Fundainga Mambo A Lesa
Nanchi Baibolo Usolola bya Kulutwe Nyi?
Mu kino kibaba muji mepuzho kampe o mwakipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu mikumbu ya ano mepuzho.
1. Nanchi Bungauzhi bwa mu Baibolo bwaluñama nyi?
Lesa Wabulume bonse wayuka bya kulutwe. (Amosi 3:7) Kyakumwenako, kufumatu kala kene, waambijile jimo kwiya kwa Mesiasa, nangwa’mba Kilishitu. Kabiji ne kuba’mba ukekala wa mu kikota kya kwa Abalahama muntu wakishinka. Ne kwikala mfumu ukalengela bantu kwikala jibiji bulongo kwakubula kukolwa. (Ntendekelo 22:18; Isaya 53:4, 5) Uno walailwe wafwainwe kusemekelwa mu muzhi wa Betelema.—Tangai Mika 5:2.
Yesu ye waishile kwikala Mesiasa. Baibolo waambijile jimo myaka ya kala kene amba Mesiasa ukasemwa ku kisungu kabiji bakamushikwa bingi. Ukafwila bundengamambo bwa bavula kabiji bakamuzhika ku munonshi. (Isaya 7:14; 53:3, 9, 12) Baibolo waambijile ne jimo kuba’mba Yesu ukatwela mu Yelusalema pa mbongolo kabiji bakamusolola na mali a siliva makumi asatu. Bino byonse byaubiwe.—Tangai Zekaliya 9:9; 11:12.
2. Nanchi Lesa uyukila jimo moba nyi?
Myaka ya kala, Yesu saka akyangye kwikala Mesiasa, Baibolo watongwejile jimo mwaka ye akekelamo Mesiasa. Myaka yapichilepo beibajile mu milungu, ko kuba’mba ‘mulungu’ umo waimenejilengako myaka itanu na ibiji. Milungu itanu na ibiji kubikapo milungu 62, ko kuba’mba yonse pamo ke milungu 69. Ino ke myaka 483. Pano ñanyi kimye kyo batendekele kubala ino myaka? Kwesakana na byaamba Baibolo, batendekele kimye kalume wa Lesa Nehemiya kyo afikile mu Yelusalema ne kutendeka mwingilo wa kushimukulula muzhi. Mabuku a bena Pelisha mwanembwa bya kala amba’mba mwajinga mu 455 B.C.E. (Nehemiya 2:1-5) Yesu wabatizhiwe mu 29 C.E., panyuma ya kupitapo myaka 483.—Tangai Danyela 9:25.
3. Nanchi bungauzhi bwa mu Baibolo bubena kufika nyi?
Yesu waawile bungauzhi bwaamba pa bintu bikatampe bikamweka kulutwe. Bungauzhi bwanji bwatongola mambo awama a Bufumu bwa Lesa bukapwisha makatazho onse apitamo bantu batemwa Lesa pano pa ntanda ponse. Buno Bufumu bukapwisha bubi bonse bubena kubiwa mu buno bwikalo bwatama.—Tangai Mateo 24:14, 21, 22.
Bungauzhi bwa mu Baibolo bwalumbulula byonse bikamweka kimye kikafika mpelo ya buno bwikalo. Baibolo waamba kuba’mba bantu bakonaunanga ntanda nangwa mu ntanda muji bukomo. Bantu bamanama na makondo, bipowe bya nzala, ne myalo ibena kuvujilakotu. (Luka 21:11; Lumwekesho 11:18) Byubilo bya bantu bikatama. Kabiji mu moba akatazha, baana ba bwanga ba kwa Yesu bakasapwilanga mambo awama a Bufumu bwa Lesa ku mikoka yonse ya bantu.—Tangai Mateo 24:3, 7, 8; 2 Timoti 3:1-5.
4. Bantu bakekala byepi kulutwe na lwendo?
Lesa Wabulume bonse ukobila bantu bakishinka byawama. Yesu Kilishitu, Mesiasa pamo na banji basalululwa bakalaminanga ino ntanda mwiulu. Bo balenga Kafulumende wa mwiulu ukalama pa myaka kiumbi kimo. Bafwa bakasangulwa ne kwikala na bumi bwa myaka. Kabiji buno Bufumu bukapwisha bikola bya bangikazhi bonse. Bikola ne lufu kechi bikekalako jibiji ne.—Tangai Lumwekesho 5:10; 20:6, 12; 21:4, 5.
Umvwe mukeba kuyukilapo byavula, monai mapa 23-25 ne 197-201 mu uno buku ye bamwesha pano.