Ha pa 10 maˬ

Na yuˬ tuˬ haˍ jaˇ tehꞈ nawˬ dawˇ jaw˗aw laˇ? Jawˇ mawˇ Daˍviˆ kaꞈ chi hkʼe dawˇ jaw ve yoˬ. Hkʼe te leh, yawˇ Yaˬhoˉvaˬ geh bon lawˬ ve, “ngaˬ htaꞈ na yuˬ puiˉ ve chaw kʼawꞈ hpehꞈ la piˇ˗oˆ.” (Chiˇ 51:12) Daˍviˆ Yaˬhoˉvaˬ htaꞈ haꞈ ve htawˇ, teˇ pawˆ pawˆ kʼo yawˇ na yuˬ tuˬ haˍ jaˇ tehꞈ dawˇ ve yoˬ. Ngaˬ hui kaꞈ chi hkʼa shuˍ dawˇ ve yoˬ. Aˬ htoꞈ ma pa taw le? Awˬ hkʼaˇ teˇ hkʼaˇ lehˬ, venˇ baˆ htaꞈ pa taw ngaˬ hui maˇ na yuˬ gaˇ ve yoˬ. 2 hkʼaˇ teˇ hkʼaˇ lehˬ, Saˍtanˍ ngaˬ hui htaꞈ yawˇ hkʼa shuˍ Gʼuiˬ sha ve kanˇ paˆ htaꞈ tawˍ daꞈ tcuh gaˇ ve yoˬ. (2 Kawˇ 11:3) 3 hkʼaˇ teˇ hkʼaˇ lehˬ, miˬ guiˬ hkʼoˆ lo maˇ˗awˍ ve ‘maˇ na yuˬ puiˉ ve chaw teˇ hpaˍ ve nyi ma awˬ hkʼaw lo kanˉ te chehˇ ve geh ngaˬ hui chehˇ ve yoˬ.’ (Efs 2:2) Chi htaꞈ pa taw, Yaˬhoˉvaˬ leh yawˇ kanˇ paˆ piˇ ve chaw hkawˇ na yuˬ tuˬ, ngaˬ hui maˇ biˇ ve chaw hpehꞈ ve, Saˍtanˍ leh miˬ guiˬ ve awˬ liˇ awˬ hkʼaˇ htaꞈ kaꞈ gʼa tawˍ daꞈ ve yoˬ. w23.10 6 ¶1

Yeˍsuˆ anˇ tuˬ te leh iˉ kaˆ htaꞈ a pehˉ meuˇ gʼuiˬ hpehꞈ la piˇ ve awˬ lawn ngaˬ hui aˬ htoꞈ ma henˇ yuˬ gʼa ve le? Yeˍsuˆ anˇ tuˬ te gʼa ve chi yawˇ cheuˬ ve tehꞈ maˇ gʼa kʼoˆ leh nyi ma nuˇ nehˬ ve htaꞈ ngaˬ hui henˇ yuˬ gʼa ve yoˬ. Yawˇ te gʼa ve awˬ ceuˬ yawˇ cheuˬ ve tehꞈ teˇ pawˆ˗ehˬ kaꞈ maˇ gʼa kʼoˆ jaw. Yawˇ nyi ma nuˇ nehˬ leh hkʼaˬ htaˆ kaꞈ Yaˬhoˉvaˬ htaꞈ chiˇ mvuh ve yoˬ. Yeˍsuˆ yawˇ awˬ ceuˬ chi ve teˇ hpaˍ te gʼa ve lehˬ Gʼuiˬ sha ga laˇ ve tehꞈ kʼoˆ ve yoˬ. (Yoˇ 5:19, 30; 8:28) Ngaˬ hui Yeˍsuˆ htaꞈ henˇ yuˬ leh hkʼaˬ htaˆ kaꞈ nyi ma nuˇ nehˬ ve kʼo, ngaˬ hui te gʼa ve awˬ ceuˬ htaꞈ cheuˬ ve tehꞈ maˇ kʼoˆ. Ngaˬ hui hkʼaˇ ngaˬ hui awˬ to htaꞈ taˇ chiˇ mvuh. Yaꞈ hkʼaˇ, ngaˬ hui Yaˬhoˉvaˬ ve kanˉ daꞈ jaˇ ve chi hkʼe ve gʼa te ve lehˬ yawˇ htaꞈ chiˇ mvuh cawˇ ve yoˬ. (Yrm 9:23, 24) Ngaˬ hui te gʼa ve awˬ ceuˬ hkʼa peu˗eˬ lehˬ Yaˬhoˉvaˬ maˇ ga laˇ ve kʼo, ngaˬ hui daꞈ ve awˬ ceuˬ htaꞈ te maˇ gʼa taˬ. (1 Kawˇ 1:26-31) Ngaˬ hui nyi ma nuˇ nehˬ ve kʼo, awˬ nu ve chaw daꞈ ve htaꞈ te gʼa ve lehˬ ngaˬ hui htaꞈ pa taw yoˬ tehꞈ maˇ kʼoˆ. Yaꞈ hkʼaˇ, ngaˬ hui te ve awˬ ceuˬ htaꞈ Yaˬhoˉvaˬ mawˬ leh awˬ hpfuhˇ shiˍ ve tehꞈ ngaˬ hui shiˍ ve yoˬ. (Maꞈ 6:2-4; Heˍ 13:16 htaꞈ tehˆ daꞈ sheˍ.) Nyi ma nuˇ nehˬ ve awˬ lawn ngaˬ hui Yeˍsuˆ htaꞈ henˇ yuˬ ve kʼo, Yaˬhoˉvaˬ ngaˬ hui htaꞈ nyi hkʼaˇ suh jaˇ tuˬ yoˬ.—1 Peˍ 5:6. w23.04 4-5 ¶9, 11-12

Shu awˬ pon awˬ bon cawˬ tuˬ dawˇ nyi piˇ˗oˆ tehꞈ Pawˇluꞈ awˬ viˉ awˬ nyi Hkriꞈ yaˇ htaꞈ awˬ gʼaˇ piˇ ve yoˬ. Leh chi ve teˇ tawn ngaˬ hui hpawnˬ daꞈ kuiˬ hkʼaw hkʼaˬ hkʼe yuˬ yehˇ gʼa tuˬ le? Hkriꞈ yaˇ awˬ moˍ hkʼaw awˬ nu ve awˬ viˉ awˬ nyi kaꞈ hkʼawꞈ gaˇ ve tehꞈ tawnˇ taˍ sheˍ. Dawˇ nyi sheˍ, nawˬ awˬ chawˇ geh tawˇ yaw daꞈ htaˇ, nawˬ teˇ gʼaˇ tiˉ yaw leh awˬ chawˇ htaꞈ tawˇ yaw tuˬ awˬ yanˇ maˇ piˇ ve laˇ? Nawˬ chi hkʼe maˇ te taˬ. Nawˬ ve awˬ chawˇ htaꞈ kaꞈ yaw tcuh gaˇ ve yoˬ. Chi ve hkʼa shuˍ shuˍ, hpawnˬ daꞈ ve hkʼaw ngaˬ hui teˇ gʼaˇ le le htaꞈ kaꞈ hkʼawꞈ tcuh gaˇ ve yoˬ. Ngaˬ hui awˬ viˉ awˬ nyi htaꞈ awˬ gʼaˇ piˇ daꞈ gʼa ve daꞈ jaˇ ve teˇ hkʼaˇ lehˬ, yawˇ hui ve yonˍ hkʼaˇ htaꞈ kʼoˆ tuˬ kaꞈ awˬ yanˇ piˇ sheˍ. (1 Kawˇ 10:24) Chi htaꞈ pa taw, awˬ nu ve chaw kaꞈ hkʼa dehꞈ hkʼawꞈ tuˬ ngaˬ hui chi suhˉ˗ehˍ hkʼawꞈ cawˇ ve yoˬ. Nawˬ chi suhˉ˗ehˍ hkʼawꞈ ve htawˇ laiˉ lawn htaꞈ teˇ pawˆ tiˉ taˇ hkʼawꞈ. Awˬ tawn teˇ tawn hkʼaw nawˬ laiˉ lawn hkʼawꞈ˗oˬ ve kʼo, awˬ nu ve chaw hkʼaˬ hkʼe hkʼawꞈ tuˬ maˇ shiˍ ve yoˬ. w23.04 22-23 ¶11-13

Ngaˬ hui awˬ nu ve chaw htaꞈ ga piˇ ve lehˬ, daꞈ ve awˬ lawn sha tanˇ gʼa hto maˍ piˇ ve tehꞈ tawnˇ taˍ cawˇ ve yoˬ. Ngaˬ hui Gʼuiˬ sha ve kanˉ te htaˇ, teˇ ceuˬ htaꞈ ceh tiˉ maˇ vawˆ tiˍ taˍ ve kʼo, pa tuˬ sha ve yoˬ. Yonˍ hkʼaˇ, dawˇ hkʼaˇ, hpehꞈ laˬ jaw ve, leh chaw liˇ vaˇ liˇ maˇ shuˍ daꞈ ve chaw htaꞈ gʼa mawˬ daꞈ ve yoˬ. Tcuh yaˇ Pawˇluꞈ hkʼaˬ htaˆ kaꞈ pa tuˬ gu hehnˇ taˍ ve yoˬ. Leh ngaˬ hui kaꞈ yawˇ ve awˬ lawn htaꞈ henˇ yuˬ gʼa ve yoˬ. Yeˍsuˆ Pawˇluꞈ htaꞈ leuˆ yuˬ leh “buiˇ shaˆ aˉ naˆ chaw hui awˬ pon tcuh yaˇ hpehꞈ” tuˬ kʼai tcuh ve yoˬ. (Roˉ 11:13) Hkʼe te leh, Yuˇdaꞈ chaw, Heˍlaˍsaˆ chaw, cuˇ yiˍ cawˬ ve chaw, mvuhˇ miˬ yaˇ, mvuhˇ miˬ hpawˇ kanˉ te paˍ, leh jawˇ mawˇ htaꞈ Pawˇluꞈ bon maˍ piˇ ve yoˬ. Pawˇluꞈ lehˬ chaw chi teˇ hpaˍ htaꞈ bon maˍ piˇ leh nyi ma hkʼaw gaˬ tuˬ te gʼa ve yoˬ. Yawˇ lehˬ ‘chaw hkʼa peu˗eˬ awˬ pon teˇ ceuˬ le le hpehꞈ la peuˬ.’ (1 Kawˇ 9:19-22) Pawˇluꞈ yawˇ mawˬ daꞈ ve chaw htaꞈ yonˍ hkʼaˇ, hpehꞈ laˬ jaw ve awˬ lawn, leh chaw liˇ vaˇ liˇ maˇ shuˍ daꞈ ve chaw awˬ pon dawˇ nyi piˇ ve yoˬ. Chi ve htaꞈ pa taw, yawˇ pa tuˬ ga piˇ leh yawˇ hui Yaˬhoˉvaˬ ve awˬ lawn htaꞈ nyi ma pfuhˇ tuˬ, Pawˇluꞈ awˬ hkʼaˇ ca leh teˇ gʼaˇ le le htaꞈ yaw daꞈ ve yoˬ. Ngaˬ hui kaꞈ chi hkʼa shuˍ gʼa te cawˇ ve yoˬ. Ngaˬ hui Gʼuiˬ sha ve kanˉ te cheuˬ la tuˬ, pa tuˬ gʼa gu hehnˇ taˍ leh, na ve chaw teˇ gʼaˇ leh teˇ gʼaˇ htaꞈ keunˍ daꞈ ve hkʼe, hto maˍ piˇ tuˬ daꞈ jaˇ ve awˬ hkʼaˇ gʼa ca ve yoˬ. w23.07 23 ¶11-12

