LUMU LUIMPE LUFUNDA KUDI YONE

1 Ku tshibangidilu Dîyi divuaku,+ Dîyi divua ne Nzambi,+ ne Dîyi divua nzambi.+ 2 Yeye eu uvua ne Nzambi ku tshibangidilu. 3 Bintu bionso biakafika ku dikalaku ku butuangaji buende,+ ne kakuena tshintu nansha tshimue tshivua tshifike ku dikalaku kabiyi ku butuangaji buende.

Tshidi tshifike ku dikalaku 4 ku butuangaji buende tshivua muoyo, ne muoyo au uvua butoke bua bantu.+ 5 Nunku butoke budi butokesha mu mîdima,+ kadi mîdima kayena mibupite bukole.

6 Muntu mukuabu wakalua uvuabu batume bu muleji mpala wa Nzambi; dîna diende divua Yone.+ 7 Muntu eu wakalua bu ntemu bua kufila bumanyishi bua bualu bua butoke,+ bua bantu ba mishindu yonso bitabuje ku butuangaji buende. 8 Yeye kavua butoke abu to,+ kadi uvua ne bua kumanyisha bua bualu bua butoke abu.

9 Butoke bulelela budi butokesha bantu ba mishindu yonso bukavua pa kulua pa buloba.+ 10 Yeye uvua pa buloba,+ ne ba pa buloba bakafika ku dikalaku ku butuangaji buende,+ kadi ba pa buloba kabakamumanya to. 11 Wakalua kuabu, kadi bena kuabu kabakamuitaba to. 12 Kadi wakapesha bantu bonso bakamuakidila bukokeshi bua kulua bana ba Nzambi,+ bualu bavua baleja ditabuja mu dîna diende.+ 13 Kabavua baledibue ku mashi anyi ku disua dia mubidi peshi ku disua dia muntu, kadi kudi Nzambi.+

14 Nunku Dîyi diakalua mubidi,+ diakasomba munkatshi muetu, tuakamona butumbi buende, butumbi bu bua muana mulela umuepele+ kudi tatu; uvua muwule tente ne dianyishibua* dia Nzambi ne bulelela. 15 (Yone wakamanyisha bualu buende, eyowa, wakela lubila ne: “Yeye ke muntu umvua muakule bua bualu buende ne: ‘Yeye udi ulua panyima panyi mmupite kumpala kuanyi, bualu uvuaku kumpala kuanyi.’”)+ 16 Bualu tuetu bonso tuvua bapetele ku tshiuwidi tshiende, mmumue ne: ngasa pa ngasa. 17 Bualu Mikenji yakafidibua ku butuangaji bua Mose,+ ngasa+ ne bulelela biakalua ku butuangaji bua Yezu Kristo.+ 18 Kakuena muntu ukadi mumone Nzambi musangu nansha umue;+ anu nzambi mulela umuepele+ udi ku luseke* lua Tatu+ ke udi mumvuije tshidiye.+

19 Ebu mbumanyishi buvua Yone mufile pavua bena Yuda bamutumine bakuidi ne bena Lewi bafumine ku Yelushalema bua kumukonka ne: “Wewe udi nganyi?”+ 20 Wakitaba, kakavila to, wakamba ne: “Meme tshiena Kristo to.” 21 Bakamukonka ne: “Kadi udi nganyi? Udi Eliya anyi?”+ Wakandamuna ne: “Tshiena yeye to.” “Udi Muprofete anyi?”+ Wakandamuna ne: “Tòo!” 22 Nunku bakamuambila ne: “Wewe udi nganyi? Tuambila bua tumone mua kuandamuna badi batutume. Udi wamba tshinyi bua bualu buebe?” 23 Wakamba ne: “Ndi dîyi dia muntu udi wela lubila mu tshipela ne: ‘Lulamijayi njila wa Yehowa,’*+ anu bu muvua muprofete Yeshaya muambe.”+ 24 Bantu bavuabu batume abu bavua bafume kudi Bafalese. 25 Nunku bakamuebeja, bamba ne: “Kadi wewe kuyi Kristo anyi Eliya peshi Muprofete, udi ubatizangana bua tshinyi?” 26 Yone wakabandamuna ne: “Meme ndi mbatizangana mu mâyi. Muntu mmuimane munkatshi muenu unudi kanuyi bamanye, 27 yeye udi ulua panyima panyi, tshiena mukumbane bua kusulula nshinga ya sandala wende.”+ 28 Malu aa akenzekela mu Betania dishiya dia Yadene, muaba uvua Yone ubatizangana.+

29 Dituku diakalonda, wakamona Yezu ulua kudiye, wakamba ne: “Monayi, Muana wa mukoko+ wa Nzambi udi umbusha mpekatu+ wa ba pa buloba!+ 30 Yeye ke umvua muambe bua bualu buende ne: ‘Panyima panyi padi palua muntu udi mupite kumpala kuanyi, bualu uvuaku kumpala kuanyi.’+ 31 Nansha meme tshivua mumumanye to, kadi bualu bumvua muluile mbatizangana mu mâyi buvua bua ne: amone mua kumueneshibua patoke kudi Isalele.”+ 32 Yone wakamanyisha kabidi, wamba ne: “Mvua mumone nyuma upueka mu diulu bu nyunyi wa nkutshi, kushalaye pa mutu pende.+ 33 Nansha meme tshivua mumumanye to, kadi Eu muine uvua muntume bua kubatizangana mu mâyi wakangambila ne: ‘Muntu uudi umona nyuma umupuekela, ushala pa mutu pende,+ yeye au ke udi ubatizangana mu nyuma muimpe.’*+ 34 Ndi mumone bualu ebu, ne ndi mumanyishe ne: yeye eu udi Muana wa Nzambi.”+

35 Dituku diakalonda kabidi, Yone uvua muimane ne babidi ba ku bayidi bende, 36 pavuaye mutangile Yezu upita, wakamba ne: “Tangilayi, Muana wa mukoko+ wa Nzambi!” 37 Pavua bayidi babidi abu bamumvue wamba bualu ebu, bakalonda Yezu. 38 Pashishe Yezu wakakudimuka, kubamonaye bamulonda, wakabakonka ne: “Nudi nukeba tshinyi?” Bakamuambila ne: “Labi (padibu bakudimuna muaku eu udi umvuija ne: “Mulongeshi”), udi musombele penyi?” 39 Wakabambila ne: “Luayi, nenumone.” Nunku bakaya, kumonabu muaba uvuaye usombela, kusombabu nende dituku adi; bikavua bu pa dîba dia dikumi.* 40 Andele,+ muanabu ne Simona Petelo, uvua umue wa ku bayidi babidi bavua bumvue tshivua Yone muambe ne balonde Yezu. 41 Kumpala, wakapeta muanabu Simona, kumuambilaye ne: “Tudi bapete Masiya”+ (padibu bakudimuna muaku eu udi umvuija ne: “Kristo”), 42 wakaya nende kudi Yezu. Pakamutangila Yezu, wakamba ne: “Wewe udi Simona,+ muana wa Yone; nebakubikile ne: Kefa” (dîna didibu bakudimuna ne: “Petelo”).+

43 Dituku diakalonda, uvua musue kuya ku Galela. Nunku Yezu wakapetangana ne Filipo,+ kumuambilaye ne: “Ndonda.” 44 Kadi Filipo uvua wa ku Betesaida, wa mu tshimenga tshia ba Andele ne Petelo. 45 Filipo wakapeta Natanaele,+ kumuambilaye ne: “Tudi bapete muntu uvua Mose mufunde mu Mikenji ne Baprofete bafunde: Yezu wa ku Nazaleta, muana wa Jozefe.”+ 46 Kadi Natanaele wakamuambila ne: “Tshintu tshimpe tshidiku mua kupatukila mu Nazaleta anyi?” Filipo wakamuambila ne: “Luaku umone.” 47 Yezu wakamona Natanaele ulua kudiye, kuambaye bua bualu buende ne: “Monayi, yeye udi bulelela muena Isalele udi kayi ne dishima munda muende.”+ 48 Natanaele wakamukonka ne: “Udi mummanye munyi?” Yezu wakamuandamuna ne: “Kumpala kua Filipo kukubikila, pauvua muinshi mua mutshi wa mfigi, mvua mukumone.” 49 Natanaele wakamuambila ne: “Labi, udi Muana wa Nzambi, udi Mukalenge wa Isalele.”+ 50 Yezu wakamuambila ne: “Udi witabuja bualu ndi mukuambile ne: Mvua mukumone muinshi mua mutshi wa mfigi anyi? Neumone malu manene kupita aa.” 51 Pashishe yeye wakamuambila ne: “Bulelela, bulelela, ndi nnuambila ne: nenumone diulu dibululuke ne banjelu ba Nzambi babanda bapueka kudi Muana wa muntu.”+

2 Mu dituku disatu, kuvua tshibilu tshia dibaka ku Kana wa Galela, mamuende wa Yezu uvuamu. 2 Bavua kabidi babikile Yezu ne bayidi bende mu tshibilu tshia dibaka atshi.

3 Pakajika mvinyo, mamuende wa Yezu wakamuambila ne: “Kabena ne mvinyo to.” 4 Kadi Yezu wakamuambila ne: “Mukaji, bualu ebu mbututangile nebe ku tshinyi?* Dîba dianyi ki ndianji kulua to.” 5 Mamuende wakambila bantu bavua benza mudimu ne: “Enzayi tshionso tshidiye unuambila.” 6 Kadi kuvua milondo ya mâyi ya mabue isambombo miteka muaba au anu muvua mikenji ya didilengeja ya bena Yuda ilomba,+ mulondo wonso uvua mua kubuela bipiminu* bibidi anyi bisatu bia bintu bia mâyi mâyi. 7 Yezu wakabambila ne: “Uwujayi milondo eyi ne mâyi.” Nunku bakayuwuja too ne pa mishiku. 8 Pashishe wakabambila ne: “Mpindieu tuntayi ndambu, nuye nende kudi mulombodi wa tshibilu.” Nunku bakaya nende. 9 Pakalabula mulombodi wa tshibilu mâyi akavuabu mpindieu bakudimune mvinyo, kayi mumanye kuvuayi mufumine (nansha muvua bena mudimu bavua batunte mâyi bamanye), mulombodi wa tshibilu wakabikila musedianganyi, 10 kumuambilaye ne: “Muntu yonso eu utu wanji ufila mvinyo mutambe buimpe, nanku padi bantu bakuatshika, ulua kufila udi mushadile. Wewe udi mulame mvinyo mutambe buimpe too ne mpindieu.” 11 Yezu wakenza bualu ebu mu Kana wa Galela bu ntuadijilu wa bimanyinu biende, wakamuenesha butumbi buende patoke,+ ne bayidi bende bakamuitabuja.

12 Panyima pa bualu ebu, yeye ne mamuende ne bana babu+ ne bayidi bende, bakapueka ku Kapênuma,+ kadi kabakashalaku matuku a bungi to.

13 Kadi Pasaka*+ wa bena Yuda ukavua pabuipi, ne Yezu wakabanda ku Yelushalema. 14 Wakasangana mu ntempelo bantu bapana ngombe, mikoko ne nyunyi ya nkutshi+ ne bashintudi ba makuta basombe mu nkuasa yabu. 15 Nunku yeye mumane kuenza mfimbu ne mionji, wakipata bantu bonso bavua ne mikoko ne ngombe, kubapatulaye mu ntempelo, kuitshikijaye makuta a binjanja a bashintudi panshi, kutonkolaye mêsa abu.+ 16 Wakambila bavua bapana nyunyi ya nkutshi ne: “Umbushayi bintu ebi muaba eu! Lekelayi kuvuija nzubu wa Tatu wanyi nzubu wa kuendela mushinga!”*+ 17 Bayidi bende bakavuluka tshidibu bafunde ne: “Tshisumi bua nzubu webe netshindie.”+

18 Nunku, bena Yuda bakamuebeja ne: “Ntshimanyinu kayi tshiudi mua kutuleja+ bua muudi wenza malu aa?” 19 Yezu wakabandamuna ne: “Upulayi ntempelo eu, nemmujule mu matuku asatu.”+ 20 Nanku bena Yuda bakamba ne: “Bavua bibake ntempelo eu munkatshi mua bidimu 46, wewe neumujule mu matuku asatu anyi?” 21 Kadi yeye uvua wakula bua ntempelo wa mubidi wende.+ 22 Kadi, pakamujulabu ku lufu, bayidi bende bakavuluka ne: uvua utamba kuakula bua bualu ebu,+ bakitabuja mufundu ne tshivua Yezu muambe.

23 Kadi, pavuaye mu Yelushalema mu tshibilu tshia Pasaka, bantu ba bungi bakitabuja dîna diende pakamonabu bimanyinu bivuaye wenza. 24 Kadi Yezu kavua mubeyemene bikole to, bualu uvua mubamanye bonso 25 ne bualu kavua dijinga ne muntu amanyishe bualu bua muntu to, bualu uvua mumanye tshivua munda mua muntu.+

3 Kuvua muntu mukuabu wa mu Bafalese dîna diende Nikodemo,+ uvua mulombodi wa bena Yuda. 2 Muntu eu wakalua kudiye butuku,+ kumuambilaye ne: “Labi,+ tudi bamanye ne: udi mulongeshi udi mufume kudi Nzambi, bualu muntu kena mua kuenza bimanyinu+ biudi wenza ebi padi Nzambi kayi nende to.”+ 3 Yezu wakamuandamuna ne: “Bulelela, bulelela, ndi nkuambila ne: Muntu yeye kayi muledibue tshiakabidi,*+ kena mua kumona Bukalenge bua Nzambi to.”+ 4 Nikodemo wakamuambila ne: “Mmunyi mudi muntu mua kuledibua pakadiye muntu mukole? Kena mua kubuela munda mua mamuende musangu muibidi bua kuledibua to, ki mmuomu?” 5 Yezu wakandamuna ne: “Bulelela, bulelela, ndi nkuambila ne: muntu yeye kayi muledibue kudi mâyi+ ne kudi nyuma,+ kena mua kubuela mu Bukalenge bua Nzambi to. 6 Tshidibu balela kudi mubidi mmubidi, tshidibu balela kudi nyuma nnyuma. 7 Kukemi bualu ndi nkuambila ne: Nuenu nudi ne bua kuledibua tshiakabidi. 8 Lupepele ludi lupepa kudilu lusue, udi umvua tshiona tshialu, kadi kuena mumanye kudilu lufuma ne kudilu luya to. Ke mudibi bua muntu yonso udi muledibue kudi nyuma.”+

9 Nikodemo wakamuebeja ne: “Mmunyi mudi malu aa mua kuenzeka?” 10 Yezu wakandamuna ne: “Wewe udi mulongeshi wa Isalele, kadi kuyi mumanye malu aa? 11 Bulelela, bulelela, ndi nkuambila ne: Tudi tuamba tshitudi bamanye, ne tumanyisha tshitudi bamone, kadi nuenu kanuena nuitaba bumanyishi butudi tufila. 12 Bingikala munuambile malu a pa buloba, kanuyi anu nuitabuja, mmunyi munuitabuja meme munuambile malu a mu diulu? 13 Bualu bukuabu, kakuena muntu ukadi mubande mu diulu,+ kadi anu yeye udi mufume mu diulu,+ Muana wa muntu. 14 Anu bu muvua Mose mukudike nyoka kuulu mu tshipela,+ ke mudibu ne bua kukudika Muana wa muntu kuulu,+ 15 bua muntu yonso udi umuitabuja amone mua kupeta muoyo wa tshiendelele.+

16 “Bualu Nzambi uvua munange ba pa buloba bikole menemene, kufikaye ne ku difila Muanende mulela umuepele,+ bua muntu yonso udi uleja ditabuja kudiye kabutudibu, kadi apete muoyo wa tshiendelele.+ 17 Bualu Nzambi kavua mutume Muanende pa buloba bua yeye kulumbuluisha ba pa buloba to, kadi mbua ba pa buloba bapandishibue ku butuangaji buende.+ 18 Muntu yonso udi uleja ditabuja kudiye kabakumulumbuluisha to.+ Muntu yonso udi kayi uleja ditabuja ukadi mumane kulumbuluishibua, bualu yeye ki mmuleje ditabuja mu dîna dia Muana mulela umuepele wa Nzambi to.+ 19 Mpindieu dilumbuluisha ndimanyine pa bualu ebu ne: butoke mbulue pa buloba,+ kadi bantu mbanange mîdima pamutu pa butoke, bualu midimu yabu ivua mibi. 20 Bualu muntu yonso udi wenza malu mabi mmukine butoke ne kena ulua ku butoke, bua midimu yende kayedibu patoke* to. 21 Kadi muntu yonso udi wenza malu malelela udi ulua ku butoke,+ bua midimu yende imueneshibue patoke mudiyi mienza mu diumvuangana ne Nzambi.”

22 Panyima pa bualu ebu, Yezu ne bayidi bende bakaya mu buloba bua Yudaya, kuenzaye nabu ndambu wa matuku kuntu aku, ubatizangana.+ 23 Kadi Yone pende uvua ubatizangana mu Ainona pabuipi ne Salima, bualu muaba au uvua mâyi a bungi,+ bantu bavua anu balua ne babatijibua;+ 24 bualu kabavua banji kuela Yone mu buloko to.+

25 Mpindieu bayidi ba Yone bakakokangana ne muena Yuda mukuabu bua bualu bua dilengejibua. 26 Nunku bakalua kudi Yone, kumuambilabu ne: “Labi, muntu unuvua nende dishiya dia Yadene, uuvua mumanyishe bualu buende au,+ tangila, muntu au udi ubatizangana, ne bantu bonso badi baya kudiye.” 27 Yone wakandamuna ne: “Muntu kena mua kupeta tshintu nansha tshimue padibu kabayi bamupeshatshi mu diulu to. 28 Nuenu bine nudi nunjadikila mumvua muambe ne: ‘Tshiena Kristo to,+ kadi bavua bantume kumpala kua yeye au.’+ 29 Muntu yonso udi ne mukaji wa kusela yeye ke musedianganyi.+ Kadi mulunda wa musedianganyi, padiye wimana nende ne umuteleja, udi ne disanka dipite bungi bua dîyi dia musedianganyi. Nunku disanka dianyi ndikumbane. 30 Yeye au udi ne bua kutungunuka ne kuvula, kadi meme ndi ne bua kutungunuka ne kukepa.”

