Kipwilo Kya Bwine-kristu Kya Mu Myaka Katwa Imbajinji
Mu difuku dya Pentekosa mu mwaka wa 33 K.K., bana-babwanga ba Yesu 120 bātūkilwe na mushipiditu sandu, bāshilula kwisamba mu ndimi mishileshile myanda milumbuluke itala pa bilongwa bya Leza. Kino kyo kyādi kyalwilo kya kipwilo kya bwine-kristu. Kwābatyijibwa kubwipi kwa bana-babwanga bapya 3 000 mu dine difuku’dya.—Bilongwa, shapita 2.
Bipwilo byādi byenda bīlundila’ko mu bifuko bishileshile, mwanda batumibwa ne bakwabo bādi bendelela na kusapula Kinenwa kya Leza pakubulwa moyo. Busapudi bwāsambakene bukidi-bukidi bonka mu Moyen-Orient monso, kutamba ku Babiloni ne Kungala kwa Afrika kufika ne ku Loma, padi ne mu Espanye, ye mwikilombwela mukanda wa Bilongwa.—Loma 15:18-29; Kolose 1:23; 1 Petelo 5:13.
Bātūdile bipwilo konso kwādi bana-babwanga. Bana-balume babwanye bisakibwa batame kumushipiditu, bātongelwe bu bakulumpe, nansha bu batadi ba kwimanina bufundiji bwikale nyeke boloke ne mwiendelejo mulumbuluke mu bipwilo. Inoko kebābundilepo kabumbo ka bakata batyinwa baludika bipwilo, mhm; bādi bengidi nansha bantu bakwingidila nabo pamo mwingilo wa Bulopwe bwa Leza.—Bilongwa 14:23; 20:28; 1 Kodinda 3:5; 5:13; Kolose 4:11; 1 Temote 3:1-15; Bahebelu 13:17; 1 Petelo 5:1-4.
Batumibwa ne balunda nabo bakwabo mu mingilo, bādi bengidila umbumo abo bonso bu kitango kyendeji. Bādi bapityile kumeso mu mwingilo wa busapudi. Bādi batyiba myanda mu kipwilo kya mu Yelusalema. Bādi batuma batutu babwanye bisakibwa senene ku Samadia ne ku Antyioka mwanda wa kukankamika bapya mu lwitabijo. Bāpwijije lupata lutala pa disao, ne kutuma konso konso mbila yobātyibile mwanda wa bipwilo byonso biilonde. Ino bano bana-balume kebādipo bamfumu peūlu pa bakwabo, bādi bakwashi ne balunda bengidi ba kipwilo kyonsololo.—Bilongwa 4:33; 6:1-7; 8:14-25; 11:22-24; 15:1-32; 16:4, 5; 1 Kodinda 3:5-9; 4:1, 2; 2 Kodinda 1:24.
Bana-babwanga babajinji bādi bayukene bu bakristu, bāinikilwe dino dijina ku kiswamutyima kya Leza. Kadi bādi na mfundijo yādi ibashalañanya na bantu bakwabo; yādi itelwa bu bufundiji bwa batumibwa, nansha bu kimfwa kya myanda ya lupandilo. Buno bufundiji bwa pa Bisonekwa bwādi kadi buyukene bu bubinebine.
—Yoano 17:17; Bilongwa 2:42; 11:26; Loma 6:17; 1 Temote 4:6; 6:1, 3; 2 Temote 1:13; 2 Petelo 2:2; 2 Yoano 1, 4, 9.
Bādi babundile kisaka kya bu bana na bana kujokoloka ntanda yonso, bekutyile umbumo na buswe. Bādi batele mityima bininge ku balunda nabo mu lwitabijo ba mu matanda makwabo. Kitatyi kyobādi benda mu matanda a bweni, balunda nabo mu lwitabijo bādi bebatundaila mu mobo abo. Bādi na mwiendelejo mulumbuluke kutabuka, bādi bantu bajila, besansanye na ba pano pantanda. Bādi balamine pototo mu ñeni yabo kitatyi kya difuku dya kwikala’po kwa Yehova ne kulombola na bupyasakane lwitabijo lwabo ku bantu bonso.
—Yoano 13:34, 35; 15:17-19; Bilongwa 5:42; 11:28, 29; Loma 10:9, 10, 13-15; Tetusa 2:11-14; Bahebelu 10:23; 13:15; 1 Petelo 1:14-16; 2:9-12; 5:9; 2 Petelo 3:11-14; 3 Yoano 5-8.
Inoko, bupondo bukatampe bwāshilwile kutandabuka bityebitye mu myaka ya tutwa tubidi ne ya tutwa tusatu, pamo’nka na mokyātobelwe. Buno bupondo bwābutwile bibumbo bikatampe bya bipwilo byākankelwe kulama bu-ujila bwādi na kipwilo kya bwine-kristu kibajinji mu myanda itala mfundijo, mwiendelejo, bulongolodi ne mwimanino wabo mu bya ntanda.—Mateo
13:24-30, 37-43; 2 Tesalonika, shapita 2.
Ino, Yesu wātobele butobo amba mutōtelo wabine ukajokejibwa mu kitatyi kya kuvuika kwa ngikadilo ya bintu. Ba Tumoni twa Yehova bakulupile’mba kuno kujokejibwa dipya kwa mutōtelo kumwekanga patōka mu kino kyetu kitatyi kupityila ku mingilo yabo yobengila kujokoloka ntanda yonso, kubwipi kwa myaka 1 900 tamba kitatyi kyānene Yesu buno bupolofeto. Manyi alonda’ko ano akashintulula kyotunenena namino i kika.
• Kipwilo kya bwine-kristu kyāshimikilwe namani, ne i muswelo’ka okyātandabukile?
• I muswelo’ka wādi wendejibwa kipwilo?
• I bintu’ka byādi biyukilwa’po bakristu ba mu myaka katwa imbajinji?
[Kapango pa paje 7]
Bakristu babajinji bādi basapula Kinenwa kya Leza pakubulwa moyo
Bakristu bādi batundailwa na balunda nabo mu lwitabijo ku mobo konso kobādi benda
[Kapango pa paje 7]
Matanda āfikile’mo myanda miyampe mu myaka katwa imbajinji
[Kapango pa paje 7]
Bekadi ba mu ano matanda bavule bāitabije