Dilongesha dia Nzambi didi ditshimuna
“Mêsu ebe adi ne bua kulua mêsu adi amona Mukushidimunyi webe Munene. Ne matshi ebe neumvue dîyi mu nyima muebe diamba ne: ‘Ke njila eu. Endelayimu, nuenu bantu.’”—YESHAYI 30:20, 21.
1. Bua tshinyi mbiakane bua dishidimuna dia Yehowa kubikidibuadi ne: dilongesha dia Nzambi?
YEHOWA NZAMBI mMpokolo wa dilongesha dipite buimpe didi muntu yonso mua kupeta. Bituamuteleja padiye wakula, nangananga ku butuangaji bua Dîyi diende dinsantu, neikale Mutushidimunyi wetu munene. (Yeshayi 30:20) Mu Mifundu ya tshiena-Ebelu udi kabidi ubikidibua ne: “Wa bu-Nzambi.” (Musambu wa 50:1) Nunku, dishidimuna dia Yehowa ndilongesha dia Nzambi.
2. Mmu ngumvuilu kayi mudibi bilelela bua se: Nzambi nkayende ke muena meji?
2 Bena mu bulongolodi ebu badi baditumbisha bua tulasa tuabu tubandile, kadi nansha kamue ka kuditu ki nkafila dilongesha dia Nzambi. Bushuwa, meji wonso adi bantu bapete biangatshile bikondo bia kale kaena ne mushinga pa kuafuanyikija ne dishidimuna dia Nzambi dibakila pa meji a Yehowa akena ndekelu. Lomo 16:27 udi wamba ne: amu Nzambi nkayende ke udi muena meji, ne bidi nanku bushuwa mu ngumvuilu wa se: amu Yehowa nkayende ke udi ne meji mapuangane.
3. Bua tshinyi Yezu Kristo mmulongeshi mutambe bunene wa katshia ne katshia pa buloba?
3 Yezu Kristo, Muana wa Nzambi, ntshilejilu tshipuangane tshia meji ne mmulongeshi mutambe bunene kupita buonso ba pa buloba. Kabiena bikemesha to! Munkatshi mua bikondo bile, Yehowa uvua Mulongeshi wende mu mawulu. Bushuwa, dilongesha dia Nzambi diakatuadija pakatuadija Nzambi kushidimuna tshifukibua tshiende tshia kumpala, Muanende umuepele. Ke bualu kayi Yezu uvua mua kuamba ne: “Ndi ngamba malu aa amu bu mudi Tatu muandongeshe.” (Yone 8:28; Nsumuinu 8:22, 30) Mêyi a Kristo yeye muine mafunda mu Bible adi asakidila bivule ku dimanya dietu dia dilongesha dia Nzambi. Pa kulongesha bivua Yezu mulongeshe, bena nkristo bela manyi a mu nyuma badi batumikila Mubashidimunyi wabu munene, udi musue bua se: “meji a Nzambi mavulavulayi” amanyishibue ku butuangaji bua tshisumbu.—Efeso 3:10, 11; 5:1; Luka 6:40.
Dikeba dia meji
4. Ntshinyi tshiakambibua pa bidi bitangila makokeshi a buongo?
4 Bua kupeta meji adi afumina ku dilongesha dia Nzambi, bidi bikengela kutumika muetu muonso ne makole etu a kuela meji, tshipedi tshietu tshia kudi Nzambi. Kudi mushindu wa kuenza nanku bualu buongo bua muntu budi ne bukole bua dikema. Bua bualu ebu, mukanda wa The Incredible Machine udi wamba ne: “Nansha ordinatere idi mipite bukole idibu mua kuenza, mmishadile bikole pa kuyifuanyikija ne bitupa bidi bienza buongo bua muntu ne mbabi yabu idi amu bu ikena nshikidilu—ngikadilu eyi mbulongolodi bupuangane ne bujalame budi bimanyinu bia nzembu bukumbaja. . . . Miliyo ya bimanyinu bidi bikenka mu buongo buebe ku musangu ne ku musangu bidi bifila mamanyisha mavule matambe. Bidi bimanyisha malu adi atangila bidi bipitakana mu mubidi webe ne a muaba udi mukunyunguluke: pa bidi bitangila kakaji-kakulu peshi kansansa ka muan’a-nkasa, mupuya mulenga wa kafé, anyi mineku ya mulunda webe kampanda. Bu mudi bimanyinu bikuabo bikuata mudimu ne bisunguluja mamanyisha, bidi bilela amue majinga, bivulukilu, ngenyi anyi bipatshila bidi bifikisha ku dipangadika kampanda. Mu tshitupa tshîpi, bimanyinu bidi bifumina mu buongo buebe bidi bimanyisha bitupa bikuabu bia mubidi webe tshidibi ne bua kuenza: kunyungisha muan’a-nkasa, kunua kafé, kuseka, anyi pamu’apa kuandamuna ne bilela. Mu dîba dimue dimue adi, muanda uwudi kuyi nansha mumanya, buongo buebe budi bukuba mueyelu webe, bienji bia mashi ebe, luya lua mubidi webe ne midimu mikuabo ya bitupa biebe bionso bia mubidi idi ikengedibua. Budi butuma mikenji idi ilama mubidi webe mushindu mujalame nansha mudiku nshintulukilu misangu ne misangu muaba webe udi mukunyunguluke. Budi kabidi bupangadija majinga atshilualua.”—Dibeji dia 326.
