Seputembala

U Chala amupiye u Yesu amaka aghakumazizya intamyo zyosi. Pakabalilo ko u Yesu akabombagha iviswigho, akalangizya ukuti ali na maka gho angamazizya intamyo zyosi izya bantu zyo abene batangazimazya. Umwakufwanikizya, u Yesu ali na maka aghakutusatula ukufuma ku ntamyo zyitu, ali na maka aghakumazya intamyo iya mbibi sona chilichosi cho chikwiza ichifukwa cha mbibi zyo tukapyana ngati imbina nu bufwe. (Mata. 9.1-6; Loma 5.12, 18, 19) Iviswigho vyo u Yesu akabombagha, vikulangizya ukuti ali na maka aghakumazizya ‘ububine ubwakulekana-lekana’ nu kubazusya abafwe. (Mata. 4.23; Yoha. 11.43, 44) U Yesu ali sona na maka aghakulesya ichimpepo ichakoghofya nu kubasatula abantu ku mizimu iyibibi. (Mali. 4.37-39; Luka 8.2) Chakukazya sana ukumanya ukuti u Yehova weyo amupiye amaka u Mwana wache aghakubombela ivintu ivi! Ivintu ivyiza vyo u Chala atulayizizye mu Bumwene bwache, vikwiza pakukubombiwa naloli. Iviswigho vyo u Yesu akabombagha po akaba muntu pachisu ichapasi, vikutumanyisya ukuti akwiza pakubomba ivyakuchila vyo akabomba po akaba pachisu, ichifukwa weyo akwiza ukuba we Mwene uwa Bumwene ubwa Chala. w23.04 3 ¶5-7

Nanti muli muchipanga cho muli abantu abinji sona mukwiyivwa ukuti batakubasala nanti mwimika inyobe, vingabapangisya ukuti muyeliwe nu kuleka ukwamulapo. Loli mutakalekaghe ukwamulapo. Mwisengannyanje ifundo izyinji nanti mukwisengannya inkomano zyosi. Nanti batabasala ukuti mwamulepo kubwandilo po mukubukilila ukumanyila, mukuba ukuti muchili muli nu lusako ulwakuti mungamulapo. Nanti mukwisengannya Ichitembe cha Mulindilili Ichakumanyila, mwinong’onele mo indime yiliyosi yikukolelana nu mutu wa nkani. Nanti mukubomba bunubu inti mwaghe amaansala aghamalalusyo gho ghakwayiwa munkani. Umwakongelezyapo mungisengannya ifundo izya mu Bayibolo zyo zyakutamya pakuzilongosola. Chifukwa buli? Ichifukwa bantu badono bulo bo bangiyipa ukuti bamulepo pa ndime izyo. Nkimba mungabomba ichoni nanti batakubasala? Mungamubuzya yo akutangilila po inkomano zichili zitandite ilalusyo lyo mukulonda ukuti mwize mwamule. w23.04 21-22 ¶9-10

U Jozefu akabombezyanga ubulongozi ubwakufuma kwa Yehova, ivi vikapangisya ukuti abe umulume umwiza. Amabulendo ghatatu akapokela ubulongozi ukufuma kwa Chala ubwakukwafannya ni mbumba yache. Akabalilo kosi akivwilagha umwalubilo napo vikabonekagha ukuti vipala kukwache. (Mata. 1.20; 2.13-15, 19-21) Umwakukonka ubulongozi ubwakufuma kwa Chala, u Jozefu akamufighilila u Maliya, akamwavwanga nu kumupwelelela. Ivintu vyo u Jozefu akabombagha vikamutulagha u Maliya ukuti amughanaghe sana u Jozefu nu kumuchindika! Mwe balume, mungamuyezya u Jozefu pakubombezya ifundo izya mu Bayibolo pakupwelelela imbumba zyinyu. Nanti mukubombezya ubulongozi ubwa mu Bayibolo, napo mungalondiwa ukuti musinte ivintu vimo, mukulangizya ukuti mumughanite umuchi winyu nu kughomya isendwa yinyu. Umuyemba yumo uwa ku Vanuatu yo ikala mu sendwa ukwa myaka 20, akanena ukuti: “Nanti umulume wane akulondelezya ubulongozi ubwakufuma kwa Yehova nu kububombezya imbombo nkumuchindika sana. Nkwiyivwa kuti ne wakufighililiwa sona nkuvisubalila vyosi vyo akusala.” w23.05 21 ¶5

Abayuda bo bakanyokela ukufuma ku Babeloni bakenelagha ukuba ‘bantu abazelu’ kwa Chala wabo. (Kumbu. 7.6) Ichi chitakang’anamulagha ukuti abantu batakulondiwa ukusinta ukuti bamuhobosye u Yehova. Abayuda abinji bakapapiliwa ku Babeloni, bakabelela na kikalile na kinong’onele aka bantu aba ku Babeloni. Pakati pendapo imyaka 69 ukufuma po Abayuda ababwandilo bakafumilako ku Babeloni, Umulaghili u Nehemiya akaswigha akati amanya ukuti abana bamo bo bakapapiwa ku Izilayeli batakachimanyagha ichinenelo icha Bayuda. (Kumbu. 6.6, 7; Nehe. 13.23, 24) Ka abana bala nge bakamanyila buli-buli ukumughana nu kumwiputa u Yehova po batakachimanyagha ichinenelo icha Chihebeli, cho chikaba chinenelo cheka cho amazyu agha Chala ghakasimbiwamo? (Ezra 10.3, 44) Abayuda aba bakalondiwanga ukuti basinte sana, loli chikaba chipepe ukusinta chifukwa bakaba ukuti pa kabalilo aka bakwikala Muizilayeli, mo ukwiputa ukwa bwanaloli kukaba ukuti kwanda ukunyokelamo panandi-panandi.—Nehe. 8.8, 9. w23.05 15 ¶6-7

