‘Teshai Muchima . . . mu Kwibafunjisha’

“ANWEBA muntela amiwa amba, Mufunjishi, kabiji’mba, Nkambo: mwaamba bulongo; mambo byo byo nji.” (Yoa. 13:13) Byo aambile bino byambo ku baana banji ba bwanga, Yesu wamwesheshe mwingilo ye engila wa bufunjishi. Kabiji byo kwakishajile kakimye kacheche kuba’mba aye mwiulu, Yesu wakambizhe baana banji ba bwanga amba: ‘Onkao mambo yainga na kwibasambisha ba mu mikoka yonse ya bantu baluke ke baana ba bwanga, . . . ne kwibafunjisha balamenga byonse byo nemukambizhe.’ (Mat. 28:19, 20) Palutwe kacheche, mutumwa Paulo naye wamwesheshe buneme bwa kwikala bafunjishi ba Mambo a Lesa. Watundaikile mukulumpe wa bwina kilishitu mu kipwilo aye Timoti amba: “Tesha muchima mu kutanga, ne mu kwibakosesha ne mu kwibafunjisha. . . . Kasa ubisha bino bintu; wikale monka mwi abyo; amba, kuya palutwe kobe kumweke ku bonse.”—1 Timo. 4:13-15.

Byonkatu byo kyajinga kala, ne lelo jino kufunjisha ke kintu kyanema bingi mu mwingilo wa mu bujimi ne pa kupwila kwetu kwa bwina Kilishitu. Twakonsha kutwajijila byepi kutesha muchima ku kufunjisha, kabiji kino kiketukwasha byepi kuyilako palutwe mu kwikala bafunjishi ba Mambo a Lesa?

Londelainga Mufunjishi Wayukisha

Bantu bavula batemenwe bingi jishinda jafunjishishangamo Yesu. Akimonai byaubilenga bantu baumvwanga byambo byo afunjishanga baiyanga ku nshinagoga wa ku Nazala. Nembi wa Mambo Awama aye Luka wanembele amba: “Bonse bamutakaikilenga, bakuminyenga byambo bya bupe byafuminenga mu kanwa kanji.” (Luka 4:22) Baana ba bwanga ba kwa Yesu basapwijilenga byonka byaubilenga Nkambo yabo. Kya kine, mutumwa Paulo watundaikile bena Kilishitu bakwabo amba: “Ikalai ba kundondela amiwa, pamo byonka byo nji amiwa wa kumulondela Kilishitu.” (1 Ko. 11:1) Na mambo a kulondela mashinda a kwa Yesu, Paulo wayukile bingi bya ‘kufunjisha patoka, ne ku nzubo ku nzubo.’—Byu. 20:20.

Kufunjisha ‘pa Kisankanyi’

Kyakumwenako kyawama kya kwa Paulo kya kufunjisha kitanwa mu Byubilo kitango 17. Muno tutangamo pa mambo a byo ayile mu Atene, ku Greece. Monse mwapichile Paulo mu yewa muzhi, ko kuba amba, mu mikwakwa ne mu mapunzha mwatanwanga bantu watainengamo bankishi. O ene mambo Paulo o azhingijile! Nangwa byonkabyo, kechi wazhingijile kikupu ne. Pakuba, ‘waipuzhañenenga mu nshinagoga . . . ne pa kisankanyi napo na bantu bo asambakenengapo pa juba pa juba.’ (Byu. 17:16, 17) Kino kyakumwenako byo kyawamapo kwi atweba! Kupichila mu kwisamba mu mushingi na bantu bapusana pusana, kwakubula kwibazhachisha, mu kuya kwa kimye bamo bakonsha kufuma mu buzha bwa mpopwelo ya bubela.—Byu. 10:34, 35; Lum. 18:4.

Paulo watananga bantu mu bisankanyi bakananga kutambwila bukine. Pa bano bantu pajinga batemwamaana bajinga na ndangulukilo yapusana na bukine bo asapwijilenga. Umvwe Paulo wamona kuba’mba bantu bo abena kwisamba nabo babena kumupachika, watelekanga ku byo baambanga. Bamo bamutelelenga amba “kyabauki.” Bakwabo nabo amba: “Wauba nobe usapula balesa bangi.”—Byu. 17:18.

