Ngondo 5

Tudi mua kuidikija petu mêyi malenga a Yezu tuetu bikale bantu badi banange bakuabu, badi babanemeka ne bikale baditatshisha bua mushindu udibu badiumvua. Pakamona Yezu musumba wa bantu udienzeja bikole bua kumuteleja, wakabumvuila luse ne “wakatuadija kubalongesha malu a bungi.” (Mâko 6:34) Nansha pavua bantu bapenda Yezu, kavua ubapingajila bipendu to. (1 Pet. 2:23) Bidi mua kutukolela bua kuakula ne bukalanga ne bulenga patudi tuyukila ne muntu utudi bamanye bimpe menemene. Tudi mua kuela meji ne: kabiena ne mushinga bua kutabalela mushindu utudi tubambila malu to. Bidi mua kutuenzekela nanku nangananga patudi tuyukila ne muena mu dîku dietu anyi mulunda wetu wa pa muoyo wa mu tshisumbu. Yezu uvuaku mumone ne: bu muvuaye mudie malanda mimpe ne bayidi bende, uvua ne bukokeshi bua kubamba mêyi mabi anyi? Nansha kakese. Pavua bamue ba kudibu bakokangana bua kumanya uvua munene kupita bakuabu, wakababela mu mushindu muimpe ne kubapeshaye tshilejilu tshia muana mukese. (Mâko 9:33-37) Bakulu badi mua kuidikija tshilejilu tshia Yezu pa kubela bakuabu “ne meji a bupole.”​—Gal. 6:1. w15 15/12 3:15, 16

Bua tshinyi bidi ne mushinga bua kutungunuka ne kunangangana bu bana ba muntu? Diandamuna dipepele didi ne: Yehowa ke udi utulomba bua kunangangana bu bana ba muntu. Katuena mua kuamba ne: tudi banange Yehowa kadi eku tubenga kunanga bana betu to. (1 Yone 4:7, 20, 21) Bualu bukuabu budi ne: muntu yonso udi dijinga ne diambuluisha dia mukuabu, nangananga mu bikondo bia ntatu. Pavua Paulo mufundile bena Kristo ba mu Ebelu mukanda, uvua mumanye ne: bamue bakavua pa kushiya nzubu yabu ne bintu biabu. Yezu uvua muleje muvua tshikondo atshi ne bua kuikala tshikole. (Mâko 13:14-18; Luka 21:21-23) Nunku kumpala kua tshikondo atshi kufika, bena Kristo abu bavua ne bua kukolesha dinanga munkatshi muabu. (Lomo 12:9) Mu katupa kîpi emu, nebalekelele mpepele ya dikenga dinene ditu kadiyi dianji kuenzeka. (Mâko 13:19; Buak. 7:1-3) Kadi pa kumbusha didisangisha dietu pamue pa tshibidilu, kudi malu makuabu atudi ne bua kuenza. Paulo wakavuluija bena Kristo ba mu Ebelu ne: bavua ne bua kuenza mudimu ne mpunga ya nunku bua kusakangana “ku dinanga ne ku bienzedi bimpe.”​—Eb. 10:24, 25. w16.01 1:6-8

Mu Pentekoste wa mu tshidimu tshia 33, bena Kristo 120 bavua badisangishe pamue mu nzubu wa kuulu mu Yelushalema “batungunuka ne kusambila.” (Bien. 1:13-15) Bualu buvua ne bua kubafikila budi dikumbana dia mulayi wa buprofete wa muprofete Yoele. (Yoe. 2:28-32; Bien. 2:16-21) Nzambi wakitshikijila bena Kristo bavua badisangishe mu nzubu wa kuulu aba nyuma wende muimpe. (Bien. 1:8) Bakatuadija kuamba mêyi a buprofete, mmumue ne: kuakula malu mimpe avuabu bamone ne bumvue. Mupostolo Petelo wakumvuija musumba wa bantu uvua mulue kubakunguila mushinga wa tshivua tshienzeke. Wakambila musumba wa bantu au ne: “Kudimunayi mitshima, ne yonso wa kunudi abatijibue mu dîna dia Yezu Kristo bua dilekelela dia mibi yenu ne nenupete dipa dia nyuma muimpe didi Nzambi ufila tshianana.” Dituku adi bantu batue ku 3000 bakabatijibua ne kupetabu pabu nyuma muimpe.​—Bien. 2:37, 38, 41. w16.01 3:1-3

Ntshinyi tshidi mupostolo Paulo usua kuamba muaba eu? Muena Kristo muela manyi yeye kayi mu malanda mimpe ne Yehowa, udi udia mu mushindu udi kawuyi muakanyine. (Eb. 6:4-6; 10:26-29) Didimuija dikole edi didi divuluija bela manyi ne: ki mbanji kupeta difutu diabu to. Badi ne bua kutungunuka ne kudienzeja “bua kupeta tshipatshila tshia difutu dia dibikila dia muulu dia Nzambi ku butuangaji bua Kristo Yezu.” (Filip. 3:13-16) Paulo wakalomba bena Kristo bela manyi ku bukole bua nyuma muimpe ‘bua kuendabu biakanangane ne dibikila divuabu bababikile.’ Mmunyi muvuabu ne bua kuenza nunku? Paulo wakumvuija wamba ne: “Ne didipuekesha dionso ne bupole buonso, ne lutulu, nulekelelangana bilema mu dinanga, nudienzeja ne muoyo umue bua kulama buobumue bua kudi nyuma mu tshisuikidi tshia ditalala.” (Efeso 4:1-3) Nyuma muimpe wa Yehowa udi wambuluisha bua kuikala ne budipuekeshi, kadi ki mbua kuikala ne lutambishi to.​—Kolos. 3:12. w16.01 4:5, 6

