ບົດຄວາມສຶກສາທີ 48
ຂໍໃຫ້ມີສະຕິເມື່ອຍາກທີ່ຈະສັດຊື່ຕໍ່ພະເຢໂຫວາ
“ຂໍໃຫ້ມີສະຕິໃນທຸກສະຖານະການ.”—2ຕມ. 4:5
ເພງ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ
ໃຈຄວາມສຳຄັນa
1. ການ “ມີສະຕິໃນທຸກສະຖານະການ” ໝາຍຄວາມວ່າແນວໃດ? (2 ຕີໂມທຽວ 4:5)
ເຮົາອາດຮູ້ສຶກວ່າຍາກທີ່ຈະສັດຊື່ຕໍ່ພະເຢໂຫວາແລະອົງການຂອງເພິ່ນເມື່ອເຮົາມີບັນຫາທີ່ເຮັດໃຫ້ໜັກໃຈ. ແລ້ວເຮົາຈະຍັງສັດຊື່ຕໍ່ພະເຢໂຫວາໄດ້ແນວໃດ? ເຮົາຕ້ອງມີສະຕິໃນທຸກສະຖານະການ ຕື່ນຕົວຢູ່ສະເໝີ ແລະ “ມີຄວາມເຊື່ອທີ່ໝັ້ນຄົງ.” (ອ່ານ 2 ຕີໂມທຽວ 4:5) ການ “ມີສະຕິໃນທຸກສະຖານະການ” ໝາຍຄວາມວ່າເຮົາຕ້ອງໃຈເຢັນໆ ຄິດຮອບຄອບ ແລະພະຍາຍາມເບິ່ງເລື່ອງຕ່າງໆໃນແບບທີ່ພະເຢໂຫວາເບິ່ງ. ຖ້າເຮັດແບບນີ້ ເຮົາກໍຈະບໍ່ໄດ້ໃຫ້ອາລົມຄວາມຮູ້ສຶກມາຄວບຄຸມຄວາມຄິດຂອງເຮົາ.
2. ເຮົາຈະຮຽນຫຍັງໃນບົດຄວາມນີ້?
2 ໃນບົດຄວາມກ່ອນເຮົາໄດ້ເບິ່ງບັນຫາ 3 ຢ່າງທີ່ມາຈາກຄົນນອກປະຊາຄົມ. ແຕ່ໃນບົດຄວາມນີ້ເຮົາຈະມາເບິ່ງບັນຫາ 3 ຢ່າງທີ່ມາຈາກພາຍໃນປະຊາຄົມເຊິ່ງເຮັດໃຫ້ຍາກທີ່ຈະສັດຊື່ຕໍ່ພະເຢໂຫວາ. ບັນຫາເຫຼົ່ານັ້ນແມ່ນ (1) ເມື່ອເຮົາຮູ້ສຶກວ່າພີ່ນ້ອງເຮັດບໍ່ດີກັບເຮົາ (2) ເມື່ອເຮົາໄດ້ຮັບການສັ່ງສອນ ແລະ (3) ເມື່ອຮູ້ສຶກຍາກທີ່ຈະປັບໂຕຕາມການປ່ຽນແປງຂອງອົງການ. ແລ້ວເຮົາຈະເຮັດແນວໃດເພື່ອຈະມີຄວາມຄິດທີ່ຖືກຕ້ອງແລະຍັງສັດຊື່ຕໍ່ພະເຢໂຫວາເມື່ອເຈິບັນຫາແບບນີ້?
ເມື່ອເຮົາຮູ້ສຶກວ່າພີ່ນ້ອງເຮັດບໍ່ດີກັບເຮົາ
3. ຖ້າພີ່ນ້ອງເຮັດບໍ່ດີຕໍ່ເຮົາ ເຮົາອາດຮູ້ສຶກແນວໃດ?
3 ເຈົ້າເຄີຍຮູ້ສຶກວ່າພີ່ນ້ອງຄົນອື່ນຫຼືແມ່ນແຕ່ຜູ້ດູແລເຮັດບໍ່ດີກັບເຈົ້າບໍ? ພີ່ນ້ອງຄົນນັ້ນອາດບໍ່ໄດ້ຕັ້ງໃຈເຮັດໃຫ້ເຈົ້າເສຍໃຈ. (ຣມ. 3:23; ຢກບ. 3:2) ແຕ່ສິ່ງທີ່ລາວເຮັດອາດເຮັດໃຫ້ເຈົ້າຮູ້ສຶກເຈັບໃຈຈົນນອນບໍ່ຫຼັບແລະສົງໄສວ່າ ‘ນີ້ເປັນອົງການຂອງພະເຈົ້າແທ້ໆຫວາ ຂະໜາດພີ່ນ້ອງກໍຍັງເຮັດແບບນີ້?’ ຊາຕານຢາກໃຫ້ເຮົາຄິດແບບນັ້ນ. (2ກຣ. 2:11) ຄວາມຄິດໃນແງ່ລົບແບບນີ້ອາດຈະເຮັດໃຫ້ເຮົາເຊົາຮັບໃຊ້ພະເຢໂຫວາແລະອອກໄປຈາກອົງການຂອງເພິ່ນ. ຖ້າເຮົາຮູ້ສຶກວ່າພີ່ນ້ອງເຮັດບໍ່ດີຕໍ່ເຮົາ ເຮົາຈະເຮັດແນວໃດເພື່ອຈະບໍ່ຄິດໃນແງ່ລົບແລະຍັງມີຄວາມຄິດທີ່ຖືກຕ້ອງ?
