EKESODE

1 Nunku aa mmêna a bana ba Isalele bavua balue mu Ejipitu ne Yakoba, muntu yonso uvua mulue ne ba mu nzubu wende:+ 2 Lubena, Simeona, Lewi, ne Yuda;+ 3 Yisakâ, Zebulona, ne Benyamina; 4 Dana ne Nafatale; Gada ne Ashê.+ 5 Bantu* bonso bavuabu balelele Yakoba* bavua bantu* 70, kadi Jozefe yeye ukavua mu Ejipitu.+ 6 Ndekelu wa bionso, Jozefe wakafua,+ yeye ne bana babu bonso ne bantu bonso ba mu tshipungu atshi kabidi. 7 Bena Isalele* bakalelangana bikole, kuluabu ba bungi, ne bakatungunuka ne kuvulangana ne kulua ne bukole bua bungi mu mushindu wa dikema; kuwulabu+ mu buloba tente.

8 Pakapita matuku, mukalenge mukuabu uvua kayi mumanye Jozefe wakajuka mu Ejipitu. 9 Nunku wakambila bantu bende ne: “Tangilayi! Bena Isalele mbatupite bungi ne badi ne bukole kutupita.+ 10 Tubadimukilayi, tshianana nebatungunuke ne kuvulangana, ne mvita yoyi mibuele, nebadisangishe kudi bena lukuna betu, nebatuluishe ne pashishe nebumbuke mu ditunga.”

11 Nunku bakabatekela bamfumu bua kubenzeja midimu mikole ku bukole* ne bua kubakengesha ne midimu mikole;+ bakibakila Palô bimenga bia kulamina bintu, mmumue ne: Pitoma ne Lamesese.+ 12 Kadi pavuabu babakengesha bikole ke pavuabu bavulangana bikole ne batangalaka bikole, nunku bakumvua buôwa bua bungi bua bualu bua bena Isalele.+ 13 Bua bualu abu, bena Ejipitu bakabueja bena Isalele mu bupika+ bubi ku bukole. 14 Bakavuija nsombelu wabu mukole pa kubenzeja midimu mikole, benza mudimu ne potopoto ne madioto, ne benza midimu ya bupika ya mishindu yonso mu madimi. Eyowa, bakabenzeja midimu mikole ya bupika ya mishindu yonso+ mu mushindu mubi.

15 Pashishe mukalenge wa Ejipitu wakakula ne baleleshi bena Ebelu; mêna abu avua Shifela ne Pua, 16 yeye kubambila ne: “Panudi nuambuluisha bakaji bena Ebelu bua kulela,+ panudi nubamona pa tshibasa tshia kulelela, nudi ne bua kushipa muana bikalaye wa balume; kadi bikalaye wa bakaji, udi ne bua kushala ne muoyo.” 17 Kadi baleleshi bakatshina Nzambi mulelela, kabakenza tshivua mukalenge wa Ejipitu mubambile bua kuenza to. Bavua balama bana ba balume ne muoyo.+ 18 Pakapita matuku, mukalenge wa Ejipitu wakabikila baleleshi abu, kubambilaye ne: “Bua tshinyi nudi bashiye bana ba balume ne muoyo?” 19 Baleleshi bakambila Palô ne: “Bakaji bena Ebelu kabena bu bakaji bena Ejipitu to. Badi ne makanda ne badi balela kumpala kua muleleshi kufikaye kudibu.”

20 Nunku Nzambi wakenzela baleleshi abu malu mimpe, ne bantu bakatungunuka ne kuvulangana ne kulua ne bukole bua bungi. 21 Bu muvua baleleshi abu b atshine Nzambi mulelela, yeye wakalua kubapesha mêku. 22 Ndekelu wa bionso, Palô wakatumina bantu bende bonso dîyi ne: “Nudi ne bua kuela muana wa balume yonso wa bena Ebelu udibu balela mu Musulu wa Nile, kadi nudi ne bua kulama muana wa bakaji yonso ne muoyo.”+

2 Mu tshikondo atshi, muntu mukuabu wa mu nzubu wa Lewi wakasela muana wa bakaji wa Lewi.+ 2 Mukaji au wakimita difu, kulelaye muana wa balume. Pakamonaye ne: muana au uvua muimpe kumona, wakamusokoka munda mua ngondo isatu.+ 3 Pakamonaye ne: katshivua kabidi ne mushindu wa kumusokoka,+ wakangata tshisaka* tshiluka ne nyandu,* kutshilabaye kabudimbu ne budimbu, yeye kutekamu muana, kutshitekaye mu malenge avua ku muelelu kua Musulu wa Nile. 4 Kadi muanabu wa bakaji+ wakimana pa bule bua kumona tshivua mua kumufikila.

5 Pavua muana wa bakaji wa Palô mupueke bua kuowa mâyi mu musulu wa Nile, bena mudimu bende ba bakaji bavua benda bendela kumpenga kua musulu wa Nile. Wakamona tshisaka mu malenge. Yeye kutuma diakamue mupika wende mukaji bua kutshiambula.+ 6 Pavuaye mutshikangule, wakamona muana wa balume, ne muana au uvua udila. Wakamumvuila luse, kadi kuambaye ne: “Eu ngumue wa ku bana ba bena Ebelu.” 7 Ke muanabu wa bakaji kuambila muana wa bakaji wa Palô ne: “Udi musue nye kubikila umue wa ku bamamu bena Ebelu bua alue kukuamushila muana eu anyi?” 8 Muana wa bakaji wa Palô wakamuambila ne: “Ndaku!” Diakamue muana wa bakaji wakaya, yeye kubikila mamuende wa muana.+ 9 Pashishe muana wa bakaji wa Palô wakamuambila ne: “Angata muana eu, umungamushile, nenkufute.” Nunku mamu au wakangata muana, kutuadijaye kumuamusha. 10 Pakakola muana, wakamufila kudi muana wa bakaji wa Palô, kuluaye muanende.+ Wakamuinyika ne: Mose,* kuambaye ne: “Mbualu ndi mumupatule mu mâyi.”+

11 Mu matuku au, Mose mumane kulua muntu mukole,* wakapatuka, kuyaye kudi bana babu bua kumona majitu avuabu bambula;+ yeye kumona muena Ejipitu kampanda ukuma muanabu mukuabu muena Ebelu. 12 Nunku wakatangila eku ne eku, ne bu muvuaye kayi mumone muntu, wakashipa muena Ejipitu au, kumusokokaye mu lusenga.+

13 Kadi dituku diakalonda wakapatuka kabidi, yeye kumona bena Ebelu babidi baluangana. Ke yeye kuambila uvua mu tshilema ne: “Udi ukuma mukuebe+ bua tshinyi?” 14 Ke yeye kuamba ne: “Udi mukuteke mukokeshi ne mulumbuluishi wetu nnganyi? Udi ukeba kunshipa muuvua mushipe muena Ejipitu+ anyi?” Nunku Mose wakumvua buôwa, kuambaye ne: “Bushuwa, bualu bukadi bumanyike!”

15 Pashishe Palô wakumvua bualu abu, kukebaye bua kushipa Mose; kadi Mose wakanyema Palô, kuyaye bua kusombela mu buloba bua Midiyana.+ Pakafikaye kuntu aku, wakasomba kumpenga kua tshina tshia mâyi. 16 Muakuidi wa mu Midiyana+ uvua ne bana ba bakaji muanda mutekete, ne bana abu bakalua bua kusuna mâyi, ne kuwuja binuinu bia mâyi bua kunuisha mikoko ya tatuabu. 17 Kadi bu pa tshibidilu, balami ba mikoko bakalua, bakabipata. Ke Mose kujuka, kuambuluisha* bansongakaji abu, kunuishaye mikoko yabu mâyi. 18 Pakafikabu kumbelu kua tatuabu Luele,*+ wakakema ne: “Mmunyi munudi bapingane lelu ku nzubu pa lukasa?” 19 Bakandamuna ne: “Muena Ejipitu+ mukuabu uvua mutusungile kudi balami ba mikoko, kutusunyinaye too ne mâyi ne kunuishaye mikoko.” 20 Yeye kuambila bana bende ba bakaji ne: “Kadi muntu au udi penyi? Bua tshinyi nudi bamushiye kuntu aku? Mubikilayi bua tulue kudia nende.” 21 Pashishe Mose wakitaba bua kusomba ne muntu au, yeye kuselesha muanende wa bakaji Sipola+ kudi Mose. 22 Pakapita matuku Sipola wakalela muana wa balume, Mose kumuinyika ne: Gêshoma,*+ bualu wakamba ne: “Ndi mulue kusomba buenyi mu buloba+ bua bende.”

23 Pakapita tshikondo tshile,* mukalenge wa Ejipitu wakafua,+ kadi bena Isalele bakatungunuka ne kutua mikemu bua bupika ne badila bua kanyinganyinga, ne muadi wabu bua kulomba diambuluisha bua bupika abu uvua anu ubanda kudi Nzambi mulelela.+ 24 Nzambi wakalua kumvua mikemu yabu,+ Nzambi kuvulukaye tshipungidi tshivuaye mudie ne Abalahama ne Izaka ne Yakoba.+ 25 Nunku Nzambi wakatangila kudi bena Isalele, kumonaye dikenga diabu.

3 Mose wakalua mulami wa mikoko ya tatuende muenu Yetelo,+ muakuidi wa mu Midiyana. Pavuaye wenda uya ne mikoko lua ku ouest kua tshipela, wakafika ndekelu wa bionso ku mukuna wa Nzambi mulelela, ku mukuna wa Holeba.+ 2 Nunku muanjelu wa Yehowa wakamumuenekela mu ndimi ya kapia mu kamutshi ka mêba.+ Pavuaye utangila, wakamona ne: kamutshi ka mêba kavua kalakuka kapia, kadi kamutshi ka mêba aku kakavua kuoshika to. 3 Ke Mose kuamba ne: “Ndi nya kuntu kuaka bua kumona bualu bua dikema ebu, bua kumona bua tshinyi kamutshi ka mêba kakena kuoshika.” 4 Pakamona Yehowa ne: uvua uyaku bua kumona, Nzambi wakamubikila kumbukila mu kamutshi ka mêba wamba ne: “Mose! Mose!” Yeye kuandamuna ne: “Mmeme eu.” 5 Ke yeye kuamba ne: “Kusemenyi kabidi pabuipi to. Kopola sandala ku makasa ebe, bualu muaba uudi muimane mbuloba bua tshijila.”

6 Yeye kuamba kabidi ne: “Ndi Nzambi wa tatu webe, Nzambi wa Abalahama,+ Nzambi wa Izaka,+ ne Nzambi wa Yakoba.”+ Mose wakasokoka mpala wende bualu uvua utshina bua kutangila Nzambi mulelela. 7 Yehowa wakamba kabidi ne: “Bulelela, ndi mumone dikenga dia bantu banyi badi mu Ejipitu, ne ndi mumvue muadi udibu badila bua bantu badi babenzeja mudimu ku bukole; ndi mumanye bimpe makenga+ adibu nawu. 8 Nempueke bua kubasungila mu tshianza tshia bena Ejipitu+ ne bua kubapatula mu buloba abu, kuya nabu mu buloba buimpe ne bualabale, buloba budi ne mabele ne buitshi+ bia bungi, mu buloba bua bena Kanâna, bena Hiti, bena Amole, bena Pelizi, bena Hiwi, ne bena Yebuse.+ 9 Mpindieu, tangila! Muadi wa bena Isalele mmufike kundi, ne ndi mumone kabidi mushindu mubi udi bena Ejipitu babakengesha.+ 10 Mpindieu luaku, nenkutume kudi Palô, ne neupatule bantu banyi bena Isalele mu Ejipitu.”+

11 Kadi Mose wakambila Nzambi mulelela ne: “Meme ndi nganyi bua kuya kudi Palô ne kupatula bena Isalele mu Ejipitu?” 12 Ke yeye kumuambila ne: “Nengikale nebe,+ ne etshi ntshimanyinu kuudi tshia ne: meme ke uvua mukutume: Wewe mumane kupatula bantu banyi mu Ejipitu, nuenu nenutendelele* Nzambi mulelela ku mukuna eu.”+

13 Kadi Mose wakambila Nzambi mulelela ne: “Fuanyikija ne: ndi nya kudi bena Isalele ne mbambila ne: ‘Nzambi wa bankambua benu mmuntume kunudi,’ bobu bangebeje ne: ‘Dîna diende+ nnganyi?’ Nembambile tshinyi?” 14 Ke Nzambi kuambila Mose ne: “Nendue tshindi nsungula* bua kulua.”*+ Kuambaye kabidi ne: “Newambile bena Isalele ne: ‘Nendue mmuntume kunudi.’”+ 15 Pashishe Nzambi wakambila kabidi Mose ne:

“Newambile bena Isalele ne: ‘Yehowa Nzambi wa bankambua benu, Nzambi wa Abalahama,+ Nzambi wa Izaka,+ ne Nzambi wa Yakoba+ mmuntume kunudi.’ Edi ndîna dianyi bua kashidi+ ne eu ke mushindu udibu ne bua kumvuluka kudi bantu ba bipungu ne bipungu. 16 Mpindieu ndaku, usangishe bakulu ba bena Isalele ubambile ne: ‘Yehowa Nzambi wa bankambua benu mmummuenekele, Nzambi wa Abalahama, wa Izaka, ne wa Yakoba, ne mmuambe ne: “Ndi munumone+ bushuwa ne ndi mumone tshidibu banuenzela mu Ejipitu. 17 Nunku ndi ngamba ne: Nennupatule mu dikenga+ dia ku bianza bia bena Ejipitu bua kuya nenu mu buloba bua bena Kanâna, bena Hiti, bena Amole,+ bena Pelizi, bena Hiwi, ne bena Yebuse,+ mu buloba budi ne mabele ne buitshi+ bia bungi.”’

18 “Bushuwa nebateleje dîyi diebe;+ ne wewe ne bakulu ba bena Isalele nenuye kudi mukalenge wa Ejipitu, ne nuenu nenumuambile ne: ‘Yehowa Nzambi wa bena Ebelu+ mmuyukile netu. Nunku tulekela koku tuenze luendu lua matuku asatu mu tshipela bua tuetu kulambula Yehowa Nzambi wetu milambu.’+ 19 Kadi meme ndi mumanye bimpe ne: mukalenge wa Ejipitu kakunuanyishila bua nuenu kuya yeye+ kayi muenzeja kudi tshianza tshia bukole to. 20 Nunku nengolole tshianza tshianyi, nenkengeshe Ejipitu ne bienzedi bia kukema bingenzamu; pashishe neanulekele.+ 21 Nengenze bua tshisamba etshi tshilengelele bena Ejipitu, ne panuaya, kanuakuya bianza bitupu nansha kakese.+ 22 Muntu mukaji yonso udi ne bua kulomba muena mutumba nende ne muntu mukaji udi musombele mu nzubu muende bintu bia arjan ne bia or, ne bilamba kabidi, ne nenubivuadike bana benu ba balume ne bana benu ba bakaji; nenupawule bena Ejipitu.”+

4 Kadi Mose wakandamuna ne: “Mpindieu fuanyikija ne: kabena bangitaba ne kabena bateleja dîyi dianyi,+ bualu nebambe ne: ‘Yehowa kavua mukumuenekele to.’” 2 Ke Yehowa kumuebeja ne: “Tshidi mu tshianza tshiebe ntshinyi?” Yeye kuandamuna ne: “Dikombo.” 3 Kuambaye ne: “Kupa dikombo adi panshi.” Nunku wakadikupa panshi, kuluadi nyoka;+ Mose kumunyema. 4 Yehowa wakambila Mose ne: “Olola tshianza tshiebe, umukuate ku mukila.” Nunku wakolola tshianza, yeye kumukuata, ne nyoka wakalua dikombo mu tshianza tshiende. 5 Ke Nzambi kuamba ne: “Mbua bitabe ne: Yehowa Nzambi wa bankambua babu, Nzambi wa Abalahama, Nzambi wa Izaka, ne Nzambi wa Yakoba+ mmukumuenekele.”+

6 Yehowa wakamuambila kabidi ne: “Bueja koku tshianza mu mubunyi wa ku mutu kua tshilamba tshiebe.” Nunku wakabueja tshianza mu mubunyi wa tshilamba tshiende. Pakatshipatulaye, monayi, tshianza tshiende tshivua tshipie nsudi anu bu neje!+ 7 Ke yeye kuamba ne: “Pingaja tshianza tshiebe mu mubunyi wa ku mutu kua tshilamba tshiebe.” Nunku wakapingaja tshianza mu tshilamba tshiende. Pakatshipatulaye mu tshilamba, tshivua tshipingane anu muvua mubidi wende mujima! 8 Wakamba ne: “Bobu kabayi bakuitabe anyi bitabe tshimanyinu tshia kumpala, nunku nebitabe bushuwa tshimanyinu+ tshialonda. 9 Kadi nansha bobu kabayi bitabe bimanyinu bibidi ebi, ne babenge kuteleja dîyi diebe, newangate ndambu wa mâyi a mu Musulu wa Nile, neuapongolole pa buloba bume, ne mâyi awangata mu musulu wa Nile nealue mashi pa buloba bume.”+

10 Ke Mose kuambila Yehowa ne: “Mfuila koku luse, Yehowa, bualu tshitu ngakula bimpe to, ni nkonso eku, ni nkatshia wabanga kuakula ne muena mudimu webe, bualu muakulu wanyi mmuneme* ne ludimi luanyi nduneme.”+ 11 Yehowa wakamuambila ne: “Nnganyi udi muenze mukana mua muntu, peshi nnganyi udi uvuija muntu kamama, mpudi matshi, umona bimpe anyi mpofu? Ki mmeme Yehowa anyi? 12 Mpindieu ndaku, nengikale nebe paudi wakula,* ne nenkulongeshe tshia wewe kuamba.”+ 13 Kadi wakamba ne: “Mfuila koku luse, Yehowa, tuma koku muntu yonso uudi musue kutuma.” 14 Nunku Yehowa wakakuatshila Mose tshiji tshikole, kuambaye ne: “Kadi newambe bishi bua muanenu Alona+ muena Lewi? Ndi mumanye ne: yeye udi wakula bimpe menemene. Udi mpindieu mu njila bua kusambakena nebe. Pakumonaye, muoyo wende neusanke.+ 15 Nunku akula nende ne ela mêyi aa mukana muende,+ ne nengikale nenu, wewe ne yeye, paudi wakula;+ nennulongeshe tshia nuenu kuenza. 16 Neakule ne bantu pa muaba webe; neikale muleji mpala webe ne wewe newikale kudiye bu Nzambi.*+ 17 Newangate dikombo edi mu tshianza tshiebe, newenze nadi bimanyinu.”+

18 Nunku Mose wakapingana kudi tatuende muenu Yetelo+, kumuambilaye ne: “Ndi musue kupingana, kuya koku kudi bana betu badi mu Ejipitu bua kumona ni batshidi ne muoyo.” Yetelo wakambila Mose ne: “Ndaku mu ditalala.” 19 Pashishe Yehowa wakambila Mose mu Midiyana ne: “Ndaku, pingana mu Ejipitu, bualu bantu bonso bavua bakeba kukushipa* bakadi bafue.”+

20 Nunku Mose wakangata mukajende ne bana bende ba balume, yeye kubabandisha pa mpunda, kutuadijaye kupingana mu buloba bua Ejipitu. Mose wakangata kabidi dikombo dia Nzambi mulelela mu tshianza tshiende. 21 Yehowa wakambila Mose ne: “Pawapingana mu Ejipitu, enza bua wenze kumpala kua Palô bishima bionso bindi mukupeshe bukokeshi bua kuenza.+ Kadi nendekele bua apapishe muoyo wende;+ kakulekela bantu banyi bua baye to.+ 22 Ambila Palô ne: ‘Yehowa udi wamba ne: “Isalele mmuananyi, muanabute wanyi.+ 23 Ndi nkuambila ne: Lekela muananyi bua angenzele mudimu. Kadi wewe mubenge bua kumulekela, nenshipe muanebe, muanabute webe.”’”+

24 Pavuabu mu njila, Yehowa+ wakasambakena nende muaba wa tshilala benyi ne wakakeba kumushipa.+ 25 Ndekelu wa bionso, Sipola+ wakangata dibue ditue,* yeye kutengula muanende wa balume, kuenzaye bua dikoba diende dilenge ku makasa ende, kuambaye ne: “Bualu udi mulume wa mashi kundi.” 26 Nunku Yeye wakamulekela bua aye. Dîba adi wakamba ne: “Mulume wa mashi,” bua bualu bua ditengudibua.

27 Pashishe Yehowa wakambila Alona ne: “Ndaku mu tshipela bua kusambakena ne Mose.”+ Ke yeye kuya, kusambakenaye nende ku mukuna wa Nzambi mulelela+, kumuelaye muoyo umutua mishiku. 28 Nunku Mose wakambila Alona mêyi onso a Yehowa uvua mumutume+ ne bimanyinu bionso bivuaye mumutumine dîyi bua kuenza.+ 29 Pashishe Mose ne Alona bakaya, kusangishabu bakulu bonso ba bena Isalele.+ 30 Alona wakabambila mêyi onso avua Yehowa muambile Mose, ne yeye wakenza bimanyinu+ abi mu mêsu a bantu. 31 Bua bualu ebu, bantu bakitaba.+ Pakumvuabu ne: Yehowa uvua muvuluke bena Isalele+ ne uvua mumone dikenga diabu,+ bakinama, kutuabu mpala yabu panshi.

5 Pashishe Mose ne Alona bakabuela kudi Palô, kumuambilabu ne: “Yehowa Nzambi wa bena Isalele udi wamba ne: ‘Lekela bantu banyi baye bua kungenzela tshibilu mu tshipela.’” 2 Kadi Palô wakamba ne: “Yehowa nnganyi+ pende bua meme kutumikila dîyi diende ne kulekela bena Isalele?+ Tshiena mumanye Yehowa nansha, ne kabidi tshiakulekela bena Isalele to.”+ 3 Kadi bakamba ne: “Nzambi wa bena Ebelu mmuyukile netu. Tudi basue kuenza koku luendu lua matuku asatu mu tshipela bua kulambula Yehowa Nzambi wetu milambu;+ tshianana neatutue masama anyi neatushipe ne muele wa mvita.” 4 Mukalenge wa Ejipitu wakabandamuna ne: “Mose ne Alona, bua tshinyi nudi numbusha bantu ku midimu yabu? Pinganayi ku midimu yenu mikole!”*+ 5 Palô wakamba kabidi ne: “Monayi bungi bua bantu badi mu buloba ebu, ne nuenu nudi basue kubalekesha midimu yabu mikole.”

6 Anu diodi dituku adi, Palô wakatumina bafidi ba midimu mikole ne batangidi babu ba midimu dîyi ne: 7 “Kanupeshi kabidi bantu aba bisunsukile bia tukolakola bua kututa madioto to.+ Balekelayi baye kudianguila bisunsukile bia tukolakola. 8 Kadi nudi ne bua kutungunuka ne kubakosela bungi bumue bua madioto anu muvuabu benza kumpala. Kanubapuekeshidibu to, bualu bakadi ne kalengu.* Ke bualu kayi badi badilakana ne: ‘Tudi basue kuya, tudi basue kulambula Nzambi wetu milambu!’ 9 Benzejayi mudimu mukole kupita kumpala, ne ikalayi nubenzeja mudimu wa bungi bua kabateleji mashimi to.”

10 Nunku bafidi ba midimu mikole+ ne batangidi babu ba midimu bakapatuka, bobu kuambila bantu ne: “Palô mmuambe ne: ‘Tshiakunupesha kabidi bisunsukile bia tukolakola to. 11 Ndayi nudianguile bisunsukile bia tukolakola muaba wonso unudi mua kubipeta, kadi kabakunukepeshila mudimu wenu nansha kakese.’” 12 Nunku bantu bakatangalaka mu buloba bujima bua Ejipitu bua kuangula tukolakola bua kutusunsulula. 13 Bafidi ba midimu mikole bakatungunuka ne kubambila ne: “Muntu ne muntu udi ne bua kujikija mudimu wende dituku dionso, anu bu muvuabi pavuabu banupesha bisunsukile bia tukolakola.” 14 Pashishe bafidi ba midimu mikole ba Palô bakakuma+ batangidi ba midimu ba bena Isalele bavua bobu aba bateke ku mutu kuabu. Bakabebeja ne: “Bua tshinyi kanuena bakumbaje bungi bua madioto bunuvua nuenza konso eku? Bivua bienzeke nanku malaba ne lelu kabidi.”

15 Nunku batangidi ba midimu ba bena Isalele bakaya kudi Palô, badilakana bamba ne: “Bua tshinyi udi wenzela bena mudimu bebe malu mushindu eu? 16 Ki mbapeshe bena mudimu bebe bisunsukile bia tukolakola to, kadi badi batuambila ne: ‘Tutayi madioto!’ Badi bakuma bena mudimu bebe, pabi bantu bebe ke badi mu tshilema.” 17 Kadi wakamba ne: “Nukadi ne kalengu,* nukadi ne kalengu!*+ Ke bualu kayi nudi nuamba ne: ‘Tudi basue kuya, tudi basue kulambula Yehowa milambu.’+ 18 Mpindieu ndayi, pinganayi ku mudimu! Kabakunupesha bisunsukile bia tukolakola to, kadi nudi anu ne bua kututa madioto bungi buvuabu banukosele.”

19 Nunku batangidi ba midimu ba bena Isalele bakamona ne: bavua mu lutatu lukole bualu bavua babatumine dîyi ne: “Kanuena ne bua kukepesha bungi bua madioto buvuabu banukosele ku dituku nansha kakese.” 20 Pashishe bakasambakena ne Mose ne Alona bavua bimane muaba au bua kumonangana nabu pavuabu bapatuka kua Palô. 21 Bakabambila diakamue ne: “Yehowa anutangile ne anulumbuluishe, bualu nudi benze bua Palô ne bena mudimu bende batupetule,* ne nudi bateke muele wa mvita mu tshianza tshiabu bua kutushipa.”+ 22 Ke Mose kukudimuka kudi Yehowa, kuambaye ne: “Yehowa, udi mukengeshe bantu aba bua tshinyi? Bua tshinyi udi muntume? 23 Kubangila anu dîba dimvua mubuele kudi Palô bua kuakula mu dîna diebe,+ yeye mmuenzele bantu aba malu mabi matambe,+ ne wewe kuena musungile bantu bebe nansha kakese.”+

6 Nunku Yehowa wakambila Mose ne: “Mpindieu neumone tshingenzela Palô.+ Tshianza tshia bukole netshimuenzeje bua kubalekela, ne tshianza tshia bukole netshimuenzeje bua kubipata mu buloba buende.”+

2 Pashishe Nzambi wakambila Mose ne: “Meme ndi Yehowa. 3 Mvua mmuenekela Abalahama, Izaka, ne Yakoba bu Nzambi Wa Bukole Buonso,+ kadi tshivua mudimanyishe kudibu+ bua dîna dianyi dia Yehowa+ to. 4 Mvua kabidi mujadike tshipungidi tshianyi nabu bua kubapesha buloba bua Kanâna, buloba buvuabu basombele bu bantu ba ku babende.+ 5 Mpindieu meme nkayanyi ndi mudiumvuile mikemu ya bena Isalele badi bena Ejipitu bavuije bapika, ne ndi muvuluke tshipungidi tshianyi.+

6 “Nunku ambila bena Isalele ne: ‘Meme ndi Yehowa, ne nennumbushe muinshi mua majitu a bena Ejipitu, nennupatule mu bupika buabu+ ne nennusungile ne diboko diolola* ne manyoka makole.+ 7 Nennuangate bu bantu banyi, nengikale Nzambi wenu;+ nenumanye bulelela ne: meme ndi Yehowa Nzambi wenu udi unumbusha muinshi mua majitu a bena Ejipitu. 8 Nennubueje mu buloba bumvua muditshipe* bua kupesha Abalahama, Izaka, ne Yakoba; nennupeshabu bua buikale buenu.+ Meme ndi Yehowa.’”+

9 Pashishe Mose wakambila bena Isalele bualu ebu, kadi kabakateleja Mose to, bualu bavua batekete mu mikolo ne bikale mu bupika bukole.+

10 Ke Yehowa kuambila Mose ne: 11 “Ndaku wambile Palô mukalenge wa Ejipitu ne: udi ne bua kulekela bena Isalele bumbuke mu buloba buende.” 12 Kadi Mose wakandamuna Yehowa ne: “Tangila! Bena Isalele ki mbanteleje to;+ mmunyi muikala Palô mua kunteleja, panyi ngakula ne lutatu?”*+ 13 Kadi Yehowa wakambila kabidi Mose ne Alona mêyi a kuambila bena Isalele ne Palô mukalenge wa Ejipitu bua kupatula bena Isalele mu buloba bua Ejipitu.

14 Aba mbantu bavua ku mutu kua nzubu ya batatuabu: Bana ba Lubena, muanabute wa Isalele,+ bavua: Hanoka, Palu, Heselona, ne Kâmi.+ Aa mmêku a Lubena.

15 Bana ba balume ba Simeona bavua: Yemuele, Yamina, Ohada, Yakina, Sohâ, ne Shawula muana wa mukaji muena Kanâna.+ Aa mmêku a Simeona.

16 Aa mmêna a bana ba balume ba Lewi,+ bilondeshile dilondangana dia mêku abu: Gêshona, Kohata, ne Melali.+ Matuku a muoyo wa Lewi avua bidimu 137.

17 Bana ba balume ba Gêshona bavua: Libini ne Shimei, bilondeshile mêku abu.+

18 Bana ba balume ba Kohata bavua Amalama, Yisehâ, Hebelone, ne Uziele.+ Matuku a muoyo wa Kohata avua bidimu 133.

19 Bana ba balume ba Melali bavua: Mali ne Mushi.

Aa mmêku a bena Lewi bilondeshile dilondangana dia mêku abu.+

20 Amalama wakasela Yokebede, muanabu ne tatuende.+ Wakamulelela Alona ne Mose.+ Matuku a muoyo wa Amalama avua bidimu 137.

21 Bana ba balume ba Yisehâ bavua: Kola,+ Nefege, ne Zikeli.

22 Bana ba balume ba Uziele bavua: Mishaele, Elisafana,+ ne Siteli.

23 Alona wakasela Elisheba, muana wa Aminadaba, muanabu ne Nashona+ wa bakaji. Wakamulelela Nadaba, Abihu, Eleazâ, ne Itamâ.+

24 Bana ba balume ba Kola bavua: Asî, Elekana, ne Abiasafa.+ Aa mmêku a bena Kola.+

25 Eleazâ+ muana wa Alona wakasela umue wa ku bana ba bakaji ba Putiele. Wakamulelela Pinehasa.+

Aba mbantu bavua ku mutu kua nzubu ya batatu ba bena Lewi, bilondeshile mêku abu.+

26 Alona ne Mose aba ke bavua Yehowa muambile ne: “Patulayi bena Isalele mu buloba bua Ejipitu, balongolola mu bisumbu mu bisumbu.”*+ 27 Bobu ke bavua bakule ne Palô mukalenge wa Ejipitu bua kupatula bena Isalele mu Ejipitu. Ke Mose ne Alona+ abu.

