Myanda ya Kunyemena’ko ya Kabuku ka ku Kupwila Būmi ne Mwingilo
13-19 KWEJI 4
BYABULĒME BYA MU KINENWA KYA LEZA | NGALWILO 31
“Ba Yakoba ne Lebane Abasamba Kipwano kya Ndoe”
it-1-F p. 943 mus. 3
Ngadida
Pa kupwija mu ndoe myanda yobēpile, ba Yakoba ne Lebane bāsambile kipwano. Pa kino, Yakoba wāshimikile kikomo kya dibwe ne kunena “banababo” babunge mulwi wa mabwe, mobimwekela mu bupunga bwa meza, pene pobādidīle bidibwa bya kipwano. Kupwa , Lebane wāita kino kifuko bu “Yengala-Sahaduta,” dijina dya Kialamia (Kine Shidea), ino Yakoba wēkita bu Ngadida, dijina dya Kihebelu. Penepo Lebane wānena’mba: “Uno mulwi [mu Kihebelu, gal] wa mabwe i kamoni [mu Kihebelu, edh] pa bukata bwa ami ne abe dyalelo.” (Ngo 31:44-48) Mulwi wa mabwe (ne kikomo kya dibwe) byāikele bu kamoni ku bapityeshinda bonso. Enka na munenena vese 49, “Kiteba kya Mulami [mu Kihebelu, mitspah],” kyāletele bukamoni amba ba Yakoba ne Lebane abeivwana kulama ndoe pa bukata bwabo ne bisaka byabo. (Ngo 31:50-53) Mu bitatyi bikwabo, mabwe āingidijibwe mwanda wa kuleta bukamoni bwampikwa kwisamba.—Yos 4:4-7; 24:25-27.
it-2-F p. 1089
Kiteba kya Mulami
Yakoba wābungile mulwi wa mabwe, wēwita bu “Ngadida” (ko kunena’mba “Mulwi Uleta Bukamoni”) ne bu “Kiteba kya Mulami.” Kupwa Lebane wānena’mba: “Yehova ekale kalama pa bukata bwa abe ne ami shi tubeshiye ketukimonepo meso.” (Ngo 31:45-49) Uno mulwi wa mabwe wādi uleta bukamoni amba Yehova utalanga shi ba Yakoba ne Lebane bakafikidija kipwano kyabo kya ndoe.
Kukola Byabupeta bya ku Mushipiditu
it-2-F p. 1062
Telafimi
Bintu bya kala byasokwelwe mu Mesopotemya ne mu bifuko bya kubwipi bilombola’mba kusela byelekejo bya batelafimi kwādi kupa muntu mukenga wa kupyana bupyani bwa kisaka. Kukwatañana na kipapo kimo kyasokwelwe mu Nuzi, kyaba kimo kusela baleza ba mu njibo kwādi kupa muko mwana-mulume mukenga wa kukasamba mu kidye mwanda wa apyane bintu bya shandi muko ufwile (Ancient Near Eastern Texts, na J. Pritchard, mu 1974, p. 219, 220, ne kunshi kwa dyani 51) Na kino mu ñeni, padi Letyela wālangile amba udi na bubinga bwa kusela batelafimi, mwanda shandi wādimbile wandi mulume Yakoba. (Dingakanya na Ngo 31:14-16.) Kadi batelafimi byobādi bapa muntu lupusa lwa kupyana bupyani, kino kilombola kine kyādi kikimbila Lebane bamujokejeje’bo, wāfula’nka ne kusela banababo, bākalonda Yakoba, bāenda lwendo lwa mafuku asamba-abidi. (Ngo 31:19-30) Na bubine Yakoba kādipo uyukile byālongele Letyela (Ngo 31:32), kadi i kutupu kintu nansha kimo kilombola’mba Yakoba wādi ukimba kwingidija batelafimi mwanda wa kupyana bupyani bwa bana ba Lebane. Bino byelekejo kebyādipo na mvubu kudi Yakoba. Ne kadi, batelafimi bādi ba konakanibwa kitatyi kyāonakenye Yakoba baleza ba kungi bāletele bantu ba mu njibo yandi munshi mwa mutyi mukatampe kubwipi na Shekema.—Ngo 35:1-4.
