Ngondo 4

Alistâko uvua muena Kristo muena Makedonia wa ku Tesalonike. Wakaleja muvuaye mulunda wa lulamatu kudi mupostolo Paulo. Bible udi utuadija kuakula bualu buende pavua Paulo mukumbule Efeso mu luendu luende luisatu lua bumisionere. Pavuaye wenda ufila Paulo, bakamukuata kudi musumba wa bantu. (Bien. 19:29) Pakaluabu kumulekelela, kakanyema Paulo to, kadi wakashala anu nende. Pakapita ngondo, Alistâko utshivua anu ne Paulo mu Grese nansha pavua baluishi bakeba kushipa Paulo. (Bien. 20:2-4) Pakakuatabu Paulo kuyabu nende ku Lomo bu mu 58 panyima pa Yezu, Alistâko wakenza nende luendu lule alu, mazuwa kubatshibukilawu mu njila. (Bien. 27:1, 2, 41) Bidi bimueneka ne: pakafikabu ku Lomo, bakenza matuku ne Paulo mu buloko. (Kolos. 4:10) Tudi tumvua bua tshinyi Paulo wakadiumvua mukankamijibue kudi mulunda wende wa lulamatu eu! Anu bu Alistâko, tuetu tulamata bena Kristo netu kabiyi anu padi malu abu enda bimpe, kadi kabidi padibu mu “bikondo bia dikenga,” tudi tuleja mutudi balunda ba lulamatu. w20.01 9 §4, 5

Muntu udibu bele manyi udi mua kudimona kayi mukumbanyine diakalenga dia mushinga mukole edi to. Kadi kena ne dielakana nansha dikese dia ne: Yehowa mmumusungule to. Muoyo wende mmuwule ne disanka ne udi umvua muoyo wa kuleja dianyisha padiye wela meji bua tshidi tshimuindile matuku alua. (1 Pet. 1:3, 4) Bidi biumvuija ne: bena Kristo bela manyi mbasue kufua anyi? Mupostolo Paulo udi wandamuna lukonko elu. Wakafuanyikija mubidi wabu wa buntu ne ntenta, kuambaye ne: “Mu bulelela, tuetu badi mu ntenta eu tudi tutua mikemu, bazengeja, bualu katuena basue kuvula utudi nende, kadi tudi basue kuvuala mukuabu au, bua tshidi tshifua batshimine kudi muoyo.” (2 Kol. 5:4) Bena Kristo aba kabena bamona bia panu bibatonde, bajinga bua kufua lukasa to. Kadi mbasue kuikala ne muoyo ne kuenzela Yehowa Nzambi mudimu dituku dionso ne bena mu mêku abu ne balunda babu. Nanku, nansha bobu benza tshinyi, badi anu bavuluka ditekemena dia butumbi didibu nadi bua matuku atshilualua.​—1 Kol. 15:53; 2 Pet. 1:4; 1 Yone 3:2, 3. w20.01 23 §12, 13

Tatu wetu wa dinanga udi utunyoka bua kutulongesha padibi bikengedibua. Utu wenza nanku mu mishindu ya bungi. Yehowa utu utunyoka mu mishindu ya bungi. Tshilejilu, bualu kampanda butudi babale mu Bible anyi bumvue mu bisangilu budi mua kutululamija. Peshi pamuapa diambuluisha ditudi nadi dijinga didi difumina kudi bakulu. Nansha Yehowa mutupeshe dinyoka dia mushindu kayi, dinanga ke ditu anu dimusaka bua kuenza nanku. (Yel. 30:11) Yehowa udi utukuatshisha mu ntatu. Anu mutu tatu wa dinanga ukuatshisha muanende mu bikondo bikole, Tatu wetu wa mu diulu utu utukuatshisha petu mu ntatu. Udi utukuba ne nyuma wende muimpe ku tshintu tshionso tshidi mua kutunyangila nende malanda. (Luka 11:13) Yehowa utu kabidi utuambuluisha bua katuteketshi mu mikolo. Tshilejilu, mmutupeshe ditekemena dia matuku atshilualua dia katshia. Ditekemena edi didi dituambuluisha bua kunanukila mu ntatu. Elabi meji bua bualu ebu: Nansha tuetu bapete njiwu ya mushindu kayi, Tatu wetu wa dinanga neatuondope, mubidi wetu upingana anu muawu ne kale. Ntatu itudi tupeta nansha yoyi ya bishi, nya tshitupa tshîpi; kadi mabenesha adi Yehowa utupesha nga tshiendelele.​—2 Kol. 4:16-18. w20.02 5 §14, 15

Mukawu nansha wowu muenze bishi, tudi mua kuwutshimuna! Tupingane ku tshilejilu tshia bana babu ne Jozefe. Panyima pa bidimu bia bungi bamane kukengesha Jozefe, bakatuilangana nende mu Ejipitu. Kadi kumpala kua Jozefe kudimanyisha kudibu, wakabateta bua kumanya ni bakavua bashintuluke. Wakalambisha biakudia; pavuaye nabu ku mêsa, uvua upesha Benyamina mukala wabu biakudia bia bungi kubapita. (Gen. 43:33, 34) Kadi kakuena tshidi tshileja ne: bana babu bakumvuila Benyamina mukawu to. Kadi bakaleja ne: bavua batabalela muanabu au ne tatuabu Yakoba ne muoyo mujima. (Gen. 44:30-34) Bu muvua bana babu ne Jozefe balekele mukawu, bakapingajija ditalala mu dîku diabu. (Gen. 45:4, 15) Tuetu bumbushe petu meji onso a mukawu, netuenze bua ditalala dishale mu dîku dietu ne mu tshisumbu tshietu. Yehowa ki mmusue bua tuikale tumvuilangana mukawu to, mmusue bua tukebe ditalala. Tuetu tuditatshisha bua kuikala ne budipuekeshi, tusanka ne bitudi nabi, ne tulejangana dianyisha, mukawu kawakupeta muaba to. w20.02 19 §17, 18

