Ganyulwa mu Kwesomesa

LWAKI KIKULU: Okwesomesa kutuyamba “okutegeerera ddala obugazi, obuwanvu, obugulumivu, n’obuziba” bw’amazima. (Bef 3:18) Ate era kutuyamba okusigala nga tetuliiko kya kunenyezebwa oba kamogo mu nsi eno embi era ‘n’okunywerera ku kigambo eky’obulamu.’ (Baf 2:15, 16) Okwesomesa kutusobozesa okulonda ebintu eby’okusoma ebitukwatako kinnoomu. Tuyinza tutya okuganyulwa mu bujjuvu mu kusoma Bayibuli n’okwesomesa?

ENGERI Y’OKUKIKOLAMU:

• Saza ku nnyiriri era obeeko by’owandiika mu Bayibuli gy’okozesa okwesomesa, k’ebeere nga ya mpapula oba ng’eri ku ssimu

• Bw’oba osoma Ekigambo kya Katonda weebuuze ebibuuzo bino: ‘Ani? Kiki? Ddi? Wa? Lwaki? Mu ngeri ki?’

• Noonyereza. Ng’okozesa ebintu bye tukozesa okunoonyereza, noonyereza ku nsonga gy’osomako oba ku lunyiriri lw’osomye

• Fumiitiriza ku ebyo by’osomye olabe engeri gye bikukwatako

• By’oyize bikolereko mu bulamu bwo.​—Luk 6:47, 48

MULABE VIDIYO, “NYWERERA KU KIGAMBO”​—NGA WEESOMESA BULUNGI, OLUVANNYUMA MUDDEMU EBIBUUZO BINO:

• Ab’oluganda abamu baganyuddwa batya mu kwesomesa?

• Lwaki tusaanidde okusooka okusaba nga tetunneesomesa?

• Kiki ekisobola okutuyamba okutegeera obulungi bye tuba tusomye?

• Biki bye tuyinza okukozesa okulamba ku bye tusomye mu Bayibuli?

• Lwaki kikulu nnyo okufumiitiriza bwe tuba tusoma Bayibuli?

• Bye tuyize tusaanidde kubikozesa tutya?