Nyi ma nuˇ nehˬ ve chaw lehˬ awˬ gʼaˇ nuˇ ve maˇ heˆ. Awˬ gʼaˇ hehnˇ ve chaw hpehꞈ ve yoˬ. Dawˇ haˍ ve awˬ lawn gʼa hpuˇ htaˇ, yawˇ nyi ma gawˬ lehˍ te tuˬ gʼa coˇ caˇ jaˇ. Nyi ma nuˇ nehˬ ve lehˬ ‘Gʼuiˬ sha ve awˬ ha hpu ve awˬ shiˍ nawꞈ ve hkʼaw’ teˇ ceuˬ hpehꞈ ve yoˬ. (Gaˍ 5:22, 23) Heˍlaˍsaˆ hkawˇ “nyi ma nuˇ nehˬ ve” tehꞈ kʼoˆ gaˇ ve lehˬ, iˉ mvuhˇ hteunˍ haiˬ jaˇ ve htaꞈ meuˇ la tuˬ te piˇ ve yoˬ. Yaꞈ hkʼaˇ, yawˇ meuˇ la˗oˬ ve htawˇ, awˬ gʼaˇ hehnˇ jaˇ sheˍ. Chaw yaˇ lehˬ awˬ yanˇ teˇ yanˇ hkʼaw ceh tiˉ awˬ gʼaˇ nuˇ ve, leh awˬ gʼaˇ hehnˇ ve hpehꞈ kʼai gʼa˗aw laˇ? Ngaˬ hui te gʼa ve htawˇ, ngaˬ hui ve awˬ gʼaˇ awˬ shaˉ htaꞈ pa taw maˇ heˆ. Ngaˬ hui htaꞈ ga laˇ gʼa ve a yeˇ uiˍ jaˇ ve lehˬ, Yaˬhoˉvaˬ geh daꞈ kehˬ ve awˬ ha hpu gʼa tuˬ lawˬ cawˇ ve yoˬ. Nyi ma nuˇ nehˬ te gʼa˗oˬ ve chaw laiˉ gʼaˇ ve awˬ lawn htaꞈ ngaˬ hui gʼa mawˬ ve yoˬ. Yaˬhoˉvaˬ ve Shaˉhkiˆhkanˍ ve chaw tawˍ taˍ paˍ yawˇ hui htaꞈ nyi ma zuhˆ tuˬ te piˇ ve htawˇ, yawˇ hui nyi ma nuˇ nehˬ ve tehꞈ hpeuꞈ maw piˇ leh, chi hkʼe te piˇ ve htaꞈ mawˬ ve chaw Yaˬhoˉvaˬ ve Shaˉhkiˆhkanˍ ve chaw htaꞈ daꞈ ve hpawˇ nyi mawˬ ve yoˬ.—2 Tiˆ 2:24, 25. w23.09 15 ¶3

Chaw mawˇ chaw kehˉ 24 gʼaˇ hkui tcuhˉ teh leh Yaˬhoˉvaˬ htaꞈ oˉ kʼoˍ pui chehˇ ve tcuh yaˇ Yoˇhanˬ mawˬ ve yoˬ. Yawˇ hui Yaˬhoˉvaˬ htaꞈ chiˇ mvuh leh kʼoˆ ve, “Gʼuiˬ sha˗oˬ, nawˬ lehˬ awˬ meꞈ awˬ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ htaꞈ gʼa keunˍ ve yoˬ.” (Hpeuꞈ 4:10, 11) Chi hkʼoˆ kaꞈ, ka tiꞈ yeˬ ve mvuhˇ naw ma tcuh yaˇ kaꞈ Yaˬhoˉvaˬ htaꞈ chiˇ mvuh ve yoˬ. Yawˇ hui mvuhˇ naw ma hkʼoˆ Yaˬhoˉvaˬ geh chehˇ leh yawˇ htaꞈ hkʼa dehꞈ shiˍ ve yoˬ. Yawˇ hui Yaˬhoˉvaˬ te ve awˬ ceuˬ htaꞈ mawˬ ve pa taw, yawˇ hkʼaˬ hkʼe ve Gʼuiˬ sha hpehꞈ ve leh yawˇ ve te hkʼaˇ dawˇ hkʼaˇ hkʼaˬ hkʼe cawˬ ve htaꞈ kaꞈ yawˇ hui hkʼa dehꞈ shiˍ ve yoˬ. Chi ve lehˬ yawˇ hui Yaˬhoˉvaˬ htaꞈ chiˇ mvuh gaˇ tuˬ te piˇ ve yoˬ. (Yb 38:4-7) Ngaˬ hui ve bon lawˬ hkawˇ hkʼaw Yaˬhoˉvaˬ chiˇ mvuh ve htaꞈ gʼa tcuh gaˇ ve yoˬ. Ngaˬ hui Yaˬhoˉvaˬ htaꞈ haꞈ leh hkʼaˬ hkʼe taw yawˆ yan ve, bon lawˬ hkawˇ hkʼaw kʼoˆ piˇ gaˇ ve yoˬ. Nawˬ Liꞈ hpu gʼaw leh hkʼa dehꞈ hpfuhˆ nyi htaˇ, Yaˬhoˉvaˬ ve te hkʼaˇ dawˇ hkʼaˇ hkʼaˬ ve teˇ ceuˬ nawˬ dawˇ cawˇ jaˇ ve htaꞈ dawˇ nyi sheˍ. (Yb 37:23; Roˉ 11:33) Leh nawˬ bon lawˬ htaˇ, yawˇ ve te hkʼaˇ dawˇ hkʼaˇ htaꞈ nawˬ hkʼaˬ hkʼe dawˇ ve kaꞈ kʼoˆ piˇ sheˍ. Chi hkʼoˆ kaꞈ, ngaˬ hui leh awˬ viˉ awˬ nyi teˇ gʼaˇ le le awˬ pon, yawˇ ngaˬ hui htaꞈ haꞈ ve pa taw, yawˇ htaꞈ chiˇ mvuh piˇ gaˇ ve yoˬ.—1 Saˍ 2:1, 2. w23.05 3-4 ¶6-7

1919 hkʼawꞈ htaˇ, Gʼuiˬ sha ve chaw lehˬ, Uiˍ ve Baˍbuˍlonˍ hkʼaw tawˆ la ve yoˬ. Leh oˇ ve teˇ hkʼawꞈ hkʼaw “ka tiꞈ yeˬ leh cuˇ yiˍ cawˬ ve awˬ ceˬ” cawˬ la ve yoˬ. Yawˇ hui nyi ma nuˇ nehˬ ve chaw “daꞈ kehˬ ve yaꞈ kʼaw” hpaw gehˇ sheˍ ve hkʼoˆ toˇ tuˬ ga piˇ ve yoˬ. (Maꞈ 24:45-47; Isy 35:8) Oˇ htaˇ teˇ co˗e ve chaw awˬ gʼuˇ suhˍ htaˇ gu teh taˍ laˇ ve awˬ ceuˬ, chaw laiˉ gʼaˇ Yaˬhoˉvaˬ htaꞈ shiˍ la leh yawˇ ve a loˍ htaꞈ te gʼa tuˬ kaꞈ ga piˇ ve yoˬ. (Tawˇ 4:18) Yawˇ hui ve a shaꞈ teꞈ hkʼaˇ Gʼuiˬ sha ve a loˍ htaꞈ gʼaꞈ te gʼa tuˬ kaꞈ ga piˇ ve yoˬ. Yaꞈ hkʼaˇ, Yaˬhoˉvaˬ ve chaw te hkʼaˇ dawˇ hkʼaˇ teˇ pawˆ tiˉ pa gʼa tuˬ yawˇ maˇ dawˇ law. Yawˇ htaꞈ oˉ kʼoˍ pui ve chaw awˬ meu˗eˇ awˬ meu˗eˇ daꞈ kehˬ la tuˬ yawˇ ga piˇ ve yoˬ. Ngaˬ hui te ve teˇ ceuˬ le le Gʼuiˬ sha nyi hkʼaˇ suh tuˬ te piˇ ve kʼo, ngaˬ hui hkʼaˬ hkʼe taw ha lehˬ jaˇ tuˬ ve htaꞈ dawˇ nyi sheˍ! Yaꞈ kʼaw hkʼaˬ htaˆ kaꞈ daꞈ tuˬ hkʼa dehꞈ gʼa nyi haꞈ shaˉ ve yoˬ. Chaw maˇ maˇ Uiˍ ve Baˍbuˍlonˍ hkʼaw tawˆ la tuˬ 1919 hkʼawꞈ tanˬ leh ka tiꞈ yeˬ leh cuˇ yiˍ cawˬ ve awˬ ceˬ lehˬ daꞈ kehˬ ve yaꞈ kʼaw htaꞈ caˉ leh gu ve yoˬ. w23.05 17, 19 ¶15-16

Uˉ peunˍ ve Kawˍmiˍtiˍ htaꞈ ga piˇ paˍ te tuˬ maˍ piˇ ve yoˬ. Leh chi teˇ hkui ga piˇ paˍ chi teˇ hpaˍ a yeˇ uiˍ ve awˬ vuiˬ laiˉ ceuˬ te chehˇ ve yoˬ. Leh yawˇ hui awˬ gʼuˇ suhˍ hpawˇ Yeˍsuˆ ve yawˬ awˬ moˍ htaꞈ nyi haꞈ shaˉ tuˬ yoˬ. Tuꞈ jaˇ hkanˍ jaˇ ve peuˬ la paˇ neˇ htaˇ, leuˆ yuˬ taˍ ve chaw mvuhˇ naw ma hkʼoˆ lo taˆ˗e peuˬ˗oˬ ve htawˇ, awˬ tehˬ oˉ kʼoˍ pui ve cawˬ sheˍ ve yoˬ. Gawˇgaˆ leh Maˍgawˇgaˆ chi lehˬ mvuhˇ miˬ teˇ hpaˍ geh pawnˇ daꞈ leh ngaˬ hui htaꞈ ca bawˆ la ve htawˇ, Yeˍsuˆ sheh kʼai shehˍ hpaˇ hpehꞈ ve pa taw, ngaˬ hui Yaˬhoˉvaˬ htaꞈ oˉ kʼoˍ pui gʼa sheˍ ve yoˬ. (Ysk 38:18-20) Yaꞈ hkʼaˇ, bawˆ la ve chi maˇ gʼaˇ. Yawˇ hui lehˬ Yaˬhoˉvaˬ ve chaw yawˇ htaꞈ oˉ kʼoˍ maˇ pui tuˬ tawˍ piˇ maˇ gʼa. Yawˇ ngaˬ hui htaꞈ awˬ tehˬ ga laˇ tuˬ yoˬ. Tcuh yaˇ Yoˇhanˬ mawˬ ve zuhꞈ maˆ hkʼaw “chaw awˬ moˍ lonˉ” chi ve lehˬ Yeˍsuˆ ve awˬ kaˍ awˬ nu ve yawˬ teˇ hpaˍ hpehꞈ leh “uiˍ jaˇ ve tuꞈ ve hkanˍ ve awˬ hkʼaw lo tawˆ la” ve htaꞈ gʼa mawˬ ve yoˬ. (Hpeuꞈ 7:9, 14) Leh Yaˬhoˉvaˬ yawˇ ve chaw htaꞈ awˬ tehˬ ponˬ piˇ tuˬ yoˬ! w24.02 6 ¶13-14