28 Dituku divua Yehowa muakule ne Mose mu buloba bua Ejipitu, 29 Yehowa wakambila Mose ne: “Meme ndi Yehowa. Ambila Palô mukalenge wa Ejipitu malu onso andi nkuambila.” 30 Ke Mose kuamba kumpala kua Yehowa ne: “Tangila! Ndi ngakula ne lutatu,* nunku mmunyi muikala Palô mua kunteleja?”+

7 Nunku Yehowa wakambila Mose ne : “Mona, ndi mukuvuije bu Nzambi* kudi Palô, ne muanenu Alona nealue muprofete webe.+ 2 Newambulule malu onso angakutumina dîyi bua kuenza, ne muanenu Alona neakule ne Palô, ne yeye nealekele bena Isalele bua bapatuke mu buloba buende. 3 Kadi meme nendekele muoyo wa Palô bua upape,+ nemvudije bimanyinu bianyi ne bishima bianyi mu buloba bua Ejipitu.+ 4 Kadi Palô kakunuteleja to, ne nenteke tshianza tshianyi pa Ejipitu, nempatule misumba yanyi,* bantu banyi bena Isalele mu buloba ne manyoka makole.+ 5 Bena Ejipitu nebamanye bushuwa ne: meme ndi Yehowa+ pangolola tshianza tshianyi pa Ejipitu, ne pangapatula bena Isalele munkatshi muabu.” 6 Mose ne Alona bakenza tshivua Yehowa mubatumine dîyi bua kuenza; bakenza anu nanku. 7 Mose uvua ne bidimu 80 ne Alona uvua ne bidimu 83 pakakulabu ne Palô.+

8 Pashishe Yehowa wakambila Mose ne Alona ne: 9 “Palô yeye munuambile ne: ‘Enzayi tshishima,’ newambile Alona ne: ‘Angata dikombo diebe, udikupe panshi kumpala kua Palô.’ Diodi nediandamuke nyoka munene.”+ 10 Mose ne Alona bakabuela kudi Palô, kuenzabu anu muvua Yehowa mubatumine dîyi bua kuenza. Alona wakakupa dikombo diende panshi kumpala kua Palô ne kua bena mudimu bende, diodi kuandamuka nyoka munene. 11 Kadi Palô wakabikila bena meji ne bena manga, ne bakuidi bena majimbu ba mu Ejipitu+ bakenza pabu bia muomumue ne majimbu abu.+ 12 Nunku yonso wa kudibu wakakupa dikombo diende panshi, ne makombo au akandamuka nyoka minene; kadi dikombo dia Alona diakamina makombo abu. 13 Nansha nanku muoyo wa Palô wakapapa,+ ne kakabateleja to, anu muvua Yehowa muambe.

14 Pashishe Yehowa wakambila Mose ne: “Muoyo wa Palô mmupape.+ Yeye mmubenge bua kulekela bantu banyi baye. 15 Uye kudi Palô mu dinda. Tangila! Neapatuke bua kuya ku mâyi! Wimane ku muelelu kua Musulu wa Nile bua kusambakena nende; wangate dikombo divua dikudimuke nyoka+ adi mu tshianza tshiebe. 16 Umuambile ne: ‘Yehowa Nzambi wa bena Ebelu mmuntume kuudi+ ne udi wamba ne: “Lekela bantu banyi baye bua kuntendelela mu tshipela,” kadi wewe kuena mutumikile dîyi dianyi too ne mpindieu to. 17 Yehowa udi wamba nunku: “Mu bualu ebu neumanye ne: meme ndi Yehowa.+ Mona, ndi nkuma dikombo didi mu tshianza tshianyi pa mâyi adi mu Musulu wa Nile, ne owu neakudimuke mashi. 18 Mishipa idi mu musulu wa Nile neyifue, ne musulu wa Nile newununke, ne bena Ejipitu nebapange mua kunua mâyi a mu musulu wa Nile.”’”

19 Pashishe Yehowa wakambila Mose ne: “Ambila Alona ne: ‘Angata dikombo diebe, olola tshianza tshiebe pa mutu pa mâyi a mu Ejipitu,+ pa mutu pa misulu yende, pa mutu pa minkoloji yende,* pa mutu pa bisense biende+ ne pa mutu pa majiba ende onso, bua bilue mashi.’ Mashi neikale mu buloba buonso bua Ejipitu, too ne mu bilaminu bia mâyi bia mitshi ne bia mabue.” 20 Diakamue Mose ne Alona bakenza anu muvua Yehowa mubatumine dîyi bua kuenza. Wakela dikombo diende muulu, kudikumaye pa mâyi avua mu Musulu wa Nile mu mêsu a Palô ne a bena mudimu bende, ne mâyi onso avua mu musulu akakudimuka mashi.+ 21 Mishipa ivua mu musulu yakafua,+ ne musulu wakatuadija kununka; bena Ejipitu bakapanga mua kunua mâyi a mu musulu wa Nile,+ ne mashi avua mu buloba bujima bua Ejipitu.

22 Kadi bakuidi bena majimbu ba mu Ejipitu bakenza pabu bia muomumue ne majimbu abu,+ nunku muoyo wa Palô wakatungunuka ne kupapa, ne kakabateleja to, anu muvua Yehowa muambe.+ 23 Pashishe Palô wakapingana ku nzubu kuende, ne kakateka bualu abu ku muoyo to. 24 Nunku bena Ejipitu bonso bavua bumbula kumpenga kuonso kua musulu wa Nile bua kupeta mâyi a kunua, bualu kabavua mua kunua mâyi a musulu wa Nile to. 25 Matuku muanda mutekete majima akapita panyima pa Yehowa mumane kukuma musulu wa Nile.

8 Pashishe Yehowa wakambila Mose ne: “Ndaku kudi Palô, umuambile ne: ‘Yehowa udi wamba ne: “Lekela bantu banyi baye bua kuntendelela.+ 2 Wewe mutungunuke ne kubenga bua kubalekela, nentume ndimba+ mu buloba buebe buonso. 3 Musulu wa Nile newuwule tente ne ndimba, neyibande ne neyibuele mu nzubu muebe, mu nzubu webe wa bulalu, pa bulalu buebe, mu nzubu ya bena mudimu bebe, pa bantu bebe, mu mfulu yebe, ne mu bintu biebe bia kusopela bukula.*+ 4 Ndimba neyibande kuudi, kudi bantu bebe, ne kudi bena mudimu bebe bonso.”’”

5 Pashishe Yehowa wakambila Mose ne: “Ambila Alona ne: ‘Olola tshianza tshiebe ne dikombo diebe pa misulu, pa minkoloji ya musulu wa Nile, ne pa bisense, ne wenze bua ndimba ibande mu buloba bua Ejipitu.’” 6 Nunku Alona wakolola tshianza tshiende pa mâyi a mu Ejipitu, ndimba kutuadijayi kubanda, kuwulayi buloba bua Ejipitu bujima. 7 Kadi bakuidi bena majimbu bakenza bualu bua muomumue ne majimbu abu, ne bobu pabu bakenza bua ndimba ibande mu buloba bua Ejipitu.+ 8 Pashishe Palô wakabikila Mose ne Alona, kubambilaye ne: “Lombayi Yehowa bua umbushe ndimba kundi ne kudi bantu banyi,+ bualu ndi musue kulekela tshisamba tshienu bua tshiye kulambula Yehowa milambu.” 9 Ke Mose kuambila Palô ne: “Ngambilaku wewe dîba dindi ne bua kulomba bua ndimba yumbuke kuudi, kudi bena mudimu bebe, kudi bantu bebe, ne mu nzubu yebe. Neyishadile anu mu Musulu wa Nile.” 10 Ke yeye kuamba ne: “Malaba.” Nunku Mose wakamba ne: “Nebienzeke bilondeshile dîyi diebe, bua umanye ne: kakuena mukuabu udi bu Yehowa Nzambi wetu to.+ 11 Ndimba neyumbuke kuudi, mu nzubu yebe, kudi bena mudimu bebe ne kudi bantu bebe. Neyishadile anu mu musulu wa Nile.”+

12 Nunku Mose ne Alona bakumbuka kudi Palô, Mose wakalomba Yehowa bua ndimba ivuaye mutume kudi Palô.+ 13 Ke Yehowa kuenza anu muvua Mose mulombe, ndimba kutuadijayi kufua mu nzubu, mu mbanza ne mu mpata. 14 Bavua bayikunguija mishiki bungi kabuyi kubala, ne buloba kutuadijabu kununka. 15 Pakamona Palô ne: kuvua kumueneke disulakana, wakapapisha muoyo wende,+ kubengaye bua kubateleja, anu muvua Yehowa muambe.

16 Ke Yehowa kuambila Mose ne: “Ambila Alona ne: ‘Olola dikombo diebe, ukume lupuishi lua pa buloba, ne lupuishi nelulue tumue mu buloba buonso bua Ejipitu.’” 17 Bakenza nanku. Alona wakolola tshianza tshiende ne dikombo diende, kukumaye lupuishi lua pa buloba, ne tumue tuakabanga kuikila bantu ne nyama. Lupuishi luonso lua pa buloba luakalua tumue mu buloba buonso bua Ejipitu.+ 18 Bakuidi bena majimbu bakateta bua kuenza bia muomumue bua kupatulabu tumue ne majimbu abu,+ kadi bakapangila. Tumue tuakikila bantu ne nyama. 19 Ke bakuidi bena majimbu kuambilabu Palô ne: “Eu mmunu wa Nzambi!”+ Kadi Palô wakatungunuka ne kupapisha muoyo wende, kakabateleja to, anu muvua Yehowa muambe.

20 Pashishe Yehowa wakambila Mose ne: “Ujuke mu dindadinda, wimane kumpala kua Palô. Tangila! Neapatuke bua kuya ku mâyi. Umuambile ne: ‘Yehowa udi wamba ne: “Lekela bantu banyi baye bua kuntendelela. 21 Kadi wewe kuyi mulekele bantu banyi, nentume mabubu* kuudi wewe, kudi bena mudimu bebe, kudi bantu bebe ne mu nzubu yebe; nzubu ya mu Ejipitu neyuwule tente ne mabubu, ne neikale too ne panshi ponso padibu* bimanyina. 22 Dituku adi meme nengenze bua kuikale dishilangana mu buloba bua Goshene mudi bantu banyi basombele. Muomu kamuakuikala dibubu nansha dimue;+ mu bualu ebu neumanye ne: meme Yehowa ndi mu buloba ebu.+ 23 Nengenze bua kuikale dishilangana pankatshi pa bantu banyi ne bantu bebe. Malaba tshimanyinu etshi netshienzeke.”’”

24 Yehowa wakenza nanku, ne bisumbu binene bia mabubu biakatuadija kubuela mu nzubu mua Palô, mu nzubu ya bena mudimu bende ne mu buloba buonso bua Ejipitu.+ Buloba buakanyanguka bua mabubu.+ 25 Ndekelu wa bionso, Palô wakabikila Mose ne Alona, kuambaye ne: “Ndayi, nulambule Nzambi wenu milambu mu buloba ebu.” 26 Kadi Mose wakamba ne: “Kabiena bikumbana bua kuenza nanku to, bualu tshitualambula Yehowa Nzambi wetu netshikale tshintu tshibi kudi bena Ejipitu.+ Tuetu balambule tshintu tshidi tshibi kudi bena Ejipitu mu mêsu abu, kabakutuasa mabue anyi? 27 Netuenze luendu lua matuku asatu mu tshipela, ne muomu amu ke mutualambuila Yehowa Nzambi wetu milambu anu mudiye mutuambile.”+

28 Ke Palô kuamba ne: “Nennulekele nuye kulambula Yehowa Nzambi wenu milambu mu tshipela. Kadi kanuyi kule to. Nundombele kudi Nzambi.”+ 29 Nunku Mose wakamba ne: “Mpindieu ndi ngumbuka kumpala kuebe, nendombe Yehowa, ne malaba mabubu neumbuke kudi Palô, kudi bena mudimu bende, ne kudi bantu bende. Kadi Palô alekele kutukutakaja* pa kubenga kulekela bantu bua baye kulambula Yehowa milambu.”+ 30 Nunku Mose wakapatuka kudi Palô, kulombaye Yehowa.+ 31 Nunku Yehowa wakenza bilondeshile dîyi dia Mose, ne mabubu akumbuka kudi Palô, kudi bena mudimu bende, ne kudi bantu bende. Nansha dimue kadiakashala to. 32 Kadi Palô wakapapisha kabidi muoyo wende, kubengaye bua kulekela bena Isalele.

9 Nunku Yehowa wakambila Mose ne: “Ndaku kudi Palô, umuambile ne: ‘Yehowa Nzambi wa bena Ebelu udi wamba nunku: “Lekela bantu banyi baye bua kuntendelela.+ 2 Kadi wewe mubenge bua kubalekela, ne mutungunuke ne kubalama, 3 tangila! tshianza tshia Yehowa+ netshilue kudi bimuna biebe bidi mu mpata. Tshipupu tshibi netshikuate+ tubalu, mpunda, tumelu, ngombe ne mikoko. 4 Yehowa neenze bua kuikale dishilangana pankatshi pa bimuna bia bena Isalele ne bimuna bia bena Ejipitu, ne tshintu nansha tshimue tshia bena Isalele katshiakufua to.”’”+ 5 Kabidi, Yehowa wakakosa dîba wamba ne: “Yehowa neenze bualu ebu mu buloba ebu malaba.”

6 Nunku Yehowa wakenza bualu ebu dituku mene diakalonda, ne bimuna bia mishindu yonso bia mu Ejipitu biakatuadija kufua,+ kadi tshimuna nansha tshimue tshia bena Isalele katshiakafua to. 7 Pakakonka Palô, mona! kakuvua tshimuna nansha tshimue tshia bena Isalele tshivua tshifue to. Nansha nanku, muoyo wa Palô wakatungunuka ne kupapa, kakalekela bena Isalele to.+

8 Pashishe Yehowa wakambila Mose ne Alona ne: “Nuenu bonso babidi uwujayi bianza bienu ne mishila ya mu mfulu, ne Mose udi ne bua kuyikupa muulu kumpala kua Palô. 9 Neyilue lupuishi pa buloba bujima bua Ejipitu, ne neyilue biuwuja bidi bienza tufina pambidi pa bantu ne nyama mu buloba buonso bua Ejipitu.”

10 Nunku bakangata mishila ya mu mfulu, kuimanabu kumpala kua Palô, Mose kuyikupaye muulu, yoyi kulua biuwuja bidi bienza tufina, bipatuka bantu ne nyama. 11 Bakuidi bena majimbu kabakakokesha bua kuimana kumpala kua Mose bua biuwuja, bualu bivua bibapatuke bobu ne bena Ejipitu bonso.+ 12 Kadi Yehowa wakalekela muoyo wa Palô upapa, ne kakabateleja to, anu muvua Yehowa muambile Mose.+

13 Pashishe Yehowa wakambila Mose ne: “Ujuke mu dindadinda, wimane kumpala kua Palô, umuambile ne: ‘Yehowa Nzambi wa bena Ebelu udi wamba nunku: “Lekela bantu banyi baye bua kuntendelela. 14 Bualu mpindieu ndi ntuma bipupu bianyi kuudi bua kusamisha muoyo webe, bena mudimu bebe, ne bantu bebe, bua umanye ne: kakuena mukuabu bu meme pa buloba bujima to.+ 15 Bualu dîba edi mvua mua kuikala muolole tshianza tshianyi bua kukutua wewe ne bantu bebe tshipupu tshibi, ne uvua mua kuikala mumane kujimijibua* pa buloba. 16 Kadi ndi mukushiye ne muoyo anu bua bualu ebu: bua kukuleja bukole buanyi ne bua dîna dianyi dimanyishibue pa buloba bujima.+ 17 Wewe utshidi anu wenzela bantu banyi malu ne diambu, ubenga kubalekela anyi? 18 Mona, nendokeshe mvula wa mabue mukole malaba ku mêba aa utu kayi muanji kuloka mu Ejipitu katshia Ejipitu wabanga too ne lelu. 19 Nunku tuma dîyi bua bumbushe bimuna biebe bionso ne bionso biudi nabi mu mpata, babibueje muaba wa kubilamina. Muntu yonso anyi nyama yonso wikala mu mpata, kayi mubueja mu nzubu neafue pamututa mvula wa mabue.”’”

20 Muntu yonso wa ku bena mudimu ba Palô uvua mutshine dîyi dia Yehowa wakabueja bena mudimu bende ne bimuna biende mu nzubu lukasa, 21 kadi muntu yonso uvua kayi muangate dîyi dia Yehowa ne mushinga wakalekela bena mudimu bende ne bimuna biende mu mpata.

22 Ke Yehowa kuambila Mose ne: “Olola tshianza tshiebe muulu, bua mvula wa mabue alue pa buloba buonso bua Ejipitu,+ pa bantu ne nyama ne bikunyibua bionso bidi mu mpata mu buloba bua Ejipitu.”+ 23 Nunku Mose wakela dikombo diende muulu, ne Yehowa wakatuma makubakuba ne mvula wa mabue, ne kapia* kakapueka pa buloba, ne Yehowa wakatungunuka ne kulokesha mvula wa mabue mu buloba bua Ejipitu. 24 Kuvua mvula wa mabue, ne kuvua mipenya itema munkatshi mua mvula wa mabue. Mvula uvua mukole menemene; kakuvua kuanji kuloka mvula wa nanku mu buloba abu katshia Ejipitu walua tshisamba to.+ 25 Mvula wa mabue wakatuta bintu bionso bivua mu mpata mu buloba buonso bua Ejipitu, kumbukila ku bantu too ne ku nyama, ne wakanyangakaja bikunyibua bionso, kusunsula mitshi yonso ya mu mpata.+ 26 Anu mu buloba bua Goshene, muvua bena Isalele basombele, ke muvua kamuyi mvula wa mabue.+

27 Nunku Palô wakabikidisha Mose ne Alona, kubambilaye ne: “Musangu eu ndi muenze mpekatu. Yehowa mmuakane, kadi meme ne bantu banyi tudi mu tshilema. 28 Nundombele kudi Yehowa bua makubakuba ne mvula wa mabue bia Nzambi bijike. Nunku nengitabe bua kunulekela nuye, kanuakushala kabidi to.” 29 Ke Mose kumuambila ne: “Diakamue pandi mpatuka mu tshimenga nengolole bianza bianyi kumpala kua Yehowa. Makubakuba nealekele, ne mvula wa mabue kakutungunuka kabidi to, bua umanye ne: buloba mbua Yehowa.+ 30 Kadi nkadi mumanye ne: nansha nanku wewe ne bena mudimu bebe kanuakutshina Yehowa Nzambi to.”

31 Mvula wakanyangakaja line ne orje, bualu orje ikavua mu miepu ne line ikavua yela bilongo. 32 Kadi kavua munyangakaje ntete ya blé ne ya epotre* to, bualu yoyi ivua ikola pashishe.* 33 Mose wakumbuka kudi Palô mu tshimenga, kuololaye bianza biende kumpala kua Yehowa, makubakuba ne mabue a mvula kulekelabi, mvula kulekela kuloka pa buloba.+ 34 Pakamona Palô ne: mvula, mabue a mvula, ne makubakuba bivua bilekele, wakenza kabidi mpekatu, kupapishaye muoyo wende,+ yeye ne bena mudimu bende. 35 Muoyo wa Palô wakatungunuka anu ne kupapa, kakalekela bena Isalele, anu muvua Yehowa muambe ku butuangaji bua Mose.+

10 Pashishe Yehowa wakambila Mose ne: “Ndaku kudi Palô, bualu ndi mulekele muoyo wende ne mioyo ya bena mudimu bende bua ipape,+ bua ngenze bimanyinu bianyi ebi kumpala kuende,+ 2 ne bua umanyishe bana bebe ne bikulu bebe mumvua mukengeshe Ejipitu bikole ne bimanyinu bimvua muenze munkatshi muabu;+ nenumanye bushuwa ne: meme ndi Yehowa.”

3 Nunku Mose ne Alona bakaya kudi Palô, kumuambilabu ne: “Yehowa Nzambi wa bena Ebelu udi wamba nunku: ‘Neutungunuke ne kubenga kunkokela too ne dîba kayi?+ Lekela bantu banyi baye bua kuntendelela. 4 Bualu wewe mutungunuke ne kubenga kulekela bantu banyi, mona, ndi ntuma mpasu mu buloba buebe malaba. 5 Neyikale pa mutu pa buloba buonso, ne kakuakuikala mushindu wa kumona panshi to. Neyidie bintu bivua bipanduke ku mvula wa mabue, bivuabu banushile, ne neyidie mitshi yenu yonso idi ikola mu mpata.+ 6 Neyuwule mu nzubu yebe, mu nzubu ya bena mudimu bebe bonso, ne mu nzubu ya mu Ejipitu mujima mu mushindu udi batatuebe ne bakakuebe kabayi banji kumona katshia bikala mu buloba ebu too ne lelu.’”+ Pakambaye nanku, wakakudimuka, kumbukaye kudi Palô.

7 Pashishe, bena mudimu ba Palô bakamuambila ne: “Muntu eu neatungunuke ne kututatshisha* too ne dîba kayi? Lekela bantu aba baye bua kutendelela Yehowa Nzambi wabu. Kuena muanji kumona ne: Ejipitu mmubutuke anyi?” 8 Nunku bakapingaja kabidi Mose ne Alona kumpala kua Palô, yeye kubambila ne: “Ndayi nutendelele Yehowa Nzambi wenu. Kadi badi baya bine mbanganyi?” 9 Ke Mose kuamba ne: “Netuye ne bansonga betu, ne bakulumpe betu, ne bana betu ba balume, ne bana betu ba bakaji, ne mikoko yetu, ne ngombe yetu,+ bualu netuenzele Yehowa tshibilu.”+ 10 Yeye kubambila ne: “Meme anu munulekele nuenu ne bana benu, nanku Yehowa udi nenu!+ Bidi bimueneka ne: nudi nukeba kuenza bualu bubi. 11 Tòo! Anu bantu balume ba munkatshi muenu ke badi mua kuya bua kutendelela Yehowa, bualu ke tshinuvua balombe.” Nunku bakabipata kumpala kua Palô.

12 Ke Yehowa kuambila Mose ne: “Olola tshianza tshiebe pa buloba bua Ejipitu bua mpasu ilue mu buloba bua Ejipitu ne idie bikunyibua bionso bidi mu buloba, bintu bionso bivua mvula wa mabue mushiye.” 13 Diakamue Mose wakolola dikombo diende pa buloba bua Ejipitu, ne Yehowa wakenza bua lupepele lua ku est lutute pa buloba dituku adi dijima ne butuku bujima. Mu dinda, lupepele lua ku est luakalua ne mpasu. 14 Mpasu yakalua mu buloba buonso bua Ejipitu, kuikilayi mu buloba buonso bua Ejipitu.+ Buvua bualu bukole be!+ Kakuvua kuanji kuikala mpasu bungi nanku kumpala kuayi, ne kayakuikalaku kabidi bungi nanku to. 15 Yakabuikila buloba bujima, ne buloba buakafiika bua bualu buayi; yakadia bikunyibua bionso bia mu buloba ne bimuma bionso bia ku mitshi bivua mvula wa mabue mushiye; dibeji dibishi nansha dimue kadiakashala ku mitshi anyi ku bikunyibua bia mu mpata mu buloba buonso bua Ejipitu.

16 Nunku Palô wakabikila Mose ne Alona lukasa, kuambaye ne: “Ndi muenzele Yehowa Nzambi wenu mpekatu ne nuenu kabidi. 17 Mpindieu mbuikidilayi koku mpekatu wanyi bua musangu eu, ne nulombe Yehowa Nzambi wenu bua angumbushile anu tshipupu tshia lufu etshi.” 18 Nunku yeye* wakumbuka kudi Palô, kulombaye Yehowa.+ 19 Pashishe Yehowa wakenza bua lupepele lukudimuke, luolu kulua lupepele lukole lua ku ouest, kuyalu ne mpasu, luolu kuyela mu Mbuu Mukunze. Mpasu nansha umue kakashala mu buloba buonso bua Ejipitu to. 20 Kadi Yehowa wakalekela muoyo wa Palô upapa,+ ne yeye kakalekela bena Isalele to.

21 Pashishe Yehowa wakambila Mose ne: “Olola tshianza tshiebe muulu bua mifitu ilue mu buloba bua Ejipitu, mifitu mikole ya muntu mufuane kuyilenga.” 22 Mose wakolola diakamue tshianza tshiende muulu, ne mifitu mikole yakalua mu buloba buonso bua Ejipitu bua matuku asatu.+ 23 Bantu kabavua bamonangana, ne muntu nansha umue kakumbuka muaba uvuaye matuku asatu au to; kadi bena Isalele bonso bavua ne butoke miaba ivuabu basombele.+ 24 Pashishe Palô wakabikila Mose, kuambaye ne: “Ndayi nuenzele Yehowa mudimu.+ Nenushiye anu mikoko yenu ne ngombe yenu. Nansha bana benu badi mua kuya nenu.” 25 Kadi Mose wakamba ne: “Wewe nkayebe neutupeshe* milambu ne milambu ya kuosha, ne netubilambule Yehowa Nzambi wetu.+ 26 Bimuna bietu nebiye kabidi netu. Kakuena nyama* nansha umue washala, bualu netuangate imue ya kudiyi bua kutendelela Yehowa Nzambi wetu, ne katuena banji kumanya bitualambula Yehowa bua kumutendelela too ne patuafika kuntu aku.” 27 Nunku Yehowa wakalekela muoyo wa Palô upapa, ne yeye kakitaba bua kubalekela nansha.+ 28 Palô wakamuambila ne: “Umbuka kumpala kuanyi! Kukebi kabidi bua kumona mpala wanyi to, bualu dituku diwamona mpala wanyi neufue.” 29 Ke Mose kuamba ne: “Anu muudi muambe amu, tshiakukeba bua kumona mpala webe kabidi to.”

11 Nunku Yehowa wakambila Mose ne: “Nkushale tshipupu tshimue tshindi ne bua kutumina Palô ne Ejipitu. Pashishe neanulekele numbuke muaba eu.+ Dîba dianulekelaye, neanuipatshilamu muaba eu.+ 2 Mpindieu ambila bantu ne: bantu balume ne bantu bakaji bonso balombe bena mutumba babu bintu bia arjan ne bia or.”+ 3 Nanku Yehowa wakenza bua bena Isalele balengelele bena Ejipitu. Kabidi, Mose muine ukavua mulue muntu uvuabu banemeka bikole mu buloba bua Ejipitu kudi bena mudimu ba Palô ne kudi bena Ejipitu bakuabu.

4 Pashishe Mose wakamba ne: “Yehowa udi wamba nunku: ‘Mundankulu nempitshile mu Ejipitu,+ 5 ne muanabute yonso wa mu buloba bua Ejipitu neafue,+ kubangila ku muanabute wa Palô udi musombe mu nkuasa wende wa bukalenge too ne ku muanabute wa mupika mukaji udi upela ne mabue a kupela nawu bintu, ne muanabute wa tshimuna tshionso.+ 6 Mu buloba buonso bua Ejipitu nemuikale miadi mikole itu kayiyi mianji kuikalamu ne yikala kayiyi mua kuikalamu kabidi.+ 7 Kadi nansha mbua kakubulukila* bena Isalele, bantu anyi bimuna biabu, bua numanye ne: Yehowa udi mua kuenza bua kuikale dishilangana pankatshi pa bena Ejipitu ne bena Isalele.’+ 8 Bena mudimu bebe bonso nebapueke kundi, nebatue mpala yabu panshi kumpala kuanyi bamba ne: ‘Ndaku wewe ne bantu bonso badi mu nyima muebe.’+ Panyima pa bualu ebu, nengumbuke.” Pashishe, yeye kumbuka kudi Palô ne tshiji tshikole.

9 Ke Yehowa kuambila Mose ne: “Palô kakunuteleja to,+ bua bishima bianyi bivulangane mu buloba bua Ejipitu.”+ 10 Mose ne Alona bakenza bishima bionso ebi kumpala kua Palô,+ kadi Yehowa wakalekela muoyo wa Palô upapa, nunku yeye kakalekela bena Isalele bua bumbuke mu buloba buende to.+

12 Yehowa wakambila Mose ne Alona mu buloba bua Ejipitu ne: 2 “Ngondo eu neikale ngondo wa ntuadijilu buenu nuenu. Neikale ngondo wa kumpala wa tshidimu buenu nuenu.+ 3 Ambila tshisumbu tshijima tshia bena Isalele ne: ‘Mu dituku dia dikumi dia ngondo eu, yonso wa kudibu angate mukoko+ bua nzubu wa tatuabu, mukoko ku nzubu, mukoko ku nzubu. 4 Kadi bikala bena mu nzubu bakese menemene bua kujikija mukoko, bobu ne muena mutumba nabu* wa pabuipi menemene badi ne bua kuwudia pamue mu nzubu muabu bilondeshile bungi bua bantu.* Paudi wenza makumi, umanye bungi bua munyinyi udi muntu yonso mua kudia. 5 Mukoko webe udi ne bua kuikala tshimpanga tshimpe+ tshia tshidimu tshimue. Udi mua kusungula munkatshi mua bimpanga bia mikoko bitshidi biana anyi munkatshi mua mbuji. 6 Udi ne bua kuwulama too ne mu dituku dia 14 dia ngondo eu,+ ne dîku dionso dia mu tshisumbu tshia Isalele nediwushipe pakadi dîba dibuele, kumpala kua butuku kuila.*+ 7 Badi ne bua kuangata ndambu wa mashi, kuasompuela ku mabaya abidi a mu nseke ya mushiku wa mbelu ne ku dibaya dia ku mutu kua mushiku wa mbelu wa nzubu mudibu bawudiila.+

8 “‘Badi ne bua kudia munyinyi au butuku abu.+ Nebawoshe pa kapia ne nebawudie pamue ne mampa adi kaayi mela luevene+ ne bisekiseki bia bululu.+ 9 Kanuwudi mubishi anyi mutumpa, mulamba ne mâyi to, kadi nuwoshe pa kapia, mutu wawu pamue ne tulum’a mukolo ne bia munda biawu. 10 Kanuena ne bua kuwulama nansha mukese too ne mu dinda, kadi washala too ne mu dinda nenuwoshe mu kapia.+ 11 Nudi ne bua kuwudia mushindu eu: ne mukaba wenu musuika,* sandala yenu ku makasa, ne dikombo dienu mu tshianza; ne nudi ne bua kuwudia lubilu lubilu. Eu udi Pasaka wa Yehowa.* 12 Bualu nempitshile mu buloba bua Ejipitu butuku abu, nenshipe muanabute yonso wa mu buloba bua Ejipitu, kubangila ku muntu too ne ku nyama;+ ne nennyoke nzambi yonso ya mu Ejipitu.+ Meme ndi Yehowa. 13 Mashi au neikale tshimanyinu tshienu pa nzubu inudi; nemmone mashi au ne nempite pa mutu penu, tshipupu katshiakulua kunudi bua kunubutula pangakuma buloba bua Ejipitu to.+

14 “‘Dituku edi nedikale tshivulukilu kunudi, ne nenudivuluke bu tshibilu tshia Yehowa mu bipungu bienu bionso. Nudi ne bua kudivuluka bu mukenji mufunda wa tshiendelele. 15 Nenudie mampa adi kaayi mela luevene matuku muanda mutekete.+ Mu dituku dia kumpala, nudi ne bua kumbusha luevene* mu nzubu yenu, bualu muntu yonso udi udia tshintu tshiela luevene kumbukila ku dituku dia kumpala too ne ku dia muanda mutekete, badi ne bua kumbusha* muntu* au mu Isalele. 16 Mu dituku dia kumpala nenuenze masangisha a tshijila, ne mu dituku dia muanda mutekete, masangisha makuabu a tshijila. Mudimu nansha umue kawena ne bua kuenzeka matuku au to.+ Anu tshintu tshidi muntu* natshi dijinga bua kudia, tshiotshi ke tshinualamba.