Nangwa byonkabyo, Paulo kechi walefwilwe na byambo byatama bya bantu bamutelekelenga ne. Byo bamwambijile kulumbulula mafunjisho anji, Paulo waingijishe jino jishuko kwamba jashi jawama jamwesheshe amba wayukile kufunjisha. (Byu. 17:19-22; 1 Pe. 3:15) Twayai tumone bulongo jashi janji byo jajinga ne kufunjilako byo twakonsha kuwamishako busendwe bwetu bwa kufunjisha.

Ambai pa Bintu Byakonsha Kutemwa Bantu bo Mubena Kwisamba Nabo

Paulo waambile amba: ‘Anweba bena Atene, mu bintu byonse namona byo mwakizhamo kupandawila balesa. Mambo byo . . . namwene bintu byo mupopwela, nataine kipandawilo kiji ne kino kinembelo amba, Kwi Lesa Wabula Kuyukanyika. Nanchi aye ye mupopwela pa kubula kumuyuka, i ye ye nemusapwila.’—Byu. 17:22, 23.

Paulo watele bingi muchima ku bintu byo amwenenga. Bino bintu byo amwenenga byamukwashishe kuyuka byavula bingi pa mambo a boba bo esambanga nabo. Ne atweba twakonsha kuyuka byavula pa mambo a mwina nzubo umvwe twatako muchima kumona bintu byo biji. Kyakumwenako, tubintu twakukaisha banyike tuji pa lubanza nangwa biyukilo pa kinzhilo byakonsha kwitulengela kuyuka byavula. Umvwe twayukako biji bwikalo bwa mwina nzubo, twakonsha kusala bulongo byambo bya kwamba ne kuyuka mwa kwibyambila.—Kolo. 4:6.

Paulo kechi waambanga byambo bya kuzhachisha bantu ne. Nangwa byonkabyo, wamwene kuba amba bena Atene kechi ‘banemekele Lesa’ kya kine ne. Paulo wibabujile bulongo byo bafwainwe kupopwela Lesa wa kine. (1 Ko. 14:8) Kyanema bingi kwi atweba kwamba byambo byawama kabiji byaumvwanyika kimye kyo tubena kusapwila mambo awama a Bufumu!

Yukainga bya Kuba na Bintu ne Kubula Kutala ku Bilungi

Paulo watwajijile kwamba amba: “Lesa, yenkaye walengele ntanda ne byonsetu bijimo, byo aji Mwine wa mwiulu ne panshi, kechi wikala mu mazubo azhila o bashimika na maboko ne; kabiji nangwa kwingijilwa na maboko a bantu, nobe wakajilwa kintu ne, byo aji Mwine upana mweo ku bonse, ne muya, ne bintu byonse.”—Byu. 17:24, 25.

Pa kwamba bino byambo, Paulo wamwesheshe amba Yehoba ye Upana Bumi, kabiji wayukile mwakwambila bino, byo aambile pe aye amba ye “Mwine wa mwiulu ne panshi.” Ke jishuko bingi kukwasha bantu ba michima yakishinka bafuma mu bupopweshi ne nkomeno yapusana pusana kumvwisha kuba amba Yehoba Lesa ye mwina bumi bonse!—Sala. 36:9.

Kabiji Paulo waambile amba: ‘Kabiji walengele ku umo mikoka yonse ya bantu, . . . ne kwibatongwela myaka yabo, ne mipaka ya kwikalamo; amba bamukebe Lesa, kana kampe bakapampante na kumukeba ne kumutana, kabiji byonkabyo kechi uji kwalepa ne atweba bonse ne.’—Byu. 17:26, 27.

Mfunjishisho yetu yakonsha kumwesha biji Lesa ye tupopwela. Kwakubula kutala ku bilungi, Yehoba waswisha bantu ba mu mikoka yonse ‘kupampanta na kumukeba ne kumutana.’ Ne atweba twisamba na bantu bonse kwakubula kutala ku bilungi. Tukeba kukwasha boba baitabila mwi Mulenga kwikala na bulunda bwakosa ne aye bwakonsha kwibakwasha kutambula mapesho a myaka. (Yako. 4:8) Pano twakonsha kukwasha byepi boba bazhinauka kuba’mba kana Lesa ko aji nyi? Tulondela kyakumwenako kya kwa Paulo. Akimonai byambo bikwabo byo aambile.

