Nanchi Mukivuluka Nyi?

Nanchi mwamwenamo mu kutanga magazini a Kyamba kya Usopa akatataka nyi? Monai inge mwakonsha kukumbula ano mepuzho:

•Mambo ka Mesiasa o afwijile?

Lufu lwa kwa Yesu lwamwesheshenga kuba’mba muntu walumbuluka wakonsha kutwajijila kwakamwa Lesa kechi na mambo a meseko akatampe o akonsha kupitamo ne. Kabiji wipaine kufwa pa kuba’mba akuule baana ba kwa Adama ku bundengamambo bo baswaine, kwibashinkwila jishinda ja ku bumi bwa myaka.—12/15, mapa 22-23.

•Kwisamba na baana bulongo kwavwangamo ka?

Kwisamba na baana kwavwangamo kwibepuzha mepuzho ne kutelekesha ku mikumbu yabo. Bavula batana kuba’mba kimye kya kuja kyo kyawama kwisambilamo.—1/15, mapa 18-19.

•Bintu ka byakonsha kulengela muntu kulangulukapo kubatizwa jibiji?

Kino kyakonsha kubiwa umvwe pa kimye kyo akebelenga kubatizwa, kampe awo muntu waubilengapo bintu bimo byatama mu bufyamfya abyo byakonsheshe kumulengela kumupanga mu kipwilo inge kya kuba wajinga wabatizwa kala pa kyokyo kimye.—2/15, jipa 22.

•Mu kishimpi kya kwa Yesu kya kajo ne bincha, kukusa nangwa kubyala nkunwa yawama kwimenako ka?

Mwana muntu, Yesu, wanengezhezhe bujimi kimye kyo aingijilenga mwingilo wanji panopantanda. Kufumatu pa juba ja Pentekosita mu 33 C.E. kuya ne kulutwe, nkunwa yawama yabyajilwenga bena Kilishitu byo bashingilwenga kwikala baana ba Lesa, ko kuba’mba baana ba mu Bufumu.—3/15, jipa 20.

•Kajo ka kifwanyikizho mu kishimpi kya kwa Yesu kabena kulongwa byepi mu butala bwa Yehoba? (Mat. 13:30)

Kufikizhiwa kwa buno bungauzhi kwaubiwa pa kimye kyabaya mu kino kimye kya ku mpelo. Baana bashingwa ba mu Bufumu, bemenwako na kajo ka kifwanyikizho, babena kulongwa mu butala bwa Yehoba byo beya mu kipwilo kya bena Kilishitu kyalengwa jibiji nangwa amba byo batambwila mfweto yabo ya mwiulu.—3/15, jipa 22.