Umue mushindu wa kuleja ne: udi ne dianyisha bua dinanga dia Yehowa nkumusambila. Dinanga diebe dia Nzambi nedikole paudi umuambila malu adi makutonde ne umusakidila bua malu onso adiye mukuenzele. Bualu bukuabu, malanda ebe ne Yehowa neakole paudi umona mudiye wandamuna masambila ebe. Neufike ku dituishibua ne: utu ukumvua. Kadi bua wewe kusemena pabuipi ne Yehowa, bidi bikengela ujingulule bidiye musue, bidiye kayi musue, ne tshituye wenzela amue malu. Bidi bikengela kabidi umanye malu adiye ukulomba. Mushindu umuepele uudi mua kupeta dimanya adi nkulonga Bible Dîyi diende. Nunku umanye mua kudiangata ne mushinga. Anu Bible ke udi ne malu malelela adi atangila Yehowa ne tshidiye mukulongoluele kumpala eku. Paudi ubala Bible dituku dionso, udilongolola kumpala kua kukulongeshabu, ne utumikila biudi ulongamu, udi uleja ne: udi umuangata ne mushinga. (Mis. 119:97, 99; Yone 17:17) Utu ne programe wa kudibadila Bible anyi? Utu ubala Bible dituku dionso bilondeshile programe webe au anyi? w20.03 5 §8, 9

Wewe kuyi ne makanda a kuenda, udi mua kusomba muaba utu bantu ba bungi bapitshila bua kubayisha. Udi nansha mua kuyishila bantu mu mikanda iudi ubafundila anyi ku telefone, peshi kubabidila mpunga yonso idi imueneka. Bamanyishi ba bungi badi kabayi ne makanda a kuyisha ku nzubu ne ku nzubu batu ne disanka padibu bayisha mu mishindu mikuabu eyi. Nansha masama akutatshisha, udi mua kukumbaja mudimu webe wonso menemene. Tuangate kabidi tshilejilu tshia mupostolo Paulo. Wakamba ne: “Bua malu onso ndi ne bukole ku diambuluisha dia yeye udi umpesha bukole.” (Filip. 4:13) Paulo uvua dijinga ne bukole abu pavuaye musame mu lumue lua ku ngendu yende ya bumisionere. Wakambila bena Galatiya ne: “Disama dia mubidi wanyi ke divua dimpeteshe mushindu wa kunuambila lumu luimpe musangu wa kumpala.” (Gal. 4:13) Bia muomumue, masama ebe adi mua kukupetesha mpunga ya kuambila bantu bakuabu lumu luimpe bu mudi badoktere, baminganga, ne bantu bakuabu badi bakulama bua kukuambuluisha. Ba bungi ba kudibu batu ku midimu padi bamanyishi ba lumu luimpe bapita ku mabu. w19.04 4-5 §10, 11

Mu 2018, kuvua bamanyishi ba lumu luimpe bapite pa 223 000 bavua mu matunga adibu bakandike midimu yetu yonso anyi ya bungi ya kudiyi. Kabiena bitukemesha to. Bena Kristo balelela mbamanye bimpe ne: nebabakengeshe. Nansha tuetu basombele muaba kayi, tudi mua kupapuka bakokeshi bakadi batukandike bua kuenzela Yehowa Nzambi wetu wa dinanga mudimu. Mbulamatadi yeye mukandike midimu yetu, tudi mua kudishima tuamba ne: Nzambi katshiena utuanyisha. Kadi manya ne: kabiena nanku to. Tshilejilu, tuakule bua mupostolo Paulo. Nzambi uvua umuanyisha bikole. Wakapeta diakalenga dia kufunda mikanda 14 ya Mifundu ya mu tshiena Greke ya buena Kristo, ne uvua mupostolo bua bisamba bikuabu. Nansha nanku, bakamukengesha bikole. (2 Kol. 11:23-27) Bualu bua mupostolo Paulo ebu budi butuleja ne: Yehowa udi mua kulekela bua batendeledi bende ba lulamatu bakengeshibue. w19.07 8 §1, 3

Kudi mishindu mitambe buimpe idi Yehowa uleja mudiye uditatshisha buetu tuetu batendeledi bende. Tshilejilu, udi utuambuluisha bua kukandamena bena lukuna betu. Satana ne bademon bende ke bena lukuna betu banene. Yehowa udi utudimuija bua bena lukuna aba, ne utupesha bionso bidi bikengela bua kubakandamena. (Ef. 6:10-13) Patudi tuitaba diambuluisha dia Yehowa ne tumueyemena ne muoyo mujima, tudi mua kukokesha bua kukandamena Diabolo. Tudi mua kuikala ne dishindika dia buena dia mupostolo Paulo wakafunda ne: “Bikala Nzambi ku tshietu, nnganyi watuenzela bibi?” (Lomo 8:31) Tuetu bena Kristo balelela katutu tutamba kutuma meji etu ku malu a Satana ne bademon bende to. Tutu tutamba kuatuma ku dilonga malu a Yehowa ne ku dimuenzela mudimu. (Mis. 25:5) Kadi mbimpe tumanye malu atu Satana utamba kuenza. Bua tshinyi? Bua kalu kutudia lungenyi to.​—2 Kol. 2:11; dim. w19.04 20 §1, 2

