Yehova Alisuni Kwaamba Ayi Soonse Twaane

1. Ino muntu alacita buyani na waana?

NA TWACIITA cilubo, tulayandika kwaana. Baibo ilaamba ayi na muntu waana, alatalika kupata cilubo ncaakacita, kucileka kucita cintu ico akuba ushinishite kutacibooshawo.—Mate. 3:8; Milimo 3:19; 2 Pit. 3:9.

2. Ino nceebonshi soonse tulayandika kwiiya pamakani akwaana? (Neyemiya 8:​9-11)

² Ino nceebonshi soonse tulayandika kwiiya pamakani akwaana? Mukwiinga soonse tulabisha bushiku abushiku ceebo cakwaamba ayi twakapyana bubi alufu kuswa kuli Adamu a Efa. (Loma. 3:23; 5:12) Soonse tulabisha alimwi tulayandika kwaana. Nabi bantu bakalinga kucite lushomo luyumu mbuli mutumwi Paulo, teshi lyoonse ndyecakalinga kubabeta cuubu kuleya kucita shintu shitabete kabotu. (Loma. 7:​21-24) Ano sa ici cilaamba ayi lyoonse tulyeelete kunolinyumfwabo cibiibi ceebo ca shibiibi shesu? Sobwe. Yehova alicite nkuumbu alimwi alisuni ayi tunoosangalala. Amuyeeye pa shakacitikila baJuda bamu ciindi cakwe Neyemiya. (Amubelenge Neyemiya 8:​9-11.) Yehova taakalinga kusuni ayi banoolinyumfwa cibiibi cakwiindilila pa shilubo nshobakacita kale kale. Sombi wakalinga kusuni ayi banomulambila calusangalalo. Yehova alicishi kwaamba ayi tulaba alusangalalo na twaana. Aboobo alatwiisha nsheenga twaciita kwaamba ayi tutondeshe ayi twaana. Na twaana kushilubo shesu, inga twashoma ayi Ishiwesu shinkuumbu alaakutulekelela.

3. Ino tutokwiiya nshi mumutwi uyu?

³ Mumutwi uyu, tutokwiiya pamakani akwaana. Tutobandika pa shintu shotatwe. Cakutaanguna, tutokwiiya Yehova nshaakaiisha bene Isilaeli pamakani akwaana. Lyalo tutoobona Yehova mbwacafwa bantu kwaamba ayi baane. Mukweelaako, tutobandika bashikwiiya bakwe Yesu nshobakeeya pamakani akwaana.

YEHOVA NSHAAKAIISHA BENE ISILAELI PAMAKANI AKWAANA

4. Ino nshiinshi Yehova nshaakaiisha bene Isilaeli pamakani akwaana?

⁴ Yehova ndyakabapa milawo bene Isilaeli, bakamushomesha ayi balaakunoomunyumfwila. Alimwi Yehova wakabashomesha ayi alaakunoobashitilisha akubapa shoolwe na kabakonkela milawo yakwe. Wakaamba pa milawo njakabapa ayi: “Anu mulawo ngontoomupa sunu teshi uyumu alimwi toobete kulaale sobwe.” (Duto. 30:​11, 16) Sombi na basalawo kutakonkela milawo yakwe na kutalika kulambila shibumbwabumbwa, wakalinga kucileka kubashitilisha alimwi bakalinga kupenga. Nacibi boobo, ici tacakalinga kusansulula ayi camana Yehova wacileka kubacafwa. Bakalinga kucite coolwe ca ‘kuboolela kuli Yehova akukonkela milawo yakwe.’ (Duto. 30:​1-3, 17-20) Yehova wakalinga kubalangila ayi inga baana. Na bacita boobo, wakalinga kuba abushicibusa ambabo akutalika kubapa shoolwe alimwi.