Fuanyikijabi Abalahama ne bidimu bitue ku 125 wenda ubanda mukuna bitekete bitekete. Udi wenza luendu luvua pamuapa lua lutatu lukole lua mu nsombelu wende. Luendu eu kaluvua lukole bualu ukavua mukulakaje to. Utshivua ne makanda a bungi. Muanende Izaka uvua ne bidimu 25 udi wenda umulonda mu nyima. Uvua muambule nkunyi, ne Abalahama uvua mukuate kele ne bintu bia kutemesha nabi kapia ku bianza. Yehowa uvua mumulombe bua kulambula muanende. (Gen. 22:1-8) Etshi tshivua pamuapa diteta ditambe bunene dia ditabuja dia Abalahama. Abalahama kavua muitabe bua kutumikila Nzambi tshitabataba to. Uvua mutumikile bualu uvua umona. Uvua mumone ne mêsu a ditabuja ne: Yehowa kavua mua kumulomba bua kuenza bualu buvua mua kumukengeshisha kashidi to. Abalahama uvua mumanye ne: yeye mutumikile, Yehowa uvua ne bua kumubenesha yeye ne muanende munanga. Ditabuja edi divua dishindamene pa tshinyi? Divua dishindamene pa dimanya ne dimonamona dia malu. w16.02 1:3, 4

Mariya uvua ne bua kuimita, kulela, ne kukolesha Muana mulela umuepele wa Nzambi! Misangu ya bungi tutu tuakula bua diakalenga dinene divuabu bapeshe Mariya kadi tupua muoyo bua kuela meji bua amue malu avua mua kuikala mamuenze buôwa. Tshilejilu, muanjelu Gabaliele wakamuambila ne: uvua ne bua kuimita mu tshishima, kayi musangile ne mulume. Kadi Gabaliele kavua mumvuije bena mu dîku dia ba Mariya ne bantu ba muaba uvuaye mushindu uvuaye ne bua kuimita to. Ntshinyi tshivua bantu aba mua kuamba? Mariya uvua mua kuikala uditatshisha bua mubangila wende Jozefe. Mmunyi muvuaye mua kumujadikila ne: nansha muvuaye muimite, kavua mupange lulamatu kudiye? Bualu bukuabu, uvua ne mudimu munene wa kukolesha, kutabalela ne kulongesha muana wa Nzambi bu muntu! Katuena bamanye malu onso avua atatshisha Mariya mu lungenyi pavuabu bayukile ne muanjelu Gabaliele to. Kadi tudi bamanye ne: wakandamuna ne mêyi adi mu mvese wa lelu aa.​—Luka 1:26-37. w16.02 2:13, 14

Hushai uvua dijinga ne dikima bua kushalaye ne lulamatu kudi Nzambi. Hushai uvua umue wa ku balunda ba lulamatu ba mukalenge Davidi. Kadi lulamatu luende luvua mu diteta pavua Abashaloma muana wa Davidi muibe mioyo ya bantu ba bungi ne ukeba kunyenga Yelushalema ne kulua mukalenge. (2 Sam. 15:13; 16:15) Davidi uvua munyeme, kadi ntshinyi tshivua Hushai mua kuenza? Uvuaku mua kulekela Davidi bua kuambuluisha Abashaloma anyi? Bu muvua Hushai musue kulamata mukalenge uvua Nzambi musungule, wakaya ku mukuna wa Olive bua kumonangana ne Davidi. (2 Sam. 15:30) Davidi wakalomba Hushai bua kupingana mu Yelushalema ne bua adivuije bu mulunda wa Abashaloma bua amusake bua ateleje mubelu wende pamutu pa kutelejaye wa Ahitofele. Hushai uvua ne dikima ne wakateka muoyo wende mu njiwu bua kutumikila Davidi ne kushala ne lulamatu kudi Yehowa. Anu muvua Davidi mulombe mu disambila, Abashaloma wakateleja Hushai pamutu pa kuteleja Ahitofele.​—2 Sam. 15:31; 17:14. w16.02 4:15, 16

Bu mutudi bena Kristo, buludiki buvua Yehowa mupeshe bena Isalele ku butuangaji bua Mikenji budi mua kutuambuluisha. Mushindu kayi? Tudi mua kuimana ne kutangila mêyi manene adi nshindamenu wa Mikenji eyi. Nansha mutudi katuyi muinshi mua mikenji eyi, tudi anu mua kueyemena ya bungi ya kudiyi bua itulombole mu nsombelu wetu wa ku dituku ne ku dituku ne mu ntendelelu wetu wa Yehowa, Nzambi wetu wa tshijila. Mmufundishe mikenji eyi mu Bible bua itulongeshe, itulombole ku diambuluisha dia mêyi manene ayi ne bua tuikale ne dianyisha bua mikenji minene ya bena Kristo. Teleja tshivua Yezu muambe etshi: “Nuakumvua tshivuabu bambe ne: ‘Kuena ne bua kuenda masandi.’ Kadi meme ndi nnuambila ne: muntu yonso udi utungunuka ne kutangila mukaji mu mushindu wa kumvua dijinga dia kusangila nende, ukadi muende nende masandi mu muoyo wende.” Nunku katuena anu ne bua kuepuka bua kuenda masandi to, kadi tudi kabidi ne bua kulekela meji ne majinga a malu a masandi.​—Mat. 5:27, 28. w16.03 4:6, 8