31 Muntu udi ufumina muulu udi ku mutu+ kua bakuabu bonso. Muntu udi mufumine pa buloba ngua pa buloba ne udi wakula malu a pa buloba. Muntu udi ufumina mu diulu udi ku mutu kua bakuabu bonso.+ 32 Udi umanyisha malu avuaye mumone ne mumvue,+ kadi muntu nansha umue kena witaba malu adiye umanyisha.+ 33 Muntu yonso udi muitabe malu adiye umanyisha mmuatue tshitampi* ne: Nzambi udi mulelela.+ 34 Bualu yeye uvua Nzambi mutume udi wamba mêyi a Nzambi,+ bualu Yeye kena ufila nyuma ulobelela to.* 35 Tatu mmunange Muana+ ne mmufile bintu bionso mu bianza biende.+ 36 Muntu udi uleja ditabuja kudi Muana udi ne muoyo wa tshiendelele;+ muntu udi ubenga kutumikila Muana kakumona muoyo,+ kadi tshiji tshikole tshia Nzambi tshidi tshishala kudiye.+

4 Pakamanya Mukalenge ne: Bafalese bavua bumvue ne: Yezu uvua uvuija bantu ba bungi bayidi kupita Yone ne ubabatiza,+ 2 nansha muvua Yezu muine kayi ubatizangana, kadi bayidi bende ke bavua babatizangana, 3 wakumbuka mu Yudaya, kuyaye kabidi ku Galela. 4 Kadi bivua bikengela apitshile mu Samalea. 5 Nunku wakafika mu tshimenga tshia Samalea tshivuabu babikila ne: Suka, pabuipi ne mpata uvua Yakoba mupeshe muanende Jozefe.+ 6 Mu bulelela, tshina tshia mâyi tshia Yakoba tshivua muaba au.+ Mpindieu Yezu, bu muvuaye mutshioke bua luendu, uvua musombe ku tshina tshia mâyi atshi.* Dîba dikavua bu pa dîba disambombo.*

7 Mukaji mukuabu wa mu Samalea wakalua bua kusuna mâyi. Yezu kumuambila ne: “Mpesha koku mâyi a kunua.” 8 (Bualu bayidi bende bavua baye mu tshimenga bua kusumba biakudia.) 9 Ke mukaji muena Samalea au kumuambila ne: “Mmunyi muudi wewe, nansha muudi muena Yuda, undomba mâyi a kunua panyi meme muikale mukaji muena Samalea?” (Bualu bena Yuda kabena bapetangana ne bena Samalea to.)+ 10 Yezu wakamuandamuna ne: “Bu wewe mumanye dipa difila tshianana dia Nzambi+ ne muntu udi ukuambila ne: ‘Mpesha koku mâyi a kunua,’ uvua mua kuikala mumulombe, nunku yeye uvua mua kuikala mukupeshe mâyi a muoyo.”+ 11 Wakamuambila ne: “Mukalenge, kuena nansha ne mbeketshi wa kusuna nende mâyi, ne tshina ntshile. Nunku, mâyi a muoyo au udi uapetela penyi? 12 Wewe kuena munene kupita nkambua wetu Yakoba, uvua mutupeshe tshina etshi, ne uvua munue mâyi a muomu pamue ne bana bende ne bimuna biende to, ki mmuomu?” 13 Yezu wakamuandamuna ne: “Muntu yonso udi unua mâyi aa neumvue kabidi nyota. 14 Kadi muntu yonso udi unua mâyi angamupesha kakumvua kabidi nyota nansha kakese,+ kadi mâyi angamupesha nealue munda muende mushimi wa mâyi adi afukuka bua kufila muoyo wa tshiendelele.”+ 15 Mukaji wakamuambila ne: “Mukalenge, mpesha koku mâyi au, bua tshikadi kabidi ne nyota, anyi tshitungunuki ne kulua muaba eu bua kusuna mâyi.”

16 Wakamuambila ne: “Ndaku, ubikile bayebe, ulue muaba eu.” 17 Mukaji au wakandamuna ne: “Tshiena ne mulume to.” Yezu kumuambila ne: “Udi muambe bulelela paudi wamba ne: ‘Tshiena ne mulume.’ 18 Bualu uvua ne balume batanu ne mulume uudi nende mpindieu ki mbayebe to. Nanku udi muambe bulelela.” 19 Mukaji wakamuambila ne: “Mukalenge, ndi mumone ne: udi muprofete.+ 20 Bankambua betu bavua batendelela ku mukuna eu, kadi nuenu nudi nuamba ne: ku Yelushalema ke muaba udi bantu ne bua kutendelela.”+ 21 Yezu wakamuambila ne: “Mukaji, ngitabuja, dîba didi dilua dinuikala kanuyi mua kutendelela Tatu ku mukuna eu anyi ku Yelushalema. 22 Nuenu nudi nutendelela tshinudi kanuyi bamanye;+ tuetu tudi tutendelela tshitudi bamanye, bualu lupandu ludi lutuadija ne* bena Yuda.+ 23 Kadi dîba didi dilua, ne didiku mpindieu, dikala batendeledi balelela ne bua kutendelela Tatu ne nyuma ne bulelela, bualu, bushuwa, Tatu udi ukeba bua bantu ba nunku bamutendelele.+ 24 Nzambi udi Nyuma,+ ne badi bamutendelela badi ne bua kutendelela ne nyuma ne bulelela.”+ 25 Mukaji au wakamuambila ne: “Ndi mumanye ne: Masiya, udibu babikila ne: Kristo, udi ulua. Paluaye, neatumanyishe malu onso patoke.” 26 Yezu wakamuambila ne: “Meme udi wakula nebe eu ke yeye.”+

27 Anu dîba adi, bayidi bende bakafika, kukemabu bua muvuaye uyukila ne muntu mukaji. Kadi, muntu nansha umue kakamba ne: “Udi ukeba tshinyi?” peshi ne: “Bua tshinyi udi uyukila nende?” 28 Nunku mukaji au wakashiya mulondo wende wa mâyi, kuyaye mu tshimenga, kuambilaye bantu ne: 29 “Luayi, numone muntu mukuabu udi mungambile malu onso amvua muenze. Kena mua kuikala Kristo anyi?” 30 Bakumbuka mu tshimenga, kutuadijabu kulua kudiye.

31 Dîba adi bayidi bavua bamusengelela ne: “Labi,+ diaku koku.” 32 Kadi wakabambila ne: “Ndi ne biakudia binudi kanuyi bamanye.” 33 Nunku bayidi bakambilangana ne: “Kakuvua muntu uvua mumutuadile tshintu tshia kudia to, ki mmuomu?” 34 Yezu wakabambila ne: “Biakudia bianyi nkuenza disua dia yeye udi muntume+ ne kujikija mudimu wende.+ 35 Kanutu nuamba ne: nkushale ngondo inayi bua dinowa kutuadija anyi? Monayi! ndi nnuambila ne: Bandishayi mêsu enu ne monayi madimi, mmatoke bua kunowa.+ Mpindieu 36 munowi udi wangata difutu diende, ukunguija mamuma bua muoyo wa tshiendelele, bua mukunyi ne munowi basanke bonso pamue.+ 37 Bua bualu ebu dîyi edi ndilelela: Umue udi ukuna ne mukuabu udi unowa. 38 Mvua munutume bua kunowa tshinuvua kanuyi bakuatshile mudimu mukole. Bakuabu mbakuate mudimu mukole, kadi nuenu nudi basankile mu mudimu wabu mukole.”

39 Bena Samalea ba bungi ba mu tshimenga atshi bakamuitabuja bua dîyi dia mukaji uvua mujadike, wamba ne: “Mmungambile malu onso amvua muenze.”+ 40 Nunku, pakalua bena Samalea kudiye, bakamulomba bua kushala nabu, kushalaye muaba au matuku abidi. 41 Nunku bantu bakuabu ba bungi bakitabuja bua malu avuaye muambe, 42 kuambilabu mukaji au ne: “Katuena kabidi tuitabuja anu bua biuvua muambe to; bualu tudi badiumvuile tuetu nkayetu ne tudi bamanye ne: muntu eu udi bushuwa mupandishi wa ba pa buloba.”+

43 Panyima pa matuku abidi, wakumbuka muaba au, kuyaye ku Galela. 44 Kadi Yezu muine uvua muambe ne: muprofete katu ne butumbi mu ditunga diabu to.+ 45 Nunku pakafikaye mu Galela, bena Galela bakamuakidila, bualu bavua bamone malu onso avuaye muenze mu tshibilu ku Yelushalema,+ bualu bobu pabu bavua baye ku tshibilu atshi.+

46 Pashishe, wakalua kabidi ku Kana wa Galela, kuvuaye mukudimune mâyi malue mvinyo.+ Mpindieu kuvua muena mudimu mukuabu wa mukalenge uvua muanende usama mu Kapênuma. 47 Pakumvua muntu au ne: Yezu uvua mulue mu Galela ufumina ku Yudaya, wakaya kudiye, kumulombaye bua apueke ne ondope muanende, bualu ukavua pa kufua. 48 Kadi Yezu wakamuambila ne: “Nuenu kanuyi bamone bimanyinu ne malu a kukema kanuakuitabuja nansha kakese.”+ 49 Muena mudimu wa mukalenge wakamuambila ne: “Mukalenge, pueka kumpala kua muananyi mutekete kufuaye.” 50 Yezu wakamuambila ne: “Ndaku; muanebe udi ne muoyo.”+ Muntu au wakitabuja dîyi divua Yezu mumuambile, kuyaye. 51 Kadi patshivuaye mu njila wenda upueka, bapika bende bakasambakena nende bua kumuambila ne: muanende wa balume uvua ne muoyo.* 52 Nunku wakabebeja dîba divuaye mumvue bimpe. Bakamuandamuna ne: “Mubidi kapia uvua mumushile muaba malaba pa dîba dia muanda mutekete.”* 53 Nunku tatu au wakamanya ne: dîba adi mene ke divua Yezu mumuambile ne: “Muanebe udi ne muoyo.”+ Nanku yeye ne ba mu nzubu muende bonso bakitabuja. 54 Etshi tshivua tshimanyinu tshibidi+ tshivua Yezu muenze pakaluaye mu Galela ufumina ku Yudaya.

5 Panyima pa malu aa, kuvua tshibilu+ tshia bena Yuda, Yezu wakabanda ku Yelushalema. 2 Mpindieu, mu Yelushalema, ku Tshiibi tshia Mikoko+ kuvua dijiba dia mâyi divuabu babikila mu tshiena Ebelu ne: Beteseda, dikale ne mbalanda itanu. 3 Muomu amu muvua tshisumbu tshia bantu bavua basama, bampofu, balema ne aba bavua ne bitupa bia mubidi biuminyine* balale panshi. 4* —— 5 Kadi muntu mukuabu uvua muaba au uvua usama kukavua bidimu 38. 6 Pakamona Yezu muntu eu mulale panshi muaba au ne pakamanyaye ne: uvua usama kukavua bidimu bia bungi, wakamuambila ne: “Udi musue kumvua bimpe anyi?”+ 7 Muntu uvua usama au wakamuandamuna ne: “Mukalenge, tshiena ne muntu wa kungela mu dijiba dia mâyi padi mâyi avuanduluka, kadi pantshidi ngenda nya, muntu mukuabu udi upueka kumpala kuanyi.” 8 Yezu wakamuambila ne: “Juka! Ambula tshiata* tshiebe, enda.”+ 9 Diakamue muntu au wakumvua bimpe, kuambulaye tshiata* tshiende, kutuadijaye kuenda.

Dituku adi divua dia Nsabatu. 10 Nunku bena Yuda bakatuadija kuambila muntu uvuabu bondope au ne: “Lelu ndia Nsabatu, ki mbianyishibue bua wewe kuambula tshiata* to.”+ 11 Kadi wakabandamuna ne: “Yeye muine uvua mungondope uvua mungambile ne: ‘Ambula tshiata* tshiebe, enda.’” 12 Bakamukonka ne: “Mmuntu kayi uvua mukuambile ne: ‘Tshiambula, enda’?” 13 Kadi muntu uvuabu bondope au kavua mumanye ne: uvua nganyi to, bualu Yezu uvua muongoloke mubuele mu musumba wa bantu uvua muaba au.

14 Panyima pa malu aa, Yezu wakamusangana mu ntempelo, kumuambilaye ne: “Tangila, udi mumvue bimpe. Kuenji kabidi mpekatu to, bua bualu bukuabu butambe bubi kabukuenzekedi to.” 15 Muntu au wakaya, kuambilaye bena Yuda ne: Yezu ke uvua mumuondope. 16 Bua bualu ebu, bena Yuda bavua baluisha Yezu, bualu uvua wenza malu aa dituku dia Nsabatu. 17 Kadi wakabandamuna ne: “Tatu wanyi mmutungunuke ne kuenza mudimu too ne mpindieu, meme panyi ndi ntungunuka ne kuenza mudimu.”+ 18 Ke bualu kayi bena Yuda bakatuadija kukeba ne muoyo mujima bua kumushipa, bualu kavua anu ushipa mukenji wa Nsabatu to, kadi uvua kabidi ubikila Nzambi ne: Tatu wende,+ udivuija muomumue ne Nzambi.+

19 Nunku Yezu wakabambila ne: “Bulelela, bulelela, ndi nnuambila ne: Muana kena mua kudienzela bualu nansha bumue mu yeye nkayende to, kadi anu budiye umona Tatu wenza.+ Bualu malu onso adi Yeye au wenza, malu aa ke adi Muana wenza pende muomumue. 20 Bualu Tatu mmunange Muana+ ne udi umuleja malu onso adiye yeye muine wenza, neamuleje midimu minene kupita eyi, bua nuenu kukema.+ 21 Bualu anu bu mudi Tatu ujula bafue, ubapesha muoyo,+ nunku Muana pende udi upesha yonso udiye musue muoyo.+ 22 Bualu Tatu kena ulumbuluisha muntu nansha umue, kadi mmupeshe Muana dilumbuluisha dionso,+ 23 bua bantu bonso banemeke Muana anu bu mudibu banemeka Tatu. Muntu yonso udi kayi unemeka Muana kena unemeka Tatu udi mumutume to.+ 24 Bulelela, bulelela, ndi nnuambila ne: muntu yonso udi uteleja dîyi dianyi ne witabuja Yeye udi muntume, udi ne muoyo wa tshiendelele,+ kena upita ku dilumbuluisha to, kadi mmumbuke ku lufu muye ku muoyo.+

25 “Bulelela, bulelela, ndi nnuambila ne: dîba didi dilua, ne didiku mpindieu, diumvua bafue dîyi dia Muana wa Nzambi, aba badi bateya ntema nebikale ne muoyo. 26 Bualu anu bu mudi Tatu ne muoyo munda muende,*+ ke mudiye mupeshe kabidi Muana bukokeshi bua kuikala ne muoyo munda muende.+ 27 Mmumupeshe bukokeshi bua kulumbuluisha,+ bualu yeye udi Muana wa muntu.+ 28 Kanukemi bua bualu ebu, bualu dîba didi dilua diumvua bantu bonso badi mu nkita ya tshivulukilu dîyi diende+ 29 ne nebapatuke, bavua benza malu mimpe bua dibishibua ku lufu dia muoyo, bavua ne tshilele tshia kuenza malu mabi bua dibishibua ku lufu dia dilumbuluisha.+ 30 Tshiena mua kudienzela bualu nansha bumue mu meme nkayanyi to. Ndi ndumbuluisha bilondeshile tshindi ngumvua, ne dilumbuluisha dianyi ndiakane,+ bualu tshiena nkeba disua dianyi, kadi ndi nkeba disua dia yeye uvua muntume.+

31 “Bingikala meme nkayanyi njadika bualu buanyi, bujadiki buanyi ki mbulelela to.+ 32 Kudi muntu mukuabu udi ujadika bualu buanyi, ne ndi mumanye ne: malu adiye ujadika bua bualu buanyi mmalelela.+ 33 Nudi batume bantu kudi Yone, yeye mmunujadikile bulelela.+ 34 Kadi tshiena ngitaba bujadiki bua kudi muntu, kadi ndi ngamba malu aa bua nupandishibue. 35 Muntu au uvua muendu uvua utema ne ukenka, ne nuenu nuvua bitabe bua kusanka bikole bua tshitupa tshîpi mu butoke buende.+ 36 Kadi ndi ne bujadiki bunene kupita bua Yone, bualu midimu mine ivua Tatu wanyi mungambile bua kuenza, midimu indi ngenza eyi, idi ijadika ne: Tatu uvua muntume.+ 37 Tatu uvua muntume uvua mujadike yeye muine bualu buanyi.+ Kanuena banji kumvua dîyi diende musangu nansha umue anyi bamone tshimuenekelu tshiende to,+ 38 ne kanuena ne dîyi diende disombe munda muenu to, bualu kanuena nuitabuja eu muine uvuaye mutume.

39 “Nudi nukebulula mu Mifundu+ bualu nudi nuela meji ne: nenupete muoyo wa tshiendelele ku diambuluisha diayi; kadi yoyi mine eyi* ke idi ijadika bualu buanyi.+ 40 Kadi kanuena basue kulua kundi+ bua nuenu kupeta muoyo. 41 Tshiena ngitaba butumbi bua kudi bantu, 42 kadi ndi mumanye bimpe ne: kanuena ne dinanga dia Nzambi munda muenu to. 43 Ndi mulue mu dîna dia Tatu wanyi, kadi kanuena nungakidila to. Muntu mukuabu yeye mulue mu dîna diende nkayende, nenumuakidile. 44 Mmunyi munudi mua kuitabuja panudi nuitaba butumbi bua kudi umue ne mukuabu wa kunudi ne kanuyi nukeba butumbi budi bufuma kudi Nzambi umuepele?+ 45 Kanuedi meji ne: nennufunde kudi Tatu to; kudi muntu udi unufunda: Mose+ unudi batekemene. 46 Mu bulelela, bu nuenu bitabuje Mose, nuvua mua kungitabuja panyi, bualu yeye wakafunda bua bualu buanyi.+ 47 Kadi nuenu kanuyi nuitabuja mifundu yende, mmunyi munuitabuja bindi ngamba?”

6 Panyima pa malu aa, Yezu wakaya dishiya dia Mbuu wa Galela anyi Tibelia.+ 2 Musumba munene wa bantu uvua anu umulonda,+ bualu bavua bamone bimanyinu bia bishima bivuaye wenza pavuaye wondopa bantu bavua basama.+ 3 Nunku Yezu wakabanda ku mukuna, kusombaku ne bayidi bende. 4 Mpindieu Pasaka,+ tshibilu tshia bena Yuda, ukavua pabuipi. 5 Pakabandisha Yezu mêsu ne mumone ne: musumba munene wa bantu uvua ulua kudiye, wakambila Filipo ne: “Nkuepi kutuasumba mampa bua bantu aba kudia?”+ 6 Kadi, uvua wamba nanku bua kumuteta, bualu yeye uvua mumanye tshikavuaye pa kuenza. 7 Filipo wakamuandamuna ne: “Mampa a ndenaliyo* nkama ibidi kaakukumbana bua muntu yonso wa kudibu kupetaye kapese to.” 8 Umue wa ku bayidi bende, Andele, muanabu ne Simona Petelo, wakamuambila ne: 9 “Muana wa balume udi muaba eu ne mampa atanu a orje ne mishipa ya mikese ibidi. Kadi bintu ebi bidi mua kuenzela bantu bungi nunku tshinyi?”+

10 Yezu wakamba ne: “Sombeshayi bantu panshi.” Bu muvuaku mashinde a bungi muaba au, bantu balume bakasomba muaba au, batue ku 5 000.+ 11 Yezu wakangata mampa au ne yeye mumane kusakidila Nzambi, wakaabanyina bantu bavua basombe muaba au; wakenza bia muomumue ne mishipa ya mikese eyi, bakapeta bungi buvuabu basue. 12 Kadi pakukutabu, wakambila bayidi bende ne: “Sangishayi bipese bidi bishale, bua tshintu nansha tshimue katshijiminyi to.” 13 Nunku bakabisangisha pamue, kuwujabu bisaka 12 ne bipese bia mampa bivuabu bashiye kudi bantu bavua badie mampa atanu a orje.