17 “‘Nudi ne bua kuikala nuenza Tshibilu tshia Mampa kaayi mela Luevene,+ bualu mu dituku edi menemene nempatule misumba* yenu mu buloba bua Ejipitu. Nudi ne bua kuvuluka dituku edi mu bipungu bienu bionso bu mukenji mufunda wa tshiendelele. 18 Mu ngondo wa kumpala, dituku dia 14 dia ngondo, nenudie mampa adi kaayi mela luevene ku dilolo too ne mu dituku dia 21 dia ngondo ku dilolo.+ 19 Kanuikadi ne luevene* mu nzubu yenu munkatshi mua matuku muanda mutekete, bualu muntu yeye mudie tshintu tshiela luevene, nansha yeye muikale muntu wa ku babende anyi muledibue mu ditunga,+ badi ne bua kumbusha* muntu* au mu tshisumbu tshia Isalele.+ 20 Kanuena ne bua kudia tshintu tshionso tshidi tshiela luevene to. Nudi ne bua kudia mampa adi kaayi mela luevene mu nzubu yenu yonso.’”

21 Diakamue Mose wakabikila bakulu ba bena Isalele bonso,+ kubambilaye ne: “Ndayi nusungule nyama itshidi miana* bua mêku enu onso, ne nushipe mulambu wa Pasaka.* 22 Pashishe nutue tshisumbu tshia tumitshi tua izope mu mashi adi mu dilongo dinene, nukume mashi au ku dibaya dia ku mutu kua mushiku wa mbelu ne ku mabaya abidi a mu nseke yawu; muntu nansha umue wa kunudi kapatuki ku tshiibi tshia nzubu wende too ne mu dinda. 23 Nunku padi Yehowa upita bua kutumina bena Ejipitu tshipupu ne padiye umona mashi ku dibaya dia ku mutu kua mushiku wa mbelu ne ku mabaya abidi a mu nseke yawu, Yehowa neapite bushuwa pa mutu pa tshiibi atshi, kakuanyisha bua tshipupu tshia lufu* tshibuele mu nzubu yenu to.+

24 “Nudi ne bua kuenza bualu ebu bu mukenji wa kashidi buebe wewe ne bana bebe.+ 25 Panudi nubuela mu buloba buanupesha Yehowa, anu mukadiye muambe, nudi ne bua kutungunuka ne kuenza tshibilu etshi.+ 26 Padi bana benu banuebeja ne: ‘Tshibilu tshinudi nuenza etshi tshidi tshiumvuija tshinyi kunudi?’+ 27 nubambile ne: ‘Mmulambu wa Pasaka* bua Yehowa uvua mupite pa mutu pa nzubu ya bena Isalele mu Ejipitu pavuaye mutumine bena Ejipitu tshipupu, kadi musungile nzubu yetu.’”

Pashishe bantu bakinama, kutuabu mpala panshi. 28 Nunku bena Isalele bakaya, kuenzabu anu muvua Yehowa mutumine Mose ne Alona dîyi bua kuenza.+ Bakenza anu nanku.

29 Nanku mundankulu, Yehowa wakashipa muanabute yonso mu buloba bua Ejipitu,+ kubangila ku muanabute wa Palô uvua musombe mu nkuasa wende wa bukalenge too ne ku muanabute wa muntu uvuabu bakuate mu buloko,* ne muanabute wa nyama yonso.+ 30 Palô wakajuka butuku abu, yeye ne bena mudimu bende bonso ne bena Ejipitu bakuabu bonso, ne kuvua miadi mikole munkatshi mua bena Ejipitu, bualu kakuvua nzubu uvua ne muntu kayi mufuamu to.+ 31 Ke yeye kubikila Mose ne Alona+ diakamue butuku abu, kuambaye ne: “Jukayi, umbukayi munkatshi mua bantu banyi, nuenu ne bena Isalele bakuabu. Ndayi nutendelele Yehowa, anu bu munudi bambe.+ 32 Angatayi kabidi mikoko yenu ne ngombe yenu, nuye, anu bu munudi bambe.+ Kadi nudi kabidi ne bua kumbenesha.”

33 Nunku bena Ejipitu bakabanga kuenzeja bena Isalele bua bumbuke lukasa+ mu buloba buabu “bualu,” anu muvuabu bambe, “tuetu bonso tudi anu bu tukadi bafue!”+ 34 Nunku bantu bakambula bukula buabu busopa kabuyi buanji kuela luevene, ne bintu biabu bia kusopela bukula* bivungila mu bilamba pa makaya abu. 35 Bena Isalele bakenza tshivua Mose mubambile, bobu kulomba bena Ejipitu bintu bia arjan ne bia or, ne bilamba kabidi.+ 36 Yehowa wakenza bua tshisamba etshi tshilengelele bena Ejipitu, nunku bakabapesha bivuabu balombe, ne bakapawula bena Ejipitu.+

37 Nunku bena Isalele bakumbuka ku Lamesese+ batangile ku Sukota,+ bantu balume batue ku binunu 600 benda lua makasa, pa kumbusha bana.+ 38 Tshisumbu tshinene tshia bantu basambakane*+ tshiakaya nabu, pamue ne mikoko ne ngombe, bimuna bia bungi menemene. 39 Bakatuadija kuosha mampa a bijengu kaayi mela luevene ne bukula busopa buvuabu bumbuke nabu mu Ejipitu. Kabuvua buela luevene to, bualu bavua babipate mu Ejipitu mu tshimpitshimpi kabayi banji kudilongoluela biakudia nansha bikese.+

40 Disomba dia bena Isalele, bavua basombele mu Ejipitu,+ divua dia bidimu 430.+ 41 Ku ndekelu kua bidimu 430 abi, mu dituku adi menemene, misumba* yonso ya Yehowa yakapatuka mu buloba bua Ejipitu. 42 Ebu mbutuku buikalabu ne bua kuvuluka mushindu uvua Yehowa mubapatule mu buloba bua Ejipitu. Ebu mbutuku buikala tshisamba tshionso tshia Isalele ne bua kulama bua Yehowa mu bipungu biabu bionso.+

43 Nunku Yehowa wakambila Mose ne Alona ne: “Eu mmukenji mufunda wa Pasaka:* Muntu wa ku babende nansha umue kena mua kumudia to.+ 44 Kadi muntu yeye muikale ne mupika mulume musumba ku makuta, udi ne bua kumutengula.+ Dîba adi udi mua kumudia pende. 45 Muenyi ne muntu udibu bangate ku mudimu kabena mua kumudia to. 46 Nebamudiile mu nzubu umue. Kuena ne bua kupatuka ne munyinyi nansha mukese pambelu, ne kanuena ne bua kutshibula mufuba wende nansha umue to.+ 47 Tshisumbu tshionso tshia bena Isalele tshidi ne bua kuenza Pasaka.* 48 Bikala muntu wa ku babende udi musombe nenu musue kuenza Pasaka bua Yehowa, muntu mulume yonso wa kuende udi ne bua kutengudibua. Dîba adi, udi mua kusemena bua kumuenza, ne nealue bu muntu udi muledibue mu ditunga. Kadi muntu udi kayi mutengula kena mua kumudia to.+ 49 Nekuikale mukenji wa muomumue bua muntu udi muledibue mu ditunga ne bua muntu wa ku babende udi musombe munkatshi muenu.”+

50 Nunku bena Isalele bonso bakenza anu muvua Yehowa mutumine Mose ne Alona dîyi bua kuenza. Bakenza anu nanku. 51 Mu dituku dine adi, Yehowa wakapatula bena Isalele pamue ne misumba* yabu mu buloba bua Ejipitu.

13 Yehowa wakambila kabidi Mose ne: 2 “Unjidile* muanabute yonso wa balume* wa bena Isalele. Muana wa balume wa kumpala udi uledibua, wa muntu nansha wa nyama, nguanyi.”+

3 Pashishe Mose wakambila bantu ne: “Vulukayi dituku edi dinuvua bapatuke mu Ejipitu,+ mu nzubu wa bupika, bualu Yehowa uvua munupatule muaba eu ne tshianza tshia bukole.+ Nunku, kanuena mua kudia tshintu nansha tshimue tshidi tshiela luevene to. 4 Nudi nupatuka dituku edi, mu ngondo wa Abiba.*+ 5 Pikala Yehowa munubueje mu buloba bua bena Kanâna, bena Hiti, bena Amole, bena Hiwi, ne bena Yebuse+ buvuaye muditshipe kudi bankambua benu bua kunupesha,+ buloba budi ne mabele ne buitshi bia bungi,+ nudi ne bua kutungunuka ne kuenza tshibilu etshi mu ngondo eu. 6 Nenudie mampa adi kaayi mela luevene matuku muanda mutekete,+ ne mu dituku dia muanda mutekete nekuikale tshibilu bua Yehowa. 7 Nudi ne bua kudia mampa adi kaayi mela luevene matuku muanda mutekete;+ kanuikadi ne tshintu nansha tshimue tshidi tshiela luevene,+ ne kanuikadi ne luevene* mu buloba* buenu buonso to. 8 Newambile muanebe dituku adi ne: ‘Ndi ngenza nunku bua tshivua Yehowa mungenzele pamvua mupatuke mu Ejipitu.’+ 9 Bualu ebu nebuikale bu tshimanyinu kuudi pa tshianza tshiebe ne bu tshivulukilu pa mpala pebe,*+ bua mukenji wa Yehowa wikale mukana muebe, bualu Yehowa uvua mukupatule mu Ejipitu ne tshianza tshia bukole. 10 Udi ne bua kulama mukenji mufunda eu ku tshidimu ku tshidimu+ padi tshikondo tshiawu tshikumbana.

11 “Padi Yehowa ukubueja mu buloba bua bena Kanâna buvuaye muditshipe kuudi ne kudi bankambua bebe bua kukupesha,+ 12 udi ne bua kupesha Yehowa muanabute yonso mulume,* kabidi ne muanabute yonso mulume wa bimuna biudi upeta. Balume mba Yehowa.+ 13 Udi ne bua kupikula muanabute yonso wa mpunda ku mukoko, kadi wewe kuyi mumupikule, dîba adi udi ne bua kutshibula nshingu wende. Udi ne bua kupikula kabidi muanabute yonso wa balume wa ku bana bebe ba balume.+

14 “Muanebe yeye mukuebeje pashishe ne: ‘Bualu ebu budi bumvuija tshinyi?’ dîba adi neumuambile ne: ‘Yehowa wakatupatula mu Ejipitu, mu nzubu wa bupika, ne tshianza tshia bukole.+ 15 Pavua Palô muteke mutu mukole, ubenga kutulekela,+ Yehowa wakashipa banabute bonso mu buloba bua Ejipitu, kubangila ku muanabute wa muntu too ne ku muanabute wa nyama.+ Ke bualu kayi ndi ndambula Yehowa banabute bonso ba balume,* ne ndi mpikula muanabute yonso wa ku bana banyi ba balume.’ 16 Bualu ebu nebuikale bu tshimanyinu pa tshianza tshiebe ne bu mukaba pa mpala pebe,*+ bualu Yehowa uvua mutupatule mu Ejipitu ne tshianza tshia bukole.”

17 Pavua Palô mulekele bena Isalele, Nzambi kakabayishila mu njila wa mu buloba bua bena Peleshete nansha muvuaye wa tshikoso to. Bualu Nzambi wakamba ne: “Bantu aba bobu batuilangane ne mvita badi mua kushintulula lungenyi luabu ne nebapingane mu Ejipitu.” 18 Nunku Nzambi wakenza bua bena Isalele banyunguluke, bayile mu njila wa mu tshipela tshia Mbuu Mukunze.+ Kadi bena Isalele bakapatuka mu buloba bua Ejipitu bu basalayi badilongolole bua mvita. 19 Mose wakangata kabidi mifuba ya Jozefe, bualu Jozefe uvua mutshipishe bana ba Isalele ne muoyo mujima ne: “Nzambi kakupanga kunuvuluka, nunku nudi ne bua kumbuka ne mifuba yanyi muaba eu.”+ 20 Bakumbuka ku Sukota, bobu kutudila ku Etame ku muelelu kua tshipela.

21 Yehowa uvua uya kumpala kuabu mu dikunji dia ditutu bua kubalombola mu njila mu munya,+ ne mu dikunji dia kapia bua kubatokeshila butuku, nunku bavua mua kuenda munya ne butuku.+ 22 Dikunji dia ditutu kadivua diumbuka kumpala kua bantu mu munya to, ne dikunji dia kapia kadivua diumbuka kumpala kuabu butuku to.+

14 Nunku Yehowa wakambila Mose ne: 2 “Ambila bena Isalele bua balukile, batudile kumpala kua Pihahilota, pankatshi pa Migedola ne mbuu, muaba udibu mua kumona Bâla-sefona.+ Nudi ne bua kuasa tshitudilu batangilangane nende pabuipi ne mbuu. 3 Nanku Palô neambe bua bena Isalele ne: ‘Badi benda batambakana mu buloba kabayi ne kua kuya. Tshipela ntshibajingile.’ 4 Nendekele bua muoyo wa Palô upape,+ neabalondakaje ne nenditumbishe ku diambuluisha dia Palô ne tshiluilu tshiende tshionso;+ bena Ejipitu nebamanye bulelela ne: meme ndi Yehowa.”+ Nunku bakenza nanku.

5 Pashishe bakambila mukalenge wa Ejipitu ne: bena Isalele mbanyeme. Diakamue Palô ne bena mudimu bende bakashintulula lungenyi luabu bua bena Isalele,+ kuambabu ne: “Bua tshinyi tudi benze bualu ebu, balekele bena Isalele bavua batuenzela mudimu bu bapika?” 6 Nunku wakalongolola matempu ende a mvita, yeye kuya ne bantu bende.+ 7 Wakaya kabidi ne matempu mimpe menemene 600 ne matempu makuabu onso a mu Ejipitu, ne basalayi babande mu ditempu dionso. 8 Nunku Yehowa wakalekela bua muoyo wa Palô mukalenge wa Ejipitu upape, ne wakalondakaja bena Isalele, pavua bena Isalele baya ne dishindika dionso.*+ 9 Bena Ejipitu bakabalondakaja;+ ne tubalu tuonso tua Palô tuvua tukoka matempu, ne basalayi bende bavua babande pa tubalu ne tshiluilu tshiende bivua bienda bisemena pabuipi nabu pavuabu batudile pabuipi ne mbuu, pabuipi ne Pihahilota batangilangane ne Bâla-sefona.

10 Pakasemena Palô pabuipi menemene, bena Isalele bakabandisha mêsu abu, kumonabu bena Ejipitu benda babalonda. Bena Isalele bakumvua buôwa bua bungi, kutuadijabu kudidila Yehowa.+ 11 Bakambila Mose ne: “Udi mulue netu muaba eu bua tuetu kufuila mu tshipela bualu mu Ejipitu kamuena miaba ya kujiikilangana anyi?+ Tshiudi mutuenzele nunku ntshinyi? Bua tshinyi udi mutupatule mu Ejipitu? 12 Ki mbualu butuvua bakuambile mu Ejipitu patuvua bambe ne: ‘Tulekela tuenzele bena Ejipitu mudimu’ anyi? Bualu mbimpe tuenzele bena Ejipitu mudimu pamutu pa kufuila mu tshipela.”+ 13 Ke Mose kuambila bantu ne: “Kanutshinyi to.+ Imanayi bashindame, numone lupandu lua Yehowa luanupandishaye lelu.+ Bualu bena Ejipitu banudi numona lelu aba kanuakubamona kabidi nansha kakese to.+ 14 Yehowa nkayende neanuluile mvita,+ nuenu nenushale bapuwe.”

15 Ke Yehowa kuambila Mose ne: “Bua tshinyi udi anu udila kundi? Ambila bena Isalele base luendu. 16 Kadi wewe ela dikombo diebe muulu, olola tshianza tshiebe pa mutu pa mbuu, umupandulule bua bena Isalele bendele pa buloba bume munkatshi mua mbuu. 17 Kadi meme ndi ndekela bua mioyo ya bena Ejipitu ipape bua babalonde; nunku nenditumbishe ku diambuluisha dia Palô, tshiluilu tshiende tshionso, matempu ende a mvita ne basalayi bende badi babande pa tubalu.+ 18 Bena Ejipitu nebamanye bulelela ne: meme ndi Yehowa pandi nditumbisha ku diambuluisha dia Palô, matempu ende a mvita ne basalayi bende badi babande pa tubalu.”+

19 Nunku muanjelu wa Nzambi mulelela+ uvua wenda kumpala kua tshisumbu tshia bena Isalele wakumbuka, yeye kuya panyima pabu, ne dikunji dia ditutu divua kumpala kuabu diakaya kuimana panyima pabu.+ 20 Nunku diakalua pankatshi pa tshisumbu tshia bena Ejipitu ne tshisumbu tshia bena Isalele.+ Ku luseke lumue divua ditutu difiike. Ku luseke lukuabu divua ditokesha butuku.+ Nunku tshisumbu tshimue katshiakasemena pabuipi ne tshikuabu butuku bujima.

21 Nunku Mose wakolola tshianza tshiende pa mutu pa mbuu;+ ne Yehowa wakapingaja mâyi tshianyima ne lupepele lukole lua ku est butuku bujima, panshi pa mbuu kumapu,+ mâyi kupandulukawu.+ 22 Nunku bena Isalele bakendela pa buloba bume+ munkatshi mua mbuu pavua mâyi menze tshimanu ku dia balume diabu ne ku dia bakaji diabu.+ 23 Bena Ejipitu bakabalondakaja, ne tubalu tuonso tua Palô, matempu ende a mvita ne basalayi bende bavua babande pa tubalu bakatuadija kubalonda munkatshi mua mbuu.+ 24 Mu tshilu tshia mu dinda,* Yehowa wakatangidila tshisumbu tshia bena Ejipitu mu dikunji dia kapia ne ditutu,+ yeye kubueja tshisumbu tshia bena Ejipitu mu kayumbayumba. 25 Wakabanga kutula nkata ya matempu abu, bobu kubanga kuendesha matempu abu ne lutatu, ne bena Ejipitu bavua bamba ne: “Tunyemayi ku mêsu kua bena Isalele bualu Yehowa udi ubaluila mvita, uluangana ne bena Ejipitu.”+

26 Pashishe Yehowa wakambila Mose ne: “Olola tshianza tshiebe pa mutu pa mbuu bua mâyi apingane, abuikile bena Ejipitu, matempu abu a mvita ne basalayi babu badi babande pa tubalu.” 27 Diakamue Mose wakolola tshianza tshiende pa mutu pa mbuu, ne patshiatshia mbuu wakapingana muvuaye konso eku. Pavua bena Ejipitu banyema bua kupatukamu, Yehowa wakimansha bena Ejipitu munkatshi mua mbuu.+ 28 Mâyi avua apingana akabuikila matempu a mvita ne basalayi bavua babande pa tubalu ne tshiluilu tshionso tshia Palô bivua bibalonde mu mbuu.+ Nansha umue wa kudibu kakashala ne muoyo to.+

29 Kadi bena Isalele bakendela pa buloba bume munkatshi mua mbuu,+ ne mâyi akenza tshimanu ku dia balume diabu ne ku dia bakaji diabu.+ 30 Nunku Yehowa wakapandisha bena Isalele mu tshianza tshia bena Ejipitu dituku adi,+ ne bena Isalele bakamona bena Ejipitu bafue ku muelelu kua mbuu. 31 Isalele wakamona kabidi bukole* bua bungi buvua Yehowa muleje bena Ejipitu, ne bantu bakabanga kutshina Yehowa ne kuitabuja Yehowa ne muena mudimu wende Mose.+

15 Tshikondo atshi Mose ne bena Isalele bakimbila Yehowa musambu eu ne:+

“Nengimbile Yehowa, bualu mmutumbishibue bikole.+

Kabalu ne uvua mukabande, yeye mmubiele mu mbuu.+

 2 Yah* udi makanda anyi ne bukole buanyi, bualu mmulue lupandu luanyi.+

Eu ke Nzambi wanyi, nemmusamune;+ Nzambi wa tatu wanyi,+ nemmutumbishe.+

 3 Yehowa mmuluanganyi wa mvita munene.+ Yehowa ndîna diende.+

 5 Mâyi a mavuala makole akababuikila; bakadina mu ndondo anu bu dibue.+

 9 Muena lukuna wakamba ne: ‘Nembalondakaje! Nembapete!

Nentapulule bintu bindi munyenge too ne pandi* ngukuta!

Nentule muele wanyi wa mvita! Tshianza tshianyi netshibakokeshe!’+

11 Nnganyi udi bu wewe Yehowa munkatshi mua nzambi mikuabu?+

Nnganyi udi bu wewe udi udileja wa bukole mu bunsantu?+

Yeye udi wa kutshina ne misambu ya kumutumbisha nayi, ne Udi wenza malu a kukema.+

12 Wewe wakolola tshianza tshiebe tshia balume, ne buloba buakabamina.+

Bantu bonso ba mu Kanâna nebatekete mu maboko.+

16 Ditshina ne buôwa bukole nebibakuate.+

18 Yehowa neakokeshe bu mukalenge bua kashidi ne tshiendelele.+

20 Pashishe muprofete mukaji Mîyama, muanabu ne Alona, wakangata ngoma mu tshianza tshiende, ne bantu bakaji bonso bakamulonda ne ngoma ne maja. 21 Mîyama wakapunguluja bantu balume ne:

“Imbilayi Yehowa, bualu mmutumbishibue bikole.+

Kabalu ne uvua mukabande, yeye mmubiele mu mbuu.”+

22 Pashishe Mose wakumbuka ne bena Isalele ku Mbuu Mukunze, bobu kuya mu tshipela tshia Shû, kuendabu matuku asatu mu tshipela, kadi kabakapeta mâyi to. 23 Bakafika ku Mala,*+ kadi kabavua mua kunua mâyi a ku Mala to, bualu avua ne bululu. Ke bualu kayi wakinyika muaba au ne: Mala. 24 Nunku bantu bakatuadija kunungana bua Mose+ bamba ne: “Netunue tshinyi?” 25 Wakadidila Yehowa,+ Yehowa kumulejaye mutshi kampanda. Pakawelaye mu mâyi, mâyi akalua mimpe.

Muaba au Yeye wakabatekela mukenji ne tshishimikidi tshia dilumbuluisha, Yeye kubateka mu diteta muaba au.+ 26 Wakamba ne: “Wewe muteleje dîyi dia Yehowa Nzambi webe ne muoyo mujima, ne muenze malu adi mimpe ku mêsu kuende, ne muteye ntema ku mêyi ende, ne mulonde mêyi ne mikandu biende bionso,+ tshiakukutumina disama nansha dimue dia ku masama amvua mutumine bena Ejipitu to,+ bualu meme Yehowa ke udi ukuondopa.”+

27 Panyima pa malu aa, bakafika ku Elima, muaba uvua mishimi ya mâyi 12 ne mabue a ngaji 70. Nunku bakatudila muaba au pabuipi ne mâyi.

16 Pakumbukabu ku Elima, tshisumbu tshijima tshia bena Isalele tshiakafika ndekelu wa bionso mu tshipela tshia Sina+ tshidi pankatshi pa Elima ne Sinai, mu dituku dia 15 dia ngondo muibidi wa panyima pa dipatuka diabu dia mu buloba bua Ejipitu.

2 Pashishe tshisumbu tshijima tshia bena Isalele tshiakabanga kunungana bua Mose ne Alona mu tshipela.+ 3 Bena Isalele bavua anu babambila ne: “Tuvua mua kuikala nansha bafuile ku tshianza tshia Yehowa mu buloba bua Ejipitu patuvua basombe ku ngesu ya minyinyi,+ patuvua tudia biakudia tukuta. Mpindieu nudi balue netu mu tshipela emu bua kushipa tshisumbu tshijima etshi ne nzala.”+

4 Ke Yehowa kuambila Mose ne: “Mona, ndi nnulokeshila biakudia bifuma mu diulu,+ muena Isalele yonso neaye bua kuangula buende bungi ku dituku ku dituku,+ bua mbatete bua kumona bikalabu mua kuendela mu mukenji wanyi anyi kubenga kuendelamu.+ 5 Kadi mu dituku disambombo,+ palambabu bidibu bangule, bidibu bangule bidi ne bua kuikala bungi butubu bangula matuku makuabu onso misangu ibidi.”+

6 Nunku Mose ne Alona bakambila bena Isalele bonso ne: “Dilolo nenumanye bushuwa ne: Yehowa ke uvua munupatule mu buloba bua Ejipitu.+ 7 Mu dinda nenumone butumbi bua Yehowa, bualu Yehowa mmumvue munudi nunungana bua bualu buende. Tuetu tudi banganyi bua nuenu kunungana bua bualu buetu?” 8 Mose wakatungunuka wamba ne: “Panupesha Yehowa munyinyi bua kudia ku dilolo, ne mu dinda biakudia bikuabu bua kudia kukuta, nenumone ne: Yehowa mmumvue manunganyi anudi nunungana bua bualu buende. Kadi tuetu tudi banganyi? Kanuena nunungana bua bualu buetu to, kadi nudi nunungana bua Yehowa.”+

9 Ke Mose kuambila Alona ne: “Ambila tshisumbu tshijima tshia bena Isalele ne: ‘Semenayi pabuipi kumpala kua Yehowa, bualu mmumvue manunganyi enu.’”+ 10 Diakamue pakambila Alona tshisumbu tshijima tshia bena Isalele nunku, bakakudimuka, kutangilabu ku tshipela, monayi! butumbi bua Yehowa buakamueneka mu ditutu.+

11 Yehowa wakambila kabidi Mose ne: 12 “Ndi mumvue manunganyi a bena Isalele.+ Bambila ne: ‘Pakadi dîba dibuele, kumpala kua butuku kuila* nenudie munyinyi, ne mu dinda nenudie biakudia bikuabu nenukute,+ ne nenumanye bulelela ne: Ndi Yehowa Nzambi wenu.’”+

13 Nunku dilolo adi, nyunyi ya tulumbu yakalua, yakabuikila tshitudilu,+ ne mu dinda lumuma luvua lubuikile kumpenga kuonso kua tshitudilu. 14 Pakuuma lumuma, kuvua bintu bikese bikese bienze nsekenseke panshi mu tshipela,+ bikese bikese anu bu bisunsukile bia mabue a mashika panshi. 15 Pakabimona bena Isalele, bakabanga kukonkangana ne: “Ntshinyi etshi?” bualu kabavua bamanye ne: ntshinyi to. Mose wakabambila ne: “Mbiakudia bidi Yehowa munupeshe bua kudia.+ 16 Yehowa mmuele mukenji ne: ‘Muntu yonso udi ne bua kubiangula bilondeshile bungi budiye mua kudia. Nenuangule tshipiminu tshimue tshia omer*+ bua muntu yonso bilondeshile bungi bua bantu* badi yonso wa kunudi nabu mu ntenta wende.’” 17 Bena Isalele bakabanga kuenza nanku; bobu kuangula bintu abi, bamue bangula bia bungi bakuabu bangula bikese. 18 Pavuabu bapima bungi bua bintu abi ne tshipiminu tshia omer, uvua muangule bia bungi kavua ne bia bungi kupita, ne uvua muangule bikese kavua ne bishadile to.+ Yonso wa kudibu wakangula bilondeshile bungi buvuaye mua kudia.

19 Ke Mose kubambila ne: “Muntu kashiyi tshintu nansha tshimue too ne mu dinda.”+ 20 Kadi kabakateleja Mose to. Pavua bantu bakuabu bashiye ndambu wa bintu abi too ne mu dinda, biakatapa bikusu ne biakanunka, ne Mose wakabakuatshila tshiji. 21 Bavua babiangula mu dinda dionso, muntu yonso bilondeshile bungi buvuaye mua kudia. Pavua munya ukola, bivua bienguluka.

22 Dituku disambombo bakangula biakudia bungi misangu ibidi,+ bipiminu bibidi bia omer pa muntu. Nunku bamfumu bonso ba tshisumbu bakalua kuambila Mose bualu abu. 23 Pa nanku wakabambila ne: “Ke tshidi Yehowa muambe. Malaba nekuikale dikisha ku midimu yonso,* nsabatu wa tshijila kudi Yehowa.+ Enzayi mampa ne binudi basue kuenza nabi mampa ne lambayi binudi basue kulamba;+ pashishe nulame bionso bidi bishala, nubiteke too ne mu dinda.” 24 Nunku bakabilama too ne mu dinda anu muvua Mose mutume dîyi bua kuenza, ne kabiakanunka anyi kutapa bikusu to. 25 Pashishe Mose wakamba ne: “Bidiayi lelu, bualu lelu ndia nsabatu wa Yehowa. Lelu kanuakubisangana panshi to. 26 Nenubiangule mu matuku asambombo, kadi mu dituku dia muanda mutekete, dituku dia Nsabatu,+ kabiakuikalaku to.” 27 Kadi mu dituku dia muanda mutekete, bantu bakuabu bakaya bua kubiangula, kadi kabakasangana tshintu to.

28 Nunku Yehowa wakambila Mose ne: “Nenubenge kutumikila mêyi anyi ne mikenji yanyi too ne dîba kayi?+ 29 Numanye bimpe ne: Yehowa mmunupeshe Nsabatu.+ Ke bualu kayi udi unupesha biakudia bia matuku abidi dituku disambombo. Muntu yonso udi ne bua kushala muaba udiye; muntu nansha umue kena ne bua kumbuka muaba wende dituku dia muanda mutekete to.” 30 Nanku bantu bakanemekela Nsabatu* mu dituku dia muanda mutekete.+

31 Nzubu wa Isalele wakabikila biakudia abi ne: “Mana.”* Bivua bitoke anu bu ntete ya koriandre, ne mukana bivua anu bu mikata ya bibetubetu mienza ne buitshi.+ 32 Ke Mose kuamba ne: “Yehowa mmutume dîyi ne: ‘Uwujayi tshipiminu tshimue tshia omer ne bintu ebi bua bikale bintu bia kulama mu bipungu bienu bionso,+ bua bamone biakudia bimvua munupeshe bua kudia mu tshipela pamvua munupatule mu buloba bua Ejipitu.’” 33 Nunku Mose wakambila Alona ne: “Angata mulondo, welamu tshipiminu tshia omer tshimue tshia mana, uwuteke kumpala kua Yehowa bu tshintu tshia kulama mu bipungu bienu bionso.”+ 34 Anu muvua Yehowa mutumine Mose dîyi, Alona wakawuteka kumpala kua Bujadiki+ bua ulamibue. 35 Bena Isalele bakadia mana bidimu 40,+ too ne pakafikabu mu buloba muvua bantu basombele.+ Bakadia mana too ne pakafikabu ku mikalu ya buloba bua Kanâna.+ 36 Omer uvua tshia dikumi tshia tshipiminu tshia efa.*

17 Tshisumbu tshijima tshia bena Isalele tshiakumbuka mu tshipela tshia Sina,+ benza luendu mu bitupa mu bitupa bilondeshile dîyi dia Yehowa,+ ne bakatudila ku Lefidima.+ Kadi kakuvua mâyi a bantu kunua to.

