Ngondo 3

Mupostolo Petelo wakabela bena Kristo nende ubambila bua bakuate mudimu ne tshipedi kayi tshionso peshi mamanya kayi onso avuabu nawu bua kuikala kukankamijangana. Uvua muambe ne: “Bilondeshile mudi muntu ne muntu mupete tshipedi, nukuate natshi mudimu bua kukuatshishangana bu balami bimpe ba ngasa wa Nzambi.” (1 Pet. 4:10) Katuena ne bua kudikanda bua kukuata mudimu muetu muonso ne bipedi bitudi nabi tutshina ne: bakuabu badi mua kutumvuila mukawu anyi kutuadija kudimona bashadile kutudi. Kadi tuikale badimuke bua kabitufikishi ku diditambisha to. (1 Kol. 4:6) Tuvulukayi ne: tshipedi kayi tshionso tshitudi mua kuikala natshi, ntshifumine kudi Nzambi. Mbimpe tukuate natshi mudimu bua kutantshisha tshisumbu, kadi ki mbua batumone batuambe to. (Filip. 2:3) Patudi tudifila ne makanda etu ne mamanya etu bua kuenza disua dia Yehowa, nebitusankishe bualu tudi tumutumbisha, kadi ki mbualu tudi basue kutembangana ne bakuabu anyi tudimona babapite to. w22.04 11-12 §7-9

Yezu uvua munange Mifundu minsantu bikole, mêyi adi mu Misambu 40:8 akavua maleje muvuaye mua kumvua. Mvese au udi wamba ne: “Kuenza disua diebe, Nzambi wanyi, ke disanka dianyi, mukenji webe udi munda muanyi menemene.” Bu muvuaye munange Mifundu, wakatuta diakalengele ne wakatungunuka ne kuenzela Yehowa mudimu ne disanka. Tuetu tubala Dîyi dia Nzambi ne badinange, netuikale petu ne disanka ne malu etu neende bimpe. (Mis. 1:1-3) Mu diumvuangana ne mêyi a Yezu pamue ne tshilejilu tshiende, tuakajayi mushindu wetu wa kubala Bible. Tudi mua kuakaja ngumvuilu wetu wa mvese ya mu Bible patudi tusambila, tubala bitekete bitekete, tudiela nkonko, ne tufunda tumalu tukese. Tudi mua kukuata mudimu ne dijingulula dia malu, tuetu tukonkonona bimpe bimpe malu atudi tubala ku diambuluisha dia mikanda yetu itu yumvuija malu a mu Bible. Tudi mua kulekela Dîyi dia Nzambi ditufumba, tuetu tubala Bible ne lungenyi luimpe. Tuetu tudienzeja bua kuenza malu aa, netumvue buimpe bua malu atudi tubala mu Bible, ne netusemene pabuipi menemene ne Yehowa.—Mis. 119:17; Yak. 4:8. w23.02 13 §15, 16

Difundila tshipatshila tshisunguluke, pashishe wenze muebe muonso bua kutshikumbaja. Ntshinyi tshiudi mua kuenza? Fuanyikijabi ne: udi musue kulua mulongeshi mupiluke. Udi mua kulonga ne muoyo mujima broshire wa Difila ku dibala ne ku dilongesha. Bobu bakupeshe mudimu mu bisangilu bia munkatshi mua lumingu, udi mua kulomba muanetu udi mupiluke bua akuteleje dîba diudi uwambulula kumpala kua kuwenza mu bisangilu, ne akuleje miaba iudi mua kuakaja. Ikala ulongolola midimu idibu bakupesha kumpala kua dîba, bua bantu bamone ne: udi muenji wa mudimu ne udi muntu wa kueyemena. (2 Kol. 8:22) Tshiudi mua kuenza ntshinyi biobi bienzeke ne: tshipatshila tshiudi mudifundile tshia kulua mulongeshi mupiluke, mbualu butu bukukolele? Tungunuka anu ne kudifila! Timote wakalua ngamba-malu wa dipoko peshi mulongeshi mupiluke anyi? Ki mbabuakuile mu Bible to. Kadi tudi bajadike ne: wakafika ku dilua mupiluke mu midimu ivuabu bamupeshe bualu uvua mutumikile mibelu ya Paulo.—2 Tim. 3:10. w22.04 24-25 §8-11

Nyama wa luonji wa mitu muanda mutekete udi umvuija tshinyi? Udi umueneka bu nyama wa nkashama kadi muikale ne makama a nyama wa urse ne mukana mua ntambue, ne nsengu dikumi. Bionso ebi bidi bileja nyama inayi idibu batele mu Danyele nshapita wa 7. Kadi mu mukanda wa Buakabuluibua, tshidibu bambe bua nyama inayi eyi mbatshiambe anu bua umuepele, ki mbua nyama inayi mishilangane to. Nyama wa luonji eu kena uleja anu mbulamatadi umuepele anyi bukokeshi bua pa buloba bujima to. Bualu bukuabu, Bible udi wamba bua nyama eu ne: udi ukokesha “pa tshisa tshionso ne bantu bonso ne muakulu wonso ne tshisamba tshionso.” Nunku udi ne bua kuikala munene bikole kupita mbulamatadi kayi yonso. (Buak. 13:7) Ebi bidi bileja ne: Nyama wa luonji eu ntshimfuanyi tshia makokeshi onso a tshididi adi makokeshe bantu too ne lelu. (Muam. 8:9) Bualu bukuabu budi ne: mu Bible, nomba dikumi utu utamba kumvuija tshintu tshidi tshijima. w22.05 9 §6

