Engeri y’Okukozesa Akatabo Biki Bye Tuyiga mu Bayibuli?

Ebiri mu katabo Biki Bye Tuyiga mu Bayibuli? ne mu katabo Baibuli Ky’Eyigiriza tebyawukana nnyo. Obutabo buno bwombi tubukozesa okuyigiriza abantu Bayibuli era essuula zaabwo zisengekeddwa mu ngeri y’emu. Kyokka akatabo Biki Bye Tuyiga mu Bayibuli? kagonzeddwamu. Kaategekebwa okuyamba abo abazibuwalirwa okutegeera ebiri mu katabo Baibuli Ky’Eyigiriza. Akatabo Bye Tuyiga kalimu ebyongerezeddwako we bannyonnyolera amakulu g’ebigambo ebimu ebikalimu. Essuula we zitandikira tewaliiwo bibuuzo, era ne ku nkomerero ya buli ssuula tewaliiwo kasanduuko ka bibuuzo eby’okwejjukanya. Mu kifo ky’ekyo, ku nkomerero ya buli ssuula waliwo ekitundu ekiraga ensonga enkulu eziri mu ssuula eyo. Okufaananako Baibuli Ky’Eyigiriza, akatabo Bye Tuyiga tusobola okukawa abantu ekiseera kyonna, wadde ng’omwezi ogwo si ke tuba tugaba. Tuyinza kukozesa tutya ebitundu eby’enjawulo ebiri mu katabo kano nga tuyigiriza omuntu Bayibuli?

EKITUNDU EKIRINA OMUTWE OGUGAMBA NTI, BYE TUYIZE: Ebiseera ebisinga obungi bwe tuba tuyigiriza omuntu Bayibuli, tusoma akatundu oluvannyuma ne tumubuuza ekibuuzo. Naye ate kiba kitya singa oyo gw’oyigiriza aba tamanyi bulungi lulimi lw’okozesa, oba nga tamanyi kusoma bulungi? Awo oyinza okukozesa ebiri mu kitundu kino okumuyigiriza era n’omukubiriza yeesomere ebiri mu ssuula. Ku buli mulundi, oyinza okumuyigirizaayo ensonga emu okumala eddakiika nga 15. Olw’okuba ekitundu kino tekiriimu byonna ebiri mu ssuula, osaanidde okutegeka obulungi, era n’olowooza ne ku byetaago by’omuyizi wo. Naye bw’okozesa ebiri mu ssuula okuyigiriza omuyizi, ebiri mu kitundu kino muyinza okubikozesa okwejjukanya.

EBYONGEREZEDDWAKO: Ebigambo ebinnyonnyolwa mu kitundu kino bisengekeddwa okusinziira ku ssuula nga bwe ziddiriŋŋana. Omusomesa ayinza okusalawo obanga ebyongerezeddwako ebiri mu katabo Bye Tuyiga anaabikubaganyaako ebirowoozo n’omuyizi.