Ichachitima chakuti, napo tungaba ni chinyonywa pamo tungaba ni nkalo inyiza, loli tungakomana ni vintu vyo vingatunyosezya kwisinda. Umwakufwanikizya, ‘ivyakubombiwa ivyakuchenusya’ vingatumalila akabalilo nu kubikako amahala vyo vingapangisya ukuti tube na kabalilo akandi akakukwanilisizya vyo tukulonda ukubomba. (Ndumbi. 9.11) Akabalilo kamo tungakomana ni vintu ivipala-pala vyo vingatupangisya ukuti twiyivwe ukuti twanyokela kwisinda. (Mbupi. 24.10) Ichifukwa chakuti swe bambula ukufikapo, tungabomba ivintu vimo umwakupuvya bulo vyo vingapangisya ukuti tupotwe ukukwanilisya vyo twalondagha ukubomba. (Loma 7.23) Pamo tungiyivwa ukuti twalita. (Mata. 26.43) Choni cho chingatwavwa ukukanizya ivintu vyo vingatunyosezya kwisinda? Mukumbukilaghe ukuti nanti mwakomana ni ntamyo, vitakung’amula ukuti mwapotwa ukukwanilisya vyo mukulonda ukubomba. Ibayibolo likunena umwakunyokezya-nyokezya ukuti inti tukomanaghe ni ntamyo. Loli likusimikizya ukuti napo tungawa, tunganyamuka sona. Naloli, nanti mukubukilila ukuyezya ukuti mukwanilisye ivyakubomba vyo mwibikiye napo mungakomana ni ntamyo, mukumulangizya u Yehova ukuti mukulonda ukumuhobosya. U Yehova akuhoboka sana nanti akwennya ukuti mukuyezya-yezya ukukwanilisya vyo mwibikiye! w23.05 30 ¶14-15

Ubupayiniya bukwavwa abachinyamata ukuti bamanyile mo bangabombela imbombo na bantu aba nkalo izyakupambana-pambana. Bukwavwa sona ukuti babombezyange akiza indalama umwamahala, umwakuleka ukunanga izyinji ukuchila zyo bakuzyagha. (Filipi 4.11-13) Izila inyiza iyakuba mubombi uwa kabalilo kosi, ko kwanda ubupayiniya ubwa kabalilo akanandi ko kungamwavwa ukuti ande ubupayiniya ubwa kabalilo kosi. Ubupayiniya bungighula izila izyinji izyakuba mubombi uwa kabalilo kosi ngati ukwavwa pambombo iya vyakuzenga-zenga sona ukubombela pa Beteli. Abanavuli bosi aba Chikilisitu babaghiye ukuba ni chakwibikila ichakuti bize bababombele abakamu na bayemba ngati basongo muchipanga. Ibayibolo likunena ukuti umwanavuli yo akulonda ubudindo ubu “akunyonywa imbombo inyiza nkani.” (1 Timo. 3.1) Ichabwandilo, umukamu akuba tasi mwavwilizyi. Abavwilizyi bakwavwa abasongo bachipanga muzila izya kupambana-pambana. Abasongo aba chipanga na bavwilizyi bakubabombela abakamu na bayemba umwakwiyipa sona bakubikapo umoyo pa mbombo iya bulumbilili. w23.12 28 ¶14-16

Umwene u Yosiya akaba ni myaka 16 po akandagha ukumulondelezya u Yehova. Akalondagha ukumanyila ivya Yehova sona ubwighane bwache. Loli chitakaba chipepe kwa mwene uwa chinyamata uyu. Pa kabalilo kala, abantu abinji bakiputagha abachala ababumamyasi, po u Yosiya akalondiwanga ukuba mujimvu ukuti abakanizye abantu ukuti baleke ukwiputa ivifwani. Sona akaba naloli mujimvu! Bo atafikite imyaka 20, u Yosiya akanda ukwefyamo abachala ababumyasi muchisu chabo.(2 Syambu. 34.1, 2) Napo mwe bana banandi, mungamweghelela u Yosiya umwakumulondelezya u Yehova nu kumanyila inkalo zyache izyapamwanya. Nanti mungabomba bunubu, vingabavwa ukuti mwiyipe ubumi bwinyu kukwache. Ka ukwiyipa kungakwafya buli-buli ubumi bwinyu? U Luke, yo akoziwa po akaba ni myaka 14 akanena ukuti, “Ukwanda pa kabalilo aka ukuya muntazi, inti mbike ukumubombela u Yehova pabwandilo pa bumi bwane nu kuyezya ukumuhobosya.” (Mali. 12.30) Numwe bulo mungasayiwa sana nanti mungabomba bunubu! w23.09 11 ¶12-13