Samuele uvua muelakane bua kuenza tshivua bantu balomba, ke Yehowa kumuambilaye misangu isatu bua kubenzelaye tshivuabu balomba. (1 Sam. 8:7, 9, 22) Nansha nanku, Samuele kavua mulekele meji mabi ela miji mu muoyo wende bua muntu uvua ne bua kumupingana to. Pavua Yehowa mumuambile bua kuela Shaula manyi, muprofete wakatumikila, kayi welakana bua kumupesha bujitu abu, kadi wakenza nanku ne muoyo mujima ne dinanga. Anu bu Samuele, bakulu badi ne dimonamona dia malu lelu badi pabu ne meji a muomumue bua bantu badibu balongesha. (1 Pet. 5:2) Bakulu aba kabatu babenga kulongesha bakuabu, batshina bua bana betu badibu balongesha kabalu kuangata amue majitu adibu nawu mu tshisumbu to. Balongeshi ba muoyo muimpe aba kabena bamona balongi badi badifila bu bantu badi bafuilakana nabu majitu to, kadi badi babamona bu ‘benzejanganyi nabu ba mudimu,’ mmumue ne: bu mapa a mushinga mukole bua tshisumbu. (2 Kol. 1:24; Eb. 13:16) Bakulu badi ne lungenyi lua kupesha bakuabu majitu aba badi bapeta disanka dia bungi padibu bamona mushindu udi bana betu badibu balongeshe benza mudimu ne mamanya abu bua kuambuluisha tshisumbu.​—Bien. 20:35. w15 15/4 1:16, 17

Mukalenge Uziya yeye wakatungunuka ne ‘kuenza malu mimpe ku mêsu kua Yehowa.’ Kadi ‘Yehowa wakasamisha mukalenge ne disama dia nsudi too ne ku dituku dia lufu luende.’ (2 Bak. 15:1-5) Bua tshinyi? Muyuki eu ki mmutokeshe bualu ebu to. Bualu ebu budiku mua kututonda anyi kutusaka bua kudiebeja bikala Yehowa uvua munyoke Uziya kakuyi bualu anyi? Tuetu bamanye bimpe mutu Yehowa wenza malu, katuakuela meji nanku to. Mu muyuki wa muomumue udi mu 2 Kulondolola 26:3-5, 16-21, tudi tumvua ne: nansha muvua Uziya muenze malu mimpe bua tshikondo kampanda, panyima pa matuku ‘wakadisua mu mutshima wende, wakenza malu mabi.’ Wakateta ne dikamakama dionso bua kuenza midimu ya buakuidi ivuaye kayi ne bukenji bua kuenza. Bakuidi makumi muanda mukulu ne umue bakamutandisha ne kudienzejabu bua kumubela. Ntshinyi tshiakenza Uziya? Wakaleja muvuaye mulue muena lutambishi. ‘Wakakuatshila bakuidi tshiji.’ Kabiena bitukemesha bua muvua Yehowa mumuase disama dia nsudi to. w15 15/4 3:8, 9

Anu mudibu baleje kuulu eku, badi babikila Satana ne: Diabolo, dîna didi diumvuija “Mushiminyinyanganyi wa malu.” Bualu ebu budi butuvuluija ne: Satana mmushiminyine Yehowa padiye wamba mudiye muena dishima. Tshiambilu tshia ne: “nyoka wa kale” tshidi tshituvuluija dituku divua Satana muenze mudimu ne nyoka mu budimi bua Edene bua kushima Eva. Tshiambilu tshia ne: “dragon munene” tshidi tshituvuluija tshifukibua tshidi tshienza buôwa ne ntshikumbanyine dijinga dibi didi nadi Satana dia kupangisha malu adi Yehowa mulongolole bua kaakumbanyi ne dia kubutula bantu bende. Bidi bimueneka patoke ne: Satana udi uluisha bikole muoyo wetu mutoke. Ke bualu kayi Bible udi utuambila ne: “Nulame meji enu, nuikale badimuke. Muena lukuna wenu Diabolo udi unyunguluka bu ntambue udi ukungula, ukeba bua kudia muntu.” (1 Pet. 5:8) Satana udi usanka bikole padi mutendeledi wa Nzambi wenza mpekatu munene ne udi mua kuenza mudimu ne mishindu ya ditshimuna eyi bua kupenda anyi kuyobola Yehowa.​—Nsu. 27:11. w15 15/5 1:3, 4, 10