4. ໂຢເຊັບມີຄວາມຄິດທີ່ຖືກຕ້ອງແນວໃດເມື່ອຖືກປະຕິບັດບໍ່ດີ ແລະເຮົາໄດ້ບົດຮຽນຫຍັງຈາກຕົວຢ່າງຂອງໂຢເຊັບ? (ປະຖົມມະການ 50:19-21)
4 ຢ່າເກັບຄວາມຄຽດໄວ້. ຕອນທີ່ໂຢເຊັບເປັນໄວລຸ້ນ ພວກອ້າຍເຮັດບໍ່ດີກັບລາວຫຼາຍ. ເຂົາເຈົ້າຊັງລາວ ແລະບາງຄົນເຖິງຂັ້ນຢາກຂ້າລາວ. (ປຖກ. 37:4, 18-22) ໃນທີ່ສຸດ ເຂົາເຈົ້າກໍຂາຍລາວໄປເປັນທາດ. ນີ້ເຮັດໃຫ້ລາວເຈິຄວາມລຳບາກເປັນເວລາ 13 ປີ. ໂຢເຊັບອາດຈະສົງໄສວ່າພະເຢໂຫວາຮັກລາວແທ້ບໍ ຫຼືເພິ່ນປະຖິ້ມລາວແລ້ວ ແລະບໍ່ໄດ້ຊ່ວຍລາວຕອນທີ່ເຈິຄວາມລຳບາກ. ແທນທີ່ລາວຈະຄຽດໃຫ້ພະເຢໂຫວາແລະພວກອ້າຍ ລາວໄດ້ຄວບຄຸມອາລົມໂດຍໃຈເຢັນໆ ແລະເມື່ອລາວມີໂອກາດທີ່ຈະແກ້ແຄ້ນພວກອ້າຍ ລາວກໍບໍ່ໄດ້ເຮັດ. ແຕ່ລາວໄດ້ສະແດງຄວາມຮັກແລະໃຫ້ອະໄພພວກອ້າຍ. (ປຖກ. 45:4, 5) ທີ່ໂຢເຊັບເຮັດແບບນີ້ກໍຍ້ອນລາວມີຄວາມຄິດທີ່ຖືກຕ້ອງ. ລາວບໍ່ໄດ້ຄິດເຖິງແຕ່ບັນຫາຂອງຕົວເອງ ແຕ່ລາວໄດ້ເບິ່ງພາບລວມນັ້ນກໍຄືຈຸດປະສົງຂອງພະເຢໂຫວາ. (ອ່ານປະຖົມມະການ 50:19-21) ເຮົາໄດ້ບົດຮຽນຫຍັງຈາກເລື່ອງນີ້? ເມື່ອມີຄົນເຮັດບໍ່ດີກັບເຮົາ ເຮົາບໍ່ຄວນຄຽດໃຫ້ພະເຢໂຫວາຫຼືຄິດວ່າເພິ່ນປະຖິ້ມເຮົາແລ້ວ ແຕ່ຂໍໃຫ້ເຮົາຄິດເຖິງວິທີທີ່ເພິ່ນເຄີຍຊ່ວຍເຮົາໃຫ້ອົດທົນກັບບັນຫາ. ນອກຈາກນັ້ນ ເມື່ອມີຄົນເຮັດບໍ່ດີກັບເຮົາ ຂໍໃຫ້ເຮົາເບິ່ງຂ້າມຂໍ້ຜິດພາດໂດຍສະແດງຄວາມຮັກຕໍ່ເຂົາເຈົ້າ.—1ປຕ. 4:8
5. ມີເກອັດສ໌ມີຄວາມຄິດທີ່ຖືກຕ້ອງແນວໃດເມື່ອລາວຮູ້ສຶກວ່າພີ່ນ້ອງເຮັດບໍ່ດີກັບລາວ?
