Okutuukiriza Obulungi Obuweereza Bwaffe—Okubuulira nga Tukozesa Essimu ez’Omu Bizimbe

Lwaki Kikulu: Kiyinza obutaba kyangu kubuulira nga tukozesa essimu ez’omu bizimbe. Kiki ekiyinza okutuyamba okubuulira n’obunyiikivu nga tukozesa enkola eyo? Kijjukire nti eyo eyinza okuba nga ye ngeri yokka ey’okutuusa amawulire amalungi ku bantu abamu. (Bar. 10:14) Waliwo ababuulizi abafunye ebirungi mu kukozesa enkola eno. (Laba akatabo Yearbook aka 2011, lup. 65, kat. 2–lup. 66, kat. 1 n’akatabo Yearbook aka 2000 lup. 54, kat. 3.)

Engeri y’Okukikolamu:

Tegeka ennyanjula ennyimpimpi, obeeko w’ogiwandiika osobole okugisomera omuntu gw’oba okubidde. Ekyo kiyinza okukuyamba okuba omuvumu. Omuntu bw’akwata essimu, mutegeerezeewo ensonga lwaki omukubidde. Kozesa erinnya ly’omuntu oyo bwe liba liragiddwa ku lukalala lw’abo ababeera mu kizimbe ekyo. Bw’oba ofundikira, mutegeeze nti wandyagadde okumutwalira akatabo akanaamuyamba okumanya ebisingawo.
Bw’oba oyogera n’omuntu ssaako akamwenyumwenyu era kozesa ebitundu byo eby’omubiri ng’olinga ayogera naye maaso ku maaso.
Beera mukkakkamu era yogera ng’olinga anyumya. Yogera mu ngeri etegeerekeka era kozesa eddoboozi eriwulikika obulungi. Weewale okusiriikirira ennyo, naye ate toyogerera kumukumu.
Kozesa amagezi. Mu bizimbe ebinene muyinza okubaamu abantu bangi ab’okukubira amasimu. N’olwekyo, oyinza okukubira abantu nga basatu, era n’owandiika ennyumba gy’oba okomyeko. Bwe tulwa mu kizimbe nga twagala okukubira buli muntu, abantu bayinza okutwekengera.

Mu Mwezi Guno Gezaako Kino:

Mu kusinza kw’amaka, mwegezeemu ku ngeri gye muyinza okukozesaamu enkola eno. Abo ababa beegezaamu buli omu asaanidde okukuba munne omugongo.