Ngaˬ hui daꞈ kehˬ ve awˬ ha hpu gʼa tuˬ hkʼaˬ hkʼe gʼa te ve le? Ngaˬ hui Yaˬhoˉvaˬ geh daꞈ kehˬ ve awˬ ha hpu gʼa tuˬ Liꞈ hpu gʼaw leh hkʼa dehꞈ hpfuhˆ nyi ve, daꞈ kehˬ ve awˬ ha hpu beˆ maˍ piˇ ve Gʼuiˬ sha ve kanˉ hkʼaˇ htaꞈ meuˆ daꞈ tuˬ, ngaˬ hui gʼa lawˬ cawˇ ve yoˬ. Chi hkʼe te htaˇ, “awˬ ha hpu ve awˬ shiˍ nawꞈ la” tuˬ ga laˇ tuˬ yoˬ. (Gaˍ 5:22, 23) Yaˬhoˉvaˬ yawˇ mehˆ gʼuˇ suhˍ dawˇ ve leh daꞈ ve awˬ ceuˬ htaꞈ te ve chaw ceh tiˉ yawˇ ve daꞈ kehˬ ve awˬ ha hpu piˇ ve yoˬ. Chi htaꞈ pa taw, ngaˬ hui dawˇ ve leh maˇ daꞈ ve awˬ ceuˬ htaꞈ caˉ leh te ve kʼo, yawˇ ngaˬ hui htaꞈ daꞈ kehˬ ve awˬ ha hpu maˇ peꞈ laˇ ve yoˬ. (1 Hteˇ 4:7, 8) Chi hkʼoˆ kaꞈ, ngaˬ hui daꞈ kehˬ ve awˬ ha hpu caˉ leh gʼa tuˬ, ‘Gʼuiˬ sha ve tawˇ hkawˇ htaꞈ maˇ shawˍ maˇ caˉ maˇ gʼa te.’ (1 Hteˇ 5:20) Liꞈ hpu hkʼaw “Gʼuiˬ sha ve tawˇ hkawˇ” tehꞈ kʼoˆ ve lehˬ, Gʼuiˬ sha ve awˬ ha hpu dawˇ pawnˍ piˇ ve awˬ lawn htaꞈ kʼoˆ gaˇ ve yoˬ. Chi lehˬ Yaˬhoˉvaˬ ve awˬ nyi gaˬ la tuˬ ve leh, ngaˬ hui ve awˬ co˗e lehˬ awˬ leh meuˇ ve awˬ yanˇ hkʼaw chehˇ taˍ ve tehꞈ kʼoˆ gaˇ ve yoˬ. Chi htaꞈ pa taw, Yaˬhoˉvaˬ ve awˬ nyi gaˬ la tuˬ maw jaˇ sheˍ tehꞈ maˇ gʼa dawˇ leh, Aˍmaˍgeˍdonˍ ngaˬ hui ve awˬ co˗e htaˇ maˇ gaˬ la sheˍ tehꞈ maˇ gʼa dawˇ nyi cawˇ ve yoˬ. Chi hkʼe dawˇ ve aꞈ kehˉ ngaˬ hui Yaˬhoˉvaˬ ve awˬ nyi gaˬ la tuˬ yoˬ tehꞈ hkʼaˬ htaˆ kaꞈ dawˇ nyi cawˇ ve yoˬ. Chi htaꞈ pa taw, ngaˬ hui Yaˬhoˉvaˬ ve a loˍ htaꞈ te leh teˇ nyi le le ‘ngaˬ hui Gʼuiˬ sha htaꞈ yawˆ yan ve chaw hpehꞈ cawˇ ve yoˬ.’—2 Peˍ 3:11, 12. w23.06 12-13 ¶13-14

Tawˇ yaw tuˬ awˬ hkʼeun hkʼaw nyi ve maˇ heˆ leh hkaw˗hpi˗teuˇ hkʼaw nyi chehˇ htaˇ, awˬ ku nyi ve awˬ han tawˆ la ve kʼo ngaˬ hui hkʼaˬ hkʼe te cawˇ ve le? Ngaˬ hui maˇ nyi leh laꞈ haˉ hoˆ cawˇ ve yoˬ. Ngaˬ hui Yaˬhoˉvaˬ geh meuˆ daꞈ ve htaꞈ a yeˇ uiˍ jaˇ tehꞈ dawˇ ve kʼo, ngaˬ hui maˇ nyi leh laꞈ haˉ hoˆ tuˬ sha ve yoˬ. Awˬ han teˇ hpaˍ kʼo, awˬ ku nyi ve awˬ han hpehꞈ ve tehꞈ maˇ dawˇ ve kaꞈ, teˇ geh zuhꞈ gaˇ ve nyi ma cawˬ tuˬ te piˇ gʼa ve yoˬ. Aˬ htoꞈ ma te ngaˬ hui awˬ han chi teˇ hpaˍ htaꞈ maˇ nyi cawˇ ve le? Awˬ lawn kʼo, haˉ chawˇ haˉ paˆ te ve awˬ ceuˬ ngaˬ hui ve nyi ma hkʼaw a ciˉ kaꞈ maˇ cawˬ tcuh gaˇ ve yoˬ. (Maꞈ 5:28, 29) Htaiˇ mvuhˇ miˬ lo chehˇ ve nyi haꞈ shaˉ paˍ Daˍviˆ kʼoˆ ve, “ngaˬ a shu yawˇ awˬ to htaꞈ na nyi ve, ‘awˬ han chi awˬ ku nyi ve awˬ han maˇ hpehꞈ ve htawˇ, ngaˬ caˉ leh nyi ve kʼo, Yaˬhoˉvaˬ dawˇ cawˇ tuˬ ve laˇ?’ Ngaˬ chi hkʼe dawˇ nyi ve pa taw, cuˇ yiˍ cawˬ ve hkʼaw te gʼa tuˬ yawˇ ga laˇ ve yoˬ.” Yaˬhoˉvaˬ maˇ dawˇ cawˇ tuˬ te piˇ la ve htaꞈ kawˆ ve lehˬ, ngaˬ hui cuˇ yiˍ cawˬ ve hkʼaw te tuˬ ga laˇ gʼa ve yoˬ. “Cuˇ yiˍ cawˬ la hpehꞈ tuˬ nawˬ awˉ lawˉ peuˇ Gʼuiˬ sha htaꞈ yawˆ yan puiˉ ve nyi ma gʼa cawˬ ve yoˬ.” w23.06 23 ¶12-13

“Yehˬ lo kʼawꞈ˗e” kʼoˆ ve lehˬ Hkriꞈ yaˇ awˬ moˍ htaꞈ kʼoˆ gaˇ ve yoˬ. Chi lehˬ ngaˬ hui Hkriꞈ yaˇ awˬ moˍ hkʼaw awˬ viˉ awˬ nyi geh chehˇ ve kʼo, oˇ ve teˇ yanˇ Yaˬhoˉvaˬ ngaˬ hui htaꞈ haꞈ shaˉ laˇ tuˬ ka tiꞈ te taˍ laˇ ve yoˬ. Chi htaꞈ pa taw, ngaˬ hui awˬ viˉ awˬ nyi geh ceh tiˉ yeunˇ hkanˍ ve maˇ heˆ. Yaꞈ hkʼaˇ, chi teˇ hkui kaꞈ yawˇ hui htaꞈ haꞈ cawˇ ve yoˬ. Ngaˬ hui ponˬ tuˬ, maˇ gʼa ponˬ tuˬ ve lehˬ, ngaˬ hui te ve htaꞈ cawˬ ve yoˬ. “Kawˆ tuˬ uiˍ jaˇ ve [Yaˬhoˉvaˬ] ve awˬ nyi” teˇ gʼaˇ le le awˬ pon haˍ jaˇ ve awˬ yanˇ hpehꞈ ve yoˬ. (Zeˍ 1:14, 15) Yaˬhoˉvaˬ ve chaw htawˇ tuꞈ jaˇ hkanˍ jaˇ ve htaꞈ gʼa hpuˇ tuˬ yoˬ. Yaꞈ hkʼaˇ, chi teˇ hkui kaꞈ ngaˬ hui gu hehnˇ taˍ ve kʼo, ngaˬ hui nyi ma gawˬ lehˍ cawˬ leh oˇ ve teˇ yanˇ awˬ nu ve chaw htaꞈ ga piˇ gʼa tuˬ yoˬ. Aˬ htoꞈ ma gʼa hpuˇ ve htawˇ maˇ kʼoˆ, ngaˬ hui yeunˇ hkanˍ gʼaˇ tuˬ yoˬ. Leh awˬ viˉ awˬ nyi tuꞈ ve hkanˍ ve gʼa hpuˇ ve kʼo, ngaˬ hui te ve teˇ ceuˬ le le awˬ hkʼaw lo teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ gʼa leh yawˇ hui htaꞈ ga piˇ tuˬ yoˬ. Chi teˇ hkui kaꞈ ngaˬ hui ve awˬ viˉ awˬ nyi htaꞈ haꞈ daꞈ ve kʼo, oˇ ve teˇ yanˇ ngaˬ hui yawˇ hui htaꞈ haꞈ leh meuˆ daꞈ tuˬ yoˬ. Yaˬhoˉvaˬ ngaˬ hui htaꞈ laꞈ shawnˍ peꞈ laˇ tuˬ ve lehˬ, co co taiˍ taiˍ ve a shaꞈ hpehꞈ ve yoˬ. Leh miˬ guiˬ hkʼoˆ lo mvuhˇ yeˬ mvuhˇ haw lonˉ maˇ heˆ leh tuꞈ ve hkanˍ ve maˇ cawˬ ve hkʼaw ngaˬ hui gʼa chehˇ tuˬ yoˬ.—Isy 65:17. w23.07 7 ¶16-17