“Mwi aye mo mo tumwena bumi bwetu, mo mo tupitañena, mo mo twikela: monka mo baambile bamo benu banembele nyimbo, amba, Mambo atweba twi ba mu kisaka kyanji. Byonkabi byo tuji ba mu kisaka kya Lesa, kechi twafwainwa kulanguluka’mba, buLesa bwapashañana na ngolode, nangwa siliva, nangwa jibwe” ne.—Byu. 17:28, 29.

Pa kuba’mba bantu bomvwe byo aambile, Paulo waingijishe byambo bya mu nyimbo byayukile bena Atene byo baingijishanga. Ne atweba tukeba kwamba bintu byo bayukila jimo bantu byo twayuka kuba’mba basakwibyumvwa. Kyakumwenako kyaambile Paulo mu nkalata yo anembejile Bahebelu kyakonsha kwitukwasha kufika bantu pa michima ne lelo jino. Waambile amba: “Mazubo onse aji ne beashimika; kabiji aye washimika byonse ye Lesa.” (Hebe. 3:4) Kukwasha mwina nzubo kulanguluka pa kino kyakumwenako kwakonsha kumukwasha kuyuka bukine bwa bintu byo twamba. Mu jashi jaambile Paulo muji kintu kikwabo kyakonsha kwitukwasha kufunjisha bulongo.

Mweshai Kupwa kwa Kimye kyo Tujimo

Paulo waambile amba: ‘Kabiji aya myaka ya bulubi aye Lesa [wa kine] walekayo; pakuba pano ubena kukambizha bantu bonse konse konse amba balapile: mambo aye watongola juba jo akebachibilamo mambo ba panopantanda monka mu bololoke, konka ku yewa muntu ye atongola.’—Byu. 17:30, 31.

Lesa byo aswisha bubi kutwajijila pa kakimye kacheche, witupa atweba bonse jishuko ja kumumwesheshamo biji mu michima yetu. Kyanema bingi kwi atweba kwamba pa kimye kyo tujimo byo kyakepa ne kwamba na kusumininwa pa mapesho a mu bukalama bwa Bufumu ajitu pepi kutambwilwa.—2 Timo. 3:1-5.

Bamo Baswa Kabiji Bakwabo Bakana

“Kabiji byo baumvwine mambo a lusanguko lwa mu bafu, bamo ke bamuseke mwenga; kabiji bakwabo amba, Tukemumvwa ne jibiji mambo a ano mambo. Kepo Paulo alupukilemo mo baji. Pakuba banabalume bamo balamachile kwi aye.”—Byu. 17:32-34.

Bamo bafikena kumvwa bintu byo tufunjisha, bino bakwabo nabo papita kimye pa kubatu’mba bomvwishe mo tubena kulumbulwila. Pano umvwe kya kuba twakwasha muntu kuyuka maana a Yehoba na mambo a kumulumbulwila bukine mu jishinda japela, tumusanchila bingi Lesa pa kwitwingijisha kukwasha bantu kuyuka Mwananji.—Yoa. 6:44.

Mafunjisho o Twakonsha Kufunjilako

Byo tulanguluka pa jashi jaambile Paulo, twakonsha kufunjilako byavula bingi pa mambo a byo twakonsha kulondolola bukine bwa mu Baibolo ku bantu. Umvwe twaikala na jishuko ja kwamba majashi a mvula bantu mu kipwilo, twakonsha kwibikako kulondela byaubilenga Paulo kupichila mu kuyuka mwakwambila byambo byakonsha kukwasha bantu babula mu lwitabilo pa kuba’mba bomvwishe ne kufunda bukine bwa mu Baibolo. Tukeba kufunjisha buno bukine mu jishinda japela kumvwa, pano bino kechi tukeba kwamba byambo bya kuzhachisha bantu babula mu lwitabilo bakonsha kutanwapo po tubena kwambila ne. Kabiji mu mwingilo wetu wa kusapwila, tukebesha kwitabisha bantu ne kuyuka mwakwisambila nabo. Umvwe ketube bino, ko kuba’mba tubena kulondela kya kine lujimuno lwa kwa Paulo lwa ‘kutesha muchima mu kufunjisha.’

[Kipikichala pa peja 30]

Jishinda jo afunjishishangamo Paulo japelele kumvwa, kabiji wayukile mwakwambila

[Kipikichala pa peja 31]

Tuba byaubanga Paulo kupichila mu kuyuka bibena kwiumvwa bantu bo tusapwila