Patutu tuyukila ne muntu udi ne kanyinganyinga, tutu tumuteleja bimpe anyi? Kuteleja muntu bimpe kakuena kumvuija anu kushala muteye matshi patupu, mumutangile kuyi wamba tshintu to. Tudi mua kuditeka pa muaba wende ne kumumvuila luse patudi tumuteleja. Misangu mikuabu, mêyi mimpe adi kaayi atapangana ku muoyo adi mua kuleja muudi umvua. Udi mua kumuambila ne: “Bualu buebe budi bunsama ku muoyo bibi be!” Udi mua kumuela lukonko lumue anyi ibidi bua kujadika ni udi mumvue bimpe tshidiye wamba. Udi mua kumuebeja ne: “Mukuetu, ngumvuija bimpe, udi musue kuamba tshinyi?” Anyi ne: “Meme mukumvue bimpe, udi muambe ne: . . . Mmuomu anyi?” Kuakula ne dinanga nunku kudi mua kujadikila muanenu ne: udi umuteleja bimpe, uditatshisha bua kumvua bidiye wamba. (1 Kol. 13:4, 7) Kadi wamanya ne: mbimpe kuikala “ne lujoko ku diakula.” Kukoshi muntu ku dîyi bua kumubela anyi bua kumupingaja mu njila to. Ikala kabidi ne lutulu! Pamutu pa kukeba bua kumuambila tshia kuenza, mbimpe tuditeke pa muaba wende ne tumumvuile luse.​—1 Pet. 3:8. w19.05 17-18 §15-17

Mu dîku, mulume udi ne bua kunanga mukajende ‘anu bu mudi Kristo munange tshisumbu.’ (Ef. 5:28, 29) Mulume udi ne bua kuteka majinga a mukajende ne diakalenga diende kumpala kua biende yeye bua kuidikija Kristo uvua ne dinanga divua dimusake bua kudifila bua bakuabu. Bidi mua kukolela bamue balume bua kuikala ne dinanga dia mushindu eu, bualu pamuapa bavua bakolele muaba uvua bantu bamona dienzelangana malu makane ne dienzelangana malu ne dinanga kabiyi ne mushinga to. Bidi mua kubakolela bua kulekela bibidilu bibi, kadi badi ne bua kushintuluka bua kutumikila mukenji wa Kristo. Mulume yeye ne dinanga didi dimusaka bua kudifila bua bakuabu, mukajende neamunemeke. Tatu udi bushuwa munange bana bende kakubamba mêyi mashile anyi kubenzela malu mabi nansha kakese. (Ef. 4:31) Kadi udi ubaleja mudiye mubanange ne ubanyisha, bienza bua badiumvue mu bukubi. Bana nebanange tatu wa mushindu eu ne nebamueyemene. w19.05 6 §21

Mariya uvua mua kuikala muele meji kayi bua mêyi a Gabaliele aa? Uvua muele meji ne: Gabaliele uvua muambe ne: Yezu uvua ne bua kupingana pa muaba wa mukalenge Helode anyi pa muaba wa umue wa ku bantu bavua mua kumupingana mu nkuasa mu Isalele anyi? Bu Yezu mulue mukalenge, Mariya uvua ne bua kuikala mamuende wa mukalenge, ne bena mu dîku diende bavua ne bua kusombela mu dibalasa dia bukalenge. Kadi Bible katu muleje ne: uvua mulombe bua kuikala ne muaba wa pa buawu mu Bukalenge to. Mariya uvua ne budipuekeshi bua bungi! Vuluka ne: paudi ulonga Bible anyi mikanda yetu mikuabu, tshipatshila tshiebe tshinene ntshia kutungunuka ne kusemena pabuipi ne Yehowa. Didilongela dikuambuluishe kabidi bua kumona ‘mushindu uudi’ anyi tshiudi, ne kumona malu audi ne bua kushintulula bua kusankisha Nzambi. (Yak. 1:22-25; 4:8) Ke bualu kayi, dîba dionso diudi ukeba kudilongela, anji lomba Yehowa nyuma wende. Mulomba bua malu audi ulonga akuambuluishe bikole ne bua udimone mudiye ukumona. w19.05 31 §18, 19