2 Nunku bantu bakatuadija kutandangana ne Mose+ bamba ne: “Tupesha mâyi a kunua.” Kadi Mose wakabambila ne: “Bua tshinyi nudi nutandangana nanyi? Bua tshinyi nudi nutungunuka ne kuteka Yehowa mu diteta?”+ 3 Kadi bantu bavua ne nyota mikole ya mâyi kuntu aku, ne bavua anu banungana bua Mose,+ bamba ne: “Bua tshinyi uvua mutupatule mu Ejipitu bua kutushipesha ne nyota tuetu ne bana betu ne bimuna bietu?” 4 Ndekelu wa bionso Mose wakadila kudi Yehowa ne: “Ngenze tshinyi ne bantu aba? Nkushale anu kakese bua bobu kungasa mabue!”

5 Ke Yehowa kuambila Mose ne: “Pita kumpala kua bantu, uye ne bamue bakulu ba mu Isalele ne dikombo diebe diuvua mutute pa Musulu wa Nile.+ Udiangate mu tshianza tshiebe, uye. 6 Mona! Nengimane kumpala kuebe pa dibue ku Holeba. Neutute dibue, ne mâyi neapatukamu, ne bantu nebaanue.”+ Mose wakenza nanku kumpala kua bakulu ba mu Isalele. 7 Nunku wakinyika muaba au ne: Masa*+ ne Meliba,*+ bua ditandangana dia bena Isalele ne bualu bakateka Yehowa mu diteta,+ bamba ne: “Yehowa udi munkatshi muetu emu anyi kenamu?”

8 Pashishe bena Amaleka+ bakalua, kuluanganabu ne Isalele ku Lefidima.+ 9 Ke Mose kuambila Yoshua ne:+ “Tusunguila bantu balume ne ndaku uluangane ne bena Amaleka. Malaba nengimane pa mutu pa mukuna ne dikombo dia Nzambi mulelela mu tshianza tshianyi.” 10 Nanku Yoshua wakenza anu muvua Mose mumuambile,+ wakaluangana ne bena Amaleka. Kadi Mose, Alona, ne Hû+ bakabanda pa mutu pa mukuna.

11 Pavua Mose ushala ne bianza biende biela muulu, bena Isalele bavua batshimuna; kadi pavuaye anu upuekesha bianza, bena Amaleka bavua batshimuna. 12 Pakanema bianza bia Mose bujitu, bakangata dibue kumutekelabu, yeye kusombapu. Pashishe Alona ne Hû bakakuata bianza biende, eu ku luseke lumue eu ku lukuabu, nunku bianza biende biakashala kabiyi binyunga too ne pakabuela dîba. 13 Nunku Yoshua wakatshimuna Amaleka ne bantu bende ne muele wa mvita.+

14 Ke Yehowa kuambila Mose ne: “Funda bualu ebu mu mukanda bu tshivulukilu* ne ubuambuluile Yoshua ne: ‘Nenjimije Amaleka muinshi mua diulu kashidi, kabakumuvuluka kabidi to.’”+ 15 Pashishe Mose wakasa tshioshelu, kutshibikilaye ne: Yehowa-nisi,* 16 wamba ne: “Bu mudi tshianza tshiende tshiluisha nkuasa wa bukalenge wa Yah,+ Yehowa neikale mu mvita ne Amaleka ku tshipungu ne ku tshipungu.”+

18 Pashishe Yetelo muakuidi wa mu Midiyana, tatuende muenu wa Mose,+ wakumvua lumu lua malu onso avua Nzambi muenzele Mose ne tshisamba tshiende tshia Isalele, muvua Yehowa mupatule bena Isalele mu Ejipitu.+ 2 Yetelo, tatuende muenu wa Mose, uvua muteke Sipola mukaji wa Mose kuende pavuabu bamupingaje kudiye, 3 pamue ne bana bende ba balume babidi.+ Dîna dia muana umue divua Gêshoma,*+ bualu Mose wakamba ne: “Ndi mulue kusomba buenyi mu buloba bua ku babende,” 4 ne dîna dia mukuabu divua Eliezê,* bualu wakamba ne: “Nzambi wa tatu wanyi ke muambuluishi wanyi uvua munsungile ku muele wa mvita wa Palô.”+

5 Nunku, Yetelo tatuende muenu wa Mose, ne bana ba Mose ne mukajende bakaya kudi Mose mu tshipela muvuaye mutudile ku mukuna wa Nzambi mulelela.+ 6 Pashishe wakatumina Mose mukenji ne: “Meme Yetelo tatuebe muenu,+ mmeme au ndua kuudi ne mukajebe ne bana bende babidi.” 7 Diakamue Mose wakapatuka bua kusambakena ne tatuende muenu, yeye kuinama, kumutuaye mishiku. Bobu kusambangana, pashishe kuyabu mu ntenta.

8 Mose wakalondela tatuende muenu malu onso avua Yehowa muenzele Palô ne Ejipitu bua bualu bua bena Isalele,+ ntatu yonso ivua mibafikile mu njila,+ ne muvua Yehowa mubasungile. 9 Yetelo wakasanka bua malu mimpe onso avua Yehowa muenzele bena Isalele pavuaye mubasungile mu Ejipitu.* 10 Ke Yetelo kuamba ne: “Yehowa uvua munusungile mu Ejipitu ne kudi Palô, ne uvua musungile tshisamba tshiende ku bukokeshi bua mu Ejipitu, atumbishibue. 11 Mpindieu ndi mumanye ne: Yehowa mmunene kupita nzambi mikuabu yonso+ bua malu avuaye muenzele bavua bakengesha bantu bende ne diambu.” 12 Pashishe Yetelo tatuende muenu wa Mose wakalua ne mulambu wa kuosha ne milambu mikuabu bua kulambula Nzambi, ne Alona ne bakulu bonso ba mu Isalele bakalua bua kudia biakudia kumpala kua Nzambi mulelela pamue ne tatuende muenu wa Mose.

13 Dituku diakalonda, Mose wakasomba bua kulumbuluisha bantu bu pa tshibidilu, ne bantu bavua anu bimana kumpala kua Mose kumbukila ku dinda too ne ku dilolo. 14 Pakamona tatuende muenu wa Mose bionso bivuaye wenzela bantu, wakamukonka ne: “Tshiudi wenzela bantu nunku ntshinyi? Bua tshinyi udi musombe muaba eu nkayebe, bantu bonso aba bimane kumpala kuebe kumbukila ku dinda too ne ku dilolo?” 15 Mose wakambila tatuende muenu ne: “Bualu bantu badi anu balua kundi bua kuebeja Nzambi malu. 16 Padi tshilumbu tshijuka, badi balua natshi kundi, ne ndi ne bua kutshikosa pankatshi pa muntu ne muntu mukuabu, ne ndi mmanyisha mapangadika a Nzambi mulelela ne mikenji yende.”+

17 Tatuende muenu wa Mose wakamuambila ne: “Tshiudi wenza etshi ki ntshimpe to. 18 Bushuwa, neuditshiokeshe bikole wewe ne bantu badi nebe aba, bualu ebu mbujitu budi bukupite makanda ne kuena mua kubuambula nkayebe to. 19 Mpindieu nteleja. Ndi nkupesha mubelu, ne Nzambi neikale nebe.+ Wewe ikala wimanyina tshisamba kumpala kua Nzambi mulelela,+ ne udi ne bua kuya ne bilumbu kudi Nzambi mulelela.+ 20 Ikala ubaleja tshidi mêyi ne mikandu ne mikenji,+ ubamanyisha njila udibu ne bua kuendela ne mudimu udibu ne bua kuenza. 21 Kadi usungule munkatshi mua tshisamba bantu balume badi bakumbane+ badi batshina Nzambi, balume ba kueyemena badi bakine dipetela bintu mu njila mubi;+ ubateke ku mutu kuabu, aba bamfumu ba bantu tshinunu tshinunu, aba bamfumu ba bantu lukama lukama, aba bamfumu ba bantu makumi atanu makumi atanu, ne bakuabu bamfumu ba bantu dikumi dikumi.+ 22 Bobu bikale balumbuluisha bantu padi bilumbu bijuka,* ne nebalue kuudi ne bilumbu bionso bia bikole,+ kadi bilumbu bionso bia bikese bobu nebabikose. Lekela bakuambuishe bujitu bua udipepejile malu.+ 23 Wewe muenze nunku, ne Nzambi udi ukutumina dîyi bua kuenza nunku, neukokeshe bujitu ebu, ne muntu yonso neapingane kuende ne disanka.”

24 Mose wakumvuila tatuende muenu diakamue, yeye kuenza malu onso avuaye muambe. 25 Mose wakasungula bantu balume bakumbane munkatshi mua Isalele mujima, yeye kubateka bamfumu ku mutu kua bantu, aba bamfumu ba bantu tshinunu tshinunu, aba bamfumu ba bantu lukama lukama, aba bamfumu ba bantu makumi atanu makumi atanu, ne bakuabu bamfumu ba bantu dikumi dikumi. 26 Nunku bavua balumbuluisha bantu pavua bilumbu bijuka. Tshilumbu tshia tshikole bavua baya natshi kudi Mose,+ kadi tshilumbu tshionso tshia tshikese bobu bavua batshikosa. 27 Panyima pa bualu ebu, Mose wakashindikija tatuende muenu,+ yeye kuya mu buloba buabu.

19 Mu ngondo muisatu panyima pa bena Isalele bamane kupatuka mu buloba bua Ejipitu, mu dituku dine adi, bakafika mu tshipela tshia Sinai. 2 Bakumbuka ku Lefidima,+ kufikabu mu tshipela tshia Sinai, bobu kutudila mu tshipela atshi. Isalele wakatudila muaba au kumpala kua mukuna.+

3 Nunku Mose wakabanda kudi Nzambi mulelela, ne Yehowa wakamubikidila ku mukuna,+ wamba ne: “Newambile nzubu wa Yakoba ne newambile bena Isalele nunku: 4 ‘Nuvua badimuene tshimvua muenzele bena Ejipitu+ bua kunuambula pa mapuapua a nyunyi ya mikanku ne kulua nenu kundi.+ 5 Mpindieu nuenu batumikile dîyi dianyi ne muoyo mujima ne balame tshipungidi tshianyi, nenulue bushuwa tshisamba tshianyi tshia pa buatshi* munkatshi mua bisamba bionso,+ bualu buloba bujima mbuanyi.+ 6 Nenuikale kundi bukalenge bua bakuidi ne tshisamba tshia tshijila.’+ Aa ke mêyi audi ne bua kuambila bena Isalele.”

7 Nunku Mose wakaya, kubikidishaye bakulu ba tshisamba ne kubambilaye mêyi onso aa avua Yehowa mumutumine dîyi bua kuamba.+ 8 Panyima pa bualu abu, bantu bonso bakandamuna ne dîyi dimue ne: “Tudi tuitaba bua kuenza malu onso adi Yehowa muambe.”+ Mose wakaya diakamue ne diandamuna dia bantu kudi Yehowa. 9 Nunku Yehowa wakambila Mose ne: “Mona! Ndi ndua kuudi mu ditutu difiike bua bantu bumvue pandi ngakula nebe, ne kabidi bua bikale anu bakuitabuja wewe.” Pashishe Mose wakambila Yehowa mêyi avua bantu bambe.

10 Nunku Yehowa wakambila Mose ne: “Ndaku kudi bantu, ubajidile lelu ne malaba, ne badi ne bua kusukula bilamba biabu. 11 Badi ne bua kuikala badilongolole bua dituku disatu, bualu mu dituku disatu Yehowa neapueke pa mukuna wa Sinai kumpala kua bantu bonso. 12 Udi ne bua kutekela bantu mikalu kumpenga kuawu kuonso ne kubambila ne: ‘Nuamanya! Kanubandi ku mukuna anyi kanulengi ku muelelu kuawu to. Muntu yonso walenga ku mukuna nebamushipe bushuwa. 13 Tshianza nansha tshimue katshimulengi, kadi nebamuase mabue anyi nebamutubulule.* Nansha yeye muikale muntu anyi nyama, kakushala ne muoyo to.’+ Badi mua kubanda ku mukuna anu pumvuabu muadi wa lusengu lua tshimpanga tshia mukoko.”+

14 Pashishe Mose wakumbuka ku mukuna kupuekaye kudi bantu, kubangaye kujidila bantu, ne bakasukula bilamba biabu.+ 15 Wakambila bantu ne: “Dilongololayi bua dituku disatu. Muntu kasangidi ne mukaji to.”*

16 Mu dinda dia dituku disatu, kuvua makubakuba ne mipenyi, ne kuvua ditutu difiike fitutuu+ pa mukuna ne muadi mukole menemene wa mpungi, ne bantu bonso bavua mu tshitudilu bakatuadija kuzakala.+ 17 Nunku Mose wakapatuka ne bantu mu tshitudilu bua kusambakena ne Nzambi mulelela, bobu kuimanyina kuinshi kua mukuna. 18 Mukuna wa Sinai mujima wakafuima muishi bualu Yehowa uvua mupuekapu mu kapia;+ ne muishi wawu uvua ubanda muenze bu muishi wa mfulu, ne mukuna mujima uvua uzakala bikole menemene.+ 19 Pavua muadi wa mpungi wenda ukola anu kukola, Mose wakakula, ne dîyi dia Nzambi mulelela diakamuandamuna.

20 Nunku Yehowa wakapueka pa mukuna wa Sinai, pa lusongo lua mukuna. Pashishe Yehowa wakabikila Mose ku lusongo lua mukuna, ne Mose wakabanda.+ 21 Ke Yehowa kuambila Mose ne: “Pueka ne udimuije bantu bua kabatetshi bua kusambuka mikalu bua kumona Yehowa to, tshianana ba bungi nebafue. 22 Bakuidi batu basemena pabuipi ne Yehowa pa tshibidilu badijidile, bua Yehowa kabakumi.”*+ 23 Ke Mose kuambila Yehowa ne: “Bantu kabena mua kubanda ku mukuna wa Sinai to, bualu wewe ukadi mumane kutudimuija, muambe ne: ‘Ela mikalu kumpenga kua mukuna ne uwujidile.’”+ 24 Kadi Yehowa wakamuambila ne: “Ndaku, pueka, ne upingane wewe ne Alona, kadi kulekedi bakuidi ne bantu bua basambuke mikalu bua kubanda kudi Yehowa, bua kabashipi to.”+ 25 Nunku Mose wakapueka kudi bantu ne kubambilaye.

20 Pashishe Nzambi wakamba mêyi onso adi alonda aa:+

2 “Meme ndi Yehowa Nzambi webe uvua mukupatule mu buloba bua Ejipitu, mu nzubu wa bupika.+ 3 Kuena ne bua kuikala ne nzambi mikuabu pa kumbusha meme* to.+

4 “Kuena ne bua kudienzela lupingu lusonga anyi tshimfuanyi tshia tshintu kayi tshionso tshidi muulu mu diulu anyi panshi pa buloba anyi mu mâyi muinshi mua buloba.+ 5 Kuena ne bua kubinamina anyi kabakusaki bua kubitendelela,+ bualu meme Yehowa Nzambi webe ndi Nzambi udi ulomba bua bandamate anu meme,+ udi ufila dinyoka bua tshilema tshia batatu kudi bana, kudi bantu ba tshipungu tshisatu ne kudi bantu ba tshipungu tshinayi tshia bantu badi bankine, 6 kadi udi uleja dinanga dia lulamatu kudi bantu ba tshipungu tshia tshinunu tshia bantu badi bannange ne batumikila mêyi anyi.+

7 “Kuena ne bua kuangata dîna dia Yehowa Nzambi webe mu mushindu udi kawuyi muakanyine to,+ bualu Yehowa kakupanga kunyoka muntu udi wangata dîna Diende mu mushindu udi kawuyi muakanyine.+

8 “Uvuluke dituku dia Nsabatu bua kudilama dia tshijila.+ 9 Udi ne bua kuenza midimu yebe mikole ne midimu yebe mikuabu yonso mu matuku asambombo,+ 10 kadi dituku dia muanda mutekete ndia nsabatu bua Yehowa Nzambi webe. Kuena ne bua kuenza mudimu nansha umue, wewe anyi muanebe wa balume anyi muanebe wa bakaji, anyi mupika webe mulume anyi mupika webe mukaji, anyi tshimuna tshiebe anyi muntu udi musombe buenyi miaba iudi musombele.*+ 11 Bualu Yehowa uvua muenze diulu ne buloba ne mbuu, ne bintu bionso bidimu mu matuku asambombo, ne wakatuadija kuikisha mu dituku dia muanda mutekete.+ Ke bualu kayi Yehowa uvua mubeneshe dituku dia Nsabatu ne mudivuije dia tshijila.

12 “Nemeka tatuebe ne mamuebe+ bua ulale matuku a bungi mu buloba budi Yehowa Nzambi webe ukupesha.+

13 “Kuena ne bua kushipa muntu.+

14 “Kuena ne bua kuenda masandi.+

15 “Kuena ne bua kuiba.+

16 “Kuena ne bua kujadika malu a dishima paudi ujadika bualu bua mukuebe.+

17 “Kuena ne bua kualakana nzubu wa mukuebe. Kuena ne bua kualakana mukaji wa mukuebe,+ anyi mupika wende mulume, anyi mupika wende mukaji, anyi ngombe wende, anyi mpunda wende, anyi tshintu kayi tshionso tshidi mukuebe natshi.”+

18 Nunku bantu bonso bavua bamona makubakuba ne mipenyi, muadi wa mpungi, ne mukuna ufuima muishi; dimona dia malu aa diakabazakeja, bobu kuimanyina pa bule.+ 19 Ke bobu kuambila Mose ne: “Wewe akula netu, netuteleje, kadi Nzambi kakudi netu to, tshianana netufue.”+ 20 Nunku Mose wakambila bantu ne: “Kanutshinyi to, bualu Nzambi mulelela mmulue kunuteka mu diteta+ bua nutungunuke ne kumutshina bua kanuenji mpekatu to.”+ 21 Nunku bantu bakatungunuka ne kuimanyina pa bule, kadi Mose wakasemena pabuipi ne ditutu difiike, muaba uvua Nzambi mulelela.+

22 Pashishe Yehowa wakambila Mose ne: “Newambile bena Isalele nunku: ‘Nudi badimuene mumvua muakule nenu kumbukila mu diulu.+ 23 Kanuena ne bua kuenza nzambi ya tshiamu tshia arjan bua kuyitendelela pamue nanyi, ne kanuena ne bua kudienzela nzambi ya or to.+ 24 Neungenzele tshioshelu tshia buloba, ne neulambulapu milambu yebe ya kuosha, milambu yebe ya diumvuangana,* mikoko yebe ne ngombe yebe. Muaba wonso ungenza bua bavuluke dîna dianyi,+ nendue kuudi ne nenkubeneshe. 25 Wewe mungenzele tshioshelu tshia mabue, kuena ne bua kutshiasa ne mabue makosa ne biamu to.*+ Bualu wewe mutapapu ne ntapu webe, neutshinyange. 26 Kuena ne bua kubanda pa tshioshelu tshianyi ne tshibandilu bua butaka buebe* kabumuenekipu.’

21 “Aa mmapangadika audi ne bua kubambila:+

2 “Wewe musumbe mupika muena Ebelu,+ neikale mupika bidimu bisambombo, kadi mu tshidimu tshia muanda mutekete neumulekele kayi ufuta tshintu.+ 3 Yeye mulue nkayende, neaye nkayende. Yeye ne mukaji, apu mukajende neaye nende. 4 Mfumuende yeye mumupeshe mukaji ne mukaji au mumulelele bana ba balume anyi bana ba bakaji, mukaji ne bana nebikale ba mfumuende, kadi yeye neaye nkayende.+ 5 Kadi mupika yeye musuminyine wamba ne: ‘Ndi munange mfumuanyi ne mukajanyi ne bana banyi; tshiena musue kupeta budikadidi,’+ 6 mfumuende neaye nende kumpala kua Nzambi mulelela. Nunku neaye nende ku tshiibi anyi ku dibaya dia ku tshiibi; ne mfumuende neamutubule ditshi ne tshintu tshia kutubula natshi tumasoso, ne neashale mupika wende matuku ende onso a muoyo.

7 “Muntu yeye mupane muanende wa bakaji bu mupika, kabakumulekela mushindu udibu balekela mupika mulume to. 8 Mfumuende yeye kayi mumone umusankisha ne kayi umubanjija bu mukajende, kadi wenza bua muntu mukuabu amusumbe,* kena ne bua kumupana kudi bantu ba ku babende to, bualu mmumuenzele bibi. 9 Yeye mumusungule bua muanende wa balume, udi ne bua kumukumbajila bukenji bua muana wa bakaji. 10 Yeye muangate mukaji mukuabu, kabakukepesha biakudia, bilamba, ne malu adibu ne bua kuenzela+ mukaji wa kumpala to. 11 Yeye kayi mumukumbajile malu asatu aa, dîba adi nebamulekele kayi ufuta makuta.

12 “Muntu yeye mukume muntu mukuabu ne muntu au yeye mufue, badi ne bua kumushipa pende.+ 13 Kadi yeye kayi muenze nanku ku bukole ne Nzambi mulelela mulekele bualu ebu buenzeka, nenkuleje muaba udiye mua kunyemena.+ 14 Muntu yeye mukuatshile mukuende tshiji tshikole ne udi umushipa ku bukole,+ muntu au udi ne bua kufua, nansha nuenu ne bua kumuangatshila ku tshioshelu tshianyi.+ 15 Muntu udi ukuma tatuende anyi mamuende badi ne bua kumushipa.+

16 “Muntu yeye mukuate muntu mukuabu ku bukole+ ne mumupane anyi bobu bamusangane mumukuate,+ badi ne bua kumushipa.+

17 “Muntu udi wela tatuende anyi mamuende mulawu* udi ne bua kushipibua.+

18 “Mona tshidi ne bua kuenzeka bantu babidi bobu batandangana, ne umue ututa mukuende dibue anyi mbata,* kadi kayi ufua to, tshibi ushala mu bulalu: 19 Yeye mukokeshe bua kujuka ne muendele ku dikombo pambelu, dîba adi kabakunyoka muntu uvua mumukume to. Neafute anu bua dîba didi muntu udi mutapike au mupange bua kuenza mudimu wende too ne pumvuaye bimpe menemene.

20 “Muntu yeye mukume mupika wende mulume anyi mupika wende mukaji ne mutshi ne udi ufuila ku tshianza tshiende, badi ne bua kumusombuela.+ 21 Kadi yeye mushale ne muoyo dituku dimue anyi abidi, kabena ne bua kumusombuela to, bualu mmuntu musumba ku makuta a mfumuende.

22 “Bantu balume bobu baluangana ne badi badituta kudi mukaji udi ne difu ne udi ulela dîba kadiyi dianji kukumbana,*+ kadi kakuyi njiwu ya lufu,* udi muenze bibi neafute bintu bidi bayende wa mukaji umulomba; neabifutshile ku butuangaji bua balumbuluishi.+ 23 Kadi njiwu ya lufu yoyi mienzeke, dîba adi neufile muoyo ku muoyo,*+ 24 dîsu ku dîsu, dînu ku dînu, tshianza ku tshianza, dikasa ku dikasa,+ 25 dioshangana ku dioshangana, mputa ku mputa, mukumu ku mukumu.

26 “Muntu yeye mukume mupika wende mulume anyi mupika wende mukaji tshintu ku dîsu ne mudishipe, udi ne bua kulekela mupika au aye bua dîsu diende.+ 27 Yeye mutule dînu dia mupika wende mulume anyi dia mupika wende mukaji, udi ne bua kulekela mupika au aye bua dînu diende.

28 “Ngombe yeye mukume muntu mulume anyi muntu mukaji nsengu yende, ne muntu au udi ufua, badi ne bua kushipa ngombe au ne mabue+ ne kabena ne bua kudia munyinyi wende to; kadi kabakunyoka muena ngombe to. 29 Kadi bikala ngombe uvua ne tshibidilu tshia kukumangana nsengu ne bakavua bamanyishe muenaye, kadi kayi mumukuate, yeye mushipe muntu mulume anyi muntu mukaji, nebashipe ngombe au ne mabue, ne nebashipe kabidi muenaye. 30 Bobu bamulombe tshintu tshia kupikula natshi muoyo wende,* udi ne bua kufila bionso biamulombabu bu mushinga wa kupikula nawu muoyo* wende. 31 Nansha ngombe au yeye mukume muana wa balume anyi muana wa bakaji nsengu, nebenzele muena ngombe au bilondeshile dipangadika edi. 32 Ngombe yeye mukume mupika mulume anyi mupika mukaji nsengu, neapeshe mfumu wa mupika au mushinga wa nshekele* 30, kadi nebashipe ngombe ne mabue.

33 “Muntu yeye mubulule tshina anyi mutshiumbule kadi kayi mutshibuikile, ngombe anyi mpunda yeye mukulukamu, 34 muena tshina neafute.+ Neafute muenaye mushinga wa nyama au, ne nyama mufue neikale wende. 35 Ngombe wa muntu yeye mutute ngombe wa muntu mukuabu ne yeye mufue, dîba adi nebapane ngombe udi ne muoyo ne nebabanyangane makuta adibu bamusumbe nawu; nebabanyangane kabidi nyama mufue. 36 Kadi biobi bimanyike ne: ngombe uvua ne tshibidilu tshia kukumangana nsengu, kadi muenaye kayi mumukuate, udi ne bua kufuta ngombe ku ngombe, ne ngombe mufue neikale wende.

22 “Muntu yeye muibe ngombe anyi mukoko ne muwushipe anyi muwupane, neafute ngombe itanu bua ngombe au ne mikoko inayi bua mukoko au.+

2 (“Bobu bakuate muivi+ mu nzubu wa bende, bamukume ne yeye mufue, kakuakuikala dibanza dia mashi buende yeye to. 3 Kadi bualu ebu bobu buenzeke dîba dimane kupatuka, nekuikale dibanza dia mashi buende yeye.)

“Udi ne bua kufuta. Yeye kayi ne tshintu, dîba adi nebamupane bua bintu bivuaye muibe. 4 Bobu basangane tshintu tshivuaye muibe ne muoyo mu bintu biende, nansha tshikale ngombe anyi mpunda anyi mukoko, neatshifute misangu ibidi.

5 “Muntu yeye muye ne nyama yende mu budimi anyi mu budimi bua tumuma tua mvinyo bua kuyidisha, yeye muyilekele idia mu budimi bua muntu mukuabu, neafute bintu bitambe buimpe bia mu budimi buende anyi bintu bitambe buimpe bia mu budimi buende bua tumuma tua mvinyo.

6 “Kapia koku katuadije ne kakuate ku tumitshi tua mêba ne kuoshe bisumbu bia ntete ikadibu bapuole anyi ntete itshidi ku tukolakola anyi budimi, muntu uvua mutemeshe kapia aku udi ne bua kufuta bintu bivua bioshike.

7 “Muntu yeye mupeshe mukuende makuta anyi bintu bua kumulamina, bobu babibile mu nzubu wa mukuende au, muivi udi ne bua kubifuta misangu ibidi bobu bamukuate.+ 8 Bobu kabayi bakuate muivi, badi ne bua kulua ne muena nzubu kumpala kua Nzambi mulelela+ bua kumanya ni uvua muteke tshianza pa bintu bia mukuende. 9 Mu bilumbu bionso bia muntu muikale ne bintu biba, pa bidi bitangila ngombe, mpunda, mukoko, tshilamba, anyi tshintu tshionso tshidi tshijimine tshidiye mua kuambila ne: ‘Etshi ntshianyi!’ bantu bonso babidi nebalue ne tshilumbu tshiabu kumpala kua Nzambi mulelela.+ Muntu udi Nzambi upisha neafute mukuende bintu misangu ibidi.+

10 “Muntu yeye mupeshe mukuende mpunda anyi ngombe anyi mukoko anyi tshimuna kayi tshionso bua kumulamina, tshiotshi tshifue anyi tshipete bulema anyi baye natshi muntu kayi mumone, 11 nebenze mutshipu pankatshi pabu kumpala kua Yehowa ne: kavua muteke tshianza tshiende pa bintu bia mukuende to; muenatshi udi ne bua kuwitaba. Muntu mukuabu au kakufuta tshintu to.+ 12 Kadi bobu bibile nyama au kudiye, neafute muenaye. 13 Bobu bamupandulule kudi nyama wa luonji, nealue nende bua kujadika. Kena ne bua kufuta tshintu tshidibu bapandulule kudi nyama wa luonji to.

14 “Kadi muntu yeye mulombe bua kusomba mukuende nyama, ne nyama au yeye mupete bulema anyi mufue padi muena nyama kayi ne nyama wende, muntu uvua mumusombe udi ne bua kufuta. 15 Muena nyama yeye muikale ne nyama wende, kakufuta to. Bobu bamusombe ku makuta, makuta avuabu bamusombe nawu au ke difutu.

16 “Kadi muntu yeye muambishe nsongakaji utshidi kamama udibu kabayi banji kubangila ne mulala nende, udi ne bua kumufidila biuma bua alue mukajende.+ 17 Tatuende yeye mubenge ne muoyo mujima bua kumufila kudiye, neafile makuta makumbane mushinga wa biuma.

18 “Kuena ne bua kushiya mukaji muena buloji ne muoyo to.+

19 “Muntu yonso udi ulala ne nyama badi ne bua kumushipa kakuyi mpata.+

20 “Muntu yonso udi ulambula nzambi mikuabu milambu pamutu pa kuyilambula Yehowa nkayende udi ne bua kubutudibua.+

21 “Kuena ne bua kukengesha muntu udi musombe buenyi anyi kumusubisha to,+ bualu nuvua basombe buenyi mu buloba bua Ejipitu.+

22 “Kanuena ne bua kukengesha mukaji mukamba anyi muana udi kayi ne tatuende to.*+ 23 Wewe mumukengeshe nansha kakese ne yeye mudile kundi, tshiakupanga kumvua muadi wende to;+ 24 tshiji tshianyi netshiteme, nennushipe ne muele wa mvita, ne bakaji benu nebashale bakamba, ne bana benu nebashale bana ba nshiya.

25 “Wewe musombeshe mupele* wa mu tshisamba tshianyi, muntu udi musombe nenu makuta, kuena ne bua kuikala kudiye bu musombeshanganyi wa makuta to. Kuena ne bua kumulomba tshia kasombela to.+

26 “Wewe mukuate tshilamba tshia mukuebe bu tshieya tshia tshintu tshisomba,*+ udi ne bua kumupingajilatshi padi dîba dibuela. 27 Bualu ke tshiende tshia kudibuikila, tshilamba tshiende tshia kubuikila mubidi* wende; nealadile mu tshinyi?+ Yeye mudile kundi, tshiakupanga kumvua to, bualu ndi nditeka pa muaba wa bakuabu.*+

28 “Kuena ne bua kuela Nzambi mulawu*+ anyi kuela mfumu* wa mu tshisamba tshienu mulawu to.+

29 “Kuena ne bua kuelakana bua kufila milambu ya mu bia pa madimi biebe bia bungi ne ya bintu bia mu bikaminu* biebe bidi biyila too ne panshi.+ Neumpeshe muanabute wa ku bana bebe ba balume.+ 30 Mona tshiudi ne bua kuenza ne ngombe webe ne mukoko webe:+ neashale kudi mamuende matuku muanda mutekete. Mu dituku dia muanda mukulu neumumpeshe.+

31 “Nudi ne bua kuleja munudi bantu ba tshijila kundi;+ kanuena ne bua kudia munyinyi wa tshintu kayi tshionso tshidibu bapandulule kudi nyama wa luonji mu mpata to.+ Nudi ne bua kuwelela mbua.