Pa kabalilo ko umutumiwa u Pabuli akasimbagha ukalata uyu, pakaba ukuti pendapo umwaka ghoka ukufuma po ichipanga icha ku Tesalonika chikandila. Abanavuli bo bakasaliwa ukuti balongozyanje muchipanga ichi bakaba ukuti bachili batamenye ivyinji sona akabalilo kamo babaghiye ukuti bakapuvyanga pakubomba ivintu vimo. Napo vikaba bunubu loli abakamu na bayemba bakalondiwanga ukubukilila ukubachindika. Po intamyo inkulu yikupalamila, tukulondiwa nkani ukusubila ubulongozi bo abasongo bakutupa ukuchila kwisinda kosi uku. Tutakulondiwa ukusula ubulongozi bo bukufuma kubakamu aba ku hedikota yitu na kubakamu aba ku ofesi, cho chifukwa pa kabalilo aka chakulondiwa sana ukubaghana nu kubachindika abasongo muchipanga chitu. Umwakusita ukwennya vyo vyabombiwa, za tubukilile ukubomba ivintu umwahala ukusita ukwennya vyo abasongo bakupotwa ukubomba akiza, loli tubike amahala ghitu pa mo u Yehova akubatulila ukwendela mwa Yesu Kilisitu abanavuli abasubaliwa aba. Ulusubilo lwitu ulwa vintu ivya muntazi lukutwavwa pakufighilila inyinong’ono zyitu ku vintu ivibibi, ngati mo ichisote chikufighililila umutu uwa musilikali. Vingatwavwa ukumanya ukuti ivintu vyo ichisu chikupeleka vyamwalwe. (Filipi 3.8) Ulusubilo lwitu lukutwavwa ukuti twinong’onaghe akiza sona tusalaghe akiza ivintu. w23.06 11-12 ¶11-12

Abantu bo bakwivwa ukwitizya ukwa ‘mukolo umupunganu,’ bali nu bwabuke ubwakusala: Bangasala ukwitikizya ukubuka pamo ukukana. Pali ivifukwa ivyiza vyo tukukanila ukubomba ubwamalaya. ‘Umukolo umupunganu’ yo bamulongosola akunena ukuti: ‘Amizi aghakwiba ghakunona.’ (Mbupi. 9.17) Nkimba ‘amizi agha kwiba’ chochoni? Ibayibolo likuyanisya ukughonana ko kukubapo pakasi pa bantu bo basendanite na mizi aghiza. (Mbupi. 5.15-18) Umwanavuli nu mukolo bo basendanite, bobo bakwitikiziwa ukuhoboka ni chabupi icha kughonana. Ivi vikupambana nkani na ‘mizi aghakwiba,’ vyo vikung’anamula ukughonana ko te kwakwitikiziwa. Abantu bo bakubomba ubwamalaya bakuyezya-yezya ukufisama ukuti batakabonekele ngati mo akubombela umwiba yo akulonda ukwiba. ‘Amizi aghakwiba’ ghangaboneka ukuti ghakunona nanti umuntu yo iba akwinong’ona ukuti patalipo nayumo yo angamanya vyo abomba. Loli uku kwipusika sana! Abantu bo bakubomba bunubu, bakwipusika bene ichifukwa chakuti u Yehova akwennya ichintu chilichosi cho umuntu akubomba. Chakubaba nkani ukuleka ukuba mumanyani uwa Yehova ukuchila ichintu chilichosi, patalipo na chimo-chimo icha ‘kunona’ nanti tungaluza ubumanyani bwitu nu Yehova.—1 Koli. 6.9, 10. w23.06 22 ¶7-9

Nkimba mungabomba ichoni nanti mukwennya ukuti mutakwiputa ukufumila pasi pa moyo sona mutakuhoboka nu bulumbilili ngati mo mukabombelagha pabwandilo? Mutakinong’one ukuti umuzimu wa Yehova waleka pakubomba imbombo papinyu. Te mwe bakufikapo sona akabalilo kamo inyinong’ono zyinyu zingasinta. Nanti ukwiyipa kwinyu kwanda ukuchepa, mwinong’onelepo pa chifwanikizyo icha mutumiwa u Pabuli. Napo umutumiwa u Pabuli akamweghelelagha u Yesu loli akamanya ukuti akabalilo kamo vingabombiwa ukuti atangaba ni chinyonywa ukuti abombe bunubu. U Pabuli akasimikizya ukuti inti akwanilisye imbombo yache iya bulumbilili napo akabalilo kamo akiyivwanga bunubu. Umwakuyana bulo, mutakitikizye ukuti ukusita ukufikapo kwinyu kubapangisye ukuti musalaghe ivintu ukuyana na mo mukwiyivwila. Mube bakusimikizya ukubomba cho chiza napo akabalilo kamo mungiyivwa ukuti mutakulonda ukubomba bunubu. Nanti mukubikapo umoyo pakubomba cho chiza, akabalilo nanti kendapo mungasinta mo mukwiyivwila.—1 Koli. 9.16. w24.03 11-12 ¶12-13

Tungalangizya ulughano ku bakamu na bayemba bitu umwakuba nabo pabumanyani nu kwangala nabo. (2 Koli. 6.11-13) Tuli muchipanga cho muli abakamu na bayemba bo tukulite umwakupambana sona tuli nu buntu ubwakupambana-pambana. Tungabaghana abakamu na bayemba bitu bosi aba, umwakwennya inkalo zyabo inyiza zyo bali nazyo. Nanti tukumanyila ukubennya abanji ngati mo u Yehova akubenezya, vikulangizya ukuti tubaghanite. Twize tubukilile ukubaghana abakamu na bayemba pa kabalilo aka ntamyo inkulu. Nanti intamyo inkulu yiza yanda, ka u Yehova akwiza pakutufilighilila buli-buli? Za twennye vyo u Yehova akababuzya abantu bache ukuti babombe po u Babeloni akamongoliwanga, akanena ukuti: ‘Buka, mwebantu bane, muye mwingile muvipinda vyinyu ivyamukasi, nu kwighalila ivyighi. Muvwame kwa kabalilo akanandi bulo mupaka ubukali bupululile.’ (Yesa. 26.20) Tutakumanya, lumo nuswe bulo pa ntamyo inkulu tukwiza pakulondiwa ukukonka ubulungozi ubwakuyana bulo. w23.07 6-7 ¶14-16