Imue misangu ntatu ya bungi idi mua kutukuata musangu umue. Tuangate bilejilu ebi. Muanetu kampanda diende Jean udi ne disama dikole didi dienda ditekesha mubidi (sclérose en plaques). Mukajende wakamubenga pabi bamane kuenza bidimu 19 mu dibaka; biakamutonda bikole. Pashishe bana bende ba bakaji babidi bavuaye nabu bakabenga Yehowa. Muanetu mukuabu Bob ne mukajende Linda bakapeta bobu ntatu ya mushindu mukuabu. Midimu yabu yakafua, pashishe kupangilabu mua kufuta nzubu, kubapatulabu. Pa kumbusha ntatu ayi, bakakuata Linda ne disama dibi dia muoyo divua mua kumufikisha ku lufu, ne dikuabu ditu dikuata manungu. Tudi batuishibue ne: Yehowa Mufuki wetu ne Tatu wetu wa dinanga mmumanye mutudi tutata bua tunyinganyinga. Mmusue kabidi kutuambuluisha bua tutantamene ntatu itudi tupeta. (Filip. 4:6, 7) Mu Bible mudi bilejilu bia batendeledi ba Nzambi ba bungi bavua batantamene ntatu. Bible udi kabidi uleja muvua Yehowa mubambuluishe bua kutantamena ntatu ayi. w19.06 14 §2, 3

Patudi tuenzela muntu udi katshiyi ne muena dibaka nende malu mimpe, tudi tumuleja mutudi bamunange. Bu mudiye mushale nkayende, udi dijinga ne balunda bimpe. Ntshinyi tshiudi mua kuenza bua kuleja ne: udi mulunda wende? Udi mua kumubikila bua kudia nende katshiakudia. Udi kabidi mua kumulomba bua nuye kudiolola anyi bua kuyisha nende. Bukuabu bualu, udi mua kumubikila ku misangu mu ntendelelu wenu wa mu dîku. Wewe wenza nunku, Yehowa neasanke bualu udi “pabuipi ne badi ne muoyo musunsuke” ne ‘mmukubi wa bakaji bakamba.’ (Mis. 34:18; 68:5) Mu matuku makese emu, pakokesha Bukalenge bua Nzambi pa buloba, ‘netupue makenga onso muoyo.’ Tudi bindile ne muoyo kuulu kuulu tshikondo tshikala ‘malu a kale kaayi atuvuila kabidi mu lungenyi, anyi atubanda kabidi ku muoyo to.’ (Yesh. 65:16, 17) Pakuamba tshikondo atshi tshilue, tuikale tukuatshishangana ne tuleja mu mêyi ne mu bienzedi ne: tudi banange bena mu dîku dietu dia bena Kristo bonso.​—1 Pet. 3:8. w19.06 25 §18, 19

Kukadi bidimu bia bungi bivua Tshibumba tshia Nsentedi kampanda tshiambe ne: “Muntu udi mumanye Nzambi bimpe menemene neamueyemene bikole pamukengeshabu.” Bidi nanku menemene! Bua kutantamena dikengeshibua, tudi ne bua kunanga Yehowa ne kumueyemena ne muoyo mujima. (Mat. 22:36-38; Yak. 5:11) Ikala ubala Bible dituku dionso ne tshipatshila tshia kukolesha malanda ebe ne Yehowa. (Yak. 4:8) Yehowa utu ne ngikadilu mimpe; nunku paudi ubala Bible, ikala wimanyina pa ngikadilu ayi. Mona mudi malu adiye wamba ne wenza akujadikila ne: mmukunange bikole. (Ekes. 34:6) Bitu bikolela bamue bantu bua kuitaba ne: Nzambi mmubanange bualu kabatu banji kubananga kudi muntu to. Biwikala pebe ne lutatu elu, ikala ufunda dituku dionso mishindu idi Yehowa mukuleje luse ne bulenga. (Mis. 78:38, 39; Lomo 8:32) Paudi welangana meji bua mishindu ayi ne bua biudi mubale mu Dîyi dia Nzambi, pamuapa neumone malu a bungi adi Yehowa mukuenzele. Wewe ne dianyisha bua malu adi Yehowa ukuenzela, malanda ebe nende neakole.​—Mis. 116:1, 2. w19.07 2-3 §4, 5

Yehowa ki mmutupeshe bukokeshi bua kuangatshila bakuabu mapangadika to. Muntu udi welelangana tukenjikenji kena ukuba bena Kristo nende to, mu kuamba kuimpe, mmusue kuikala mukokeshi wa ditabuja diabu. Satana Diabolo neatungunuke anu ne kukengesha batendeledi ba Yehowa ba lulamatu. (1 Pet. 5:8; Buak. 2:10) Yeye ne bena diende nebakebe bua kutukandika bua kutendelela Yehowa. Kadi kakuena bualu nansha bumue budi ne bua kutuzakeja to! (Dut. 7:21) Yehowa udi netu; neatungunuke ne kutukuatshisha nansha bobu bakandike midimu yetu. (2 Kul. 32:7, 8) Bena Kristo ba mu bidimu lukama bia kumpala bakambila bakokeshi ba matuku abu ne: “Bikalabi bimpe ku mêsu kua Nzambi bua kunuteleja nuenu pamutu pa kuteleja Nzambi, abu mbualu buenu. Kadi buetu tuetu, katuena mua kulekela kuakula bua malu atudi bamone ne bumvue to.”​—Bien. 4:19, 20. w19.07 13 §18-20