Mbanganyi bapeta malu mimpe a dikema aa? Bantu ba kumpala mbena mu musumba munene bapanduka ku Armagedone pamue ne bana bonso bikala mua kuledibua mu buloba bupiabupia. Kadi Buakabuluibua nshapita wa 20 udi kabidi ulaya ne: bantu badi bafue nebabishibue. (Buak. 20:11-13) Bantu “bakane” ba lulamatu bavua bafue kale pamue ne bantu ‘bavua kabayi bakane,’ mmumue ne: aba bavua kabayi bapete mpunga muimpe wa kulonga malu a Yehowa, nebapetulule muoyo pa buloba apa. (Bien. 24:15; Yone 5:28, 29) Abi bidi biumvuija ne: nebabishe muntu yonso ku lufu mu Bukokeshi bua bidimu tshinunu anyi? Tòo. Bantu bavua meji mabi masake bua kubenga kuenzela Yehowa mudimu kumpala kua bobu kufua, kabakubabisha ku lufu nansha. Dîba divuabu mua kumuenzela mudimu nedikale dimane kupita, ne bavua baleje muvua kupeta muoyo mu Mparadizu pa buloba kakuyi kubakumbanyine.—Mat. 25:46; 2 Tes. 1:9; Buak. 17:8; 20:15. w22.05 18 §16, 17

Ku diambuluisha dia “mupika wa lulamatu udi mudimuke,” Yezu mmuenze bulongolodi bua dikema pa buloba apa bua kutungunuja ntendelelu mukezuke. (Mat. 24:45) Udi umvua bishi bua bulongolodi ebu? Pamuapa diandamuna diebe ndifuanangane ne dia mupostolo Petelo wakambila Yezu mêyi a mu mvese wa lelu. Bu tuetu katuyi mu bulongolodi bua Yehowa, mmuaba kayi uvua yonso wa kutudi mua kuikala lelu? Ku diambuluisha dia bulongolodi ebu, Yezu udi wenza bua tudie tukute mu nyuma. Udi utuambuluisha kabidi bua tukumbaje mudimu wetu wa kuyisha bimpe menemene. Udi utuambuluisha bua kuvuala “bumuntu bupiabupia” bua tusankishe Yehowa. (Ef. 4:24) Mu bikondo bia bipupu, Yezu udi utupesha buludiki bua meji. Buludiki ebu buvua buambuluishe bantu bikole mu tshikondo tshia korona. Bantu ba bungi pa buloba bujima bakapanga tshia kuenza, kadi Yezu wakenza bua batuambile malu a tuetu kulonda avua umvuika bimpe bua tudikube. w22.07 12 §13, 14

Yehowa uvua muambile bena Isalele ba kale bua bikale ne tshibidilu tshia kulongesha bana babu malu ende. (Dut. 6:6, 7) Baledi abu bavua ne mpunga ya bungi munda mua dituku bua kuyukila ne bana babu ne kubasaka bua banange Yehowa. Tshilejilu, muana wa balume uvua wambuluisha tatuende munkatshi mua mêba a bungi bua kukuna bia pa madimi anyi kubinowa. Muana wa bakaji uvua yeye wambuluisha mamuende munkatshi mua mêba a bungi bua kutela bilamba anyi bintu bikuabu, ne bua kuenza midimu ya ku mbelu. Padi baledi ne bana babu benza midimu pamue, bidi bibambuluisha bua kuyukila malu a bungi a mushinga. Tshilejilu, badi mua kuakula bua buimpe bua Yehowa ne bua muvuaye wambuluisha dîku diabu. Mu matunga a bungi, baledi ne bana babu kabena ne mushindu wa kusomba pamue munda mua dituku to. Baledi badi mua kuikala ku mudimu, bana eku mu kalasa. Nunku baledi badi ne bua kukeba mpunga ya kuyukila ne bana babu.—Ef. 5:15, 16. w22.05 28 §10, 11

Mpekatu minene ndishipa dia mikenji ya Nzambi bibi menemene. Muena Kristo yeye muenze mpekatu wa mushindu eu, udi ne bua kusambila Yehowa Nzambi, ne kuambila bakulu ba mu tshisumbu mpekatu au. (Mis. 32:5; Yak. 5:14) Mmudimu kayi wikala nawu bakulu? Anu Yehowa nkayende ke udi ne bukokeshi bua kubuikidila muntu mpekatu bua kashidi. Udi uyibuikila nanku ku diambuluisha dia mulambu wa tshia kupikula natshi. Kadi mmupeshe bakulu mudimu wa kukonkonona malu ku diambuluisha dia Bible bua kumanya bikala muenji wa mpekatu mua kushala mu tshisumbu. (1 Kol. 5:12) Mu malu adibu ne bua kukonkonona mudi didienzeja bua kuandamuna nkonko eyi: Mmuenze mpekatu eu ku bukole anyi? Uvua mulongolole bua kuenza bualu bubi ebu anyi? Uvua muenze mpekatu eu misangu ne misangu munkatshi mua tshipolo kampanda anyi? Nkonko ya mushinga mukole menemene nyoyi eyi: Kudi tshidi tshileja ne: mmunyingalale bushuwa anyi? Kudi malu adi aleja ne: Yehowa mmumufuile luse anyi?—Bien. 3:19. w22.06 9 §4