14 Pakamona bantu tshimanyinu tshivuaye muenze, bakatuadija kuamba ne: “Eu udi bulelela Muprofete uvua ne bua kulua pa buloba.”+ 15 Nunku bu muvua Yezu mumanye ne: bavua bakeba kulua kumukuata bua kumuteka mukalenge, wakumbuka+ kabidi kuyaye ku mukuna anu yeye nkayende.+

16 Pakafika dilolo, bayidi bende bakapueka ku mbuu,+ 17 kubuelabu mu buatu, kuasabu luendu pa mbuu batangile ku Kapênuma. Dîba adi panshi pakavua pafiike, Yezu kavua muanji kulua kudibu to.+ 18 Kabidi, mbuu uvua wenda utomboka bualu tshipepele tshikole tshivua tshituta.+ 19 Kadi, pakavuabu bite buatu ntanta wa kilometre mitue ku itanu anyi isambombo,* bakamona Yezu wendela pa mâyi wenda usemena pabuipi ne buatu; buôwa buakabakuata. 20 Kadi wakabambila ne: “Mmeme; kanutshinyi to!”+ 21 Nunku bavua basue kumuambula mu buatu, diakamue buatu buakafika ku buloba buvuabu baya.+

22 Dituku diakalonda, musumba wa bantu bavua bashale dia muamua dia mbuu bakamona ne: kakuvua buatu muaba au to. Kuvua kabuatu muaba au, kadi Yezu kavua mubuelamu ne bayidi bende to, bualu bayidi bende bakavua baye nkayabu. 23 Kadi matu a ku Tibelia akafika pabuipi ne muaba uvuabu badiile mampa panyima pa Mukalenge mumane kusakidila Nzambi. 24 Nunku pakamona musumba wa bantu ne: Yezu ne bayidi bende kabatshivua muaba au, bakabanda mu matu abu, kuluabu ku Kapênuma bua kukeba Yezu.

25 Pakamupetabu dishiya dia mbuu, bakamuambila ne: “Labi,+ uvua mufike muaba eu dîba kayi?” 26 Yezu wakabandamuna ne: “Bulelela, bulelela, ndi nnuambila ne: nudi nunkeba ki mbua bimanyinu binuvua bamone, kadi mbualu nuvua badie mampa, bukute.+ 27 Kanuenji mudimu bua biakudia bidi binyanguka to, kadi enzayi mudimu bua biakudia bidi bishala bua muoyo wa tshiendelele,+ bikala Muana wa muntu ne bua kunupesha; bualu yeye eu ke udi Tatu, Nzambi muine, mutue tshitampi tshiende tshia dianyishibua.”+

28 Nunku bakamukonka ne: “Tudi ne bua kuenza tshinyi bua kukumbaja midimu ya Nzambi?” 29 Yezu wakabandamuna ne: “Mudimu wa Nzambi udi nunku: nuleje ditabuja mu muntu udiye mutume.”+ 30 Nanku bakamuambila ne: “Ntshimanyinu kayi tshiudi wenza+ bua tuetu tutshimone ne tukuitabuje? Mmudimu kayi uudi wenza? 31 Bankambua betu bavua badie mana mu tshipela,+ anu mudibu bafunde ne: ‘Wakabapesha diampa dia mu diulu bua kudia.’”+ 32 Pashishe Yezu wakabambila ne: “Bulelela, bulelela, ndi nnuambila ne: Mose kavua munupeshe diampa dia mu diulu to, kadi Tatu wanyi udi unupesha diampa dilelela dia mu diulu. 33 Bualu diampa dia Nzambi nyeye udi ufuma mu diulu ne upesha ba pa buloba muoyo.” 34 Nunku bakamuambila ne: “Mukalenge, ikala anu utupesha diampa edi.”

35 Yezu wakabambila ne: “Ndi diampa dia muoyo. Muntu yonso udi ulua kundi kakumvua kabidi nzala nansha kakese, ne muntu yonso udi uleja ditabuja kundi, kakumvua kabidi nyota nansha kakese.+ 36 Kadi anu mumvua munuambile: nudi bammone, kadi kanuena nuitabuja.+ 37 Bonso badi Tatu umpesha nebalue kundi, ne tshiakuipata muntu udi ulua kundi nansha;+ 38 bualu tshiena mufume mu diulu+ bua kuenza disua dianyi, kadi mbua kuenza disua dia yeye uvua muntume.+ 39 Disua dia yeye uvua muntume didi nunku: tshijimiji muntu nansha umue wa mu bantu bonso badiye mumpeshe, kadi mbabishe ku lufu+ dituku dia ku nshikidilu. 40 Bualu disua dia Tatu wanyi didi nunku: muntu yonso udi ujingulula Muana ne uleja ditabuja kudiye, ikale ne muoyo wa tshiendelele,+ ne nemmubishe ku lufu+ dituku dia ku nshikidilu.”

41 Nunku bena Yuda bakatuadija kunungana bua bualu buende, bualu uvua muambe ne: “Ndi diampa didi difume mu diulu.”+ 42 Nanku bakatuadija kuamba ne: “Eu ki n’Yezu muana wa Jozefe, utudi bamanye tatuende ne mamuende anyi?+ Kadi mmunyi mudiye wamba mpindieu ne: ‘Ndi mufume mu diulu’?” 43 Yezu wakabandamuna ne: “Lekelayi kunungana munkatshi muenu. 44 Muntu kena mua kulua kundi padi Tatu uvua muntume kayi mumukoke nansha,+ ne nemmubishe ku lufu dituku dia ku nshikidilu.+ 45 Mbafunde mu mikanda ya Baprofete ne: ‘Buonso buabu nebalongeshibue kudi Yehowa.’*+ Muntu yonso udi muteleje Tatu ne mulonge udi ulua kundi. 46 Kakuena muntu ukadi mumone Tatu,+ anu yeye udi mufume kudi Nzambi; yeye eu ukadi mumone Tatu.+ 47 Bulelela, bulelela, ndi nnuambila ne: muntu yonso udi witabuja udi ne muoyo wa tshiendelele.+

48 “Ndi diampa dia muoyo.+ 49 Bankambua benu bavua badie mana mu tshipela, kadi bakafua.+ 50 Edi ndiampa didi difuma mu diulu, bua muntu yonso adidie ne kafu to. 51 Ndi diampa didi ne muoyo divua difume mu diulu. Muntu yeye mudie diampa edi, neikale ne muoyo bua kashidi; bushuwa, diampa dingafila mmubidi wanyi bua muoyo wa ba pa buloba.”+

52 Nunku bena Yuda bakatuadija kukokangana, bamba ne: “Mmunyi mudi muntu eu mua kutupesha mubidi wende bua kudia?” 53 Ke Yezu kubambila ne: “Bulelela, bulelela, ndi nnuambila ne: nuenu kanuyi badie mubidi wa Muana wa muntu ne banue mashi ende, kanuena ne muoyo munda muenu to.+ 54 Muntu yonso udi udia mubidi wanyi ne unua mashi anyi, udi ne muoyo wa tshiendelele; nemmubishe ku lufu+ dituku dia ku nshikidilu; 55 bualu mubidi wanyi ntshiakudia tshilelela ne mashi anyi ntshiakunua tshilelela. 56 Muntu yonso udi udia mubidi wanyi ne unua mashi anyi, udi ushala mu buobumue nanyi, ne meme mu buobumue nende.+ 57 Anu bu muvua Tatu udi ne muoyo muntume ne bu mundi ne muoyo bua bualu bua Tatu, nunku kabidi muntu udi undia meme neikale ne muoyo bua bualu buanyi.+ 58 Edi ndiampa divua difume mu diulu. Kabiena bu pavua bankambua benu badie, kadi kufuabu to. Muntu yonso udi udia diampa edi neikale ne muoyo bua kashidi.”+ 59 Wakamba malu aa pavuaye ulongesha mu nsunagoga kampanda* mu Kapênuma.

60 Pakumvua ba bungi ba ku bayidi bende bualu ebu, bakamba ne: “Edi dîyi ndibi ditambe; nnganyi udi mua kuditeleja?” 61 Kadi bu muvua Yezu mumanye munda muende ne: bayidi bende bavua banungana bua bualu ebu, wakabambila ne: “Bualu ebu budi bunulenduisha anyi? 62 Nunku, ntshinyi tshienzeka nuenu bamone Muana wa muntu ubanda kuvuaye kumpala?+ 63 Nyuma ke udi ufila muoyo;+ mubidi kawena ne dikuatshisha nansha dikese. Mêyi andi munuambile adi nyuma ne adi muoyo.+ 64 Kadi kudi bamue ba kunudi badi kabayi bitabuja.” Bualu Yezu uvua mumanye katshia ku tshibangidilu bavua kabayi bitabuje ne muntu uvua mua kumutungila tshitungu.+ 65 Wakamba kabidi ne: “Ke bualu kayi ndi munuambile ne: muntu kena mua kulua kundi anu bobu bamuanyishile kudi Tatu.”+

66 Bua bualu ebu, ba bungi ba ku bayidi bende bakaya ku bintu bivua panyima,+ kabakenda kabidi nende nansha. 67 Ke Yezu kukonka bapostolo 12 ne: “Nuenu kanuena basue kuya penu to, ki mmuomu?” 68 Simona Petelo wakamuandamuna ne: “Mukalenge, netuye kudi nganyi?+ Wewe udi ne mêyi a muoyo wa tshiendelele.+ 69 Tudi bitabuje ne bafike ku dimanya ne: wewe udi Wa Tshijila wa Nzambi.”+ 70 Yezu kubambila ne: “Mvua munusungule nuenu 12, ki mmuomu anyi?+ Kadi umue wenu mmushiminyinyanganyi wa malu.”*+ 71 Mu bulelela, yeye uvua wakula bua Yudasa muana wa Simona Isakaliote, bualu yeye eu uvua ne bua kumutungila tshitungu, nansha muvuaye umue wa ku bapostolo 12.+

7 Panyima pa malu aa, Yezu wakatungunuka ne kunyunguluka* mu Galela, bualu kavua musue kuenza nanku mu Yudaya to, bualu bena Yuda bavua bakeba bua kumushipa.+ 2 Kadi Tshibilu tshia bena Yuda tshia Nzubu ya ntenta*+ tshikavua pabuipi. 3 Nunku bana babu+ bakamuambila ne: “Umbuka muaba eu, ndaku mu Yudaya, bua bayidi bebe bamone pabu midimu iudi wenza. 4 Bualu padi muntu ukeba kumanyika ku bantu kena wenza bualu nansha bumue mu musokoko to. Biwikala wenza malu aa, udileje patoke kudi ba pa buloba.” 5 Mu bulelela, bana babu kabavua baleja ditabuja kudiye to.+ 6 Nunku Yezu wakabambila ne: “Dîba dianyi ki ndianji kufika to,+ kadi dîba dienu didi misangu yonso pabuipi. 7 Ba pa buloba kabena ne tshidibu mua kunukinyina, kadi mbankine meme, bualu ndi njadika bualu buabu ne: midimu yabu mmibi.+ 8 Nuenu bandayi ku tshibilu; tshiena nganji mbanda ku tshibilu etshi to, bualu dîba dianyi ki ndianji kulua dionso to.”+ 9 Nunku yeye mumane kubambila malu aa, wakashala mu Galela.

10 Kadi pakavua bana babu babande ku tshibilu etshi, nunku yeye pende wakabandaku mu musokoko bantu kabayi bamanye. 11 Nunku bena Yuda bakatuadija kumukeba mu tshibilu atshi, bamba ne: “Muntu au udi penyi?” 12 Bavua banungana bikole bua bualu buende munkatshi mua misumba ya bantu. Bamue bavua bamba ne: “Mmuntu muimpe.” Bakuabu pabu bamba ne: “Ki mmuntu muimpe to. Udi upambuisha musumba wa bantu.”+ 13 Bushuwa, muntu nansha umue kavua wakula bualu buende patoke to, bualu bavua batshina bena Yuda.+

14 Pakavua tshibilu munkatshi, Yezu wakabanda, kubuelaye mu ntempelo, kutuadijaye kulongesha. 15 Nanku bena Yuda bavua bakema, bamba ne: “Mmunyi mudi muntu eu ne dimanya dia Mifundu+ dia mushindu eu pende kayi mulonge tulasa?”*+ 16 Ke Yezu kubandamuna, kuambaye ne: “Malu andi ndongesha ki nganyi to, kadi nga udi muntume.+ 17 Muntu yeye musue kuenza disua Diende, neamanye bikala dilongesha edi difumina kudi Nzambi+ anyi bingikala ngakula bilondeshile meme nkayanyi. 18 Muntu yonso udi wakula bilondeshile yeye nkayende udi ukeba butumbi buende yeye nkayende; kadi muntu yonso udi ukeba butumbi bua yeye udi mumutume,+ yeye eu mmulelela, ne malu adi kaayi makane kaena munda muende. 19 Mose wakanupesha Mikenji,+ ki mmuomu? Kadi muntu nansha umue wa kunudi kena utumikila Mikenji ayi to. Nudi nukeba kunshipa bua tshinyi?”+ 20 Musumba wa bantu wakamuandamuna ne: “Udi ne demon. Udi ukeba kukushipa nnganyi?” 21 Yezu wakabandamuna ne: “Mvua muenze bualu bumue tshianana, nuenu bonso nudi nukema. 22 Bua bualu ebu Mose wakanupesha ditengudibua,+ ki mbua ne: ndia kudi Mose to, kadi ndia kudi bankambua,+ ne nuenu nudi nutengula muntu dituku dia nsabatu. 23 Bikalabu batengula muntu dituku dia nsabatu bua kubenga kushipa Mikenji ya Mose, nuenu nudi nunkuatshila tshiji tshikole bualu mvua muondope muntu mumvue bimpe menemene dituku dia nsabatu anyi?+ 24 Lekelayi kulumbuluishangana bilondeshile tshimuenekelu, kadi nulumbuluishe ne dilumbuluisha diakane.”+

25 Nunku bamue bantu ba mu Yelushalema bakatuadija kuamba ne: “Muntu eu ke udibu bakeba bua kushipa au, ki mmuomu?+ 26 Kadi tangilayi! udi wakula kumpala kua bantu ne kabena bamuambila bualu. Bakokeshi mbafike ku dimanya bulelela ne: yeye ke Kristo anyi? 27 Petu tudi bamanye kudi muntu eu mufumine;+ kadi padi Kristo ulua, muntu kakumanya kudiye mufumine to.” 28 Nunku pavua Yezu ulongesha mu ntempelo, wakela dîyi ne: “Nuenu nudi bammanye meme ne bamanye kundi mufumine. Meme tshiena mudiluile mu meme nkayanyi to,+ kadi Yeye uvua muntume udiku bulelela, ne kanuena bamumanye to.+ 29 Ndi mumumanye,+ bualu ndi muleji mpala udi ufuma kudiye, ne Yeye au ke uvua muntume.” 30 Nunku, bakatuadija kukeba bua kumukuata,+ kadi muntu nansha umue kakamulenga tshianza, bualu dîba diende kadivua dianji kukumbana to.+ 31 Nansha nanku, bantu ba bungi ba mu musumba wa bantu bakamuitabuja,+ ne bavua bamba ne: “Padi Kristo ulua, kakuenza bimanyinu bipite bidi muntu eu wenza to, ki mmuomu?”

32 Bafalese bakumvua musumba wa bantu unungana malu aa bua bualu buende, ke bamfumu ba bakuidi ne Bafalese kutumabu balami bua kumukuata. 33 Pashishe Yezu wakamba ne: “Nengikale kabidi nenu bua tshitupa tshîpi kumpala kua meme kuya kudi Yeye uvua muntume.+ 34 Nenunkebe, kadi kanuakumpeta, kanuena mua kulua muaba undi to.”+ 35 Nunku, bena Yuda bakambilangana ne: “Muntu eu mmusue kuya kuepi kutudi katuyi mua kumupeta? Ki mmusue kuya kudi bena Yuda badi batangalake munkatshi mua bena Greke ne kulongesha bena Greke to, ki mmuomu? 36 Udi usua kuamba tshinyi padiye wamba ne: ‘Nenunkebe, kadi kanuakumpeta, ne kanuena mua kulua muaba undi’?”

37 Dituku dia ndekelu, dituku dinene dia tshibilu,+ Yezu wakimana kuulu, kuelaye dîyi ne: “Muntu yeye ne nyota, alue kundi, anue.+ 38 Muntu yonso udi ungitabuja, anu bu mudi mufundu eu muambe: ‘Munda muende menemene nemupatuke misulu ya mâyi a muoyo ipueka.’”+ 39 Kadi wakamba bualu ebu bua bualu bua nyuma ukavua bantu bavua bamuitabuje pa kupeta; bualu kakuvua kuanji kuikala nyuma,+ bualu Yezu kavua muanji kutumbishibua to.+ 40 Bamue bantu ba mu musumba wa bantu bavua bumvue mêyi aa bakatuadija kuamba ne: “Eu udi bulelela Muprofete.”+ 41 Bakuabu bavua bamba ne: “Eu udi Kristo.”+ Kadi banga bavua bamba ne: “Kristo kena ufumina mu Galela to, ki mmuomu?+ 42 Mufundu kawena wamba ne: Kristo udi ufumina mu bana ba Davidi,+ ku Beteleheme,+ musoko uvua Davidi anyi?”+ 43 Nunku ditapuluka diakajuka munkatshi mua musumba wa bantu bua bualu buende. 44 Nansha muvua bamue ba kudibu bakeba kumukuata, kadi muntu nansha umue kakamulenga bianza.

