Kifundwa 10
Bilongwa Bishikilwe Leza
Lelo i muswelo’ka ofwaninwe kumona bintu binena Leza amba i bibi? (1)
I miswelo’ka ya kusambakena pamo ibipile? (2)
Lelo mwine Kidishitu ufwaninwe kumona namani bubela? (3) makayo a kwidya lupeto? (3) bwivi? (3) bukalabale? (4) majende? (5) bunkolwankolwa? (6)
I muswelo’ka ukokeja muntu kwinyongolola mu bilongwa bibi? (7)
1. Bengidi ba Leza baswele biyampe. Ino bafwaninwe ne kushikwa bibi. (Mitōto 97:10) Kino kishintulula kwepuka bilongwa byonso bishikilwe Leza. Lelo i bilongwa’ka bimobimo bishikilwe Leza?
2. Busekese: Kusambakena pamo kumeso kwa busongi, makoji, kusambakena pamo na banyema, busula-malwa, ne busekese bwa bantu ba ngitu imo i bubi bukatampe ku meso a Leza. (Levi 18:6; Loma 1:26, 27; 1 Kodinda 6:9, 10) Shi bantu babidi kebesongelepo, bashikete’tu bya ntekele nkuvwike, bafwaninwe kusansana nansha kwisonga senene mungya bijila.—Bahebelu 13:4.
3. Kubepa, Kukaya Makayo a Kwidya Lupeto, Kwiba: Yehova Leza kabepangapo. (Tetusa 1:2) Bantu basaka kwitabijibwa na Leza kebafwaninwepo kubepa. (Nkindi 6:16-19; Kolose 3:9, 10) Miswelo yonso ya makayo a kwidya lupeto ifile lwiso. O mwanda bene Kidishitu kebafwaninwepo kukaya makayo nansha amo a kwidya lupeto, kifwa maloteri, makayo a lubilo lwa bampunda, ne tombola. (Efisesa 5:3-5) Kadi bene Kidishitu kebebangapo. Kebapotangapo bintu byobayukile amba i bibe, nansha kusela bintu bya bene pakubulwa lupusa.—Divilu 20:15; Efisesa 4:28.
4. Mutyima wa Bulobo, Bukalabale: Bulobo bwakubulwa kwitūkija bukokeja kufikija muntu ku bilongwa bya bukalabale. (Ngalwilo 4:5-8) Muntu wa bukalabale kakokejapo kwikala mulunda na Leza. (Mitōto 11:5; Nkindi 22:24, 25) Ke biyampepo kulubwila bakwabo kinongo nansha kujokeja kibi ku kibi.—Nkindi 24:29; Loma 12:17-21.
5. Maleñanya ne Majende: Bantu bamo babijanga mishipiditu imbi mwanda wa kukimba kundapa misongo. Bakwabo bafinga ba lwana nabo mafingo a kwibabeleka nansha kwibepaya. Ulengeja byonso bino i Satana. O mwanda bene Kidishitu kebafwaninwepo kulonga’byo nansha patyetye. (Kupituluka 18:9-13) Kulamata pototo kudi Yehova i ngabo mikatampe ikokeja kwitukinga ku mafingo akokeja kwitufinga bantu.—Nkindi 18:10.
6. Bunkolwankolwa: Kutoma pa ntomeno vinyu, byele nansha malwa makwabo ke kubipo. (Mitōto 104:15; 1 Temote 5:23) Ino mutomeno mpata ne bunkolwankolwa byo bibi ku meso a Leza. (1 Kodinda 5:11-13; 1 Temote 3:8) Kutoma malwa mavule kukokeja kona ngitu ne kukalañanya kyobe kisaka. Kukokeja kadi ne kukufikija ku kuponena bukidibukidi mu byongo bikwabo.—Nkindi 23:20, 21, 29-35.
7. Bantu balonga bintu binena Leza amba i bibi “kebakapyanapo bulopwe bwa Leza.” (Ngalatea 5:19-21) Shi binebine uswele Leza ne usaka kumusangaja, ukokeja kwinyongolola mu bilongwa bya uno muswelo. (1 Yoano 5:3) Shikwa byobya binena Leza amba i bibi. (Loma 12:9) Pwana na bantu badi na bibidiji bya bwine Leza. (Nkindi 13:20) Bapwani bene Kidishitu bapye bakokeja kwikala nsulo ya bukwashi. (Yakoba 5:14) Nakampata, kulupila bukwashi bwa Leza bokalomba mu milombelo.—Fidipai 4:6, 7, 13.
[Bifwatulo pa paje 20, 21]
Leza ushikilwe bunkolwankolwa, kwiba, makayo a kwidya lupeto, ne bukalabale