Fwenyai Kwipi Ne Lesa
“Amiwa, Yehoba Lesa Wobe, Nkakukwata pa Kuboko kwa Kilujo”
“PA KUKILAÑANYA mukwakwa mwavula myotoka na mwana, shetu umwambila mwananji amba: “Nkwachishe ku kuboko.” Mwana umvwe bashanji bamukwata ku kuboko, wiumvwa kuzhikijilwa, kabiji kechi upopomenwa ne. Nanchi ne anweba mu bimye bimo mukeba wa kwimukwata ku kuboko inge byakatazha bimumwekela nyi? Umvwe ibyo, byambo byanembele Isaya bisa kwimutekenesha bingi.—Tangai Isaya 41:10, 13.
Isaya wanembejile bino byambo bena Isalela. Nangwa kya kuba Lesa wamonanga mukoka wa bena Isalela amba bantu banji ‘bapatulwa,’ bino baikalanga mukachi ka balwanyi babo. (Kulupuka 19:5) Nanchi bena Isalela bafwainwe kukakilwa na moyo nyi? Yehoba watumine Isaya na kwibakosesha. Byo tusakwisambanga pa bino byambo, yukai kuba’mba bino byambo bikwasha ne bantu ba Lesa lelo jino.—Loma 15:4.
Yehoba waambile’mba: “Kuba moyo ne.” (Kyepelo 10) Buno kechi bubela ne. Yehoba walumbulula ene mambo bantu banji o bafwainwa kubujila kukakilwa na moyo mambo waambile’mba: “Mambo amiwa nji nobe.” Kechi uji kwalepa ne, ukwashañana pa kimye kyonse kyo twakebelapo bukwasho. Ukeba bantu banji kuyuka’mba uji nabo, kabiji winengezha kwibakwasha. Nanchi kino kechi kitutekenesha nenyi?
Yehoba walaya bapopweshi banji amba, “kukakilwa ne.” (Kyepelo 10) Mu Kihebelu kyambo kyo baingijisha pano kyamba pa “kubenkabenka na kukenkenta mwaya mpunzha na mambo a moyo.” Yehoba walumbulwile ene mambo o twafwainwa kubujila kukakilwa na moyo amba: “Mambo amiwa ne Lesa wobe.” Kino kintu byo kyawamapo! Yehoba ye “Mwine Wakila,” “Wa bulume bonse.” (Salamo 91:1) Mambo ka o twafwainwa kumvwinanga moyo saka tuji ne Yehoba Lesa wa bulume bonse?
Bapopweshi ba Yehoba bafwainwa kumuketekela’mba ukebobila ka? Walaya’mba: “Nkakulama na kuboko kwami kwa kilujo kwa lushinjilo.” (Kyepelo 10) Kabiji waambile ne kuba’mba: “Amiwa, Yehoba Lesa wobe, nkakukwata pa kuboko kwa kilujo.” (Kyepelo 13) Ki ka kiya mu milanguluko umvwe mwaumvwa bino byambo? Buku umo waamba’mba: “Bino byepelo byonse bibiji bitulengela kumona butemwe bukatampe nsemi bo atemwa mwananji.” Shanja baana kechi wimana kwalepa pa kuzhikijila mwananji ne, umukwata ku kuboko.” Akikifwanyikizhaitu, Yehoba kechi ukaleka kintu nangwa kimo kwimwabanya ne aye nangwatu mu bimye byakatazha ne.—Bahebelu 13:5, 6.
Byambo byanembele Isaya bibatekenesha bingi bapopweshi ba Yehoba mu ano moba. Ano moba tuji mu “bimye byakatazha.” (2 Timoti 3:1) Nangwa byonkabyo, kechi tupita mu makatazho bunke bwetu ne. Yehoba ukebesha bingi kwimukwata ku kuboko. Byonkatu biji baana baketekela bansemi babo, twayai tukwachishe ku kuboko kwanji, ne kuketekela kuba’mba usakwitutangijilanga mu jishinda jawama ne kwitukwasha mu bimye byakatazha.—Salamo 63:7, 8.