Yakuwa Awa Omukisa Abo Abawaayo n’Omutima Ogutawalirizibwa

KATONDA yawa abantu ekirabo eky’omuwendo ennyo, nga lino lye ddembe ery’okwesalirawo. Era awa omukisa abo bonna abafuba okukozesa eddembe lyabwe ery’okwesalirawo okuwagira okusinza okw’amazima, okutukuza erinnya lye, n’okuwagira ekigendererwa kye. Yakuwa tayagala tumugondere lwa buwaze oba lwa kutuusa butuusa luwalo. Mu kifo ky’ekyo, ayagala tumugondere olw’okuba tumwagala era olw’okuba tusiima ebyo by’atukolera.

Ng’ekyokulabirako, Abaisiraeri bwe baali mu ddungu lya Sinaayi, Yakuwa yabalagira okuzimba ekifo aw’okumusinziza. Yabagamba nti: “Ku bye mulina, mubeeko kye muwaayo eri Yakuwa. Buli alina omutima ogwagala aleete eky’okuwaayo eri Yakuwa.” (Kuv. 35:5, NW) Buli Muisiraeri yalina okuwaayo okusinziira ku busobozi bwe, era buli kintu omuntu kye yawaayo kyeyagalire, ka kibe ki oba nga kyenkana wa, kyalina okukozesebwa nga Katonda bwe yali ayagala. Kiki Abaisiraeri kye baakola?

“Buli muntu omutima gwe gwe gwakubiriza” era “buli muntu omwoyo gwe gwe gwakkirizisa” yawaayo n’omutima ogutawalirizibwa. Abasajja n’abakazi baawaayo kyeyagalire okuwagira omulimu gwa Yakuwa. Baawaayo amapeesa, eby’oku matu, empeta, zzaabu, ffeeza, ekikomo, kaniki, engoye ez’effulungu, engoye emmyufu, bafuta ennungi, ebyoya by’embuzi, amaliba g’endiga amannyike amamyufu, amaliba g’eŋŋonge, omuti gwa sita, amayinja ag’omuwendo, eby’akaloosa, n’amafuta. Mu butuufu, ebintu bye baawaayo byali bimalira ddala omulimu gwonna ogwali gulina okukolebwa, era nga bingi n’okusinga ebyali byetaagisa.—Kuv. 35:21-24, 27-29; 36:7.

Ekintu ekyasinga okusanyusa Yakuwa, si bye bintu abantu bye baawaayo okuwagira okusinza okw’amazima, wabula kwe kuba nti ekyo baakikola n’omwoyo ogutawalirizibwa. Era abantu baawaayo ebiseera byabwe n’amaanyi gaabwe. Bayibuli egamba nti ‘abakazi bonna abaalina emitima egy’amagezi baalanga’ ebintu n’emikono gyabwe. Mu butuufu, ‘abakazi bonna emitima gyabwe be gyakubiriza mu magezi baalanga ebyoya by’embuzi.’ Ate era, Yakuwa yawa Bezaaleeri ‘amagezi, okutegeera, n’okumanya’ okukola emirimu egy’emikono egya buli ngeri. Mu butuufu, Katonda yawa Bezaaleeri ne Okoliyaabu obusobozi okukola emirimu gyonna gye yali ayagala gikolebwe.—Kuv. 35:25, 26, 30-35.

Yakuwa bwe yagamba Abaisiraeri okuwaayo, yali mukakafu nti buli muntu eyalina omutima ogutawalirizibwa yandibaddeko ky’awaayo okuwagira okusinza okw’amazima. Mu butuufu, Yakuwa yawa abantu ng’abo obulagirizi n’emikisa mingi. Bwe kityo, Yakuwa yakiraga nti abaweereza be bwe baba n’omutima ogutawalirizibwa, abawa ebyo byonna bye beetaaga okukola ebyo by’ayagala era abawa n’obusobozi okubikola. (Zab. 34:9) N’olwekyo, bw’oweereza Yakuwa n’omutima ogutawalirizibwa, ba mukakafu nti ajja kukuwa emikisa mingi.

ENGERI ABAMU GYE BAWAAYO OKUWAGIRA OMULIMU MU NSI YONNA

Nga bwe kyali mu kiseera ky’omutume Pawulo, ne leero bangi babaako ssente ze bawaayo nga baziteeka mu kasanduuko omuteekebwa ssente eziweebwayo okuwagira omulimu gw’okubuulira ogukolebwa mu nsi yonna. (1 Kol. 16:2) Ku nkomerero ya buli mwezi, ebibiina biweereza ssente ezo ku ofiisi y’ettabi ly’Abajulirwa ba Yakuwa. Ate era omuntu asobola okubaako ky’awaayo ng’akisindika butereevu ku ofiisi y’ettabi ly’Abajulirwa ba Yakuwa erabirira omulimu gw’okubuulira mu nsi ye. Bw’oba oyagala okumanya endagiriro ya ofiisi y’ettabi erabirira omulimu gw’okubuulira mu nsi yo, genda ku mukutu gwaffe ogwa www.pr418.com. Ebimu ku bintu by’osobola okuwaayo ng’okolagana butereevu ne ofiisi y’ettabi bye bino:

EBIWEEBWAYO OBUTEREEVU

Omuntu asobola okuwaayo ssente okuva ku akawunta ye eya bbanka ng’akozesa Intaneeti oba ng’akozesa debit card, oba credit card. Mu nsi ezimu, ekyo omuntu ayinza okukikola ng’akozesa jw.org oba omukutu gwa intaneeti omulala gwonna ogukozesebwa ofiisi y’ettabbi ly’Abajulirwa ba Yakuwa.
Ssente enkalu, amajjolobera, oba ebintu ebirala eby’omuwendo. Owandiikirako ebbaluwa eraga nti ssente oba ebintu ebirala by’oba owaddeyo, obiwaddeyo ng’ekirabo.

