Mupashi Wazhila byo Engila mu Kufikizha Nkebelo ya Yehoba

‘Byambo byami bilupuka mu kanwa kami ... bikalumbulukila mu kyonkakya kintu kyo nebitumijile.’—ISA. 55:11.

1. Lumbululai lupusano luji pa mulanguluko ne nkebelo.

FWANYIKIZHAI kuba’mba banabalume babiji babena kunengezha lwendo lwa kuya na motoka, awu na wanji awu na wanji. Umo wanemba mulanguluko wanji pa kipepala byo asa kwenda kufika ko abena kuya. Mukwabo wayukatu ko abena kuya, kabiji wayuka ne mikwakwa yavula mwakupichila. Winengezha kwingijisha mukwakwa ungi kwesakanatu na bintu byo biji. Kino kyakumwenako kya bano banabalume babiji kimwesha lupusano luji pakachi ka mulanguluko ne nkebelo. Mulanguluko uji nobe mapu o mwalenga a kwimutangijila ku mpunzha ko mubena kukeba kuya, pa kuba nkebelo ilumbulula kuyuka kwine kuntu ko mubena kuya pano bino saka mwayuka ne mashinda akwabo a kwingijisha.

2, 3. (a) Nkebelo ya Yehoba yavwangamo ka, kabiji waubilepo byepi pa mambo akolomwenwe kimye ba Adama ne Evwa kyo balengele mambo? (b) Mambo ka o twafwainwa kuteshako muchima ku bibena kufikizhiwa nkebelo ya Yehoba?

² Umvwe Yehoba ke obe kyaswa muchima wanji, wingila na nkebelo kechi milanguluko ne. (Efi. 3:11) Ino nkebelo yavwangamo kufikizhiwa kwa mulanguluko wajinga na Yehoba ku ntendekelo pa mambo a bantu ne ntanda, ko kuba’mba ino ntanda kwikala paladisa mwakwikala bantu balumbuluka mu mutende ne lusekelo myaka ne myaka. (Nte. 1:28) Ba Adama ne Evwa byo balengele mambo, Yehoba wabikileko lunengezho lwa kufikizhizhamo nkebelo yanji. (Tangai Ntendekelo 3:15.) Yehoba waambile amba mukazhanji wakifwanyikizho ukasema [“lukunwa,”NW] nangwa amba Mwana ukonauna Satana ne kufumyapo bintu byanji byonse byatama byo auba.—Hebe. 2:14; 1 Yoa. 3:8.

³ Kafwako bya mwiulu nangwa bya panopantanda biji na bulume bwa kukanya nkebelo ya Lesa kubula kufikizhiwa ne. (Isa. 46:9-11) Mambo ka o twakonsha kwambila bino? Mambo Yehoba wingijisha mupashi wanji wazhila. Buno bulume bukatampe bwitulengela kuketekela amba nkebelo ya Lesa ‘ikafikizhiwa.’ (Isa. 55:10, 11) Twafwainwa kuteshako muchima ne kubila bintu monka mwayila nkebelo ya Lesa. Bwikalo bwetu bwa kulutwe bwaimena pa kufikizhiwa kwa ino nkebelo. Kunungapo, lwitabilo lwetu lukosa bingi umvwe twamona Yehoba byo engijisha mupashi wanji wazhila. Pano twayai tumone uno mupashi byo aingijile mu kimye kya kunyuma, byo engila luno kabiji ne byo akengila mu kimye kya kulutwe mu kufikizha nkebelo ya Yehoba.

Mupashi Wazhila byo Aingilanga Kala

4. Yehoba usolola byepi nkebelo yanji pachepache?

⁴ Kimye kya kala, Yehoba wasololanga nkebelo yanji pachepache. Patanshi, kuyukanyikwa kwa Lukunwa walayilwe kwajinga ‘kyafyamika.’ (1 Ko. 2:7) Byo papichile myaka nobe 2,000 Yehoba waambile jibiji pa uno lukunwa. (Tangai Ntendekelo 12:7; 22:15-18.) Yehoba walayile Abalahama mulaye ukafikizhiwa pakatampe. Byambo bya kuba’mba ‘monka mu ba mu lukunwa wobe’ byamwesheshe kuba’mba Lukunwa wa mu kisemi kya kwa Abalahama ukeya mu bumuntu. Twakonsha kusumininwa kuba amba Satana wamwenengako bino byonse byo byasolwelwenga. Kwakubula nangwa kuzhinaukatu ne, uno Mulwanyi wasakilenga konauna kisemi kya kwa Abalahama ne kulengela nkebelo ya Lesa kubula kufikizhiwa. Pano bino wapulwijilemotu mabula, mambo mupashi wa Lesa ubula kumweka waingijilenga. Mu ñanyi mashinda?

