Okutuukiriza Obulungi Obuweereza Bwaffe—Okutendeka Ababuulizi Abapya

Lwaki Kikulu: Abayigirizwa ba Yesu abapya bateekwa okukola “ebintu byonna” bye yatulagira, nga muzingiramu okuyigiriza abantu abalala amazima. (Mat. 28:19, 20) Abayizi ba Bayibuli bangi baayingira dda Essomero ly’Omulimu gwa Katonda era bayinza okuba nga babuulirako ab’eŋŋanda zaabwe oba mikwano gyabwe ku ebyo bye bayiga. Bwe beeyongera okusiima ebyo bye bayiga ne bakitegeera nti Yakuwa ayagala abantu bonna bawulire amawulire amalungi, bayinza okusaba okufuuka ababuulizi. (Bar. 10:⁠13, 14) Abayizi abo bwe batuukiriza ebisaanyizo ne bafuuka ababuulizi abatali babatize, baba beetaaga okutendekebwa obulungi basobole okufuna obuvumu okubuulira n’obunyiikivu era ekyo kibayamba okukulaakulana mu by’omwoyo.—Lukka 6:40.

Engeri y’Okukikolamu:

Yamba omubuulizi omupya okufuna ebitabo bye yeetaaga okukozesa ng’abuulira era ng’ayigiriza. Mulage engeri gy’otegekamu ensawo gy’okozesa mu buweereza era munnyonnyole omugaso gwa buli kitabo ky’okozesa.
Nga muli mmwembi, mulonde ennyanjula okuva mu Obuweereza Bwaffe obw’Obwakabaka era mugyegezeemu. Kubiriza omubuulizi oyo omupya yeegezeemu ennyanjula eyo mu ngeri emwanguyira. Mwegezeemu ezimu ku mbeera ezituukirawo mu kitundu kye mubuuliramu ezisangibwa mu kitabo Ssomero ly’Omulimu, olupapula 82. Kikkaatirize nti kikulu nnyo omubuulizi okwekolako n’okwambala mu ngeri esaanira.—2 Kol. 6:3, 4.
Weeyongere okutendeka omubuulizi omupya. Mulage kaadi eraga ekitundu ky’obuuliramu era mulage n’engeri gy’ayinza okukozesaamu akapapula kwe tuwandiika ebikwata ku bantu nga tubuulira nnyumba ku nnyumba. Ate era mulage engeri gye tuwandiika ebikwata ku abo ababa basiimye obubaka bwaffe. Muyigirize engeri y’okukozesaamu omukutu jw.org mu buweereza n’akatabo Good News for People of All Nations. Ate era muyigirize engeri gy’ayinza okweyongera okuyamba abo abaagala okumanya ebisingawo.—1 Kol. 3:6.
Beera mugumiikiriza era musiime. (Nge. 25:11) Muteerewo ekyokulabirako ekirungi. Obunyiikivu bwo n’engeri gy’omufaako bijja kumuyamba nnyo ne mu biseera eby’omu maaso.

Mu Mwezi Guno Gezaako Kino:

Buulirako wamu n’omuyizi wo nnyumba ku nnyumba, era genda naye ng’ogenda okuddira omuntu oba okuyigiriza omuyizi wa Bayibuli. Bw’oba tolina muyizi wa Bayibuli akulaakulana, kozesa amagezi ago okuyamba omubuulizi yenna atalina bumanyirivu.