Kampanye oyo ekosalema na mokili mobimba mpo na kobengisa bato na Liyangani ya Etúká “Lobiko ekómi pene!”
Basakoli ya lisangá mokomoko bakokabola nkasa ya kobengisa bato na liyangani
1 Kobanda na sanza ya Marsi mpe Aprili ya mobu 2006 na mikili ya nɔrdi tii ntango mayangani nyonso ya etúká na mokili mobimba ekosila, tokosala kampanye moko ya monene mpo na kokabola nkasa ya kobengisa bato na mayangani ya etúká oyo ekosalema na mikili pene na 155. Kampanye yango ekolobela mpe programɛ ya mayangani ya mikili mingi oyo ekosalema na Allemagne, na République tchèque, mpe na Pologne, na sanza ya Yuli mpe na pɔsɔ ya liboso ya sanza ya Augusto 2006.
2 Lokola tokómi na mikolo oyo ya nsuka mpenza, mayangani yango oyo ekolobela mingi elaka ya Nzambe ya kosikola bato na ebongiseli oyo mabe, ekozanga te kosepelisa bato oyo bazali na ezaleli oyo ebongi. Nsango yango esengeli kotinda bango bákanisa makambo oyo ekosalema na mikolo ezali koya. Mpo na kopesa bamilio ya bato libaku ya koyoka nsango wana ya kobɔndisa mpe ya elikya, tozali kolendisa masangá koleka 9 8000 ya Batatoli ya Yehova na mokili mobimba básangana na esengo mpenza mpo na kobengisa bato na liyangani oyo bango bakokende.
3 Masangá ekozwa nkasa yango ya libyangi ebele mpo mosakoli mokomoko azwa yango ata 50. Oyo ekotikala babongisi-nzela bakokabola yango. Na lisangá mokomoko, kampanye yango ekobanda pɔsɔ misato liboso ya dati oyo lisangá ekokende na liyangani. Yango ekopesa basakoli ntango ya kokabola nkasa yango na ndambo monene ya teritware na bango to na teritware mobimba.
4 Esɛngisami na basakoli ete, soki ekoki, bápesa lokasa ya libyangi na moto mokomoko oyo bakosolola na ye. Nzokande, soki bakuti moto na ndako te, bakoki kokɔtisa lokasa yango na mayele mpenza na nse ya porte. Ekosɛnga milende mpenza mpo na kokabola nkasa yango nyonso na pɔsɔ misato.
5 Tondimi mpenza ete litatoli monene ekopesama ndenge bandeko ya mokili mobimba bakosala milende mpo na kobengisa bato na liyangani ya etúká “Lobiko ekómi pene!” ndenge lisolo oyo emonisi yango. Tozali kobondela ete Yehova apambola milende oyo mokomoko na bino akosala na kampanye wana oyo ekosalema na mokili mobimba.