45 Nunku balami bakapingana kudi bamfumu ba bakuidi ne Bafalese, bobu aba kubakonka ne: “Bua tshinyi kanuena balue nende?” 46 Balami bakandamuna ne: “Katshia muntu nansha umue katu muanji kuakula mushindu eu to.”+ 47 Ke Bafalese kubambila ne: “Nuenu penu kanuena bapambuishibue to, ki mmuomu? 48 Mukokeshi nansha umue anyi Mufalese ki mmumuitabuje to, ki mmuomu?+ 49 Kadi musumba wa bantu udi kawuyi mumanye Mikenji eu mbantu bedibue mulawu.” 50 Nikodemo, uvua mulue kudiye musangu mushale, uvua umue wa kudibu, wakabambila ne: 51 “Mikenji yetu kayena ilumbuluisha muntu anu padibu banji kumuteleja ne bamanye tshidiye wenza, ki mmuomu?”+ 52 Bakamuandamuna ne: “Wewe pebe kuena ufumina mu Galela to, ki mmuomu? Kebulula, umone ne: kakuena muprofete wajulabu ufumina mu Galela to.”*

8 12 Pashishe Yezu wakakula kabidi nabu, wamba ne: “Ndi butoke bua pa buloba.+ Muntu yonso udi undonda kakuendela mu mîdima nansha kakese, kadi neikale ne butoke+ bua muoyo.” 13 Nunku Bafalese bakamuambila ne: “Udi ujadika bualu buebe nkayebe; bujadiki buebe ki mbulelela to.” 14 Yezu wakabandamuna ne: “Nansha mundi njadika bualu buanyi nkayanyi, bujadiki buanyi mbulelela, bualu ndi mumanye kumvua mufume ne kundi nya.+ Kadi nuenu kanuena bamanye kumvua mufume ne kundi nya to. 15 Nudi nulumbuluisha malu mu mubidi;*+ meme tshiena ndumbuluisha muntu nansha umue. 16 Kadi nansha meme ndumbuluisha, dilumbuluisha dianyi ndilelela, bualu tshiena nkayanyi to, kadi Tatu uvua muntume udi nanyi.+ 17 Kabidi, mbafunde mu Mikenji yenu ne: ‘Bujadiki bua bantu babidi mbulelela.’+ 18 Meme ke udi ujadika bualu buanyi nkayanyi, ne Tatu uvua muntume udi ujadika bualu buanyi.”+ 19 Pashishe bakamukonka ne: “Tatu webe udi penyi?” Yezu wakandamuna ne: “Kanuena bammanye ni mmeme ni n’Tatu wanyi to.+ Bu nuenu bammanye, nuvua kabidi mua kumanya Tatu wanyi.”+ 20 Wakakuila mêyi aa muaba wa tushete tua diela makuta+ pavuaye ulongesha mu ntempelo. Kadi muntu nansha umue kakamukuata, bualu dîba diende kadivua dianji kukumbana to.+

21 Nunku wakabambila kabidi ne: “Meme ndi nya, nenunkebe, kadi nuenu nenufue mu mpekatu wenu.+ Kanuena mua kulua muaba undi nya.”+ 22 Ke bena Yuda kutuadija kuamba ne: “Kakudishipa to, ki mmuomu? Bualu udi wamba ne: ‘Kanuena mua kulua muaba undi nya.’” 23 Wakabambila kabidi ne: “Nuenu nudi bafumine miaba ya panshi; meme ndi mufumine miaba ya muulu.+ Nuenu nudi bafumine pa buloba ebu; meme tshiena mufumine pa buloba ebu to. 24 Ke bualu kayi mvua munuambile ne: Nenufue mu mpekatu yenu. Bualu binuikala kanuyi nuitabuja ne: meme ndi yeye, nenufue mu mpekatu yenu.” 25 Nunku bakatuadija kumukonka ne: “Wewe udi nganyi?” Yezu wakabandamuna ne: “Bua tshinyi mene ndi ngakula nenu? 26 Ndi ne malu a bungi a kuamba bua bualu buenu ne a kulumbuluisha. Mu bulelela, Yeye uvua muntume mmulelela, ne malu mine amvua mumvue kudiye, ndi ngambila ba pa buloba.”+ 27 Kabavua bajingulule ne: uvua ubambila bualu bua Tatu to. 28 Pashishe Yezu wakamba ne: “Panuikala bakudike Muana wa muntu kuulu,+ dîba adi nenumanye ne: meme ndi yeye+ ne tshitu ndienzela bualu mu meme nkayanyi to;+ kadi ndi ngakula malu aa anu muvua Tatu mundongeshe. 29 Eu uvua muntume udi nanyi; kavua mundekele nkayanyi to, bualu misangu yonso ndi ngenza malu adi amusankisha.”+ 30 Pavuaye wamba malu aa, bantu ba bungi bakamuitabuja.

31 Pashishe Yezu wakambila kabidi bena Yuda bavua bamuitabuje ne: “Nuenu bashale mu dîyi dianyi, nudi bushuwa bayidi banyi, 32 ne nenumanye bulelela,+ ne bulelela nebunupeshe budikadidi.”+ 33 Bakamuandamuna ne: “Tuetu tudi bana ba Abalahama, katutu banji kuikala bapika ba muntu nansha. Mmunyi muudi wamba ne: ‘Nenupete budikadidi’?” 34 Yezu wakabandamuna ne: “Bulelela, bulelela, ndi nnuambila ne: muenji wa mpekatu yonso mmupika wa mpekatu.+ 35 Bualu bukuabu, mupika katu ushala mu nzubu mua mfumuende kashidi to; muana udi ushalamu kashidi. 36 Nunku Muana yeye munupeshe budikadidi, nenuikale bushuwa ne budikadidi. 37 Ndi mumanye ne: nudi bana ba Abalahama. Kadi nudi nukeba kunshipa bualu dîyi dianyi kadiena diya kumpala munkatshi muenu to. 38 Ndi ngakula malu amvua mumone pantshivua kudi Tatu wanyi,+ kadi nuenu nudi nuenza malu anuvua bumvue kudi tatuenu.” 39 Bakamuandamuna ne: “Abalahama ke tatuetu.” Yezu wakabambila ne: “Bu nuenu bikale bana ba Abalahama,+ nuvua mua kuikala nuenza bienzedi bia Abalahama. 40 Kadi mpindieu nudi nukeba bua kunshipa meme muntu udi munuambile bulelela bumvua mumvue kudi Nzambi.+ Abalahama kavua muenze nunku to. 41 Nuenu nudi nuenza bienzedi bia tatuenu.” Bakamuambila ne: “Katuvua baledibue mu buendenda* to; tudi ne Tatu umue, Nzambi.”

42 Yezu wakabambila ne: “Bu Nzambi muikale Tatu wenu, nuvua mua kunnanga,+ bualu mvua mufume kudi Nzambi ne ndi muaba eu. Tshiena mudiluile mu meme nkayanyi to, kadi Yeye au uvua muntume.+ 43 Bua tshinyi kanuena nujingulula malu andi ngamba? Bualu kanuena mua kuteleja dîyi dianyi to. 44 Nuenu nudi bafume kudi tatuenu Diabolo, ne nudi basue kukumbaja majinga a tatuenu.+ Yeye au uvua mushipianganyi pakabangaye,*+ kakimana bikole mu bulelela, bualu bulelela kabuena munda muende to. Padiye wamba bualu bua dishima, udi wakula bilondeshile tshidiye menemene, bualu mmuena dishima ne tatu wa dishima.+ 45 Kadi meme, bualu ndi nnuambila bulelela, kanuena nungitabuja to. 46 Nnganyi wenu udi untuisha mundi ne mpekatu? Bingikala ngamba bulelela, bua tshinyi kanuena nungitabuja? 47 Muntu udi mufume kudi Nzambi udi uteleja mêyi a Nzambi.+ Ke bualu kayi kanuena nuteleja, bualu kanuena bafume kudi Nzambi to.”+

48 Bena Yuda bakamuandamuna ne: “Katuena tuambilamu patudi tuamba ne: ‘Wewe udi muena Samalea+ ne udi ne demon’ anyi?”+ 49 Yezu wakandamuna ne: “Tshiena ne demon to, kadi ndi nnemeka Tatu wanyi, nuenu kanuena nunnemeka to. 50 Kadi meme tshiena ndikebela butumbi buanyi nkayanyi to;+ kudi Eu udi ukeba ne ulumbuluisha. 51 Bulelela, bulelela, ndi nnuambila ne: muntu yeye mutumikile dîyi dianyi kakumona lufu nansha kakese.”+ 52 Bena Yuda bakamuambila ne: “Mpindieu tudi bajadike ne: udi ne demon. Abalahama wakafua ne baprofete kabidi, kadi wewe udi wamba ne: ‘Muntu yeye mutumikile dîyi dianyi kakulabula lufu nansha kakese.’ 53 Wewe kuena munene kupita tatuetu Abalahama wakafua to, ki mmuomu? Baprofete bakafua pabu. Wewe udi udiangata bu nganyi?” 54 Yezu wakandamuna ne: “Bingikala nditumbisha nkayanyi, butumbi buanyi budi tshianana. Tatu wanyi ke udi untumbisha,+ yeye unudi nuamba ne: n’Nzambi wenu. 55 Penu kanuena bamumanye to,+ kadi meme ndi mumumanye.+ Meme muambe ne: tshiena mumumanye, nengikale muena dishima bu nuenu. Kadi ndi mumumanye ne ndi ntumikila dîyi diende. 56 Abalahama tatuenu wakasanka bikole bua ditekemena dia kumona dituku dianyi, wakadimona, kusankaye.”+ 57 Nunku bena Yuda bakamuambila ne: “Kuena muanji kukumbaja nansha bidimu 50 to, Abalahama ke uukadi mumone?” 58 Yezu wakabambila ne: “Bulelela, bulelela, ndi nnuambila ne: kumpala kua Abalahama kuikalaku, meme mvuaku.”+ 59 Nanku bakangula mabue bua kumuasa, kadi Yezu wakasokoma, kupatukaye mu ntempelo.

9 Pavuaye upita, wakamona muntu mukuabu uvua mpofu katshia waledibua. 2 Bayidi bende bakamukonka ne: “Labi,+ nnganyi uvua muenze mpekatu, mmuntu eu anyi mbaledi bende, bua kuledibuaye mpofu?” 3 Yezu wakandamuna ne: “Muntu eu anyi baledi bende kabavua benze mpekatu to, kadi bivua bua midimu ya Nzambi imueneshibue patoke mu bualu buende.+ 4 Tudi ne bua kuenza midimu ya Yeye uvua muntume patutshidi mu munya;+ butuku budi bulua buikala muntu kayi mua kuenza mudimu. 5 Pantshidi pa buloba, ndi butoke bua ba pa buloba.”+ 6 Yeye mumane kuamba malu aa, wakatuila mate panshi, kusopa bitotshi ne mate ende, kulabaye bitotshi abi pa mêsu a muntu au,+ 7 kumuambilaye ne: “Ndaku wowe mâyi mu dijiba dia Siloama” (muaku udibu bakudimuna ne: “Mutumibue”). Nunku wakaya, kuowaye mâyi, ne kupinganaye umona.+

8 Pashishe bena mutumba ne bantu bavua bamumona kumpala ne: uvua mulombi wa ka pa luse bakatuadija kuamba ne: “Muntu eu si nguvua usomba ulomba ka pa luse au, ki mmuomu?” 9 Bamue bavua bamba ne: “Nyeye.” Bakuabu bavua bamba ne: “Tòo, kadi mmufuanangane nende.” Muntu au uvua anu wamba ne: “Meme ke yeye au.” 10 Nunku bakamuebeja ne: “Kadi, mmunyi mudi mêsu ebe matabale?” 11 Wakandamuna ne: “Muntu udibu babikila ne: Yezu, uvua musope bitotshi, kubilabaye pa mêsu anyi, kungambilaye ne: ‘Ndaku ku Siloama, wowe mâyi.’+ Nunku ngakaya, kuowa mâyi ne kutuadija kumona.” 12 Bua bualu ebu bakamukonka ne: “Muntu au udi penyi?” Wakamba ne: “Tshiena mumanye to.”

13 Bakaya ne muntu uvua kumpala mpofu au kudi Bafalese. 14 Padi, dituku divua Yezu musope bitotshi ne mutabeje mêsu ende+ adi divua dia Nsabatu.+ 15 Nunku musangu eu Bafalese bakatuadija pabu kuebeja muntu eu muvuaye mutuadije kumona. Yeye wakabambila ne: “Uvua mulabe bitotshi pa mêsu anyi, meme kuowa mâyi, ne ndi mmona.” 16 Nunku bamue ba ku Bafalese bakatuadija kuamba ne: “Muntu eu ki mmufume kudi Nzambi to, bualu kena unemeka Nsabatu.”+ Bakuabu bakamba ne: “Mmunyi mudi muntu udi muenji wa mpekatu mua kuenza bimanyinu bia mushindu eu?”+ Nunku kuvua ditapuluka munkatshi muabu.+ 17 Bakakonka kabidi muntu uvua mpofu au ne: “Wewe udi wamba tshinyi bua muntu eu, bualu mêsu ebe ke avuaye mutabeja?” Muntu eu wakamba ne: “Yeye mmuprofete.”

18 Kadi bena Yuda kabavua bitabuje ne: yeye uvua mpofu ne uvua mutuadije kumona, too ne pakabikilabu baledi ba muntu ukavua mpindieu umona au. 19 Kubakonkabu ne: “Eu mmuanenu unudi nuamba muvuaye muledibue mpofu anyi? Kadi mmunyi mukadiye umona mpindieu?” 20 Baledi bende bakandamuna ne: “Tudi bamanye ne: eu mmuanetu, kabidi ne: uvua muledibue mpofu. 21 Kadi mukadiye mpindieu umona, katuena bamanye to; nansha muntu uvua mumutabeje mêsu, katuena bamumanye to. Mukonkayi. Ukadi muntu mukole. Udi ne bua kudiakuila.” 22 Baledi bende bakamba malu aa bualu bavua batshina bena Yuda,+ bualu bena Yuda bakavua bumvuangane ne: muntu yeye mumuitabe ne: udi Kristo, muntu au udi ne bua kuipatshibua mu nsunagoga.+ 23 Ke bualu kayi baledi bende bakamba ne: “Ukadi muntu mukole. Muebejayi.”

24 Nunku bakabikila muntu uvua mpofu au bua musangu muibidi, kumuambilabu ne: “Tumbisha Nzambi; tudi bamanye ne: muntu eu mmuenji wa mpekatu.” 25 Wakandamuna ne: “Yeye ni mmuenji wa mpekatu, tshiena mumanye. Bualu bumue bundi mumanye budi ne: mvua mpofu, kadi mpindieu ndi mmona.” 26 Nunku bakamuebeja ne: “Ntshinyi tshivuaye mukuenzele? Mmushindu kayi uvuaye mutabeje mêsu ebe?” 27 Wakabandamuna ne: “Nkavua munuambile bualu ebu, kadi kanuvua bateleje to. Bua tshinyi nudi basue kubumvua kabidi? Kanuena basue penu kulua bayidi bende to, ki mmuomu?” 28 Bua bualu ebu bakamuambila ne dipetu ne: “Wewe udi muyidi wa muntu au, kadi tuetu tudi bayidi ba Mose. 29 Tudi bamanye ne: Nzambi wakakula ne Mose, kadi bua muntu eu, katuena bamanye kudiye mufume to.” 30 Muntu eu wakabandamuna ne: “Bualu ebu budi bukemesha bikole, bua munudi kanuyi bamanye kudiye mufume, kadi pende uvua muntabeje mêsu. 31 Tudi bamanye ne: Nzambi kena uteleja benji ba mpekatu to,+ kadi muntu yeye utshina Nzambi ne wenza disua diende, yeye udi uteleja muntu eu.+ 32 Katshia ku kale katutu banji kumvua ne: muntu kampanda uvua mutabeje mêsu a muntu mulela mpofu to. 33 Bu muntu eu kayi mufume kudi Nzambi, kavua mua kuenza bualu nansha bumue to.”+ 34 Bakamuandamuna ne: “Wewe yonso mujima uvua mulela mu mpekatu, kadi ukadi utulongesha?” Nunku bakamuela pambelu!+

35 Yezu wakumvua ne: bavua bamuele pambelu, ne pakamumonaye, wakamuebeja ne: “Udi witabuja Muana wa muntu anyi?” 36 Muntu au wakandamuna ne: “Nnganyi au, mukalenge, bua mmuitabuje?” 37 Yezu wakamuambila ne: “Udi mumumone, mu bulelela, nyeye udi wakula nebe eu.” 38 Wakamba ne: “Ndi mmuitabuja, Mukalenge.” Nanku wakamunemekela.* 39 Pashishe Yezu wakamba ne: “Ndi mulue pa buloba ebu bua dilumbuluisha edi: bua bantu badi kabayi bamona bamone,+ ne bantu badi bamona balue bampofu.”+ 40 Bamue ba ku Bafalese bavua nende bakumvua malu aa, kumuebejabu ne: “Tuetu petu katuena bampofu to, ki mmuomu?” 41 Yezu wakabambila ne: “Bu nuenu bikale bampofu, kanuvua mua kuikala ne mpekatu to. Kadi mpindieu nudi nuamba ne: ‘Tudi tumona.’ Mpekatu wenu udi ushala.”+

10 “Bulelela, bulelela, ndi nnuambila ne: muntu udi kayi ubuelela ku tshiibi tshia tshikumbi tshia mikoko, kadi ubandila muaba mukuabu, muntu au mmuivi ne mupawudi.+ 2 Kadi muntu udi ubuelela ku tshiibi mmulami wa mikoko.+ 3 Mulami wa ku tshiibi udi umunzuluila tshiibi,+ ne mikoko idi yumvua dîyi diende.+ Yeye udi ubikila mikoko yende mu mêna ayi ne udi uyipatula. 4 Padiye upatula mikoko yende yonso, udi uya kumpala kuayi, mikoko idi imulonda, bualu mmimanye dîyi diende. 5 Kayakulonda muenyi nansha kakese, kadi neyimunyeme, bualu ki mmimanye dîyi dia benyi to.” 6 Yezu wakabafuanyikijila bualu ebu, kadi kabavua bajingulule tshivuaye ubambila to.

7 Nunku Yezu wakamba kabidi ne: “Bulelela, bulelela, ndi nnuambila ne: meme ndi tshiibi bua mikoko.+ 8 Bantu bonso badi balue pa muaba wanyi mbivi ne bapawudi; kadi mikoko ki mmibateleje to. 9 Meme ndi tshiibi; muntu yonso udi ubuelela kundi, neapandishibue, ne yeye neabuele, neapatuke ne neapete mashinde a kudia.+ 10 Muivi udi ulua anu bua kuiba, bua kushipa ne bua kubutula.+ Meme ndi mulue bua bapete muoyo ne bawupete wa bungi. 11 Meme ndi mulami muimpe wa mikoko;+ mulami muimpe udi ufila muoyo* wende bua mikoko.+ 12 Muntu udibu bangate ku mudimu, udi kayi mulami wa mikoko ne udi mikoko kayiyi yende, udi umona mbua wa ditu ulua, udi ushiya mikoko, unyema, ne mbua wa ditu udi uyibakula ne uyitangalaja, 13 bualu yeye mmuntu muangata ku mudimu, kena uditatshisha bua mikoko to. 14 Meme ndi mulami muimpe wa mikoko. Ndi mumanye mikoko yanyi ne mikoko yanyi mmimmanye,+ 15 anu bu mudi Tatu mummanye ne meme mumanye Tatu;+ ndi mfila muoyo* wanyi bua mikoko.+

16 “Ndi ne mikoko mikuabu idi kayiyi ya mu tshikumbi etshi;+ yoyi payi ndi ne bua kulua nayi munda, neyumvue dîyi dianyi, neyilue tshisumbu tshimue ne mulami umue.+ 17 Ke bualu kayi Tatu mmunnange,+ bualu ndi mfila muoyo* wanyi+ bua ngupetulule kabidi. 18 Kakuena muntu udi uwunyenga, kadi ndi ngufila mu meme nkayanyi. Ndi ne bukokeshi bua kuwufila, ndi ne bukokeshi bua kuwupetulula kabidi.+ Ndi mupete mukenji eu kudi Tatu wanyi.”

19 Ditapuluka diakajuka kabidi munkatshi mua bena Yuda+ bua mêyi aa. 20 Ba bungi ba kudibu bavua bamba ne: “Udi ne demon ne mmujimije lungenyi. Nudi numuteleja bua tshinyi?” 21 Bakuabu bakamba ne: “Aa ki mmêyi a muntu udi ne demon to. Demon kena mua kutabeja mêsu a mpofu to, ki mmuomu?”