Yehowa mmusue bua tuikale ne nsombelu muimpe, bualu budi bumueneka patoke patudi tutangila bintu bimpe bivuaye mulongoluele Adama ne Eva. (Gen. 2:9) Kadi Satana udi mua kuenza mudimu ne “mashimi adi nawu biuma” bua kunyanga majinga etu. (Mat. 13:22) Bantu ba bungi badi bela meji ne: makuta adi mua kubapetesha disanka anyi ne: kuikala ne bintu bia ku mubidi ke kudi kupetesha diakalengele. Kuela meji nunku nkudishima bibi menemene, kudi mua kutufikisha ku dijimija bintu bia mushinga bitudi nabi, mbuena kuamba ne: malanda etu ne Yehowa. Yezu wakadimuija bayidi bende ne: “Muntu nansha umue kena mua kuenzela bamfumu babidi mudimu to, bualu neakine umue, neanange mukuabu, anyi nealamate umue, neapetule mukuabu. Kanuena mua kuikala bapika ba Nzambi ne ba Biuma popamue to.” (Mat. 6:24) Tuetu balue bapika ba Biuma, tudi tulekela kuenzela Yehowa mudimu, ne ke tshidi Satana ujinga menemene bua tuetu kuenza. Katulekedi nansha kakese makuta anyi bintu bidiwu mua kusumba binyanga malanda etu ne Yehowa to. Bua kuluangana ne Satana, tudi ne bua kuikala ne nkatshinkatshi bua bintu bia ku mubidi.​—1 Tim. 6:6-10. w15 15/5 2:12

Kabitu anu bipepele misangu yonso bua kumvua tunyinganyinga tudi natu bakuabu to. Bantu ba bungi batu ne ntatu itudi katuyi banji kupeta. Bamue batu ne ntatu ya ku mubidi mikebesha kudi mputa, masama anyi bukulakaje. Bakuabu badi ne ntatu ya mu lungenyi mikebesha kudi dibungama dikole, dibabunda anyi kudi bipeta bia malu kampanda mabi avuabu benze. Bakuabu badi mu dîku didi ditapuluke mu malu a ntendelelu anyi didi ne muledi umue udikoleshila bana. Muntu yonso utu ne yende ntatu, ne misangu ya bungi katutu banji kutuilangana nayi to. Mmunyi mutudi mua kuidikija dinanga dia Nzambi mu nsombelu eyi? Mbimpe kuteleja ne ntema mudi muntu mukuabu udiumvua bua kuteta mua kumvua nsombelu wende. Nebitusake bua kumuenzela malu bilondeshile majinga ende bua kuidikija dinanga dia Yehowa. Majinga a muntu ne muntu mmashilangane, kadi tudi mua kumuleja mudi Yehowa umvua bua lutatu luende anyi kumupesha diambuluisha dikuabu didi dikengela.​—Lomo 12:15; 1 Pet. 3:8. w15 15/5 4:6, 7

Yehowa ke udi mupeshe Kristo bukole, nunku tudi tuitaba ne: Nzambi Wa Bukole Buonso mmukumbane bua kulombola bimpe makole adi nawu bintu bidiye mufuke. Tukonkonone bilejilu bikese. Kumpala kua Mvula wa kabutu kutuadija, Yehowa wakamba ne: ‘Palepa matuku muanda mutekete nendokeshe mvula pa buloba munya ne bufuku too matuku makumi anayi.’ (Gen. 7:4) Ekesode 14:21 udi wamba pende ne: ‘Yehowa wakatuma lupepele lukole lua ku esete.’ Tudi tubala kabidi mu Yona 1:4 ne: ‘Yehowa wakatuma tshipepele tshikole pa mâyi manene, ne tshipupu tshikole tshiakadi pa mâyi manene; buatu buakamba kutshibuka.’ Bidi bitukolesha patudi tumanya ne: Yehowa udi ne bukole bua kulombola bintu bidiye mufuke. Bidi bimueneka patoke ne: malu mimpe atudi bindile pa buloba adi mu bianza bia muntu muimpe. Bidi bienza disanka bua kuela meji bua tshikondo tshikala makole a bintu bidi Nzambi mufuke kaayi mua kushipa muntu anyi kumukengesha bualu ‘ntenta wa Nzambi neikale ne bantu.’ (Buak. 21:3, 4) Tuikale bashindike ne: bukole bua Nzambi budi bumuenekele kudi Kristo nebulombole makole a bintu bidi Nzambi mufuke munkatshi mua bidimu tshinunu. w15 15/6 1:15, 16

Njiwu ya dibenga kutumikila mubelu eu mmileja mu Nsumuinu nshapita wa 7 mudibu bakula bua nsongalume udi uya kuendakana pabuipi ne nzubu wa mukaji wa masandi. Badi bafika ku dienda masandi. Bu yeye muepuke mukaji au, kavua mua kupeta bipeta bibi abi to. (Nsu. 7:6-27) Kudiku misangu itudi petu mua kupangila dijingulula dia malu dimpe, pamuapa bitufikisha ku nsombelu mibi idi mua kutujula majinga mabi anyi? Tshilejilu, butuku bena ku tudiomba tua televizion badi mua kutekesha mikenji ya programe yabu bua kuleja bindidimbi bibi. Ntshinyi tshidi mua kuenzeka tuetu tuditua mu dikeba programe eyi imue misangu? Pamuapa tudi mua kubuela mu imue miaba ya ku Enternete katuyi bamanye anyi miaba itu bantu bamanyishangana malu ku Enternete ne site idi ilomba bantu bua kumona malu a bantu kabayi bilamba peshi mishindu mikuabu ya malu a masandi. Nsombelu eyi idiku mua kutufikisha ku dituilangana ne malu adi mua kutujula majinga mabi ne kutupangisha bua kushala bakezuke anyi? w15 15/6 3:8, 9