Yezu wakakankamija bayidi bende bua bakebe buakane. (Mat. 5:6) Mbuena kuamba ne: mbimpe tuikale ne dijinga dikole dia kuenza malu makane, malu mimpe, ne adi makezuke ku mêsu kua Nzambi. Utu munange bulelela ne buakane anyi? Tudi batuishibue ne: utu mubinange. Udi mukine mashimi ne malu mabi onso a tshikisu. (Mis. 119:128, 163) Muntu udi ushima udi widikija Satana mukokeshi wa buloba ebu. (Yone 8:44; 12:31) Tshimue tshia ku bipatshila bia Satana nkuamba malu a dishima bua dîna dinsantu dia Yehowa Nzambi. Katshia anu ku buntomboji bua mu Edene, Satana udi umuangalajila Nzambi wetu malu a dishima. Wakamba mudi Yehowa muikale Nzambi muena budinangi ne Mukokeshi mubi udi usokoka bantu bintu bimpe. (Gen. 3:1, 4, 5) Malu adi Satana ushiminyina Yehowa adi atungunuka ne kunyanga ngenyi ya bantu ne mioyo yabu. Bantu bobu kabayi basungule bua ‘kunanga bulelela,’ Satana neabafikishe ku malu mabi a mishindu yonso ne ku bikadilu bibi.—Lomo 1:25-31. w23.03 2 §3

Paudi wenda udienzeja bua kulekela tshikadilu tshibi kampanda, manya ne: kudi misangu iudi mua kudimona ukadi utshienza kabidi. Udi mua kutuadija kuteketa mu mikolo ne ubungama bualu kuena mutshilekele musangu umue to. Ntshinyi tshiakuambuluisha bua kuikala ne lutulu? Ngikadilu muimpe eu: ndinanga diebe kudi Yehowa. Dinanga diudi munange Yehowa nngikadilu mulenga wa katshia uudi nende. (Nsu. 3:3-6) Kunanga Nzambi bikole kudi mua kutuambuluisha bua kutshimuna ntatu itu itukuata. Ke tshitu Bible utamba kuamba bua dinanga dia Yehowa dia lulamatu kudi bena mudimu bende. Kubananga bikole mushindu eu kudi kumvuija ne: kakubalekela nansha kakese. Udi mufukibue mu tshimfuanyi tshia Nzambi. (Gen. 1:26) Mmunyi muudi mua kuikala pebe ne dinanga dia mushindu au? Tutuadijayi ne dianyisha. (1 Tes. 5:18) Ikala udiebeja dituku dionso ne: ‘Mmunyi mudi Yehowa muleje ne: mmunange?’ Pashishe paudi usambila, dienzeja bua kumuela tuasakidila, utele malu masunguluke adiye mukuenzele. Ikala umona ne: Yehowa mukuenzele malu mimpe bualu mmukunange. w23.03 12 §17-19

Yezu uvua muenzele bapostolo bende bonso 12 abu malu mimpe ne uvua mubanange. Bidi bitulongesha tshinyi? Tshidi ne bualu ki nganu bilema bidi bakuabu batuenzela to, tshitudi tuenza padibu batuenzela bilema tshidi patshi ne bualu. Muena Kristo netu yeye mutunyingalaje, mbimpe tudiebeje ne: ‘Bua tshinyi tshidiye mungenzele ntshinyingalaje bikole nunku? Tshidiku tshileja butekete kampanda bundi ne bua kuakaja anyi? Bidiku mua kuikala ne: muanetu udi munnyingalaje eu udi ne lutatu ludi lumutonde anyi? Nansha biobi ne: ndi ne bualu bua kufikila munda, tshienaku mua kulengulula tshilema tshiende bua kumuleja mundi mumunange anyi?’ Tuetu tutungunuka ne kuenzela bakuabu malu adi aleja mutudi babanange, netuleje mutudi bayidi balelela ba Yezu. Tshilejilu tshia Yezu tshidi tshitulongesha kabidi bua tuikale tumvuila bena Kristo netu. (Nsu. 20:5) Bushuwa, Yezu uvua mua kumona bivua mu mioyo ya bantu. Tuetu katuena mua kubimona to. Kadi tudi mua kubuikidila bena Kristo netu padibu batuenzela bilema. (Ef. 4:1, 2; 1 Pet. 3:8) Mbipepele bua kuenza nanku, tuetu balonge mua kumanya mudibu bakole. w23.03 30 §14-16