Patudi tuyisha, tudi ne bua kuditatshisha bua kumvua tshidi tshisaka bantu batudi tutuilangana nabu bua kumona malu mudibu baamona amu. Mupostolo Paulo uvua mukolele munkatshi mua bena Yuda. Kadi uvua ne bua kushintulula mushindu uvuaye uyisha bantu ba mu bisamba bikuabu, bualu kabavua batambe kumanya malu a Yehowa ne a mu Mifundu anyi kabavua mene baamanye to. Bidi mua kutulomba pamuapa bua kuenza makebulula bua tufike ku dimanya mua kumvuila bantu ba mu teritware wetu ne kuditeka pa muaba wabu. (1 Kol. 9:20-23) Tshipatshila tshietu ntshia kupeta bantu badi ‘bakumbane.’ (Mat. 10:11) Bua kubapeta, tudi ne bua kuela bantu nkonko bua baleje mmuenenu wabu, pashishe kubateleja ne ntema yonso. Muanetu kampanda wa mu Angleterre utu wela bantu nkonko bua kumanya tshidibu bela meji bua mushindu wa kuikala ne disanka mu dibaka, wa kukolesha bana, ne wa kutantamena malu mabi. Yeye mumane kuteleja muntu, utu umuebeja ne: “Udi wela meji kayi bua mubelu uvuabu bafunde kukadi bidimu bitue ku 2 000 eu?” Pamutu pa kumuambila ne: teleja tshidi “Bible” wamba, utu wangata tshiamu tshiende, umuleja mvese ukavuaye musungule bimpe, umubadilaye. w19.07 21-22 §7, 8

Mmushindu kayi utudi ne bua kunanga Nzambi? Yezu wakambila Mufalese kampanda ne: “Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.” (Mat. 22:36, 37) Mbimpe tunange Nzambi ne muoyo wetu wonso, ne tuikale tukolesha dinanga edi dituku dionso. Bua kunanga Nzambi, bidi bikengela kumumanya. Bible udi wamba ne: “Muntu yonso udi kayi unangangana ki mmuanji kufika ku dimanya Nzambi, bualu Nzambi udi dinanga.” (1 Yone 4:8) Mupostolo Paulo wakaleja ne: patudi tumanya bulelela bua malu adi atangila Nzambi ne tujingulula mudiye umona malu, dinanga ditudi bamunange nadi didi dikola. (Filip. 1:9) Patuakabanga kulonga Bible, tuakatuadija kunanga Nzambi nansha mutuvua katuyi bamanye malu a bungi adi amutangila. Pashishe patuvua tuenda tulonga malu ende, tuakalua kumunanga bikole. Ke bualu kayi kulonga Bible pa tshibidilu ne kuelangana meji a Dîyi dia Nzambi bidi mu malu adi ne mushinga wa bungi menemene!​—Filip. 2:16. w19.08 9 §4, 5

Mbimpe ukebe balunda bakuabu muaba uudi ufika. Vuluka, bua wewe kupeta balunda, mbimpe wewe muine wikale mulunda muimpe. Ambila bantu malu mimpe audi mupete mu mudimu wa Yehowa bua bamone mudi mudimu au mukupeteshe disanka. Mudimu wenu wowu muimane bualu muena dibaka nebe udi usama, kumuedi tshilumbu pambidi to. Peshi wowu muimane bualu udi usama, kudipishi wela meji ne: udi muele muena dibaka nebe mâyi ku makasa to. Vuluka, nudi “mubidi umue,” ne nuvua balayangane kumpala kua Yehowa bua kutabalelangana mu masanka ne mu ntatu. (Mat. 19:5, 6) Mudimu wowu muimane bualu mukaji mmupete difu, enzayi muenu muonso bua muana unualela amanye ne: udi ne mushinga wa bungi kunudi kupita mudimu unuvua nuenza. Kanumuedi tshilumbu pa mbidi nuamba ne: mudimu wenu uvua muimane bua bualu buende to. Kadi nuikale numuambila ne: nudi numumona bu ‘difutu’ dia kudi Nzambi. (Mis. 127:3-5) Ikalayi kabidi numulondela malu mimpe a panuvua mu mudimu. Kuenza nunku kudi mua kumusaka bua kuenzelaye pende Yehowa mudimu wa ku dîba ne ku dîba anu bu nuenu. w19.08 22 §10, 11

Babilona munene, nsangilu wa bitendelelu bia dishima bia pa buloba bujima, mmupendeshishe dîna dia Nzambi. Mmushiminyine Nzambi malu kudi bantu. Anu bu mukaji wa ndumba, mmutue bakalenge ba pa buloba nyama ku mikolo, bimuvuija mupange lulamatu kudi Yehowa. Mmumueneshe bena kuitabuja bende kasuba ne mubadie makuta. Mmushipe kabidi bantu ba bungi, too ne batendeledi ba Nzambi. (Buak. 18:24; 19:2) Yehowa neasake “nsengu dikumi” ya “nyama wa luonji mukunze” bua kubutula “ndumba munene.” Nyama wa luonji wa mu tshimfuanyi eu udi uleja Bulongolodi bua matunga masanga. Nsengu dikumi idi ileja makalenge a tshididi adiku adi atua bulongolodi ebu mpanda. Makalenge a tshididi aa neakudimukile Babilona wa mu tshimfuanyi au dîba didi Nzambi mulongolole. ‘Neamupawule, amushiya butaka.’ (Buak. 17:3, 16) Bua kuenza nanku, neapawule bubanji buende ne neele malu mabi ende patoke. Neabutudibue musangu umue, bu mu dituku dimue. Dibutudibua edi neditonde bantu bavua bamutua mpanda bibi be, bualu mmudikume tshianza pa tshiadi bidimu ne bidimu wamba ne: “Tshiakumona madilu nansha kakese.”​—Buak. 18:7, 8. w19.09 10 §10, 11