Mube ni mbili iyakuti mwe bololo. Mwilalusye ukuti: ‘Ka abantu bakunennya ukuti ne mololo, sona ne muntu wakwivwisya? Pamo bakunennya ukuti ne muntu wakukakamila? Ka ne muntu wakwivwisya inyinong’ono izya bantu abanji nanti chakulondiwa?’ Mo tukubombela ivintu pankani iya bololo tungalangizya ukuti tukumweghelelela u Yehova nu Yesu. Tukulondiwa ukuba bololo nanti ivintu vyasinta pa bumi bwitu. Ukusinta uku kungapangisya intamyo zyo tutinong’onelaghapo ukuti tungaba nazyo. Umwakufwanikizya, aliwesi anganda pakubina umwakuchenusya bulo. Ukusinta ukwa vya chuma pamo ukusinta ukwa boma lyo likulaghila, vingapangisya ukuti ubumi bwitu bube bupala. (Ndumbi. 9.11) Chingaba sona chakutamya nanti igulu lya Yehova lingatubuzya ukuti tumubombelaghe u Yehova muzila iyinji pamo ku malo aghanji. Tungakwanisya nu kwitikizya ukusinta kulikosi ko kungabapo nanti tungabomba ivintu 4 ivi: (1) ukwitikizya ukuti pa kabalilo aka ivintu vyasinta, (2) ukwinong’onela vyo mungabomba pa kabalilo aka mumalo mwakwinong’onela vyo mukabombagha kwisinda, (3) ukwennya ivintu ivyiza vyo mwakomana navyo pa bumi bwinyu, sona (4) ukubabombela abanji ivintu ivyiza. w23.07 21-22 ¶7-8

Umulaghuzi u Daniyeli akaba wachinyamata pa kabalilo ko aba Babeloni bakamusendagha nu kubuka nawe kubuzya ku Babeloni ko kukaba kutali sana na ku Yelusalemu. Loli tutakukayikila ukuti u Daniyeli akabahobosya aba Babeloni bo bakiza pakumusenda. Bakennya mo ‘akabonekelagha mumaso’ ukuti u Daniyeli ‘muntu umusita ichilema chilichosi, uwakuboneka akiza’ sona afumite mu mbumba iyakuchindikiwa. (1 Samu. 16.7) Ichifukwa cha vintu ivi, aba Babeloni bakamumanyisya ukuti abombaghe munyumba iyachimwene. (Dani. 1.3, 4, 6) U Yehova akamughana u Daniyeli ichifukwa cha bumi bo umunyamata uyu akasala ukuti abe. Pa kabalilo ko u Yehova akanenagha ukuti u Daniyeli ali ngati we Nowa nu Yobu, tutakukayikila ukuti u Daniyeli akaba ni myaka iya muma 20, po u Yehova akamwennyanga umunyamata uyu ukuti mugholosu ngati we Nowa nu Yobu bo bakamubombela u Yehova umwabusubaliwa kwa kabalilo akatali. (Ubwa. 5.32; 6.9, 10; Jobu 42.16, 17; Eze. 14.14.) Sona u Yehova akabukilila ukumughana u Daniyeli ubumi bwache bosi.—Dani. 10.11, 19. w23.08 2 ¶1-2

Nanti mukulonda ukughula inyumba,mungalonda ukuti mubuke ukuti muye muyennye mo yibeleye mukasi nu kwennya ivipinda vyosi mo vibeleye.person. Tungabomba umwakuyana bulo nanti tukubelenga nu kumanyila Ibayibolo. Nanti mungalibelenga bulo lubilo-lubilo, mungamanya bulo ifundo izyabwandilo vyo “vimanyisyo ivyakwanda ivya mazyu agha Chala.” (Hebe. 5.12) Ngati mo tukubombela ni nyumba yo tukulonda ukughula, ghope Amazyu agha Chala ghakulondiwa ukufufuza ukuti tumanye akiza ivigaba vyosi. Ukwennya ukukolelana ko kulipo muvigaba ivyakupambana-pambana vyo vili mu Bayibolo, zila inyiza sana iya kumanyilila Ibayibolo. Ifundo iyakulondiwa nkani yakuti mutakivyisyange bulo ivintu vyo mukusubila, loli mwivwisyange ichifukwa cho mukuvisubila. Ukuti twivwisye akiza Amazyu agha Chalatukulondiwa ukubikapo umoyo pakumanyila ubwanaloli ubwa mu Bayibolo. Umutumiwa u Pabuli akabalaba abakamu na bayemba ukuti bamanyilaghe Amazyu agha Chala umwakubikapo umoyo umwakuti bivwisye ‘mumo bubeleye ubukulu nu butali, mumwanya sona na mubwibizu’ ubwa bwanaloli. Ivi nge vikabavwa ukuti “bisimike na magululuzi” nukuti bikalane mu lwitiko. (Efe. 3.14-19) Nuswe bulo tukulondiwa ukubomba bunubu. w23.10 18 ¶1-3