Yehova—Kīkalo Kyetu
8 Yakoba paāfikile ku Halane, muyomba wandi Lebane wāmulubwile na nsangaji ne kumupa mwenda mafuku ba Lea ne Letyela bu bandi bakaji. Ino kyaba kimo, Lebane wāingidije Yakoba bibi, ne kushinta mfutwa yandi misunsa dikumi! (Ngal. 31:41, 42) Ino, Yakoba wāuminine buno bukondame koku ukulupile amba Yehova ukendelela na kumukwatakanya—ne ye Mwaālongele! Na bubine, Leza paālombwele Yakoba ajokele ku Kenani, mukulutuba “wadi ne banyema ba ntanda ne ntanda, ne bapika bakaji ne bapika balume, ne bangamedia, ne bimbulu bine kumo.” (Ngal. 30:43) Pa kufwija’ko bininge, Yakoba wālombele amba: “Ino ami nkifwaninwepo nansha katyetyetyetye ka kanye kobe, nansha binebine byonso byo walombola mupika obe; mwanda ne mukombo wami naabukile Yodano uno’u, ino pano naalamuka ke ndi bisumpi bibidi.”—Ngal. 32:10.
20-26 KWEJI 4
BYABULĒME BYA MU KINENWA KYA LEZA | NGALWILO 32-33
“Le Ulwanga Mwanda wa Kweselwa?”
w03-F 15/8 p. 25 mus. 3
Lelo Ukimbanga Yehova na Mikeketo?
Mu Bisonekwa mudi bimfwa bivule bya bantu bālongele bukomo bwa kukimba Yehova. Umo bidi i Yakoba, mwine wālwile na mwikeulu wa Leza uvwele ngitu ya bumuntu kufika’nka ne ku lubanga. Mfulo mfulō, Yakoba wāinikwa bu Isalela (Yewa Ulwa na Leza) mwanda “wālwile,” nansha “kūminina,” “wēelele’ko bininge,” “utakamene” na Leza. Kupwa mwikeulu wāesela Yakoba pa mwanda wa kininga kyandi.—Ngalwilo 32:24-30, kunshi kwa dyani.
it-1-F p. 356
Bulema
Bulema bwa Yakoba. Yakoba pawādi na kintu kya myaka 97, wālwile bufuku bonso na mwikeulu wa Leza uvwele ngitu ya bumuntu. Wānekenye na kushipila mwikeulu kufika’nka ne byāmwesele mwikeulu. Pobādi balwa, mwikeulu wātenga pa kapole ka Yakoba, penepo kapenyemuka. Yakoba wāshilula kwenda usunkuta. (Ngo 32:24-32; Hos 12:2-4) Kino kyādi kivuluja Yakoba amba, nansha byaālwile “na Leza [mwikeulu wa Leza] ne na bantu kadi mfulo mfulō [wānekenya],” na mwānenene mwikeulu, na bubine kānekenyepo mwikeulu mukomokomo wa Leza. Leza mwine ye wāsakile Yakoba alwe na mwikeulu mwanda wa kulombola’mba Yakoba wādi usaka bine kweselwa na Leza.
it-1-F p. 1212
Isalela
1. I dijina dyobāinikile Yakoba kudi Leza paādi na kintu kya myaka 97. Yakoba wātyibulwile musanza wa kamunonga ka Yaboko bufuku paādi wenda kukasambakena mwanabo Esau, penepo wāshilula kulwa na muntu wāyukene bu mwikeulu. Yakoba byaātakamene na kulwa, bāmushintyile dijina dyandi ke Isalela, ne kino kyādi kyeya kya kweselwa na Leza. Pa mwanda wa kuvuluka bino binkumenkume, Yakoba wāinika kino kifuko bu Penyele nansha’mba Penuele. (Ngo 32:22-31; tala YAKOBA No. 1.) Mwenda mafuku paādi pa Betele, Leza wāitabija kushinta kwa dino dijina, kadi tamba penepa kufika ne ku mfulo kwa būmi bwandi, Yakoba wādi witwa bu Isalela. (Ngo 35:10, 15; 50:2; 1Bi 1:34) Misunsa 2 500 ne musubu itelelwe dijina Isalela, ifunkilanga pa lutundu lwa Yakoba bu muzo onso mutuntulu.—Div 5:1, 2.