OKUWAAYO OKULIKO AKAKWAKKULIZO

Omuntu awaayo ssente ze ne zikozesebwa ekibiina kya Yakuwa naye nga zisobola okumuddizibwa w’azisabira.
Alina okuwandiikirako ebbaluwa eraga nti ssente z’awaddeyo ziriko akakwakkulizo.

OKUWAAYO OKW’ENGERI ENDALA

Ng’oggyeko okuwaayo ssente enkalu n’ebintu eby’omuwendo, waliwo engeri endala gy’oyinza okuwaayo okuwagira omulimu gw’Obwakabaka ogukolebwa mu nsi yonna. Engeri ezo ziragiddwa wammanga. Bw’oba oyagala okuwaayo ng’okozesa emu ku ngeri ezo, osaanidde okusooka okwebuuza ku ofiisi y’ettabi erabirira omulimu gw’okubuulira mu nsi yo. Okuva bwe kiri nti ensi ezitali zimu zirina amateeka ga njawulo agakwata ku by’emisolo, kikulu okusooka okwebuuza ku abo abamanyi obulungi amateeka n’eby’emisolo.

Yinsuwalensi: Omuntu akiraga mu buwandiike nti bw’afanga, ssente ze eza pensoni oba eza yinsuwalensi gye yasasula ku bulamu bwe, ziweebwe ekibiina ky’Abajulirwa ba Yakuwa.

Ssente Eziri mu Bbanka: Ng’agoberera amateeka ga bbanka ye, omuntu ayinza okulagira bbanka ye nti bw’afanga, ssente eziba ku akaawunta ye ziweebwe ekibiina ky’Abajulirwa ba Yakuwa.

Emigabo oba Ssente Ezaawolebwa: Omuntu ayinza okulagira nti emigabo gye oba ssente ze yawola kampuni oba gavumenti ziweebwe ekibiina ky’Abajulirwa ba Yakuwa.

Ettaka oba Ebizimbe: Ettaka oba ebizimbe ebiyinza okutundibwa bisobola okuweebwa ekibiina ky’Abajulirwa ba Yakuwa. Bwe kiba nti ennyumba omuntu gy’awaddeyo ate mw’asula, agibeeramu okutuusa lw’afa.

Okuwaayo ng’Oddizibwa Buli Mwaka: Omuntu awaayo ssente oba emigabo gye eri ekibiina ky’Abajulirwa ba Yakuwa. Omuntu awaayo mu ngeri eno abaako ssente engereke ezimuweebwa buli mwaka okutuusa lw’afa. Oyo aba awaddeyo bayinza okumukendeereza ku musolo gw’alina okusasula mu mwaka ogwo.

Ebiraamo oba Ssente Eziri mu Kampuni: Omuntu ayinza okukola ekiraamo n’alagira nti bw’afanga, ebintu bye, ssente ze, oba amagoba agava mu ssente ze yateeka mu kampuni, biweebwe ekibiina ky’Abajulirwa ba Yakuwa. Ssente ng’ezo bwe ziba ziweebwa kibiina kya ddiini, kampuni eziwaayo eyinza okukendeezebwa ku misolo gy’esasula.

Omuntu ayagala okuwaayo ng’ayitira mu emu ku ngeri zino asaanidde okusooka okukola enteekateeka ennungi. Waliwo brocuwa mu Lungereza ne mu Lusipeyini eyitibwa Charitable Planning to Benefit Kingdom Service Worldwide esobola okuyamba abo abaagala okuwaayo mu ngeri zino okuwagira omulimu ogukolebwa Abajulirwa ba Yakuwa mu nsi yonna. Brocuwa eno eraga engeri ezitali zimu omuntu mw’ayinza okuyitira okuwaayo mu buliwo oba ng’akola ekiraamo. Ebimu ku bintu ebiri mu brocuwa eno biyinza okuba nga tebikwata ku mbeera yo okuva bwe kiri nti amateeka agakwata ku by’emisolo mu nsi yo gayinza okuba nga ga njawulo. N’olwekyo, oluvannyuma lw’okusoma brocuwa eyo, weebuuze ku abo abamanyi obulungi amateeka n’eby’emisolo. Bangi ku abo abawagidde omulimu gwaffe ogw’obwannakyewa ogukolebwa mu nsi yonna nga bawaayo mu ngeri ng’ezo, ab’obuyinza babakendeerezza ku misolo gye basasula. Bw’oba oyagala brocuwa eyo, yogerako n’omuwandiisi w’ekibiina kyammwe agikufunire.

Okumanya ebisingawo, wandiikira ofiisi y’ettabi erabirira omulimu gw’okubuulira mu nsi yo.