Mpangiko ya Kubungakana kwa Kipindi

Ino ntanda ikimba tukulupile amba ino ngikadilo ya bintu ikekala’ko nyeke ne nyeke. Inoko Kinenwa kya Leza kitulombola amba ke amopo. (1 Yoa. 2:15-17) Akyo kitukwasha twivwanije amba ‘kwibikila lupeto pano pa ntanda’ i kupanga luvula. Pa kusaka kukomeja bantu ba Leza, mpangiko ya kubungakana kwa kipindi kwa mu mwaka wa mingilo wa 2007 ikemanina pa uno mutwe wa mwanda unena’mba: ‘Mwibikilei Lupeto Lulēme Momwa Mūlu.’​—Mat. 6:19, 20.

Kulanga enka bintu bya ku ngitu kubadilwa mu byobya bitelelwe mu Efisesa 2:2 bu ‘lupusa lwa luvula, mushipiditu wa kulonga mudi bana bampikwa kikōkeji.’ Monka mwikadilanga luvula konso, lutengele’nka ba kwilukoka pa kwesa, ne “mushipiditu wa panopantanda” nao mo monka, usambakene mu ino ngikadilo yonso ya bintu. (1 Kod. 2:12) Uno mushipiditu byoudi na bukomo bukata, o mwanda banena’mba udi na “lupusa.” Mpangiko ya kubungakana kwa kipindi iketukwasha twepuke mulangilo wa ino ntanda wa kukimba bintu bya ku ngitu, ino tubambile meso sō enka ku byobya bya kutangidija kumeso. (Mat. 6:33) Ne kadi, ino mpangiko iketukwasha tukulupile mudi Yehova potwingila mwingilo wetu nansha byotutanwa na mitabakano ne matompo.

Longa buninge bwa kukatanwa’ko mafuku onso abidi ne ‘kuta’ko mutyima’ kutabuka. (Bah. 2:1) Lemba’ko mu kīpi myanda yobwanya kwingidija mu būmi bobe ne mu mwingilo obe. Shi ukatanwe tamba ku ngalwilo kufika ne ku mfulo ku ino mpangiko milumbuluke ya ku mushipiditu, nabya ukakankamikwa ne kukomejibwa wendelele ‘kwibikila lupeto lulēme momwa mūlu’!