23 “Kuena ne bua kumuangalaja* lumu ludi kaluyi lulelela to.+ Kuambuluishi muntu mubi pa kulua ntemu udi ujinga bua kuenzelangana bibi.+ 2 Kuena ne bua kulonda tshisumbu tshia bantu bua kuenza bualu bubi, ne kuena ne bua kukonyangaja buakane pa kufila bujadiki kampanda bua kuya mudi tshisumbu tshia bantu tshiya.* 3 Kuena ne bua kuikala ne kansungansunga mu tshilumbu tshia muntu mupele.+

4 “Wewe musambakene ne ngombe anyi ne mpunda wa muena lukuna webe mupambuke, udi ne bua kumupingaja kudiye.+ 5 Wewe mumone ne: mpunda wa muntu udi mukukine mmudishinde ne bujitu, kumupitshi wewe kuya to. Udi ne bua kumuambuluisha bua kumbusha nyama bujitu.+

6 “Kuena ne bua kukonyangaja dilumbuluisha dia mupele udi munkatshi muenu padiye ne tshilumbu to.+

7 “Kubuelakanyi mu difundangana ne bualu* bua dishima, ne kushipi muntu udi kayi ne bualu ne muntu muakane, bualu tshiakuamba muntu mubi ne: mmuakane to.*+

8 “Kuena ne bua kuitaba dikosa mishiku, bualu dikosa mishiku didi difofomija bantu ba meji ne didi mua kukonyangaja mêyi a bantu bakane.+

9 “Kuena ne bua kukengesha muntu udi musombe buenyi to. Nudi bamanye mutu muntu wa ku babende udiumvua,* bualu nuvua basombe buenyi mu buloba bua Ejipitu.+

10 “Mu bidimu bisambombo neukune mamiinu mu buloba buebe ne neupuole bia pa madimi.+ 11 Kadi mu tshidimu tshia muanda mutekete udi ne bua kubulekela kabuyi budima ne neubushiye tshilala,* ne bapele ba mu tshisamba tshienu nebadie bintu bia muomu, ne bidibu bobu bashiya, nyama ya tshisuku neyibidie. Ke tshiudi ne bua kuenza ne budimi buebe bua tumuma tua mvinyo ne budimi buebe bua mitshi ya olive.

12 “Newenze mudimu webe matuku asambombo; kadi dituku dia muanda mutekete newimanyike mudimu webe mukole, bua ngombe webe ne mpunda webe bikishe ne bua muana wa mupika webe mukaji ne muntu udi musombe buenyi bapetulule bukole.+

13 “Nudi ne bua kudimuka bua kuenza malu onso andi munuambile;+ ne kanuena ne bua kutela mêna a nzambi mikuabu; kabaumvu ku mishiku* yebe to.+

14 “Neungenzele tshibilu misangu isatu ku tshidimu.+ 15 Newenze Tshibilu tshia Mampa kaayi mela Luevene.+ Neudie mampa kaayi mela luevene matuku muanda mutekete pakumbana tshikondo mu ngondo wa Abiba,*+ anu mundi mukutumine dîyi bua kuenza, bualu tshikondo atshi ke tshiuvua mupatuke mu Ejipitu. Muntu nansha umue kena ne bua kumueneka kumpala kuanyi bianza bitupu to.+ 16 Newenze kabidi Tshibilu tshia Dinowa* dia bintu bidi bikola bia kumpala bia ku midimu yebe mikole, bia ku bintu biuvua mukune mu budimi;+ ne Tshibilu tshia Disangisha bia pa madimi* ku ndekelu kua tshidimu, pawasangisha bia pa madimi bia ku midimu yebe mikole.+ 17 Bantu balume bebe bonso nebamueneke kumpala kua Mukalenge mulelela Yehowa misangu isatu ku tshidimu.+

18 “Kuena ne bua kufila mashi a mulambu wanyi pamue ne tshintu tshiela luevene to. Milambu ya mafuta a nyama iudi ufila mu bibilu bianyi kayena ne bua kushala butuku bujima too ne mu dinda.

19 “Udi ne bua kulua ne bintu bitambe buimpe bia ku bintu bidi bikola bia kumpala bia mu budimi buebe ku nzubu wa Yehowa Nzambi webe.+

“Kuena ne bua kulambila kana ka mbuji mu mabele a mamuaku to.+

20 “Ndi ntuma muanjelu kumpala kuebe+ bua kukulama mu njila ne kuya nebe muaba undi mulongolole.+ 21 Udimuke bua bualu buende ne utumikile dîyi diende. Kumutombokedi to, bualu kakubuikidila dishipa dienu dia mikenji,+ bualu dîna dianyi didi munda muende. 22 Kadi wewe mutumikile dîyi diende ne muoyo mujima ne muenze bionso bindi ngamba, nengikale lukuna ne bena lukuna bebe, ne nenduishe badi bakuluisha. 23 Bualu muanjelu wanyi neaye kumpala kuebe ne neaye nebe kudi bena Amole, bena Hiti, bena Pelizi, bena Kanâna, bena Hiwi ne bena Yebuse, ne nembabutule.+ 24 Kuena ne bua kuinamina nzambi yabu, anyi kabakuitabijiji bua kuyitendelela to, ne kuena ne bua kuidikija bilele biabu to.+ Kadi udi ne bua kuyibutula ne kusunsula makunji abu a tshijila.+ 25 Nudi ne bua kutendelela Yehowa Nzambi wenu,+ ne yeye neabeneshe biakudia bienu ne mâyi enu.+ Nengumbushe masama munkatshi muenu.+ 26 Bakaji ba mu buloba buenu kabakuikala batula mafu anyi kabakuikala bankumba to,+ ne nengenze bua ulale uboboke.*

27 “Nentume ditshina dianyi kumpala kuebe,+ ne nembueje bisamba bionso biwasambakena nabi mu kayumbayumba, ne nengenze bua utshimune bena lukuna bebe bonso ne bua banyeme kumpala kuebe.*+ 28 Nentume ditekeshibua mu mikolo* kumpala kuebe,+ ne nedinyemeshe bena Hiwi, bena Kanâna ne bena Hiti kumpala kuebe.+ 29 Tshiakubipata kumpala kuebe mu tshidimu tshimue, bua buloba kabushadi munda mutupu ne nyama ya luonji kayivudianganyi bua kukuluisha.+ 30 Nembipate kumpala kuebe ku kakese ku kakese too ne pawavulangana ne pawakuata buloba buonso.+

31 “Nenteke mikalu yebe kumbukila ku Mbuu Mukunze too ne ku mbuu wa bena Peleshete, ne kumbukila ku tshipela too ne ku Musulu;*+ bualu nemfile bena mu buloba mu bianza bienu ne neubipate kumpala kuebe.+ 32 Kuena ne bua kudia nabu tshipungidi anyi kutshidia ne nzambi yabu to.+ 33 Kabena ne bua kusomba mu buloba buenu, bua kabakufikishi ku dingenzela mpekatu. Wewe mutendelele nzambi yabu, bualu abu nebulue bushuwa buteyi kuudi.”+

24 Pashishe wakambila Mose ne: “Banda kudi Yehowa, wewe ne Alona, Nadaba ne Abihu,+ ne bakulu ba bena Isalele 70, ne nuinamine ku bule. 2 Mose udi ne bua kusemena nkayende kudi Yehowa; kadi bakuabu abu kabasemenyi to, ne bantu kababandi nende to.”+

3 Pashishe Mose wakalua, kuambilaye bantu mêyi onso a Yehowa ne mapangadika ende onso;+ bantu bonso bakandamuna ne dîyi dimue ne: “Tudi tuitaba bua kuenza mêyi onso adi Yehowa muambe.”+ 4 Nunku Mose wakafunda mêyi onso a Yehowa.+ Pashishe wakajuka pa dinda menemene, kuasaye tshioshelu kuinshi kua mukuna, ne makunji 12 bilondeshile bisa 12 bia Isalele. 5 Pashishe wakatuma bansongalume bena Isalele, bobu kufila milambu ya kuosha, ne kulambulabu Yehowa ngombe bu milambu ya diumvuangana.+ 6 Pashishe Mose wakangata tshitupa tshia mashi kutshielaye mu bibakudi, ne wakamiamina tshitupa tshikuabu tshia mashi pa tshioshelu. 7 Pashishe wakangata mukanda wa tshipungidi, kuwubadilaye bantu ne dîyi dikole.+ Ke bobu kuamba ne: “Tudi tuitaba bua kuenza bionso bidi Yehowa muambe, ne netutumikile.”+ 8 Nunku Mose wakangata mashi, kuamiaminaye bantu,+ kuambaye ne: “Aa mmashi a tshipungidi tshidi Yehowa mudie nenu mu diumvuangana ne mêyi onso aa.”+

9 Mose ne Alona, Nadaba ne Abihu, ne bakulu ba bena Isalele 70 bakabanda, 10 ne bakamona Nzambi wa Isalele.+ Muinshi mua makasa ende muvua tshintu tshienze bu mabue a safire malamika panshi, ne tshivua tshikezuke anu bu diulu dine.+ 11 Yeye kakenzela bantu banene ba bena Isalele abu bibi to,+ ne bakamona tshikena kumona tshia Nzambi mulelela, bakadia ne bakanua.

12 Nunku Yehowa wakambila Mose ne: “Banda kundi ku mukuna ne ushalaku. Nenkupeshe mabue mikale ne mikenji ne mêyi bingafunda bua kubalongesha.”+ 13 Nunku Mose wakajuka ne Yoshua muambuluishi wende,+ ne Mose wakabanda ku mukuna wa Nzambi mulelela.+ 14 Kadi wakambila bakulu ne: “Tuindilayi muaba eu too ne patuapingana kunudi.+ Alona ne Hû badi nenu.+ Muntu yonso udi ne tshilumbu udi mua kuya kudibu.”+ 15 Nunku Mose wakabanda ku mukuna pavua ditutu diwubuikile.+

16 Butumbi bua Yehowa+ buakashala pa mukuna wa Sinai,+ ne ditutu diakawubuikila matuku asambombo. Mu dituku dia muanda mutekete wakabikidila Mose munda mua ditutu. 17 Bua bena Isalele bavua batangila, tshimuenekelu tshia butumbi bua Yehowa tshivua anu bu kapia kadi kabutula kikale ku mutu kua mukuna. 18 Pashishe Mose wakabuela mu ditutu, kubandaye ku mukuna.+ Mose wakashala ku mukuna matuku 40 munya ne butuku.+

25 Pashishe Yehowa wakambila Mose ne: 2 “Ambila bena Isalele bansangishile bintu; nunsangishile bintu kudi muntu yonso udi muoyo wende umusaka bua kufila.+ 3 Bintu binudi mua kuangata kudibu mbiobi ebi: or,+ arjan,+ tshiamu tshia mitaku,+ 4 buanda bua dikala dia ble, miosa mikunzubile ya mikoko,* buanda bukunze kunzuu,* line muimpe menemene, miosa ya mbuji,  5 biseba bia bimpanga bia mikoko bikunjija, biseba bia nyama ya nkonga, mabaya a mutshi wa musese,+ 6 mafuta a kuela mu miendu,+ mafuta a mutshi wa bome bua kuenza manyi+ a kuelangana ne bua kuenza musenga wa manananshi wa mupuya muimpe,+ 7 ne mabue a onikse ne mabue makuabu a kuasa pa efoda+ ne pa tshilamba tshia pa tshiadi.+ 8 Nebangenzele muaba munsantu, ne nensombe* munkatshi muabu.+ 9 Nenumuenze, ntenta wa tshitendelelu ne bintu bionso bia muomu, bilondeshile anu mushindu* undi nkuleja.+

10 “Nebenze mushete ne mabaya a mutshi wa musese muikale ne nkubita* ibidi ne tshitupa mu bule, nkubita umue ne tshitupa mu butshiama, ne nkubita umue ne tshitupa mu butumbuke.+ 11 Pashishe, neuwulamike or muimpe menemene.+ Neuwulamike munda ne pambelu, ne neuwunyungulule ne muelelu* wa or.+ 12 Neuwenzele bikanu bia or binayi ne neubiase ku mutu kua mikolo yawu inayi, bikanu bibidi ku luseke lumue ne bikuabu bibidi ku luseke lukuabu. 13 Newenze mikamba ne mutshi wa musese ne neuyilamike or.+ 14 Neubueje mikamba ayi mu bikanu bidi ku nseke ya Mushete bua bikale bambuilaku Mushete. 15 Mikamba neyishale mu bikanu bia ku Mushete; kabena ne bua kuyumbushaku to.+ 16 Neuteke Bujadiki bungakupesha mu Mushete au.+

17 “Newenze tshibuikidiji tshia or muimpe menemene tshikale nkubita ibidi ne tshitupa mu bule ne nkubita umue ne tshitupa mu butshiama.+ 18 Newenze bakeluba babidi ne or; neubenze ne or mufula ku ntengu ibidi ya tshibuikidiji.+ 19 Wenze bakeluba ku ntengu ibidi ya tshibuikidiji, mukeluba umue ku ditengu dia luseke lumue ne mukuabu ku ditengu dia luseke lukuabu. 20 Bakeluba abu badi ne bua kubalula mapuapua abu abidi matangija muulu, babuikile tshibuikidiji ne mapuapua abu,+ ne badi ne bua kuikala batangilangane. Mpala ya bakeluba yikale mitangija pa tshibuikidiji. 21 Neuteke tshibuikidiji+ pa Mushete, ne mu Mushete amu neutekamu Bujadiki bungakupesha. 22 Nendileje kuudi muaba au ne nengakuile nebe pa mutu pa tshibuikidiji.+ Nenkumanyishile mêyi onso angakutumina dîyi bua kuenza bua bena Isalele munkatshi mua bakeluba babidi badi pa mutu pa mushete wa Bujadiki.

23 “Newenze kabidi mêsa+ ne mabaya a mutshi wa musese mikale ne nkubita ibidi mu bule, nkubita umue mu butshiama, ne nkubita umue ne tshitupa mu bule bua muulu.+ 24 Neualamike or muimpe menemene ne neuanyungulule ne muelelu* wa or. 25 Newenze mubangubangu muanyunguluke wa bunene bua tshianza* ne muelelu* wa or ku mubangubangu au. 26 Neuenzele bikanu binayi bia or ne newase bikanu abi ku matumba anayi miaba idibu bashile mikolo inayi. 27 Bikanu bidi ne bua kuikala pabuipi ne mubangubangu bua kuikalabi bikuata mikamba ya kuambula nayi mêsa. 28 Newenze mikamba ne mutshi wa musese, neuyilamike or bua kuambula nayi mêsa.

29 “Newenze kabidi malongo awu, makopo awu, mbidika yawu, ne bibakudi bia kupongolola nabi milambu ya bia kunua. Neubienze ne or muimpe menemene.+ 30 Newikale uteka mampa a dileja pa mêsa kumpala kuanyi misangu yonso.+

31 “Newenze tshitekelu tshia miendu+ tshia or muimpe menemene. Tshitekelu tshia miendu etshi tshidi ne bua kuikala tshia or mufula. Tshitaku tshiatshi, mulamba watshi, matamba atshi, tuntaku tuatshi tua bilongo, bilongo biatshi bitshidi bivungamane ne bilongo biatshi bikadi bikanguke nebikale tshipese tshimue tshijima.+ 32 Tshitekelu tshia miendu netshikale ne matamba asambombo mu nseke yatshi, matamba asatu mu luseke lumue, matamba asatu mu luseke lukuabu. 33 Ku ditamba dionso dia luseke lumue nekuikale tuntaku tusatu tua bilongo tuenza bu mudi bilongo bia mutshi wa amande ne bilongo bitshidi bivungamane ne bilongo bikadi bikanguke bienda bishintakanangana; ne ku ditamba dionso dia luseke lukuabu nekuikale tuntaku tusatu tua bilongo tuenza bu mudi bilongo bia mutshi wa amande ne bilongo bitshidi bivungamane ne bilongo bikadi bikanguke bienda bishintakanangana. Ke muikala matamba asambombo adi apatuka ku mulamba wa tshitekelu tshia miendu nanku. 34 Ku mulamba wa tshitekelu tshia miendu nekuikale tuntaku tunayi tua bilongo tuenza bu mudi bilongo bia mutshi wa amande, ne bilongo bitshidi bivungamane ne bilongo bikadi bikanguke bienda bishintakanangana. 35 Tshilongo tshitshidi tshivungamane netshikale muinshi mua matamba abidi a kumpala adi apatuka ku mulamba, ne tshilongo tshitshidi tshivungamane muinshi mua matamba abidi adi alonda, ne tshilongo tshitshidi tshivungamane muinshi mua matamba makuabu abidi adi alonda, bua matamba asambombo adi apatuka ku mulamba. 36 Bilongo bitshidi bivungamane ne matamba ne tshitekelu tshia miendu tshionso bidi ne bua kuikala tshipese tshimue tshijima tshia or muimpe menemene, or mufula.+ 37 Neutshienzele miendu muanda mutekete, ne padi miendu itema, neyikenkeshe tshitupa tshionso tshidi kumpala kuatshi.+ 38 Tushola tuatshi tua kukoka natu mikaba ya miendu* ne bintu biatshi bia kuambuila kapia mbia kuenza ne or muimpe menemene.+ 39 Tshiotshi pamue ne bintu ebi mbia kuenza ne ntalanta* mujima wa or muimpe menemene. 40 Udimuke bua ubienze bilondeshile mushindu wabi* uvuabu bakuleje ku mukuna.+

26 “Newenze ntenta wa tshitendelelu+ ne bilamba bia ntenta dikumi bienza ne buanda buluka bua line muimpe menemene, ne buanda bua dikala dia ble, ne miosa mikunzubile ya mikoko, ne buanda bukunze kunzuu. Neuzolapu bimfuanyi bia bakeluba+ ne buanda.+ 2 Tshilamba tshia ntenta tshionso netshikale ne nkubita* 28 mu bule ne nkubita inayi mu butshiama. Bilamba bia ntenta bionso bidi ne bua kuikala bunene bumue.+ 3 Bilamba bia ntenta bitanu mbia kulamakaja tshimue ku tshikuabu bua kuenza tshitupa tshimue, ne bilamba bikuabu bia ntenta bitanu mbia kulamakaja bua kuenza tshitupa tshikuabu. 4 Newenze makoshi ne buanda bua dikala dia ble ku muelelu kua tshilamba tshia ntenta tshimue tshidi ku ndekelu kua tshitupa tshimue, ne newenze kabidi bia muomumue ku muelelu wa ku ndekelu kua tshitupa tshikuabu muaba wabilamakajilabu. 5 Newenze makoshi 50 ku tshilamba tshia ntenta tshimue ne makoshi 50 ku muelelu kua tshilamba tshia ntenta tshikuabu bua bituangane muaba wa kubilamakajilabu. 6 Newenze tukanu tua kukanga natu 50 tua or, neulamakaje natu bilamba bia ntenta, ne ntenta wa tshitendelelu nealue tshintu tshimue.+

7 “Newenze kabidi bilamba ne miosa ya mbuji+ bua ntenta wa kubuikila pa mutu pa ntenta wa tshitendelelu. Newenze bilamba bia ntenta 11.+ 8 Tshilamba tshia ntenta tshionso netshikale ne nkubita 30 mu bule ne nkubita inayi mu butshiama. Bilamba bia ntenta bionso 11 bidi ne bua kuikala bunene bumue. 9 Neulamakaje bilamba bia ntenta bitanu kaba kamue, ne neulamakaje kabidi bilamba bia ntenta bikuabu bisambombo kaba kamue, ne neubunye tshilamba tshisambombo tshia ntenta kumpala kua ntenta. 10 Newenze makoshi 50 ku muelelu kua tshilamba tshia ntenta tshimue tshidi ku ndekelu kua tshitupa tshimue, ne makoshi 50 ku muelelu kua tshilamba tshia ntenta muaba mukuabu wa kubilamakajilabu. 11 Newenze tukanu tua kukanga natu 50 tua tshiamu tshia mitaku, neupayike tukanu atu mu makoshi, ne neulamakaje ntenta pamue, ne nealue tshintu tshimue. 12 Tshitupa tshia bilamba bia ntenta tshidi tshishala netshikale tshia kulembeleja. Tshia bibidi tshia tshilamba tshia ntenta tshidi tshishala netshilembelele panyima pa ntenta wa tshitendelelu. 13 Bilamba bia ku ntenta bidi bishale bipite bule nebikale bia kulembeleja ku ntenta wa tshitendelelu bule bua nkubita umue ku luseke luonso bua kumubuikila.

14 “Newenze kabidi tshibuikilu tshia ntenta ne biseba bikunjija bia bimpanga bia mikoko ne pa mutu patshi tshibuikilu tshia biseba bia nyama ya nkonga.+

15 “Newenze nyunguluilu+ ya ntenta wa tshitendelelu ne mabaya a mutshi wa musese mimanyika kuulu.+ 16 Nyunguluilu yonso udi ne bua kuikala ne nkubita dikumi mu bule ne nkubita umue ne tshitupa mu butshiama. 17 Nyunguluilu yonso udi ne tupayikilu* tubidi tulamakaja kamue ku kakuabu. Ke muwenza nyunguluilu yonso ya ntenta wa tshitendelelu. 18 Newenze nyunguluilu 20 bua luseke lua ku sud lua ntenta wa tshitendelelu, ludi lutangile ku sud.

19 “Newenze ntaku 40 ya tshiamu tshia arjan mikale ne masoso+ muinshi mua nyunguluilu 20: ntaku ibidi mikale ne masoso muinshi mua nyunguluilu wa kumpala bua tupayikilu tuende tubidi ne ntaku ibidi mikale ne masoso muinshi mua nyunguluilu yonso udi ulonda bua tupayikilu tuende tubidi.+ 20 Bua luseke lukuabu lua ntenta wa tshitendelelu, luseke lua ku nord, wenze nyunguluilu 20, 21 ne ntaku yayi 40 ya tshiamu tshia arjan mikale ne masoso, ntaku ibidi mikale ne masoso muinshi mua nyunguluilu umue ne ntaku ibidi mikale ne masoso muinshi mua nyunguluilu yonso udi ulonda. 22 Bua luseke lua panyima lua ntenta wa tshitendelelu lua ku ouest, newenze nyunguluilu isambombo.+ 23 Newenze nyunguluilu ibidi bua yikale bu bipanda bibidi bia mu matumba a panyima pa ntenta wa tshitendelelu. 24 Neyikale milamakaja ibidi kumbukila kuinshi too ne kuulu, too ne muaba udi tshikanu tshia kumpala. Newenze nunku bua yonso ibidi, ne neyikale bipanda bibidi bia mu matumba. 25 Nekuikale nyunguluilu muanda mukulu ne ntaku yayi 16 ya tshiamu tshia arjan mikale ne masoso, ntaku ibidi mikale ne masoso muinshi mua nyunguluilu wa kumpala ne ntaku ibidi mikale ne masoso muinshi mua nyunguluilu yonso udi ulonda.

26 “Newenze mikamba ne mutshi wa musese, itanu bua nyunguluilu ya luseke lumue lua ntenta wa tshitendelelu,+ 27 ne mikamba itanu bua nyunguluilu ya luseke lukuabu lua ntenta wa tshitendelelu, ne mikamba itanu bua nyunguluilu ya luseke lua ku ouest lua ntenta wa tshitendelelu, bua luseke lua panyima. 28 Mukamba wa pankatshi udi upitshila pankatshi pa nyunguluilu newumbukile ku ditengu dimue too ne ku dikuabu.

29 “Neulamike or ku nyunguluilu ayi,+ ne newenze bikanu biayi ne or bua kubuejamu mikamba, ne neulamike or ku mikamba ayi. 30 Udi ne bua kuasa ntenta wa tshitendelelu bilondeshile tshimfuanyi tshiende tshivuabu bakuleje ku mukuna.+

31 “Newenze tshilamba tshia kukosolola natshi+ ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene. Neuzolapu bakeluba ne buanda. 32 Neutshilembeleje ku makunji anayi a mutshi wa musese malamika or. Ndobo yawu neyikale ya or. Makunji neikale mimanyika pa ntaku inayi ya tshiamu tshia arjan mikale ne masoso. 33 Neulembeleje tshilamba tshia kukosolola natshi muinshi mua tukanu tua kukanga natu ne neubueje mushete wa Bujadiki+ munda, panyima pa tshilamba tshia kukosolola natshi. Tshilamba etshi netshinukosoluele Muaba wa Tshijila+ ne Muaba Mutambe Tshijila.+ 34 Udi ne bua kuteka tshibuikidiji pa mushete wa Bujadiki mu Muaba Mutambe Tshijila.

35 “Neuteke mêsa pambelu pa tshilamba tshia kukosolola natshi, neuteke tshitekelu tshia miendu+ luseke lua ku sud lua ntenta wa tshitendelelu tshitangilangane ne mêsa; ne neuteke mêsa luseke lua ku nord. 36 Newenze tshilamba tshia ku tshibuelelu tshia ntenta ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene biluka pamue.+ 37 Newenze makunji atanu a mutshi wa musese bua tshilamba tshia ku tshibuelelu ne neualamike or. Ndobo yawu neyikale ya or, ne neuenzele ntaku itanu ya tshiamu tshia mitaku mikale ne masoso.

27 “Newenze tshioshelu ne mabaya a mutshi wa musese;+ netshikale nkubita* itanu mu bule ne nkubita itanu mu butshiama. Tshioshelu netshikale ne nseke inayi ya bule bumue ne nkubita isatu mu butumbuke.+ 2 Newenze nsengu+ pa matumba atshi anayi; nsengu neyikale mienzela ku tshioshelu, ne neulamike tshiamu tshia mitaku ku tshioshelu.+ 3 Newenze mbeketshi ya kuboya nayi butu* buatshi, pamue ne bikasu, ne bibakudi, ne nsomo ne bintu bia kuambuila kapia, ne newenze bintu biatshi bionso ne tshiamu tshia mitaku.+ 4 Newenzele tshioshelu kakanu kaluka ne nkanu ya tshiamu tshia mitaku, ne bikanu binayi bia tshiamu tshia mitaku ku matumba anayi a kakanu aku. 5 Neukateke muinshi mua mubangubangu wa tshioshelu, ne kakanu nekapatukile lua pankatshi mu tshioshelu. 6 Newenzele tshioshelu mikamba ya mutshi wa musese, ne neuyilamike tshiamu tshia mitaku. 7 Mikamba neyikale ya kubueja mu bikanu bua mikamba yikale mu nseke ibidi ya tshioshelu padibu batshiambula.+ 8 Newenze tshioshelu tshikale bu mushete wa mabaya mutubuluke. Ntshia kuenza anu muvuaye Yeye mukuleje ku mukuna.+

9 “Newenze lupangu+ lua ntenta wa tshitendelelu. Bua luseke lua ku sud, ludi lutangile ku sud, lupangu neluikale lua bilamba bilembeleja bienza ne buanda buluka bua line muimpe menemene, luseke elu neluikale ne bule bua nkubita lukama.+ 10 Neluikale ne makunji 20 ne ntaku 20 ya tshiamu tshia mitaku mikale ne masoso. Ndobo ya ku makunji ne bikuatakajilu* biawu mbia kuenza ne tshiamu tshia arjan. 11 Bilamba bilembeleja ku luseke lua ku nord nebikale pabi ne nkubita lukama mu bule, pamue ne makunji 20 ne ntaku yawu ya tshiamu tshia mitaku 20 mikale ne masoso, ne ndobo ya tshiamu tshia arjan ne bikuatakajilu* bua makunji. 12 Luseke lua ku ouest neluikale ne bilamba bilembeleja mu butshiama bua lupangu bule bua nkubita 50, ne makunji dikumi ne ntaku dikumi mikale ne masoso. 13 Butshiama bua lupangu ku luseke lua est lua kudi dîba dipatukila budi bua nkubita 50. 14 Nekuikale bilamba bilembeleja bule bua nkubita 15 luseke lumue, ne makunji asatu ne ntaku isatu mikale ne masoso.+ 15 Bua luseke lukuabu, nekuikale bilamba bilembeleja bule bua nkubita 15, ne makunji asatu ne ntaku isatu mikale ne masoso.

16 “Tshibuelelu tshia lupangu netshikale ne tshilamba tshia bule bua nkubita 20 tshienza ne buanda bua dikala dia ble ne miosa mikunzubile ya mikoko ne buanda bukunze kunzuu ne buanda buluka bua line muimpe menemene biluka pamue,+ ne makunji anayi ne ntaku yawu inayi mikale ne masoso.+ 17 Makunji onso adi manyunguluke lupangu neikale ne bisuikidi bia tshiamu tshia arjan ne ndobo ya tshiamu tshia arjan, kadi ntaku yawu mikale ne masoso neyikale ya tshiamu tshia mitaku.+ 18 Lupangu neluikale bule bua nkubita lukama,+ butshiama bua nkubita 50, ne butumbuke bua nkubita itanu, luenza ne bilamba bilembeleja bia buanda buluka bua line muimpe menemene, ne neluikale ne ntaku ya tshiamu tshia mitaku mikale ne masoso. 19 Malongo onso ne bintu bia kuenza nabi mudimu mu ntenta wa tshitendelelu, pamue ne mpopo yende, ne mpopo yonso ya lupangu bidi ne bua kuikala bia tshiamu tshia mitaku.+

20 “Udi ne bua kutumina bena Isalele dîyi bua bakutuadile mafuta matambe buimpe a olive idibu batue, bua kutokesha, bua miendu yikale yitema misangu yonso.+ 21 Mu ntenta wa kusambakena, pambelu pa tshilamba tshia kukosolola natshi tshidi pabuipi ne Bujadiki,+ Alona ne bana bende ba balume nebenze bua miendu yishale mitemesha kumpala kua Yehowa+ kumbukila ku dilolo too ne mu dinda. Eu mmukenji mufunda udi bena Isalele ne bua kutungunuka ne kutumikila mu bipungu biabu bionso.+

28 “Udi ne bua kubikila muanenu Alona munkatshi mua bena Isalele, pamue ne bana bende ba balume, bua angenzele mudimu wa buakuidi,+ Alona+ pamue ne Nadaba ne Abihu,+ Eleazâ ne Itamâ,+ bana ba Alona.+ 2 Newenzele muanenu Alona bilamba bia tshijila, bua butumbi ne bulengele.+ 3 Newakule ne bantu bonso badi bapiluke,* bandi muwuje ne nyuma wa meji,+ ne bobu nebenzele Alona bilamba bua dijidibua diende, bua angenzele mudimu wa buakuidi.

4 “Bilamba bidibu ne bua kuenza mbiobi ebi: tshilamba tshia pa tshiadi,+ efoda,+ muzabi wa kawuyi maboko,+ muzabi wa tuzubu tuzubu, tshilamba tshia kujingila ku mutu,+ ne mukaba wa tshilamba;+ nebenze bilamba bia tshijila ebi bua muanenu Alona ne bana bende ba balume, bua angenzele mudimu wa buakuidi. 5 Bena mudimu bapiluke abu nebabienze ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne line muimpe menemene.