Mu Bayibolo muli inkani izyinji izya bantu bo bakaba bafisalyoyo. Nkimba mutangapaghula akabalilo nu kumanyila zimo mwa nkani izi? Umwakufwanikizya, u Devedi napo akapakaziwa po akaba mwana munandi ukuti akwiza pakuba we mwene uwa Izilayeli, loli akalindilila ukwa myaka iyinji ukuti apokele ubumwene. U Simiyoni nu Ana bakabukilila ukumwiputa u Yehova umwabusubaliwa pa kabalilo ko bakalindililagha ukwiza ukwa Mesiya. (Luka 2.25, 36-38) Po mukumanyila zimo mwa nkani izi, mwaghe amaansala aghamalalusyo agha: Choni cho chikamwavwa umuntu uyu ukuti abe mufisalyoyo? Ka akapindula buli-buli ichifukwa chakuti akaba mufisalyoyo? Nkimba ningamuyezya buli-buli? Mungapindula sona nanti mungamanyila inkani izya bantu bo batakaba bafisalyoyo. (1 Samu. 13.8-14) Po mukumanyila inkani zyabo, mwilalusye ukuti: ‘Choni cho chikamupangisya ukuti atakabe mufisalyoyo? Ka vintu buli ivibibi vyo vikabombiwa ichifukwa chakuti akapotwa ukuba mufisalyoyo?’ w23.08 25 ¶15

Umutumiwa u Pitala akaba musubaliwa, atakitikizya nachimo-chimo ukuti apotwe ukumukonka u Yesu. Akalangizya ubusubaliwa bwache pa kabalilo kamo po u Yesu akanena ifundo yimo yo abamanyili bache bamo batakayivwisya. (Yoha. 6.68) Mumalo mwakulindilila ukuti u Yesu alongosole akiza vyo akang’anamulagha abinji bakaleka ukumukonka. Loli u Pitala atakaleka. U Pitala akabukilila ukuba musubaliwa sona akanena ukuti u Yesu weka weyo ali na “amazyu amapela bumi agha bwila na bwila.” U Yesu akamanya ukuti u Pitala na batumiwa abamwabo inti bamuchimbile. Napo vikaba bunubu, U Yesu akaba nu lusubilo ukuti u Pitala azukunyokela nu kubukilila ukuba musubaliwa. (Luka 22.31, 32) U Yesu akabivwisya ukuti ‘umuzimu ghukulonda, loli umubili ghute na maka.’ (Mali. 14.38) Napo u Pitala akamukana ukuti atamumennye, loli u Yesu atakamuleka umumanyili wache uyu. Akati azyuka, akabonekela kwa Pitala pa kabalilo ko u Pitala akaba kwa weka. (Mali. 16.7; Luka 24.34; 1 Koli. 15.5) Inong’onela mo chikabela chakughomya kwa Pitala po akaba ni chitima pa vyo akabomba! w23.09 22 ¶9-10

U Chala akubahobokela Abantu bo baba nu lwitiko mumwache. Akubahobokela nu moyo ghosi sona atakuzikumbukila imbibi zyabo. (Sali. 32.1, 2) Akubennya abantu aba, ukuba bagholosu ichifukwa cha lwitiko lwabo. Napo u Abulahamu, u Devedi na babombi abasubaliwa aba Chala abanji bakitiziwa ukuti bagholosu loli bakaba ukuti bachili bantu basita ukufikapo. Loli ichifukwa icha lwitiko lwabo, u Chala akabennya ukuti bagholosu nkani-nkani nanti akuyanisya na bantu bo bate nu lwitiko mumwache. (Efe. 2.12) Mukalata yache iyakubuka ku Baloma, umutumiwa u Pabuli akalongosola ukuti tukulondiwa ukuba nu lwitiko ukuti tube pabumanyani nu Chala. U Abulahamu nu Devedi bakaba bamanyani ba Chala ichifukwa chakuti bakaba nu lwitiko mumwache, nuswe bulo tungaba bamanyani ba Chala nanti tuli nu lwitiko mumwache. w23.12 3 ¶6-7

Amasiku ghano Umukilisitu aliwesi ali nu lusako ulwakupeleka isembe kwa Yehova umwakubombezya akabalilo, amaka sona ichuma chache pakwavwapo pa mbombo iya Bumwene ubwa Chala. Tungalangizya ukuti tukupalizya ulusako lo tuli nalo ulwakumwiputa u Yehova, umwakubomba chilichosi cho tungakwanisya pakumubombela.Umutumiwa u Pabuli akasimba ivintu vyo akabalilo kosi tukulondiwa ukuti tubombaghe po tukumwiputa u Yehova. (Hebe. 10.22-25) Ivintu ivi ko kwiputa kwa Yehova, ukulumbilila ku banji, ukukomana poka pa nkomano izya chipanga sona ukukazannya “nkani-nkani bo tukwennya ukuti isiku ilyakwiza ukwa [Yehova] lili papipi.” Uwantumi uwa Yehova akanena ukuti: “Mumuchindikaye u Chala!” (Ubuvu. 19.10; 22.9) Uwantumi akanena amazyu agha kabili kosi ukulangizya ukuti inkani iyi yakulondiwa sana. Nge twabomba chilichosi cho tungakwanisya ukuti tutakaluvye ivintu vyosi vyo twamanyila ivya tempeli ilikulu ilyabuzimu ilya Yehova sona ulusako lo tuli nalo ulwakumwiputa u Chala witu umukulu! w23.10 29 ¶17-18