Mu nsombelu mikuabu, Satana udi mua kubuelela pa disama didi diamba kuya netu bua tunyange ditabuja dietu. Baminganga ne bena mu mêku etu badi mua kutuenzeja bua tuitabe batuele mashi, pabi tuetu bitabe, tudi tushipa mukenji wa Nzambi. Muntu mukuabu pende udi mua kukeba bua kutuitabijija buanga budi bubengangana ne mêyi manene a mu Bible. Nansha mutudi katuyi basue kufua, tudi bamanye ne: nansha tuetu ne bua kufua, Yehowa kakulekela kutunanga to. (Lomo 8:37-39) Padi balunda ba Yehowa bafua, udi ushala mubalame mu meji ende, bienze anu bu ne: badi ne muoyo. (Luka 20:37) Udi ne dijinga dikole dia kubabisha ku lufu. (Yob 14:15) Yehowa mmufute tshintu tshia mushinga mukole bua ‘tupete . . . muoyo wa tshiendelele.’ (Yone 3:16) Tudi bamanye ne: Yehowa mmutunange ne udi ututabalela bikole. Nunku pamutu pa kulekela Yehowa patudi tusama anyi patudi tukeba kufua, tudi tumulomba busambi, meji, ne bukole.—Mis. 41:3. w22.06 18 §16, 17

Bible udi wamba ne: “Ditshina dia Yehowa didi tshibangidilu tshia meji, ne kumanya Mutambe Tshijila kudi dijingulula dia malu.” (Nsu. 9:10) Nunku patudi ne dipangadika dinene dia kuangata, mbimpe tudiangate bilondeshile ngelelu wa meji wa Yehowa, mmumue ne: ‘dimanya dia Mutambe Tshijila.’ Netudiangate bilondeshile dimanya edi patudi tubala Bible ne mikanda yetu idi imumvuija. Dîba adi tudi tuleja mutudi ne meji malelela. (Nsu. 2:5-7) Yehowa ke udi mua kutupesha meji malelela. (Lomo 16:27) Bua tshinyi tudi tuamba ne: yeye ke mpokolo wa meji? Tshia kumpala, bu mudiye Mufuki wetu, mmumanye kalu ne kalu konso kadi katangila bifukibua biende. (Mis. 104:24) Tshibidi, malu onso atu Yehowa wenza atu aleja mudiye ne meji. (Lomo 11:33) Tshisatu, mibelu ya meji ya Yehowa itu anu yambuluisha bantu batu bayitumikila. (Nsu. 2:10-12) Tuetu basue kupeta meji malelela, tudi ne bua kuitaba malongesha malelela aa ne kualekela bua atulombole patudi tuangata mapangadika anyi patudi tukeba kuenza bualu kampanda. w22.10 19 §3, 4

Anu mukavua Buakabuluibua nshapita wa 12 muleje, bakatshimuna Satana kumuelabu yeye ne bademon bende panshi. Bua bungi bua luonji, Satana wakabanga kumvuila bukua bantu tshiji, biobi kuenza bua ne: kuikale “diakabi pa buloba.” (Buak. 12:9-12) Mmunyi mudi mêyi a buprofete aa atuambuluisha? Malu adi enzeka pa buloba ne mudi ngenzelu wa malu wa bantu mushintuluke bivua anu ne bua kutuambuluisha bua kujingulula ne: Yezu uvua mulue Mukalenge. Nunku pamutu pa kufiika munda patudi tumona bantu benza malu a budinangi ne lukinu, mbimpe tuvuluke ne: malu adibu benza au adi enda akumbaja dîyi dia buprofete. Bukalenge bukadi bukokesha! (Mis. 37:1) Ntatu neyivule bikole pa buloba apa pikala Armagedone musemene bikole menemene. (Mâko 13:8; 2 Tim. 3:13) Kuenaku ne dianyisha kudi Tatu wetu wa dinanga udi mu diulu bua mudiye mutuambuluishe bua kumvua tshidi tshikebeshe ntatu pa buloba apa anyi? w22.07 3-4 §7, 8

Tudi mua kulomba Yehowa bua ambuluishe bena Kristo netu bananukile padibu basama, padiku bipupu ne mvita; padibu babakengesha, anyi padiku ntatu mikuabu. Tudi kabidi mua kusambila bua bana betu badi badipangisha amue malu bua kuambuluisha bana betu badi mu dikenga. Pamuapa udi mumanye bamue badi batuilangana ne ntatu ya buena eyi. Kuenaku mua kubatela mu masambila ebe muntu yonso mu dîna diende anyi? Patudi tulomba Yehowa bua abambuluishe bua bananukile, tudi tuleja mutudi ne dinanga dia buwetu. Bana betu badi balombola malu mu tshisumbu batu ne dianyisha dia bungi bua mututu tubatela mu masambila etu, ne masambila au atu abambuluisha. Ke tshivua tshienzekele mupostolo Paulo. Wakafunda ne: “Nusambile kabidi bua bualu buanyi, bua bampeshe mêyi pandi mbulula mukana muanyi, bua mmone mua kuakula ne dikima mu dimanyisha bualu busokoka bua tshijila bua lumu luimpe.” (Ef. 6:19) Lelu, tudi petu ne bana betu badi benza mudimu mukole wa kutulombola. Bua kuleja mutudi babanange, tulombayi Yehowa bua abeneshe mudimu wabu. w22.07 23-24 §14-16