5 ໃຫ້ເຮົາມາເບິ່ງເລື່ອງຂອງພີ່ນ້ອງມີເກອັດສ໌b ເຊິ່ງເປັນຜູ້ດູແລຢູ່ອາເມຣິກາໃຕ້. ລາວໄດ້ເລົ່າຄວາມຮູ້ສຶກຕອນທີ່ລາວຄິດວ່າຜູ້ດູແລບາງຄົນເຮັດບໍ່ດີກັບລາວ. ລາວບອກວ່າ: “ຂ້ອຍບໍ່ເຄີຍເຈິເລື່ອງທີ່ເຮັດໃຫ້ໜັກໃຈແບບນີ້ມາກ່ອນ. ຂ້ອຍກັງວົນຫຼາຍຈົນນອນບໍ່ຫຼັບແລະຮ້ອງໄຫ້ຫຼາຍເທື່ອ.” ແຕ່ມີເກອັດສ໌ມີຄວາມຄິດທີ່ຖືກຕ້ອງແລະພະຍາຍາມຄວບຄຸມຄວາມຮູ້ສຶກຂອງຕົວເອງ. ລາວໄດ້ອະທິດຖານເລື້ອຍໆເພື່ອຂໍໃຫ້ພະເຢໂຫວາໃຫ້ພະລັງບໍລິສຸດແລະໃຫ້ກຳລັງທີ່ຈະອົດທົນໄດ້. ແລະລາວຍັງໄດ້ຄົ້ນຄວ້າປຶ້ມຕ່າງໆຂອງອົງການທີ່ຈະຊ່ວຍລາວໄດ້. ເຮົາໄດ້ບົດຮຽນຫຍັງຈາກເລື່ອງນີ້? ຖ້າເຮົາຮູ້ສຶກວ່າພີ່ນ້ອງເຮັດບໍ່ດີກັບເຮົາ ຂໍໃຫ້ເຮົາໃຈເຢັນໆແລະພະຍາຍາມຄວບຄຸມຄວາມຮູ້ສຶກທີ່ບໍ່ດີ. ເຮົາອາດບໍ່ຮູ້ສະພາບການຫຼືເຫດຜົນທີ່ພີ່ນ້ອງຄົນນັ້ນເວົ້າແລະເຮັດບໍ່ດີກັບເຮົາ. ດັ່ງນັ້ນ ໃຫ້ເຮົາອະທິດຖານເຖິງພະເຢໂຫວາ ແລະຂໍເພິ່ນໃຫ້ຊ່ວຍເຮົາເບິ່ງສິ່ງຕ່າງໆໃນແບບທີ່ພະເຢໂຫວາເບິ່ງ. ການເຮັດແບບນີ້ຈະຊ່ວຍເຮົາໃຫ້ຄິດວ່າພີ່ນ້ອງບໍ່ໄດ້ຕັ້ງໃຈເຮັດບໍ່ດີກັບເຮົາແລະເຮົາກໍຈະໃຫ້ອະໄພເຂົາເຈົ້າໄດ້. (ສຸພາ. 19:11) ຂໍໃຫ້ຈື່ໄວ້ວ່າພະເຢໂຫວາເຫັນທຸກຢ່າງທີ່ເກີດຂຶ້ນກັບເຮົາ ແລະເພິ່ນຈະໃຫ້ກຳລັງກັບເຮົາທີ່ຈະອົດທົນໄດ້.—2ຂຄ. 16:9; ຜູ້ປ. 5:8
ເມື່ອໄດ້ຮັບການສັ່ງສອນ
6. ເປັນຫຍັງຈຶ່ງສຳຄັນທີ່ເຮົາຈະເຫັນວ່າການສັ່ງສອນຈາກພະເຢໂຫວາເປັນການສະແດງຄວາມຮັກ? (ເຮັບເຣີ 12:5, 6, 11)
6 ເມື່ອພະເຢໂຫວາສັ່ງສອນເຮົາ ອາດຈະເຮັດໃຫ້ເຮົາຮູ້ສຶກເຈັບ. ແຕ່ຖ້າເຮົາຄິດເຖິງແຕ່ຄວາມເຈັບນັ້ນເຮົາອາດຈະເລີ່ມຄິດວ່າການສັ່ງສອນບໍ່ຍຸຕິທຳແລະໃຊ້ບໍ່ໄດ້ກັບເຮົາ. ນີ້ອາດຈະເຮັດໃຫ້ເຮົາພາດໂອກາດທີ່ຈະເຫັນວ່າການສັ່ງສອນເປັນການທີ່ພະເຢໂຫວາສະແດງຄວາມຮັກຕໍ່ເຮົາ. (ອ່ານເຮັບເຣີ 12:5, 6, 11) ແລະຖ້າເຮົາຍອມໃຫ້ອາລົມຄວາມຮູ້ສຶກມາຄວບຄຸມເຮົາ ເຮົາກໍຈະເປີດໂອກາດໃຫ້ຊາຕານມາໂຈມຕີເຮົາ ເພາະມັນບໍ່ຢາກໃຫ້ເຮົາຍອມຮັບການສັ່ງສອນແລະເຖິງຂັ້ນຄ່ອຍໆເຊົາຮັບໃຊ້ພະເຢໂຫວາແລະອອກໄປຈາກປະຊາຄົມ. ຖ້າເຮົາໄດ້ຮັບການສັ່ງສອນ ເຮົາຈະຍັງມີຄວາມຄິດທີ່ຖືກຕ້ອງໄດ້ແນວໃດ?
ຍ້ອນເປໂຕຖ່ອມຕົວແລະຍອມຮັບການສັ່ງສອນ ລາວຈື່ງເປັນປະໂຫຍດຕໍ່ພະເຢໂຫວາຫຼາຍຂຶ້ນ (ເບິ່ງຂໍ້ 7)
7. (ກ) ຕາມຮູບພາບ ພະເຢໂຫວາໄດ້ໃຊ້ເປໂຕແນວໃດຫຼັງຈາກລາວຍອມຮັບການສັ່ງສອນ? (ຂ) ເຮົາໄດ້ບົດຮຽນຫຍັງຈາກຕົວຢ່າງຂອງເປໂຕ?