6 “Nebenze efoda ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene, ne badi ne bua kumulengeja ne manda.+ 7 Efoda udi ne bua kuikala ne bitupa bibidi bia pa makaya bilamakajila ku mielelu yabi ibidi ya kuulu. 8 Mukaba muluka,*+ udi mutelela ku efoda bua kumulama musuika kaba kende, udi ne bua kuenjibua ne bintu bia muomumue: ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu ne buanda buluka bua line muimpe menemene.

9 “Newangate mabue a onikse abidi+ ne newondolapu mêna a bana ba Isalele,+ 10 mêna asambombo pa dibue dimue ne mêna asambombo adi mashale pa dibue dikuabu, bilondeshile mudibu balondangane ku diledibua diabu. 11 Muondodi wa pa mabue neondole mêna a bana ba Isalele pa mabue abidi au anu mudiye mua kuondola tshitampi.+ Pashishe neueleshe mu nyunguluilu ya or. 12 Neuteke mabue abidi au pa bilamba bia pa makaya bia efoda bua ikale mabue a tshivulukilu bua bana ba Isalele,+ ne Alona udi ne bua kuya ne mêna abu kumpala kua Yehowa pa bilamba bibidi bia pa makaya bu tshivulukilu. 13 Newenze nyunguluilu ya or 14 ne shene ibidi ya or muimpe menemene miluka bu mionji,+ ne udi ne bua kusuikila shene miluka ayi ku nyunguluilu ayi.+

15 “Newenzeje tshilamba tshia pa tshiadi tshia dilumbuluisha+ kudi mutedi utu uzola pa bilamba. Udi ne bua kutshienza anu bu efoda: ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene.+ 16 Tshidi ne bua kuikala ne nseke inayi ya bule bumue padibu batshitshibulula mu bitupa bibidi, mu bule, ntanta wa tshianza tshibalula* ne mu butshiama, ntanta wa tshianza tshibalula. 17 Udi ne bua kuasapu mabue mela mu nyunguluilu, milongo inayi ya mabue. Mulongo wa kumpala wikale ne dibue dia ribi, dia topaze, ne dia emerode. 18 Mulongo muibidi wikale ne dibue dia tirkuaze, dia safire, ne dia jaspe. 19 Mulongo muisatu wikale ne dibue dia lesheme,* dia agate, ne dia ametiste. 20 Mulongo muinayi wikale ne dibue dia krizolite, dia onikse, ne dia jade. Badi ne bua kuela mu nyunguluilu ya or. 21 Mabue au neikale apetangana ne mêna 12 a bana ba Isalele. Badi ne bua kuondola dîna pa dibue dionso bu tshitampi, dîna dionso dileja tshimue tshia ku bisa 12.

22 “Newenze shene miluka mienze bu mionji ya or muimpe menemene pa tshilamba tshia pa tshiadi.+ 23 Newenze tukanu tubidi tua or bua tshilamba tshia pa tshiadi ne neulamike tukanu tubidi atu mu matumba abidi a tshilamba tshia pa tshiadi. 24 Newele mionji ibidi ya or mu tukanu tubidi tudi mu matumba a tshilamba tshia pa tshiadi. 25 Newele nsongo ibidi ya mionji ayi mu nyunguluilu ibidi ayi, ne udi ne bua kuyisuikila ku bilamba bia pa makaya bia efoda, lua kumpala. 26 Newenze tukanu tubidi tua or ne neutuase mu matumba abidi adi ku muelelu wa munda wa tshilamba tshia pa tshiadi udi mutangile ku efoda.+ 27 Udi ne bua kuenza tukanu tukuabu tubidi tua or lua kumpala kua efoda, kuinshi kua bilamba bibidi bia pa makaya, pabuipi ne muaba udibu bamulamakajila, ku mutu kua mukaba muluka* wa efoda.+ 28 Tshilamba tshia pa tshiadi tshidi ne bua kusomba kaba katshi tshikuata kudi muonji wa dikala dia ble, muonji usuikakaja tukanu tuatshi ku tukanu tua ku efoda. Ebi nebiambuluishe bua tshilamba tshia pa tshiadi tshisombe kaba katshi pa efoda ku mutu kua mukaba muluka.*

29 “Alona udi ne bua kuikala ne mêna a bana ba Isalele pa tshilamba tshia pa tshiadi tshia dilumbuluisha pa muoyo wende bu tshivulukilu tshia kashidi kumpala kua Yehowa padiye ubuela Muaba wa Tshijila. 30 Newele Ulima ne Tumima*+ mu tshilamba tshia pa tshiadi tshia dilumbuluisha ne bidi ne bua kuikala pa muoyo wa Alona padiye ubuela kumpala kua Yehowa, ne Alona udi ne bua kuangata bintu bia dilumbuluisha nabi bia bena Isalele pa muoyo wende kumpala kua Yehowa misangu yonso.

31 “Newenze muzabi wa kawuyi maboko bua efoda, muenza wonso mujima ne buanda bua dikala dia ble.+ 32 Newikale ne disoso ku mutu* munkatshi muawu. Disoso diawu nedikale ne mubangubangu mudinyunguluke muluka kudi muluki wa bilamba.* Didi ne bua kuikala bu disoso dia kazaku ka mvita ka tuamu, bua kawupandiki to. 33 Udi ne bua kuenza bimuma bia grenade ne buanda bua dikala dia ble, ne miosa mikunzubile ya mikoko, ne buanda bukunze kunzuu kuinshi kuawu kuonso, pamue ne tungonga tua or munkatshi muatu. 34 Udi ne bua kuenza bua kangonga kamue ka or kikale kalonda tshimuma tshia grenade, kangonga kamue ka or kalonda tshimuma tshia grenade kuinshi kuonso kua muzabi wa kawuyi maboko. 35 Alona udi ne bua kuwuvuala bua kuenza mudimu, ne mutoyi wa ku muzabi eu udi ne bua kumvuika padiye ubuela muaba munsantu kumpala kua Yehowa ne padiye upatuka, bua kafu to.+

36 “Newenze tshitata tshia or muimpe menemene tshidi tshibalakana ne newondolapu bu mudi muntu mua kuondola tshitampi, ufundapu ne: ‘Bunsantu mbua Yehowa.’+ 37 Udi ne bua kutshisuikila ku tshilamba tshia kujingila ku mutu+ ne muonji wa dikala dia ble; tshidi ne bua kushala mu mpala, pa mutu pa tshilamba atshi. 38 Netshikale pa mpala pa Alona, ne Alona neambule bujitu bua muntu udi wenza tshilema pa bidi bitangila bintu bia tshijila+ bidi bena Isalele bajidila padibu babifila bu mapa a tshijila. Tshidi ne bua kushala pa mpala pende misangu yonso, bua banyishibue kumpala kua Yehowa.

39 “Newenze muzabi wa tuzubu tuzubu wa line muimpe menemene, newenze kabidi tshilamba tshia kujingila ku mutu tshia line muimpe menemene, ne newenze mukaba wa tshilamba muluka.+

40 “Udi ne bua kuenzela kabidi bana ba balume ba Alona mizabi,+ mikaba ya bilamba, ne bilamba bia kuvuala ku mutu, bua butumbi ne bulengele.+ 41 Neubivuadike muanenu Alona pamue ne bana bende ba balume, ne neubele manyi,+ neubajadike mu mudimu,*+ neubajidile, ne bobu nebangenzele mudimu wa buakuidi. 42 Ubenzele kabidi tuputula* tua line bua bajike butaka buabu.+ Tuputula etu tudi ne bua kumbukila mu tshimono tupueka too ne ku bibelu. 43 Badi ne bua kutuvuala kudi Alona ne bana bende ba balume padibu babuela mu ntenta wa kusambakena anyi padibu baya ku tshioshelu bua kuenza mudimu muaba wa tshijila bua kabalu kupeta dipila ne kabalu kufua. Eu mmukenji mufunda wa kashidi buende yeye ne bana* bende balonda panyima pende.

29 “Mona tshiwenza bua kubajidila bua kungenzelabu mudimu wa buakuidi: Angata muana mulume wa ngombe, ne bimpanga bia mikoko bibidi bidi kabiyi kalema,+ 2 ne mampa kaayi mela luevene, ne mampa menza bu bikata kaayi mela luevene masambakaja ne mafuta, ne mikata ya bibetubetu kayiyi miela luevene milaba mafuta.+ Neubienze ne bukula buimpe menemene bua blé, 3 neubiele mu tshianda* ne neulue nabi mu tshianda+ pamue ne ngombe mulume au ne bimpanga bia mikoko bibidi abi.

4 “Neulue ne Alona ne bana bende ku tshibuelelu tshia ntenta wa kusambakena+ ne neuboweshe mâyi.+ 5 Pashishe newangate bilamba,+ ne neuvuadike Alona muzabi, ne muzabi wa kawuyi maboko wa kuvuala muinshi mua efoda, ne efoda, ne tshilamba tshia pa tshiadi, ne neumusuike bimpe mukaba muluka* wa efoda mu tshimono.+ 6 Neumuvuadike tshilamba tshia kujingila ku mutu, neuteke tshimanyinu tshia tshijila tshia dibanjijibua* pa tshilamba tshia kujingila ku mutu atshi;+ 7 ne newangate manyi a kuelangana,+ neuapongolole pa mutu pende, neumuele manyi.+

8 “Pashishe ulue ne bana bende ba balume ne ubavuadike mizabi+ 9 ne usuike Alona ne bana bende mikaba ya bilamba, ubavuadike bilamba biabu bia ku mutu; ne buakuidi nebulue buabu bu mukenji mufunda wa kashidi.+ Ke muudi ne bua kujadika Alona ne bana bende ba balume mu mudimu wa buakuidi* nunku.+

10 “Pashishe ulue ne ngombe mulume au kumpala kua ntenta wa kusambakena, ne Alona ne bana bende nebatenteke bianza biabu pa mutu wa ngombe au.+ 11 Ushipe ngombe mulume au kumpala kua Yehowa, ku tshibuelelu tshia ntenta wa kusambakena.+ 12 Wangate ndambu wa mashi a ngombe mulume au ku munu webe, uele ku nsengu ya tshioshelu,+ ne mashi onso adi ashala uapongolole kuinshi kua tshioshelu.+ 13 Pashishe wangate mafuta+ adi ku mala, lutandetande ludi ku mutshima, ne tuonyi tubidi ne mafuta adi malamataku, ne ubioshe bua bifuime pa tshioshelu.+ 14 Kadi munyinyi wa ngombe mulume au ne tshiseba tshiende ne tumvi, neubioshile pambelu pa tshitudilu. Mmulambu wa mpekatu.

15 “Pashishe wangate tshimpanga tshia mukoko tshimue, ne Alona ne bana bende badi ne bua kutenteka bianza biabu pa mutu wa tshimpanga tshia mukoko atshi.+ 16 Ushipe tshimpanga atshi ne wangate mashi atshi, uamiamine ku nseke yonso ya tshioshelu.+ 17 Usaye tshimpanga tshia mukoko, usukule mala atshi+ ne tulum’a mukolo tuatshi, ne ulonge bitupa biatshi pamue ne mutu. 18 Udi ne bua kuosha tshimpanga tshionso tshijima, utshifuimisha pa tshioshelu. Mmulambu wa kuosha bua Yehowa, dipembu dimpe.*+ Mmulambu muosha pa kapia bua Yehowa.

19 “Pashishe newangate tshimpanga tshikuabu tshia mukoko atshi, ne Alona ne bana bende ba balume nebatenteke bianza biabu pa mutu wa tshimpanga atshi.+ 20 Ushipe tshimpanga atshi ne wangate ndambu wa mashi atshi, uele ku lusongo lua ditshi dia ku dia balume dia Alona ne ku nsongo ya matshi a ku dia balume a bana bende ne ku biala biabu bia ku bianza biabu bia balume ne ku bana ba nkasa ba banene ba ku makasa abu a ku dia balume, ne umiamine mashi ku nseke yonso ya tshioshelu. 21 Pashishe wangate ndambu wa mashi adi pa tshioshelu ne ndambu wa manyi a kuelangana+ ne uanyakile Alona ne bilamba biende ne bana bende ne bilamba bia bana bende, bua yeye ne bilamba biende ne bana bende ne bilamba biabu bikale ba tshijila.+

22 “Pashishe wangate mafuta a tshimpanga atshi, mukila watshi udi ne mafuta, mafuta adi ku mala, lutandetande ludi ku mutshima, tuonyi tubidi ne mafuta adi malamataku,+ ne tshibelu tshia dia balume, bualu ntshimpanga tshia dijadikibua mu mudimu.+ 23 Wangate kabidi diampa dia tshijengu ne diampa dienza bu tshikata diela mafuta ne mukata wa tshibetubetu bidi mu tshianda tshia mampa adi kaayi mela luevene tshidi kumpala kua Yehowa. 24 Udi ne bua kubiteka bionso mu bianza bia Alona ne mu bianza bia bana bende ba balume, ne neubikupakaje kumpala ne panyima bu mulambu wa kukupakaja kumpala kua Yehowa. 25 Pashishe neubiangate mu bianza biabu ne neubioshe pa tshioshelu, pa mutu pa mulambu wa kuosha, bu dipembu dimpe* kumpala kua Yehowa. Mmulambu muosha pa kapia bua Yehowa.

26 “Pashishe wangate tshiadi tshia tshimpanga tshia mukoko tshia dijadikibua mu mudimu,+ tshidibu bafila bua Alona, ne utshikupakaje kumpala ne panyima bu mulambu wa kukupakaja kumpala kua Yehowa, ne netshilue tshitupa tshiebe. 27 Neujidile tshiadi tshia mulambu wa kukupakaja ne tshibelu tshia tshitupa tshia tshijila, tshivuabu bakupakaje ne tshivuabu bangate ku tshimpanga tshia mukoko tshia dijadikibua mu mudimu,+ tshia ku tshivuabu bafile bua Alona ne bua bana bende. 28 Nebilue bia Alona ne bana bende ba balume bilondeshile mukenji wa kashidi udi bena Isalele ne bua kutumikila, bualu ntshitupa tshia tshijila; nebilue tshitupa tshia tshijila tshikala bena Isalele ne bua kufila.+ Ntshitupa tshiabu tshia tshijila bua Yehowa tshiangatshila mu milambu yabu ya diumvuangana.+

29 “Bana ba balume ba Alona+ balonda panyima pende nebavuale bilamba bia tshijila+ bia Alona padibu bedibua manyi ne bajadikibua mu mudimu wa buakuidi. 30 Muakuidi wa munkatshi mua bana bende, udi umupingana ne udi ubuela mu ntenta wa kusambakena bua kuenza mudimu muaba wa tshijila, neabivuale bua matuku muanda mutekete.+

31 “Newangate tshimpanga tshia mukoko tshia dijadikibua mu mudimu ne neulambile munyinyi watshi muaba kampanda wa tshijila.+ 32 Alona ne bana bende ba balume nebadiile+ munyinyi wa tshimpanga tshia mukoko ne mampa adi mu tshianda ku tshibuelelu tshia ntenta wa kusambakena. 33 Nebadie bintu bivuabu babuikile nabi mpekatu wabu bua kubajadika mu mudimu wa buakuidi* ne kubajidila. Kadi muntu udibu kabayi banyishile* kena mua kubidia to, bualu mbintu bia tshijila.+ 34 Munyinyi wa mulambu wa dijadikibua mu mudimu ne mampa biobi bishale too ne mu dinda, dîba adi udi ne bua kuosha bidi bishale ne kapia.+ Kabena ne bua kubidia to, bualu mbintu bia tshijila.

35 “Newenze nunku bua Alona ne bana bende ba balume bilondeshile malu onso andi mukutumine dîyi bua kuenza. Newenze matuku muanda mutekete bua kubajadika mu mudimu wa buakuidi.*+ 36 Neufile ngombe mulume wa mulambu wa mpekatu dituku dionso bua kubuikila mpekatu, ne neukezule tshioshelu ku mpekatu pa kubuikila mpekatu yatshi, ne neutshiele manyi bua kutshijidila.+ 37 Newenze matuku muanda mutekete bua kubuikila mpekatu ya tshioshelu, ne udi ne bua kutshijidila bua tshilue tshioshelu tshitambe tshijila.+ Muntu yonso udi ulenga tshioshelu udi ne bua kuikala wa tshijila.

38 “Mona bintu biwafila pa tshioshelu: bimpanga bia mikoko bibidi bia tshidimu tshimue dituku dionso, misangu yonso.+ 39 Neufile tshimpanga tshimue mu dinda ne tshimpanga tshikuabu pakadi dîba dibuele, kumpala kua butuku kuila.*+ 40 Neufile tshimpanga tshia kumpala pamue ne tshia dikumi tshia tshipiminu tshia efa* wa bukula bunefuke busambakaja ne tshia binayi tshia hine* wa mafuta a olive idibu batue, ne tshia binayi tshia hine wa mvinyo bua mulambu wa bia kunua. 41 Neufile tshimpanga tshibidi pakadi dîba dibuele, kumpala kua butuku kuila,* pamue ne mulambu wa muomumue wa ntete ne wa bia kunua anu bu mu dinda. Neubifile bu tshintu tshia dipembu dimpe,* mulambu muosha pa kapia bua Yehowa. 42 Newikale mulambu wa kuosha wa kufila pa tshibidilu mu bipungu bienu bionso ku tshibuelelu tshia ntenta wa kusambakena kumpala kua Yehowa, muaba ungikala nnumuenekela bua kuakuilaku nebe.+

43 “Nemmuenekele bena Isalele muaba au, ne butumbi buanyi nebuwujidile.+ 44 Nenjidile ntenta wa kusambakena ne tshioshelu; nenjidile kabidi Alona ne bana bende ba balume+ bua bangenzele mudimu wa buakuidi. 45 Nensombe* munkatshi mua tshisamba tshia Isalele, ne nengikale Nzambi wabu.+ 46 Nebamanye bushuwa ne: meme ndi Yehowa Nzambi wabu, uvua mubapatule mu buloba bua Ejipitu bua meme kusomba munkatshi muabu.+ Meme ndi Yehowa Nzambi wabu.

30 “Newenze tshioshelu bua tshikale muaba wa kuoshela musenga wa manananshi;+ neutshienze ne mabaya a mutshi wa musese.+ 2 Netshikale ne nseke inayi ya bule bumue, nkubita* umue mu bule, nkubita umue mu butshiama ne nkubita ibidi mu butumbuke. Nsengu yatshi neyikale mienzelaku.+ 3 Neutshilamike or muimpe menemene: pa mutu patshi ne ku nseke yatshi yonso ne ku nsengu yatshi; ne neutshinyungulule ne muelelu* wa or. 4 Neutshienzele kabidi bikanu bibidi bia or kuinshi kua muelelu* watshi ku nseke ibidi idi mitangilangane, ne nebikuate mikamba ya kutshiambula nayi. 5 Wenze mikamba ne mutshi wa musese, uyilamike or. 6 Neutshiteke kumpala kua tshilamba tshia kukosolola natshi tshidi pabuipi ne mushete wa Bujadiki,+ kumpala kua tshibuikidiji tshidi pa Bujadiki, muaba ungikala nkumuenekela.+

7 “Alona+ newoshilapu musenga wa manananshi wa mupuya muimpe,+ uwufuimisha pa tshioshelu padiye ulongolola miendu+ dinda dionso. 8 Padi Alona utemesha miendu pakadi dîba dibuele, kumpala kua butuku kuila,* newoshe kabidi musenga wa manananshi. Mmulambu wa musenga wa manananshi wa kufila kumpala kua Yehowa misangu yonso mu bipungu bienu bionso. 9 Kanuena ne bua kulambulapu musenga wa manananshi+ udi kawuyi muanyishibue anyi mulambu wa kuosha pa kapia anyi mulambu wa ntete, ne kanuena ne bua kupongoluelapu mulambu wa bia kunua to. 10 Alona neabuikile mpekatu pa nsengu yatshi musangu umue ku tshidimu.+ Neangate ndambu wa mashi a nyama wa mulambu wa mpekatu a kubuikila nawu mpekatu+ bua kubuikila mpekatu yatshi musangu umue ku tshidimu mu bipungu bienu bionso. Tshioshelu etshi ntshitambe tshijila kudi Yehowa.”

11 Pashishe Yehowa wakambila Mose ne: 12 “Misangu yonso iudi ubala bungi bua bana ba Isalele,+ yonso wa kudibu udi ne bua kufila tshintu tshia kupikula natshi muoyo* wende kudi Yehowa tshikondo tshidibu bababala atshi. Badi ne bua kuenza nunku bua tshipupu nansha tshimue katshilu kudibu padibu babafunda mêna. 13 Mona tshiafila bantu bonso badibu bafunda mêna: tshitupa tshia nshekele* bilondeshile nshekele wa muaba wa tshijila.*+ Gera* 20 idi mumue ne nshekele umue. Tshitupa tshia nshekele ke mulambu wa kufila kudi Yehowa.+ 14 Muntu yonso udibu bafunda dîna udi ne bidimu kubangila ku 20 kubanda neafile mulambu wa Yehowa.+ 15 Muntu mubanji kena ne bua kufila bia bungi kupita tshitupa tshia nshekele,* ne mupele kena ne bua kufila bikese bishadile ku tshitupa tshia nshekele bu mulambu wa Yehowa bua kubuikila mpekatu bua mioyo* yenu to. 16 Newangate mpalata ya kubuikila nayi mpekatu kudi bena Isalele ne neuyifile bua mudimu wa ku ntenta wa kusambakena bua yikale tshivulukilu kumpala kua Yehowa bua bena Isalele, bua kubuikila mpekatu bua mioyo* yenu.”

17 Yehowa wakambila kabidi Mose ne: 18 “Wenze dilongo dinene ne tshintu tshia kuditekela bia tshiamu tshia mitaku bua kuowa mâyi;+ pashishe uditeke pankatshi pa ntenta wa kusambakena ne tshioshelu ne welamu mâyi.+ 19 Alona ne bana bende ba balume nebowe mâyi ku bianza ne ku makasa kuntu aku.+ 20 Padibu babuela mu ntenta wa kusambakena anyi padibu baya ku tshioshelu bua kuenza mudimu ne kufila milambu ya kuosha kudi Yehowa ne kumufuimishila muishi, badi ne bua kuowa mâyi bua kabafu to. 21 Badi ne bua kuowa mâyi ku bianza ne ku makasa bua kabafu to; bualu ebu nebuikale mukenji wa kashidi buabu bobu, buende yeye ne bana bende, mu bipungu biabu bionso.”+

22 Yehowa wakatungunuka ne kuambila Mose ne: 23 “Pashishe wangate bintu bia mupuya muimpe menemene ebi: bipiminu 500 bia mire mukuatakane, ne tshia bibidi tshia bungi abu, bipiminu 250 bia kinamona wa mupuya muimpe, bipiminu 250 bia dilenge dia mupuya muimpe, 24 ne bipiminu 500 bia kasia, bipima bilondeshile nshekele wa muaba wa tshijila,*+ pamue ne hine* umue wa mafuta a olive. 25 Pashishe newenze nabi manyi a tshijila a kuelangana; mbia kusambakaja pamue bimpe menemene.*+ Neikale manyi a tshijila a kuelangana.

26 “Newele ntenta wa kusambakena+ ne mushete wa Bujadiki manyi au, 27 pamue ne mêsa ne bintu biawu bionso, tshitekelu tshia miendu ne bintu biatshi, tshioshelu tshia musenga wa manananshi, 28 tshioshelu tshia mulambu wa kuosha ne bintu biatshi bionso, ne dilongo dinene ne tshintu tshia kuditekela. 29 Udi ne bua kubijidila bua bikale bitambe tshijila.+ Muntu yonso udi ubilenga udi ne bua kuikala wa tshijila.+ 30 Newele Alona+ ne bana bende ba balume manyi+ ne neubajidile bua bangenzele mudimu wa buakuidi.+

31 “Newambile bena Isalele ne: ‘Manyi aa neatungunuke ne kuikala manyi a tshijila a kuelangana kundi mu bipungu bienu bionso.+ 32 Kabena ne bua kualaba pambidi pa muntu to, ne kanuena ne bua kuenza tshintu tshikuabu bu mudibu baenze to. Mmanyi a tshijila. Neatungunuke ne kuikala a tshijila buenu nuenu. 33 Muntu yonso udi wenza manyi a buena aa ne uela muntu udi kayi muanyishibue* badi ne bua kumumbusha* mu tshisamba tshiabu.’”+

34 Pashishe Yehowa wakambila Mose ne: “Wangate bintu bia mupuya muimpe ebi bungi bua muomumue:+ mamata a stakte, onika, budimbu bua galbanume bua mupuya muimpe ne budimbu bua mupuya muimpe bua buimpe menemene. 35 Wenze nabi musenga wa manananshi;+ bintu bia mupuya bidibu basambakaje ebi bidi ne bua kuikala bisambakaja bimpe menemene,* biela mukele,+ bimpe menemene ne bia tshijila. 36 Udi ne bua kutua ndambu wa bintu ebi bua bishale bukulakula ne kuela ndambu kumpala kua Bujadiki mu ntenta wa kusambakena, muaba ungikala nkumuenekela. Bidi ne bua kuikala tshintu tshitambe tshijila kunudi. 37 Kuena ne bua kudienzela musenga bu mudibu benze musenga eu to.+ Udi ne bua kuwangata bu tshintu tshia tshijila kumpala kua Yehowa. 38 Muntu yonso udi wenza musenga wa buena eu bua kuikalaye umvua mupuya wawu, badi ne bua kumumbusha* mu tshisamba tshiabu.”

31 Yehowa wakatungunuka ne kuambila Mose ne: 2 “Mona, ndi musungule* Besalele+ muana wa Uli muana wa Hû wa mu tshisa tshia Yuda.+ 3 Nemmuwuje ne nyuma wa Nzambi, mmupesha meji, lungenyi ne dimanya dia kuenza midimu ya bianza ya mishindu yonso, 4 bua kuenza bintu bilengeja bimpe, bua kuenza bintu ne or ne arjan ne tshiamu tshia mitaku, 5 bua kusonga mabue ne kuela mabue mu nyunguluilu,+ ne bua kuenza bintu bia mabaya bia mishindu yonso.+ 6 Ndi musungule kabidi Oholiaba+ muana wa Ahisamaka wa mu tshisa tshia Dana bua kumuambuluisha, ne ndi nteka meji mu mioyo ya bonso badi bapiluke,* bua benze bintu bionso bindi mukutumine dîyi bua kuenza:+ 7 ntenta wa kusambakena,+ mushete wa Bujadiki+ ne tshibuikidiji+ tshidi pa mutu pawu, bintu bionso bia mu ntenta, 8 mêsa+ ne bintu biawu, tshitekelu tshia miendu tshia or muimpe menemene ne bintu biatshi bionso,+ tshioshelu tshia musenga wa manananshi,+ 9 tshioshelu tshia mulambu wa kuosha+ ne bintu biatshi bionso, dilongo dinene ne tshintu tshia kuditekela,+ 10 bilamba biluka bimpe menemene, bilamba bia tshijila bia muakuidi Alona, bilamba bia bana bende ba balume bua kuenza mudimu wa buakuidi,+ 11 manyi a kuelangana, ne musenga wa manananshi wa mupuya muimpe bua muaba munsantu.+ Nebenze bintu bionso bindi mukutumine dîyi bua kuenza.”

12 Yehowa wakambila kabidi Mose ne: 13 “Akula ne bena Isalele, ubambile ne: ‘Nudi ne bua kunemekela nangananga nsabatu yanyi,+ bualu ntshimanyinu pankatshi panyi nenu mu bipungu bienu bionso bua numanye ne: meme, Yehowa, ndi nnujidila. 14 Nudi ne bua kulama Nsabatu, bualu ndituku dia tshijila kunudi.+ Muntu yonso udi unyanga Nsabatu, badi ne bua kumushipa. Muntu yeye muenze mudimu nansha mukese dituku adi, badi ne bua kumbusha* muntu* au munkatshi mua tshisamba tshiabu.+ 15 Nudi mua kuenza mudimu matuku asambombo, kadi dituku dia muanda mutekete nnsabatu bua kuikisha ku midimu yonso.+ Ndituku dia tshijila kudi Yehowa. Muntu yonso udi wenza mudimu dituku dia Nsabatu, badi ne bua kumushipa. 16 Bena Isalele badi ne bua kulama Nsabatu; badi ne bua kunemekela Nsabatu mu bipungu biabu bionso. Ntshipungidi tshia kashidi. 17 Ntshimanyinu tshia kashidi pankatshi panyi ne tshisamba tshia Isalele,+ bualu Yehowa wakenza diulu ne buloba mu matuku asambombo, ne mu dituku dia muanda mutekete wakajikija mudimu, kuikishaye.’”+

18 Nunku diakamue pakajikijaye kuakula nende ku mukuna wa Sinai, wakapesha Mose mabue abidi a Bujadiki,+ mabue avuabu bafundapu ne munu wa Nzambi.+

32 Dîba adi bantu bakamona ne: Mose uvua munenge bua kutuluka ku mukuna.+ Nunku bantu bakadisangisha kudi Alona, kumuambilabu ne: “Juka, utuenzele Nzambi waya kumpala kuetu,+ bualu katuena bamanye tshidi tshifikile Mose eu, muntu uvua mutupatule mu buloba bua Ejipitu.” 2 Ke Alona kubambila ne: “Vulayi tukanu tua or+ tudi ku matshi a bakaji benu, a bana benu ba balume ne a bana benu ba bakaji, nulue natu kundi.” 3 Nunku bantu bonso bakatuadija kuvula tukanu tua or tuvua ku matshi abu, balua natu kudi Alona. 4 Pashishe wakangata or kudibu, yeye kumusonga ne tshintu tshia kuondola natshi, kumuenzaye lupingu* lua kana ka ngombe.+ Bakatuadija kuamba ne: “Wewe Isalele, eu ke Nzambi webe uvua mukupatule mu buloba bua Ejipitu.”+

5 Pakamona Alona bualu ebu, wakibaka tshioshelu kumpala kualu. Pashishe Alona wakela dîyi ne: “Malaba nekuikale tshibilu bua Yehowa.” 6 Nunku dituku diakalonda bakajuka mu dindadinda, kutuadijabu kulambula milambu ya kuosha ne kufilabu milambu ya diumvuangana. Panyima pa bualu ebu, bantu bakasomba bua kudia ne kunua. Pashishe bakajuka bua kusanka.+

7 Ke Yehowa kuambila Mose ne: “Pueka, ndaku, bualu bantu bebe bauvua mupatule mu buloba bua Ejipitu mbadinyange.+ 8 Mbasesuke ne lukasa luonso mu njila umvua mubelele mukenji bua kuendela.+ Mbadienzele lupingu* lua kana ka ngombe, ne badi anu baluinamina, balulambula milambu bamba ne: ‘Wewe Isalele, eu ke Nzambi webe uvua mukupatule mu buloba bua Ejipitu.’” 9 Yehowa wakambila kabidi Mose ne: “Ndi mumone ne: bantu aba badi ne mutu mukole.*+ 10 Mpindieu ndekela mbajimije mu tshiji tshianyi tshikole, ne nkuvuije wewe tshisamba tshinene pa muaba wabu.”+

11 Ke Mose kusengelela* Yehowa Nzambi wende+ wamba ne: “Yehowa, bua tshinyi udi uleja bantu bebe tshiji tshikole wewe mumane kubapatula mu buloba bua Ejipitu ne bukole bua bungi ne tshianza tshia bukole?+ 12 Udi musue bua bena Ejipitu bambe ne: ‘Yeye uvua ne meji mabi pavuaye mubapatule. Uvua musue kubashipa mu mikuna ne kubajimija bonso pa buloba’ anyi?+ Lekela tshiji tshiebe tshikole ne elulula meji* bua dipangadika diebe dia kutumina tshisamba tshiebe dikenga edi. 13 Uvuluke bena mudimu bebe Abalahama, Izaka ne Isalele bauvua muditshipe kudibu mu dîna diebe, mubambile ne: ‘Nemvudije bana* benu bu mitoto ya muulu,+ ne buloba buonso bundi munuleje nembupeshe bana* benu bua babuangate bu buloba buabu bua kashidi.’”+

14 Nunku Yehowa wakatuadija kuelulula meji* bua dikenga divuaye muambe bua kutumina tshisamba tshiende.+

15 Panyima pa bualu ebu Mose wakakudimuka, kutulukaye ku mukuna ne mabue abidi a Bujadiki+ mu tshianza tshiende.+ Mabue au avua ne mifundu miondola nseke yonso ibidi; avua mafunda pa mutu ne panyima. 16 Mabue au avua masonga kudi Nzambi, ne mifundu ayi ivua mifundu ya Nzambi miondola pa mabue.+ 17 Pakatuadija Yoshua kumvua mutoyi wa bantu bua mbila ivuabu bela, wakambila Mose ne: “Kudi mutoyi wa mvita mu tshitudilu.” 18 Kadi Mose wakamba ne:

19 Diakamue pakasemena Mose pabuipi ne tshitudilu ne mumone kana ka ngombe+ ne maja avuabu baja, tshiji tshiende tshiakatema, ne wakimansha mabue avua mu bianza biende, kuatayishaye kuinshi kua mukuna.+ 20 Wakangata kana ka ngombe kavuabu benze aku, kukoshaye mu kapia, kukavingutulaye ne kuluaku musenga;+ pashishe wakawumuangalaja pa mâyi, yeye kuanuisha bena Isalele.+ 21 Pashishe Mose wakambila Alona ne: “Bantu aba mbakuenzele tshinyi bua wewe kubakebela mpekatu munene nunku?” 22 Alona wakandamuna ne: “Kukuatshi tshiji to mukalenge wanyi. Wewe udi mumanye bimpe ne: mioyo ya bantu aba idi ibasaka bua kuenza malu mabi.+ 23 Nunku bavua bangambile ne: ‘Utuenzele Nzambi waya kumpala kuetu, bualu katuena bamanye tshidi tshifikile Mose eu, muntu uvua mutupatule mu buloba bua Ejipitu.’+ 24 Ke meme kubambila ne: ‘Muntu yonso udi ne or amuvule, amumpeshe.’ Pashishe meme kumuela mu kapia, kana ka ngombe aka kupatukaku.”