Musalayi utu uvuala tshifulu bua kukuba mutu wende ku mikete idi baluishi mua kumuasa. Bu mutudi mu mvita ya mu nyuma, tudi ne bua kukuba meji etu ku buluishi bua Satana. Udi wenza mudimu ne bintu bia bungi bishilashilangane bua kututeya ne kutunyanga lungenyi. Anu mudi tshifulu tshikuba mutu wa musalayi, ditekemena dietu didi dikuba meji etu bua tushale anu ne lulamatu kudi Yehowa. Kadi diodi diteketa ne tutuadija kutuma meji anu ku majinga etu a mubidi, tudi mua kupanga kumona mushinga udi nawu muoyo wa tshiendelele. Tuakulabi bua bamue bena Kristo ba mu Kolinto wa kale. Kabatshivua bitabuja kabidi mulayi wa Nzambi wa kutekemena dibishibua dia bantu ku lufu to. (1 Kol. 15:12) Paulo wakamba ne: bantu badi kabayi ne ditekemena dia kuikala ne muoyo matuku atshilualua, badi baditatshisha anu bua kukumbaja majinga abu a lelu. (1 Kol. 15:32) Bantu ba bungi badi kabayi ne ditekemena mu milayi ya Nzambi batu benza muabu muonso bua bikale ne disanka lelu. Kadi tuetu tudi batuishibue ne: malu adi Nzambi mutulaye matuku atshilualua neakumbane. w22.10 25-26 §8, 9

Yehowa udi ukulomba bua umusambile. Mmumone malu audi uluangana nawu, ne udi ukujadikila ne: neateleje masambila ebe dîba kayi dionso. Utu musue kuteleja masambila a batendeledi bende. (Nsu. 15:8) Udi mua kusambila bua malu kayi paudi udiumvua nkaya? Ambila Yehowa yonso iudi nayi munda. (Mis. 62:8) Muambila malu adi akutonda ne muudi udiumvua. Mulomba bua akuambuluishe bua umanye tshia kuenza bua kuatantamena ne bua akupeshe dikima didi dikengela bua wakule mudilekelele. Udi mene mua kumulomba meji bua wakule ne dîyi dimpe paudi umvuija malu audi witabuja. (Luka 21:14, 15) Wewe udiumvua mutekete mu mikolo, lomba Yehowa akuambuluishe bua ukuatshile muena Kristo mushindame mu nyuma bualu buudi nabu. Udi mua kumulomba bua ambuluishe uudi ukuatshila bualu au bua akuteleje ne ajingulule muudi udiumvua. Wikale ne ntema bua kumona mudiye wandamuna masambila ebe, ne witabe diambuluisha dia bakuabu; dîba adi kuakudiumvua nkayebe nansha. w22.08 10 §6

Bena mu tshisumbu tshipiatshipia tshia mu Tesalonike bakapeta buluishi bukole menemene. Bantu babi bavua babaluisha bakakoka “bana betu bakuabu, kuyabu nabu kudi bakokeshi ba mu tshimenga.” (Bien. 17:6) Udiku mua kudifuanyikijila buôwa buvua bena Kristo bapiabapia abu nabu anyi? Bivua mua kubapangisha bua kuenzela Yehowa mudimu ne tshisumi, kadi mupostolo Paulo kavua musue ne: atshi tshibenzekele to. Watabalela tshisumbu tshipiatshipia atshi. Paulo wakavuluija bena Tesalonike ne: “Tuakanutumina Timote, muanetu . . . , bua kunushindamija ne kunusamba bua ditabuja dienu, bua muntu nansha umue katenkakajibu kudi makenga aa.” (1 Tes. 3:2, 3) Timote uvua mumone muvua Paulo mukoleshe bena Kristo bavua mu Luseta. Bu muvua Timote mumone muvua Yehowa mubambuluishe, uvua ukumbana bua kujadikila bena Kristo bapiabapia abu ne: malu onso avua ne bua kuenda bimpe nansha buabu buobu pabu.—Bien. 14:8, 19-22; Eb. 12:2. w22.08 21 §4

Ku ntuadijilu kua bidimu bia 1 800, kasumbu ka balongi ba Bible kavuabu balombola kudi Charles Taze Russell kakatuadija kulonga malu a mu Bible bikole. Bavua basue kumanya bulelela budi butangila mushinga udi nawu mulambu wa Yezu ne mushindu uvuabu ne bua kuvuluka lufu luende. Malu avuabu bakebulule au adi atuambuluisha lelu. Mushindu kayi? Yehowa mmutuambuluishe bua kumanya bulelela budi butangila mulambu wa Yezu ne tshidiwu ukumbaja. (1 Yone 2:1, 2) Tudi bamanye kabidi ne: Bible udi umvuija mishindu ibidi ya ditekemena bua bantu badi basankisha Nzambi, bamue nebapete muoyo udi kawuyi ufua mu diulu ne bakuabu miliyo ne miliyo nebashale ne muoyo kashidi pa buloba. Tudi tusemena pabuipi ne Yehowa patudi tumona mudiye mutunange bikole ne mudi mulambu wa Yezu wambuluisha yonso wa kutudi. (1 Pet. 3:18) Nunku anu bu bana betu ba lulamatu ba kale abu, tutu tubikila petu bantu bua balue mu Tshivulukilu tshitutu tuenza bilondeshile tshilejilu tshidi Yezu mutushile. w23.01 21 §6, 7