5, 6. Yehoba waingijishe byepi mupashi wanji kuzhikijila ba mu kisemi mwasemekejilwe Lukunwa?

⁵ Yehoba waingijishe mupashi wanji kuzhikijila bantu ba mu kisemi mwasemekejilwe Lukunwa. Yehoba waambijile Abulama (Abalahama) amba: “Amiwa yami jikebo jobe.” (Nte. 15:1) Bino byambo kechi byajinga bya bubela ne. Kyakumwenako, monai kyamwekele nobe mu 1919 B.C.E. ba Abalahama ne Sala byo bakekeleko pa kimye kicheche mu Gelala. Byo abujile kuyuka kuba’mba Sala wajinga muka Abalahama, Abimeleki, mfumu wa ku Gelala wasendele Sala na mulanguluko wa kuba’mba akekale mukazhanji. Nanchi Satana ye wamulengejile kuba bino, kukeba kulengela Sala kubula kusemena Abalahama lukunwa nyi? Baibolo kechi waambapo bino ne. Kyo etubulakotu ke kya kuba’mba Yehoba ye wakwashañene. Wamujimwine Abimeleki mu kiloto kubula kukwata Sala.—Nte. 20:1-18.

⁶ Kino kechi kyo kyonkatu kimye Yehoba kyo ebakwashishe ne. Yehoba wakwashishe Abalahama ne kisemi kyanji pa bimye byavula. (Nte. 12:14-20; 14:13-20; 26:26-29) Pa mambo a kwa Abalahama ne ba mu kisemi kyanji, nyimbi wa masalamo waambile’mba: “[Yehoba] kechi walekele nangwa muntu umo kwiboba kibi ne; Ee kine, wibalengulwile bamfumu pa mambo a abo, Amba, Kechi mukwateko ku bami bashingwa manyi ne, Ne kwiboba kibi bañambi bami ne.”—Sala. 105:14, 15.

7. Mu mashinda ka Yehoba mo azhikijile mukoka wa bena Isalela?

⁷ Yehoba waingijishe mupashi wanji kuzhikijila mukoka wa kala wa bena Isalela, mwasemekejilwe Lukunwa walayilwe. Kupichila mu mupashi wanji, Yehoba wapele bena Isalela Mizhilo yanji, yalamine mpopwelo ya kine ne kuzhikijila Bayudea ku mupashi, mu byubilo ne ku mubiji. (Lupu. 31:18; 2 Ko. 3:3) Mu kimye kya Bamitonyi, mupashi wa Yehoba wakoseshe banabalume bamo kupokolola bena Isalela ku balwanyi babo. (Mito. 3:9, 10) Mu myaka yanangijilenga ku kusemwa kwa kwa Yesu, awo wajinga lubaji lutanshi lwa lukunwa wa kwa Abalahama, mupashi wazhila wafwainwa wazhikijilenga Yelusalema, Betelema ne nzubo ya Lesa, bino byonse byaingijileko lubaji mu kufikizha bungauzhi bwaamba pe Yesu.

8. Ki ka kimwesha amba mupashi wazhila waingijile bingi mu bwikalo ne mu mwingilo wa Mwana Lesa?

⁸ Mupashi wazhila waingijile bingi mu bwikalo ne mu mwingilo wa kwa Yesu. Uno mupashi wazhila byo aingijilenga munda ya kwa Maliya muzhike wa kishinka wabujile kusambakanapo na mwanamulume, waingijile mwingilo wabaya ukyangye kwingijiwapo kala kabiji kechi ukengijiwapo jibiji ne. Kino kyalengejile uno mwanamukazhi kwimita ne kusema Mwana wamulume walumbuluka, awo wabujile kuswana lufu. (Luka 1:26-31, 34, 35) Kabiji mupashi wazhikijile Yesu byo akijinga lukeke kubula kumwipaya bukiji. (Mat. 2:7, 8, 12, 13) Yesu byo ajinga na myaka ya kusemwa 30, Lesa wamushingile na mupashi wazhila, kumutongola kwikala nswanyi pa jitanda ja kwa Davida ne kumupa mwingilo wa kusapwila. (Luka 1:32, 33; 4:16-21) Mupashi wazhila wapele Yesu bulume bwa kuba bya kukumya, kuvwangakotu ne kubuka bakolwa, kujisha mabumba ne kusangula bafwa. Bino byubilo bya kukumya byamwesheshenga mapesho o twakonsha kuketekela kwiyowa mu bukalama bwa kwa Yesu.