Yezu udi ubikila muntu yonso bua alue kudiye, ne muntu yeye musue kuenzela Nzambi mudimu ne muoyo umue, Yezu kakumubenga to. (Yone 6:37, 38) Bayidi bonso ba Yezu badi ne diakalenga dia kuenza pabu mudimu uvua Yehowa muambile Yezu bua kuenza. Tudi anu batuishibue ne: Yezu neikale netu bua kutuambuluisha bua tuenze mudimu au. (Mat. 28:18-20) Bantu bavua ne budipuekeshi bavua baya kudi Yezu. (Mat. 19:13, 14; Luka 7:37, 38) Bua tshinyi? Anji elabi meji bua muvua Yezu mushilangane ne Bafalese. Bamfumu ba bitendelelu abu kabavua ne dinanga to, bavua ne lutambishi. (Mat. 12:9-14) Kadi Yezu yeye uvua ne musangelu ne budipuekeshi. Bafalese bavua basue malu manene ne bavua baditambisha bua mianzu minene ivuabu nayi. Yezu yeye uvua wambila bayidi bende bua kabakebi malu manene, ubalongesha bua kudipuekesha ne kuenzela bakuabu mudimu. (Mat. 23:2, 6-11) Bafalese bavua bazakeja bantu bua kubenzeja malu ku bukole. (Yone 9:13, 22) Yezu yeye uvua wenzela bantu malu mimpe ne ubambila mêyi mimpe bua kubapeshilula bukole. Malu avua Yezu wenza mmakulongeshaku bualu anyi? w19.09 20 §1; 21 §7, 8; 23 §9

Bisangilu bidi bituambuluisha bua kukolesha malanda etu ne Yehowa. Kubuela kuetu mu bisangilu kudi kuleja ne: dîba diatukengeshabu, netunanukile. (Eb. 10:24, 25) Bua tshinyi tudi tuamba nanku? Tuetu tulekela tumalu tukese tutupangisha bua kubuela mu bisangilu lelu, dîba diatulombabi bua kuteka muoyo wetu mu njiwu bua kuya kudisangisha ne bena Kristo netu, netuye anyi? Kadi tuetu badisuike bua kubuela mu bisangilu lelu, katuakulekela kudisangisha pamue pikala baluishi betu bakeba kutupangisha bua kudisangisha to. Mbimpe tunange bisangilu bietu bikole ku mpindieu. Tuetu babinange, dîba adi nansha mbulamatadi mutukandikabi, nansha bantu batuluishe, netutungunuke anu ne kutumikila Nzambi pamutu pa kutumikila bantu. (Bien. 5:29) Ikala ukuata mvese iutu mutambe kunanga ku muoyo. (Mat. 13:52) Pamuapa bitu bikukolele bua kukuata malu, kadi Yehowa udi mua kukuvuluija mvese ayi ku diambuluisha dia bukole bua nyuma wende muimpe. (Yone 14:26) Mvese ayi neikuamuambuluishe bua kushala pabuipi ne Yehowa ne kunanukila ne lulamatu. w19.07 3 §5; 4 §8, 9

Biwikala muledibue panyima pa 1914, nanku udi mukole mu “matuku a ku nshikidilu.” Yezu uvua muambe ne: malu kampanda neenzeke matuku etu aa. Tuetu bonso tukadi bumvue bakula bualu buawu. Mu malu au mudi: mvita, biyole bia nzala, dikanka dia buloba, bipupu bia masama, divulangana dia dishipa dia mikenji, ne dikengeshibua dia bantu ba Yehowa. (Mat. 24:3, 7-9, 12; Luka 21:10-12) Tudi bamone kabidi mudi bantu benza malu anu muvua mupostolo Paulo mudianjile kuamba. Tuetu batendeledi ba Yehowa, tudi batuishibue ne: tudi “ku ndekelu kua matuku.” (Mika 4:1) Katshia ku 1914, kukadi kupite bidimu bia bungi. Nunku lelu tudi ne bua kuikala ku ndekelu kua “matuku a ku nshikidilu.” Bu mukadi nshikidilu mulembelele, bidi bikengela tumanye mandamuna a imue nkonko ya mushinga bu mudi: Mmalu kayi enzeka ku ndekelu kua “matuku a ku nshikidilu”? Ntshinyi tshidi Yehowa musue bua tuenze mu tshikondo tshitudi bindile malu aa? w19.10 8 §1, 2

Ki nkuikala mu bikondo bimpe kudi kuenza bua tuikale tunanukila to. Tudi tukolesha dinanukila dietu patudi tueyemena Yehowa. (Lomo 12:12) Mulayi wa Yezu wa mu mvese wa lelu eu udi umvuija ne: tudi ne bua kushala ne lulamatu nansha ntatu ya bishi mitukuate. Patudi tunanukila mu lutatu luonso ludi lutukuata ku mpindieu, tudi tupeta bukole bua bungi kumpala kua dikenga dinene kudikuma mu tshialu. Anu mudibi bua dinanukila, bua tuetu kupeta dikima dilelela anu tuetu tueyemena Yehowa. Ntshinyi tshitudi mua kuenza bua kumueyemena bikole? Tuikale tubala Dîyi diende dituku dionso ne tuelangana meji a muvua Yehowa musungile bantu bende kale. (Mis. 68:20; 2 Pet. 2:9) Patubunda bisamba mu dikenga dinene, nebikengele tuikale ne dikima ne tueyemene Yehowa bikole kupita kuonso eku. (Mis. 112:7, 8; Eb. 13:6) Tuetu tueyemena Yehowa ku mpindieu, netupete dikima dituikala nadi dijinga patubunda Goga. Tudi batuishibue ne: bu mudi Yehowa utukuba ne dinanga dionso, netushale anu mu ditalala.​—1 Kol. 13:8. w19.10 18 §15, 16