Yezu uvua ulongesha bantu ubambila malu mimpe abatuadila Bukalenge bua Nzambi. Tudi ne disanka dia bungi bua tshia kupikulangana natshi bualu tshidi tshitupetesha mushindu wa kudia bulunda bukole ne Yehowa ne Yezu. Bantu badi baleja mudibu bitabuja Yezu badi kabidi ne ditekemena dia kuikala ne muoyo wa kashidi ne dia kumonangana kabidi ne badibu bafuishe. (Yone 5:28, 29; Lomo 6:23) Katuena ne tshituvua benze bua kutuenzelabu malu mimpe aa to, ne katuena ne tshitudi mua kufuta Nzambi ne Kristo bua bidibu batuenzele to. (Lomo 5:8, 20, 21) Kadi tudi mua kubaleja mutudi ne dianyisha dia bungi. Mushindu kayi? Tudi petu mua kufila dîba dietu, makanda etu, ne makuta etu bua mudimu wa Bukakenge uye kumpala. Tshilejilu, tudi mua kudifila bua kuambuluisha mu mudimu wa dibaka dia nzubu yetu ya malu a ntendelelu ne diyilongolola. w23.01 26 §3; 28 §5

Bantu bakokesha mu Bukalenge bua Nzambi bobu nebatabalele bantu bungi tshianana bikala ne muoyo pa buloba bujima. Bantu 144000 nebikale bakalenge ne bakuidi anu bu Yezu. (Buak. 5:10) Patshivua bena Isalele batumikila Mikenji ya Mose, bakuidi ke bavua benza bua bantu bikale ne makanda a mubidi mimpe eku benza kabidi bua bikale mu malanda mimpe ne Yehowa. Mikenji ayi ivua “mundidimbi wa malu mimpe atshilualua,” ke bualu kayi mbikumbane bua kuamba ne: bantu bakokesha ne Yezu nebambuluishe bantu ba Nzambi bua kuikala ne makanda a mubidi mimpe ne kuikala mu malanda mimpe ne Yehowa. (Eb. 10:1) Mbimpe tuindile bua kumona muikala bakalenge ne bakuidi aba mua kueleshangana diboko ne bantu badi Bukalenge bua Nzambi bukokesha pa buloba. Nansha Yehowa mulongolole malu mushindu kayi, tuikale batuishibue ne: bantu bonso bikala mu Mparadizu pa buloba nebapete buludiki budi bukengela.—Buak. 21:3, 4. w22.12 11 §11-13

Bualu bumue butu butusaka bua kubikila bakuabu bua kubuela netu mu Tshivulukilu budi ne: tudi basue bua badi babuelamu bua musangu wa kumpala bamanye tshidi Yehowa ne Yezu benzele yonso wa kutudi. (Yone 3:16) Tudi batekemene ne: malu adibu bumvua mu Tshivulukilu ne bamonamu neabasake bua kulonga bia bungi bua kuluabu batendeledi ba Yehowa. Tutu tubikila kabidi bantu bakadi balekele kuenzela Yehowa mudimu. Tutu tubabikila nanku bua kubavuluija ne: Yehowa utshidi anu mubanange. Ba bungi batu bitaba dibikila dietu adi, ne bitu bitusankisha bikole patutu tubamona. Kubuela mu Tshivulukilu kutu kubavuluija ne: bavua banange kuenzela Yehowa mudimu bikole ku kale. (Mis. 103:1-4) Nansha bantu bobu bitaba dibikila dietu anyi kabayi baditaba, tudi tuenza muetu muonso bua kubabikila mu Tshivulukilu, bamanye ne: Yehowa utu utangila nangananga badi babuelamu.—Luka 15:7; 1 Tim. 2:3, 4. w23.01 20 §1; 22-23 §9-11

Butuku kumpala kua Yezu kufua, wakalomba Yehowa, Tatu wende wa mu diulu bualu bua pa buabu, bua ne: alame bayidi bende. (Yone 17:15, 20) Bushuwa, Yehowa uvua anu utabalela bantu bende ne ubakuba. Kadi Yezu uvua mumanye ne: Satana uvua ne bua kuluisha bayidi bende ne luonji lua bungi. Wakajingulula kabidi ne: bavua ne bua kukeba diambuluisha dia Yehowa bua bakandamene buluishi bubi bua Diabolo. Ndongoluelu wa Satana eu udi ukebela bena Kristo balelela ntatu ya bungi. Tudi tutuilangana ne buluishi budi mua kututekesha mu mikolo, bufuane ne kutupangisha bua kushala ne lulamatu kudi Yehowa. Kadi katuena ne tshitudi tutshina to. Yehowa udi utulama, udi umona ntatu itudi tupeta, ne mmudiakaje bua kutuambuluisha bua tuyitantamene. Eyowa, ‘Yehowa udi utangila badi bamutshina . . . bua kubasungila.’—Mis. 33:18-20. w22.08 8 §1, 2