Bua tshinyi Yezu uvua muakule bua “mabanza” kadi musangu mukuabu kuluaye kuakula bua “mibi”? (Mat. 6:12; Luka 11:4) Kukadi bidimu bipite pa 60, Tshibumba tshia Nsentedi tshiakumvuija ne: “Dishipa mukenji wa Nzambi didi dituvuija bena dibanza kudiye. . . . Bua bubi butudi benze, Nzambi udi mua kutulomba mioyo yetu. . . . Uvua mua kutunyenga ditalala diende, kukosa malanda onso a ditalala adi pankatshi petu nende. . . . Tudi ne bua kumutumikila bua kuleja mutudi bamunange; patudi tuenza bubi tudi tupangila bua kufuta dibanza dietu dia kumunanga, bualu kuenza bubi nkubenga kunanga Nzambi.” (1 Yone 5:3) Dijinga ditudi nadi dituku dionso dia kufuidibua luse didi dileja mudi mulambu wa Yezu udi upikula muikale nshindamenu umuepele bua Nzambi kutubuikidilaye mibi yetu. Nansha muvuabu bafile tshia kupikula natshi bantu etshi kukadi bidimu bitue ku 2000, tudi ne bua kutshinanga bikole bienze bu dipa didibu batupeshe lelu. ‘Mushinga wa tshia kupikula natshi’ mioyo yetu ‘mmukole menemene’ mu mushindu wa ne: muntu mupange bupuangane nansha umue kena mua kuwufuta bua kutupikula.​—Mus. 49:7-9; 1 Pet. 1:18, 19. w15 15/6 5:9, 10

Tudi ne disanka dia kupesha bantu diambuluisha ne mikanda patudi tuyisha. Ela kabidi meji bua mudi bintu bidi bena siyanse bapatule bituambuluisha bua kuyisha lumu luimpe. Tshilejilu, ku diambuluisha dia site wetu wa jw.org, tudi tuleja mudi Yehowa munange bantu ba miaba yonso bua mudiye ubapesha buludiki budibu nabu dijinga. Dishintulula malu didi ne mushinga wa bungi bualu didi ditupetesha mushindu wa kuenza Ntendelelu wa mu dîku anyi kuikala ne dîba dia kudilongela Bible. Tudi kabidi tuanyisha malu adibu bashintulule bua mpuilu ne mpungilu. Misangu ya bungi tutu tuamba ne: mpungilu itu ilengela tshidimu tshionso! Tudi tusanka bikole bua malongesha atudi tupeta mu tulasa tuetu tua bungi tua malu a mu Bible. Mashintuluka onso aa adi aleja patoke ne: Yehowa udi ulombola bulongolodi buende ne udi utungunuka ne kulengeja mparadizu wa mu nyuma bikole menemene lelu. w15 15/7 1:16, 17

Wewe welakana bua tshiudi mua kuenza mu nsombelu kayi yonso, mbimpe udiebeje ne: ‘Ntshinyi tshivua Yezu mua kuikala muenze?’ Pavua Yezu pa buloba, muaba uvuaye musombele uvua bantu ba miaba ya bungi bu mudi ba mu Yudaya, ba mu Galela ne ba mu Samaleya. Miyuki ya mu Bible idi ileja ne: kuvua bimvundu ne dibenga kupetangana pankatshi pa bantu aba. (Yone 4:9) Kakuvua dipetangana pankatshi pa Bafalese ne Basadoke to (Bien. 23:6-9), pankatshi pa bantu ne balambuishi ba bitadi (Mat. 9:11), ne pa bantu bavua balonge malu a Mikenji ne bavua kabayi baalonge. (Yone 7:49) Mu bidimu lukama bia kumpala, bena Isalele bavua ku bukokeshi bua bena Lomo ne bavua babakine. Nansha muvua Yezu wakuila bulelela bua Yehowa ne mumanye ne: lupandu luvua lufumina kudi bena Yuda, kavua mulongeshe bayidi bende musangu nansha umue ne: bavua bapite bakuabu to. (Yone 4:22) Kadi uvua mubalongeshe bua kunangabu bantu bonso. w15 15/7 3:5

Yehowa uvua mufuke bantu ne dijinga dia kunangangana ne kudiumvua banangibue. Kadi mbipepele bua kuteketa mu mikolo bua disama, bua ntatu ya dipangila makuta anyi bualu katuena tupatula bipeta bimpe mu mudimu wa buambi. Tuetu batuadije kudiumvua ne: Yehowa ki mmutunange kabidi, tudi ne bua kuvuluka ne: tudi ne mushinga wa bungi ne udi pabuipi netu ‘mutukuate ku tshianza tshietu tshia balume’ ne utuambuluisha. Tuetu bamulamate, kakutupua muoyo nansha kakese. (Yesh. 41:13; 49:15) Brigitte, muanetu wa bakaji uvua udikoleshila bana babidi bayende mumane kufua udi wamba ne: “Kukolesha bana mu bulongolodi bua Satana ndumue lua ku ntatu mikole, nangananga bua muledi udi mushale nkayende udi udikoleshila bana. Kadi ndi mutuishibue ne: Yehowa mmunnange bualu mmundombole mu bikondo bia muadi ku mêsu ne bia tunyinganyinga, ne katu muanji kundekela mpeta lutatu lundi tshiyi mua kutantamena to.”​—1 Kol. 10:13. w15 15/8 1:1-3