Liꞈ hpu hkʼaw laiˉ pawˆ kʼoˆ ve, Yaˬhoˉvaˬ ve kanˉ te ve chaw awˬ gʼaˇ cawˬ ve yoˬ. Yaꞈ hkʼaˇ, awˬ gʼaˇ cawˬ jaˇ ve chaw kaꞈ, hkʼaˬ htaˆ kaꞈ awˬ gʼaˇ cawˬ ve maˇ heˆ tehꞈ dawˇ ve yoˬ. Tawˇ pa haˉ te kʼo, teˇ pawˆ pawˆ jawˇ mawˇ Daˍviˆ yawˇ “hkʼaw pui hkʼoˆ ve taꞈ yehˬ hkʼa shuˍ” hpehꞈ ve yoˬ. Yaꞈ hkʼaˇ, teˇ pawˆ pawˆ kʼo, yawˇ “kawˆ jaˇ ve yoˬ.” (Chiˇ 30:7) Sanˍsonˍ kaꞈ hkʼa shuˍ shuˍ yoˬ. Yawˇ Gʼuiˬ sha geh kanˇ paˆ gʼa htaˇ, awˬ gʼaˇ cawˬ la ve yoˬ. Yaꞈ hkʼaˇ, yawˇ Gʼuiˬ sha geh kanˇ paˆ maˇ gʼa ve kʼo, “awˬ nu ve chaw teˇ hpaˍ hkʼa shuˍ hpehꞈ la tuˬ yoˬ.” (Suhˉ 14:5, 6; 16:17) Gʼuiˬ sha ve kanˉ ka tiꞈ yeˬ ve hkʼaw te ve chaw chi teˇ hpaˍ Gʼuiˬ sha geh kanˇ paˆ gʼa htaˇ, awˬ gʼaˇ cawˬ ve tehꞈ ngaˬ hui hkʼa tawˍ lehˆ gʼa mawˬ ve yoˬ. Pawˇluꞈ Gʼuiˬ sha ve kanˇ paˆ gʼa tuˬ loˍ ve yoˬ. (2 Kawˇ 12:9, 10) Pawˇluꞈ kaꞈ ngaˬ hui hkʼa shuˍ hpehꞈ ve yoˬ. Yawˇ kaꞈ maˇ chehˇ sha ve htaꞈ gʼa tawˍ daꞈ ve yoˬ. (Gaˍ 4:13, 14) Teˇ pawˆ pawˆ yawˇ cawˇ ve awˬ ceuˬ htaꞈ te tuˬ gʼa coˇ caˇ jaˇ. (Roˉ 7:18, 19) Chi hkʼoˆ kaꞈ, yawˇ aˬ htoꞈ ma gʼa hpuˇ la tuˬ ve htaꞈ dawˇ haˍ leh kawˆ ve yoˬ. (2 Kawˇ 1:8, 9) Pawˇluꞈ awˬ gʼaˇ nuˇ ve teˇ yanˇ, awˬ gʼaˇ kʼawꞈ uiˍ la ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ yawˇ htaꞈ kanˇ paˆ piˇ leh yawˇ awˬ gʼaˇ cawˬ tuˬ te piˇ ve yoˬ. w23.10 12 ¶1-2

Teˇ pawˆ pawˆ ngaˬ hui awˬ hpfuhˇ maˇ cawˬ ve tehꞈ dawˇ ve kʼo, Yaˬhoˉvaˬ ngaˬ hui htaꞈ yawˇ geh laˬ tuˬ gʼawˬ veu laˇ ve tehꞈ tawnˇ taˍ sheˍ. (Yoˇ 6:44) Awˬ nu ve chaw ngaˬ hui daꞈ ve htaꞈ te ve maˇ mawˬ ve htawˇ, Yaˬhoˉvaˬ mawˬ leh yawˇ ngaˬ hui ve nyi ma hkʼaw kaꞈ mawˬ ve yoˬ. (2 Raˍ 6:30) Chi htaꞈ pa taw, Yaˬhoˉvaˬ ngaˬ hui yawˇ awˬ pon awˬ hpfuhˇ hkʼaˆ jaˇ tehꞈ kʼoˆ ve htaꞈ ngaˬ hui yonˍ gʼa ve yoˬ. (1 Yoˇ 3:19, 20) Awˬ tehˬ ve maˇ henˇ sheˍ htaˇ, chaw teˇ hpaˍ maˇ daꞈ ve htaꞈ te jaw ve pa taw, nyi ma luˬ jaˇ ve yoˬ. (1 Peˍ 4:3) Gʼuiˬ sha ve kanˉ ka tiꞈ yeˬ ve hkʼaw te ve chaw teˇ hpaˍ htawˇ, maˇ daꞈ ve dawˇ hkʼaˇ htaꞈ gʼa tawˍ daꞈ ve yoˬ. Hkʼe kʼo, nawˬ awˬ pon Yaˬhoˉvaˬ teˇ pawˆ pawˆ nawˬ htaꞈ venˇ baˆ maˇ hpehˇ laˇ gʼa tehꞈ dawˇ˗aw laˇ? Nawˬ chi hkʼe dawˇ ve kʼo, taˇ dawˇ haˍ. Yaˬhoˉvaˬ ve kanˉ ka tiꞈ yeˬ ve hkʼaw te ve chaw laiˉ gʼaˇ htawˇ, chi hkʼe dawˇ jaw ve yoˬ. Tawˇ pa haˉ te kʼo, tcuh yaˇ Pawˇluꞈ yawˇ maˇ biˇ ve chaw hpehꞈ ve tehꞈ, dawˇ ve pa taw nyi ma luˬ jaˇ ve yoˬ. (Roˉ 7:24) Pawˇluꞈ venˇ baˆ dawˇ hpfuhˆ leh Baˆtiˆsaˬ haꞈ yuˬ˗oˬ ve htawˇ, yawˇ awˬ to htaꞈ kʼoˆ ve, “ngaˬ lehˬ tcuh yaˇ hui awˬ hkʼaw lo i jaˇ ve teˇ gʼaˇ hpehꞈ ve yoˬ.” Leh yawˇ kʼawꞈ kʼoˆ sheˍ ve, “ngaˬ lehˬ venˇ baˆ uiˍ ve chaw teˇ gʼaˇ hpehꞈ ve yoˬ.”—1 Kawˇ 15:9; 1 Tiˆ 1:15. w24.03 27 ¶5-6

Jawˇ mawˇ Yeˍhawˇshaˆ cuˇ yiˍ maˇ cawˬ ve hkʼaw dawˇ cheˆ ve ngaˬ hui htaꞈ maˍ laˇ gʼa ve teˇ lawn lehˬ, ngaˬ hui cawˇ ve awˬ ceuˬ htaꞈ te tuˬ ga laˇ gʼa ve awˬ chawˇ htaꞈ gʼa leuˆ cawˇ ve yoˬ. Yaˬhoˉvaˬ htaꞈ haꞈ leh yawˇ ha lehˬ tuˬ te piˇ gaˇ ve chaw htaꞈ ngaˬ hui awˬ chawˇ te tuˬ gʼa leuˆ cawˇ ve yoˬ. Ngaˬ hui a shaꞈ hkʼa shuˍ ve chaw htaꞈ ceh tiˉ awˬ chawˇ maˇ te gaˇ. Yeˍhawˇshaˆ aꞈ kehˉ Yawˇyaˍdaˆ a shaꞈ maˇ ve htawˇ, yawˇ huiˉ maˬ meuˆ daꞈ jaˇ ve awˬ chawˇ hpehꞈ ve tehꞈ tawnˇ taˍ sheˍ. Chi htaꞈ pa taw, nawˬ awˬ chawˇ te ve chaw htaꞈ dawˇ nyi leh a shu yawˇ awˬ to htaꞈ na nyi cawˇ ve, ‘yawˇ hui ngaˬ Yaˬhoˉvaˬ htaꞈ yonˍ yeˬ tuˬ ga laˇ˗aw laˇ? Yawˇ hui ngaˬ a shaꞈ teꞈ kuiˬ hkʼaw Yaˬhoˉvaˬ ve awˬ liˇ awˬ hkʼaˇ htaꞈ yuˬ yehˇ tuˬ ga laˇ˗aw laˇ? Yawˇ hui Yaˬhoˉvaˬ leh Liꞈ hpu hkʼaw awˬ tehˬ ve htaꞈ yaw daꞈ˗aw laˇ? Yawˇ hui ngaˬ htaꞈ chiˇ mvuh laˇ ve, maˇ heˆ leh ngaˬ maˇ cawˇ ve awˬ ceuˬ htaꞈ te htaˇ, yawˇ hui ngaˬ htaꞈ shaˍ tiꞈ peꞈ laˇ haˆ˗aw laˇ?’ (Tawˇ 27:5, 6, 17) Nawˬ awˬ chawˇ te ve chaw yawˇ hui Yaˬhoˉvaˬ htaꞈ maˇ haꞈ ve kʼo, awˬ chawˇ maˇ te cawˇ. Yaꞈ hkʼaˇ, nawˬ ve awˬ chawˇ Yaˬhoˉvaˬ htaꞈ haꞈ ve kʼo, yawˇ hui geh caˉ leh awˬ chawˇ te sheˍ. Awˬ lawn kʼo, yawˇ hui hkʼa shuˍ nawˬ kaꞈ Yaˬhoˉvaˬ htaꞈ haꞈ tuˬ ga laˇ gʼa ve yoˬ.—Tawˇ 13:20. w23.09 9-10 ¶6-7

Aˍlaˍhpaˆ lehˬ Heˍlaˍsaˆ ve tawˇ hkawˇ hkʼaw awˉ lawˉ teˇ hkawˇ hpehꞈ leh Awˇmeˍgaˆ lehˬ awˬ leh meuˇ ve teˇ hkawˇ hpehꞈ ve yoˬ. Chi htaꞈ pa taw, Yaˬhoˉvaˬ yawˇ awˬ to htaꞈ kʼoˆ ve, “ngaˬ lehˬ Aˍlaˍhpaˆ leh Awˇmeˍgaˆ hpehꞈ ve yoˬ.” Chi kʼoˆ gaˇ ve lehˬ yawˇ aˬ htoꞈ ma te tuˬ dawˇ teh˗oˬ ve kʼo, awˬ ceuˬ oˇ ve te gʼa tcuh ve yoˬ. Yaˬhoˉvaˬ Aˍdanˍ leh Eˇvaꞈ htaꞈ hpanˍ peuˬ hkʼawꞈ nawˉ, yawˇ yawˇ huiˉ maˬ htaꞈ kʼoˆ ve, ‘yaˇ maˇ maˇ cawˬ la piˇ˗oˆ. Chaw yaˇ teˇ hpaˍ miˬ guiˬ hkʼoˆ biˇ la piˇ˗oˆ. Leh uˉ peunˍ chehˇ˗oˆ.’ (Awˬ 1:28) Yaˬhoˉvaˬ yawˇ ve a loˍ chi htaꞈ kʼoˆ htaˇ, “Aˍlaˍhpaˆ” lehˬ awˬ hkuiˉ peuˬ ve teˇ hkawˇ hpehꞈ leh Yaˬhoˉvaˬ ve a loˍ awˬ tehˬ hpehꞈ la tuˬ yoˬ. Aˍdanˍ leh Eˇvaꞈ ve awˬ yaˇ awˬ duˬ miˬ guiˬ hkʼoˆ lo hkʼa biˇ cawˬ leh miˬ guiˬ hkʼa peu˗eˬ hkʼoˆ lo miˬ guiˬ awˬ suhˉ hpehꞈ la tuˬ te ve yoˬ. Yaˬhoˉvaˬ lehˬ “miˬ guiˬ mvuhˇ naw ma hkʼa peu˗eˬ htaꞈ te hpanˍ taˍ peuˬ” hkʼawꞈ nawˉ, oˇ ve teˇ yanˇ “Awˇmeˍgaˆ” tehꞈ kʼoˆ ve yoˬ. Yawˇ ve a loˍ chaw yaˇ leh miˬ guiˬ htaꞈ awˬ tehˬ hpehꞈ la tcuh tuˬ yoˬ tehꞈ yawˇ ka tiꞈ te taˍ laˇ ve yoˬ. Yawˇ ve a loˍ 7 nyi teˇ nyi htaˇ awˬ tehˬ biˇ la ve yoˬ.—Awˬ 2:1-3. w23.11 5 ¶13-14

Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e ve aˬ laˬ hkʼe 4 ha pa gʼa yehˇ ve yoˬ. Yawˇ hui kʼawꞈ˗e htaˇ kaꞈ haˍ jaˇ ve yoˬ. Yaꞈ hkʼaˇ, yawˇ hui gʼa hpuˇ ve awˬ ceuˬ htaꞈ Yaˬhoˉvaˬ gu laˇ tuˬ yoˬ tehꞈ ka tiꞈ te piˇ ve yoˬ. Iˉsaˍreˍlaˆ mvuhˇ miˬ lo kʼawꞈ˗e tuˬ dawˇ cheˆ ve ka tiꞈ yeˬ ve Yuˇdaꞈ chaw lehˬ, yawˇ hui yehˬ leh tanˇ kaˬ hkʼaˇ htaꞈ gʼa baˬ taˉ ve aꞈ kehˉ Yaˬhoˉvaˬ yawˇ hui htaꞈ awˬ bon naꞈ laˇ maˇ jaˇ tuˬ ve htaꞈ yawˇ hui shiˍ ve yoˬ. A yeˇ uiˍ jaˇ ve teˇ ceuˬ lehˬ Yaˬhoˉvaˬ htaꞈ oˉ kʼoˍ gʼa pui ve yoˬ. Baˍbuˍlonˍ venˇ hkʼaw Yaˬhoˉvaˬ htaꞈ oˉ kʼoˍ pui kuiˬ bon yehˬ maˇ cawˬ. Iˉsaˍreˍlaˆ chaw Moˉseˍ ve awˬ liˇ awˬ hkʼaˇ htaꞈ gʼaꞈ te ve tuˉ tanˇ kuiˬ teˇ kaˬ kaꞈ maˇ cawˬ. Yawˇ hui awˬ pon tuˉ tanˇ laˇ tuˬ, paw hkuˇ ve awˬ vuiˬ htaꞈ te paˍ teˇ gʼaˇ kaꞈ maˇ cawˬ ve yoˬ. Chi hkʼoˆ kaꞈ, Baˍbuˍlonˍ venˇ hkʼaw maˇ heˆ heˆ ve htaꞈ oˉ kʼoˍ pui ve chaw lehˬ, Yaˬhoˉvaˬ htaꞈ yawˆ yan leh yawˇ ve awˬ liˇ awˬ hkʼaˇ htaꞈ gʼaꞈ te ve chaw aꞈ kehˉ cawˬ maˇ jaˇ ve yoˬ. Chi htaꞈ pa taw, Yaˬhoˉvaˬ htaꞈ yawˆ yan ve Yuˇdaꞈ chaw laiˉ meunˍ gʼaˇ daꞈ kehˬ ve oˉ kʼoˍ pui kuiˬ kʼawꞈ gu te gʼa tuˬ mvuhˇ miˬ lo kʼawꞈ˗e tuˬ dawˇ law taˍ ve yoˬ. w23.05 14-15 ¶3-4

Ngaˬ hui “awˬ gʼeuˆ yaˇ hkʼe te kʼai” tuˬ daꞈ kehˬ ve awˬ ha hpu gʼa ga laˇ tcuh ve yoˬ. Aˬ htoꞈ ma pa taw le? Awˬ lawn kʼo, miˬ guiˬ hkʼoˆ lo haˉ chawˇ haˉ paˆ te ve cawˬ maˇ jaˇ ve pa taw, ngaˬ hui daꞈ ve htaꞈ te tuˬ sha ve maˇ heˆ. (1 Hteˇ 4:3-5, 7, 8) Daꞈ kehˬ ve awˬ ha hpu lehˬ, ngaˬ hui miˬ guiˬ yaˇ ve dawˇ hkʼaˇ htaꞈ tawˍ daꞈ gʼaˇ tuˬ ga laˇ gʼa ve yoˬ. Chi ve lehˬ, Gʼuiˬ sha ve dawˇ hkʼaˇ htaꞈ maˇ hawˍ daꞈ ve chaw yaˇ ve cuˇ yiˍ leh dawˇ hkʼaˇ htaꞈ kaꞈ kʼoˆ gaˇ ve yoˬ. Chi hkʼoˆ kaꞈ, “awˬ gʼeuˆ ve awˬ shiˍ lehˬ, daꞈ ve hkʼa peu˗eˬ hteˇ ve cawˇ ve hkʼa peu˗eˬ” chi ve ngaˬ hui cawˬ tuˬ daꞈ kehˬ ve awˬ ha hpu ga laˇ gʼa ve yoˬ. (Efs 5:9) Ngaˬ hui daꞈ kehˬ ve awˬ ha hpu gʼa tuˬ ve teˇ hkʼaˇ lehˬ bon lawˬ ve yoˬ. Yeˍsuˆ kʼoˆ ve, Yaˬhoˉvaˬ geh “hkʼa lawˬ ve chaw teˇ hpaˍ htaꞈ daꞈ ve kehˬ ve awˬ ha hpu yawˇ piˇ tuˬ” yoˬ. (Luˉ 11:13) Hpawnˬ daꞈ kuiˬ hkʼaw awˬ viˉ awˬ nyi geh teˇ geh Yaˬhoˉvaˬ htaꞈ chiˇ mvuh htaˇ, ngaˬ hui daꞈ kehˬ ve awˬ ha hpu gʼa ve yoˬ. (Efs 5:19, 20) Daꞈ kehˬ ve awˬ ha hpu lehˬ ngaˬ hui Gʼuiˬ sha nyi hkʼaˇ suh ve te piˇ tuˬ ga laˇ gʼa ve yoˬ. w24.03 23-24 ¶13-15

Nawˬ yeunˇ hkanˍ ve chaw hpehꞈ gaˇ˗aw laˇ? Hpehꞈ gaˇ ve kʼo, chi awˬ pon bon lawˬ sheˍ. Yeunˇ hkanˍ ve lehˬ, Gʼuiˬ sha ve awˬ ha hpu ve awˬ shiˍ hkʼaw ve teˇ ceuˬ hpehꞈ ve yoˬ. (Gaˍlaˍtiˆ 5:22, 23) Chi htaꞈ pa taw, ngaˬ hui yeunˇ hkanˍ ve chaw hpehꞈ gaˇ ve kʼo, Gʼuiˬ sha ve awˬ ha hpu gʼa tuˬ bon gʼa lawˬ cawˇ ve yoˬ. Ngaˬ hui yeunˇ hkanˍ ve htaꞈ lawˇ nyi laˇ ve gʼa hpuˇ htaˇ, “lawˬ loˬ. Lawˬ kʼo gʼa tuˬ yoˬ.” Leh ngaˬ hui chi hkʼe te ve kʼo, Yaˬhoˉvaˬ ga laˇ tuˬ yoˬ. (Luˉkaꞈ 11:13) Yaˬhoˉvaˬ dawˇ ve hkʼe ngaˬ hui dawˇ tuˬ, yawˇ ga laˇ tuˬ bon lawˬ gʼa ve yoˬ. Chi hkʼoˆ kaꞈ, bon lawˬ peuˬ hkʼawꞈ nawˉ teˇ nyi le le ngaˬ hui yeunˇ hkanˍ gʼaˇ tuˬ gʼa coˇ caˇ ve yoˬ. Ngaˬ hui bon lawˬ leh yeunˇ hkanˍ ve tehꞈ hpeuꞈ maw piˇ ve kʼo, ngaˬ hui yeunˇ hkanˍ gʼaˇ tuˬ Yaˬhoˉvaˬ ga laˇ leh chi lehˬ ngaˬ hui hkʼaˬ htaˆ kaꞈ te jaw ve hkʼe hpehꞈ tuˬ yoˬ. Liꞈ hpu hkʼaw ve awˬ lawn htaꞈ dawˇ nyi ve kaꞈ awˬ bon cawˬ ve yoˬ. Liꞈ hpu hkʼaw yeunˇ hkanˍ gʼaˇ ve laiˉ gʼaˇ ve awˬ lawn cawˬ ve yoˬ. Yawˇ hui ve awˬ lawn htaꞈ caˉ daꞈ ve ngaˬ hui dawˇ nyi htaˇ, ngaˬ hui yeunˇ hkanˍ ve awˬ hkʼaˇ shiˍ la tuˬ yoˬ. w23.08 22-23 ¶10-11

Yaˬhoˉvaˬ tcuh yaˇ Peˍtruˆ htaꞈ nyi haꞈ shaˉ laˇ tuˬ yoˬ tehꞈ yonˍ gʼa tuˬ Yeˍsuˆ ga piˇ ve yoˬ. Tawˇ pa haˉ te kʼo, Yeˍsuˆ kʼawꞈ teꞈ tu la peuˬ hkʼawꞈ nawˉ, Peˍtruˆ leh tcuh yaˇ hui ngaˇ ca gʼa maˇ jaˇ tuˬ Yeˍsuˆ anˇ tuˬ kʼawꞈ te piˇ ve yoˬ. (Yoˇ 21:4-6) Yaˬhoˉvaˬ lehˬ Peˍtruˆ loˍ ve awˬ ceuˬ htaꞈ piˇ tuˬ sha jaˇ ve tehꞈ, anˇ tuˬ chi ve Peˍtruˆ yonˍ gʼa tuˬ te piˇ ve yoˬ. A shu teˇ gʼaˇ ‘Gʼuiˬ sha ve mvuhˇ miˬ awˉ lawˉ ca’ ve kʼo, Gʼuiˬ sha lehˬ yawˇ hui loˍ ve awˬ ceuˬ htaꞈ piˇ tuˬ yoˬ tehꞈ, Yeˍsuˆ kʼoˆ ve tawˇ hkawˇ chi ve htaꞈ Peˍtruˆ dawˇ nawˇ la ve yoˬ hehˉ. (Maꞈ 6:33) Chi ve lehˬ Peˍtruˆ awˬ pon awˬ bon cawˬ jaˇ ve tehꞈ ngaˬ hui gʼa mawˬ ve yoˬ. Peˍtruˆ a shaꞈ teꞈ kuiˬ hkʼaw Gʼuiˬ sha ve kanˉ te ve a yeˇ uiˍ jaˇ tehꞈ shawˍ ve yoˬ. Leh Peˍteˍkoˆteˍ 33 hkʼawꞈ C.E. htaˇ, Peˍtruˆ haꞈ hanˉ ve hkʼaw bon maˍ leh laiˉ hinˉ gʼaˇ awˬ laꞈ gʼawˇ hpehꞈ la ve yoˬ. (Tcuh 2:14, 37-41) Peuˬ hkʼawꞈ nawˉ, Saˍmaˍriˆ chaw leh buiˇ shaˆ aˉ naˆ chaw laiˉ gʼaˇ Yeˍsuˆ awˬ hkʼaˇ suh gʼaꞈ kʼai tuˬ Peˍtruˆ ga piˇ gʼa ve yoˬ. (Tcuh 8:14-17; 10:44-48) Chaw teˇ ceuˬ le le Hkriꞈ yaˇ hpehꞈ la tuˬ Yaˬhoˉvaˬ Peˍtruˆ htaꞈ awˬ vuiˬ piˇ ve lehˬ daꞈ jaˇ ve yoˬ. w23.09 20 ¶1; 23 ¶11