5. Ino Yehova wakatondesha buyani ayi taakwe kucileka kweelesha kucafwa bantu bakwe? (2 Baami 17:​13, 14)

⁵ Bene Isilaeli bakapondokela Yehova mankanda aanji. Bakalinga kulambila shibumbwabumbwa akucita shintu shimwi shibiibi abuumbi. Aboobo bakapenga. Sombi Yehova taakwe kucileka kweelesha kucafwa bantu bakwe kwaamba ayi batalike alimwi kumusebensela. Wakatolelela kutuma bashinshimi kwaamba ayi bacafwe bantu bakwe kwaana akutalika alimwi kumusebensela amyoyo yabo yoonse.—Amubelenge 2 Baami 17:​13, 14.

6. Ino Yehova wakasebensesha buyani bashinshimi kucafwa bantu bakwe kushiba kuyandika kwa kwaana? (Amubone acikope.)

⁶ Liinji Yehova wakalinga kutuma bashinshimi kucenjesha bantu bakwe akubalulika na basalawo kutakonkela milawo yakwe. Kucakubonenaako, Lesa wakatuma Jelemiya kulwiita bene Isilaeli ayi: ‘Piluka Isilaeli webo nootashomeki, teshi nkakulangewo cabukali ceebo ndashomeka. Teshi nkakubikilewo mfundilishi kwamuyayaya, sobwe. Citoyandikabo nkusumina mulandu wako, ceebo wakaashukila ndime ne Yehova.’ (Jele. 3:​12, 13) Yehova wakalwiita Jowelo kulwiita bantu bakwe ayi: ‘Amwaane kuswa kushibiibi shanu akuboolela kuli ndime amyoyo yanu yoonse.’ (Jowe. 2:​12, 13) Alimwi wakatanjilila Isaya kulemba ayi: “Amucileeke kucita bubi boonse ubu mboomubona kamucita. Ee, amucileeke kucita shitaluleme.” (Isa. 1:​16-19) Kwiilikaawo, kwiinda mumushinshimi Esekelo, Yehova wakaamba ayi: ‘Sa nebo ndasangalala kubona mucita shibi kaafwa? Sobwe, ndasangalala na waaluka kuswa kunshila shakwe shibiibi akuba abuumi. Nebo . . . nshisuni kwaamba ayi nabi womwi afwe. Aboobo amwaane kuswa kushibiibi shanu, mube abuumi.’ (Esek. 18:​23, 32) Yehova alasangalala abuumbi na bantu baana kuswa kushibiibi shabo, mukwiinga alisuni ayi bakekale kwamuyayaya! Aboobo Yehova alatalika kucafwa bantu nabi kabatana kwaana. Amuleke tubone shakubonenaako shimwi mbwaakacita boobo.

7. Ino nciinshi Yehova ncakaiisha bantu bakwe kwiinda mukusebensesha cakubonenaako ca mushinshimi Osiya amukaakwe?

⁷ Yehova wakasebensesha cakubonenaako ca mushinshimi Osiya a Goma mukaakwe, kwaamba ayi acafwe bantu bakwe kushiba ayi wakalinga kulibambite kubacafwa kwaana. Goma ndyaakacita bulale, wakamushiya Osiya akutalika kweenda abasankwa bamwi. Sa ici cakalinga kusansulula ayi inga taaluki? Yehova uyo ushiba shili mumoyo, wakalwiita Osiya ayi: ‘Koya ukatondeshe lusuno alimwi ku mwanakashi usunikwi kumusankwa umwi alimwi utoocita bulale. Ulyeelete kumusuna bweenka nebo ne Yehova mboonsuni bene Isilaeli nabi kwaamba ayi basandukila kubalesa bamwi.’ (Osi. 3:1; Tus. 16:2) Paciindi ici, mukaakwe Osiya kaacicita cilubo cinene. Nacibi boobo, Yehova wakalwiita Osiya kumulekelela akumuboosha kuŋanda kwaamba ayi atolelele kuba mukaakwe.a Yehova alakwe taakwe kucileka kucafwa bantu bakwe ndyebakamupondokela. Nabi kwaamba ayi bakalinga kunocicita shintu shibiibi abuumbi, wakalinga kubasuni alimwi wakatolelela kutuma bashinshimi kwaamba ayi babacaafwe kwaana akwaalula buumi bwabo. Cakubonenaako ici cilatwiisha ayi Yehova alicishi shoonse pa muntu womwi awomwi alimwi alaakweelesha kucafwa muntu ucicita shilubo shinene kwaamba ayi aane. (Tus. 17:3) Amuleke twiiye shiinji Yehova mbwaakacita boobo.

