Mpangiko ya Kubungakana kwa Kipindi

Lelo i muswelo’ka otukokeja kushinda boba balwa na mutōtelo wa bine na bulobo? Le tukakomena namani lupusa lwa boba bakimba kwitujokeja mu ntanda yampikwa bwine-Leza? Mpangiko ya kubungakana kwa kipindi kwa mu mwaka wa mingilo wa 2009 ikalondolola bino bipangujo bya kamweno. Mutwe wa mwanda mwine unena’mba “Shindai Bubi ku Bilumbuluke.” (Loma 12:21) Ivwana bintu bimobimo byotukevwana’ko.

Mutadi wa distrike ukanena dishikulu dinena’mba “Bakomejibwe Mwa Kushindila Bubi na Bilumbuluke,” “Dyumuka Kwikulupila Bipitepite Keko!,” “Panopano Ponka Bubi Busa Kufula!,” ne “Tukomejei Lwitabijo Lwetu Tushinde Ntanda.” Mutadi wa kipindi nandi uketulombola ino mitwe ya myanda: “Pano Kyo Kitatyi kya Kulanguka!,” wimanine pa Loma 13:11-13, ne “Kokapungila mu Difuku dya Tusua,” wimanine pa Nkindi 24:10. Mwanda mukwabo ukesambilwa’ko i unena’mba “Lelo Ubulwe’po ‘Kwiela ku Uno Mwingilo’​—Na Kwingila bu Pania?” Dishikulu dibajinji dya mapingu dinena amba: “Imanijai mu bya Kyongo bya Dyabola.” Diketukwasha tujingulule ne kusumbula byongo bya Dyabola bidi mu bya busendwe, mu bya kwipwija mukose, ne mu myanda itala masomo. Dishikulu dya bubidi ne dya mfulo dinena amba “Kukankamana Mwa Kukomenena Satana mu Ano Mafuku Mabi” diketulombola mwa kulondela madingi a ku bukomo bwa mushipiditu atanwa mu Efisesa 6:10-18.

Nanshi kushinda bibi pobikishilula kukwatañene na musapu wa kusapula Bulopwe. (Kus. 12:17) Bine, Satana utambanga Batumoni ba Yehova bulwi bwa zenzeka! (Is. 43:10, 12) Inoko Satana ukakankalwa bya bumvu mwanda twi basumininwe ‘kushinda bubi ku bilumbuluke.’ Kwata mpangiko ya kukamwena ne pa mfulo mu bipimpo byonso biná bya kuno kubungakana kwa kipindi.