Baˍbuˍlonˍ chaw Yeˍruˆsaˍlehnˍ venˇ htaꞈ te luˬ ve aˬ laˬ hkʼe 2 hkʼawꞈ peuˬ hkʼawꞈ nawˉ htaˇ hpehꞈ ve yoˬ. Baˍbuˍlonˍ ve jawˇ mawˇ Neˍbuˍhkaˍneˍzaˍ awˬ han lonˉ htaꞈ caˉ daꞈ ve yawˇ zuhꞈ maˆ mawˬ leh tawnˇ maˇ gʼa ve pa taw, yawˇ nyi ma maˇ sha ve yoˬ. Yawˇ aˬ htoꞈ ma ve awˬ lawn htaꞈ zuhꞈ maˆ mawˬ leh tcuhˉ kuiˬ kʼoˆ maˍ laˇ maˇ gʼa ve kʼo, cuˇ yiˍ cawˬ paˍ, mawˉ paˍ, leh Daˍyeˍlaˆ htaꞈ kaꞈ tiˇ pehˍ tuˬ yoˬ tehꞈ kawˆ ho piˇ ve yoˬ. (Daˍ 2:3-5) Hkʼe te leh, Daˍyeˍlaˆ teˇ ceuˬ ceuˬ laꞈ haˉ gʼa te cawˇ ve yoˬ. Maˇ te ve kʼo, laiˉ gʼaˇ gʼa suh˗e tuˬ yoˬ. Yawˇ “teˇ cawˬ haˉ jawˇ mawˇ geh kʼai leh, zuhꞈ maˆ ve tcuhˉ kuiˬ yuˬ tawˆ laˇ gʼa tuˬ, yawˇ htaꞈ awˬ yanˇ a ciˉ kʼawꞈ piˇ laˇ tuˬ, jawˇ mawˇ geh a hkaw˗anˬ ca lawˬ ve yoˬ.” (Daˍ 2:16) Chi hkʼe te ve lehˬ, haꞈ hanˉ ve leh yonˍ ve gʼa cawˬ jaˇ ve yoˬ. Chi awˬ gʼuˇ suhˍ htaˇ, Daˍyeˍlaˆ lehˬ zuhꞈ maˆ ve tcuhˉ kuiˬ yuˬ tawˆ gʼa ve tehꞈ, Liꞈ hpu hkʼaw teˇ kaˬ˗ehˬ kaꞈ maˇ gʼa kʼoˆ laˇ taˍ ve yoˬ. Daˍyeˍlaˆ leh yawˇ ve awˬ chawˇ “Gʼuiˬ sha yawˇ hui htaꞈ ha kʼaˉ laˇ leh zuhꞈ maˆ oˇ ve Gʼuiˬ sha yawˇ hui htaꞈ hpeuꞈ maˍ laˇ tuˬ, Gʼuiˬ sha geh bon lawˬ˗oꞈ” tehꞈ kʼoˆ ve yoˬ. (Daˍ 2:18) Yaˬhoˉvaˬ yawˇ hui ve bon lawˬ hkawˇ htaꞈ hkʼawꞈ piˇ ve lehˬ, Daˍyeˍlaˆ zuhꞈ maˆ ve tcuhˉ kuiˬ yuˬ tawˆ gʼa tuˬ ga piˇ ve yoˬ. Hkʼe te leh, Daˍyeˍlaˆ leh awˬ chawˇ kaꞈ maˇ gʼa suh˗o. w23.08 2-3 ¶4

Yeunˇ hkanˍ ve chaw hpehꞈ ve lehˬ awˬ bon gʼa ve htaꞈ dawˇ nyi sheˍ. Ngaˬ hui yeunˇ hkanˍ gʼaˇ htaˇ, ha lehˬ ve leh nyi ma gawˬ lehˍ cawˬ tuˬ yoˬ. Chi ve ngaˬ hui chehˇ sha cawˬ sha hpawˇ leh nyi ma sha tuˬ kaꞈ ga laˇ ve yoˬ. Chi hkʼoˆ kaꞈ, ngaˬ hui awˬ nu ve chaw geh yeunˇ hkanˍ htaˇ, ngaˬ hui yawˇ hui geh meuˆ daꞈ tuˬ yoˬ. Hkriꞈ yaˇ awˬ moˍ hkʼaw kaꞈ teˇ moˍ tiˉ hpehꞈ tuˬ yoˬ. Leh awˬ nu ve chaw ngaˬ hui nyi ma zuhˆ tuˬ te laˇ htaˇ, ngaˬ hui nyi ma haˆ maˇ zuhˆ ve lehˬ, awˬ lawn oˇ ve gu gʼa sha ve yoˬ. (Chiˇ 37:8; Tawˇ 14:29) A yeˇ uiˍ jaˇ ve lehˬ, Awˬ pa Yaˬhoˉvaˬ htaꞈ henˇ yuˬ chehˇ ve yoˬ. Chi ve ngaˬ hui yawˇ geh meuˆ daꞈ maˇ la tuˬ te laˇ ve yoˬ. Yeunˇ hkanˍ ve lehˬ te hkʼaˇ dawˇ hkʼaˇ daꞈ jaˇ leh ngaˬ hui awˬ pon awˬ bon cawˬ jaˇ. Ngaˬ hui hkʼaˬ htaˆ kaꞈ yeunˇ hkanˍ ve chaw hpehꞈ tuˬ maˇ sha ve htawˇ, Yaˬhoˉvaˬ ga laˇ tuˬ lawˬ sheˍ. Chi hkʼe te ve kʼo, ngaˬ hui yeunˇ hkanˍ gʼaˇ tuˬ yoˬ. Miˬ guiˬ awˬ suhˉ gaˬ la tuˬ ngaˬ hui law chehˇ htaˇ, Yaˬhoˉvaˬ lehˬ “yawˇ htaꞈ yawˆ yan ve chaw leh, yawˇ ve haꞈ pehnˇ ve htaꞈ gʼaˇ va ve chaw hui htaꞈ haꞈ shaˉ piˇ chehˇ ve yoˬ” tehꞈ ngaˬ hui yonˍ gʼa ve yoˬ. (Chiˇ 33:18) Ngaˬ hui teˇ gʼaˇ le le leuˉ leh yeunˇ hkanˍ ve cawˬ tuˬ te sheˍ. w23.08 22 ¶7; 25 ¶16-17

Chaw teˇ gʼaˇ yawˇ yonˍ ve cawˬ ve tehꞈ kʼoˆ ve htawˇ, maˇ te tawˆ la ve tehꞈ Yaˍkoˆ beˆ maˍ laˇ ve yoˬ. (Yaˍ 2:1-5, 9) Yaˍkoˆ kʼawꞈ kʼoˆ sheˍ ve lehˬ, awˬ viˉ awˬ nyi veuꞈ kʼaˇ veuꞈ tuˬ maˇ cawˬ leh caˇ tuˬ maˇ gʼa caˇ ve mawˬ ve chaw htaꞈ yawˇ kʼoˆ ve yoˬ. Yaꞈ hkʼaˇ, yawˇ teꞈ chiˉ kaꞈ maˇ ga piˇ. Yawˇ yonˍ ve cawˬ ve tehꞈ kʼoˆ ve htawˇ, te tawˆ la ve maˇ cawˬ ve kʼo, teꞈ chiˉ awˬ bon maˇ cawˬ. (Yaˍ 2:14-16) Raˍhaˆ lehˬ yonˍ ve htaꞈ pa taw te tawˆ la ve tehꞈ Yaˍkoˆ kʼoˆ ve yoˬ. (Yaˍ 2:25, 26) Raˍhaˆ Yaˬhoˉvaˬ ve awˬ lawn gʼa kaˇ jaw leh Yaˬhoˉvaˬ Iˉsaˍreˍlaˆ chaw htaꞈ ga piˇ chehˇ ve yawˇ shiˍ ve yoˬ. (Ys 2:9-11) Yawˇ Yaˬhoˉvaˬ htaꞈ yonˍ ve pa taw Iˉsaˍreˍlaˆ chaw, chaw jaˆ 2 gʼaˇ kawˆ tuˬ cawˬ ve htaꞈ yawˇ ponˬ piˇ ve yoˬ. Aˍbraˍhanˍ hkʼa shuˍ, oˇ ve htaꞈ pa taw yawˇ “hteˇ ve cawˇ ve chaw hpehꞈ ve” tehꞈ Gʼuiˬ sha shawˍ ve yoˬ. Raˍhaˆ ve awˬ lawn yonˍ ve lehˬ gʼa te tawˆ la ve tehꞈ ngaˬ hui hkʼa tawˍ lehˆ gʼa mawˬ ve yoˬ. w23.12 5 ¶12-13

Ngaˬ hui Liꞈ hpu hkʼaw awˬ lawn lonˉ ma htaꞈ shiˍ ve ceh nyi hkʼaˇ maˇ suh cawˇ. Yaꞈ hkʼaˇ, ngaˬ hui “Gʼuiˬ sha ve naˉ jaˇ ve awˬ ceuˬ” henˇ gaˇ ve yoˬ. Chi hkʼe henˇ htaˇ ngaˬ hui na gʼa tuˬ, Gʼuiˬ sha ve daꞈ kehˬ ve awˬ ha hpu ga laˇ gʼa ve yoˬ. (1 Kawˇ 2:9, 10) Nawˬ chi hkʼe te ve kʼo, nawˬ Yaˬhoˉvaˬ geh meuˆ daꞈ ve awˬ ceuˬ htaꞈ caˉ daꞈ ve a shu yawˇ hkʼaˇ yawˇ Liꞈ hpu henˇ gaˇ˗aw laˇ? Tawˇ pa haˉ te kʼo, Yaˬhoˉvaˬ oˇ htaˇ teˇ co˗e yawˇ ve kanˉ te ve chaw htaꞈ haꞈ ve tehꞈ hkʼaˬ hkʼe hpeuꞈ maw piˇ ve, leh Yaˬhoˉvaˬ nawˬ htaꞈ haꞈ ve tehꞈ hkʼaˬ hkʼe hpeuꞈ maw laˇ ve, hpfuhˆ nyi gaˇ ve yoˬ hehˉ. Iˉsaˍreˍlaˆ chaw Yaˬhoˉvaˬ htaꞈ oˉ kʼoˍ pui ve htaꞈ caˉ daꞈ ve yawˇ hkʼaˬ hkʼe gu teh piˇ ve htaꞈ nawˬ hpfuhˆ nyi gaˇ ve yoˬ hehˉ. Leh awˬ ceuˬ chi ve teˇ hpaˍ, chi beuꞈ teˇ co˗e Hkriꞈ yaˇ oˉ kʼoˍ pui ve htaꞈ caˉ daꞈ ve htaꞈ tehˆ daꞈ gʼa ve yoˬ. Yeˍsuˆ miˬ guiˬ hkʼoˆ lo chehˇ htaˇ, tcuh kaˍ paˍ ve tawˇ hkawˇ yawˇ htaꞈ caˉ daꞈ ve awˬ tehˬ hkʼaˬ hkʼe hpehꞈ la ve htaꞈ kaꞈ nawˬ hpfuhˆ nyi gaˇ ve yoˬ hehˉ. Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ laꞈ caˉ yehˇ htaˇ, awˬ lawn chi ve teˇ hpaˍ htaꞈ henˇ leh hpfuhˆ nyi ve nawˬ ha lehˬ tuˬ yoˬ. Tcuhˉ kuiˬ naˉ ve htaꞈ henˇ leh hpfuhˆ nyi ve kʼo, yonˍ hkʼaˇ yonˍ yeˬ tuˬ te laˇ leh nawˬ “Gʼuiˬ sha awˬ lawn shiˍ maˇ la tuˬ” kaꞈ te laˇ ve yoˬ.—Tawˇ 2:4, 5. w23.10 18-19 ¶3-5