22 Tshikondo atshi, Tshibilu tshia Dibanjija tshiakenzeka mu Yelushalema. Tshivua tshikondo tshia muvu wa mashika makole,* 23 ne Yezu uvua wendakana mu ntempelo mu mbalanda wa Solomo.+ 24 Nunku bena Yuda bakamunguila, kutuadijabu kumuambila ne: “Neutulame* ne mioyo kuulu kuulu too ne dîba kayi? Biwikala Kristo, tuambila patoke.” 25 Yezu wakabandamuna ne: “Mvua munuambile, kadi kanuena nuitabuja to. Malu andi ngenza mu dîna dia Tatu wanyi, owu aa adi ajadika bualu buanyi.+ 26 Kadi nuenu kanuena nuitabuja, bualu kanuena mikoko yanyi to.+ 27 Mikoko yanyi idi yumvua dîyi dianyi, ndi muyimanye, ne idi indonda.+ 28 Ndi nyipesha muoyo wa tshiendelele,+ kabakuyibutula nansha kakese, ne muntu nansha umue kakuyinyenga mu tshianza tshianyi to.+ 29 Tshidi Tatu wanyi mumpeshe ntshintu tshinene kupita bintu bikuabu bionso, ne muntu nansha umue kena mua kuyinyenga mu tshianza tshia Tatu to.+ 30 Meme ne Tatu tudi tshintu tshimue.”*+

31 Musangu eu kabidi, bena Yuda bakangula mabue bua kumuasa. 32 Yezu wakabambila ne: “Ndi munuleje malu mimpe a bungi a kudi Tatu. Mbuepi bua ku malu au bunudi nungashila mabue?” 33 Bena Yuda bakamuandamuna ne: “Tudi tukuasa mabue ki mbua bualu buimpe, kadi bualu udi upenda Nzambi;+ bualu wewe, nansha muudi muntu, udi udivuija nzambi.” 34 Yezu wakabandamuna ne: “Ki mbafunde mu Mikenji yenu ne: ‘Mvua muambe ne: “Nuenu nudi banzambi”’* anyi?+ 35 Bikalaye mubikile bantu bavua dîyi dia Nzambi+ dibipishe ne: ‘banzambi,’ pawu mufundu kawuyi mua kushipibua, 36 nudi nungambila meme udi Tatu mujidile ne mutume pa buloba ne: ‘Udi upenda Nzambi,’ bualu mvua muambe ne: ‘Ndi Muana wa Nzambi’ anyi?+ 37 Bingikala tshiyi ngenza malu a Tatu wanyi, kanungitabuji to. 38 Kadi bingikala ngenza malu aa, nansha munudi kanuyi nungitabuja meme, itabujayi malu aa,+ bua nufike ku dimanya ne nutungunuke ne kumanya ne: Tatu udi mu buobumue nanyi ne meme ndi mu buobumue ne Tatu.”+ 39 Nunku, bakakeba kabidi bua kumukuata, kadi wakabapanduka mu bianza.

40 Nanku wakaya kabidi dishiya dia Yadene muaba uvua Yone ubatiza bantu kumpala,+ yeye kusombaku. 41 Bantu ba bungi bakalua kudiye, kutuadijabu kuamba ne: “Yone kavua muenze tshimanyinu nansha tshimue to, kadi malu onso avua Yone muambe bua muntu eu avua malelela.”+ 42 Bantu ba bungi bakamuitabuja muaba au.

11 Mpindieu muntu mukuabu uvua usama, dîna diende Lazalo; uvua wa ku Betania, musoko wa ba Mariya ne muanabu wa bakaji Mâta.+ 2 Eu ke Mariya wakela Mukalenge mafuta a mupuya muimpe ne wakakupula makasa ende ne nsuki yende;+ muanabu Lazalo ke uvua usama. 3 Nunku bana babu ba bakaji bakamutumina mukenji, bamba ne: “Mukalenge, tangila! muntu uudi munange bikole udi usama.” 4 Kadi pakumvua Yezu bualu ebu, wakamba ne: “Tshipatshila tshia disama edi ki ntshia kufikisha ku lufu to, kadi didiku bua butumbi bua Nzambi,+ bua Muana wa Nzambi atumbishibue ku butuangaji buadi.”

5 Mpindieu Yezu uvua munange Mâta ne muanabu wa bakaji ne Lazalo. 6 Kadi pakumvuaye ne: Lazalo uvua usama, wakashala mu bulelela matuku makuabu abidi muaba uvuaye au. 7 Nunku panyima pa bualu ebu wakambila bayidi bende ne: “Tuyayi kabidi mu Yudaya.” 8 Bayidi bakamuambila ne: “Labi,+ matuku mashale aa bena mu Yudaya bavua bakeba kukuasa mabue,+ udi uyamu kabidi anyi?” 9 Yezu wakandamuna ne: “Kudi mêba 12 a munya, ki mmuomu?+ Muntu yeye wenda mu munya, kena udituta ku tshintu, bualu udi umona butoke bua pa buloba ebu. 10 Kadi muntu yeye wenda butuku, udi utetuka, bualu butoke kabuena munda muende to.”

11 Yeye mumane kuamba malu aa, wakamba kabidi ne: “Mulunda wetu Lazalo mmulale,+ kadi ndi nyaku bua kumubisha.” 12 Pashishe bayidi bakamuambila ne: “Mukalenge, bikalaye mulale, neumvue bimpe.” 13 Kadi Yezu uvua muakule bua lufu luende. Kadi bobu bavua bele meji ne: uvua wakula bua dilala tulu bua kuikisha. 14 Nunku Yezu wakabambila patoke ne: “Lazalo mmufue,+ 15 ne ndi ne disanka bua bualu buenu ne: tshivua muaba au, bua nuenu nuitabuje. Kadi tuyayi kudiye.” 16 Ke Tomase uvuabu babikila ne: Dipasa, kuambila bayidi bakuabu ne: “Tuyayi petu, bua tufue nende.”+

17 Pakafika Yezu, wakasangana ne: Lazalo ukavua mu lukita* matuku anayi. 18 Kadi Betania uvua pabuipi ne Yelushalema, ntanta wa kilometre mitue ku isatu.* 19 Bena Yuda ba bungi bavua balue kudi Mâta ne Mariya bua kubasamba bua muanabu. 20 Pakumvua Mâta ne: Yezu uvua ulua, wakaya kusambakena nende; kadi Mariya+ wakashala musombe kumbelu. 21 Nunku Mâta wakambila Yezu ne: “Mukalenge, bu wewe muikalapu, muanetu kavua mua kufua to. 22 Kadi nansha mpindieu ndi mumanye ne: tshionso tshiudi ulomba Nzambi, Nzambi neakupeshe.” 23 Yezu wakamuambila ne: “Muanenu neajuke.” 24 Mâta wakamuambila ne: “Ndi mumanye ne: yeye neajuke ku dibishibua dia bantu ku lufu+ dituku dia ku nshikidilu.” 25 Yezu wakamuambila ne: “Meme ndi dibishibua ku lufu ne muoyo.+ Muntu udi uleja ditabuja kundi, nansha yeye mufue, neapetulule muoyo; 26 ne muntu yonso udi ne muoyo ne uleja ditabuja kundi, kakufua nansha kakese.+ Udi witabuja bualu ebu anyi?” 27 Yeye kumuambila ne: “Eyowa, Mukalenge, ndi muitabuje ne: wewe udi Kristo, Muana wa Nzambi, eu udi ulua pa buloba.” 28 Pakambaye bualu ebu, wakaya, kubikilaye muanabu Mariya, umuambila pa nkayende ne: “Mulongeshi+ walu, udi ukubikila.” 29 Pakumvuaye bualu ebu, wakajuka lubilu, kuyaye kudiye.

30 Yezu kavua muanji kubuela mu musoko to, kadi utshivua muaba uvua Mâta musambakene nende. 31 Pavua bena Yuda bavua ne Mariya mu nzubu bamusamba bamumone ujuka lubilu upatuka, bakamulonda, bela meji ne: uvua uya ku lukita*+ bua kudidilaku. 32 Pakafika Mariya muaba uvua Yezu, mumumone, wakadiela ku makasa ende, kumuambilaye ne: “Mukalenge, bu wewe muikalapu, muanetu kavua mua kufua to.” 33 Pakamumona Yezu udila ne bena Yuda bavua balue nende badila, wakashikunkila munda muende* ne wakapampakana. 34 Wakakonka ne: “Nudi bamuteke penyi?” Bakamuambila ne: “Mukalenge, luaku umone.” 35 Yezu wakapuekesha binsonji.+ 36 Bua bualu ebu bena Yuda bakatuadija kuamba ne: “Tangilayi, uvua mumunange bikole be!” 37 Kadi bamue ba kudibu bakamba ne: “Muntu uvua mutabeje mêsu a mpofu eu+ kavuaku mua kuenza bua muntu eu kafu anyi?”

38 Nunku Yezu mumane kabidi kushikunkila munda muende, wakalua ku lukita.* Mu bulelela luvua mu lubuebue, ne bavua batekaku dibue. 39 Yezu wakamba ne: “Umbushayi dibue.” Mâta, muanabu ne mufue, wakamuambila ne: “Mukalenge, udi ne bua kuikala ukadi ununka mpindieu, bualu kukadi kupite matuku anayi.” 40 Yezu wakamuambila ne: “Tshivua mukuambile ne: wewe muitabuje neumone butumbi bua Nzambi anyi?”+ 41 Nunku bakumbusha dibue. Pashishe Yezu wakabandisha mêsu ende muulu,+ kuambaye ne: “Tatu, ndi nkuela tuasakidila bua muudi munteleje. 42 Bulelela, mvua mumanye ne: utu anu unteleja; kadi ndi ngakula bua musumba wa bantu udi muimane muaba eu, bua bitabuje ne: wewe nguvua muntume.”+ 43 Pakambaye malu aa, wakela lubila ne dîyi dikole ne: “Lazalo, patuka!”+ 44 Muntu uvua mufue eu wakapatuka, makasa ne bianza bijingila bilamba, ne mpala wende uvua mujingila tshilamba. Yezu wakabambila ne: “Mukutululayi, numulekele aye.”

45 Nunku bena Yuda ba bungi bavua balue kudi Mariya, bavua bamone tshivua Yezu muenze bakamuitabuja,+ 46 kadi bamue ba kudibu bakaya kudi Bafalese, kubalondela malu avua Yezu muenze. 47 Nunku bamfumu ba bakuidi ne Bafalese bakasangisha Tshilumbuluidi Tshinene,* kuambabu ne: “Tudi ne bua kuenza tshinyi, bualu muntu eu udi wenza bimanyinu bia bungi?+ 48 Tuetu bamulekele utungunuka nunku, bantu bonso nebamuitabuje, ne bena Lomo nebalue, nebangate muaba* wetu ne tshisamba tshietu.” 49 Kadi Kayifa,+ umue wa kudibu, uvua muakuidi munene tshidimu atshi, wakabambila ne: “Kanuena bamanye tshintu nansha tshimue to, 50 ne kanuena numona ne: mbua diakalenga dienu bua muntu umue kufua bua bantu pamutu pa tshisamba tshijima kubutudibua.” 51 Kadi kakamba bualu ebu bilondeshile yeye nkayende to, kadi bu muvuaye muakuidi munene tshidimu atshi, wakamba dîyi dia buprofete dia ne: Yezu uvua ne bua kufua bua tshisamba tshiabu, 52 ki nganu bua tshisamba tshiabu nkayatshi to, kadi kabidi bua kusangisha mu buobumue bana ba Nzambi bavua batangalake. 53 Nunku, kutuadijila ku dituku adi, bakela tshifufu bua kumushipa.

54 Nunku Yezu kavua kabidi wendakana patoke munkatshi mua bena Yuda to, kadi wakumbuka muaba au, kuyaye mu buloba buvua pabuipi ne tshipela, mu tshimenga tshivuabu babikila ne: Efelayima,+ ne wakasombamu ne bayidi bende. 55 Kadi Pasaka+ wa bena Yuda ukavua pabuipi, ne bantu ba bungi ba ku ntshiama bakabanda ku Yelushalema kumpala kua Pasaka bua kudilengeja bilondeshile mikenji. 56 Bavua bakeba Yezu, ne bavua bambilangana pavuabu bimane mu ntempelo ne: “Nudi nuela meji kayi? Kakulua mu tshibilu etshi anyi?” 57 Kadi bamfumu ba bakuidi ne Bafalese bavua batume dîyi ne: muntu yeye mumanye muaba uvua Yezu, uvua ne bua kumanyisha bualu abu, bua bamukuate.

12 Matuku asambombo kumpala kua Pasaka, Yezu wakafika ku Betania kuvua Lazalo+ uvua Yezu mujule ku lufu. 2 Nunku bakamulongoluela biakudia bia dilolo muaba au, Mâta uvua ubakuatshila mudimu,+ kadi Lazalo uvua umue wa ku bavua badia* nende. 3 Pashishe Mariya wakangata litela* wa mafuta a mupuya muimpe, nare mulelela, wa mushinga mukole, kuapongololaye ku makasa a Yezu ne kukupulaye makasa ende ne nsuki yende. Nzubu wakuwula tente ne dipembu dia mafuta a mupuya muimpe au.+ 4 Kadi Yudasa Isakaliote,+ umue wa ku bayidi bende ukavua pa kumutungila tshitungu, wakamba ne: 5 “Bua tshinyi kabavua mua kupana mafuta a mupuya muimpe aa ku ndenaliyo* 300 ne kuyipesha bapele?” 6 Kadi wakamba nanku ki mbualu uvua uditatshisha bua bapele, kadi bualu uvua muivi, uvua ne kashete ka makuta ne uvua ne tshibidilu tshia kuiba makuta avuabu belamu. 7 Nunku, Yezu wakamba ne: “Mulekelayi, bua enze tshienzedi etshi bua dituku dia dijiikibua dianyi.+ 8 Bualu nudi ne bapele aba misangu yonso,+ kadi meme kanuakuikala nanyi misangu yonso to.”+

9 Dîba adi, musumba munene wa bena Yuda wakamanya ne: uvua muaba au, bakalua, ki nganu bua Yezu to, kadi bua kumona kabidi Lazalo uvuaye mujule ku lufu.+ 10 Kadi bamfumu ba bakuidi bakela tshifufu bua kushipa kabidi Lazalo, 11 bua muvua bena Yuda ba bungi baya muaba au ne bitabuja Yezu bua bualu buende.+

12 Dituku diakalonda, musumba munene wa bantu bavua balue mu tshibilu bakumvua ne: Yezu uvua ulua ku Yelushalema. 13 Nunku bakangata malala a mabue, kupatukabu bua kusambakena nende, kutuadijabu kuela mbila ne: “Tudi tukulomba, pandisha! Eu udi ulua mu dîna dia Yehowa,*+ Mukalenge wa Isalele, mmubeneshibue!”+ 14 Pakapeta Yezu muana wa mpunda, wakasomba pa nyima pende,+ anu mudibu bafunde ne: 15 “Kutshinyi, wewe muana wa bakaji wa Siona. Mona! Mukalenge webe udi ulua musombe pa muana wa mpunda.”+ 16 Bayidi kabavua banji kujingulula malu aa to, kadi pakatumbishibua Yezu,+ bakavuluka ne: malu aa avua mafunda bua bualu buende, kabidi ne: bavua bamuenzele malu aa.+

17 Mpindieu, musumba wa bantu bavua nende pavuaye mubikile Lazalo pambelu pa lukita*+ ne mumujule ku lufu bavua batungunuka ne kujadika bualu ebu.+ 18 Bua bualu ebu kabidi, musumba wa bantu wakaya kusambakena nende, bualu bavua bumvue ne: uvua muenze tshimanyinu etshi. 19 Nunku Bafalese bakambilangana ne: “Nudi bamone ne: kanuena ne kunudi nuya to. Tangilayi! Ba pa buloba bonso mbamulonde.”+

20 Mpindieu, kuvua bamue bena Greke munkatshi mua bantu bavua balue mu tshibilu bua kutendelela. 21 Nunku bantu abu bakasemena kudi Filipo,+ uvua wa ku Betesaida wa Galela, kutuadijabu kumulomba, bamba ne: “Mukalenge, tudi basue kumona Yezu.” 22 Filipo wakalua, kuambilaye Andele. Andele ne Filipo kuyabu, kuambilabu Yezu.

23 Kadi Yezu wakabandamuna ne: “Dîba ndikumbane bua Muana wa muntu kutumbishibua.+ 24 Bulelela, bulelela, ndi nnuambila ne: bikala lutete lua blé kaluyi lumate panshi ne lufue, ludi lushala anu lutete lumue; kadi luolu lufue,+ dîba adi ludi lukuama mamuma a bungi. 25 Muntu yonso udi munange muoyo* wende bikole udi uwubutula, kadi muntu yonso udi mukine muoyo* wende+ pa buloba ebu neawulame bua muoyo wa tshiendelele.+ 26 Muntu yeye musue kungenzela mudimu, andonde , ne muaba ungikala, ke wikala kabidi muena mudimu wanyi.+ Muntu yeye musue kungenzela mudimu, Tatu neamuambike bunême. 27 Ndi* ne dipampakana mpindieu,+ ngambe tshinyi? Tatu, umpandishe ku dîba edi.+ Nansha nanku, bua bualu ebu ke bundi mufikile ku dîba edi. 28 Tatu, utumbishe dîna diebe.” Nunku dîyi+ diakafuma mu diulu ne: “Ndi muditumbishe, nenditumbishe kabidi.”+

29 Musumba wa bantu bavua bimane muaba au bakadiumvua, kutuadijabu kuamba ne: dikubakuba divua ditute. Bakuabu bakamba ne: “Muanjelu mmuakule nende.” 30 Yezu wakandamuna ne: “Dîyi edi ndiumvuike, ki mbuanyi meme, kadi mbuenu nuenu. 31 Mpindieu badi balumbuluisha ba pa buloba ebu; mpindieu mukokeshi wa buloba ebu+ neipatshibue.+ 32 Kadi meme, biankudikabu kuulu pa buloba,+ nenkoke bantu ba mishindu yonso kundi.” 33 Uvua bushuwa wamba bualu ebu bua kuleja mushindu wa lufu lukavuaye pa kufua.+ 34 Nunku musumba wa bantu wakamuandamuna ne: “Tuvua bumvue mu Mikenji ne: Kristo udi ushala kashidi.+ Mmunyi muudi wamba ne: badi ne bua kukudika Muana wa muntu kuulu?+ Muana wa muntu au nnganyi?” 35 Ke Yezu kubambila ne: “Butoke nebuikale kabidi munkatshi muenu bua tshitupa tshîpi. Endayi panutshidi ne butoke, bua mîdima kayinupitshi bukole; muntu yonso udi wenda mu mîdima ki mmumanye kudiye uya to.+ 36 Panutshidi ne butoke, lejayi ditabuja mu butoke, bua nulue bana ba butoke.”+

Yezu wakamba malu aa, kuyaye, kubasokomaye. 37 Nansha muvuaye muenze bimanyinu bia bungi kumpala kuabu, kabavua bamuitabuja to, 38 bua dîyi dia muprofete Yeshaya dikumbane, yeye wakamba ne: “Yehowa,* nnganyi udi muitabuje bualu budibu bumvuile kutudi?*+ Ne bua diboko dia Yehowa,* nnganyi uvuabu badisokoluele?”+ 39 Yeshaya wakaleja kabidi bua tshinyi kabavua mua kuitabuja wamba ne: 40 “Mmufofomije mêsu abu, mmupapishe mioyo yabu, bua kabamonyi ne mêsu abu, kabajinguludi ne mioyo yabu, kabakudimuki ne meme kubondopa.”+ 41 Yeshaya wakamba malu aa bualu uvua mumone butumbi buende ne muakule bua bualu buende.+ 42 Bia muomumue, bantu ba bungi too ne bakokeshi bavua bamuitabuje bushuwa,+ kadi kabavua bamuitaba patoke bua Bafalese, bua kabalu kubipata mu nsunagoga;+ 43 bualu bavua banange butumbi bua kudi bantu kupita mene butumbi bua kudi Nzambi.+