Bavua bapeshe muprofete Habakuka mudimu wa kuyisha bua dibutuka dia Yelushalema. Baprofete bakuabu bavua kumpala kuende bavua bayishe pabu mukenji eu munkatshi mua bidimu bia bungi. Habakuka wakamona ne: ‘bantu babi bavua basesuisha muntu muakane ne kulumbulula kua bilumbu kuvua kunyanguke.’ Nunku, kabiena bikemesha bua muvuaye muebeje Yehowa ne: ‘Yehowa, nendile kuudi musangu bule bishi bua wewe unkuatshishe?’ Yehowa wakajadikila muprofete wende wa lulamatu eu ne: kabutu kakavua ‘kapanga kulua.’ (Hab. 1:1-4) Fuanyikijabi ne: Habakuka udi udimona mutshioke ne dindila nshikidilu, ne wamba ne: ‘Ndi muindile dibutuka dia Yelushalema kukadi bidimu bia bungi. Nshikidilu utshidi kule. Tshiena nyisha kabidi bua kabutu aka to. Bantu bakuabu benze pabu mudimu eu.’ Bu yeye muele meji mushindu eu, Yehowa kavua mua kumuanyisha kabidi to, ne uvua mua kujimija muoyo wende pavua bena Babilona babutula Yelushalema. w15 15/8 2:12, 13

Bua bikadilu bietu bimpe kubenga kunyanguka, katuena ne bua kudia bulunda ne bantu badi benza malu mabi to. Mu bantu aba mudi kabidi aba badi bamba mudibu batendelela Yehowa, kadi babenga kumutumikila. Bantu badi badiamba mudibu bena Kristo aba bobu benze bubi bunene ne babenge kunyingalala, tudi tukosa nabu malanda. (Lomo 16:17, 18) Nunku tuetu badie bulunda ne bantu badi kabayi batumikila Nzambi, tudi mua kutuadija kuenza bidibu benza bua batuanyishe. Tshilejilu, tuetu badie bulunda ne bena malu a masandi, tudi mua kubafuana. Bikadi bifikile bamue bena Kristo badilambule. Aba bavua kabayi banyingalale bakipatshibua mu tshisumbu. (1 Kol. 5:11-13) Bua bena Kristo badi kabayi banyingalala, nsombelu wabu udi mua kufuanangana ne wa buena udi Petelo muleje.​—2 Pet. 2:20-22. w15 15/8 4:4-6

Yezu wakasungula bimpe balunda bende ba pa muoyo. Uvua musungule balunda bende munkatshi mua bantu bavua bamulonda ne lulamatu ne bavua banange Yehowa ne bamuenzela mudimu. Utuku usungula balunda munkatshi mua bantu badi banange Yehowa ne muoyo wabu wonso anyi? Bua tshinyi bidi ne mushinga? Dinanga dikole didi bana betu bakuleja didi mua kukuambuluisha bua kulua muena Kristo mukole. Udi nsonga udi ukeba kuangata dipangadika dia tshiwikala mua kuenza mu nsombelu webe anyi? Bikalabi nanku, mbimpe kusungula balunda badi benzela Yehowa mudimu ne badi badienzeja bua kulama buobumue mu tshisumbu. Bavua mua kuikala bapete ntatu mu nsombelu wabu pavuabu benzela Yehowa mudimu ne bayitantamene. Badi mua kukuambuluisha bua kuangata dipangadika dimpe bua tshiwikala mua kuenza mu nsombelu webe. Paudi utamba kusomba nabu, badi mua kukuambuluisha bua kuangata mapangadika mimpe ne kulua muena Kristo mushindame.​—Eb. 5:14. w15 15/9 1:14, 15

Yezu wakambuluisha bayidi bende bua kukoleshabu ditabuja diabu ku diambuluisha dia malu avuaye wamba ne wenza. (Mâko 11:20-24) Mbimpe tuidikije tshilejilu tshia Yezu, bualu patudi tuambuluisha bantu bakuabu bua kukoleshabu ditabuja diabu, tudi tukolesha ne dietu. (Nsu. 11:25) Paudi ulongesha bantu Bible, utambe kuleja bijadiki bidi bileja ne: Nzambi udiku, udi ututabalela, ne bidi bileja ne: Bible n’Dîyi diende difundisha ku nyuma wende. Ambuluisha bena Kristo nebe bua kukoleshabu pabu ditabuja diabu. Wewe mumvue muanetu kampanda wakula bibi bua bana betu ba balume badi batulombola, ki mbimpe kumuepuka diakamue to. Kadi, mbimpe kumuambuluisha ne bulenga buonso bua apetulule ditabuja diende. (Yuda 22, 23) Biwikala utshidi mulongi, ne mulongeshi wenu udi unulongesha dilongesha dia ne: bintu mbidienze, ikala ne dikima ne uleje muudi witabuja ne: bintu mbifukibue. Mulongeshi wenu ne balongi benu badi mua kuitaba mmuenenu webe, ne bualu ebu budi mua kukusankisha bikole. Yehowa udi wambuluisha yonso wa kutudi bua kushindama mu ditabuja. (1 Pet. 5:10) Mushindu utudi tudienzeja bua kukolesha ditabuja udi ne mushinga bualu Yehowa neatufute. w15 15/9 3:20, 21

