Baibolo Waambapo’mba ka?

Nanchi Lesa uji na jizhina nyi?

BANTU BAMO BAMBA’MBA kechi uji na jizhina ne, bakwabo bamba’mba Lesa nangwa’mba Nkambo, kabiji bakwabo nabo bamba’mba uji na mazhina avula bingi. Nga anweba mulangulukapo’mba ka?

BYAMBA BAIBOLO

“Anweba, yenka wa jizhina ja Yehoba, yenu bunketu Mwine Wakila pano pa ntanda ponse.”​—Salamo 83:18.

ÑANYI BINTU BIKWABO BYO TWAKONSHA KUFUNDA MU BAIBOLO?

• Nangwa kya kuba Lesa uji na mazhina a mushingi avula, aye mwine witumbile jizhina jimo.​—Kulupuka 3:​15.

• Lesa kechi wakatazha kumuyuka ne; ukeba’mba tumuyuke.​—Byubilo 17:27.

• Kuyuka jizhina ja Lesa kyo kintu kitanshi kyo twafwainwa kuba pa kuba’mba twikale balunda nanji.​—Yakoba 4:8.

Nanchi kyatama kutela jizhina ja Lesa nyi?

MWAKONSHA KUKUMBULA’MBA KA?

• Ee nyi?

• Ine nyi?

• Inyi amba kyaimenatu pa bintu byo biji?

BYAMBA BAIBOLO

“Kechi mwafwainwa kwingijisha jizhina ja Yehoba Lesa wenu mu jishinda jabula kufwainwa ne.” (Kulupuka 20:7) Kyatamakotu ke kwingijisha jizhina ja Lesa mu jishinda jibula kumwesha mushingi.​—Yelemiya 29:9.

ÑANYI BINTU BIKWABO BYO TWAKONSHA KUFUNDA MU BAIBOLO?

• Yesu wayukile jizhina ja Lesa kabiji wijingijishanga.—Yoano 17:25, 26.

• Lesa ukeba’mba tumutelenga pa jizhina janji.—Salamo 105:1.

• Balwanyi ba Lesa bakeba’mba bantu babule kuyuka jizhina janji.​—Yelemiya 23:27.