44 Kadi Yezu wakela dîyi, kuambaye ne: “Muntu yonso udi ungitabuja kena ungitabuja anu meme to, kadi udi witabuja kabidi uvua muntume;+ 45 ne muntu yonso udi ummona meme udi umona kabidi Yeye uvua muntume.+ 46 Ndi mulue bu butoke pa buloba,+ bua muntu yonso udi ungitabuja kashadi mu mîdima.+ 47 Kadi muntu yeye mumvue mêyi anyi ne kayi ualama, tshiena mmulumbuluisha to; bualu tshivua mulue bua kulumbuluisha ba pa buloba to, kadi bua kupandisha ba pa buloba.+ 48 Muntu yonso udi umbenga ne kayi witaba mêyi anyi, udi ne eu wamulumbuluisha. Dîyi dindi muambe ke diamulumbuluisha dituku dia ku nshikidilu. 49 Bualu tshiena mudiakuile mu meme nkayanyi to, kadi Tatu uvua muntume yeye muine ke udi mumpeshe mukenji wa tshia kuamba ne tshia kuakula.+ 50 Ndi mumanye ne: mukenji wende udi umvuija muoyo wa tshiendelele.+ Nunku malu onso andi ngamba, ndi ngamba anu mudi Tatu mungambile.”+

13 Mpindieu, bu muvua Yezu mumanye kumpala kua tshibilu tshia Pasaka ne: dîba diende dikavua dikumbane+ bua yeye kumbuka pa buloba ebu ne kuya kudi Tatu,+ yeye mumane kunanga bende bavua pa buloba, wakabananga too ne ku ndekelu.+ 2 Pavuabu badia biakudia bia dilolo, Diabolo ukavua mubueje mu muoyo wa Yudasa Isakaliote,+ muana wa Simona, lungenyi lua kumutungila tshitungu.+ 3 Nunku bu muvua Yezu mumanye ne: Tatu uvua mufile bintu bionso mu bianza biende, kabidi ne: yeye uvua mufume kudi Nzambi ne uvua uya kudi Nzambi,+ 4 wakajuka ku biakudia bia dilolo, kutekaye bilamba biende bia pa mutu ku luseke. Wakangata tshilamba tshia kukupula natshi mâyi, kutshijingila mu tshimono tshiende.*+ 5 Pashishe wakela mâyi mu dilongo, kutuadijaye kuowesha bayidi mâyi ku makasa ne kuakupula ne tshilamba tshia kukupula natshi mâyi tshivuaye mudijingile atshi.* 6 Pashishe wakafika kudi Simona Petelo. Yeye wakamuambila ne: “Mukalenge, wewe udi ungowesha mâyi ku makasa anyi?” 7 Yezu wakamuandamuna ne: “Tshindi ngenza kuena utshiumvua mpindieu to, kadi neumvue panyima pa malu aa.” 8 Petelo wakamuambila ne: “Bushuwa wewe kuakungowesha mâyi ku makasa nansha kakese.” Yezu kumuandamuna ne: “Meme tshiyi mukuoweshe mâyi,+ kuena ku luseke luanyi to.” 9 Simona Petelo wakamuambila ne: “Mukalenge, kungoweshi anu ku makasa nkayaku to, kadi ngowesha kabidi ku bianza ne mu mutu.” 10 Yezu wakamuambila ne: “Muntu yonso ukadi muowe mâyi kena dijinga ne tshintu tshikuabu to, anu kuowa mâyi ku makasa patupu, kadi yeye mujima mmukezuke. Nuenu nudi bakezuke, kadi ki nnuenu bonso to.” 11 Bualu uvua mumanye muntu uvua umutungila tshitungu.+ Ke bualu kayi wakamba ne: “Ki nnuenu bonso badi bakezuke to.”

12 Kadi, pakajikijaye kubowesha mâyi ku makasa ne kuvuala bilamba biende bia pa mutu, wakadiadija kabidi ku mêsa, kubambilaye ne: “Nudi bumvue tshindi munuenzele anyi? 13 Nudi numbikila ne: ‘Mulongeshi’ ne ‘Mukalenge,’ nudi nuambilamu, bualu ke tshindi.+ 14 Nunku bingikala meme, Mukalenge ne Mulongeshi, munoweshe mâyi ku makasa,+ nuenu penu nudi ne bua* kuoweshangana mâyi ku makasa.+ 15 Bualu ndi munushile tshilejilu, bua nuenu nuenze penu anu bu mundi munuenzele.+ 16 Bulelela, bulelela, ndi nnuambila ne: mupika ki mmunene kupita mfumuende anyi muntu udibu batume ki mmunene kupita uvua mumutume to. 17 Nuenu bamanye malu aa, nudi ba diakalenga binuaenza.+ 18 Tshiena ngakula buenu nuenu bonso to; ndi mumanye bandi musungule. Kadi bivua nanku bua mufundu kukumbanawu:+ ‘Muntu uvua udia diampa dianyi, mmunjudile tshikankanyi tshiende.’*+ 19 Kutuadijila ku mpindieu, ndi nnuambila kumpala kua kuenzekabi, bua padibi bienzeka, nuitabuje ne: meme ke yeye.+ 20 Bulelela, bulelela, ndi nnuambila ne: muntu yonso udi wakidila muntu undi ntuma udi ungakidila panyi,+ ne muntu yonso udi ungakidila udi wakidila kabidi Yeye uvua muntume.”+

21 Panyima pa Yezu mumane kuamba malu aa, wakapampakana mu lungenyi, kujadikaye, wamba ne: “Bulelela, bulelela, ndi nnuambila ne: umue wa kunudi neantungile tshitungu.”+ 22 Bayidi bakatuadija kutangilangana, kabayi bamanye ne: uvua wakula bua nganyi to.+ 23 Umue wa ku bayidi, eu uvua Yezu munange,+ uvua mudiadije pabuipi ne* Yezu. 24 Nunku Simona Petelo wakaloba yeye eu ne mutu, kumuambilaye ne: “Tuambila udiye wamba.” 25 Nunku yeye eu wakeyemena mu tshiadi tshia Yezu, kumukonkaye ne: “Mukalenge, nnganyi au?”+ 26 Yezu wakandamuna ne: “Mmuntu ungapesha tshipese tshia diampa tshindi ntua mu dilongo.”+ Nunku yeye mumane kutuamu diampa, wakadiangata, wakadipesha Yudasa, muana wa Simona Isakaliote. 27 Panyima pa Yudasa mumane kuangata tshipese tshia diampa atshi, nanku Satana wakabuela munda muende.+ Ke Yezu kumuambila ne: “Tshiudi wenza, utshienze ne lukasa luonso.” 28 Kadi muntu nansha umue wa ku bavua badiadije ku mêsa kavua mumanye tshivuaye mumuambidile nanku to. 29 Mu bulelela, bamue bavua bela meji ne: bu muvua Yudasa ulama kashete ka makuta,+ Yezu uvua umuambila ne: “Sumba bintu bitudi nabi dijinga bua tshibilu,” peshi ne: uvua ne bua kupesha bapele tshintu kampanda. 30 Nunku, yeye mumane kuangata tshipese tshia diampa, wakapatuka musangu umue. Butuku bukavua buile.+

31 Nunku, pakapatukaye, Yezu wakamba ne: “Mpindieu Muana wa muntu mmutumbishibue,+ ne Nzambi mmutumbishibue bua bualu buende. 32 Nzambi muine neamutumbishe,+ ne neamutumbishe diakamue. 33 Bana bakese, ndi nenu bua tshitupa tshîpi kabidi. Nenunkebe; anu bu mumvua muambile bena Yuda ne: ‘Kanuena mua kulua muaba undi nya,’+ mpindieu ndi nnuambilabu penu. 34 Ndi nnupesha mukenji mupiamupia ne: nunangangane; anu bu mundi mununange,+ nuenu penu nunangangane.+ 35 Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.”+

36 Simona Petelo wakamuebeja ne: “Mukalenge, udi uya penyi?” Yezu wakandamuna ne: “Kuena mua kundonda mpindieu muaba undi nya to, kadi neulonde pashishe.”+ 37 Petelo wakamuambila ne: “Mukalenge, bua tshinyi tshiena mua kukulonda mpindieu? Nemfile muoyo* wanyi bua bualu buebe.”+ 38 Yezu wakandamuna ne: “Neufile muoyo* webe bua bualu buanyi anyi? Bulelela, bulelela, ndi nkuambila ne: tshitala katshiakusama, wewe kuyi mumvile misangu isatu.”+

14 “Mioyo yenu kayipampakanyi to.+ Lejayi ditabuja kudi Nzambi;+ lejayi kabidi ditabuja kundi. 2 Mu nzubu wa Tatu wanyi mudi miaba ya bungi ya kusombela. Bu biobi kabiyi nanku, mvua mua kunuambila, bualu ndi nya bua kunulongoluela muaba.+ 3 Kabidi, meme muye, munulongoluele muaba, nempingane kabidi ne nennuakidile kuanyi, bua muaba undi, nuenu penu nuikalapu.+ 4 Nudi bamanye njila wa kundi nya.”

5 Tomase+ wakamuambila ne: “Mukalenge, katuena bamanye kuudi uya to. Mmunyi mutudi mua kumanya njila?”

6 Yezu kumuambila ne: “Meme ndi njila+ ne bulelela+ ne muoyo.+ Muntu kena mua kulua kudi Tatu kayi mupitshile kundi to.+ 7 Bu nuenu bammanye, nuvua mua kumanya kabidi Tatu; kubangila ku mpindieu, nudi bamumanye ne nudi bamumone.”+

8 Filipo wakamuambila ne: “Mukalenge, utuleje Tatu, mbikumbane buetu tuetu.”

9 Yezu wakamuambila ne: “Nansha mundi nenu kukadi matuku bungi nunku, Filipo, kuena mufike ku dimmanya anyi? Muntu yonso udi mummone mmumone kabidi Tatu.+ Mmunyi muudi wamba ne: ‘Utuleje Tatu’? 10 Kuena witabuja ne: meme ndi mu buobumue ne Tatu ne Tatu udi mu buobumue nanyi anyi?+ Malu andi nnuambila, tshiena ndiambidilawu bilondeshile meme nkayanyi to,+ kadi Tatu udi muikale mu buobumue nanyi udi wenza midimu yende. 11 Nungitabuje ne: ndi mu buobumue ne Tatu, ne Tatu udi mu buobumue nanyi; biobi kabiyi nanku, itabujayi nansha bua malu andi ngenza.+ 12 Bulelela, bulelela, ndi nnuambila ne: muntu yonso udi uleja ditabuja kundi, yeye pende neenze malu andi ngenza; neenze malu manene kupita aa,+ bualu ndi nya kudi Tatu.+ 13 Kabidi, tshintu tshionso tshinudi nulomba mu dîna dianyi, nennuenzelatshi, bua Tatu atumbishibue bua bualu bua Muana.+ 14 Nuenu balombe tshintu tshionso mu dîna dianyi, nennuenzelatshi.

15 “Nuenu bannange, nenutumikile mikenji yanyi.+ 16 Nendombe Tatu, yeye neanupeshe muambuluishi* mukuabu bua ikale nenu kashidi,+ 17 nyuma wa bulelela,+ udi ba pa buloba kabayi mua kupeta, bualu kabena bamumona anyi bamumanye.+ Nuenu nudi bamumanye, bualu udi ushala nenu ne udi munda muenu. 18 Tshiakunushiya nkayenu* to. Ndi ndua kunudi.+ 19 Mu katupa kîpi emu ba pa buloba kabakummona kabidi to, kadi nuenu nenummone,+ bualu ndi ne muoyo ne nuenu nenuikale ne muoyo. 20 Dituku adi nenumanye ne: ndi mu buobumue ne Tatu wanyi ne nuenu nudi mu buobumue nanyi ne meme ndi mu buobumue nenu.+ 21 Muntu yonso udi ne mikenji yanyi, uyitumikila, yeye ke udi munnange. Muntu yonso udi munnange , Tatu wanyi neamunange pende, ne meme nemmunange, ne nendileje kudiye patoke.”

22 Yudasa,+ ki ng’Isakaliote to, wakamuambila ne: “Mukalenge, ntshinyi tshidi tshienzeke bua wewe kujinga kudileja patoke kutudi, kuyi udileja kudi ba pa buloba?”

23 Ke Yezu kumuandamuna ne: “Muntu yeye munnange, neatumikile dîyi dianyi,+ ne Tatu wanyi neamunange, netulue kudiye, netusombe nende.+ 24 Muntu yonso udi kayi munnange kena utumikila mêyi anyi to. Dîyi dinudi nuteleja edi ki ndianyi to, kadi ndia Tatu uvua muntume.+

25 “Ndi munuambile malu aa pantshidi nenu. 26 Kadi muambuluishi, nyuma muimpe,* watuma Tatu mu dîna dianyi, yeye au neanulongeshe malu onso ne neanuvuluije malu onso amvua munuambile.+ 27 Ndi nnushila ditalala; ndi nnupesha ditalala dianyi.+ Tshiena nnupeshadi bu mudi ba pa buloba badipeshangana to. Mioyo yenu kayipampakanyi peshi kayiteketshi bua buôwa. 28 Nuvua bumvue mumvua munuambile ne: ‘Ndi nya ne ndi mpingana kunudi.’ Bu nuenu bannange, nuvua mua kusanka bua mundi nya kudi Tatu, bualu Tatu mmunene kumpita meme.+ 29 Nunku, mpindieu ndi munuambile bualu ebu kumpala kua kuenzekabu, bua nuitabuje padibu buenzeka.+ 30 Tshiakuakula kabidi nenu malu a bungi to, bualu mukokeshi wa buloba ebu+ udi ulua, yeye kena ne bukokeshi ku mutu kuanyi.+ 31 Kadi bua ba pa buloba kumanya ne: ndi munange Tatu, ndi ngenza anu mudi Tatu mungambile bua kuenza.+ Jukayi, tumbuke muaba eu.

15 “Ndi muonji mulelela wa tumuma tua mvinyo, ne Tatu wanyi ke tshidime. 2 Yeye udi umbusha ditamba dionso didi munda muanyi didi kadiyi dikuama tumuma, ne udi ulengeja dionso didi dikuama tumuma, bua dikuame tumuma tua bungi.+ 3 Nuenu nukadi balengejibue bua dîyi dindi munuambile.+ 4 Nushale mu buobumue nanyi, ne meme nenshale mu buobumue nenu. Anu bu mudi ditamba kadiyi mua kudikuamina tumuma diodi pa nkayadi, anu diodi dishale ku muonji wa mvinyo, nansha nuenu penu kanuena mua kukuama mamuma anu nuenu bashale mu buobumue nanyi.+ 5 Meme ndi muonji wa tumuma tua mvinyo; nuenu nudi matamba. Muntu yonso udi ushala mu buobumue nanyi, ne meme mu buobumue nende, yeye au udi ukuama mamuma a bungi;+ bualu nuenu kanuyi nanyi kanuena ne tshinudi mua kuenza to. 6 Muntu yeye kayi ushala mu buobumue nanyi, badi bamuimansha anu bu ditamba dia mutshi ne udi wuma. Bantu badi bangula matamba au, baela mu kapia ne adi oshika. 7 Nuenu bashale mu buobumue nanyi ne mêyi anyi mashale munda muenu, nulombe tshionso tshinudi basue, netshienzeke buenu nuenu.+ 8 Tatu wanyi udi utumbishibua mu bualu ebu: bua nutungunuke ne kukuama mamuma a bungi ne nuleje munudi bayidi banyi.+ 9 Anu bu mudi Tatu munnange,+ ke mundi mununange; nushale mu dinanga dianyi. 10 Nuenu nutumikila mikenji yanyi, nenushale mu dinanga dianyi, anu bu mundi mutumikile mikenji ya Tatu ne mushale mu dinanga diende.

11 “Ndi munuambile malu aa bua disanka dianyi dikale munda muenu ne bua disanka dienu diuwujibue tente.+ 12 Eu mmukenji wanyi: bua nunangangane anu bu mundi mununange.+ 13 Kakuena muntu udi ne dinanga dinene kupita edi: dia muntu ufila muoyo* wende bua balunda bende.+ 14 Nudi balunda banyi nuenu nuenza tshindi nnuambila.+ 15 Tshiena nnubikila kabidi bapika nansha, bualu mupika ki mmumanye tshidi mfumuende wenza to. Kadi ndi munubikile balunda, bualu ndi munumanyishe malu onso andi mumvue kudi Tatu wanyi. 16 Nuenu kanuvua bansungule to, kadi meme mvua munusungule ne munuteke bua nuenu kuya ne kutungunuka ne kukuama mamuma ne bua mamuma enu ashale, bua tshionso tshinualomba Tatu mu dîna dianyi anupeshatshi.+

17 “Malu aa ngandi nnuelela mukenji, bua nunangangane.+ 18 Ba pa buloba bobu banukine, nudi bamanye ne: bavua bankine meme kumpala kua kunukinabu.+ 19 Bu nuenu bikale ba pa buloba, ba pa buloba bavua mua kuikala banange babu bikole. Mpindieu bu munudi kanuyi ba pa buloba,+ kadi munusungule mu ba pa buloba, bua bualu ebu ba pa buloba mbanukine.+ 20 Vulukayi dîyi dimvua munuambile edi: Mupika ki mmunene kupita mfumuende to. Bikalabu bankengeshe, nebanukengeshe penu;+ bikalabu batumikile dîyi dianyi, nebatumikile kabidi dienu. 21 Kadi nebanuenzele malu onso aa bua dîna dianyi, bualu ki mbamanye Yeye uvua muntume.+ 22 Bu meme tshiyi mulue, muakule nabu, kabavua mua kuikala ne mpekatu to.+ Kadi mpindieu kabena ne tshia kudibingisha natshi bua mpekatu wabu nansha.+ 23 Muntu yonso udi munkine mmukine kabidi Tatu wanyi.+ 24 Bu meme tshiyi muenze munkatshi muabu midimu ivua muntu mukuabu kayi muenze, kabavua mua kuikala ne mpekatu to;+ kadi mpindieu mbammone ne mbankine meme ne Tatu wanyi kabidi. 25 Kadi bualu ebu mbuenzeke bua kukumbaja dîyi didibu bafunde mu Mikenji yabu ne: ‘Bavua bankine kakuyi bualu.’+ 26 Palua muambuluishi ungatuma ufumina kudi Tatu, nyuma wa bulelela,+ udi ufumina kudi Tatu, yeye au neajadike bualu buanyi;+ 27 nunku nuenu penu, nudi ne bua kujadika,+ bualu nudi nanyi katshia ku tshibangidilu.