YEHOVA MBWAEELESHA KUCAFWA BANTU KWAAMBA AYI BAANE

8. Ino nshiinshi Yehova nshaakacita kwaamba ayi acafwe Kaini kwaana? (Matalikilo 4:​3-7) (Amubone acikope.)

⁸ Kaini ngowakalinga mwaana wakwiiya wakwe Adamu a Efa. Alimwi wakapyana bubi kuswa kubashali bakwe. Kwiilikaawo, Baibo ilaamba ayi: “Nshaakalinga kucita lakwe mwiine shakalinga shibiibi.” (1 Joni 3:12) Mpashi ici ncocakapa kwaamba ayi Yehova ‘akake Kaini pantu pomwi acipo cakwe,’ ndyaakabenga mulambu. Muciindi cakwaaluka, “Kaini wakashimba kubukali.” Ino Yehova wakacita buyani? Wakabandikaakwe. (Amubelenge Matalikilo 4:​3-7.) Paciindi ici, Yehova wakabandika a Kaini ca nkuumbu akumulwiita ayi alaakumupa shoolwe na akatalike kucita shibotu. Alimwi wakacenjesha Kaini ayi kukalala inga kwamupa kucita cintu citabete kabotu. Cakabicaako ncakwaamba ayi Kaini taakwe kukonkela Yehova nshaakamulwiita. Taakwe kusuminisha Yehova kumucafwa kwaana. Sa Yehova wakasalawo ayi teshi akeeleshewo lyobilo kucafwa muntu uli woonse kwaana, ceebo cakwaamba ayi Kaini taakwe kumunyumfwila? Sobwe napaceyi!

9. Ino Yehova wakamucafwa buyani Defedi kwaamba ayi aane?

⁹ Yehova wakaamba pa Mwaami Defedi ayi ngu “muntu ngonsuni abuumbi.” (Milimo 13:22) Sombi Defedi wakacita shintu shimwi shibiibi abuumbi, kwiilikaawo akucita bulale akucaya muntu. Kweelana a Milawo yakwe Mose mboyakalinga kwaamba, Defedi wakalinga kweelete kucaikwa. (Lefi. 20:10; Shakube. 35:31) Sombi Yehova wakalinga kusuni kucafwa Defedi kwaamba ayi aane.b Wakatuma mushinshimi Natani kuya kuli Defedi nabi kwaamba ayi paciindi ici Defedi kaatana kulyaambilila shibiibi shakwe akwaana. Natani wakasebensesha cikoshanyo kwaamba ayi acafwe Defedi kushiba ayi wacita shilubo shinene. Defedi wakashiba ayi wakakalasha Yehova abuumbi alimwi wakaana. (2 Samwe. 12:​1-14) Wakalemba lwiimbo lwakatondesha mbwaakalinyumfwa cibiibi abuumbi pa shilubo nshaakacita. (Kulu. 51, maswi ali peculu) Bantu baanji abo bakalinga bacita shilubo bakayuminishikwa ndyebakabelenga maswi ali mulwiimbo ulu alimwi bakaana. Tulalumba abuumbi kwaamba ayi Yehova wakalinga kumusuni Defedi alimwi wakamucafwa kwaana.

