Ikala ‘Mulēmenenwe Mpata’ na Mwingilo Obe
1 Potutanga amba mutumibwa Polo wādi mu Kodinda wingila kaji ka kupunga mapema, tubwanya padi kulanga amba kadipo ukimona mikenga mivule ya mwa kusapwila. Ino Bilongwa 18:5 witulombola’mba: “[Polo] walemenenwe [mpata] ne mwanda, kasapwila ba Yudea’mba: Yesu i Kidishitu.” Mwanda waka Polo wādi mulēmenenwe mpata na mwingilo wa busapudi? Mwanda Mfumwetu wāyukije amba kwādi kukidi bantu bavule ba kwikala bana-babwanga mu Kodinda, nansha bavule mu kino kibundi byobādi kala ke betabije. (Bil. 18:8-11) Lelo netu kudi buluji bwa uno muswelo bwa kwikadila balēmenenwe mpata na mwingilo wetu? Eyo budi’ko. Tubwanya kutana bantu bavule ba kufundija bubinebine.
2 Pityija Kitatyi Kivule mu Mwingilo mu Kweji 4: Mobimwekela udi na kitungo kya kulēmenenwa na mwingilo wa kusapula myanda miyampe kweji ne kweji. Ino kudi myeji imo itulomba ‘kulēmenenwa mpata’ na mingilo kutabuka myeji mikwabo. Mu ino myeji mudi ne uno Kweji wa Buná, kyo kitatyi kine kya Kivulukilo. Lelo ngikadilo yodi’mo ikupa mukenga wa kwingila bu pania mukwashi nansha kulongela’ko bukomo bwa kutambila divule mu mwingilo mu kino kitatyi? Basapudi bavule baloñanga uno muswelo beselwanga madyese mavule mpata. (2 Kod. 9:6) Shi uloñanga bukomo bobe bonso, yuka’mba Yehova usangedile mwingilo oingila na muya obe onso. (Luka 21:2-4) Bine, nansha wikale mu ngikadilo ya muswelo’ka, witūdile’ko kitungo kya kwikala ‘mulēmenenwe mpata’ na mingilo mu bula bwa Kweji wa Buná. Kadi kokelwa kutūla lapolo obe wa mingilo ku mfulo kwa kweji mwanda wa bukomo bolongele bukabadilwe pamo na bwa bantu bonso ba Yehova.
3 Pempula Bapya Baile Kutanwa ku Kivulukilo: Ku mwaka wapityile’u, mu mwaba utalwa na wetu musambo mwatenwe bantu 604 160 ku Kivulukilo. Buvule bwa uno mwaka kebwayukene. Ino malapolo alombola amba kukidi “byakwangula” bivule mpata. (Mat. 9:37, 38) Shi ke pano, alwila’ko kwiteakanya mwa kukapempwila bonso basangela musapu baile kutanwa ku Kivulukilo umone kwibakwasha ku mushipiditu. Kutundululatundulula kyaba kya kukebapempula i kupa ‘yewa mubi mukenga wa kutekuna kinenwa kya bulopwe kyakuninwe mu mityima yabo.’ (Mat. 13:19) Kwibapempula ponka na ponka kukalombola amba binebine wi ‘mulēmenenwe mpata’ na mwingilo obe.
4 Endelela na Kukwasha Boba Kebakisapulanga: Tamba mu Kweji wa Bubidi twashilwile kulonga buninge bwa pa bula bwa kukwasha boba kebakisapulanga. Shi kudi bamo kebaikele kupempulwa na bakulumpe, nankyo bakulumpe bafwaninwe kuteakanya’ko bupempudi kumeso kwa Kweji wa Buná kufula’ye. Bakulumpe bafwaninwe kulonga buninge bwa kujingulula mwanda mwine ukambakanya umo ne umo, ne muswelo mulumbuluke wa kumukwasha anze kwingidila Yehova na bukankamane. Buno bukwashi bwa buswe bulombola amba bakulumpe baselele na kusumininwa kiselwa kyabo kya bu bakumbi ba “luombe lwa Leza.” (1 Pet. 5:2; Bil. 20:28) Kiteba kya Mulami kya mu Falanse kya mafuku 15 Kweji 9, 1993, paje 22-23, kileta madingi malumbuluke abwanya kwingidijibwa na bakulumpe shi kebesambila pa mwanda o-onso wa mu myanda itano itelelwe ibwanya kukambakanya banabetu kebakisapulanga. Motumwena bamo bakokeja kukabijibwa dipya banzulule kwingila mu Kweji wa Buná.
5 Kwasha Bavule Bekale Basapudi Bakubulwa Kubatyijibwa: Lelo bobe bana ke babwanye bisakibwa bya kwikala basapudi ba myanda miyampe bakubulwa kubatyijibwa? Le bidi namani ku bakwabo bowifunda nabo Bible? Shi bano bantu i betabijibwe na bakulumpe, mwene Kweji wa Buná ubwanya kwikala bu kitatyi kiyampe kya abo kushilula kusapula? Shi kudi mwifundi wendelela kumeso kadi ke mwifunde mukanda Kisaka Leza ne dibuku Buyuki, nankyo ubwanya kwendeleja nandi kifundwa kya Bible mu dibuku dikwabo—kifwa mu dibuku La Bible: Parole de Dieu, Ndoe ne mutyima-ntenke, nansha mu dibuku Unis dans le culte. Kitungo kyobe i kukwasha mwifundi ekale na bujinguludi buvule mu bubinebine, abwanye bisakibwa bya kwikala musapudi wakubulwa kubatyijibwa, ne kwikala Kamoni wa Yehova mwipāne kadi mubatyijibwe.—Ef. 3:17-19; 1 Tem. 1:12; 1 Pet. 3:21.
6 Kuta kokata nyeke befundi ba Bible mutyima byabinebine kubwanya kwibakwasha nabo belamije bubinebine ke bwabo. Tutu umo Kamoni wetene na ba mulume ne mukaji banunu baitabije na mutyima umo kifundwa kya Bible. Ino bano ba mulume ne mukaji balongele mayenga asatu matuntulu batundululatundulula kifundwa. Mwenda mafuku kifundwa kyashilula. Kupwa kadi bano ba mulume ne mukaji bapityija mayenga kapwila kwakubulwa kwifunda. Ino ku mfulo, mukaji waendelela kufika ne ku kubatyijibwa. Uno tutu uvuluka mobyapityile, amba: “Pa kupwa kubatyijibwa’ye, meso a uno lolo ayudile impolo ya nsangaji, penepo wami mukaji ne ami netu twashilula kusumija impolo ya nsangaji.” Bine, ‘kulēmenenwa mpata’ na kusapula myanda miyampe kuletanga nsangaji mikatampe!
7 Bupolofeto bwa mu Bible ne biyukeno bimweka ntanda yonso bilombola amba ketudi batakamane bininge mu kitatyi kya ku mfulo. Kino kyo kitatyi kifwaninwe bantu ba Leza bonso ‘kulēmenenwa mpata’ na mwingilo wa kuyukanya myanda miyampe ku bakwabo. Mutumibwa Polo i mwitukulupije amba kuputumina kwa mu mingilo yetu “kekudipo kwa bitubitupu mudi Mfumwetu, ehe.”—1 Kod. 15:58.