7 ຍອມຮັບການສັ່ງສອນແລະປ່ຽນແປງຕົວເອງ. ຫຼາຍເທື່ອພະເຢຊູໄດ້ສັ່ງສອນເປໂຕຕໍ່ໜ້າອັກຄະສາວົກຄົນອື່ນໆ. (ມຣກ. 8:33; ລກ. 22:31-34) ນີ້ຄືຊິເຮັດໃຫ້ເປໂຕຮູ້ສຶກອາຍແທ້ໆ! ແຕ່ເປໂຕກໍຍັງພັກດີຕໍ່ພະເຢຊູ. ລາວຍອມຮັບການສັ່ງສອນຈາກພະເຢຊູແລະຮຽນຮູ້ຈາກຂໍ້ຜິດພາດນັ້ນ. ດັ່ງນັ້ນ ພະເຢໂຫວາຈຶ່ງໃຫ້ລາງວັນກັບລາວທີ່ລາວພັກດີແລະມອບວຽກສຳຄັນໃຫ້ລາວເຮັດ. (ຢຮ. 21:15-17; ກຈກ. 10:24-33; 1ປຕ. 1:1) ເຮົາໄດ້ບົດຮຽນຫຍັງຈາກເລື່ອງນີ້? ເມື່ອເຮົາເບິ່ງຂ້າມຄວາມອັບອາຍ ຍອມຮັບການສັ່ງສອນ ແລະປ່ຽນແປງໂຕເອງ ເຮົາແລະຄົນອື່ນກໍຈະໄດ້ຮັບປະໂຫຍດ. ແລະເມື່ອເຮັດແບບນັ້ນ ເຮົາກໍຈະເປັນປະໂຫຍດຕໍ່ພະເຢໂຫວາແລະຕໍ່ພີ່ນ້ອງຫຼາຍຂຶ້ນ.
8-9. ຫຼັງຈາກທີ່ເບີນາໂດຖືກສັ່ງສອນ ທຳອິດລາວຮູ້ສຶກແນວໃດ ແຕ່ສິ່ງໃດຊ່ວຍລາວໃຫ້ມີຄວາມຄິດທີ່ຖືກຕ້ອງໄດ້?
8 ໃຫ້ເຮົາມາເບິ່ງຕົວຢ່າງຂອງພີ່ນ້ອງຊາຍທີ່ຊື່ເບີນາໂດຢູ່ໂມຊຳບິກ. ລາວຖືກປົດອອກຈາກການເປັນຜູ້ດູແລ. ທຳອິດລາວຮູ້ສຶກແນວໃດ? ລາວບອກວ່າ: “ຂ້ອຍຄຽດຫຼາຍ ຍ້ອນຂ້ອຍບໍ່ມັກການສັ່ງສອນທີ່ໄດ້ຮັບ.” ເບີນາໂດກັງວົນວ່າພີ່ນ້ອງໃນປະຊາຄົມຈະເບິ່ງລາວບໍ່ດີ. ລາວເວົ້າຕື່ມວ່າ: “ຂ້ອຍຕ້ອງໃຊ້ເວລາສອງສາມເດືອນເພື່ອຈະມີຄວາມຄິດທີ່ຖືກຕ້ອງໃນເລື່ອງການສັ່ງສອນແລະໄວ້ໃຈພະເຢໂຫວາແລະອົງການຂອງເພິ່ນອີກ.” ແລ້ວສິ່ງໃດຊ່ວຍເບີນາໂດໃຫ້ມີຄວາມຄິດທີ່ຖືກຕ້ອງ?
9 ເບີນາໂດໄດ້ປັບຄວາມຄິດຂອງຕົວເອງ. ລາວບອກວ່າ: “ຕອນທີ່ຂ້ອຍເປັນຜູ້ດູແລ ຂ້ອຍເຄີຍໃຊ້ເຮັບເຣີ 12:7 ເພື່ອຊ່ວຍຄົນອື່ນໃຫ້ມີຄວາມຄິດທີ່ຖືກຕ້ອງເລື່ອງການສັ່ງສອນຈາກພະເຢໂຫວາ. ຕອນນີ້ຂ້ອຍຖາມຕົວເອງວ່າ: ‘ຂໍ້ນີ້ໃຊ້ໄດ້ກັບໃຜແດ່?’ ໃຊ້ໄດ້ກັບຜູ້ຮັບໃຊ້ຂອງພະເຢໂຫວາທຸກຄົນລວມເຖິງຂ້ອຍນຳ.” ຈາກນັ້ນ ເບີນາໂດກໍໄດ້ປ່ຽນແປງໂຕເອງແລະກັບມາໄວ້ໃຈພະເຢໂຫວາແລະອົງການຂອງເພິ່ນອີກ. ລາວອ່ານຄຳພີໄບເບິນຫຼາຍຂຶ້ນແລະຄິດຕຶກຕອງສິ່ງທີ່ອ່ານ. ເຖິງລາວຈະກັງວົນວ່າພີ່ນ້ອງຈະເບິ່ງລາວແນວໃດ ແຕ່ລາວກໍຍັງໄປປະກາດແລະອອກຄວາມຄິດເຫັນໃນການປະຊຸມ. ໃນທີ່ສຸດ ລາວກໍຖືກແຕ່ງຕັ້ງໃຫ້ເປັນຜູ້ດູແລອີກເທື່ອໜຶ່ງ. ຖ້າເຮົາໄດ້ຮັບການສັ່ງສອນຄືເບີນາໂດ ຂໍໃຫ້ເຮົາບໍ່ຄິດເຖິງໂຕເອງຫຼາຍເກີນໄປ ໃຫ້ຍອມຮັບການສັ່ງສອນແລະປ່ຽນແປງໂຕເອງ.c (ສຸພາ. 8:33; 22:4) ຖ້າເຈົ້າເຮັດແບບນັ້ນ ເຈົ້າກໍຈະໝັ້ນໃຈວ່າພະເຢໂຫວາຈະໃຫ້ລາງວັນກັບເຈົ້າທີ່ຍັງພັກດີຕໍ່ເພິ່ນແລະອົງການຂອງເພິ່ນ.