Lelu, Yehowa udi utulongesha malu a bungi adi atuambuluisha bua kumumanya, kumanya malu adiye mulongolole, bintu bidiye mufuke ne kumanya kabidi Dîyi diende. Bulongolodi ebu budi busaka bantu bua kulonga tulasa tutumbuke tudi nangananga tubafikisha ku dijimija dinanga diabu dia Nzambi. Yehowa kena utulongesha bua tuetu kupeta dimanya patupu to, kadi udi utuambuluisha kabidi bua kupeta meji ne ngumvuilu muimpe. Mmusue bua tuenze mudimu ne malu atudi tulonga bua tuikale ne diakalengele ne bua tuambuluishe bantu bakuabu. (Nsu. 4:5-7) Nzambi mmusue “bua bantu ba mishindu yonso basungidibue ne badike ku dimanya dijalame dia bulelela.” (1 Tim. 2:4) Tudi tuleja mutudi banange Yehowa patudi tuditatshisha bua kuyisha bantu ba bungi lumu luimpe lua Bukalenge ne malu adi Nzambi mulongoluele bantu.​—Mus. 66:16, 17. w15 15/9 5:10, 11

Ela meji bua nsombelu idi ilonda eyi ivua mileje patoke ne: Eliya uvua mueyemene Yehowa. Pavua Eliya muambile mukalenge Ahaba ne: Yehowa uvua ne bua kutuma minanga, wakamba ne dishindika dionso ne: ‘Bu mudi Yehowa ne muoyo, nansha mume nansha mvula kabiena bimueneka bidimu ebi anu ku dîyi dianyi.’ (1 Bak. 17:1) Eliya uvua mujadike ne: Yehowa uvua ne bua kumupesha yeye ne bantu bakuabu bivuabu nabi dijinga mu tshikondo tshia minanga. (1 Bak. 17:4, 5, 13, 14) Eliya uvua kabidi mutuishibue ne: Yehowa uvua ne bua kujula muana wa balume wa mukaji mukamba ku lufu. (1 Bak. 17:21) Kavua ne dielakana bua kapia ka Yehowa kavua ne bua kuosha mulambu wende pa mukuna wa Kâmele to. (1 Bak. 18:24, 37) Pakakumbana tshikondo tshia Yehowa kujikija minanga, Eliya wakambila Ahaba ne dishindika dionso ne: ‘Juka biebe, udie, unue; bualu bua tshiona tshia mvula ya bungi tshidiku.’ (1 Bak. 18:41) Malu aa kaenaku mua kutuambuluisha bua kudikonkonona bua kumona bikala ditabuja dietu dikole anyi? w15 15/10 2:4, 5

Dikala dietu bakumbane bua kuakula muakulu kampanda ndipa dia kudi Nzambi. (Mus. 139:14; Buak. 4:11) Mmutupeshe kabidi dipa dikuabu didi dienza bua tuikale bashilangane ne nyama. Bantu mbafukibue mu ‘tshifuanyikiji tshia Nzambi.’ Tudi ne tshipedi anyi budikadidi bua kudisunguila malu. Tudi mua kusungula bua kukuata mudimu ne dimanya dia muakulu bua kuenzela Yehowa mudimu ne kumutumbisha. (Gen. 1:27) Bantu bonso badi basue kutumbisha Mufuki wa muakulu, Nzambi mmubapeshe Bible dipa ditambe buimpe. Mbapatule Bible mujima anyi tshitupa tshiende mu miakulu mipite pa 2800. Patudi tuelangana meji bua malu adi Bible wamba, tudi mua kutuadija kuwuja meji ne ngenyi ya Nzambi. (Mus. 40:5; 92:5; 139:17) Nunku udi mua kusanka bua kuelangana meji bua malu adi “mua kukuvuija muena meji bua kupeta lupandu.” (2 Tim. 3:14-17) Kuelangana meji kudi kumvuija kutuma ntema bikole ku tshintu kampanda ne kunana lungenyi bikole menemene bua tshintu atshi. (Mus. 77:12; Nsu. 24:1, 2) Patudi tuelangana meji bua malu atudi tulonga bua Yehowa ne Yezu bidi bituambuluisha bikole.​—Yone 17:3. w15 15/10 4:2-4

Yezu wakalongesha bayidi bende bua kukuatshilabu bantu bakuabu mudimu ne budipuekeshi ku mêyi ne bienzedi biende. (Luka 22:27) Bapostolo bende bakalonga bua kudipangisha malu bua kuenzela Yehowa mudimu ne kuambuluisha bena Kristo nabu. Udi pebe mua kulongesha bana bebe wewe ne budipuekeshi ne kuyi mudinangi. Debbie udi ne bana babidi udi wamba ne: “Tshivua ngumvua mukawu bua dîba divua bayanyi upitshisha ne bakuabu mu mudimu wende wa bukulu to. Mvua mumanye ne: uvua utabalela dîku dietu dîba dionso dituvua nende dijinga.” Bayende Pranas udi wamba pende ne: “Bana banyi bavua badifila misangu yonso bua kuambuluisha mu mpuilu. Bavua ne disanka, bavua ne balunda bimpe ne bavua basue kuikala basomba ne bena Kristo nabu balume ne bakaji.” Buonso buabu badi mpindieu benzela Yehowa mudimu wa ku dîba ne ku dîba. Wewe ne budipuekeshi ne kuyi mudinangi, udi ulongesha bana bebe bua kuitababu bua kuambuluisha bantu bakuabu. w15 15/11 1:9