Kukola Byabupeta bya ku Mushipiditu
Mīsambo ya Buntu Ilengejanga Kipwano Kilumbuluke
10 Binenwa bya buntu ne mīsambo miyampe biletanga ne kukomeja kipwano kya ndoe. Na bubine, kulonga byonso byotubwanya mwanda wa kulumbulula kipwano kyetu na bakwetu kubwanya kunengeja mīsambo yotwisamba na bakwetu. Kwimona na bakwetu na kwibalongela bintu na kanye pampikwa buzazangi—kumona mikenga ya kwibakwasha, kwibapa byabuntu na mutyima umo, kwibalombola kizaji—kutwalanga ku mīsambo yampikwa kafinda. Kukokeja ne ‘kubanjila mudilo wa makala’ pa muntu ne kusokola ngikadilo miyampe, mine ipēleja mwisambe bintu patōkelela.—Loma 12:20, 21.
11 Mukulutuba Yakoba wāyukile kino. Esau, Kyungu wāmukalabedile mpata, Yakoba wānyema kutyina Esau wakamwipaya. Myaka mivule pa kupita’po, Yakoba wājoka. Esau wāendele kumusambakana, aye pamo ne bantu bana-balume 400. Yakoba wālomba Yehova amukwashe. Penepo wātumina Esau byabuntu bivule bya bimunanwa. Byabuntu byāfikidija kitungo. Abo pa kwitana, mutyima wa Esau wāshinta, wāsenselela’ko kamubumbe bīpa.—Ngal. 27:41-44; 32:6, 11, 13-15; 33:4, 10.
it-1-F p. 641
Leza, Leza wa Isalela
Yakoba pa kwitana na mwikeulu wa Yehova pa Penyele, wāinikilwe bu Isalela, kadi pa kupwa kwisambakena mu ndoe na mwanabo Esau, wāshikata mu Sukote, kupwa ke mu Shekema. Wāpotele kipindi kya ntanda ku bana ba Hamola, wāshimika’po pema. (Ngo 32:24-30; 33:1-4, 17-19) Kadi “wāshimika’po kisōkelo kaekite bu Leza, Leza wa Isalela,” nansha’mba “Leza i Leza wa Isalela.” (Ngo 33:20) Yakoba pa kwityila kisōkelo pa dijina dipya dyobāmwinikile, wālombwele amba witabije kadi ufwijanga’ko pa dino dijina ne pa buludiki bwāmuludikile Leza ajokele mu Ntanda ya Mulao pampikwa kyaka. Bino bishima bitanwa musunsa umo kete mu Bisonekwa.
27 KWEJI 4–3 KWEJI 5
BYABULĒME BYA MU KINENWA KYA LEZA | NGALWILO 34-35
“Bipa Bilula Bilupuka ku Bulunda Bubi”
w97-F 1/2 p. 30 mus. 4
Shekema—Kibundi kya mu Musanza
Le bansongwalume ba mu kibundi bādi bamona namani uno nsongwakaji mujike wādi wiya kyaba ne kyaba mu kyabo kibundi—mobimwekela bunka bwandi? Mwanā mfumu wāmuselele, “wālāla nandi ne kujilula wāmujilula.” Mwanda waka Dina wētūdile mu kyaka kya kupwana na bene Kenani bādi na mwiendelejo wa busekese? Le i mwanda wādi umona’mba usakilwa kupwana na bansongwakaji ba yandi myaka? Le wādi na mutwe mūmu ne kusaka kwiendeja aye mwine pamo bwa banababo bamobamo? Potanga nsekununi idi mu Ngalwilo, longa bukomo bwa kwivwanija makambakano ātene ba Yakoba ne Lea ne bumvu bobāivwene pa mwanda wa bipa bilula byālupukile ku kipwano kibi kyādi kipwene wabo mwana na bene Shekema.—Ngalwilo 34:1-31; 49:5-7; tala ne Kiteba kya Mulami, 15 Kweji 6, 1985, paje 31, Falanse.
“Nyemai Busekese!”
14 Shekema wālongele byaādi umona bu i byendele’mo kadi biyampe kwadi. Byaākokelwe bininge na Dina, “wāmusela” ne “kujilula wāmujilula.” (Tanga Ngalwilo 34:1-4.) Buno bupolapola bwālupwile lunkukwamulongo lwa byamalwa bine byāsuswile Dina ne kyabo kisaka kine.—Ngalwilo 34:7, 25-31; Ngalatea 6:7, 8.
w09-F 1/9 p. 21 mus. 1-2
Le Ukalonga Namani shi Abakulubila?