9, 10. (a) Mupashi wazhila waingijile byepi pa baana ba bwanga ba kwa Yesu ba mu myaka kitota kitanshi? (b) Ñanyi jishinda jayukanyikilwe mu myaka kitota kitanshi C.E. Yehoba jo afikizhizhemo nkebelo yanji?

⁹ Kutendekatu pa Pentekosita mu 33 C.E., Yehoba waingijishenga mupashi wanji kushinga bakwabo ba mu lukunwa wa kwa Abalahama, bavula babujile kusemenwa mu kisemi kya kwa Abalahama. (Loma 8:15-17; Nga. 3:29) Mupashi wazhila waingijilenga ne mu baana ba bwanga ba kwa Yesu ba mu myaka kitota kitanshi, kwibakwasha kusapwila na kizaku ne kwibapa bulume bwa kuba mingilo ya kukumya. (Byu. 1:8; 2:1-4; 1 Ko. 12:7-11) Kuno kutambwila bya bupe bya kuba bya kukumya, kwamwesheshenga jishinda jikwabo Yehoba jo akafikizhizhamo nkebelo yanji. Yehoba kechi wakebelenga bantu kumupopwela kwesakana na jishinda jo abikileko jo bamupopwelangamo kala ne. Wavilwijile bibusa byanji pa kipwilo kya bena Kilishitu kyakatataka. Kufumatu kimye kyo aubile bino, Yehoba watwajijila kwingijisha kipwilo kyashingwa kufikizhizhamo nkebelo yanji.

¹⁰ Kuzhikijila, kupana bulume, kushingañana na mupashi, ke mashinda amo Yehoba mo aingijishe mupashi wanji wazhila mu kimye kya kala kutwajijila kufikizhizhamo nkebelo yanji. Nga lelo jino kiji byepi? Yehoba ubena kwingijisha byepi mupashi wanji kubilamo nkebelo yanji? Twafwainwa kuyuka, mambo tukeba kubila bintu monka mwayila uno mupashi. Pano twayai twisambe pa mashinda ana Yehoba mo abena kwingijishisha mupashi wanji lelo jino.

Mupashi Wazhila byo Engila Lelo Jino

11. Ki ka kimwesha amba mupashi wa Lesa ye ukwasha bantu ba Lesa, kabiji mwakonsha kumwesha byepi amba mubena kutangijilwa na mupashi?

¹¹ Kitanshi, mupashi wazhila ukwasha bantu ba Lesa kwikala na byubilo byawama. Aba bamwingijila kwesakana na kyaswa muchima wanji bafwainwa kwikala na byubilo byawama. (Tangai 1 Kolinda 6:9-11.) Bamo saka bakyangye kwikala bena Kilishitu bakine bevwanganga mu byubilo byatama nabiji bulalelale, bukende, kabiji ne kwilaala banabalume nangwa banabakazhi bonka bonka. (Yako. 1:14, 15) Pano bino bano bantu ‘bebovwa,’ kumwesha kuba amba bapimpula bwikalo bwabo pa kuba’mba basangajikenga Lesa. Ki ka kilengela boba batemwa Lesa kushinda ndangulukilo yatama? Pa 1 Kolinda 6:11 paamba amba: “Mupashi wa Lesa wetu.” Umvwe mwatwajijila kwikala na byubilo byawama, mumwesha amba uno mupashi ye ubena kwimukwasha kwikala na byubilo byawama.

12. (a) Kwesakana na kimwesho kyamwene Ezikyo, Yehoba utangijila byepi jibumba janji? (b) Mwakonsha kumwesha byepi amba mubena kuba bintu monka mwayila mupashi?

¹² Kya bubiji, Yehoba wingijisha mupashi wanji kutangijila jibumba janji monka mo akebela. Mu kimwesho kyamwene Ezikyo, lubaji lwa mwiulu lwa jibumba ja Yehoba belumwesheshe kwikala kalaki wa mwiulu watwajijila kufikizha nkebelo ya Yehoba. Ki ka kilengela uno kalaki kutangijilwa bulongo? Mupashi wazhila. (Ezi. 1:20, 21) Twayai tuvulukenga kuba’mba jibumba ja Yehoba jiji na mbaji ibiji, lubaji lumo luji mwiulu kabiji lubaji lukwabo luji panopantanda. Umvwe lubaji lwa mwiulu belutangijila ku mupashi wazhila, ko kuba’mba ne lubaji lwa panopantanda nalo belutangijila ku uno yenka mupashi. Byo mukokela ne kwikala bakishinka ku lutangijilo lwa lubaji lwa panopantanda lwa jibumba ja Lesa, mumwesha amba mubena kwendela pamo na kalaki wa mwiulu wa Yehoba kabiji ne kuba bintu monka mwayila mupashi wanji wazhila.—Hebe. 13:17.

