Mpangiko ya Kubungakana kwa Kipindi

Yehova ufwaninwe kutumbijibwa. Ino le tumutumbijanga namani? I bika bikolejanga bamobamo kumutumbija? Lelo i byabuyabuya’ka bidi mu kutumbija Leza tamba’nka pano? Mpangiko ya kubungakana kwa kipindi kwa mwaka wa mingilo wa 2008 ikalondolola bino bipangujo. Mutwe wayo wa mwanda unena’mba: “Byonsololo, Longelai’byo Monka mu Ntumbo ya Leza.” (1 Kod. 10:31) Ivwana bidi myanda imo ikekala’ko mu mafuku abidi a bufundiji butyite bwa ku mushipiditu.

Mutadi wa distrike ukesambila pa ino mitwe ya myanda, “Mwanda Waka Tutumbije Leza?” ne amba “Ikalai Byelekejo mu Kuvuija Byobya Bisaka Leza.” Ukanena dishikulu dya bantu bonso dinena’mba, “Lelo I Bāni Batumbija Leza Ntumbo?,” ne dishikulu dya mfulo dinena’mba, “Tutumbijei Leza Umbumo Ntanda Yonso.” Ne kadi ukendeja Masomo a Mwingilo wa Kiteokratike. Mutadi wa kipindi nandi ukanena ino mitwe ya myanda, “Sangelai Kumwekeja Ntumbo ya Leza,” “Tutei Mutyima ku Bisakibwa bya Kipindi,” ne “Ikalai Nyeke ‘Bemanije mu Bubinebine,’” mutwe ukemanina pa 2 Petelo 1:12, MB. Pakwabo kadi tukayuka ino myanda, “Mwingilo wa Bupania Utumbijanga Leza.” “Tutumbijei Leza mu Miswelo Yonso ya mu Būmi Bwetu,” dyo dikekala dishikulu dibajinji dya mapingu diloba tudi mu kanwa, dikabandaula na mushike buluji bwa binenwa bya ku bukomo bwa mushipiditu bidi mu 1 Kodinda 10:31. Dishikulu dya bubidi dya mapingu dinena’mba “Kwingila Mwingilo Ukola ku Ntumbo ya Yehova” dikemanina pa myanda palapala itala butōtyi bwetu. Tukasangela kadi kifundwa kya Kiteba kya Mulami mu kīpi ne mīsambo ya kisonekwa kya difuku mu Dya Yenga. Kukekala ne mukenga wa bantu kubatyijibwa.

Bavule dyalelo bapelanga kwitabija amba Leza udi’ko. Bangi bene i balabikwe na nkuku ya bantu batunya ne kulangulukila pa bukatampe bwa ntumbo ya Yehova. (Yoa. 5:44) Ino batwe tukulupile amba i kya mvubu kwitūdila’ko kitatyi kya kubandaula uno mwanda unena’mba, “Byonsololo, Longelai’byo Monka mu Ntumbo ya Leza.” Kwata mpangiko ya kutanwa’ko ne kumwena mu bipimpo byonso biná.