Swebosi tukulonda ukuti “tughananaye.” (1 Yoha. 4.7) Loli chakulondiwa sana ukuti tukumbukilaghe ifundo yo u Yesu akatusoka pakunena ukuti “ulughano ulwa bantu abinji lukwiza pakukatala.” (Mata. 24.12) Loli u Yesu atakanena ukuti ivi vikwiza pakubombiwa nkani pakasi pa bamanyili bache. Napo vili bunubu, loli tukulondiwa ukucheba umwakuti tutakasendeleko inkalo zyo abantu bo bate nu lughano bakulangizya muchisu ichi. Po tukwinong’onelapo ifundo iyi, za tunenezannye ilalusyo ilyakulondiwa ili: Choni cho chingatwavwa ukumanya nanti tubaghanite abakamu na bayemba bitu? Izila yoka yo yingatwavwa ukuti tumanye waghe tuli nu lughano, yakwennya mo tukubombela ivintu pa bumi bwitu nanti twakomana ni ntamyo yimo. (2 Koli. 8.8) Cho chifukwa umutumiwa u Pitala akanena ukuti: “Pamwanya pa vyosi mughananaye mwebene nu lughano ulwakufikapo, pakuti ulughano lukuzikupikila imbibi inyinji nkani.” (1 Pita. 4.8) Mo tukubombela ivintu nanti abakamu na bayemba batunangila pamo batunena kabibi, vingatwavwa ukumanya waghe tubaghanite nkani. w23.11 10-11 ¶12-13

Tutangivwila ilamulo ilya Yesu ilyakuti tughananaye, nanti tukusalila muchimanyani pakulangizya ulughano muchipanga. Loli akabalilo kamo vingabombiwa ukuti bamo tungabaghana nkani ukuchila abanji ngati mo u Yesu akabombela. (Yoha. 13.23; 20.2) Loli umutumiwa u Pitala akubakumbusya ukuti mukulondiwa ukuti “mubaghanaye abitiki abamwinyu” chifukwa chakuti muli mumbumba yoka. (1 Pita. 2.17) U Pitala akutukazya ukuti “mughananaye mwebene nu moyo winyu ghosi.” (1 Pita. 1.22) Munkani iyi amazyu aghakuti “mughananaye” ghakung’anamula ukumughana umuntu yumo napo chingaba chipala ukukulangizya ulughano. Umwakufwanikizya, ka tungabomba ichoni nanti umukamu yumo atunangila? Pabwandilo, tungalonda ukuti tumubombele ngati mo abombela mumalo mwakumulangizya ulughano. U Pitala akamanyilako kwa Yesu ukuti inkalo iyi yitakumuhobosya u Chala. (Yoha. 18.10, 11) U Pitala akasimba ukuti: “Mutakatanizannyanje ububibi pa bubibi, pamo intuko pa ntuko awe. Mubuyo bwache, mutanizannyanje nu lusayo.” (1 Pita. 3.9) Nanti muli nu lughano ulwenecho, inti mube bachisa. w23.09 28-29 ¶9-11

Tukuswigha sana ukwennya mo umwana akukulila nu kuba wachinyamata. Vikuboneka ukuti abana bakukula umwakusita ukubombapo zimo. Loli nanti tukulonda ukukonka ichifwanikizyo icha Yesu, tukulondiwa ukubombapo zimo. (1 Koli. 13.11; Hebe. 6.1) Ukuti tukwanilisye ivi, tukulondiwa ukuba pabumanyani ubwiza nu Yehova. Tukulondiwa sona umuzimu wache ubuzelu ukuti ghutwavwe ukuba ni nkalo zyo zingamuhobosya u Chala, ukumanyila amaluso gho ghangatwavwa pa bumi bwitu sona ukwisengannya ubudindo bo tungize tube nabo muntazi. (Mbupi. 1.5) U Yehova akapela abantu ukuba mwanavuli pamo umukolo. (Ubwa. 1.27) Chipepe sana ukwennya ukuti umwanavuli nu mukolo bapambanite amaka, loli pali sona ivintu vyo bapambanite muzila izyamwabo. Umwakufwanikizya, u Yehova akapela umwanavuli nu mukolo ukuti bakwanilisyanje amabudindo ghabo, umwakuti bakulondiwa ukuba ni nkalo sona amaluso gho ghangabavwa ukukwanilisya ubudindo bwabo.—Ubwa. 2.18. w23.12 18 ¶1-2

Ka u Yesu akalondagha ukuti abanji bope ba bombezyange izina ilya Baba wache? Tutakukayikila. Abalongozi bamo abavipanga bakasubilagha ukuti ghutakaba muchizi ukulitambula izina lya Chala, loli u Yesu atakitikizya chilichosi ngati akikalile ko kakususannya ni fundo izya mu Bayibolo ukumulesya ukuchindika izina ilya Baba wache. Inong’onela vyo vikabombiwa pa kabalilo ko u Yesu akamupozya umuntu yo akaba ni mizimu imibibi kuchigaba icha Gelase. Abantu bakaba ni lyogha sona bakamulaba u Yesu ukuti epemo, umwakuti u Yesu atakabukilila ukwikala muchigaba chila. (Mali. 5.16, 17) Napo vikaba bunubu, loli u Yesu akalondagha ukuti abantu aba kuchigaba chila balimanye izina ilya Yehova. U Yesu akamubuzya umuntu yo akamupozya yula ukuti atakababuzye abantu vyo amubombela loli ababuzye vyo u Yehova amubombela. (Mali. 5.19) Amasiku ghano pope, u Yesu akulonda ukuti tubamanyisye abantu izina ilya Baba wache pachisu chosi ichapasi! (Mata. 24.14; 28.19, 20) Nanti tukubomba bunubu tukumuhobosya Umwene witu u Yesu. w24.02 10 ¶10