25 Mose wakamona ne: bantu kabavua ne didikanda to, bualu Alona uvua mubalekele benza malu kabayi ne didikanda, nunku bakalua tshintu tshia bundu kudi baluishi babu. 26 Pashishe Mose wakimana ku tshibuelelu tshia tshitudilu, kuambaye ne: “Udi ku luseke lua Yehowa nnganyi? Alue kundi!”+ Nunku bena Lewi bonso bakamunyunguluka. 27 Ke yeye kubambila ne: “Yehowa Nzambi wa Isalele mmuambe nunku: ‘Yonso wa kunudi avuale muele wende wa mvita ne aye ku tshiibi ne ku tshiibi mu tshitudilu tshijima bua kushipa muanabu, muena mutumba nende ne mulunda wende wa pa muoyo.’”+ 28 Bena Lewi bakenza tshivua Mose muambe. Nunku bakashipa bantu batue ku 3 000 dituku adi. 29 Pashishe Mose wakamba ne: “Ditekayi lelu ku luseke* bua Yehowa, bualu yonso wa kunudi mmukudimukile muanende wa balume ne muanabu wa balume;+ lelu neanupeshe dibenesha.”+

30 Dituku mene diakalonda, Mose wakambila bantu ne: “Nudi benze mpekatu munene menemene, mpindieu ndi mbanda kudi Yehowa bua kumona ni ndi mua kuenza bualu kampanda bua anubuikidile mpekatu wenu.”+ 31 Nunku Mose wakapingana kudi Yehowa, kuambaye ne: “Bantu aba mbenze mpekatu munene be! Mbadienzele nzambi wa or!+ 32 Kadi mpindieu wewe musue, ubabuikidile koku mpekatu wabu;+ tshianana ndi nkulomba bua unkupule mu mukanda uudi mufunde.”+ 33 Kadi Yehowa wakambila Mose ne: “Muntu udi mungenzele mpekatu, yeye ke ungakupula mu mukanda wanyi. 34 Mpindieu ndaku, ulombole bantu abu muaba undi mukuambile. Mona! Muanjelu wanyi neikale kumpala kuebe,+ ne dituku dingalua kulondolola malu, nembanyoke bua mpekatu wabu.” 35 Nunku Yehowa wakabanga kunyoka bantu bualu bavua benze kana ka ngombe, kana ka ngombe kavua Alona muenze.

33 Yehowa wakambila kabidi Mose ne: “Umbuka muaba eu ne bantu bauvua mupatule mu buloba bua Ejipitu. Ndaku mu buloba bumvua muditshipe kudi Abalahama, kudi Izaka, ne kudi Yakoba, muambe ne: ‘Nembupeshe bana* bebe.’+ 2 Nentume muanjelu kumpala kuebe+ ne nengipate bena Kanâna, bena Amole, bena Hiti, bena Pelizi, bena Hiwi, ne bena Yebuse.+ 3 Ndaku mu buloba budi ne mabele ne buitshi bia bungi.+ Kadi tshiakuya munkatshi muenu to, bualu nudi bantu ba mutu mukole,*+ ne ndi mua kunubutula mu njila.”+

4 Pakumvua bantu mêyi makole au, bakatuadija kudila; muntu nansha umue kakavuala bintu biende bia kudilengeja nabi to. 5 Yehowa wakambila Mose ne: “Ambila bena Isalele ne: ‘Nudi bantu ba mutu mukole.*+ Kuvua kushale anu kakese bua meme kupitshila munkatshi muenu ne kunubutula.+ Nunku mpindieu lekelayi kuvuala bintu bienu bia kudilengeja nabi, pantshidi nkeba tshindi mua kunuenzela.’” 6 Nunku kutuadijila anu ku mukuna wa Holeba, bena Isalele bakalekela kuvuala* bintu biabu bia kudilengeja nabi.

7 Pashishe Mose wakangata ntenta wende, kumuasaye pambelu pa tshitudilu, kule ne tshitudilu, ne wakamubikila ne: ntenta wa kusambakena. Muntu yonso uvua ne bualu bua kuebeja Yehowa+ uvua upatuka, uya ku ntenta wa kusambakena uvua pambelu pa tshitudilu. 8 Diakamue pavua Mose upatuka uya ku ntenta, bantu bonso bavua bajuka, bimana ku tshibuelelu tshia ntenta yabu, ne bashala batangile Mose too ne pavuaye ubuela mu ntenta. 9 Diakamue pavua Mose ubuela mu ntenta, dikunji dia ditutu+ divua dipueka, dimana ku tshibuelelu tshia ntenta pavua Nzambi uyukila ne Mose.+ 10 Pavua bantu bonso bamona dikunji dia ditutu dimana ku tshibuelelu tshia ntenta, muntu yonso uvua ujuka ne utua mpala wende panshi ku tshibuelelu tshia ntenta wende. 11 Yehowa uvua uyukila ne Mose mpala ne mpala+ anu mutu muntu uyukila ne muntu mukuabu. Pavuaye upingana mu tshitudilu, Yoshua+ muana wa Nuna, muena mudimu wende ne mumuambuluishi,+ kavua umbuka ku ntenta to.

12 Nunku Mose wakambila Yehowa ne: “Mona, udi ungambila ne: ‘Lombola bantu aba,’ kadi kuena mungambile muntu uwantuma nende to. Udi mungambile kabidi ne: ‘Ndi mukumanye mu dîna,* ne udi muanyishibue kabidi ku mêsu kuanyi.’ 13 Bingikala muanyishibue ku mêsu kuebe, ndi nkulomba bua ummanyishe njila yebe,+ bua nkumanye ne ntungunuke ne kuanyishibua ku mêsu kuebe. Tangila kabidi ne: bantu aba ntshisamba tshiebe.”+ 14 Nunku yeye wakamuambila ne: “Meme nkayanyi* nenye nebe,+ ne nenkupeshe dikisha.”+ 15 Ke yeye kumuambila ne: “Wewe kuyi* uya netu, kutumbushi muaba eu bua kubanda netu to. 16 Mmunyi muamanyabu ne: meme ne tshisamba tshiebe tudi banyishibue ku mêsu kuebe? Ki mpaudi uya netu,+ bua meme ne tshisamba tshiebe tuikale bashilangane ne bisamba bikuabu bionso bidi pa buloba anyi?”+

17 Yehowa wakambila kabidi Mose ne: “Nengenze kabidi bualu buudi mulombe ebu, bualu udi muanyishibue ku mêsu kuanyi ne ndi mukumanye mu dîna.” 18 Ke yeye kuamba ne: “Ndeja koku butumbi buebe.” 19 Kadi wakamba ne: “Nengenze bua buimpe buanyi buonso bupite kumpala kuebe, ne nemmanyishe dîna dia Yehowa+ kumpala kuebe; nenganyishe muntu undi musue kuanyisha, ne nendeje luse kudi muntu undi musue kuleja luse.”+ 20 Kadi wakamba kabidi ne: “Kuena mua kumona mpala wanyi to, bualu kakuena muntu udi mua kumona mpala wanyi ne kushalaye ne muoyo to.”

21 Yehowa wakamba kabidi ne: “Muaba ngowu eu pabuipi nanyi. Imana pa dibue. 22 Padi butumbi buanyi buenda bupita, nenkuteke mu disoso didi mu dibue, ne nenkujike ne tshianza tshianyi too ne pangapita. 23 Pashishe nengumbushe tshianza tshianyi, ne neumone nyima wanyi. Kadi mpala wanyi kabena mua kumumona to.”+

34 Pashishe Yehowa wakambila Mose ne: “Disongela mabue abidi a buena a kumpala au,+ ne nemfunde pa mabue au mêyi avua pa mabue a kumpala+ auvua mutayishe au.+ 2 Dilongolola bua mu dinda, bualu mu dinda neubande ku mukuna wa Sinai ne newimane kumpala kuanyi kuntu aku pa lusongo lua mukuna.+ 3 Kadi muntu nansha umue kabandi nebe, ne muntu nansha umue kamueneki muaba nansha umue ku mukuna aku. Nansha ngombe anyi mikoko kayena mua kudia kumpala kua mukuna au to.”+

4 Nunku Mose wakasonga mabue abidi a buena a kumpala ne wakajuka pa dinda menemene, kubandaye ku mukuna wa Sinai anu muvua Yehowa mumutumine dîyi bua kuenza; wakaya ne mabue abidi au mu tshianza tshiende. 5 Pashishe Yehowa wakapueka+ mu ditutu, kuimanaye nende muaba au, kumanyishaye dîna dia Yehowa.+ 6 Yehowa uvua upita kumpala kuende umanyisha ne: “Yehowa, Yehowa, Nzambi wa luse+ udi uditeka pa muaba wa bakuabu,*+ kena ukuata tshiji lukasa,+ mmuwule tente ne dinanga dia lulamatu*+ ne bulelela,*+ 7 udi uleja dinanga dia lulamatu kudi bantu binunu ne binunu;+ udi ubuikila bilema, dishipa dia mikenji ne mpekatu,+ kadi mu mushindu nansha umue kena mua kupanga kunyoka muntu udi mupile;+ udi ufila dinyoka bua tshilema tshia batatu kudi bana ne kudi bikulu, kudi bantu ba tshipungu tshisatu ne kudi bantu ba tshipungu tshinayi.”+

8 Mose wakinama ne lukasa luonso, kutuaye mpala panshi. 9 Pashishe wakamba ne: “Mpindieu Yehowa, meme muanyishibue ku mêsu kuebe, nunku Yehowa, ndaku koku netu munkatshi muetu+ nansha mutudi bantu ba mutu mukole,*+ ne utubuikidile koku bilema bietu ne mpekatu wetu,+ ne utuangate bu tshisamba tshiebe.” 10 Yeye kuamba ne: “Mona, ndi ndia nenu tshipungidi ne: Nengenze kumpala kua tshisamba tshienu tshionso malu a kukema atu kaayi manji kuenzeka* pa buloba bujima anyi munkatshi mua bisamba bionso,+ ne bisamba bionso binudi basombe munkatshi muabi nebimone mudimu wa Yehowa, bualu ndi ngenza nenu bualu budi bukemesha.+

11 “Teleja tshindi nkutumina dîyi lelu bua kuenza.+ Mona, ndi ngipata bena Amole, bena Kanâna, bena Hiti, bena Pelizi, bena Hiwi ne bena Yebuse kumpala kuebe.+ 12 Udimuke bua kudi tshipungidi ne bantu ba mu buloba buudi uya,+ tshianana bidi mua kulua buteyi kuudi.+ 13 Kadi nudi ne bua kupula bioshelu biabu, nudi ne bua kubumbula makunji abu a tshijila, ne nudi ne bua kukosa mitshi yabu ya tshijila.*+ 14 Kuena ne bua kuinamina nzambi mukuabu to,+ bualu Yehowa mmumanyike bua mudiye ulomba* bua bamulamate anu yeye.* Bushuwa, yeye udi Nzambi udi ulomba bua bamulamate anu yeye.+ 15 Udimuke bua kudi tshipungidi ne bantu ba mu buloba abu, bualu dîba didibu benda bundumba ne nzambi yabu ne balambula nzambi yabu milambu,+ muntu mukuabu udi mua kukubikila ne udi mua kudia bintu bidiye mulambule.+ 16 Dîba adi kuakupanga kuangatshila bana bebe ba balume bana babu ba bakaji,+ ne bana babu ba bakaji nebende masandi ne nzambi yabu ne nebafikishe bana bebe ba balume ku dienda masandi ne nzambi yabu.+

17 “Kuena ne bua kuenza nzambi ya tshiamu tshiengulula.+

18 “Udi ne bua kuenza Tshibilu tshia Mampa kaayi mela Luevene.+ Neudie mampa kaayi mela luevene anu mundi mukutumine dîyi bua kuenza; wenze nanku matuku muanda mutekete pakumbana tshikondo mu ngondo wa Abiba,*+ bualu uvua mupatuke mu Ejipitu mu ngondo wa Abiba.

19 “Muanabute yonso wa balume* nguanyi,+ pamue ne banabute bonso ba bimuna biebe, nansha ba ngombe nansha ba mikoko.+ 20 Udi ne bua kupikula muanabute wa mpunda ku mukoko. Kadi wewe kuyi mumupikule, dîba adi udi ne bua kumutshibula nshingu. Udi ne bua kupikula muanabute yonso wa ku bana bebe ba balume.+ Muntu nansha umue kamueneki kumpala kuanyi bianza bitupu to.

21 “Newenze mudimu matuku asambombo, kadi dituku dia muanda mutekete newikishe.*+ Newikishe nansha mu tshikondo tshia kudima nansha mu tshia kupuola.

22 “Newenze Tshibilu tshia Mbingu ne bintu bidi bikola bia kumpala bia ku dinowa dia blé, ne Tshibilu tshia Disangisha bia pa madimi* ku ndekelu kua tshidimu.+

23 “Bantu balume bebe bonso nebamueneke kumpala kua Mukalenge mulelela, Yehowa, Nzambi wa Isalele misangu isatu ku tshidimu.+ 24 Bualu nengipate bisamba kumpala kuebe,+ ne nengalabaje buloba buebe; muntu nansha umue kakualakana buloba buebe paudi uya bua kumona mpala wa Yehowa Nzambi webe misangu isatu ku tshidimu.

25 “Kuena ne bua kulambula mashi a mulambu wanyi pamue ne tshintu tshiela luevene to.+ Mulambu wa tshibilu tshia Pasaka* kawena ne bua kushala butuku bujima too ne mu dinda to.+

26 “Neulue ne bintu bitambe buimpe bia ku bintu bidi bikola bia kumpala bia mu buloba buebe ku nzubu wa Yehowa Nzambi webe.+

“Kuena ne bua kulambila kana ka mbuji mu mabele a mamuaku to.”+

27 Yehowa wakambila kabidi Mose ne: “Udi ne bua kufunda mêyi aa,+ bualu ndi ndia nebe tshipungidi, wewe ne bena Isalele, mu diumvuangana ne mêyi aa.”+ 28 Wakashala ne Yehowa muaba au matuku 40, munya ne butuku. Kakadia ni mbiakudia,+ kakanua ni mmâyi. Nunku Nzambi wakafunda pa mabue au mêyi a tshipungidi, Mêyi Dikumi.*+

29 Pashishe Mose wakatuluka ku mukuna wa Sinai muikale ne mabue abidi a Bujadiki mu tshianza tshiende.+ Pavua Mose mutuluke ku mukuna, kavua mumanye ne: dikoba dia mpala wende divua ditua nsese bualu uvua muakule ne Nzambi to. 30 Pavua Alona ne bena Isalele bonso bamone Mose, bakamona ne: dikoba dia mpala wende divua ditua nsese, kutshinabu bua kusemena pabuipi nende.+

31 Kadi Mose wakababikila, nunku Alona ne bamfumu bonso ba tshisumbu bakalua kudiye, Mose kuakulaye nabu. 32 Pashishe bena Isalele bonso bakasemena pabuipi nende, yeye kubapesha mikenji yonso ivua Yehowa mumupeshe ku mukuna wa Sinai.+ 33 Pavua Mose ujikija kuakula nabu, uvua ubuikila mpala wende tshilamba.+ 34 Kadi pavua Mose ubuela kumpala kua Yehowa bua kuakula nende, uvua umbusha tshilamba atshi too ne pavuaye upatuka.+ Pashishe uvua upatuka, umanyisha bena Isalele mikenji ivuaye mupete.+ 35 Bena Isalele bavua bamona ne: dikoba dia mpala wa Mose divua ditua nsese; nunku Mose uvua udibuikila kabidi tshilamba ku mêsu too ne pavuaye ubuela bua kuakula ne Nzambi.*+

35 Pashishe Mose wakasangisha tshisumbu tshijima tshia bena Isalele pamue, kubambilaye ne: “Malu adi Yehowa muele mukenji bua kuenza ngowu aa:+ 2 Nudi mua kuenza mudimu matuku asambombo, kadi dituku dia muanda mutekete nedikale dituku dia tshijila kunudi, nsabatu bua dikisha ku midimu yonso bua Yehowa.+ Muntu yonso udi wenza mudimu dituku adi, nebamushipe.+ 3 Kanuena ne bua kutemesha kapia dituku dia Nsabatu muaba nansha umue unudi nusombela to.”

4 Nunku Mose wakambila tshisumbu tshijima tshia bena Isalele ne: “Yehowa mmutume dîyi ne: 5 ‘Sangishilayi Yehowa bintu munkatshi muenu.+ Muntu yonso udi muoyo wende musue,+ atuadile Yehowa bintu ebi: or, arjan, tshiamu tshia mitaku, 6 buanda bua dikala dia ble, miosa mikunzubile ya mikoko, buanda bukunze kunzuu, line muimpe menemene, miosa ya mbuji,+ 7 biseba bia bimpanga bia mikoko bikunjija, biseba bia nyama ya nkonga, mabaya a mutshi wa musese, 8 mafuta a kuela mu miendu, mafuta a mutshi wa bome bua kuenza manyi a kuelangana ne bua kuenza musenga wa manananshi wa mupuya muimpe,+ 9 mabue a onikse, ne mabue makuabu a kuasa pa efoda+ ne pa tshilamba tshia pa tshiadi.+

10 “‘Bantu bonso badi bapiluke*+ munkatshi muenu balue ne benze bintu bionso bidi Yehowa mutume dîyi bua kuenza, 11 mmumue ne: ntenta wa tshitendelelu ne ntenta wende ne tshibuikilu tshiende, tukanu tuende tua kukanga natu ne nyunguluilu yende ya mabaya, mikamba yende, makunji ende ne ntaku yende mikale ne masoso; 12 Mushete+ ne mikamba yawu ya kuwambuila,+ tshibuikidiji+ ne tshilamba tshia kukosolola natshi;+ 13 mêsa+ ne mikamba yawu ya kuambuila ne bintu biawu bionso ne mampa a dileja;+ 14 tshitekelu tshia miendu+ bua butoke ne bintu biatshi ne miendu yatshi ne mafuta bua kutokesha;+ 15 tshioshelu tshia musenga wa manananshi+ ne mikamba yatshi ya kutshiambuila; manyi a kuelangana ne musenga wa manananshi wa mupuya muimpe;+ tshilamba tshia ku tshibuelelu tshia ntenta wa tshitendelelu; 16 tshioshelu tshia mulambu wa kuosha+ ne kakanu katshi ka tshiamu tshia mitaku, mikamba yatshi ya kutshiambuila ne bintu biatshi bionso; dilongo dinene ne tshintu tshia kuditekela;+ 17 bilamba bia kulembeleja bua lupangu,+ makunji alu ne ntaku yawu mikale ne masoso; tshilamba tshia ku tshibuelelu tshia lupangu; 18 mpopo ya ntenta wa tshitendelelu ne mpopo ya lupangu ne mionji yayi;+ 19 bilamba biluka bimpe menemene+ bua kuenza nabi mudimu muaba munsantu, bilamba bia tshijila bia muakuidi Alona+, ne bilamba bia bana bende ba balume bua kuenzabu mudimu wa buakuidi.’”

20 Nunku tshisumbu tshijima tshia bena Isalele tshiakumbuka kumpala kua Mose. 21 Pashishe muntu yonso uvua muoyo wende umuenzeja+ ne muntu yonso uvua lungenyi lumusaka, wakalua ne dipa dia Yehowa bua mudimu wa ku ntenta wa kusambakena, bua midimu yende yonso, ne bua bilamba bia tshijila. 22 Bakatungunuka ne kulua, bantu balume ne bantu bakaji, muntu yonso uvua muoyo wende musue, balua ne tukanu tua kulengeja natu pa bilamba, tukanu tua ku matshi, mpeta, ne bilengejilu bikuabu, pamue ne bintu bia mishindu yonso bia or. Bonso bakalua ne milambu* yabu ya or kudi Yehowa.+ 23 Bonso bavua ne buanda bua dikala dia ble, miosa mikunzubile ya mikoko, buanda bukunze kunzuu, line muimpe menemene, miosa ya mbuji, biseba bikunjija bia bimpanga bia mikoko, ne biseba bia nyama ya nkonga, bakalua nabi. 24 Bonso bavua bafila tshiamu tshia arjan ne tshiamu tshia mitaku bakalua ne dipa dia Yehowa, ne bonso bavua ne mabaya a mutshi wa musese bua tshitupa kayi tshionso tshia mudimu bakalua nawu.

25 Bantu bakaji bonso bavua bapiluke+ bakaluka bintu ne bianza biabu, ne bakalua ne bintu bivuabu baluke: buanda bua dikala dia ble, miosa mikunzubile ya mikoko, buanda bukunze kunzuu, ne line muimpe menemene. 26 Bantu bakaji bonso bavua bapiluke ne bavua muoyo wabu ubenzeja, bakaluka miosa ya mbuji.

27 Bamfumu bakalua ne mabue a onikse ne mabue makuabu a kuasa pa efoda ne pa tshilamba tshia pa tshiadi,+ 28 ne mafuta a mutshi wa bome, ne mafuta bua kutokesha ne bua kuenza manyi a kuelangana,+ ne kuenza musenga wa manananshi wa mupuya muimpe.+ 29 Bantu balume ne bantu bakaji bonso bavua mioyo yabu ibasaka, bakalua ne tshintu kampanda bua mudimu uvua Yehowa mutume dîyi ku butuangaji bua Mose bua kuenza; bena Isalele bakalua natshi bu mulambu wa budisuile kudi Yehowa.+

30 Pashishe Mose wakambila bena Isalele ne: “Monayi, Yehowa mmusungule Besalele muana wa Uli muana wa Hû wa mu tshisa tshia Yuda.+ 31 Mmumuwuje ne nyuma wa Nzambi, umupesha meji, lungenyi ne dimanya dia kuenza midimu ya bianza ya mishindu yonso 32 bua kuenza bintu bilengeja bimpe, bua kuenza bintu ne or ne arjan ne tshiamu tshia mitaku, 33 bua kusonga mabue ne kuela mabue mu nyunguluilu, ne bua kuenza bintu bilengeja bimpe bia mishindu yonso bia mabaya. 34 Mmuele mu muoyo wende, yeye ne Oholiaba+ muana wa Ahisamaka wa mu tshisa tshia Dana lungenyi lua kulongesha. 35 Mmubuwuje ne dimanya*+ dia kuenza midimu yonso ya bunsenda, ya muntu utu uzola pa bilamba ne manda, ya muntu utu uluka bilamba ne buanda bua dikala dia ble, miosa mikunzubile ya mikoko, buanda bukunze kunzuu ne line muimpe menemene, ne ya muluki wa bilamba.* Bantu aba nebenze midimu ya mishindu yonso ne nebalongolole mushindu wa kuenza bintu bia mishindu yonso.

36 “Besalele neenze mudimu pamue ne Oholiaba ne muntu yonso mupiluke* udi Yehowa mupeshe meji ne lungenyi bua kumanya mushindu wa kuenza midimu yonso ya mudimu wa tshijila anu mudi Yehowa mutume dîyi bua kuenza.”+

2 Nunku Mose wakabikila Besalele ne Oholiaba ne muntu yonso mupiluke uvua Yehowa muteke meji munda muende,+ muntu yonso uvua muoyo wende mumuenzeje bua kudifila bua kuenza mudimu.+ 3 Pashishe bakangata kudi Mose bintu bionso+ bivua bena Isalele bafile bua mudimu wa muaba wa tshijila. Kadi bobu bavua anu batungunuka ne kumutuadila milambu ya budisuile dinda dionso.

4 Nunku panyima pa bamane kubanga mudimu wa tshijila, bena mudimu bonso bapiluke bavua balua benda bapinganangana, 5 ne bavua bambila Mose ne: “Bantu badi balua ne bintu bia bungi menemene kupita bidi bikengedibua bua mudimu udi Yehowa mutume dîyi bua kuenza.” 6 Ke Mose kuamba bua bele dîyi mu tshitudilu tshijima ne: “Balumiana ne bakajana, kanulu kabidi ne bintu bikuabu bua disangisha dia bintu bia tshijila to.” Nunku bakakanda bantu bua kabalu kabidi ne bintu bikuabu to. 7 Bintu abi bivua bikumbane bua mudimu wonso kuenzekawu, bipite too ne kupita.

8 Nunku bena mudimu bonso bapiluke+ bakenza ntenta wa tshitendelelu+ ne bilamba bia ntenta dikumi bienza ne buanda buluka bua line muimpe menemene, ne buanda bua dikala dia ble, ne miosa mikunzubile ya mikoko, ne buanda bukunze kunzuu; yeye* wakabienza ne bakeluba bazolapu ne buanda.+ 9 Tshilamba tshia ntenta tshionso tshivua ne nkubita* 28 mu bule ne nkubita inayi mu butshiama. Bilamba bia ntenta bionso bivua bunene bumue. 10 Nunku wakalamakaja bilamba bia ntenta bitanu kaba kamue, kulamakajaye kabidi bilamba bia ntenta bikuabu bitanu kaba kamue. 11 Pashishe wakenza makoshi ne buanda bua dikala dia ble ku muelelu kua tshilamba tshia ntenta tshimue muaba uvuabu ne bua kutshilamakajila. Wakenza kabidi bia muomumue ku muelelu kua tshilamba tshia ntenta tshivua ku ndekelu muaba wa muomumue uvuabu ne bua kutshilamakajila. 12 Wakenza makoshi 50 ku tshilamba tshia ntenta tshimue ne makoshi 50 ku muelelu mukuabu kua tshilamba tshia ntenta muaba uvuabu ne bua kutshilamakajila, bua makoshi ikale matangilangane. 13 Ndekelu wa bionso wakenza tukanu tua kukanga natu 50 tua or, ne wakalamakaja bilamba bia ntenta kaba kamue ne tukanu atu, nunku ntenta wa tshitendelelu wakalua tshintu tshimue.

14 Pashishe wakenza bilamba bia ntenta ne miosa ya mbuji bua ntenta wa kubuikila pa mutu pa ntenta wa tshitendelelu. Wakenza bilamba bia ntenta 11.+ 15 Tshilamba tshia ntenta tshionso tshivua ne nkubita 30 mu bule ne nkubita inayi mu butshiama. Bilamba bia ntenta bionso 11 bivua bunene bumue. 16 Pashishe wakalamakaja bilamba bia ntenta bitanu kaba kamue, kulamakajaye bilamba bia ntenta bikuabu bisambombo kaba kamue. 17 Wakenza kabidi makoshi 50 ku muelelu kua tshilamba tshia ntenta tshivua ku ndekelu, muaba wa kutshilamakajila, kuenzaye kabidi makoshi 50 ku muelelu kua tshilamba tshia ntenta tshikuabu tshivuabu batshilamakaja natshi. 18 Pashishe wakenza tukanu tua kukanga natu 50 tua tshiamu tshia mitaku bua kulamakaja ntenta kaba kamue bua alue tshintu tshimue.

19 Wakenza tshibuikilu tshia ntenta ne biseba bikunjija bia bimpanga bia mikoko ne tshibuikilu tshia biseba bia nyama ya nkonga bua kubuikila pa mutu patshi.+

20 Pashishe wakenza nyunguluilu ya ntenta wa tshitendelelu ne mabaya a mutshi wa musese,+ mimanyika kuulu.+ 21 Nyunguluilu yonso uvua ne nkubita dikumi mu bule ne nkubita umue ne tshitupa mu butshiama. 22 Nyunguluilu yonso uvua ne tupayikilu* tubidi tulamakaja kamue ku kakuabu. Ke muakenzaye nyunguluilu yonso ya ntenta wa tshitendelelu nanku. 23 Nunku wakenza nyunguluilu bua luseke lua ku sud lua ntenta wa tshitendelelu, nyunguluilu 20, luseke ludi lutangile ku sud. 24 Pashishe wakenza ntaku 40 ya tshiamu tshia arjan mikale ne masoso ya kuteka muinshi mua nyunguluilu 20, ntaku ibidi mikale ne masoso muinshi mua nyunguluilu umue bua tupayikilu tuende tubidi, ne ntaku ibidi mikale ne masoso muinshi mua nyunguluilu yonso uvua ulonda bua tupayikilu tuende tubidi.+ 25 Bua luseke lukuabu lua ntenta wa tshitendelelu, luseke lua ku nord, wakenza nyunguluilu 20, 26 ne ntaku yayi 40 ya tshiamu tshia arjan mikale ne masoso, ntaku ibidi mikale ne masoso muinshi mua nyunguluilu umue ne ntaku ibidi mikale ne masoso muinshi mua nyunguluilu mikuabu yonso.