Tshidimu tshionso tshikondo tshia Tshivulukilu, tutu tusambila ne tuelangana meji a mushinga udi nawu lufu luende bua kuleja dianyisha bua malu onso adiye mutuenzele. Tutu kabidi ne disanka dia kuyisha bikole, tukankamija bantu ba bungi bua kubuela netu mu tshibilu tshia pa buatshi etshi. Bushuwa tudi badisuike bua kubenga kulekela tshintu tshitupangisha bua kubuela mu Tshivulukilu. Mu Tshivulukilu tutu tulonga bua tshinyi bantu batu dijinga ne tshia kupikulangana natshi ne mudi lufu lua muntu umuepele mua kubuikila mpekatu ya bantu ba bungi. Batu batuvuluija tshitu diampa ne mvinyo bileja ne bantu badi ne bua kudia diampa ne kunua mvinyo. (Luka 22:19, 20) Tutu tuelangana meji a mabenesha adibu balamine bantu badi ne ditekemena dia kusomba pa buloba. (Yesh. 35:5, 6; 65:17, 21-23) Mbimpe tuangate malu malelela aa ne mushinga wa bungi. w23.01 20 §2; 21 §4

Yehowa mmutupeshe mpunga wa kupeta muoyo wa tshiendelele padiye mufile Muanende bu tshiakupikulangana natshi bua kutubuikidila mpekatu. (Mat. 20:28) Mupostolo Paulo wakaleja mushinga udi nawu kabidi bualu budi Nzambi mulongoluele bantu pakambaye ne: “Bu muvua lufu lufumine kudi muntu umue, dibishibua dia bafue didi difumina padi kudi muntu umue. Bualu anu bu mudi bantu bonso bafua mu Adama, nunku kabidi mu Kristo bonso nebapete muoyo.” (1 Kol. 15:21, 22) Yezu wakalongesha bayidi bende bua kusambila bua Bukalenge bua Nzambi bulue ne bua disua diende dienzeke pa buloba. (Mat. 6:9, 10) Nzambi mmulongolole kabidi bua bantu bikale ne muoyo kashidi pa buloba. Bua kukumbaja bualu ebu, Yehowa mmuteke Muanende Mukalenge wa Bukalenge bua Masiya. Ukadi mutuadije kusangisha kabidi bantu 144000 ba pa buloba bua benze mudimu ne Yezu bua kukumbaja disua diende.—Buak. 5:9, 10. w22.12 5 §11, 12

Patutu tufuisha muntu, tutu tushala tumujinga bikole! Patudi tuvuluka matuku a ndekelu a lufu luende, nangananga yeye mukenge kumpala kua kufua, tudi mua kuanji kumvua kanyinganyinga. Kadi mu kupita kua matuku, tutu tubanga kumvuaku disanka patudi tuvuluka bualu kampanda buvuaye mutulongeshe, buvuaye muambe anyi muenze bua kutukankamija anyi kutusekesha. Bia muomumue, bitu bitubungamija patutu tubala malu a muvua Yezu mukenge ne muvuaye mufue. Tshikondo tshia Tshivulukilu, tutu tutamba kukeba dîba dia kuelangana meji a mushinga udi nawu lufu luende. (1 Kol. 11:24, 25) Kadi tutu tumvua disanka dia bungi patutu tuela meji a malu onso avua Yezu muambe ne muenze patshivuaye pa buloba. Bitu bitukankamija kabidi bua kuela meji a tshidiye wenza mpindieu ne tshiatuenzelaye kumpala eku. w23.01 26 §1, 2

Pakafua Yezu, bayidi bakabungama bikole. Bavua bajimije mulunda wabu munanga ne bumvue kabidi bu ne: bavua bajimije ditekemena diabu. (Luka 24:17-21) Kadi pakabamuenekela Yezu, wakakeba dîba dia kubumvuija mudimu udiye nawu mu dikumbana dia mêyi a buprofete. Wakabapesha kabidi mudimu wa mushinga wa kuenza. (Luka 24:26, 27, 45-48) Dîba divua Yezu mubande mu diulu matuku 40 pashishe, dibungama divua nadi bayidi diakandamuka disanka. Bu muvuabu bamanye ne: Mfumuabu uvua ne muoyo ne uvua pabuipi bua kubambuluisha bua kukumbaja mudimu mupiamupia uvuaye mubapeshe, bakumvua disanka. Disanka diabu diakabasaka bua kutumbisha Yehowa kabayi balekela. (Luka 24:52, 53; Bien. 5:42) Bua kuidikija bayidi ba Yezu bidi bilomba kuteka malu a Bukalenge bua Nzambi pa muaba wa kumpala. Nansha mudibi bitulomba dinanukila bua kutungunuka ne kuenzela Yehowa mudimu, yeye udi utulaya bua kutubenesha bikole tuetu bateke malu a Bukalenge pa muaba wa kumpala.—Nsu. 10:22. w23.01 30-31 §15, 16