ເມື່ອຮູ້ສຶກຍາກທີ່ຈະປັບໂຕຕາມການປ່ຽນແປງຂອງອົງການ
10. ມີການປ່ຽນແປງຫຍັງທີ່ເຮັດໃຫ້ຊາວອິດສະຣາເອນບາງຄົນຍາກທີ່ຈະສັດຊື່ຕໍ່ພະເຢໂຫວາ?
10 ເມື່ອອົງການມີການປ່ຽນແປງ ເຮົາອາດຮູ້ສຶກວ່າຍາກທີ່ຈະສັດຊື່ຕໍ່ພະເຢໂຫວາ. ຖ້າບໍ່ລະວັງ ເຮົາອາດຈະຄ່ອຍໆຫ່າງອອກຈາກພະເຢໂຫວາກໍໄດ້. ໃຫ້ເຮົາມາເບິ່ງສິ່ງທີ່ເກີດຂຶ້ນກັບຊາວອິດສະຣາເອນເມື່ອມີການປ່ຽນແປງຕອນທີ່ມີກົດໝາຍຂອງໂມເຊ. ກ່ອນທີ່ພະເຢໂຫວາຈະໃຫ້ກົດໝາຍກັບຊາວອິດສະຣາເອນ ຫົວໜ້າຄອບຄົວແຕ່ລະຄົນຈະເຮັດໜ້າທີ່ແບບປະໂລຫິດ. (ປຖກ. 8:20, 21; 12:7; 26:25; 35:1, 6, 7; ໂຢບ 1:5) ເຂົາເຈົ້າຕ້ອງສ້າງແທ່ນບູຊາແລະຖວາຍເຄື່ອງບູຊາໃຫ້ພະເຢໂຫວາ. ແຕ່ເມື່ອມີການຕັ້ງກົດໝາຍຂອງໂມເຊ ຫົວໜ້າຄອບຄົວກໍບໍ່ໄດ້ເຮັດໜ້າທີ່ນີ້ແລ້ວ ເພາະພະເຢໂຫວາໄດ້ແຕ່ງຕັ້ງປະໂລຫິດຈາກລູກຫຼານຂອງອາໂຣນໃຫ້ເປັນຜູ້ຖວາຍເຄື່ອງບູຊາ. ຕັ້ງແຕ່ນັ້ນມາ ຖ້າຫົວໜ້າຄອບຄົວທີ່ບໍ່ແມ່ນລູກຫຼານຂອງອາໂຣນເຮັດໜ້າທີ່ແບບປະໂລຫິດ ຜູ້ນັ້ນຈະຕ້ອງຖືກປະຫານຊີວິດ.d (ລລວ. 17:3-6, 8, 9) ເປັນໄປໄດ້ບໍວ່າເລື່ອງນີ້ເຮັດໃຫ້ໂກຣາ ດາທານ ອາບີຣາມ ແລະພວກຫົວໜ້າອີກ 250 ຄົນຕໍ່ຕ້ານໂມເຊແລະອາໂຣນ? (ຈຊບ. 16:1-3) ຄຳພີໄບເບິນບໍ່ໄດ້ບອກເຫດຜົນທີ່ເຂົາເຈົ້າຕໍ່ຕ້ານ ແຕ່ເຮົາຮູ້ວ່າໂກຣາແລະຄົນອື່ນໆທີ່ຢູ່ຝ່າຍລາວບໍ່ສັດຊື່ຕໍ່ພະເຢໂຫວາ. ແລ້ວຖ້າການປ່ຽນແປງຂອງອົງການພະເຢໂຫວາມີຜົນຕໍ່ເຈົ້າເດ ເຈົ້າຈະເຮັດແນວໃດ?
ເມື່ອລູກຫຼານຂອງໂກຮາດຖືກປ່ຽນວຽກມອບໝາຍ ເຂົາເຈົ້າກໍເຕັມໃຈຮັບໃຊ້ເປັນນັກຮ້ອງ ຍາມປະຕູ ແລະເບິ່ງແຍງຫ້ອງມ້ຽນເຄື່ອງ (ເບິ່ງຂໍ້ 11)
11. ເຮົາໄດ້ບົດຮຽນຫຍັງຈາກຕົວຢ່າງຂອງລູກຫຼານຂອງໂກຮາດ?