10. Ino mulalinyumfwa buyani kushiba ayi Yehova alatukalikila moyo akutulekelela?

¹⁰ Yehova alipatite kubisha kuli koonse. (Kulu. 5:​4, 5) Sombi Yehova alitusuni alimwi alisuni kutucafwa na twabiisha. Lyoonse aleelesha kucafwa bantu kwaana kwiilikaawo abaabo bakacita shilubo shinene, kwaamba ayi babe abushicibusa anguwe. Cilayuminisha abuumbi kushiba ayi Yehova alisuni kunootulekelela! Na twayeeya pa kukalika moyo akulekelela kwakwe Yehova, tulaba bashinishite kutolelela kushomeka kuli nguwe akufwambaana kwaana na twaciita cilubo. Ano amuleke tubandike bashikwiiya bakwe Yesu nshobakeeya pamakani akwaana.

BASHIKWIIYA BAKWE YESU NSHOBAKEEYA PAMAKANI AKWAANA

11-12. Ino ncikoshanyo nshi Yesu ncaakasebensesha kwaamba ayi atwiishe ayi Yehova alisunishishi kunootulekelela? (Amubone cikope cili papeeji yakutaanguna.)

¹¹ Muciindi ca Beneklistu bakutaanguna, ncociindi Mesiya ndyaakalinga kusa mukubonekela. Kweelana ambotwakeeya mumutwi wamana, Yehova wakasebensesha Joni Mubombeki a Yesu Klistu kucafwa bantu kushiba kuyandika kwa kwaana.—Mate. 3:​1, 2; 4:17.

¹² Yesu ndyaakalinga pacishi, wakaiisha bantu ayi Baishi balisunishishi kunootulekelela na twabiisha. Nshila yomwi mbwaakacita boobo, nkwiinda mukulwiita bantu cikoshanyo cibotu ca mwaana wakaashuka. Musankwa uyo wacanike wakasalawo kuswawo paŋanda lyalo akutalika kucita shintu shimwi shibiibi abuumbi. Sombi ndyepakeenda ciindi ‘maano akesaamo’ alimwi wakaboolela kuŋanda. Ino baishi bakacita buyani? Yesu wakaamba ayi mwaana “kaacilibo palaale baishi bakamubona, mpeeke bakamunyumfwila nkuumbu akumucicilila bamukumbata akumufyonta.” Mwaana uyo takalinga kulangilaawo ayi baishi inga bamulekelela. Aboobo wakabasenga na inga waba musebenshi muŋanda yabo. Sombi baishi bakalinga kusunishishi kumulekelela. Bakamwiita ayi “mwanaangu,” akumutambula mumukwashi. Baishi bakaamba ayi: “Wakalinga kusowekete, ono wacanika.” (Luka 15:​11-32) Yesu ndyaakalinga kwiculu, ncakutatoonsha kwaamba ayi mankanda aanji wakabona Baishi mbobakalinga kutondesha nkuumbu kubantu ambobakalinga kufwambaana kulekelela baabo beenga baana. Cikoshanyo ici Yesu ncaakatulwiita cilayuminisha abuumbi alimwi cilatondesha ayi Yehova ngu Ishiwesu ucite nkuumbu abuumbi!

13-14. Ino nshiinshi mutumwi Pita nshakeeya pamakani akwaana, alimwi ino nshiinshi nshaakaiisha bamwi pamakani aya? (Amubone acikope.)

¹³ Mutumwi Pita wakeeya shiiyo shiyandika kuswa kuli Yesu shaamba Yehova mbwalekelela baabo baana. Liinji Pita wakalinga kucita shilubo alimwi Yesu wakalinga kumulekelela. Kucakubonenaako, Pita ndyaakakaka Yesu mankanda otatwe, wakalinyumfwa cibiibi abuumbi pacilubo ncaakacita. (Mate. 26:​34, 35, 69-75) Sombi pesule lyakwaamba ayi Yesu wabushikwa, wakaya kuli Pita ndyaakalingabo eenka kwaamba ayi abandikaakwe. (Luka 24:​33, 34; 1 Koli. 15:​3-5) Ncakutatoonsha kwaamba ayi paciindi ici, Yesu wakalinga kucishi ayi Pita wakaana alimwi wakalinga kusuni kumucafwa kushiba ayi wakamulekelela.—Maako 16:7.