Ukunena ubwanaloli tusayiwe sana ukuba chigaba icha gulu lya Yehova mumasiku aghabumalilo agha. Po ivintu pa bumi muchisu ichi vikubipila-vipila loli u Yehova akutupa abakamu na bayemba bo bakutwavwa. (Sali. 133.1) Akutwavwa ukuti tubanje bakuhoboka mumbumba zyitu. (Efe. 5.33–6.1) Sona akutwavwa pakutupa amahala gho tukulondiwa ukuti tube nu mutende uwa mumoyo. Tukulondiwa ukubikapo umoyo ukuti tubukilile ukumubombela u Yehova umwabusubaliwa. Chifukwa buli? Ichifukwa chakuti akabalilo kamo tungapunuziwa ni vintu vyo abantu abanji bangabomba ichifukwa chakuti bambula ukufikapo. Akabalilo kamo tunganyokela kwisinda ichifukwa cha vintu vyo tukupuvya nkani-nkani nanti ivintu ivyo, tukupuvya umwakupyanizya-pyanizya. Tukulondiwa ukujimba ukuti tubukilile ukumubombela u Yehova (1) pa kabalilo ko umukamu pamo umuyemba atupunuzya, (2) nanti umuchi pamo umulume witu atupunuzya sona, (3) nanti twanyokela kwisinda ichifukwa cha vintu vyo twapuvya. w24.03 14 ¶1-2

Akabalilo kosi, inti mwivwange inkani izya bakamu na bayemba bo basalite ukubomba ivyinji pakumubombela u Yehova. Bamo bakwingila Isukulu iya Balumbilili aba Bumwene pamo ukubuka ku chigaba ko kukulondiwa abalumbilili abinji. Nanti mo ivintu vibeleye pa bumi bwinyu vikubitikizya, ichi chakwibikila ichiza cho mungabomba. Abantu ba Yehova bakubikapo umoyo ukuti babombe ivyinji pakumubombela. (Imbo. 16.9) Nkimba mungabomba ichoni nanti pa kabalilo aka mutangakwanisya ukubomba bunubu? Mutakinong’onaghe ukuti mwe bapasi ukuchila bo bakukwanisya ukubomba bunubu. Ichintu ichakulondiwa nkani kwa Mukilisitu ko kubukilila ukuba wakujimba. (Mata. 10.22) Mutakiyennye ukuti te mwe bakulondiwa kwa Yehova ukuyana na vyo mukukwanisya ukubomba sona mo ivintu vibeleye pa bumi bwinyu. Ichi cho chintu chakulondiwa sana cho chingabavwa ukuti mubukilile ukumukonka u Yesu pisinda apakuti moziwa.—Sali. 26.1. w24.03 10 ¶11

Ubaba witu uwa kumwanya akulayizya ukuti inti atuhobokele nanti twalapa imbibi zyitu. (Sali. 86.5) Nanti tukubomba ivintu umwakulangizya ukuti tukwipelela ichisa pa vyo twananga, tungaba nu lusubilo ukuti u Yehova atuhobokela. Choni cho chingatwavwa ukuti tumalane ni ntamyo iyakukayikila? Tukumbukilaghe ukuti u Yehova akulonda ukuti tubombaghe vyo tungakwanisya. U Yehova atakulindilila ukuti tubombaghe ivyingi ukuchila vyo tungakwanisya. Akupalizya sana chilichosi cho tungakwanisya pakumubombela nanti chikufuma pasi pamoyo. Mwinong’onele ivifwanikizyo ivya mu Bayibolo ivya bantu bo bakamubombela u Yehova nu moyo wabo ghosi. Inong’onela ichifwanikizyo icha mutumiwa u Pabuli. Akabomba umwakubikapo umoyo ukwa myaka iyinji, akendagha amabulendo amatali nu kwandisya ivipanga ivyingi. Loli ivintu vikati vyasinta pa bumi bwache, atakakwanisyagha ukulumbilila ngati mo akabombelagha pabwandilo. Ka ivi vikung’anamula ukuti u Yehova akaleka ukuhoboka nawe? Awe. Mumalo mwache akabukilila ukubomba chilichosi cho angakwanisya sona u Yehova akamusaya. (Imbo. 28.30, 31) Umwakuyana bulo nuswe ivintu vingasinta pa bumi bwitu pa mo tukumubombela u Yehova. Cho chikutupangisya ukuti tumubombelaghe, chocho chakulondiwa nkani kwa Yehova. w24.03 27 ¶7, 9

Mo u Yesu akiputilagha kwa Yehova, vikabavwa abamanyili bache ukumanya mo bangiputila. Pakabalilo kosi ko akalumbililagha pachisu ichapasi, u Yesu akiputagha papipi-papipi. U Yesu akalondiwanga ukupaghula akabalilo akakwiputila ichifukwa chakuti akabalilo akinji akabanga wakutangwanika sona akabanga na bantu abinji. (Mali. 6.31, 45, 46) Akalabilagha pandabi-ndabi ukuti abe na kabalilo akakwiputila pa weka. Pakabalilo kamo, akiputa ubusiku bosi po achili atasalite ichintu chimo ichakulondiwa sana. (Luka 6.12, 13) Ubusiku bwache ubwabumalilo pachisu ichapasi bo achili pakufwa, u Yesu akiputa umwakupyanizya-pyanizya ukuti vimwavwe ukumalizya akiza ichigaba ichakutamya ichabumalilo icha mbombo yo u Tata wache akamupa pachisu ichapasi. (Mata. 26.39, 42, 44) Mo u Yesu akabombelagha, vikutumanyisya ukuti nuswe bulo napo tungaba bakutangwanika, tupaghulaghe akabalilo akakuti twiputaye. Ngati we Yesu, nuswe bulo tukulondiwa ukwagha akabalilo akakwiputila. Tungasala ukwiputa kundabi-ndabi pamo kuchamabwila. Nanti tukubomba bunubu, tukulangizya ukuti tukumupalizya u Yehova ichifukwa icha chabupi ichapamwanya ichi. w23.05 3 ¶4-5

