Tusobola Okwesiga Amagezi Bayibuli g’Ewa ku Kituufu n’Ekikyamu

Singa tutambuza obulamu bwaffe mu ngeri ffe gye twagala oba nga tusinziira ku ndowooza z’abalala, tetusobola kuba bakakafu nti ebyo ebinaavaamu binaaba birungi. Bayibuli etubuulira ensonga lwaki kiri bwe kityo, era erimu obulagirizi obwesigika obukwata ku mitindo gy’empisa obusobola okutuyamba okuba abasanyufu.

TWETAAGA OBULAGIRIZI OBUVA ERI KATONDA

Bayibuli eraga nti twetaaga obulagirizi bwa Yakuwaa Katonda era nti tetusobola kukola kintu kyonna awatali bulagirizi bwe. (Yeremiya 10:23) Eyo ye nsonga lwaki yatuwa emitindo egikwata ku mpisa egiri mu Bayibuli. Yakuwa atwagala nnyo era tayagala tusalewo mu ngeri eneetulumya oba enaakalubya obulamu bwaffe. (Ekyamateeka 5:29; 1 Yokaana 4:8) Ate era olw’okuba ye Mutonzi waffe, alina amagezi n’okumanya okusobola okutuwa obulagirizi obusingayo obulungi obukwata ku mpisa. (Zabbuli 100:3; 104:24) Wadde kiri kityo, Katonda takaka bantu kutambulira ku mitindo gye.

Yakuwa yawa Adamu ne Kaawa buli kimu kye baali beetaaga okusobola okuba abasanyufu. (Olubereberye 1:28, 29; 2:8, 15) Ate era yabawa ebiragiro ebitaali bizibu kugondera, ng’asuubira nti bandibigondedde. Kyokka yabaleka beesalirewo obanga banaagondera ebiragiro ebyo oba nedda. (Olubereberye 2:9, 16, 17) Eky’ennaku, Adamu ne Kaawa baasalawo okutambulira ku mitindo gyabwe mu kifo ky’okutambulira ku mitindo gya Katonda. (Olubereberye 3:6) Biki ebyavaamu? Abantu basobodde okuba abasanyufu nga bakola ekyo bo kye balowooza nti kye kituufu? Nedda. Ebyafaayo biraze nti bwe tutatambulira ku mitindo gya Katonda, tetusobola kuba mu mirembe n’essanyu eby’olubeerera.—Omubuulizi 8:9.

Bayibuli erimu amagezi ge twetaaga okusobola okusalawo obulungi, ka tube nga tubeera mu kitundu ki eky’ensi. (2 Timoseewo 3:16, 17; laba akasanduuko “Ekitabo ky’Abantu Bonna.”) Laba engeri ekyo Bayibuli gy’esobola okukikolamu.

Laba ensonga lwaki Bayibuli eyitibwa “Ekigambo kya Katonda.”—1 Abasessalonika 2:13. Laba vidiyo, Ani Yawandiika Bayibuli? ku jw.org.

ENSONGA LWAKI ABAMU BALOWOOZA NTI BAYIBULI TESOBOLA KUBAYAMBA

Abantu abamu bagamba nti Bayibuli tesobola kubawa bulagirizi obukwata ku mpisa. Bayinza okugamba ebintu bino wammanga.

Omuntu ayinza okugamba nti: “Ebiri mu Bayibuli bikontana.”

Ekituufu: Mu kusooka oyinza okulaba ng’ennyiriri ezimu eziri mu Bayibuli ezikontana, naye bw’omanya engeri gye zaawandiikibwamu na ddi lwe zaawandiikibwa ojja kukizuula nti tezikontana.

Okulabayo ebyokulabirako ku nsonga eno, soma ekitundu ekirina omutwe, “Are There Contradictions in the Bible?” ku jw.org.

Omuntu ayinza okugamba nti: “Abantu abagamba nti bakolera ku ebyo ebiri mu Bayibuli bakola ebintu ebibi, n’olwekyo amagezi g’ewa agakwata ku mpisa si malungi.”

Ekituufu: Bwe kiba nti abantu tebakolera ku ebyo Bayibuli by’eyigiriza, Bayibuli si y’ebaako obuzibu. Bayibuli yalaga nti abantu bangi nga mw’otwalidde ne bannaddiini abagamba nti bakolera ku ebyo ebiri mu Bayibuli bandyeyisizza mu ngeri ekontana n’ebyo ebigirimu. Ate era yalaga nti olw’ensonga eyo, enjigiriza za Bayibuli ‘zandyogeddwako bubi.’—2 Peetero 2:1, 2.

