Izaki vandaka na bamvula 40 ntangu yandi kwelaka Rebeka. Yandi vanda zolaka yandi mingi. Na kati ya mwa bantangu, Rebeka butaka mapasa ya babakala.

Dipasa ya ntete, nkumbu ya yandi vandaka Ezawu, mpe dipasa ya zole, nkumbu ya yandi vandaka Yakobi. Ezawu vanda zolaka kutambula, mpe yandi zabaka mbote kufwa bibulu ya brusu. Kasi Yakobi vanda zolaka kuvanda na yinzo.

Na ntangu yina, kana tata me kufwa, ba vanda pesaka na mwana ya ntete ya bakala kitini ya kulutila nene ya ntoto mpe mbongo. Ba vanda bokilaka yawu dikabu to héritage. Na dikanda ya Izaki, dikabu yina mwana ya ntete zolaka kuzwa, vandaka mpe na bansilulu yina Yehova salaka na Abrahami. Ezawu vanda kipeke ve bansilulu yina, kasi Yakobi zabaka ti ya vandaka mfunu mingi.

Kilumbu mosi, na manima ya kulutisa kilumbu ya muvimba na kisalu ya yandi ya kufwa bibulu ya brusu, Ezawu vutukaka na yinzo ya kulemba mingi. Yandi kuwaka nsunga ya madya ya kitoko yina Yakobi vanda lamba mpe yandi zonzaka na yandi: ‘Mu ke na nsatu ya ngolo! Pesa munu ndambu ya supu ya mbwaki yina!’ Yakobi zonzaka: ‘Mu ke pesa nge yawu, kasi sala ntete munu nsilulu ti mu lenda kuzwa dikabu ya nge.’ Ezawu zonzaka na yandi: ‘Yinki mu ke sala na dikabu ya munu? Nge lenda baka ya nge yawu. Munu ni nsatu ya kudya ke na munu.’ Nge kanisa ti mambu yina Ezawu salaka vandaka mayela? Ve. Ezawu tekaka kima ya mfunu mingi samu na ndonga ya supu.

Ntangu Izaki kumaka ya kununa mingi, ya kumaka mpe ntangu ya kupesa lusakumunu na mwana ya yandi ya ntete ya bakala. Kasi Rebeka sadisaka Yakobi, mwana ya yandi ya zole, na kuzwa lusakumunu yina. Ntangu Ezawu zabaka yawu, yandi kuzwaka nkele ya ngolo mpe yandi kanisaka kufwa dipasa ya yandi. Samu Izaki na Rebeka vandaka na nsatu ya kubumba Yakobi, ba zonzaka na yandi: ‘Kwenda vanda na sika ya tonton ya nge Labani tii nkele ya Ezawu ke manisa.’ Yakobi kuwaka mambu yina bibuti ya yandi zonzaka mpe yandi kimaka samu na kubumba luzingu ya yandi.

Yehova zonzaka na Yakobi ti yandi ke bumba yandi kaka mutindu yandi salaka yawu samu na Abrahami na Izaki. Yakobi kwendaka vanda na kisika yina ba vanda bokilaka Arani. Kuna, yandi kwelaka, yandi kumaka na dikanda ya nene, mpe yandi kumaka na bimvwama mingi.

Na manima Yehova zonzaka na Yakobi: ‘Vutuka na bwala ya nge.’ Na yawu, Yakobi na dikanda ya yandi bandaka nzyetolo ya yinda samu na kuvutuka na bwala ya yandi. Na nzila ya kuvutuka, bantu kwizaka tala Yakobi mpe zonzaka na yandi: ‘Mpangi ya nge Ezawu ke na kwizaka na bantu 400!’ Yakobi vandaka na boma ti Ezawu sosa kutalisa yandi na dikanda ya yandi mpasi. Yandi sambilaka Yehova: ‘Mulemvo, bumba munu na maboko ya mpangi ya munu.’ Kilumbu yina landaka, Yakobi filisaka Ezawu dikabu ya mameme mingi, bankombo, bangombe, bashamo, mpe bambuluku (ânes).

Na mpimpa yina, ntangu Yakobi vandaka yandi mosi, yandi talaka mbazi mosi! Mbazi bandaka kunwana na yandi. Ba nwanaka tii na suka. Ata ti Yakobi talaka mpasi, yandi bikaka ve. Mbazi zonzaka na yandi: ‘Bika mu kwenda.’ Kasi Yakobi zonzaka: ‘Ve, mu ke bika nge kaka kana nge sakumuna munu.’

Nsuka-nsuka mbazi sakumunaka Yakobi. Awa Yakobi me zaba ti Yehova ke bika ve Ezawu talisa yandi mpasi.

Na suka yina, Yakobi talaka na ntama Ezawu na babakala 400. Yakobi tekilaka na mantwala ya dikanda ya yandi mpe fukamaka bambala 7 na mantwala ya mpangi ya yandi. Ezawu kimaka na kubwabana Yakobi mpe yandi yambaka yandi. Ba bandaka kudila mpe ba salaka kizunu. Samu na nge, yinki ya salaka Yehova na ntima na kutala faso Yakobi yidikaka mambu yayi?

Na manima ba kabukaka, Ezawu kwendaka na nzila ya yandi, mpe Yakobi mpe kwendaka na nzila ya yandi. Yakobi vandaka na bana 12. Bankumbu ya bawu vandaka Rubene, Simeyoni, Levi, Yuda, Dane, Neftali, Gadi, Azere, Izakare, Zabulone, Yozefi, mpe Benzame. Yehova soolaka Yozefi mosi ya bana ya Yakobi, samu na kuvuukisa dikanda ya yandi. Nge zaba wapi mutindu yandi salaka yawu? Beto ke zonzila yawu na disolo yina ke landa.