“Gʼaˇ hteꞈ” kʼoˆ ve tawˇ hkawˇ chi ve teˇ tawn hkʼaw tcuh yaˇ Peˍtruˆ kʼoˆ ve lehˬ, Heˍlaˍsaˆ hkawˇ kʼo, “laꞈ sheh che tawˆ ve” htaꞈ kʼoˆ gaˇ ve yoˬ. Chi ve teˇ tawn hkʼaw awˬ leh meuˇ lo Peˍtruˆ kʼoˆ ve, ngaˬ hui awˬ viˉ awˬ nyi htaꞈ leuˉ leh haꞈ ve kʼo, ngaˬ hui ve haꞈ pehnˇ ve lehˬ yawˇ hui ve venˇ baˆ htaꞈ beh taˍ ve yoˬ. Hpui lawˇ teˇ maˬ awˬ kuiˉ cawˬ ve, maˇ heˆ leh laiˉ kaˬ lo awˬ haiˉ cawˬ ve htaꞈ dawˇ nyi sheˍ. Ngaˬ hui hpa teˇ maˬ yuˬ laˬ leh hpui lawˇ hkʼoˆ lo a yehˉ yehˉ gʼawˬ beh ve kʼo, hpui lawˇ hkʼoˆ lo ve awˬ kuiˉ leh awˬ haiˉ htaꞈ beh hoˆ gʼa ve yoˬ. Teˇ kaˬ leh nyiˇ kaˬ ceh tiˉ beh hoˆ gʼa ve maˇ heˆ. Yaꞈ hkʼaˇ, hkʼa peu˗eˬ htaꞈ beh hoˆ gʼa ve yoˬ. Chi ve hkʼa shuˍ shuˍ, ngaˬ hui awˬ viˉ awˬ nyi htaꞈ leuˉ leh haꞈ ve kʼo, ngaˬ hui awˬ viˉ awˬ nyi ve venˇ baˆ htaꞈ pa taw awˬ gʼaˇ nuˇ ve leh maˇ biˇ ve awˬ ceuˬ teˇ ceuˬ leh nyiˇ ceuˬ htaꞈ ceh tiˉ beh hoˆ taˍ piˇ gʼa ve maˇ heˆ. Yaꞈ hkʼaˇ, “maˇ jaˇ ve venˇ baˆ teˇ hpaˍ htaꞈ beh taˍ ve yoˬ.” Ngaˬ hui awˬ viˉ awˬ nyi htaꞈ hkʼa dehꞈ haꞈ ve kʼo, yawˇ hui maˇ biˇ ve awˬ ceuˬ htaꞈ ngaˬ hui venˇ baˆ hpehˇ piˇ gʼa tuˬ ga laˇ gʼa ve yoˬ. Yaꞈ hkʼaˇ, teˇ pawˆ pawˆ kʼo te gʼa tuˬ haˍ jaˇ. (Kawˇ 3:13) Ngaˬ hui awˬ viˉ awˬ nyi htaꞈ venˇ baˆ hpehˇ piˇ htaˇ, yawˇ hui htaꞈ haꞈ leh, ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve tehꞈ hpeuꞈ maw piˇ ve yoˬ. w23.11 10-12 ¶13-15

Jawˇ mawˇ Yawˇshiˆ 26 hkʼawꞈ htaˇ, bon yehˬ lonˉ kʼawꞈ gu te ve yoˬ. Te chehˇ ve awˬ yanˇ htaˇ, “Gʼuiˬ sha Moˉseˍ htaꞈ piˇ taˍ ve awˬ liˇ tawˇ hkawˇ liꞈ daw htaꞈ” awˬ nu ve chaw gʼa mawˬ ve yoˬ. Liꞈ daw hkʼaw ve awˬ liˇ tawˇ hkawˇ gʼaw ve htaꞈ jawˇ mawˇ gʼa kaˇ htaˇ, oˇ ve hkʼaw bvuhꞈ taˍ ve hkʼe yawˇ laꞈ haˉ gʼaꞈ te ve yoˬ. (2 Raˍ 34:14, 19-21) Nawˬ Liꞈ hpu hkʼaˬ htaˆ kaꞈ gʼaw gaˇ˗aw laˇ? Chi hkʼe te chehˇ ve kʼo, cawˇ˗aw laˇ? Nawˬ htaꞈ awˬ gʼaˇ peꞈ laˇ gʼa ve Liꞈ hpu awˬ tawn htaꞈ nawˬ tawnˇ gʼa˗aw laˇ? Yawˇshiˆ 39 hkʼawꞈ htaˇ, yawˇ te yaꞈ ve pa taw gʼa suh˗e ve yoˬ. Yaˬhoˉvaˬ beˆ maˍ laˇ ve aꞈ kehˉ yawˇ awˬ to htaꞈ yonˍ jaˇ ve yoˬ. (2 Raˍ 35:20-25) Maˍ laˇ ve lehˬ, ngaˬ hui a shaꞈ hkʼaˬ hkʼe ma gaˬ˗oˬ ve, maˇ heˆ leh Liꞈ hpu hkʼaˬ hkʼe maw henˇ˗oˬ ve htawˇ maˇ kʼoˆ, ngaˬ hui Yaˬhoˉvaˬ ve kanˉ te leh yawˇ htaꞈ hkʼaˬ htaˆ kaꞈ gʼaˇ va tuˬ dawˇ teh taˍ cawˇ ve yoˬ. Beˆ maˍ laˇ tuˬ ngaˬ hui hkʼaˬ htaˆ kaꞈ bon lawˬ ve, Liꞈ hpu henˇ ve leh co ha hpawˇ ve chaw mawˇ beˆ maˍ laˇ ve htaꞈ na yuˬ cawˇ ve yoˬ. Ngaˬ hui chi hkʼe te ve kʼo, uiˍ jaˇ ve venˇ baˆ htaꞈ maˇ te yaꞈ leh ngaˬ hui ve a shaꞈ teꞈ kuiˬ hkʼaw ha lehˬ jaˇ tuˬ yoˬ.—Yaˍ 1:25. w23.09 12-13 ¶15-16

Liꞈ hpu hkʼaw yaˇ miˇ laiˉ gʼaˇ, Yaˬhoˉvaˬ htaꞈ haꞈ leh yawˇ ve kanˉ te ve awˬ lawn htaꞈ kʼoˆ taˍ ve yoˬ. Yawˇ hui lehˬ “shaˍ tiꞈ cawˬ ve chaw leh teˇ ceuˬ le le awˬ hkʼaw lo ka tiꞈ yeˬ ve chaw gʼa hpehꞈ ve yoˬ.” (1 Tiˆ 3:11) Chi hkʼoˆ kaꞈ, ngaˬ hui ve Hkriꞈ yaˇ awˬ moˍ hkʼaw awˬ viˉ awˬ nyi yaˇ miˇ co ha hpawˇ ve chaw mawˇ hpehꞈ ve htaꞈ ngaˬ hui henˇ yuˬ gʼa ve yoˬ. Awˬ viˉ awˬ nyi yaˇ miˇ haˉ˗oˬ, nawˬ henˇ yuˬ gaˇ ve awˬ viˉ awˬ nyi yaˇ miˇ hkʼaˬ ve teˇ gʼaˇ ve awˬ lawn cawˬ ve le? Yawˇ hui daꞈ ve te hkʼaˇ dawˇ hkʼaˇ aˬ htoꞈ ma cawˬ ve le? Leh nawˬ yawˇ hui htaꞈ hkʼaˬ hkʼe te henˇ yuˬ gʼa tuˬ le? Co ha hpawˇ ve chaw mawˇ ve te hkʼaˇ dawˇ hkʼaˇ teˇ hkʼaˇ lehˬ nyi ma nuˇ nehˬ ve yoˬ. Awˬ viˉ awˬ nyi yaˇ miˇ nyi ma nuˇ nehˬ ve kʼo, yawˇ Yaˬhoˉvaˬ leh awˬ nu ve chaw geh meuˆ daꞈ tuˬ yoˬ. Tawˇ pa haˉ te kʼo, Yaˬhoˉvaˬ htaꞈ haꞈ ve yaˇ miˇ lehˬ, hawˉ hkʼaˆ yehˬ kʼa hkʼaw maˇ kʼoˆ, Hkriꞈ yaˇ awˬ moˍ hkʼaw maˇ kʼoˆ, sheh kʼai paˍ te tuˬ Yaˬhoˉvaˬ gu teh taˍ laˇ ve htaꞈ yawˇ awˬ gʼaˇ piˇ ve yoˬ.—1 Kawˇ 11:3. w23.12 19 ¶3-5

Yaˬhoˉvaˬ kʼoˆ ve awˬ hpawˇ lehˬ, awˬ miˇ ma htaꞈ gʼa haꞈ leh gʼa nyi haꞈ shaˉ ve yoˬ. Awˬ to hpawˇ, nyi ma hpawˇ leh, yonˍ hkʼaˇ hpawˇ kaꞈ gʼa nyi haꞈ shaˉ piˇ ve yoˬ. Nawˬ daꞈ ve awˬ hpawˇ hpehꞈ tuˬ ga laˇ gʼa ve lehˬ, shiˍ puiˉ ve nyi ma cawˬ ve, yaˇ miˇ htaꞈ yawˆ yan piˇ ve, leh yonˍ gʼa ve chaw gʼa hpehꞈ ve yoˬ. Nawˬ heuˆ daꞈ peuˬ hkʼawꞈ nawˉ, nawˬ awˬ pa hpehꞈ tuˬ yoˬ. Nawˬ daꞈ ve awˬ pa hkʼaˬ hkʼe hpehꞈ gʼa tuˬ Yaˬhoˉvaˬ htaꞈ henˇ yuˬ sheˍ. (Efs 6:4) Yaˬhoˉvaˬ chaw awˬ moˍ lonˉ mehˆ gʼuˇ suhˍ Yeˍsuˆ htaꞈ kʼoˆ ve, ‘ngaˬ nawˬ htaꞈ haꞈ leh nyi hkʼaˇ suh jaˇ ve yoˬ.’ (Maꞈ 3:17) Chi htaꞈ pa taw nawˬ awˬ pa hpehꞈ ve kʼo, nawˬ ve yaˇ htaꞈ haꞈ ve tehꞈ teˇ hkui teˇ hkui kʼoˆ piˇ sheˍ. Yawˇ te ve daꞈ ve awˬ ceuˬ htaꞈ teˇ hkui teˇ hkui chiˇ mvuh piˇ sheˍ. Yaˬhoˉvaˬ htaꞈ henˇ yuˬ ve awˬ pa lehˬ, yaˇ co ha hpawˇ uiˍ la mvuh la tuˬ ga piˇ ve yoˬ. Nawˬ awˬ vuiˬ chi htaꞈ te gʼa tuˬ awˬ hkʼaˇ lehˬ, yehˬ kʼa hkʼaw ve chaw teˇ gʼaˇ le le htaꞈ haꞈ leh, Hkriꞈ yaˇ awˬ moˍ hkʼaw ve chaw teˇ gʼaˇ le le htaꞈ kaꞈ haꞈ ve tehꞈ hpeuꞈ maw piˇ sheˍ. Nawˬ yawˇ hui htaꞈ hkʼa dehꞈ nyi haꞈ shaˉ piˇ leh nawˬ yawˇ hui htaꞈ haꞈ leh awˬ hpfuhˇ shiˍ ve tehꞈ kʼoˆ piˇ sheˍ.—Yoˇ 15:9. w23.12 29 ¶17-18