11 ຍອມຮັບແລະເຮັດຕາມການປ່ຽນແປງຂອງອົງການ. ຕອນທີ່ຊາວອິດສະຣາເອນເດີນທາງໃນບ່ອນທຸລະກັນດານ ລູກຫຼານຂອງໂກຮາດໄດ້ຖືກມອບໝາຍໃຫ້ເຮັດໜ້າທີ່ທີ່ສຳຄັນ. ທຸກເທື່ອທີ່ຊາວອິດສະຣາເອນຍ້າຍຄ້າຍພັກ ລູກຫຼານຂອງໂກຮາດບາງຄົນຈະຫາມຫີບສັນຍາອອກໜ້າໄປກ່ອນປະຊາຊົນທຸກຄົນ. (ຈຊບ. 3:29, 31; 10:33; ຢຊ. 3:2-4) ນີ້ເປັນສິດທິພິເສດຫຼາຍແທ້ໆ! ແຕ່ລູກຫຼານຂອງໂກຮາດກໍເຈິການປ່ຽນແປງເມື່ອຊາວອິດສະຣາເອນເຂົ້າໄປໃນແຜ່ນດິນຕາມຄຳສັນຍາ ເພາະຫີບສັນຍາບໍ່ຈຳເປັນຕ້ອງຍ້າຍໄປຍ້າຍມາອີກແລ້ວ. ໃນສະໄໝທີ່ໂຊໂລໂມນປົກຄອງ ລູກຫຼານຂອງໂກຮາດບາງຄົນກໍຖືກມອບໝາຍໃຫ້ເປັນນັກຮ້ອງ ບາງຄົນຍາມປະຕູ ແລະບາງຄົນເບິ່ງແຍງຫ້ອງມ້ຽນເຄື່ອງ. (1ຂຄ. 6:31-33; 26:1, 24) ແຕ່ບໍ່ມີບ່ອນໃດໃນຄຳພີໄບເບິນທີ່ບອກວ່າເຂົາເຈົ້າຈົ່ມຫຼືຮຽກຮ້ອງທີ່ຈະເຮັດໜ້າທີ່ທີ່ມີກຽດຄືແຕ່ກ່ອນ. ເຮົາໄດ້ບົດຮຽນຫຍັງຈາກເລື່ອງນີ້? ເຮົາຕ້ອງຍອມຮັບແລະເຮັດຕາມການປ່ຽນແປງຂອງອົງການເຖິງວ່າການປ່ຽນແປງນັ້ນຈະມີຜົນຕໍ່ວຽກມອບໝາຍຂອງເຮົາກໍຕາມ ແລະໃຫ້ເຮົາມີຄວາມສຸກກັບວຽກມອບໝາຍທຸກຢ່າງທີ່ໄດ້ຮັບ. ຂໍໃຫ້ຈື່ໄວ້ວ່າ ຄຸນຄ່າຂອງເຮົາບໍ່ໄດ້ຂຶ້ນຢູ່ກັບວຽກທີ່ເຮົາເຮັດ ເພາະພະເຢໂຫວາຖືວ່າການເຊື່ອຟັງສຳຄັນກວ່າວຽກມອບໝາຍຕ່າງໆ.—1ຊມ. 15:22
12. ພີ່ນ້ອງໄຊນ້າຮູ້ສຶກແນວໃດເມື່ອຖືກປ່ຽນວຽກມອບໝາຍ?
12 ໃຫ້ເຮົາມາເບິ່ງຕົວຢ່າງຂອງພີ່ນ້ອງທີ່ຊື່ໄຊນ້າ ຢູ່ອາຊີກາງ. ຫຼັງຈາກທີ່ຮັບໃຊ້ຢູ່ເບເທນມາຫຼາຍກວ່າ 23 ປີ ລາວກໍຖືກປ່ຽນວຽກມອບໝາຍໃຫ້ໄປເປັນໄພໂອເນຍພິເສດ. ລາວບອກວ່າ: “ຂ້ອຍຮູ້ສຶກຕົກໃຈຫຼາຍເມື່ອຖືກປ່ຽນມອບໝາຍ. ຂ້ອຍຄິດວ່າຕົວເອງບໍ່ມີຄ່າແລະຖາມໂຕເອງມາຕະຫຼອດວ່າ ‘ຂ້ອຍເຮັດຫຍັງຜິດ?’” ແຖມພີ່ນ້ອງບາງຄົນໃນປະຊາຄົມກໍຍັງເວົ້າຊ້ຳເຕີມລາວວ່າ: “ຖ້າເຈົ້າເຮັດວຽກດີກວ່ານີ້ ກໍຄືຊິບໍ່ຖືກເຊີນອອກຈາກເບເທນດອກ.” ນີ້ເຮັດໃຫ້ໄຊນ້າເສຍໃຈຫຼາຍຈົນຮ້ອງໄຫ້ທຸກຄືນ ແຕ່ລາວບອກວ່າ: “ຂ້ອຍບໍ່ເຄີຍສົງໄສໃນອົງການຂອງພະເຢໂຫວາແລະບໍ່ໄດ້ຄິດວ່າພະເຢໂຫວາບໍ່ຮັກຂ້ອຍ.” ສິ່ງໃດຊ່ວຍໄຊນ້າໃຫ້ຍັງມີຄວາມຄິດທີ່ຖືກຕ້ອງ?
13. ພີ່ນ້ອງໄຊນ້າຄວບຄຸມຄວາມຮູ້ສຶກແລະຄວາມຄິດໃນແງ່ລົບໄດ້ແນວໃດ?