Kyaba kimo, bantu bakimbanga kutalaja misanshi ya kilubo kyobebalubīle na kwaluja kinongo. Kimfwa, Bible witusapwila’mba bana ba Yakoba, mukulutuba Muhebelu pobāyukile amba Shekema mwine Kenani wajilula mwanabo Dina, “bāfītwa mutyima ne kuloba bikatampe.” (Ngalwilo 34:1-7) Pa kusaka kwaluja kinongo pa mwanda wa kibi kyobālongele mwanabo, bana babidi ba Yakoba bākutyila Shekema nkuku ne ba mu njibo yandi mine. Na budyumuku, ba Shimioni ne Levi bātwela mu kibundi kya bene Kenani, bāipaya bana-balume bonso, ne Shekema mwine.—Ngalwilo 34:13-27.
Le ano mashi onso obāmwangile ye āpwile myanda? Yakoba pa kuyuka byālongele bandi bana, wēbafunina, wēbanena’mba: “Mubaundetela makambakano makatampe pa kungalamuna kendi kintu kinunka bibi ku bekadi ba mu ino ntanda, . . . kadi basa kwikūkila kuntamba’dyo ne kuntukija, ami ne njibo yami.” (Ngalwilo 34:30) Pa kyaba kya kupwija myanda, kinongo kyabo kyāletele makambakano; pano kisaka kya Yakoba kyādi kya kutambwa bulwi buvule na bantu ba bukalabale bādi bebajokolokele. Bimweka’mba pa kukankaja kino kileke kulongeka, Leza wānenene Yakoba ende na kisaka kyandi ku ntanda ya Betele.—Ngalwilo 35:1, 5.
Kukola Byabupeta bya ku Mushipiditu
it-1-F p. 603 mus. 4
Debola
1. Muledi wa Lebeka. Lebeka paātambile ku njibo ya shandi Betule, wāenda ku Paleshitina kukasongwa na Izake, Debola wāendele nandi. (Ngo 24:59) Pa kupwa kwingila myaka mivule mu njibo ya Izake, Debola wāikala mu njibo ya Yakoba, mobimwekela i pa kupwa kwa Lebeka kufwa. Kintu kya myaka 125 pa kupita’po na pobāsongele Lebeka kudi Izake, Debola wāfwa, bāmujīka munshi mwa mutyi mukatampe pa Betele. Dijina dyāinikilwe uno mutyi (Aloni-Bakuti, dishintulula’mba “Shene wa Madilo”) dilombola’mba Yakoba ne kisaka kyandi bādi bamusenswe bininge.—Ngo 35:8.
Bipangujo bya Batangi
Mu Isalela wa kala, le musuku wādi wa kutwala kudi Meshiasa wādi wilonda mungya lupusa lwa bu mwana umbedi?
Ketudi kala ne besambile pa uno mwanda. Bamo bamonanga’mba uno mwanda i mukwatañane na byobya byotutanga mu Bahebelu 12:16. Uno vese unena’mba, Esau kādipo ulēmekele “bintu bikola” kadi “wāpēne lupusa lwandi lwa bu mwana umbedi [kudi Yakoba] ku nsāni umo wa bidibwa.” Pa kino bantu babwanya kulanga’mba Yakoba wāikele nkambulula wa Meshiasa kitatyi kyaāpelwe ‘lupusa lwa bu mwana umbedi.’—Mateo 1:2, 16; Luka 3:23, 34.
Inoko, bubandaudi bwa myanda ya mu Bible bulombola’mba kebyādipo bilomba muntu ekale’nka mwana umbedi pa kwikala nkambulula wa Meshiasa. Lekai tubandaule’ko bubinga bumobumo:
Ku bana ba Yakoba (Isalela), wandi mwana umbedi i Lubeni waābutwile na Lea. Mwenda mafuku, wābutula Yosefa, mwana mubajinji na Letyela, mukaji waādi usenswe bininge. Ino Lubeni paālongele kilubo pa mwanda wa mwiendelejo mubi, lupusa lwandi lwa bu mwana umbedi lwāpelwe Yosefa. (Ngalwilo 29:31-35; 30:22-25; 35:22-26; 49:22-26; 1 Bilongwa 5:1, 2) Nansha nankyo, musuku wa Meshiasa kewātambilepo kudi Lubeni nansha ke kudi Yosefa kwine. Ino wātambile kudi Yuda, mwanā Yakoba wa buná na Lea.—Ngalwilo 49:10.