Yaˬhoˉvaˬ ve kanˉ te ve chaw teˇ gʼaˇ le le htawˇ, shoꞈ shaꞈ ve awˬ lawn awˬ nu ve chaw gʼa hpuˇ ve hkʼa shuˍ gʼa hpuˇ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Tawˍ laˇ ve htaꞈ ngaˬ hui gʼa yeunˇ hkanˍ leh, Yaˬhoˉvaˬ ve kanˉ te ve chaw htaꞈ maˇ dawˇ cawˇ ve fawˉ mehˍ laˇ ve htaꞈ kaꞈ ngaˬ hui gʼa yeunˇ hkanˍ ve yoˬ. Shoꞈ shaꞈ ve awˬ lawn teˇ ceuˬ le le Yaˬhoˉvaˬ maˇ haꞈ shaˉ laˇ ve htawˇ, ngaˬ hui yeunˇ hkanˍ gʼaˇ tuˬ yawˇ ga laˇ tuˬ yoˬ tehꞈ ka tiꞈ te taˍ laˇ ve yoˬ. (Isy 41:10) Yawˇ ngaˬ hui htaꞈ ga laˇ ve kʼo, ngaˬ hui ha lehˬ ve cawˬ ve, hkʼa dehꞈ dawˇ cheˆ gʼa ve, leh a shaꞈ teꞈ kuiˬ hkʼaw shoꞈ shaꞈ ve gʼa hpuˇ ve htawˇ, yawˇ htaꞈ ka tiꞈ yeˬ gʼa ve yoˬ. Liꞈ hpu hkʼaw kʼoˆ ve, ‘Gʼuiˬ sha lo laˬ ve dawˇ sha gaˇ sha veʼ ngaˬ hui htaꞈ peꞈ laˇ tuˬ yoˬ tehꞈ Yaˬhoˉvaˬ ka tiꞈ te taˍ laˇ ve yoˬ. (Hpi 4:6, 7) Dawˇ sha gaˇ sha ve chi lehˬ, ngaˬ hui Yaˬhoˉvaˬ htaꞈ haꞈ leh yawˇ geh meuˆ daꞈ ve ceh tiˉ nyi ma gawˬ lehˍ cawˬ gʼa ve htaꞈ kʼoˆ gaˇ ve yoˬ. Dawˇ sha gaˇ sha ve chi lehˬ, “ca dawˇ maˇ gaˬ ve” ngaˬ hui dawˇ maˇ gʼa ve aꞈ kehˉ kanˇ paˆ cawˬ jaˇ. Nawˬ chi hkʼe gʼa hpuˇ jaw˗aw laˇ? Dawˇ haˍ jaˇ ve htawˇ bon lawˬ peuˬ hkʼawꞈ nawˉ, nawˬ nyi ma sha jaˇ ve yoˬ. Chi ve lehˬ, ‘Gʼuiˬ sha geh lo laˬ ve dawˇ sha gaˇ sha veʼ teˇ ceuˬ hpehꞈ ve yoˬ. w24.01 20 ¶2; 21 ¶4

Yaˬhoˉvaˬ htaꞈ haꞈ ve chaw lehˬ, nyi ma awˬ tawˬ hkʼa gaˬ yawˇ ve awˬ meh htaꞈ chiˇ mvuh gaˇ ve yoˬ. Yaˬhoˉvaˬ ve awˬ meh htaꞈ chiˇ mvuh ve lehˬ, yawˇ ve awˬ to htaꞈ chiˇ mvuh ve tehꞈ kʼoˆ gaˇ ve, jawˇ mawˇ Daˍviˆ shiˍ ve yoˬ. Ngaˬ hui Yaˬhoˉvaˬ ve awˬ meh gʼa kaˇ htaˇ, yawˇ hkʼaˬ hkʼe ve Gʼuiˬ sha hpehꞈ ve, yawˇ ve te hkʼaˇ dawˇ hkʼaˇ daꞈ ve, yawˇ te ve daꞈ jaˇ ve awˬ ceuˬ, chi ve teˇ hpaˍ htaꞈ ngaˬ hui dawˇ nyi ve yoˬ. Daˍviˆ Gʼuiˬ sha ve awˬ meh daꞈ kehˬ jaˇ ve htaꞈ yawˆ yan leh chiˇ mvuh gaˇ ve tehꞈ hpeuꞈ maw laˇ ve yoˬ. “Ngaˬ ve awˬ to hkʼa peu˗eˬ” Gʼuiˬ sha htaꞈ chiˇ mvuh gaˇ ve yoˬ. Chi ve lehˬ, Gʼuiˬ sha htaꞈ nyi ma awˬ tawˬ hkʼa gaˬ chiˇ mvuh ve htaꞈ kʼoˆ gaˇ ve yoˬ. Chi ve hkʼa shuˍ shuˍ, Leˍviˆ chaw sheh kʼai paˍ lehˬ, Yaˬhoˉvaˬ ve awˬ meh htaꞈ chiˇ mvuh ve, yawˇ ve awˬ meh daꞈ kehˬ jaˇ leh uiˍ jaˇ mvuh jaˇ ve pa taw, yawˇ ceh tiˉ chiˇ mvuh ve gʼa keunˍ ve tehꞈ Leˍviˆ chaw kʼoˆ ve yoˬ. (Neˍ 9:5) Yaˬhoˉvaˬ htaꞈ nyi ma awˬ tawˬ hkʼa gaˬ chiˇ mvuh ve tehꞈ hpeuꞈ maw piˇ ve lehˬ, yawˇ ha lehˬ jaˇ tuˬ te piˇ ve yoˬ. w24.02 9 ¶6

Nawˬ dawˇ teh taˍ ve htaꞈ te gʼa tuˬ haˍ jaˇ leh nawˬ dawˇ teh taˍ ve htaꞈ pa tuˬ te laˇ ve kʼo, Yaˬhoˉvaˬ nawˬ htaꞈ na gʼa leh nawˬ teꞈ chiˉ te maˇ gʼa ve chaw hpehꞈ ve tehꞈ yawˇ maˇ shawˍ. (2 Kawˇ 8:12) Ngaˬ hui dawˇ teh taˍ ve htaꞈ te gʼa tuˬ chi ve teˇ hpaˍ ngaˬ hui htaꞈ maˍ laˇ gʼa ve yoˬ. Nawˬ te gʼa˗oˬ ve awˬ ceuˬ htaꞈ maˇ leunˇ cawˇ ve yoˬ. Liꞈ hpu hkʼaw kʼoˆ ve, ‘Gʼuiˬ sha lehˬ maˇ hteˇ maˇ cawˇ ve Gʼuiˬ sha hpehꞈ ve maˇ heˆ. Ponˬ laˬ htaˇ nawˬ hui te taˍ ve kanˉ Gʼuiˬ sha yawˇ leunˇ tuˬ ve maˇ heˆ.’ (Heˍ 6:10) Chi htaꞈ pa taw, nawˬ te gʼa˗oˬ ve awˬ ceuˬ htaꞈ taˇ leunˇ sheˍ. Nawˬ laiˉ ceuˬ htaꞈ te gʼa˗oˬ ve maˇ heˆ laˇ? Tawˇ pa haˉ te kʼo, nawˬ Yaˬhoˉvaˬ geh meuˆ daꞈ ve, yawˇ ve awˬ lawn awˬ nu ve chaw htaꞈ kʼoˆ maˍ piˇ ve, leh Baˆtiˆsaˬ haꞈ yuˬ˗oˬ ve yoˬ. Nawˬ Hkriꞈ yaˇ ve awˬ vuiˬ te tuˬ dawˇ teh taˍ leh te gʼa˗oˬ ve kʼo, nawˬ caˉ leh co ha hpawˇ uiˍ la mvuh la gʼa leh chi teˇ hkui nawˬ dawˇ teh taˍ ve htaꞈ awˬ tehˬ awˬ na te gʼa tuˬ yoˬ. Nawˬ htaꞈ Yaˬhoˉvaˬ ga laˇ tcuh ve kʼo, dawˇ teh taˍ ve htaꞈ te gʼa tuˬ yoˬ. Yaˬhoˉvaˬ nawˬ htaꞈ ga laˇ leh awˬ bon hkʼaˬ hkʼe naꞈ laˇ chehˇ ve htaꞈ dawˇ nyi sheˍ. Nawˬ chi hkʼe te ve kʼo, dawˇ teh taˍ ve htaꞈ te chehˇ ve awˬ yanˇ htaˇ ha lehˬ gʼa ve yoˬ. (2 Kawˇ 4:7) Chi nawˬ caˉ leh te ve kʼo awˬ bon maˇ maˇ gʼa tuˬ yoˬ.—Gaˍ 6:9. w23.05 31 ¶16-18

Yaˬhoˉvaˬ yawˇ ve kanˉ te ve chaw htaꞈ haꞈ leh nyi hkʼaˇ suh ve tehꞈ hpeuꞈ maw laˇ gaˇ ve yoˬ. Yaˬhoˉvaˬ yawˇ ve Yaˇ Yeˍsuˆ htaꞈ haꞈ leh nyi hkʼaˇ suh jaˇ ve tehꞈ, Liꞈ hpu hkʼaw 2 lawn bvuhꞈ taˍ ve yoˬ. (Maꞈ 3:17; 17:5) Yaˬhoˉvaˬ nawˬ htaꞈ chi hkʼe kʼoˆ laˇ ve nawˬ gʼa kaˇ gaˇ˗aw laˇ? Yaˬhoˉvaˬ ngaˬ hui htaꞈ hteˇ˗ehˍ chi hkʼe maˇ kʼoˆ laˇ ve htawˇ, yawˇ ngaˬ hui htaꞈ Liꞈ hpu hkʼaw kʼoˆ laˇ leh, ha lehˬ ve bon hkawˇ liꞈ 4 daw hkʼaw Yeˍsuˆ ve tawˇ hkawˇ htaꞈ ngaˬ hui gʼaw htaˇ, Yaˬhoˉvaˬ ngaˬ hui htaꞈ nyi hkʼaˇ suh jaˇ tehꞈ kʼoˆ ve gʼa kaˇ ve yoˬ. Yeˍsuˆ lehˬ Yaˬhoˉvaˬ htaꞈ hkʼa dehꞈ henˇ yuˬ gʼa ve yoˬ. Chi htaꞈ pa taw, Yeˍsuˆ awˬ laꞈ gʼawˇ hui htaꞈ chiˇ mvuh piˇ ve, leh Yeˍsuˆ yawˇ hui htaꞈ nyi hkʼaˇ suh jaˇ tehꞈ hpeuꞈ maw piˇ ve kaꞈ ngaˬ hui gʼa gʼaw ve yoˬ. Yaˬhoˉvaˬ ngaˬ hui htaꞈ chi hkʼe dawˇ ve tehꞈ ngaˬ hui kaꞈ dawˇ mawˬ gʼa ve yoˬ. (Yoˇ 15:9, 15) Ngaˬ hui shoꞈ shaꞈ ve awˬ lawn gʼa hpuˇ htaˇ, chi lehˬ Gʼuiˬ sha ngaˬ hui htaꞈ nyi hkʼaˇ maˇ suh˗o ve tehꞈ kʼoˆ gaˇ ve maˇ heˆ. Awˬ tehˬ kʼo, chi ve ngaˬ hui Yaˬhoˉvaˬ htaꞈ haꞈ leh yawˇ htaꞈ gʼaˇ va ve tehꞈ hpeuꞈ maw piˇ ve awˬ yanˇ hpehꞈ ve yoˬ.—Yaˍ 1:12. w24.03 28 ¶10-11