Katuena basue kuenza tshilema tshia muomumue atshi, tshivua Adama ne Eva benze to. Tudi mua kutshiepuka tuetu tutungunuka ne kulonga malu a Yehowa, tuanyisha ngikadilu yende, ne tudienzeja bua kumanya ngelelu wende wa meji. Dîba adi dinanga ditudi bamunange nedikole bushuwa. Tuakulabi bua Abalahama. Uvua munange Yehowa bikole. Nansha pavuabi bimukolele bua kumvua mapangadika a Yehowa, kavua mumutombokele to. Kadi wakakeba bua kumanya Yehowa bimpe. Tshilejilu, pakamanyaye ne: Yehowa uvua mupangadije bua kubutula Sodoma ne Amola, wakanji kumvua buôwa bua ne: “Mulumbuluishi wa buloba bujima” uvua mua kubutula bantu bakane ne bantu babi popamue. Bua Abalahama bivua bimueneka ne: kabivua bikengela kuenza nanku to. Nunku wakela Yehowa nkonko ne didipuekesha. Yehowa kumuandamunaye ne lutulu. Ndekelu wa bionso, Abalahama wakamona ne: Yehowa utu ukonkonona muoyo wa muntu yonso ne katu unyoka bapile ne babinge popamue to.—Gen. 18:20-32. w22.08 28 §9, 10

Mu 455 K.Y., nguvena Nehemiya mumane kuibakulula bimanu bia Yelushalema, wakakeba bantu balume ba kueyemena bua batabalele tshimenga. Mu bantu abu wakasungula Hananiya, kumutekaye mfumu wa Muaba mukolesha. Bible udi wamba bua Hananiya ne: “Uvua muntu wa kueyemena bikole menemene ne uvua utshina Nzambi mulelela kupita bantu bakuabu ba bungi.” (Neh. 7:2) Bu muvua Hananiya munange Yehowa ne ditshina divuaye nadi dia kubenga kumunyingalaja biakamusaka bua kuenza mudimu wonso uvuabu bamupesha, uwenza ne muoyo mujima. Ngikadilu eyi idi ituambuluisha bua kuikala bantu ba kueyemena mu mudimu utudi tuenzela Nzambi. Tuakulayi bua Tukiko, muanetu wa balume uvua mupostolo Paulo mueyemene. Paulo uvua mueyemene Tukiko, umuangata bu “muena mudimu wa lulamatu.” (Ef. 6:21, 22) Paulo kavua mumueyemene anu bua kuya kufila mikanda kudi bena Kristo ba ku Efeso ne ba ku Kolosayi patupu to, kadi uvua mumueyemene kabidi bua kubakankamija ne kubakolesha. Tshilejilu tshia Tukiko tshidi tshituvuluija balume ba kueyemena badi batabalela majinga etu a mu nyuma lelu.—Kolos. 4:7-9. w22.09 9-10 §5, 6

Jozefe wakapeta ntatu mikole munkatshi mua bidimu bitue ku 13. Uvua mua kuikala udiebeja bikala Yehowa uvua mumunange bulelela. Uvua mua kuikala udiebeja kabidi bikala Yehowa uvua mumulekele mu tshikondo tshia dikenga atshi. Nansha nanku, kakafiika munda bua bualu abu to. Wakashala talala bua kulama bieledi biende bia meji. Pakapetaye mpunga wa kudisombuela, kakenza nanku to, wakaleja bana babu dinanga, kubafuilaye luse. (Gen. 45:4, 5) Jozefe wakabenga kudisombuela bualu uvua wela meji bimpe. Pamutu pa kuimanyina pa ntatu yende, wakimanyina yeye pa tshivua Yehowa musue. (Gen. 50:19-21) Ndilongesha kayi ditudi tupeta? Bobu bakukebele lutatu, kufiikidi Yehowa munda anyi kudiebeji bua kumanya ni mmukulekele to. Kadi elangana meji a mudiye ukuambuluisha bua kunanukila mu lutatu alu. Bualu bukuabu, padi bakuabu bakuenzela malu mabi, dinanga dikusake bua kubabuikidila mapanga abu. w22.11 21 §4

Muprofete Danyele wakamona bikena kumona bivua bileja mudi Yehowa muikale ku mutu kua makokeshi makuabu onso. Danyele wakanji kumona nyama minene inayi idi tshimfuanyi tshia makokeshi adi makokeshe buloba bujima akadi mapite, mmumue ne: bukokeshi bua Babilona, bua Madayi ne Pelasa, bua Grese, ne bua Lomo, kusangisha ne budiku lelu bua Grande-Bretagne ne États-Unis budi bupatukile ku bua Lomo. (Dan. 7:1-3, 17) Pashishe Danyele wakamona Yehowa Nzambi musombe mu nkuasa wa bukalenge mu lubanza lua mu diulu. (Dan. 7:9, 10) Nzambi udi unyenga mbulamatadi ya bantu bukokeshi, ubupesha bantu bakuabu badi batambe kubukumbanyina ne bikale ne bukole bua bungi. Neabupeshe banganyi menemene? Neabupeshe “muntu muenze bu muana wa muntu,” Yezu Kristo ne “bantu ba tshijila ba Udi ku Mutu kua Bionso” 144000 nebakokeshe “kashidi ne tshiendelele.” (Dan. 7:13, 14, 18) Mbiumvuike bimpe ne: Yehowa “Udi ku Mutu kua Bionso.” Bualu buvua Danyele mumone mu tshikena kumona budi bupetangana ne bualu buvuaye mumone kumpala. Wakamba ne: “Nzambi wa mu diulu [udi] umbusha bakalenge ne ujadika bakalenge.”—Dan. 2:19-21. w22.10 14-15 § 9-11