27 Bua luseke lua panyima pa ntenta wa tshitendelelu lua ku ouest, wakenza nyunguluilu isambombo.+ 28 Wakenza nyunguluilu ibidi bua yikale bipanda bia mu matumba a ntenta wa tshitendelelu mu matumba abidi a panyima. 29 Bipanda bivua bilamakaja bibidi kumbukila kuinshi too ne kuulu, too ne muaba uvua tshikanu tshia kumpala. Ke tshivuaye muenze ne bipanda bibidi bia mu matumba abi. 30 Nunku nyunguluilu yonso ivua muanda mukulu ne ntaku yayi 16 ya tshiamu tshia arjan mikale ne masoso, ntaku ibidi mikale ne masoso muinshi mua nyunguluilu yonso.

31 Pashishe wakenza mikamba ne mutshi wa musese, mikamba itanu bua nyunguluilu ya luseke lumue lua ntenta wa tshitendelelu+ 32 ne mikamba itanu bua nyunguluilu ya luseke lukuabu lua ntenta wa tshitendelelu ne itanu bua nyunguluilu ya ntenta wa tshitendelelu bua luseke lua panyima lua ku ouest. 33 Wakenza mukamba wa pankatshi bua wupitshile pankatshi pa nyunguluilu kumbukila ku ditengu dimue too ne ku dikuabu. 34 Wakalamika or ku nyunguluilu yonso, kuenzaye bikanu biayi bia or bua kubuejamu mikamba, ne kulamikaye or ku mikamba ayi.+

35 Pashishe wakenza tshilamba tshia kukosolola natshi+ ne buanda bua dikala dia ble, ne miosa mikunzubile ya mikoko ne buanda bukunze kunzuu ne buanda buluka bua line muimpe menemene. Wakazolapu bakeluba+ ne buanda.+ 36 Pashishe wakatshienzela makunji anayi a mutshi wa musese, kualamikaye or, pamue ne ndobo ya or, kuenzelaye kabidi makunji au ntaku inayi ya tshiamu tshia arjan mikale ne masoso. 37 Pashishe wakenza tshilamba tshia ku tshibuelelu tshia ntenta ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene biluka pamue,+ 38 kuenzaye kabidi makunji atshi atanu ne ndobo yawu. Wakalamika or ku nsongo yawu ne ku bikuatakajilu* biawu, kadi ntaku yawu itanu mikale ne masoso ivua ya tshiamu tshia mitaku.

37 Pashishe Besalele+ wakenza Mushete+ ne mabaya a mutshi wa musese. Uvua ne nkubita* ibidi ne tshitupa mu bule, nkubita umue ne tshitupa mu butshiama ne nkubita umue ne tshitupa mu butumbuke.+ 2 Yeye wakawulamika or muimpe menemene munda ne pambelu, kuwunyungululaye ne muelelu* wa or.+ 3 Pashishe wakawenzela bikanu binayi bia or bia kuasa ku mutu kua mikolo yawu inayi, bikanu bibidi ku luseke lumue ne bikanu bibidi ku luseke lukuabu. 4 Pashishe wakenza mikamba ne mutshi wa musese, kuyilamikaye or.+ 5 Pashishe wakabueja mikamba ayi mu bikanu ku nseke ya Mushete bua kuambula nayi Mushete au.+

6 Wakenza tshibuikidiji tshia or muimpe menemene.+ Tshivua ne nkubita ibidi ne tshitupa mu bule ne nkubita umue ne tshitupa mu butshiama.+ 7 Pashishe wakenza bakeluba babidi+ ku ntengu yonso ibidi ya tshibuikidiji ne or mufula.+ 8 Mukeluba umue uvua ku ditengu dimue ne mukeluba mukuabu ku ditengu dikuabu. Wakenza bakeluba ku ntengu yonso ibidi ya tshibuikidiji. 9 Bakeluba babidi abu bavua babalule mapuapua abu matangija muulu, babuikile tshibuikidiji ne mapuapua abu.+ Bavua batangilangane ne mpala yabu ivua mitangija pa tshibuikidiji.+

10 Pashishe wakenza mêsa ne mabaya a mutshi wa musese.+ Mêsa avua ne nkubita ibidi mu bule, nkubita umue mu butshiama ne nkubita umue ne tshitupa mu bule bua muulu.+ 11 Wakaalamika or muimpe menemene, kuanyungululaye ne muelelu* wa or. 12 Pashishe wakenza mubangubangu wa bunene bua tshianza* kumpenga kuawu ne muelelu* wa or ku mubangubangu au. 13 Pashishe wakenzela mêsa au bikanu binayi bia or, kuasaye bikanu abi ku matumba anayi muaba uvuabu bashile mikolo inayi. 14 Bikanu bivua pabuipi ne mubangubangu bua kuikalabi bikuata mikamba ivuabu bambula nayi mêsa. 15 Pashishe wakenza mikamba ne mutshi wa musese bua kuambula nayi mêsa, kuyilamikaye or. 16 Pashishe kuenzaye bintu bia kuteka ku mêsa ne or muimpe menemene: malongo awu, makopo awu, bibakudi ne mbidika biawu bivuabu bapongolola nabi milambu ya bia kunua.+

17 Pashishe wakenza tshitekelu tshia miendu+ tshia or muimpe menemene. Wakenza tshitekelu tshia miendu ne or mufula. Tshitaku tshiatshi, mulamba watshi, tuntaku tuatshi tua bilongo, bilongo biatshi bitshidi bivungamane, ne bilongo biatshi bikadi bikanguke bivua bienza ne tshipese tshimue tshijima.+ 18 Matamba asambombo avua mapatuke mu nseke yatshi, matamba asatu a tshitekelu tshia miendu mu luseke lumue ne matamba asatu mu luseke lukuabu. 19 Ku ditamba dionso dia luseke lumue kuvua tuntaku tusatu tua bilongo tuenza bu mudi bilongo bia mutshi wa amande ne bilongo bitshidi bivungamane ne bilongo bikadi bikanguke bienda bishintakanangana, ne ku ditamba dionso dia luseke lukuabu kuvua tuntaku tusatu tua bilongo tuenza bu mudi bilongo bia mutshi wa amande ne bilongo bitshidi bivungamane ne bilongo bikadi bikanguke bienda bishintakanangana. Wakenza nunku bua matamba onso asambombo avua mapatuke ku mulamba wa tshitekelu tshia miendu. 20 Ku mulamba wa tshitekelu tshia miendu kuvua tuntaku tunayi tua bilongo tuenza bu mudi bilongo bia mutshi wa amande, ne bilongo bitshidi bivungamane ne bilongo bikadi bikanguke bienda bishintakanangana. 21 Kuvua tshilongo tshitshidi tshivungamane muinshi mua matamba atshi abidi a kumpala avua mapatuke ku mulamba ne tshilongo tshitshidi tshivungamane muinshi mua matamba abidi avua alonda, ne tshilongo tshitshidi tshivungamane muinshi mua matamba makuabu abidi avua alonda, bua matamba asambombo avua mapatuke ku mulamba wa tshitekelu tshia miendu. 22 Bilongo bitshidi bivungamane ne matamba ne tshitekelu tshia miendu tshionso bivua bienza bua bikale tshipese tshimue tshia or muimpe menemene, or mufula. 23 Pashishe wakenza miendu yatshi muanda mutekete+ ne tushola tuatshi tua kukoka natu mikaba ya miendu* ne bintu biatshi bia kuambuila kapia, ne or muimpe menemene. 24 Wakatshienza, tshiotshi pamue ne bintu biatshi bionso, ne ntalanta* mujima wa or muimpe menemene.

25 Pashishe wakenza tshioshelu tshia musenga wa manananshi+ ne mabaya a mutshi wa musese. Tshivua ne nseke inayi ya bule bumue, nkubita umue mu bule ne nkubita umue mu butshiama ne nkubita ibidi mu butumbuke. Nsengu yatshi neyikale mienzelaku.+ 26 Wakatshilamika or muimpe menemene pa mutu patshi ne ku nseke yatshi yonso, ne ku nsengu yatshi, ne wakatshinyungulula ne muelelu* wa or. 27 Wakatshienzela bikanu bibidi bia or kuinshi kua muelelu* uvua mutshinyunguluke ku nseke ibidi ivua mitangilangane bua bikuate mikamba ya kutshiambula nayi. 28 Pashishe wakenza mikamba ne mutshi wa musese, kuyilamikaye or. 29 Wakenza kabidi manyi a tshijila a kuelangana,+ ne musenga wa manananshi muimpe menemene, wa mupuya muimpe,+ musambakaja bimpe menemene.*

38 Wakenza tshioshelu tshia mulambu wa kuosha ne mabaya a mutshi wa musese. Tshivua ne nseke inayi ya bule bumue, nkubita* itanu mu bule, nkubita itanu mu butshiama ne nkubita isatu mu butumbuke.+ 2 Pashishe wakenza nsengu pa matumba atshi anayi. Nsengu yatshi ivua mienzelaku. Pashishe wakatshilamika tshiamu tshia mitaku.+ 3 Pashishe wakenza bintu bia tshioshelu bionso: tumbeketshi, bikasu, bibakudi, nsomo, ne bintu bia kuambuila kapia. Wakenza bintu biatshi bionso ne tshiamu tshia mitaku. 4 Wakenzela kabidi tshioshelu kakanu kaluka ne nkanu ya tshiamu tshia mitaku muinshi mua mubangubangu, kuinshi lua pankatshi patshi. 5 Wakenza bikanu binayi mu matumba anayi pabuipi ne kakanu ka tshiamu tshia mitaku bua kukuatabi mikamba. 6 Pashishe wakenza mikamba ya mutshi wa musese, kuyilamikaye tshiamu tshia mitaku. 7 Wakabueja mikamba ayi mu bikanu bivua mu nseke ya tshioshelu bua kutshiambula nayi. Wakenza tshioshelu atshi tshienze bu mushete wa mabaya mutubuluke.

8 Pashishe wakenza dilongo dinene dia tshiamu tshia mitaku+ ne tshintu tshia kuditekela tshia tshiamu tshia mitaku; wakabienza ne mmuenu* ya bantu bakaji bavua balongolola bua kuenza mudimu ku tshibuelelu tshia ntenta wa kusambakena.

9 Pashishe wakenza lupangu.+ Bua luseke lua ku sud kua lupangu, ludi lutangile ku sud, wakenza bilamba bia kulembeleja ne buanda buluka bua line muimpe menemene, bule bua nkubita lukama.+ 10 Kuvua makunji 20 ne ntaku 20 ya tshiamu tshia mitaku mikale ne masoso, ne ndobo ya ku makunji ne bikuatakajilu* biawu bivua bia tshiamu tshia arjan. 11 Bua luseke lua ku nord, kuvua kabidi nkubita lukama ya bilamba bilembeleja. Makunji abi 20 ne ntaku yawu 20 mikale ne masoso bivua bia tshiamu tshia mitaku. Ndobo ya ku makunji ne bikuatakajilu* biawu bivua bia tshiamu tshia arjan. 12 Kadi bua luseke lua ku ouest, bilamba bilembeleja bivua bule bua nkubita 50. Kuvua makunji dikumi ne ntaku dikumi mikale ne masoso; ndobo ya ku makunji ne bikuatakajilu* biawu bivua bia tshiamu tshia arjan. 13 Bule bua luseke lua ku est, lua kudi dîba dipatukila, buvua bua nkubita 50. 14 Kuvua bilamba bilembeleja bule bua nkubita 15 luseke lumue lua tshibuelelu, ne makunji asatu ne ntaku isatu mikale ne masoso. 15 Bua luseke lukuabu lua tshibuelelu tshia lupangu, kuvua bilamba bilembeleja bule bua nkubita 15, ne makunji asatu ne ntaku isatu mikale ne masoso. 16 Bilamba bilembeleja bionso bivua binyunguluke lupangu bivua bienza ne buanda buluka bua line muimpe menemene. 17 Ntaku mikale ne masoso ya makunji ivua ya tshiamu tshia mitaku, ndobo ya makunji ne bikuatakajilu* biawu bivua bia tshiamu tshia arjan, nsongo yawu ivua milamika tshiamu tshia arjan, ne kuvua bintu bia kusuika nabi bia tshiamu tshia arjan bua makunji onso a ku lupangu.+

18 Tshilamba tshia ku tshibuelelu tshia lupangu tshivua tshiluka ne buanda bua dikala dia ble, ne miosa mikunzubile ya mikoko, ne buanda bukunze kunzuu ne buanda buluka bua line muimpe menemene. Tshivua ne nkubita 20 mu bule, ne nkubita itanu mu butumbuke, ne butumbuke ebu buvua bua muomumue ne bua bilamba bilembeleja bia ku lupangu.+ 19 Makunji atshi anayi ne ntaku yawu inayi mikale ne masoso bivua bia tshiamu tshia mitaku. Ndobo yawu ne bikuatakajilu* biawu bivua bia tshiamu tshia arjan, ne nsongo yawu ivua milamika tshiamu tshia arjan. 20 Mpopo yonso ya ntenta wa tshitendelelu ne ivua ku lupangu lujima ivua ya tshiamu tshia mitaku.+

21 Edi ndibala dia bintu bia mu ntenta wa tshitendelelu, ntenta wa Bujadiki,+ divuabu benze ku dîyi dia Mose, mudimu uvua bena Lewi+ benze ku bulombodi bua Itamâ+ muana wa muakuidi Alona. 22 Besalele+ muana wa Uli muana wa Hû wa mu tshisa tshia Yuda wakenza bionso bivua Yehowa mutumine Mose dîyi bua kuenza. 23 Uvua ne Oholiaba+ muana wa Ahisamaka wa mu tshisa tshia Dana, muntu uvua nsenda ne uvua uzola pa bilamba ne manda ne uvua uluka bilamba ne buanda bua dikala dia ble, miosa mikunzubile ya mikoko, buanda bukunze kunzuu, ne line muimpe menemene.

24 Or yonso uvuabu benze nende mudimu bua midimu yonso ya muaba wa tshijila uvua bungi bua muomumue ne bua or wa mulambu wa kukupakaja,+ mmumue ne: ntalanta* 29 ne nshekele* 730 bilondeshile nshekele wa muaba wa tshijila.* 25 Bungi bua arjan uvua bantu ba mu tshisumbu bavuabu bafunde mêna bafile buvua bua ntalanta lukama ne nshekele 1 775 bilondeshile nshekele wa muaba wa tshijila.* 26 Muntu yonso wa munkatshi mua bantu bavuabu bafunde mêna, kutuadijila ku bidimu 20 kubanda,+ wakafila tshitupa tshia nshekele bilondeshile nshekele wa muaba wa tshijila,* ne bantu abu bavua 603 550.+

27 Dienza dia ntaku mikale ne masoso ya muaba wa tshijila ne ntaku mikale ne masoso ya tshilamba tshia kukosolola natshi diakangata ntalanta lukama; ntaku lukama mikale ne masoso ivua bungi bumue ne ntalanta lukama, ntalanta umue bua ntaku yonso muikale ne disoso.+ 28 Wakenza ndobo ya makunji ne nshekele ya tshiamu tshia arjan 1 775, kulamikaye tshiamu tshia arjan ku nsongo yawu ne kualamakajaye pamue.

29 Mulambu* wa tshiamu tshia mitaku uvua wa ntalanta 70 ne nshekele 2 400. 30 Wakenza natshi ntaku mikale ne masoso ya ku tshibuelelu tshia ntenta wa kusambakena, tshioshelu tshia tshiamu tshia mitaku ne kakanu katshi ka tshiamu tshia mitaku, bintu bionso bia tshioshelu, 31 ntaku mikale ne masoso ya ku lupangu lujima, ntaku mikale ne masoso ya ku tshibuelelu tshia lupangu, mpopo yonso ya ntenta wa tshitendelelu ne mpopo yonso+ ya ku lupangu lujima.

39 Bakenza bilamba biluka bimpe menemene ne buanda bua dikala dia ble ne miosa mikunzubile ya mikoko ne buanda bukunze kunzuu+ bua kuenza nabi mudimu muaba wa tshijila. Bakenza bilamba bia tshijila bia Alona,+ anu muvua Yehowa mutumine Mose dîyi bua kuenza.

2 Wakenza efoda+ ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene. 3 Bakabatalaja bitata bia or, kubivuijabu bipepele menemene, kubikosabu bua kuenza nshinga ya kubuejakaja ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene, ne bakamulengeja ne buanda. 4 Bakenza bitupa bia efoda bia pa makaya bilamakajila ku mielelu yabi ibidi ya kuulu. 5 Mukaba muluka* uvua mutelela ku efoda bua kumulama musuika kaba kende+ uvua pawu muluka ne bintu bia muomumue: ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu ne buanda buluka bua line muimpe menemene, anu muvua Yehowa mutumine Mose dîyi bua kuenza.

6 Pashishe bakela mabue a onikse mu nyunguluilu ya or, ne bakuondolapu mêna a bana ba Isalele, anu muvuabu buondola tshitampi.+ 7 Bakaasa pa bilamba bia pa makaya bia efoda bua ikale mabue a tshivulukilu bua bana ba Isalele,+ anu muvua Yehowa mutumine Mose dîyi bua kuenza. 8 Pashishe bakenza tshilamba tshia pa tshiadi+ mushindu utu muntu utu ulengeja bilamba ne manda wenza, anu muvuabu benze efoda, ne or, ne buanda bua dikala dia ble, ne miosa mikunzubile ya mikoko, ne buanda bukunze kunzuu, ne buanda buluka bua line muimpe menemene.+ 9 Tshivua tshilua ne nseke inayi ya bule bumue pavuabu batshitshibulula mu bitupa bibidi. Bakenza tshilamba tshia pa tshiadi tshivua, pavuabu batshitshibulula mu bitupa bibidi, tshikale ne bule ne butshiama bua ntanta wa tshianza tshibalula.* 10 Bakasapu milongo inayi ya mabue. Mulongo wa kumpala uvua ne dibue dia ribi, dia topaze ne dia emerode. 11 Mulongo muibidi uvua ne dibue dia tirkuaze, dia safire ne dia jaspe. 12 Mulongo muisatu uvua ne dibue dia lesheme,* dia agate ne dia ametiste. 13 Mulongo muinayi uvua ne dibue dia krizolite, dia onikse ne dia jade. Bavua baele mu nyunguluilu ya or. 14 Mabue au avua apetangana ne mêna 12 a bana ba Isalele, ne mêna avua muondola anu bu tshitampi, dîna dionso dileja tshimue tshia ku bisa 12.

15 Pashishe bakenza shene miluka mienze bu mionji ya or muimpe menemene pa tshilamba tshia pa tshiadi.+ 16 Bakenza kabidi nyunguluilu ibidi ya or ne tukanu tubidi tua or, bobu kuasa tukanu tubidi atu mu matumba abidi a tshilamba tshia pa tshiadi. 17 Pashishe kubuejabu mionji ibidi ya or mu tukanu tubidi tuvua mu matumba a tshilamba tshia pa tshiadi. 18 Kubuejabu kabidi nsongo ibidi ya mionji ibidi ayi mu nyunguluilu ibidi, kuyisuikilabu ku bilamba bia pa makaya lua kumpala kua efoda. 19 Bakenza kabidi tukanu tubidi tua or, kutuasabu mu matumba abidi a ku muelelu wa munda wa tshilamba tshia pa tshiadi udi mutangile ku efoda.+ 20 Pashishe bakenza tukanu tukuabu tubidi tua or, kutuasabu lua kumpala kua efoda, kuinshi kua bilamba bia pa makaya, ku mutu kua muaba udi mukaba muluka* utuangana ne efoda. 21 Ndekelu wa bionso, bakasuika muonji wa dikala dia ble ku tukanu tua tshilamba tshia pa tshiadi ne ku tukanu tua efoda bua tshilamba tshia pa tshiadi tshisombe kaba katshi pa efoda, ku mutu kua mukaba muluka,* anu muvua Yehowa mutumine Mose dîyi bua kuenza.

22 Pashishe bakenza muzabi wa kawuyi maboko bua efoda, muluka kudi muluki wa bilamba,* muluka wonso ne buanda bua dikala dia ble.+ 23 Disoso dia muzabi wa kawuyi maboko divua lua munkatshi muawu, anu bu disoso dia kazaku ka mvita ka tuamu. Disoso diawu divua ne mubangubangu mudinyunguluke, bua kawupandiki to. 24 Pashishe bakenza bimuma bia grenade kuinshi kua muzabi wa kawuyi maboko ne buanda bua dikala dia ble, ne miosa mikunzubile ya mikoko, ne buanda bukunze kunzuu biluka pamue. 25 Bakenza kabidi tungonga tua or muimpe menemene, kutekabu tungonga atu munkatshi mua bimuma bia grenade kuinshi kuonso kua muzabi wa kawuyi maboko, munkatshi mua bimuma bia grenade; 26 bakenza bua kangonga kamue kalonde tshimuma tshia grenade, kangonga kamue ne tshimuma tshia grenade, kuinshi kuonso kua muzabi wa kawuyi maboko uvuabu bavuala bua kuenza nawu mudimu, anu muvua Yehowa mutumine Mose dîyi bua kuenza.

27 Bakenzela kabidi Alona ne bana bende ba balume mizabi ya line muimpe menemene miluka kudi muluki wa bilamba,*+ 28 ne tshilamba tshia kujingila ku mutu,+ ne tshilamba tshilengeja tshia kuvuala ku mutu+ tshia line muimpe menemene, ne tuputula* tua buanda buluka bua line+ muimpe menemene, 29 ne mukaba wa tshilamba muenza ne buanda buluka bua line muimpe menemene, ne buanda bua dikala dia ble, ne miosa mikunzubile ya mikoko, ne buanda bukunze kunzuu biluka pamue, anu muvua Yehowa mutumine Mose dîyi bua kuenza.

30 Ndekelu wa bionso bakenza tshitata tshia or muimpe menemene tshivua tshibalakana, tshimanyinu tshia tshijila tshia dibanjijibua,* bobu kufundapu miaku anu mutu muntu wondola pa tshitampi, ufundapu ne: “Bunsantu mbua Yehowa.”+ 31 Bakasuikaku muonji muenza ne buanda bua dikala dia ble bua kutshisuikila pa tshilamba tshia kujingila ku mutu, anu muvua Yehowa mutumine Mose dîyi bua kuenza.

32 Nunku mudimu wonso wa ntenta wa tshitendelelu, ntenta wa kusambakena, wakajika, ne bena Isalele bakenza bintu bionso bivua Yehowa mutumine Mose dîyi bua kuenza.+ Bakenza anu nanku.

33 Nunku bakalua ne ntenta wa tshitendelelu+ kudi Mose, ntenta+ ne bintu biende bionso: tukanu tua kumukanga natu,+ nyunguluilu yende ya mabaya,+ mikamba yende,+ makunji ende ne ntaku yende mikale ne masoso;+ 34 tshibuikilu tshia biseba bikunjija bia bimpanga bia mikoko,+ tshibuikilu tshia biseba bia nyama ya nkonga, tshilamba tshia kukosolola natshi;+ 35 mushete wa Bujadiki ne mikamba yawu+ ya kuwambuila ne tshibuikidiji;+ 36 mêsa, bintu biawu bionso+ ne mampa a dileja; 37 tshitekelu tshia miendu tshia or muimpe menemene, miendu yatshi+ miteka mu mulongo, ne bintu biatshi bionso+ ne mafuta a kutokesha nawu;+ 38 tshioshelu+ tshia or, manyi a kuelangana,+ musenga wa manananshi wa mupuya muimpe,+ tshilamba+ tshia mu mushiku wa mbelu wa ntenta; 39 tshioshelu tshia tshiamu tshia mitaku+ ne kakanu katshi ka tshiamu tshia mitaku, mikamba yatshi+ ya kutshiambuila, bintu biatshi bionso,+ dilongo dinene ne tshintu tshia kuditekela;+ 40 bilamba bia kulembeleja ku lupangu, makunji alu, ne ntaku yalu mikale ne masoso,+ tshilamba+ tshia ku tshibuelelu tshia lupangu, mionji ya ntenta ne mpopo yalu ya ntenta+ ne bintu bionso bia kuenza nabi mudimu mu ntenta wa tshitendelelu, bua ntenta wa kusambakena; 41 bilamba biluka bimpe menemene bua kuenza nabi mudimu muaba munsantu, bilamba bia tshijila bia muakuidi Alona,+ ne bilamba bia bana bende bua kuenzabu mudimu wa buakuidi.

42 Bena Isalele bakenza mudimu wonso bilondeshile bionso bivua Yehowa mutumine Mose dîyi bua kuenza.+ 43 Pavua Mose mutangile mudimu wabu wonso wakamona ne: bavua bawenze anu muvua Yehowa mutume dîyi bua kuenza; nunku Mose wakababenesha.

40 Pashishe Yehowa wakambila Mose ne: 2 “Mu dituku dia kumpala dia ngondo wa kumpala, udi ne bua kuasa ntenta wa tshitendelelu, ntenta wa kusambakena.+ 3 Utekamu mushete wa Bujadiki+ ne ujike Mushete ne tshilamba tshia kukosolola natshi.+ 4 Udi ne bua kubuejamu mêsa,+ kulonga bintu bia kutekapu, ne kubuejamu tshitekelu tshia miendu,+ ne kutemesha miendu yatshi.+ 5 Pashishe uteke tshioshelu tshia or bua musenga wa manananshi+ kumpala kua mushete wa Bujadiki, wele tshilamba* tshia ku tshibuelelu tshia ntenta wa tshitendelelu muaba watshi.+

6 “Udi ne bua kuteka tshioshelu tshia mulambu wa kuosha+ kumpala kua tshibuelelu tshia ntenta wa tshitendelelu, ntenta wa kusambakena, 7 ne uteke dilongo dinene pankatshi pa ntenta wa kusambakena ne tshioshelu, welamu mâyi.+ 8 Pashishe wase lupangu+ lunyunguluke ntenta wa tshitendelelu ne wele tshilamba*+ tshia ku tshibuelelu tshia lupangu. 9 Pashishe udi ne bua kuangata manyi a kuelangana+ ne kuela ntenta wa tshitendelelu ne bintu bionso bidimu manyi,+ ne kumujidila ne bintu biende bionso, bua alue tshintu tshia tshijila. 10 Udi ne bua kuela tshioshelu tshia mulambu wa kuosha ne bintu biatshi bionso manyi, ne kujidila tshioshelu, bua tshilue tshioshelu tshitambe tshijila.+ 11 Pashishe wele dilongo dinene ne tshintu tshia kuditekela manyi ne udijidile.

12 “Pashishe ulue ne Alona ne bana bende ba balume pabuipi ne tshibuelelu tshia ntenta wa kusambakena, ubambile bua buowe mâyi.+ 13 Udi ne bua kuvuadika Alona bilamba bia tshijila,+ kumuela manyi+ ne kumujidila, ne neangenzele mudimu wa buakuidi. 14 Pashishe usemeje bana bende ba balume ne ubavuadike mizabi.+ 15 Udi ne bua kubela manyi anu muuvua muele tatuabu+ bua bangenzele mudimu wa buakuidi, ne diedibua diabu dia manyi nedienze bua batungunuke ne kuikala bakuidi mu bipungu biabu bionso bua kashidi.”+

16 Mose wakenza malu bilondeshile bionso bivua Yehowa mumutumine dîyi bua kuenza.+ Wakenza anu nanku.

17 Mu ngondo wa kumpala, mu tshidimu tshibidi, mu dituku dia kumpala dia ngondo, bakasa ntenta wa tshitendelelu.+ 18 Pavua Mose muase ntenta wa tshitendelelu, wakateka ntaku mikale ne masoso+ panshi, kuimanyikaye nyunguluilu ya mabaya,+ kubuejaye mikamba,+ ne kuimanyikaye makunji ende. 19 Wakabalula ntenta+ pa mutu pa ntenta wa tshitendelelu, kutekaye tshibuikilu tshia ntenta pa mutu pende,+ anu muvua Yehowa mutumine Mose dîyi bua kuenza.

20 Pashishe wakangata Bujadiki,+ kubutekaye mu Mushete,+ kubuejaye mikamba+ ku Mushete, kutekaye tshibuikidiji+ pa Mushete.+ 21 Wakabueja Mushete mu ntenta wa tshitendelelu, kuelaye tshilamba tshia kukosolola natshi+ muaba watshi bua kujika mushete wa Bujadiki,+ anu muvua Yehowa mutumine Mose dîyi bua kuenza.

22 Pashishe wakateka mêsa+ mu ntenta wa kusambakena luseke lua ku nord kua ntenta wa tshitendelelu pambelu pa tshilamba tshia kukosolola natshi, 23 ne wakalongapu milongo ya mampa+ kumpala kua Yehowa, anu muvua Yehowa mutumine Mose dîyi bua kuenza.

24 Wakateka tshitekelu tshia miendu+ mu ntenta wa kusambakena, kumpala kua mêsa, luseke lua ku sud lua ntenta wa tshitendelelu. 25 Wakatemesha miendu+ kumpala kua Yehowa, anu muvua Yehowa mutumine Mose dîyi bua kuenza.

26 Pashishe wakateka tshioshelu tshia or+ mu ntenta wa kusambakena kumpala kua tshilamba tshia kukosolola natshi, 27 bua kuoshelapu+ musenga wa manananshi wa mupuya muimpe,+ anu muvua Yehowa mutumine Mose dîyi bua kuenza.

28 Pashishe wakela tshilamba*+ tshia ku tshibuelelu tshia ntenta wa tshitendelelu muaba watshi.

29 Wakateka tshioshelu tshia mulambu+ wa kuosha ku tshibuelelu tshia ntenta wa tshitendelelu, ntenta wa kusambakena, bua yeye kulambulapu mulambu wa kuosha+ ne mulambu wa ntete, anu muvua Yehowa mutumine Mose dîyi bua kuenza.

30 Pashishe wakateka dilongo dinene pankatshi pa ntenta wa kusambakena ne tshioshelu, yeye kuelamu mâyi a kuowa.+ 31 Mose ne Alona ne bana bende ba balume bakuowelaku mâyi ku bianza ne ku makasa. 32 Dîba dionso divuabu babuela mu ntenta wa kusambakena anyi balua ku tshioshelu, bavua buowa mâyi,+ anu muvua Yehowa mutumine Mose dîyi bua kuenza.

33 Ndekelu wa bionso, wakasa lupangu+ lunyunguluke ntenta wa tshitendelelu ne tshioshelu, kuelaye tshilamba* tshia ku tshibuelelu tshia lupangu.+

Nunku Mose wakajikija mudimu. 34 Ditutu diakatuadija kubuikila ntenta wa kusambakena, ne butumbi bua Yehowa buakuwula mu ntenta wa tshitendelelu.+ 35 Mose kakakokesha bua kubuela mu ntenta wa kusambakena to, bualu ditutu divua dimane pa mutu pa ntenta, ne butumbi bua Yehowa buvua buwule mu ntenta wa tshitendelelu.+

36 Mu bitupa bionso bia luendu luabu, pavua ditutu dijuka pa ntenta wa tshitendelelu, bena Isalele bavua basa luendu.+ 37 Kadi ditutu diodi kadiyi dijuke, kabavua basa luendu to, too ne dituku divuadi dijuka.+ 38 Bualu ditutu dia Yehowa divua pa mutu pa ntenta wa tshitendelelu mu munya, ne kapia kavua kimana pa mutu pa ntenta butuku ku mêsu kua nzubu mujima wa Isalele mu bitupa bionso bia luendu luabu.+