Okusobola okulaba ekyokulabirako ku ngeri bannaddiini bangi gye batagoberedde ebyo Bayibuli by’eyigiriza, laba ekitundu “Is Religion Just Another Big Business?” ku jw.org.

Omuntu ayinza okugamba nti: “Bayibuli ereetera abo abakola by’egamba obutawa kitiibwa abo abatakola by’egamba.”

Ekituufu: Bayibuli etukubiriza okuwa abantu bonna ekitiibwa. Tewagira bintu bino wammanga.

Omuntu okwetwala nti wa waggulu ku balala.—Abafiripi 2:3.
Obutassa kitiibwa mu bantu abeeyisa mu ngeri ey’enjawulo oba abalina enzikiriza ez’enjawulo.—1 Peetero 2:17.
Omuntu okukakaatika endowooza ye ku balala.—Matayo 10:14.

Bayibuli eraga nti Katonda ayisa abantu mu ngeri ey’ekisa era ey’obwenkanya era ayagala naffe tukole kye kimu.—Abaruumi 9:14.

Okumanya ebisingawo, laba ekitundu, “Okussa Ekitiibwa mu Ndowooza z’Abalala—Engeri Bayibuli gy’Eyinza Okuyambamu” ku jw.org/lg.

BAYIBULI ETUBUULIRA KATONDA BY’AYAGALA TUKOLE

Bayibuli etubuulira engeri Katonda gy’azze akolaganamu n’abantu okuviira ddala ku ntandikwa. Ebyo ebigirimu bituyamba okumanya ebyo Katonda by’atwala nti bituufu, n’ebyo by’atwala nti bikyamu, eby’omuganyulo, n’ebitali bya muganyulo. (Zabbuli 19:7, 11) Emisingi gye tuyiga okuva mu Bayibuli gituyamba okweyisa mu ngeri ey’amagezi buli lunaku.

Ng’ekyokulabirako, lowooza ku magezi agali mu Engero 13:20: “Omuntu atambula n’ab’amagezi naye ajja kuba wa magezi, naye oyo akolagana n’abasirusiru ajja kugwa mu mitawaana.” Amagezi ago gakyakola ne leero, nga bwe kyali edda. Bayibuli erimu emisingi ng’egyo egisobola okutuyamba.—Laba akasanduuko “Amagezi Agali mu Bayibuli Gakyakola ne Leero.”

Naye oyinza okwebuuza, ‘Nnyinza ntya okuba omukakafu nti emitindo egiri mu Bayibuli egikwata ku mpisa gisobola okunnyamba?’ Ekitundu ekiddako kiraga engeri Bayibuli gye yayambamu abantu abatali bamu.

a Yakuwa lye linnya Katonda.—Zabbuli 83:18.

AMAGEZI AGALI MU BAYIBULI GAKYAKOLA NE LEERO

Wadde nga Bayibuli yawandiikibwa emyaka nga 2,000 emabega, ekyali ya mugaso ne leero. Ne leero abantu baagala okuba abasanyufu era baagala okuba mu bulamu obulungi. (Omubuulizi 1:9) Amagezi agali mu Bayibuli gasobola okutuyamba okutuuka ku bintu ebyo.

Obwesigwa

“Twagala okubeera abeesigwa mu bintu byonna.”—Abebbulaniya 13:18.
“Omubbi alekere awo okubba, wabula afube okukola emirimu.”—Abeefeso 4:28.

Okukolagana n’Abalala

“Buli muntu alemenga kunoonya bimugasa yekka, wabula anoonye ebigasa abalala.”—1 Abakkolinso 10:24.
“Mweyongere okugumiikirizigananga n’okusonyiwagananga.”—Abakkolosaayi 3:13.

Okusalawo

“Atalina bumanyirivu akkiriza buli kye bamugamba, naye omuntu ow’amagezi afumiitiriza ku buli ky’agenda okukola.”—Engero 14:15.
“Omuntu ow’amagezi alaba akabi ne yeekweka, naye atalina bumanyirivu agenda bugenzi mu maaso n’agwa mu mitawaana.”—Engero 22:3.