¹⁴ Pita wakanyumfwa mbocinyumfwika na muntu waana alimwi walekelelwa. Aboobo wakaiishako bamwi nshakeeya pamakani aya. Ndipakeenda ciindi pesule lyakusekelela kwa Pentekositi, Pita wakasansulwiita likoto lya baJuda ayi bakacaya Mesiya. Nacibi boobo, wakabalwiita ayi: ‘Anu amwaane akwaaluka kuswa kushibiibi shanu, mwaalukile kuli Lesa kwaamba ayi shibiibi shanu shikushikwe. Na mucite boobo, Yehova ndyeshi akamupe nkusu shipya ciindi aciindi.’ (Milimo 3:​14, 15, 17, 19, 20) Pita wakeesha ayi muntu na wacita cilubo alatondesha ayi waana kwiinda mukwaaluka. Ici cilaamba ayi alacileka kuyeeya pashintu shitabete kabotu, kucileka kucita shibiibi akutalika kucita shisangalasha Lesa. Alimwi mutumwi Pita wakabacafwa kushiba ayi Yehova inga wabalekelela shibiibi shabo cakumaninina. Aboobo cilababo anga washifuuta. Kwiilikaawo, ndyepakeenda myaaka iinji, Pita wakalwiita Beneklistu ayi: ‘Yehova ucimukalikila moyo mukwiinga taasuni muntu nabi womwi kunyonyoolwa, sombi alisuni kwaamba ayi boonse baane kuswa kushibiibi shabo.’ (2 Pit. 3:9) Cilayuminisha kushiba ayi Yehova alatulekelela cakumaninina na twaana kushilubo shesu nabi kashili shinene buyani!

15-16. (a) Ino Yesu wakamucafwa buyani mutumwi Paulo kwaamba ayi aane akushiba ayi walekelelwa? (1 Timoti 1:​12-15) (b) Ino tulaakwiiya nshi mumutwi utokonkelaawo?

¹⁵ Paulo uyo wakalinga kukala ku Tasasi wakacita shintu shiinji shibiibi. Wakabapensha abuumbi bashikwiiya bakwe Klistu. (Milimo 7:58–8:3) Beneklistu baanji mpashi bakalinga kumubona ayi inga taalukiwo. Sombi Yesu wakalinga kucishi ayi Paulo inga waaluka akwaana. Lakwe a Baishi bakabona mibo ibotu Paulo njaakalinga kucite. Yesu wakaamba ayi: “Ndamusala kwaamba ayi ansebensele.” (Milimo 9:15) Alimwi Yesu wakasebensesha acaankamiko kwaamba ayi acafwe Paulo kwaana. (Milimo 9:​1-9, 17-20) Paulo wakaana akuba Mwineklistu, lyalo Yesu wakamupa ncito yakusebensa mbuli mutumwi. Liinji Paulo wakalinga kwaamba mbwaakalinga kulumba Yehova a Yesu abuumbi ceebo ca mbobakamutondesha nkuumbu. (Amubelenge 1 Timoti 1:​12-15.) Paulo wakaamba ayi: “Lesa ncaabetele shinkumbu nkweelesha kwaamba ayi waane kuswa kushibiibi shako.”—Loma. 2:4.

¹⁶ Paciindi cimwi, Paulo wakanyumfwa ayi bamulibungano lyaku Kolinto bakasuminisha musankwa umwi wakalinga kucita bulale kutolelela kuba mulibungano. Ino wakabalwiita kucita nshi ndyaakanyumfwa makani aya? Mumutwi utokonkelaawo tulaakwiiya shakacitika mulibungano lyaku Kolinto. Tulaakwiiya Yehova mbwaatondesha lusuno ndyaatolulika basebenshi bakwe ambwaabatondesha nkuumbu na baana, kuswa kushesho Paulo nshaakaamba. Alimwi tulaakwiiya ambweenga twakonkela cakubonenaako cakwe Yehova.