13 ໄຊນ້າຄວບຄຸມຄວາມຮູ້ສຶກແລະຄວາມຄິດໃນແງ່ລົບໄດ້ແນວໃດ? ລາວໄດ້ອ່ານບົດຄວາມແລະປຶ້ມຕ່າງໆຂອງອົງການທີ່ເວົ້າເຖິງບັນຫາຄ້າຍຄືກັບລາວ. ລາວອ່ານບົດຄວາມທີ່ຊື່ວ່າ “ເຈົ້າສາມາດຮັບມືກັບຄວາມທໍ້ແທ້ໄດ້!” ໃນຫໍສັງເກດການ 1 ກຸມພາ 2001 (ພາສາໄທ). ບົດຄວາມນີ້ເວົ້າເຖິງມາຣະໂກຜູ້ຂຽນຄຳພີໄບເບິນທີ່ອາດຮູ້ສຶກຄ້າຍຄືກັບໄຊນ້າເມື່ອຖືກປ່ຽນວຽກມອບໝາຍ. ໄຊນ້າບອກວ່າ: “ຕົວຢ່າງຂອງມາຣະໂກປຽບຄືກັບຢາທີ່ບັນເທົາຄວາມທໍ້ໃຈຂອງຂ້ອຍ.” ໄຊນ້າຍັງໄດ້ສະໜິດກັບພີ່ນ້ອງ ບໍ່ແຍກໂຕຢູ່ຜູ້ດຽວ ແລະບໍ່ເສຍໃຈກັບສະພາບການຂອງໂຕເອງຫຼາຍເກີນໄປ. ລາວຮູ້ວ່າພະລັງບໍລິສຸດກຳລັງຊີ້ນຳວຽກໃນອົງການຂອງພະເຢໂຫວາ ແລະພີ່ນ້ອງທີ່ນຳໜ້າໃນອົງການກໍເປັນຫ່ວງລາວຫຼາຍ ແລະລາວຍັງເຂົ້າໃຈວ່າອົງການຂອງພະເຢໂຫວາຕ້ອງເຮັດສິ່ງທີ່ດີທີ່ສຸດເພື່ອໃຫ້ວຽກຂອງພະເຢໂຫວາສຳເລັດ.
14. ມີການປ່ຽນແປງຫຍັງທີ່ເຮັດໃຫ້ຍາກສຳລັບພີ່ນ້ອງວາໂດ ແລະສິ່ງໃດຊ່ວຍລາວໄດ້?
14 ພີ່ນ້ອງວາໂດອາຍຸ 73 ປີເຊິ່ງເປັນຜູ້ດູແລຢູ່ປະເທດໂຊເວເນຍຮູ້ສຶກວ່າຍາກທີ່ຈະປັບໂຕເມື່ອປະຊາຄົມຕ່າງໆຖືກຍຸບເຂົ້າກັນ ແລະຫໍປະຊຸມທີ່ປະຊາຄົມລາວໃຊ້ກໍຖືກປິດໄວ້. ລາວບອກວ່າ: “ຂ້ອຍບໍ່ເຂົ້າໃຈວ່າເປັນຫຍັງຫໍປະຊຸມທີ່ງາມໆຈຶ່ງຖືກປິດໄວ້. ຂ້ອຍເສຍໃຈຫຼາຍເພາະເຮົາຫາກໍສ້ອມແປງຫໍປະຊຸມຫວ່າງບໍ່ດົນມານີ້ ແລະຂ້ອຍກໍໄດ້ຊ່ວຍເຮັດເຟີນິເຈີໃໝ່ໆໄວ້ຢູ່ຫັ້ນຍ້ອນຂ້ອຍເປັນຊ່າງໄມ້. ນອກຈາກນັ້ນ ການປ່ຽນແປງແບບນີ້ຍັງເຮັດໃຫ້ຍາກທີ່ຜູ້ເຖົ້າແບບເຮົາຈະປັບໂຕໄດ້.” ແລ້ວສິ່ງໃດຊ່ວຍວາໂດໃຫ້ເຮັດຕາມການຊີ້ນຳນີ້? ລາວບອກວ່າ: “ການປັບໂຕໃຫ້ເຂົ້າກັບການປ່ຽນແປງຂອງອົງການຊ່ວຍໃຫ້ເຮົາໄດ້ຮັບພອນຫຼາຍຢ່າງ. ການປ່ຽນແປງແບບນີ້ກຳລັງກຽມເຮົາໃຫ້ພ້ອມສຳລັບການປ່ຽນແປງທີ່ໃຫຍ່ກວ່າເຊິ່ງຈະເກີດຂຶ້ນໃນອະນາຄົດ.” ແລ້ວເຈົ້າເດຮູ້ສຶກວ່າຍາກທີ່ຈະປັບໂຕບໍເມື່ອປະຊາຄົມຕ່າງໆຖືກຍຸບເຂົ້າກັນຫຼືເມື່ອເຈົ້າຖືກປ່ຽນວຽກມອບໝາຍ? ຂໍໃຫ້ໝັ້ນໃຈວ່າພະເຢໂຫວາເຂົ້າໃຈຄວາມຮູ້ສຶກຂອງເຈົ້າ. ແຕ່ເມື່ອເຈົ້າຍອມຮັບ ເຮັດຕາມການປ່ຽນແປງ ແລະສັດຊື່ຕໍ່ພະເຢໂຫວາແລະອົງການຂອງເພິ່ນ ເຈົ້າກໍຈະໄດ້ຮັບພອນຫຼາຍຢ່າງ.—ເພງ. 18:25
“ຂໍໃຫ້ມີສະຕິໃນທຸກສະຖານະການ”
15. ເຮົາຈະມີຄວາມຄິດທີ່ຖືກຕ້ອງໄດ້ແນວໃດເມື່ອມີບັນຫາທີ່ມາຈາກພາຍໃນປະຊາຄົມ?