13, 14. (a) Bañanyi balenga ‘kino kisemi’ kyaambilepo Yesu? (b) Ambaipo kyakumwenako kimwesha amba mupashi wazhila wingila kwitukwasha kumvwisha bukine bwa mu Baibolo. (Monai kakitenguluzha ka kuba amba “Nanchi Mubena Kwendela Pamo na Kyeya Kibena Kuya na Kusama Nyi?”)

¹³ Kya busatu, Yehoba wingijisha mupashi wazhila kwitukwasha kumvwisha bukine bwa mu Baibolo. (Mana 4:18) ‘Kalume wakishinka kabiji wa maana’ waingijisha ino magazini pa kimye kyabaya kwikala jishinda ja kusolwelamo bukine bwa mu Baibolo. (Mat. 24:45) Kyakumwenako, akilangulukai pa boba balenga ‘kino kisemi’ kyaambilepo Yesu. (Tangai Mateo 24:32-34.) Yesu waambilenga pa ñanyi kisemi? Mutwe wa kuba amba, “Kwikalapo kwa kwa Kilishitu Kulumbulula ka kwi Anweba?” walondolwele ku ba’mba Yesu kechi waambilenga pa bantu babi ne, pakuba waambilenga pa baana banji ba bwanga, bajingatu pepi kushingwa na mupashi wazhila.a Baana ba bwanga bashingwa ba kwa Yesu ba mu myaka kitota kitanshi ne ba mu ano moba etu, bo bonkatu bafwainwa kumona ne kuyuka mwatala kiyukilo kya kuba’mba Yesu “kaji pepi, ponka pa kibelo.”

¹⁴ Ino ndumbulwilo yatala mwepi kwi atweba? Nangwa kya kuba kechi twakonsha kuyuka kulepa kwa kimye kikekalako ‘kino kisemi’ ne, bino twafwainwa kuyuka bintu byavula pa kyambo kya kuba amba “kisemi.” Kino kyambo javula kingila ku bantu ba myaka yapusana pusana bekalako pa kimye kimo; kino kechi kimye kyalepeshatu ne, kabiji kiji ne na mpelo. (Lupu. 1:6) Pano twakonsha kumvwisha byepi byambo bya kwa Yesu bya kuba’mba ‘kino kisemi’? Kyamweka walumbulwilenga kuba’mba bashingwa bajingako kimye kyatendekele kumweka kiyukilo mu 1914 bakekala bomi kimye kikashingwa bakwabo bakamonako malwa akatampe byo akatendeka. Kino kisemi kyajinga na ntendekelo kabiji kikekala ne na mpelo. Kufika kwa mbaji yapusana pusana ya kiyukilo kya moba a kupelako kumwesha kuba’mba malwa akatampe ajitu pepi. Kupichila mu kutwajijila kulaba ne kukenketa, mumwesha amba mubena kwendela pamo na kyeya kibena kuya na kusama ne kulondela lutangijilo lwa mupashi.—Mako 13:37.

15. Ki ka kimwesha kuba’mba mupashi wazhila ye witupa bulume bwa kusapwila mambo awama?

¹⁵ Kya buna, mupashi wazhila witupa bulume bwa kusapwila mambo awama. (Byu. 1:8) Kintu ka kikwabo kyakonsha kulumbulula bibena kusapwilwa mambo awama mwaya ntanda? Akikilangulukai. Kampe ne anweba muji pa boba balangulukanga kuba’mba ‘kechi nakonsha kusapwila ku nzubo ku nzubo ne,’ na mambo a bumvu ne moyo. Pano luno mubena kwingilako pakatampe mu uno mwingilo.b Bakamonyi ba kwa Yehoba bakishinka bavula batwajijila kusapwila nangwa kya kuba bebakanya ne kwibamanyika. Mupashi wazhila ye yenkatu wakonsha kwitupa bulume bwa kushinda mikiika kabiji ne kuba bintu byo tumona nobe kechi twakonsha kwibyuba na bulume bwetu ne. (Mika 3:8; Mat. 17:20) Kupichila mu kwingilako pakatampe mu mwingilo wa kusapwila, mumwesha amba mubena kutangijilwa na uno mupashi.