16 “Ndi munuambile malu aa bua kanulenduki to. 2 Bantu nebanuipate mu nsunagoga.+ Mu bulelela, dîba didi dilua dikala muntu yonso udi unushipa+ wela meji ne: mmuenzele Nzambi mudimu wa tshijila. 3 Kadi nebenze malu aa bualu ki mbafike ku dimanya Tatu anyi meme to.+ 4 Nansha nanku, ndi munuambile malu aa bua padi dîba dia kuenzekawu dikumbana, nuvuluke ne: mvua munuambilawu.+

“Tshivua munuambile malu aa kumpala bualu mvua nenu. 5 Kadi mpindieu ndi nya kudi Yeye uvua muntume;+ kadi kakuena muntu nansha umue wa kunudi udi ungebeja ne: ‘Udi uya penyi?’ 6 Kadi kanyinganyinga nkuwule mu mioyo yenu bualu ndi munuambile malu aa.+ 7 Nansha nanku, ndi nnuambila bulelela ne: ndi nya bua diakalenga dienu. Bualu meme tshiyi muye, muambuluishi+ kakulua kunudi to; kadi meme muye, nennutuminaye. 8 Padi yeye au ufika, neapeshe ba pa buloba bijadiki bidi bibatuisha bua mpekatu, bua buakane ne bua dilumbuluisha: 9 tshia kumpala, bua mpekatu,+ bualu kabena baleja ditabuja kundi to;+ 10 pashishe bua buakane, bualu ndi nya kudi Tatu ne kanuakummona kabidi to; 11 ndekelu wa bionso, bua dilumbuluisha, bualu bakadi balumbuluishe mukokeshi wa buloba ebu.+

12 “Ntshidi ne malu a bungi a kunuambila, kadi kanuena nukumbana bua kuambula mpindieu to. 13 Kadi padi yeye au* ulua, nyuma wa bulelela, neanulombole mu bulelela buonso,+ bualu kakudiakuila mu yeye nkayende to, kadi yeye neakule malu adiye umvua ne neanumanyishe malu adi alua.+ 14 Yeye au neantumbishe,+ bualu yeye neapete tshia ku tshidi tshianyi ne neanumanyishatshi.+ 15 Bintu bionso bidi Tatu nabi mbianyi.+ Ke bualu kayi mvua muambe ne: yeye udi upeta tshia ku tshidi tshianyi ne udi unumanyishatshi. 16 Mu katupa kîpi emu kanuakummona kabidi to,+ ne kabidi, mu katupa kîpi emu nenummone.”

17 Bua bualu abu bamue ba ku bayidi bende bakambilangana ne: “Udi usua kuamba tshinyi padiye utuambila ne: ‘Mu katupa kîpi emu kanuakummona kabidi to, ne kabidi, mu katupa kîpi emu nenummone,’ kabidi ne: ‘bualu ndi nya kudi Tatu’?” 18 Nunku bavua bamba ne: “Udi usua kuamba tshinyi padiye wamba ne: ‘Katupa kîpi’? Katuena bamanye tshidiye wamba to.” 19 Yezu uvua mumanye ne: bavua basue kumuela nkonko, ke yeye kubambila ne: “Nudi nuebejangana bua bualu ebu, bualu mvua muambe ne: ‘Mu katupa kîpi emu kanuakummona kabidi to, ne kabidi, mu katupa kîpi emu nenummone’ anyi? 20 Bulelela, bulelela, ndi nnuambila ne: nenudile ne nenuele kabobo ka muadi, kadi ba pa buloba nebasanke; nenuikale ne kanyinganyinga, kadi kanyinganyinga kenu nekalue disanka.+ 21 Padi mamu ulela, udi ne kanyinganyinga bualu dîba diende ndikumbane, kadi pakadiye mulele muana, kena uvuluka kabidi dikenga bua disanka dia mudi muntu muledibue pa buloba. 22 Nunku nuenu penu, mpindieu nudi ne kanyinganyinga; kadi meme nennumone kabidi, ne mioyo yenu neyisanke,+ ne kakuena muntu wanunyenga disanka dienu to. 23 Dituku adi, kanuakunkonka bualu nansha bumue to. Bulelela, bulelela, ndi nnuambila ne: nuenu balombe Tatu tshintu,+ neanupeshatshi mu dîna dianyi.+ 24 Too ne mpindieu kanuena banji kulomba tshintu nansha tshimue mu dîna dianyi to. Lombayi ne nenupete, bua disanka dienu dikumbane.

25 “Ndi munuambile malu aa mu mifuanu. Dîba didi dilua dingikala tshiyi nnuambila kabidi malu mu mifuanu nansha, kadi nennuambile bualu bua Tatu patoke. 26 Dituku adi, nenulombe Tatu mu dîna dianyi; pandi ngamba nunku, tshiena musue kuamba ne: meme nennulombele to. 27 Bualu Tatu muine mmununange bikole, bualu nudi bannange bikole+ ne bitabuje ne: mvua mulue bu muleji mpala wa Nzambi.+ 28 Mvua mulue bu muleji mpala wa Tatu ne ndi mulue pa buloba. Mpindieu ndi ngumbuka pa buloba ne ndi nya kudi Tatu.”+

29 Bayidi bende bakamba ne: “Tangila! Mpindieu udi utuambila malu patoke ne kuena ufila mifuanu to. 30 Mpindieu tudi bamanye ne: udi mumanye malu onso, kuena dijinga ne: muntu akukonke bualu. Bua bualu ebu, tudi tuitabuja ne: uvua mufume kudi Nzambi.” 31 Yezu wakabandamuna ne: “Nudi nuitabuja mpindieu anyi? 32 Monayi! Dîba didi dilua, mu bulelela, ndikumbane, dianutangalajabu yonso wa kunudi kuende ku nzubu, nenunshiye nkayanyi.+ Kadi tshiena nkayanyi to, bualu Tatu udi nanyi.+ 33 Ndi munuambile malu aa bua nuikale ne ditalala ku butuangaji buanyi.+ Pa buloba nenuikale ne dikenga, kadi koleshayi muoyo! Ndi mutshimune ba pa buloba.”+

17 Yezu wakamba malu aa, kujulaye mêsu ende kutangila mu diulu, kuambaye ne: “Tatu, dîba diakumbanyi. Tumbisha muanebe, bua muana akutumbishe,+ 2 anu bu muudi mumupeshe bukokeshi pa bantu* bonso,+ bua apeshe bantu bonso baudi mumupeshe+ muoyo wa tshiendelele.+ 3 Bualu ebu budi bumvuija muoyo wa tshiendelele:+ bende bakumanya wewe,* Nzambi umuepele mulelela,+ ne yeye uuvua mutume, Yezu Kristo.+ 4 Ndi mukutumbishe pa buloba,+ mujikije mudimu uuvua mumpeshe bua kuenza.+ 5 Nanku mpindieu, Tatu, untumbishe ku luseke luebe ne butumbi bumvua nabu ku luseke luebe kumpala kua buloba kuikalaku.+

6 “Ndi muleje* bantu ba mu ba pa buloba bauvua mumpeshe dîna diebe.+ Bavua bebe, wakabampesha, ne mbatumikile dîyi diebe. 7 Mpindieu mbafike ku dimanya ne: malu onso audi mumpeshe mmafume kuudi; 8 bualu ndi mubapeshe mêyi auvua mumpeshe,+ mbaitabe ne mbafike bushuwa ku dimanya ne: mvua mulue bu muleji mpala webe+ ne mbitabuje ne: wewe uvua muntume.+ 9 Ndi ndomba bua bualu buabu; tshiena ndomba bua ba pa buloba to, kadi ndi ndomba bua bantu bauvua mumpeshe, bualu mbebe; 10 ne bintu bianyi bionso mbiebe ne biebe mbianyi,+ ne ndi mutumbishibue munkatshi muabu.

11 “Meme tshiena kabidi pa buloba to, kadi bobu badi pa buloba,+ ne meme ndi ndua kuudi. Tatu wa tshijila, ubalame+ bua dîna diebe wewe diuvua mumpeshe, bua bikale tshintu tshimue* anu bu mutudi nebe tshintu tshimue.*+ 12 Pamvua nabu, mvua mbalama+ bua dîna diebe wewe diuvua mumpeshe; ndi mubalame, kakuena umue wa kudibu udi mubutuke+ pa kumbusha anu muana wa dibutuka,+ bua mufundu ukumbane.+ 13 Kadi mpindieu ndi ndua kuudi, ndi ngamba malu aa pa buloba, bua bikale ne disanka dianyi dikumbane munda muabu.+ 14 Ndi mubapeshe dîyi diebe, kadi ba pa buloba mbabakine, bualu kabena ba pa buloba,+ anu bu mundi meme tshiyi wa pa buloba.

15 “Tshiena ndomba bua ubumbushe pa buloba, kadi mbua ubalame bua bualu bua mubi.+ 16 Kabena ba pa buloba,+ anu bu mundi meme tshiyi wa pa buloba.+ 17 Ubajidile* ku diambuluisha dia bulelela;+ dîyi diebe mbulelela.+ 18 Anu bu muuvua muntume mu ba pa buloba, meme panyi mvua mubatume mu ba pa buloba.+ 19 Ndi ndijidila bua bualu buabu, bua bobu pabu bikale bajidila ku diambuluisha dia bulelela.

20 “Tshiena ndomba anu bua aba nkayabu to, kadi ndi ndomba kabidi bua bantu badi bangitabuja ku diambuluisha dia dîyi diabu, 21 bua bonso bikale tshintu tshimue,+ anu bu muudi wewe, Tatu, mu buobumue nanyi ne meme mu buobumue nebe,+ bua bobu pabu bikale mu buobumue netu, bua ba pa buloba bitabuje ne: uvua muntume. 22 Ndi mubapeshe butumbi buudi mumpeshe, bua bikale tshintu tshimue anu bu mutudi nebe tshintu tshimue.+ 23 Meme mu buobumue nabu ne wewe mu buobumue nanyi, bua bobu bikale tshintu tshimue menemene,* bua ba pa buloba bamanye ne: wewe uvua muntume ne uvua mubanange anu bu muuvua munnange. 24 Tatu, ndi musue bua bantu baudi mumpeshe bikale nanyi muaba undi,+ bua bamone butumbi buanyi buudi mumpeshe, bualu uvua munnange kumpala kua mbangilu wa ba pa buloba.+ 25 Tatu muakane, mu bulelela, ba pa buloba ki mbafike ku dikumanya to,+ kadi meme ndi mukumanye,+ ne bantu aba mbafike ku dimanya ne: uvua muntume. 26 Ndi mubamanyishe dîna diebe, ne nendimanyishe,+ bua dinanga diuvua munnange nadi dikale munda muabu ne meme mu buobumue nabu.”+

18 Yezu mumane kuamba malu aa, wakapatuka ne bayidi bende, kuyabu dishiya dia Tshibandabanda tshia Kidilona*+ muaba uvua budimi, yeye ne bayidi bende bakabuelamu.+ 2 Kadi Yudasa, mumutungidi, uvua pende mumanye muaba au, bualu Yezu uvua uyamu misangu ya bungi ne bayidi bende. 3 Nunku Yudasa wakalua ne tshisumbu tshia basalayi ne balami ba bamfumu ba bakuidi ne ba Bafalese, kuluaye muaba au ne bimunyi ne miendu ne bia mvita.+ 4 Nunku, bu muvua Yezu mumanye malu onso avua ne bua kumufikila, wakasemena kumpala, kubambilaye ne: “Nudi nukeba nganyi?” 5 Bakamuandamuna ne: “Yezu muena Nazaleta.”+ Wakabambila ne: “Mmeme eu.” Kadi Yudasa, mumutungidi, uvua pende muimane nabu.+

6 Kadi pakabambila Yezu ne: “Mmeme eu,” bakalukila tshianyima, kukulukabu panshi.+ 7 Ke yeye kubebeja kabidi ne: “Nudi nukeba nganyi?” Bakamba ne: “Yezu muena Nazaleta.” 8 Yezu wakandamuna ne: “Ndi munuambile ne: Meme ke yeye. Nunku binuikala nunkeba meme, lekelayi aba baye.” 9 Bualu ebu buvua bua kukumbaja dîyi diakambaye ne: “Tshiena mujimije muntu nansha umue wa mu bantu baudi mumpeshe.”+

10 Nunku, Simona Petelo uvua ne muele wa mvita, wakawupatula, kutapaye mupika wa muakuidi munene, kumukosaye ditshi dia ku dia balume.+ Dîna dia mupika au divua Malako. 11 Kadi Yezu wakambila Petelo ne: “Pingaja muele wa mvita mu tshizubu tshiawu.+ Tshiena ne bua kunua dikopo didi Tatu mumpeshe anyi?”+

12 Pashishe basalayi ne mfumu wa basalayi ne balami ba bena Yuda bakakuata Yezu, bakamusuika. 13 Bakanji kuya nende kudi Ana, bualu uvua tatuende muenu wa Kayifa+ uvua muakuidi munene tshidimu atshi.+ 14 Mu bulelela, Kayifa ke eu uvua mupeshe bena Yuda lungenyi ne: bivua bua diakalenga diabu bua muntu umue kufua bua bantu.+

15 Mpindieu, Simona Petelo wakalonda Yezu, kabidi ne muyidi mukuabu.+ Muyidi au uvua mumanyike kudi muakuidi munene, ne wakabuela ne Yezu mu lubanza lua muakuidi munene, 16 kadi Petelo uvua muimane pambelu ku tshiibi.* Nunku muyidi mukuabu, uvua mumanyike kudi muakuidi munene au, wakapatuka, kuakulaye ne mulami wa ku tshiibi, kubuejaye Petelo. 17 Pashishe nsongakaji muena mudimu uvua mulami wa ku tshiibi wakambila Petelo ne: “Wewe pebe kuena umue wa ku bayidi ba muntu eu anyi?” Wakamba ne: “Tshiena umue wa kudibu to.”+ 18 Mpindieu, bapika ne balami bavua bimane banyunguluke kapia ka makala kavuabu batemeshe, bualu kuvua mashika ne bavua bota kapia. Petelo pende uvua muimane nabu, wota kapia.

19 Nunku, mfumu wa bakuidi wakakonka Yezu bua bayidi bende ne bua malongesha ende. 20 Yezu wakamuandamuna ne: “Ndi muakule ne bantu patoke. Mvua ndongesha misangu yonso mu nsunagoga ne mu ntempelo,+ muaba udi bena Yuda bonso badisangisha, ne tshivua muambe bualu nansha bumue mu musokoko to. 21 Udi unkonka bua tshinyi? Konka bantu bavua bumvue malu amvua mubambile. Tangila! Bobu mbamanye malu amvua muambe.” 22 Yeye mumane kuamba malu aa, umue wa ku balami uvua muimane muaba au wakatapa Yezu dipi mu mêsu,+ kuambaye ne: “Ke muudi wandamuna mfumu wa bakuidi nanku?” 23 Yezu wakamuandamuna ne: “Bingikala muambe bualu bubi, jadika bubi abu; kadi bikala tshimvua muambe tshimpe, bua tshinyi udi unkuma?” 24 Pashishe Ana wakamutuma musuika kudi muakuidi munene Kayifa.+

25 Mpindieu, Simona Petelo uvua muimane muaba au wota kapia. Nunku bakamuambila ne: “Wewe pebe kuena umue wa ku bayidi bende anyi?” Wakavila, kuambaye ne: “Tshiena umue wa kudibu to.”+ 26 Umue wa ku bapika ba muakuidi munene, uvua mulela wa muntu uvua Petelo mukose ditshi,+ wakamba ne: “Mvua mukumone nende mu budimi, ki mmuomu?” 27 Kadi Petelo wakavila kabidi, diakamue tshitala tshiakasama.+

28 Pashishe bakumbuka ne Yezu kua Kayifa kuyabu nende mu nzubu mua nguvena.+ Mpindieu bivua patshiatshia. Kadi bobu bine kabakabuela mu nzubu mua nguvena, bua kabalu kudinyanga,+ kadi bamone mua kudia Pasaka. 29 Nunku Pilato wakalua kudibu pambelu, kuambaye ne: “Nudi nubanda muntu eu ne bualu kayi?” 30 Bakamuandamuna ne: “Bu muntu eu kayi muenji wa malu mabi,* katuvua mua kumufila kuudi to.” 31 Nunku Pilato wakabambila ne: “Muangatayi nuenu, numulumbuluishe bilondeshile mikenji yenu.”+ Bena Yuda bakamuambila ne: “Ki mbianyishibue bua tuetu kushipa muntu to.”+ 32 Bualu ebu buvua bua kukumbaja dîyi divua Yezu muambe bua kuleja mushindu wa lufu lukavuaye pa kufua.+

33 Nunku Pilato wakabuela kabidi mu nzubu mua nguvena, kubikilaye Yezu, kumukonkaye ne: “Wewe udi Mukalenge wa bena Yuda anyi?”+ 34 Yezu wakandamuna ne: “Udi webeja bualu ebu bilondeshile wewe nkayebe, anyi bantu bakuabu mbakuambile bualu buanyi?” 35 Pilato wakandamuna ne: “Meme tshiena muena Yuda to, ki mmuomu? Bena tshisamba tshienu ne bamfumu ba bakuidi ke bavua bakufile kundi. Uvua muenze tshinyi?” 36 Yezu wakandamuna ne:+ “Bukalenge buanyi ki mbua pa buloba ebu to.+ Bu Bukalenge buanyi buikale bua pa buloba ebu, bena mudimu banyi bavua mua kuluangana bua tshifidibu kudi bena Yuda to.+ Kadi anu mudibi, Bukalenge buanyi ki mbufumine muaba eu to.” 37 Ke Pilato kumuebeja ne: “Nanku, udi mukalenge anyi?” Yezu kuandamuna ne: “Wewe nkayebe ke udi wamba ne: ndi mukalenge.+ Bualu ndi muledibue bua bualu ebu, ne ndi mulue pa buloba bua bualu ebu, bua meme kumanyisha bulelela.+ Muntu yonso udi ku luseke lua bulelela udi uteleja dîyi dianyi.” 38 Pilato wakamuambila ne: “Bulelela ntshinyi?”

Yeye mumane kuamba nunku, wakaya kabidi pambelu kudi bena Yuda, kubambila ne: “Tshiena musangane bualu munda muende to.+ 39 Bualu bukuabu, nudi ne tshilele tshia meme kunulekeleela muntu dia Pasaka.+ Nunku nudi basue nnulekeleele Mukalenge wa bena Yuda anyi?” 40 Bakela kabidi mbila ne: “Muntu au to, anu Balabase!” Kadi Balabase uvua muivi.+

19 Pashishe Pilato wakangata Yezu, kumuelaye mfimbu.+ 2 Basalayi bakaluka tshifulu tshia butumbi tshia mêba, bobu kumuasatshi ku mutu, kumuvuadikabu muzabi mukunzubile,+ 3 ne bavua balua kudiye, bamba ne: “Muoyo au, Mukalenge wa bena Yuda!” Bavua kabidi bamutapa mapi mu mêsu.+ 4 Pilato wakaya kabidi pambelu, kubambilaye ne: “Tangilayi! Ndi nnupatuilaye pambelu bua numanye ne: tshiena musangane bualu munda muende to.”+ 5 Nunku Yezu wakalua pambelu, muvuale tshifulu tshia butumbi tshia mêba ne muzabi mukunzubile. Pilato kubambila ne: “Tangilayi! Ke Muntu eu!” 6 Kadi pakamumona bamfumu ba bakuidi ne balami, bakela mbila ne: “Yeye anu ku mutshi! Yeye anu ku mutshi!”*+ Pilato wakabambila ne: “Muangatayi nuenu, numushipe,* bualu tshiena musangane bualu nansha bumue munda muende to.”+ 7 Bena Yuda bakamuandamuna ne: “Tudi ne mukenji, ne bilondeshile mukenji au, yeye udi ne bua kufua,+ bualu uvua mudivuije muana wa Nzambi.”+

8 Pakumvua Pilato tshivuabu bamba, wakatshina kabidi bikole, 9 kubuelaye kabidi mu nzubu mua nguvena, kuebejaye Yezu ne: “Udi mufume penyi?” Kadi Yezu kakamuandamuna to.+ 10 Ke Pilato kumuambila ne: “Udi ubenga kuakula nanyi anyi? Kuena mumanye ne: ndi ne bukokeshi bua kukulekela ne ndi ne bukokeshi bua kukushipa* anyi?” 11 Yezu wakamuandamuna ne: “Kuvua mua kuikala ne bukokeshi nansha bukese ku mutu kuanyi bu bobu kabayi bakupeshabu mu diulu to. Ke bualu kayi muntu uvua mumfile kuudi udi ne mpekatu munene.”