Buloba ebu budi mu bianza bia Diabolo, ne udi wenza nabu mudimu mu mushindu wa ne: bintu bitu bantu basue bilue ne mushinga wa bungi mu nsombelu wetu. Udi wenza kabidi bua bitukolele bua kukandamena majinga etu mabi. (Ef. 2:1-3) Mmusue bua tuikale muoyo eku muoyo eku bua katushadi balamate anu Yehowa nkayende to. Mupostolo Petelo mumane kufunda bua kabutu ka bulongolodi bua Satana ne bua bulongolodi bupiabupia budi bulua, wakamba ne: “Bananga, bu munudi bindile malu aa, nuenze muenu muonso bua ndekelu wa bionso [Yehowa] anusangane kanuyi katoba, kanuyi kalema, ne mu ditalala.” (2 Pet. 3:14) Patudi tutumikila mubelu eu ne tuenza ne muetu muonso bua kuikala ne bikadilu bilenga ne kutendelela Yehowa mudiye musue, tudi tuleja mutudi bamulamate anu yeye nkayende. Satana ne ba mu bulongolodi buende nebatungunuke ne kutusaka bua tuteke bintu bikuabu pa muaba wa kumpala, tutume Yehowa panyima. (Luka 4:13) Kadi nansha tuetu bapete ntatu ya mushindu kayi, katuakuitaba bua muntu anyi tshintu kampanda kuangata muaba wa Yehowa mu muoyo wetu to. Tudi badisuike bua kupesha Yehowa tshidi tshimuakanyine anu yeye nkayende, tuambe ne: kumulamata anu yeye! w19.10 27 §4; 31 §18, 19

Disamisha mutu dionso kaditu dibi to. Tshilejilu, patutu tuditatshisha bua kusankisha Yehowa ne Yezu katutu tuenza bibi to. (1 Kol. 7:32) Tuetu benze mpekatu munene, tudi tuditatshisha bua kulongolola malanda etu ne Nzambi. Tudi tuditatshisha kabidi bua kusankisha muena dibaka netu ne bua diakalenga dia bena mu mêku etu ne bena Kristo netu. (1 Kol. 7:33; 2 Kol. 11:28) Kadi ditamba kusamisha mutu didi mua kutufikisha ku dishala tusamisha mutu bua kupeta tshiakudia ne tshilamba tshia kuela pambidi. (Mat. 6:31, 32) Bua bualu ebu, tudi mua kushala baditue mu dikeba bintu bia ku mubidi. Tuetu bakuluke mu buteyi ebu, ditabuja dietu kudi Yehowa neditekete ne netunyange malanda etu nende. (Mâko 4:19; 1 Tim. 6:10) Peshi tudi mua kukuluka mu buteyi bua kutamba kuditatshisha bua bakuabu batuanyishe. Dîba adi tudi mua kubanga kutshina bua bantu kabikadi batuseka anyi kabatukengeshi kupita mutudi tutshina bua kubungamija Yehowa. Bua kudilama ku njiwu eyi, tudi ne bua kulomba Yehowa ditabuja ne muoyo mukole bua kutua lutatu elu tshiadi.​—Nsu. 29:25; Luka 17:5. w19.11 15 §6, 7

Kudi amue mapangadika manene atudi katuyi mua kushintulula to. Tshilejilu, katuena mua kushintulula dipangadika dietu dia kuenzela Yehowa mudimu to, ne tudi badisuike bua kushala balamate muena dibaka netu. (Mat. 16:24; 19:6) Kadi kudi mapangadika makuabu atudi mua kushintulula. Bua tshinyi? Bualu malu atu ashintuluka. Mmalu kayi adi mua kutuambuluisha bua kuangata mapangadika mimpe menemene? Lomba Yehowa meji. Tuetu bonso tutu ‘tupangila meji’ mu amue malu. Ke bualu kayi patudi tuangata dipangadika anyi patudi tuditangilula, tuikalayi tueyemena Yehowa. Dîba adi Yehowa neatuambuluishe bua kuangata mapangadika mimpe. Bala, webeje. Bala Dîyi dia Nzambi ne mikanda yetu, ne uyukile ne bantu bautu weyemena. (Nsu. 20:18) Mbimpe kuenza nunku kumpala kua kuangata dipangadika dia kushintulula mudimu, dia kumuangala, anyi dia kulonga kalasa kadi mua kukupetesha mudimu udi mua kukuambuluisha bua kuenzela Yehowa mudimu. w19.11 27 §6-8

