Okutuukiriza Obulungi Obuweereza Bwaffe—Okugaba Akatabo Baibuli Ky’Eyigiriza

Lwaki Kikulu: Akatabo Baibuli Ky’Eyigiriza ke tusinga okukozesa nga tuyigiriza abantu Bayibuli. Kyokka, nga tetunnatandika kuyigiriza muntu, tulina kusooka kukamuwa. N’olwekyo, buli omu ku ffe asaanidde okumanya obulungi engeri y’okugabamu akatabo kano nga tuli mu kubuulira. (Nge. 22:29) Waliwo engeri nnyingi ez’okugabamu akatabo kano, n’olwekyo buli mubuulizi asaanidde okukozesa eyo emwanguyira.

Engeri y’Okukikolamu:

Buuza omuntu ekibuuzo ekisikiriza, ekinaakusobozesa okumutwala obutereevu mu ssuula eddamu ekibuuzo ekyo. Oyinza okukozesa ekimu ku bibuuzo ebiri ku ntandikwa ya buli ssuula. Omuntu bw’amala okukuwa endowooza ye, soma ekyawandiikibwa ekituukirawo era omulage akatundu akakwata ku nsonga gye mwogerako era bwe kiba kisoboka mukakubaganyeeko ebirowoozo.
Ate era oyinza okukozesa ebyo ebiri mu mu nnyanjula y’akatabo kano. Ng’ekyokulabirako, oyinza okwogera ku ebyo ebyakabaawo ebiri mu mawulire era n’ogamba omuntu nti bangi baagala okufuna eby’okuddamu mu bibuuzo ebiri ku lupapula 3. Oba oyinza okumugamba nti omukyaliddeko okwogera ku bikwata ku biseera eby’omu maaso. Oluvannyuma mulage ebifaananyi ebiri ku lupapula 4-5 era omubuuze nti, “Ku bisuubizo bino, kiruwa kye wandyagadde okulaba nga kituukiridde?” Oba oyinza okugamba omuntu nti omukyaliddeko okumulaga eby’okuddamu mu bibuuzo abantu bye batera okwebuuza. Oluvannyuma mulage ebibuuzo ebiri ku lupapula 6, era omusabe alondeko ekibuuzo ky’atera okwebuuza.
Kakozese okutandika okuyigiriza abantu Bayibuli ku mulundi ogusooka. Oyinza okugamba nti: “Tukukyaliddeko okukulaga akatabo kano ke tukozesa okuyigiriza abantu Bayibuli. Wali okalabyeko? [Muleke abeeko ky’addamu.] Bw’oba olinawo akadde, nnandyagadde okukulaga engeri gye tukakozesaamu.”

Mu Mwezi Guno Gezaako Kino:

Mu kusinza kwammwe okw’amaka, mwegezeemu engeri gye muyinza okugabamu akatabo Baibuli Ky’Eyigiriza.
Oyo gw’obuulidde naye mubuulireko ennyanjula gy’oteeseteese okukozesa. (Nge. 27:17) Ennyanjula gy’oteeseteese bw’eba tetuukirawo, kozesa endala.