Le Mbwanya Kusokola Kipwilo kya Bine Namani?
Bilondolola Bible
Bible uleta kyelekejo kitukwasha tuyuke kwishila kwishidile bantu badi mu kipwilo kya bine na boba badi mu kya bubela; unena’mba: “Mukebayukila ku bipa byabo. Kashā bantu kebāpangapo mañanza ku miba nansha kwapa bikuyu ku bapimbye, mwene i amo?” (Mateo 7:16) Monka motubwaninya kuyukila kwishila kwishidile muñanza na kimuna kya miba kupityila ku bipa byabyo, nobe ubwanya kuyuka kwishila kwishidile kipwilo kya bine na kya bubela kupityila ku bipa byabyo nansha ku ngikadila yabyo.
Kipwilo kya bine kifundijanga bubine budi mu Bible, ke tunangupo twa bantu. (Yoano 4:24; 17:17) Mu buno bubine mubadilwe bubine butala pa muya ne lukulupilo lwa kukekala na būmi bwa nyeke mu paladisa pano pa ntanda. (Ñimbo ya Mitōto 37:29; Isaya 35:5, 6; Ezekyele 18:4) Kadi kipwilo kya bine kekishisangapo kusokwela patōka bubela bwa bipwilo.—Mateo 15:9; 23:27, 28.
Kipwilo kya bine kikwashanga bantu bayuke Leza, ne kwibafundija dijina dyandi, Yehova. (Ñimbo ya Mitōto 83:18; Isaya 42:8; Yoano 17:3, 6) Kekifundijangapo amba ketubwanyapo kumwivwanija nansha kumufwena, ino kifundijanga’mba usakanga tupwane nandi.—Yakoba 4:8.
Kipwilo kya bine kinenanga’mba Leza i mulete lupandilo kupityila kudi Yesu Kidishitu. (Bilongwa 4:10, 12) Bantu badi’mo bakōkele misoñanya ya Yesu, kadi baloñanga bukomo bwa kulonda kimfwa kyandi.—Yoano 13:15; 15:14.
Kipwilo kya bine kitele mutyima ku Bulopwe bwa Leza mwanda ye lukulupilo lumo kete ku muzo wa muntu. Bantu badi’mo basapwilanga bakwabo myanda ya Bulopwe na bukankamane.—Mateo 10:7; 24:14.
Kipwilo kya bine kikankamikanga bantu besanswe bya binebine. (Yoano 13:35) Kifundijanga kulēmeka bantu ba tubila tonso ne kutambula bantu ba nkoba yonso, bibidiji byonso, ndimi yonso ne batambile ku bifuko byonso. (Bilongwa 10:34, 35) Bantu badi’mo byobadi na buswe, kelungapo mavita.—Mika 4:3; 1 Yoano 3:11, 12.
Kipwilo kya bine kekidipo na bendeji bafutwa lupeto, kadi kekipengapo bengidi bakyo bitenta bya ntumbo.—Mateo 23:8-12; 1 Petelo 5:2, 3.
Kipwilo kya bine kekikujangapo mu myanda ya politike. (Yoano 17:16; 18:36) Inoko bantu badi’mo, balēmekele ne kukōkela buludiki bobadi’mo, mungya musoñanya wa mu Bible wa amba: “Futai bintu bya Kesala kudi Kesala, ino bintu bya Leza nabyo kudi Leza.”—Mako 12:17; Bene Loma 13:1, 2.
Kipwilo kya bine kilondanga bubine, ke mulongopo wa bisela. Bantu badi’mo balondanga mu būmi bwabo bonso misoñanya idi mu Bible ya mwa kwikadila. (Bene Efisesa 5:3-5; 1 Yoano 3:18) Pa kyaba kya kwikala bya bulanda, badi na nsangaji ya kutōta “Leza wa nsangaji.”—1 Temote 1:11.
Boba badi mu kipwilo kya bine bakekala batyetye. (Mateo 7:13, 14) Bantu badi mu kipwilo kya bine bafutululwanga, kuzawilwa, ne kupangwapangwa pa mwanda wa kiswa-mutyima kya Leza kyobalonga.—Mateo 5:10-12.
Kipwilo kya bine ke ‘kipwilopo’tu nkifwaninwe bitupu’
Kudi kyaka kidi mu kutonga kipwilo kukwatañana na mowiivwaninanga shi udi’mo. Bible wālaile kitatyi kyadi kya kwivudijija bantu “bafundiji [ba bipwilo] ba abo bene ba kwibafundija bisangaja matwi abo.” (2 Temote 4:3) Inoko, Bible witukankamika twikale mu ‘butōtyi bwine butōka tō, bwampikwa disubi ku meso a Leza wetu Tata.’—Yakoba 1:27, kunshi kwa dyani; Yoano 15:18, 19.