12 Bua bualu ebu, Pilato uvua utungunuka ne kukeba mushindu wa kumulekela, kadi bena Yuda bakela mbila ne: “Wewe mulekele muntu eu, kuena mulunda wa Kaisa to. Muntu yonso udi udivuija mukalenge udi uluisha* Kaisa.”+ 13 Nunku, panyima pa Pilato mumane kumvua mêyi aa, wakapatula Yezu pambelu, kusombaye mu nkuasa wa tshilumbuluidi muaba uvuabu babikila ne: Mabue Malamika Panshi, kadi mu tshiena Ebelu ne: Gabata. 14 Kadi divua dituku dia Dilongolola+ dia Pasaka; dîba dikavua bu pa dîba disambombo.* Yeye wakambila bena Yuda ne: “Monayi! Mukalenge wenu!” 15 Kadi bakela mbila ne: “Mumbusha! Mumbusha! Yeye anu ku mutshi!”* Pilato wakabebeja ne: “Nshipe mukalenge wenu anyi?” Bamfumu ba bakuidi bakandamuna ne: “Katuena ne mukalenge mukuabu to, anu Kaisa.” 16 Nanku wakamufila kudibu bua bamushipele ku mutshi.+

Nunku bobu bakangata Yezu. 17 Uvua mudiambuile mutshi wa makenga,* kupatukaye kuya muaba uvuabu babikila ne: Muaba wa Kabalubalu ka mutu,+ udibu babikila mu tshiena Ebelu ne: Gologota.+ 18 Kuoku aku bakamupopela ku mutshi+ pamue ne bantu bakuabu babidi, umue eku, mukuabu eku, Yezu pankatshi.+ 19 Pilato wakafunda kabidi miaku, kuyitekaye ku mutshi wa makenga.* Bavua bafunde ne: “Yezu muena Nazaleta Mukalenge wa bena Yuda.”+ 20 Bena Yuda ba bungi bakabala miaku eyi, bualu muaba uvuabu bapopele Yezu ku mutshi uvua pabuipi ne tshimenga, ne bavua bayifunde mu tshiena Ebelu, mu muakulu wa Laten ne mu tshiena Greke. 21 Kadi bamfumu ba bakuidi ba bena Yuda bakambila Pilato ne: “Kufundi ne: ‘Mukalenge wa bena Yuda’ to, kadi funda ne: wakamba ne: ‘Meme ndi Mukalenge wa bena Yuda.’” 22 Pilato wakamba ne: “Nkadi mufunde tshindi mufunde atshi.”

23 Kadi pavua basalayi bapopele Yezu ku mutshi, bakangata bilamba biende bia pa mutu, kubiabanya mu bitupa binayi, tshitupa tshimue bua musalayi yonso, kuangatabu kabidi tshilamba tshia muinshi. Kadi tshilamba tshia muinshi atshi katshivua ne mutelu to, tshivua tshiluka kubangila kuulu too ne kuinshi. 24 Nunku bakambilangana ne: “Katutshipandi to, kadi tuelayi nshobo bua kumanya wikala muenatshi.”+ Bualu ebu buvua bua kukumbaja mufundu eu ne: “Bakabanyangana bilamba bianyi, bakelela tshilamba tshianyi nshobo.”+ Nunku basalayi bakenza malu aa bulelela.

25 Kadi mamuende, ne muanabu ne mamuende wa bakaji;+ Mariya mukaji wa Kelopa ne Mariya wa ku Magadala, bavua bimane pabuipi ne mutshi wa makenga* wa Yezu.+ 26 Nunku pakamona Yezu mamuende ne muyidi uvuaye munange+ bimane pabuipi apu, wakambila mamuende ne: “Mukaji, mona! Muanebe!” 27 Pashishe wakambila muyidi au ne: “Mona! Mamuebe!” Kutuadijila anu ku dîba adi, muyidi au wakaya nende kuende.

28 Panyima pa bualu ebu, pakamanya Yezu ne: kubangila ku mpindieu malu onso mmakumbane, bua kukumbaja mufundu, wakamba ne: “Ndi mumvue nyota.”+ 29 Mulondo uvua muaba au muwule tente ne mvinyo wa buanji. Nunku bakasa musukula mpampa muwule tente ne mvinyo wa buanji ku tshibalabala tshia izope,* kuwutekabu ku mishiku yende.+ 30 Pakangata Yezu mvinyo wa buanji au, wakamba ne: “Bualu buakumbanyi!”+ kuinyikaye mutu panshi, kukulaye muoyo.*+

31 Bu muvua dituku adi dikale dia Dilongolola,+ bua bitalu kabishadi ku mitshi ya makenga+ dituku dia Nsabatu (bualu dituku dia Nsabatu adi divua dituku dinene),+ bena Yuda bakalomba Pilato bua kutshibula mikolo yabu ne bua kumbusha bitalu. 32 Nunku basalayi bakalua, kutshibulabu mikolo ya muntu wa kumpala ne ya muntu mukuabu uvua ku mutshi ku luseke luende. 33 Kadi pakaluabu kudi Yezu, bakamona ne: ukavua mufue, nanku kabakatshibula mikolo yende to. 34 Kadi umue wa ku basalayi wakamutua difuma mu lubadi,+ diakamue mashi ne mâyi biakapatuka. 35 Muntu udi mumone bualu ebu ke udi mufile bujadiki ebu, ne bujadiki buende mbulelela, ne yeye mmumanye ne: malu adiye wamba mmalelela, bua nuenu penu nuitabuje.+ 36 Mu bulelela, malu aa akenzeka bua kukumbaja mufundu eu ne: “Kabakutshibula* mufuba wende nansha umue.”+ 37 Kabidi mufundu mukuabu udi wamba ne: “Nebatangile kudi muntu uvuabu batubule.”+

38 Kadi panyima pa malu aa, Jozefe wa ku Alimataya, uvua muyidi wa Yezu wa mu musokoko bualu uvua utshina bena Yuda,+ wakalomba Pilato ni uvua mua kumbusha tshitalu tshia Yezu, Pilato wakamuitabila. Nunku wakalua, kumbushaye tshitalu atshi.+ 39 Nikodemo,+ muntu uvua mulue kudiye butuku musangu wa kumpala, wakalua pende, muikale ne mire musambakaja ne alowe bia* bujitu bua kilo mitue ku 30.+ 40 Nunku bakangata tshitalu tshia Yezu, kutshijingilabu mu bilamba bia line ne bintu bia dipembu dimpe+ ebi bilondeshile tshilele tshia bena Yuda tshia dijiikangana. 41 Kadi, kuvua budimi muaba uvuabu bamushipele* au, ne mu budimi amu muvua lukita* lupialupia+ muvuabu kabayi banji kuteka muntu. 42 Bu muvuadi dituku dia Dilongolola+ dia bena Yuda ne bu muvua lukita pabuipi apu, bakatekamu Yezu.

20 Dituku dia kumpala dia lumingu, Mariya wa ku Magadala wakalua ku lukita* mu dinda menemene,+ patshivua panshi pafiike, wakamona ne: bakavua bumbushe dibue ku lukita.*+ 2 Nunku wakalua lubilu kudi Simona Petelo ne muyidi mukuabu uvua Yezu munange bikole,+ kubambilaye ne: “Mbumbushe Mukalenge mu lukita,+ katuena bamanye kudibu bamuteke to.”

3 Ke Petelo ne muyidi mukuabu au kupatuka kuyabu ku lukita. 4 Bubidi buabu bakatuadija kunyema, kadi muyidi mukuabu au wakanyema bikole kupita Petelo, kufikaye wa kumpala ku lukita. 5 Wakinangilamu, kumonaye bilamba bia line muaba au,+ kadi kakabuelamu to. 6 Pashishe Simona Petelo wakalua pende, wenda umulonda, kubuelaye mu lukita. Wakamona bilamba bia line muaba au. 7 Tshilamba tshivua ku mutu wende katshivua pamue ne bilamba bikuabu bivuabu bamujingile to, kadi tshivua tshivunga pa muaba watshi pa nkayatshi. 8 Pashishe, muyidi mukuabu uvua mufike ku lukita kumpala au, wakabuela pende, kumonaye, yeye kuitabuja. 9 Bualu kabavua banji kujingulula mufundu wa ne: udi ne bua kujuka ku lufu to.+ 10 Nunku bayidi abu bakapingana ku mabu.

11 Kadi Mariya wakashala muimane pambelu pabuipi ne lukita, udila. Pavuaye udila, wakinangila bua kutangila mu lukita, 12 kumonaye banjelu babidi+ bavuale bilamba bitoke, basombe muaba uvua tshitalu tshia Yezu, umue ku mutu, mukuabu ku makasa. 13 Bakamukonka ne: “Mukaji, udi udila bua tshinyi?” Wakabambila ne: “Mbumbushe Mukalenge wanyi, tshiena mumanye kudibu bamuteke to.” 14 Yeye mumane kuamba mêyi aa, wakakudimuka, kumonaye Yezu muimane muaba au, kadi kavua mujingulule ne: uvua Yezu to.+ 15 Yezu wakamuebeja ne: “Mukaji, udi udila bua tshinyi? Udi ukeba nganyi?” Yeye uvua wela meji ne: mmuena mudimu wa mu budimi abu, kumuambilaye ne: “Mukalenge, biwikala mumumbushe, ngambilaku muaba uudi mumuteke, nemmuangate.” 16 Yezu wakamubikila ne: “Mariya!” Pakakudimukaye, wakamuambila mu tshiena Ebelu ne: “Laboni!” (muaku udi umvuija “Mulongeshi!”) 17 Yezu wakamuambila ne: “Lekela kunkuata, bualu tshiena muanji kubanda kudi Tatu to. Kadi ndaku kudi bana betu,+ ubambile ne: ‘Ndi mbanda kudi Tatu wanyi+ ne Tatu wenu, kudi Nzambi wanyi+ ne Nzambi wenu.’” 18 Mariya wa ku Magadala wakalua, kutuadilaye bayidi lumu ne: “Ndi mumone Mukalenge!” Yeye kubambila malu avuaye mumuambile.+

19 Pakavua dîba diye bikole dituku adi, dituku dia kumpala dia lumingu, ne biibi bivua bikange muaba uvua bayidi bualu bavua batshina bena Yuda, Yezu wakalua, kuimanaye munkatshi muabu, kubambilaye ne: “Ditalala dikale nenu.”+ 20 Yeye mumane kuamba bualu ebu, wakabaleja bianza biende ne lubadi luende.+ Nunku bayidi bakasanka pakamonabu Mukalenge.+ 21 Yezu wakabambila kabidi ne: “Ditalala dikale nenu.+ Anu bu mudi Tatu muntume,+ meme panyi ndi nnutuma.”+ 22 Yeye mumane kuamba bualu ebu, wakabela mupuya, kubambilaye ne: “Angatayi nyuma muimpe.*+ 23 Nuenu babuikidile muntu kayi yonso mpekatu yende, idi ibuikidibua; nuenu kanuyi babuikile ya muntu kayi yonso, kayena ibuikidibua to.”

24 Kadi Tomase,+ umue wa ku bapostolo 12, uvuabu babikila ne: Dipasa, kavua nabu pavua Yezu mulue to. 25 Nunku bayidi bakuabu bavua bamuambila ne: “Tudi bamone Mukalenge!” Kadi yeye wakabambila ne: “Meme tshiyi mumone bimanyinu bia misonso mu bianza biende, tshiyi mubueje munu wanyi mu bimanyinu bia misonso abi ne tshiyi mubueje tshianza tshianyi mu lubadi luende,+ tshiakuitabuja nansha kakese.”

26 Kadi matuku muanda mukulu pashishe, bayidi bende bavua kabidi mu nzubu, Tomase uvua nabu. Yezu wakalua, nansha muvua biibi bikange, wakimana munkatshi muabu, kuambaye ne: “Ditalala dikale nenu.”+ 27 Pashishe wakambila Tomase ne: “Ela munu webe muaba eu, tangila bianza bianyi, angata tshianza tshiebe, tshibueja mu lubadi luanyi, ne lekela mpata,* kadi itabuja.” 28 Tomase wakamuandamuna ne: “Mukalenge wanyi ne Nzambi wanyi!” 29 Yezu wakamuambila ne: “Udi muitabuje bualu udi mummone anyi? Ba diakalenga mbadi bitabuja nansha kabayi bamone.”

30 Mu kuamba kuimpe, Yezu wakenza kabidi bimanyinu bikuabu bia bungi kumpala kua bayidi bidi kabiyi bifunda mu muvungu eu.+ 31 Kadi malu aa mmafunda bua nuitabuje ne: Yezu udi Kristo, Muana wa Nzambi, ne bua munudi nuitabuja, nuikale ne muoyo ku diambuluisha dia dîna diende.+

21 Panyima pa malu aa, Yezu wakadileja patoke* kabidi kudi bayidi bende, ku Mbuu wa Tibelia. Wakadileja patoke mu mushindu eu. 2 Simona Petelo, Tomase (uvuabu babikila ne: Dipasa),+ Natanaele+ wa ku Kana wa Galela, bana ba Zebedayi,+ ne bayidi bende bakuabu babidi, bavua pamue. 3 Simona Petelo wakabambila ne: “Ndi nya kuloba.” Bakamuambila ne: “Tuyaya nebe.” Bakapatuka, kubuelabu mu buatu, kadi kabakakuata tshintu nansha tshimue butuku abu to.+

4 Kadi pakavua butuku buamba kutshia, Yezu wakimana ku muelelu wa mâyi, kadi bayidi kabavua bajingulule ne: uvua Yezu to.+ 5 Pashishe Yezu wakabambila ne: “Bana, nudi ne tshintu tshia* kudia anyi?” Bakandamuna ne: “Tòo!” 6 Yeye kubambila ne: “Elayi kapamba* ku dia balume dia buatu, nenupete ndambu.” Nunku bakakela, kadi kabavua bakokeshe bua kukapulumuna bua bungi bua mishipa.+ 7 Nunku muyidi uvua Yezu munange au+ wakambila Petelo ne: “M’Mukalenge!” Kadi pakumvua Simona Petelo ne: uvua Mukalenge, wakavuala* tshilamba tshiende tshia pa mutu, bualu uvua butaka,* kudielaye mu mbuu. 8 Kadi bayidi bakuabu bakalua mu buatu bukese, benda bakoka kapamba kuwula tente ne mishipa, bualu kabavua kule ne ku mukuna to, metre matue ku 90* tshianana.

9 Pakafikabu ku mukuna, bakamona kapia ka makala ne mishipa mitekapu ne diampa. 10 Yezu wakabambila ne: “Luayi ne ndambu wa mishipa inudi bafume ku dikuata mpindieu.” 11 Nunku Simona Petelo wakabuela mu buatu, kupulumunaye kapamba ku mukuna kuwula tente ne mishipa minene 153. Nansha muvuayi bungi nanku, kapamba kakakapandika to. 12 Yezu kubambila ne: “Luayi nudie.” Muyidi nansha umue kavua ne dikima dia kumukonka ne: “Wewe udi nganyi?” to, bualu bavua bamanye ne: uvua Mukalenge. 13 Yezu wakalua, kuangataye diampa, kubapeshadi ne kuenzaye bia muomumue ne mishipa. 14 Eu uvua mpindieu musangu muisatu+ uvua Yezu mumuenekele bayidi bende yeye mumane kujudibua ku lufu.

15 Pakajikijabu kudia, Yezu wakambila Simona Petelo ne: “Simona muana wa Yone, udi munnange kupita ebi anyi?” Wakamuandamuna ne: “Eyowa, Mukalenge, udi mumanye ne: ndi mukunange bikole.” Yeye wakamuambila ne: “Udiishe bana banyi ba mikoko.”+ 16 Wakamuambila kabidi musangu muibidi ne: “Simona muana wa Yone, udi munnange anyi?” Wakamuandamuna ne: “Eyowa, Mukalenge, udi mumanye ne: ndi mukunange bikole.” Yeye wakamuambila ne: “Ulame mikoko yanyi mikese.”+ 17 Wakamuambila musangu muisatu ne: “Simona muana wa Yone, udi munnange bikole anyi?” Petelo wakabungama bua muvuaye mumuebeje musangu muisatu ne: “Udi munnange bikole anyi?” Nunku Petelo wakamuambila ne: “Mukalenge, wewe udi mumanye malu onso; udi mumanye ne: ndi mukunange bikole.” Yezu wakamuambila ne: “Udiishe mikoko yanyi mikese.+ 18 Bulelela, bulelela, ndi nkuambila ne: pautshivua muana, uvua uvuala bilamba nkayebe, uya kuonso kuuvua musue. Kadi paudi ukulakaja, newolole bianza biebe ne muntu mukuabu neakuvuadike bilamba, neaye nebe kuudi kuyi musue.” 19 Wakamba nanku bua kuleja mushindu wa lufu luvuaye ne bua kutumbisha nalu Nzambi. Yeye mumane kuamba nunku, wakamuambila ne: “Tungunuka ne kundonda.”+

20 Petelo wakakudimuka, kumonaye muyidi uvua Yezu munange+ wenda ulonda, yeye uvua kabidi mueyemene mu tshiadi tshiende pavuabu badia biakudia bia dilolo ne mukonke ne: “Mukalenge, nnganyi udi ukutungila tshitungu?” 21 Nunku pakamumona Petelo, wakebeja Yezu ne: “Mukalenge, kadi bua muntu eu?” 22 Yezu wakamuambila ne: “Bingikala musue bua ashale too ne pangalua, mbualu buebe anyi? Wewe tungunuka ne kundonda.” 23 Nunku, dîyi edi diakatangalaka munkatshi mua bana betu ne: muyidi eu kavua mua kufua to. Kadi Yezu kavua mumuambile ne: kavua mua kufua to, kadi uvua muambe ne: “Bingikala musue bua ashale too ne pangalua, mbualu buebe anyi?”

24 Muyidi eu+ ke udi ufila bujadiki ebu bua malu aa ne ke uvua mufunde malu aa, ne tudi bamanye ne: bujadiki buende mbulelela.

25 Mu bulelela, kudi kabidi malu makuabu a bungi avua Yezu muenze, bu owu anu mafunda onso ku kanungu ne ku kanungu, ndi ngela meji ne: buloba buine kabuvua mua kukumbana mivungu ivuabu mua kufunda to.+