15 ເມື່ອລະບົບນີ້ໃກ້ຈະເຖິງຈຸດຈົບ ເຮົາກໍແຮ່ງຄາດໝາຍໄດ້ວ່າຈະມີບັນຫາຫຼາຍຢ່າງທີ່ມາຈາກພາຍໃນປະຊາຄົມ ເຊິ່ງບັນຫາເຫຼົ່ານີ້ອາດເຮັດໃຫ້ເຮົາຮູ້ສຶກວ່າຍາກທີ່ຈະສັດຊື່ຕໍ່ພະເຢໂຫວາ. ດັ່ງນັ້ນ ເຮົາຕ້ອງ “ມີສະຕິໃນທຸກສະຖານະການ” ແລະມີຄວາມຄິດທີ່ຖືກຕ້ອງ. ຖ້າເຈົ້າຮູ້ສຶກວ່າພີ່ນ້ອງເຮັດບໍ່ດີກັບເຈົ້າ ຂໍຢ່າເກັບຄວາມຄຽດໄວ້. ຖ້າເຈົ້າໄດ້ຮັບການສັ່ງສອນ ຂໍໃຫ້ເບິ່ງຂ້າມຄວາມອາຍ ຍອມຮັບຄຳແນະນຳ ແລະປ່ຽນແປງຕົວເອງ. ແລະເມື່ອອົງການຂອງພະເຢໂຫວາມີການປ່ຽນແປງເຊິ່ງມີຜົນຕໍ່ເຈົ້າເປັນສ່ວນຕົວ ກໍຂໍໃຫ້ຍອມຮັບດ້ວຍຄວາມເຕັມໃຈແລະເຮັດຕາມການປ່ຽນແປງນັ້ນ.
16. ເຮົາຈະໄວ້ໃຈພະເຢໂຫວາແລະອົງການຂອງເພິ່ນຕໍ່ໆໄປໄດ້ແນວໃດ?
16 ເຮົາຈະໄວ້ໃຈພະເຢໂຫວາແລະອົງການຂອງເພິ່ນຕໍ່ໆໄປໄດ້ ຖ້າເຮົາ “ມີສະຕິໃນທຸກສະຖານະການ” ເຊິ່ງກໍຄື ໃຈເຢັນໆ ຄິດຮອບຄອບ ແລະເບິ່ງເລື່ອງຕ່າງໆໃນແບບທີ່ພະເຢໂຫວາເບິ່ງ. ໃຫ້ເຮົາຕັ້ງໃຈທີ່ຈະອ່ານແລະຄິດຕຶກຕອງເລື່ອງຂອງຄົນໃນຄຳພີໄບເບິນທີ່ສາມາດຮັບມືກັບບັນຫາທີ່ຄ້າຍຄືກັບເຮົາ. ໃຫ້ອະທິດຖານຂໍຄວາມຊ່ວຍເຫຼືອຈາກພະເຢໂຫວາແລະຢ່າແຍກໂຕເອງອອກຈາກປະຊາຄົມ. ເມື່ອເຮັດແບບນີ້ ຊາຕານກໍຈະບໍ່ສາມາດເຮັດໃຫ້ເຮົາເຊົາຮັບໃຊ້ພະເຢໂຫວາແລະອອກໄປຈາກອົງການຂອງເພິ່ນ.—ຢກບ. 4:7
ເພງ 126 ຈົ່ງຕື່ນຕົວ ເຂັ້ມແຂງ ໝັ້ນຄົງ
a ບາງເທື່ອເຮົາກໍຮູ້ສຶກວ່າຍາກທີ່ຈະສັດຊື່ຕໍ່ພະເຢໂຫວາແລະອົງການຂອງເພິ່ນ ໂດຍສະເພາະຕອນທີ່ເຮົາເຈິບັນຫາທີ່ມາຈາກພາຍໃນປະຊາຄົມ. ໃນບົດຄວາມນີ້ເຮົາຈະເບິ່ງບັນຫາ 3 ຢ່າງ ແລະເບິ່ງວ່າເຮົາຕ້ອງເຮັດແນວໃດເພື່ອຈະຮັກສາຄວາມສັດຊື່ຕໍ່ພະເຢໂຫວາແລະອົງການຂອງເພິ່ນ.
b ຊື່ສົມມຸດ
c ເຈົ້າອາດຈະເບິ່ງຄຳແນະນຳເພີ່ມເຕີມໃນບົດຄວາມທີ່ຊື່ວ່າ “ເຈົ້າເຄີຍຮັບໃຊ້ມາແລ້ວບໍ? ເຈົ້າຈະຮັບໃຊ້ອີກໄດ້ບໍ?” ໃນຫໍສັງເກດການ 15 ສິງຫາ 2009 ໜ້າ 30 (ພາສາໄທ)
d ຕາມກົດໝາຍ ຖ້າຫົວໜ້າຄອບຄົວຢາກຖວາຍສັດເປັນເຄື່ອງບູຊາ ເຂົາເຈົ້າຕ້ອງເອົາໄປຖວາຍໃນບ່ອນທີ່ພະເຢໂຫວາກຳນົດໄວ້ ແຕ່ມີຂໍ້ຍົກເວັ້ນສຳລັບຜູ້ທີ່ຢູ່ໄກ.—ພບຍ. 12:21