Bia diakalenga, Nzambi ukadi mulongolole mushindu wa kutupikula anyi kutusungila ku mpekatu. Yezu ke muntu watupetesha budikadidi abu. Mu bidimu bia 700 kumpala kua Yezu, muprofete Yeshaya wakamanyisha dilekedibua dinene divua ne bua kulua kuenzeka. Dilekedibua adi divua ne bua kuenzela bantu malu a bungi kupita avua enzeka mu Tshidimu tshia budikadidi tshia bena Isalele. Wakafunda ne: “Nyuma wa Mukalenge Mutambe Bunene Yehowa udi pambidi panyi, bualu Yehowa uvua mungele manyi bua kuambila bena bupuekele lumu luimpe. Uvua muntume bua kusuika mputa ya badi ne muoyo musunsuke, bua kumanyisha dilekedibua kudi badibu bakuate.” (Yesh. 61:1) Mêyi a buprofete aa adi atangila nganyi? Mêyi a buprofete adi akula bua dilekedibua aa akabanga kukumbana pakavua Yezu mutuadije mudimu wende. Pakabuelaye mu nsunagoga wa kuabu ku Nazaleta, wakabadila bena Yuda bavua badisangishamu mêyi a Yeshaya aa ne wakaleja muvua mêyi au amutangila.​—Luka 4:16-19. w19.12 9-10 §6-8

Bua kutua buluishi tshiadi, bidi bikengela dikima. Wewe mumone ne: kuena nadi, tshiudi mua kuenza ntshinyi? Manya ne: bunene buebe, makanda audi nawu, anyi mamanya ebe kabiena mua kukupesha dikima dilelela to. Tuangate tshilejilu tshia Davidi ne Goleyata. Goleyata uvua munene mule wa mfiondo, kadi Davidi yeye utshivua tshitende, muikale ne mubidi mukese, kayi ne makanda a bungi, ne kayi ne tshia mvita tshia nsongo, nansha muele wa mvita. Nansha nanku, uvua ne dikima disaba ditutuka. Wakaya mutangile kudi muntu mule wa mfiondo au bua kuluangana nende, kayi ne buôwa. Bua tshinyi Davidi uvua ne dikima dia bungi nunku? Bualu uvua mutuishibue ne: Yehowa uvua nende. (1 Sam. 17:37, 45-47) Kavua umona muvua Goleyata mumupite ku bunene to. Kadi uvua umumona mukese menemene mushadile kudi Yehowa. Bualu ebu budi butulongesha tshinyi? Budi butulongesha ne: tuetu batuishibue ne: Yehowa Nzambi wa Bukole Buonso udi netu, batuishibue kabidi ne: baluishi betu badi kutupu kumpala kuende, netupete dikima.​—2 Kul. 20:15; Mis. 16:8. w19.07 5 §11-13

Tukiko wakaleja muvuaye muena Kristo mulunda wa mupostolo Paulo wa lulamatu. (Bien. 20:4) Bu mu 55 panyima pa Yezu, Paulo wakalongolola bua basangishile bena Kristo ba mu Yudaya bintu bua kubambuluisha, ne uvua mua kuikala muambile Tukiko bua kuimanyinaye mudimu wa mushinga eu. (2 Kol. 8:18-20) Pakaluabu kuela Paulo mu buloko mu Lomo bua musangu wa kumpala, Tukiko ke uvuaye utuma ne mikenji. Uvua uya kupesha bena mu bisumbu bia mu Asia mikanda ne mikenji ya kubakankamija nayi. (Kolos. 4:7-9) Tukiko uvua mulunda uvua Paulo weyemena. (Tito 3:12) Mu bena Kristo bonso ba mu tshikondo atshi, kakuvua muntu uvuaye weyemena bu Tukiko to. Bu mu 65 panyima pa Yezu, pavua Paulo mu buloko musangu muibidi, wakafunda ne: bena Kristo balume ba bungi ba mu provense wa Asia bavua babenga kusomba nende, pamuapa bualu bavua batshina baluishi babu. (2 Tim. 1:15) Kadi Paulo uvua weyemena Tukiko, kumupeshaye ne mudimu mukuabu kabidi. (2 Tim. 4:12) Paulo uvua usanka bikole bua muvuaye ne mulunda muimpe bu Tukiko. w20.01 10 §7, 8

Pamuapa udi udiebeja bua kumanya ni mbakuele manyi. Bikalabi nanku, anji elabi meji bua nkonko ya mushinga eyi: Utu ne dijinga dikole dia kuenza disua dia Yehowa anyi? Utu umona ne: utu ne tshisumi tshia bungi mu mudimu wa buambi anyi? Utu mulongi wa Dîyi dia Nzambi wa tshisumi utu musue kumanya “malu male a Nzambi” anyi? Udi mumone ne: Yehowa mmukuambuluishe bua kupatula bipeta bia dikema mu mudimu wa buambi anyi? Utu udiumvua ne dibanza dinene dia kuambuluisha bakuabu bua kumanya Yehowa anyi? Udi ne bijadiki bidi bikuleje ne: Yehowa mmukuambuluishe mu mishindu ya pa buayi anyi? Wewe muandamune nkonko eyi ne: Eyowa, bidi bileja ne: Yehowa mmukuele manyi a nyi? Tòo. Bua tshinyi tudi tuamba nanku? Bualu batendeledi ba Nzambi bonso badi mua kuandamuna eyowa ku nkonko eyi. Mu bulelela, biwikala udiebeja bua kumanya ni mbakuele manyi, dielakana adi didi dileja ne: ki mbakuelawu to. Bantu badi Yehowa muele manyi kabatu badiebeja bua kumanya bikalabu babele manyi anyi kabayi babelawu to! Mbadimanye! w20.01 23 §14