Mupashi Wazhila byo Akengila mu Kimye kya Kulutwe

16. Mambo ka o twakonsha kuketekela kuba’mba Yehoba ukazhikijila bantu banji mu kimye kya malwa akatampe?

¹⁶ Kulutwe na lwendo, Yehoba ukengijisha mupashi wanji wazhila mu mashinda a kukumya kufikizha nkebelo yanji. Patanshi akilangulukai pa mambo a luzhikijilo. Byonka byo twamona, mu kimye kya kunyuma Yehoba waingijishe mupashi wanji kuzhikijila bantu ne kukoka yense wa bena Isalela. Onkao mambo, tuji na bishinka byavula bya kuketekela kuba’mba ukengijisha yenka uno mupashi wanji wa bulume kuzhikijila bantu banji mu kimye kya malwa akatampe abena kwiya. Kechi twafwainwa kufwanyikizha jishinda jiketuzhikijilamo Yehoba pa kyokya kimye ne. Twafwainwa kwikala na luketekelo mu bintu bya kulutwe, ne kuyuka kuba’mba aba bamutemwa Yehoba kechi ukebavulama ne, ukebatangijilanga na mupashi wanji wazhila.—2 Moba 16:9; Sala. 139:7-12.

17. Yehoba ukengijisha byepi mupashi wanji wazhila mu ntanda ipya?

¹⁷ Yehoba ukengijisha byepi mupashi wazhila mu ntanda ipya ibena kwiya? Mupashi ye ukatangijilanga pa mambo a yoya mivungilo yakatataka yo bakazhikula pa kyokya kimye. (Lum. 20:12) Mu ino mivungilo mukekala ka? Mukekala byambo bya kwa Yehoba biketukwashanga kuyuka bya kuba mu myaka kiumbi kimo. Nanchi ne anweba mutonga kubalaula bintu bikekala mu ino mivungilo nyi? Tubena kutengela bingi ino ntanda ipya. Kikawama bingi pa kyokya kimye Yehoba byo akengijisha mupashi wanji wazhila kufikizha nkebelo yanji pa mambo a ntanda ne bantu.

18. Mwafwainwa kutwajijila kuba ka?

¹⁸ Kechi twafwainwa kulubamo kuba’mba nkebelo ya Yehoba ikafika ne, mambo wingijisha mupashi wanji wazhila, ko kuba’mba bulume bukatampe mu kulengwa konse kufikizhizhamo ino nkebelo. Ino nkebelo yavwangamo ne anweba. Onkao mambo, twajijilai kulomba Yehoba kwimupa mupashi wanji ne kuleka uno mupashi kwimutangijila. (Luka 11:13) Umvwe mwauba bino, mwakonsha kwikala na luketekelo lwa kwikala mu Paladisa panopantanda myaka ne myaka kwesakana na nkebelo ya Yehoba pa mambo a bantu.

[Tubyambo twa mushi]

Mukivuluka Nyi?

•Mu ñanyi mashinda Yehoba mo aingijishe mupashi wanji wazhila mu kimye kya kala kutwajijila kubilamo nkebelo yanji?

•Yehoba ubena kwingijisha byepi mupashi wanji lelo jino?

•Yehoba ukengijisha byepi mupashi wanji mu kimye kya kulutwe kufikizhizhamo nkebelo yanji?

[Kitenguluzha pa peja 10]

Nanchi Mubena Kwendela Pamo na Kyeya Kibena Kuya na Kusaminako Nyi?

Yehoba watwajijila na kusamisha kyeya pa bantu banji. Lupimpu ka lwakatataka lwanembwa mu Kyamba kya Usopa?

▪Kishimpi kya kwa Yesu pa mambo a mbizho kitufunjisha lufunjisho ka lwanema pa mambo a kukomenako ku mupashi? (Mat. 13:33)—Kyamba kya Usopa kya July 15, 2008, mapa 19-20.

▪Nga lwito lwa bena Kilishitu lwa kuya mwiulu lukapwa kimye ka?—Kyamba kya Usopa kya January 15, 2008, mapa 22-24.

▪Kupopwela Yehoba “na mupashi” kulumbulula ka? (Yoa. 4:24)—Kyamba kya Usopa kya August 1, 2002, jipa 12.

▪Jibumba jikatampe jingijila mu lubanza ka? (Lum. 7:15)—Kyamba kya Usopa kya September 1, 2006, jipa 25.

▪Kwabanya kwa mikooko ne bambuzhi kukobiwa kimye ka? (Mat. 25:31-33)—Kyamba kya Usopa kya Kibemba kya October 15, 1995, mapa 18-28.