Yehowa mmuleje dinanga diende dinene mu mishindu ya bungi. Tshilejilu, elabi meji bua bunene bua tshibuashibuashi tshietu ne bua buimpe buatshi. Ntshienza ne bikata bia mitoto miliyo ya bungi, ne tshikata tshionso tshidi ne mitoto ne mabulunge miliyo ne miliyo. Mu tshikata tshietu tshia mitoto tshidibu babikila ne: voie lactée, mudi mutoto udibu babikila ne: dîba. Bu dîba kadiyiku, muoyo kawuvua mua kuikala pa buloba to. Bifukibua bionso ebi bidi bileja Bunzambi bua Yehowa ne ngikadilu yende bu mudi bukole, meji ne dinanga. Yehowa uvua mufuke buloba nangananga bua muoyo wikalapu. Tshintu tshionso tshidi pa buloba tshidi tshiambuluisha bantu ne nyama. Nzambi wakenzela bantu mparadizu, muaba muimpe wa kusomba ne kubapeshaye lungenyi ne mubidi bipuangane bua kuikalabu ne muoyo bua kashidi. (Buak. 4:11) Bualu bukuabu, ‘udi ufila biakudia kudi bintu bionso bidi ne muoyo, bua luse luende ludi lujalame tshiendelele.’​—Mus. 136:25. w15 15/11 3:7, 8

Munkatshi mua bidimu, Mukalenge wetu mmutupeshe biamu bia mudimu bidi bituambuluisha bua kulongolola mioyo ya bantu miliyo ya bungi bua kumvuabu mukenji wa Bukalenge. Bimue biamu bia mudimu mbituambuluishe pamuapa munkatshi mua bidimu bikese, kadi bikuabu mbituambuluishe munkatshi mua bidimu bia bungi. Kadi biamu bia mudimu bionso ebi mbituambuluishe bua kulua bamanyishi bapiluke. Mu 1933, bamanyishi bakatuadija kuenza mudimu ne Karte ka kuyisha naku, karte aka nkambuluishe bamanyishi ba bungi bua kutuadija kuyukila ne bantu. Karte aka kavua ne mukenji wa mu Bible muîpi. Karte ka kuyisha naku aka kavua kambuluisha mu mishindu ya bungi. Bamue bamanyishi bavua ne bundu; nansha muvuabu ne dijinga dikole dia kuyisha, kabavua bamanye tshia kuamba to. Bakuabu bavua bambila muntu malu onso avuabu bamanye mu minite mikese tshianana, kadi kabavua misangu yonso bakula ne bukalanga to. Kadi, karte ka kuyisha naku kavua kambuluishe bamanyishi bua kuambila bantu mukenji mu mêyi masungula bimpe ne avua umvuika kabidi bimpe. w15 15/11 5:3-6

Mvese ya bungi ya mu Bible idi ileja ne: dîna dia Nzambi didi ne mushinga ne badi ne bua kudinemeka. (Ekes. 3:15; Mus. 83:18; Yesh. 42:8; 43:10; Yone 17:6, 26; Bien. 15:14) Yehowa Nzambi wakasaka bafundi ba Bible ku diambuluisha dia nyuma wende bua kufunda dîna diende misangu binunu bia bungi mu maniskri a kale. (Yeh. 38:23) Nunku padi bakudimunyi bumbusha dîna dia Nzambi mu Bible, kabena banemeka Yehowa muena Bibe to. Kudi bijadiki bia bungi bidi bileja ne: tudi ne bua kuenza mudimu ne dîna dia Nzambi. Bible wa Nkudimuinu wa bulongolodi bupiabupia muakajilula mu 2013 udi ne dîna dia Nzambi misangu 7216. Mmumue ne: mbapingaje dîna edi miaba isambombo kupita muvuadi mu nkudimuinu wa mu 1984. Bavua bapete dîna edi miaba itanu mu mvese eyi: 1 Samuele 2:25; 6:3; 10:26; 23:14, 16. Mbapingaje dîna dia Nzambi miaba eyi nangananga bualu bavua badipete mu mvese eyi mu Mivungu ya ku Mbuu mufue. Mivungu ya ku Mbuu mufue nya kumpala kua mifundu ya tshiena Ebelu ya Bamasorete ku bidimu bipite pa 1000. Muaba muisambombo bavua bawupete mu Balumbuluishi 19:18 pavuabu benze makebulula mu maniskri a kale. w15 15/12 2:5, 6

Tudi ne bua kukolesha dinanga dietu dia bana ba muntu ku mpindieu bualu nedituambuluishe bua kutantamena lutatu kayi luonso lutuapeta matuku atshilualua. Nansha mpindieu, tudi ne dijinga dikole dia kuleja mutudi banangangane bu bana ba muntu kumpala kua dikenga dinene kutuadijadi. Bana betu ba bungi badi ne ntatu mikebesha kudi dikanka dia buloba, mvula mikole, mpepele mikole, disapalala dia mâyi, ne bipupu bikuabu. Bamue bana betu badi ne ntatu mikebesha kudi buluishi ne dikengeshibua. (Mat. 24:6-9) Bu mutudi mu bulongolodi ebu bubi, tudi kabidi tupeta ntatu ya malu a makuta dituku dionso. (Buak. 6:5, 6) Kadi, bu mudi ntatu eyi yenda ivula, tudi tupeta mpunga ya bungi ya kuleja mutudi banange bana betu bikole. Nansha mudi ‘dinanga dia bantu ba bungi dikepe,’ tudi ne bua kutungunuka ne kunangangana bu bana ba muntu.​—Mat. 24:12. w16.01 1:8, 9