Ennya amazyu aghakuti “akizuzya amoyo ghitu” gho ghali pamwanya apa. Ibuku limo ilyakulongosola ivya Bayibolo likulongosola amazyu agha ngati ukuti “ghukiza kwa uswe ngati amizi mulusoko.” Amazyu agha ghakulangizya ulughano ulwa maka lo u Yehova ali nalo ku bapakaziwa! Abapakaziwa bakumanya ukuti “baghaniwe nu Chala.” (Yuda 1) Umutumiwa u Yohani akalongosola mo bakwiyivwila po akasimba ukuti: “Ennya namumo u Tata u Chala atughaniye, umwakuti tukwitiziwa bana bache!” (1 Yoha. 3.1) Nkimba u Yehova abaghanite abapakaziwa bene? Awe, u Yehova akulangizya ulughano lwache ku bantu bosi. Ka chintu buli cho u Yehova abombite ukulangizya ukuti atughanite? U Yehova alangizizye ulughano ulukulu nkani ukuchila aliwesi pakutupa isembe iya kutusatula!—Yoha. 3.16; Loma 5.8. w24.01 28 ¶9-10

Ivesi ilya pamwanya ili, likunena izila yo yikamwavwa u Devedi ukuti apote ilyogha. Napo ubumi bwache bukaba ukuti buli pa ngozi loli akinong’onelaghapo pa vyo u Yehova inti ize amubombele muntazi. U Devedi akamanyagha ukuti u Yehova akwiza pakumupoka pa kabalilo kache. Ukuchila vyosi, u Yehova akanenela zila ukuti u Devedi akwiza ukuba we Mwene uwakukonkapo uwa Izilayeli. (1 Samu. 16.1, 13) U Devedi, akennyanga ngati ukuti ivintu vyosi vyo u Yehova akamulaghizya vyakwanilisiwa kale. Nkimba u Yehova abalaghizizye ukuti inti ababombele ichoni? Tutakulindilila ukuti u Yehova inti atufighilile ku ntamyo zyosi zyo tukukomana nazyo. Loli intamyo zyosi zyo tukukomana nazyo pa kabalilo aka, u Yehova akwiza pakumalana nazyo muchisu cho chikwiza. (Yesa. 25.7-9) Umupeli witu wamaka sana umwakuti akwiza pakuzusya bo bafuye, ukutupozya sona akwiza pakwefyapo abakususya bosi.—1 Yoha. 4.4. w24.01 6 ¶12-13

Mwinong’onele ichifukwa cho mukiyipa ubumi bwinyu kwa Yehova nu koziwa. Mukabomba bunubu ichifukwa chakuti mukalondagha ukubukilila ukwima nkani kulubazu ulwa Yehova. Inong’onela cho chikabavwa ukusubalila ukuti mwabwagha ubwanaloli. Mukamumanya u Yehova nu kwanda ukumuchindika nu kumughana ngati we Baba winyu uwa kumwanya. Ulwitiko lwinyu lukakula umwakuti lukabavwa ukuti mupinduke. Mukaleka ukubomba ivintu vyo u Chala avibengite nu kwanda ukubomba ivintu vyo vingamuhobosya. Tukusubila ukuti mukiyivwa akiza mukati mwamanya ukuti u Chala angabahobokela pa vintu ivibibi vyo mukabombagha. (Sali. 32.2) Mukanda ukwaghiwapo pa nkomano izya Chikilisitu nu kubabuzyako abanji ivintu ivyiza vyo mukamanyilagha. Pakuba Mukilisitu uwakwiyipa nu wakoziwa, pa kabalilo aka mukwenda pa musebo uwakubuka ku bumi sona mukubomba chilichosi cho mungakwanisya ukuti mubukilile ukwenda mumusebo ughu. (Mata. 7.13, 14) Mubukilile ukwima nkani sona mutakayingaghe pakwiyipa kwinyu kwa Yehova nu kwivwila indaghilo zyache. w23.07 17 ¶14; 19 ¶19.

Ukwinong’onelapo pa vyo mukanena mulwiputo ulwakwiyipa kwa Yehova, kungabavwa sona ukuti mwaghe amaka gho ghangabavwa ukuti muzipote injelo zyo mungakomana nazyo. Umwakufwanikizya, nkimba mwanda pakukopana nu muntu yo te mulume pamo muchi winyu? Tutakukayikila ukuti mutangitikizya ukuti mubombe bunubu! Ichifukwa chakuti mukamulaghizya kale u Yehova ukuti te mwize mubombepo lumo ivintu ngati vinivi. Nanti mukuvikanizya ivinyonywa ivibibi, mutakwiza ukutamiwa ukuvileghuka. Ivi vikwiza pakubavwa ‘ukuleghuka’ ‘izila iya babibi.’ (Mbupi. 4.14, 15) Ukwinong’onelapo mo u Yesu akabombela kope kungabavwa. Akabikapo umoyo ukubomba vyo vingamuhobosya ubaba wache. Po numwe bulo, mubikaghepo umoyo ukumanya nu kukana chilichosi cho mukumanya ukuti chitangamuhobosya u Chala. (Mata. 4.10; Yoha. 8.29) Ubwanaloli bwakuti intamyo ni ngelo zikubapa ulusako ulwakuti mulangizye nanti mukubukilila ukumukonka u Yesu. Nanti mukubomba bunubu mungaba nu lusubilo ukuti u Yehova akwiza ukubukilila ukubavwa. w24.03 9-10 ¶8-10