5. Mu ngumvuilu wa Mifundu, meji ntshinyi?
5 Bushuwa, buongo bua muntu budi ne makokeshi a dikema, kadi mmunyi mutudi mua kutumika biakane ne tshieledi tshia lungenyi? Tòo, ki mpa kudibueja ne kasuki mu dilonga dia muakulu kampanda, dia malu a kale, dia science, anyi kufuanyikija ngikadilu idi isunguluja bitendelelu nansha. Tudi ne bua kutumika ne makole etu a kuela meji diambedi bua kupeta dilongesha dia Nzambi. Didi nkayadi dipetesha meji malelela. Kadi, meji malelela ntshinyi? Mu ngumvuilu udi mu Mifundu [Minsantu], muaku meji, udi ushindamena pa mmuenenu muimpe muibakila pa dimanya dijalame ne dijingulula dilelela. Meji adi atuambuluisha bua kutumika biakane dimanya ne lungenyi bua kujandula malu, kuepuka anyi kupengama njiwu, kuambuluisha bakuabo ne kukumbaja bipatshila. Mbimpe bua kumanya se: Bible udi usunguluja meji ne bupote ne butshimbakane—bitudi bushuwa ne bua kuepuka.—Dutelonome 32:6; Nsumuinu 11:29; Muambi 6:8.
Mukanda munene wa Yehowa
6. Bitualeja meji malelela, ntshinyi tshitudi ne bua kutumika natshi bimpe?
6 Meji a mu bulongolodi ebu mmavulangane miaba itudi. (1 Kolinto 3:18, 19) Mmushindu kayipu udi bulongolodi ebu buwule tente ne bilongelu ne biblioteke bidi ne mikanda miliyo ne miliyo! Mivule ya ku mikanda eyi mmifunda bua kulongesha muakulu, makumi, science, ne mamanya makuabu. Kadi, Mushidimunyi Munene mmufila mukanda udi mupita mikuabo mikanda yonso—Dîyi diende difundisha ku spiritu wende, Bible. (2 Timote 3:16, 17) Mukanda eu kawena mulelela anu padiwu wakula bua biena-bualu bu mudi bia mianda ya kale, jeografi, dilonga dia botanike (peshi malu adi atangila bukua-mitshi), kadi, ne kabidi padiwu udianjila kumanyisha malu atshilualua. Kupita apu, udi utuambuluisha bua kuikala ne nsombelu wa disanka ne muimpe mutambe bituadije mpindieu. Bushuwa, anu bu mudi balongi mu tshilongelu tshia bena mu bulongolodi ebu bakengela mua kutumika ne mikanda yabo, tudi petu ne bua kuibidilangana ne kutumika ne mukanda munene wa Nzambi bua kuleja meji malelela a muomumue ne a aba badi “balongeshibue kudi Yehowa.”—Yone 6:45.
7. Bua tshinyi udi ne bua kuamba se: dimanya dia mu lungenyi dia malu adi mu Bible ki ndikumbane?
7 Kadi, kuikala ne dimanya dia Bible dia mu lungenyi nkushilangane ne kuikala ne meji malelela ne kuenza malu mu diumvuangana ne dilongesha dia Nzambi. Tshilejilu: Mu siekele wa 17 B.B., muena katolike kampanda uvua ubikidibue ne: Cornelius van der Steen uvua musue kulua Jésuite, kadi kabakamuitaba bualu uvua muntu wa tshipindi anyi mutambe kuipidila. Manfred Barthel udi wamba mu mukanda wende wa Les jésuites (angl.) ne: “Komité musungula bua muanda eu wakamanyisha van der Steen ne: bavua badilongolole bua kumbusha tshilumbu tshia bule anu biakuataye Bible mujima ku muoyo. Muyuki eu kawuvua mua kusankisha bua kuwulonda bu van der Steen kayi mukumbaje dilomba edi dia tshinyangu.” Mmadikolela kayipu akenzaye bua kukuata Bible mujima ku muoyo! Bushuwa, kadi, kujingulula Dîyi dia Nzambi nkutambe ne kule kudikuata ku muoyo.
8. Ntshinyi tshiatuambuluisha bua kubabidila dilongesha dia Nzambi ne kuleja meji malelela?
8 Bituajinga bua kupeta bipeta bimpe bia ku dilongesha dia Nzambi ne bituajinga bua kupeta meji malelela, tudi tukengela dimanya dijalame dia Mifundu. Tudi kabidi ne bua kulombodibua kudi spiritu munsantu wa Yehowa, peshi bukole buenzeji. Ebi nebituambuluishe bua kulonga malelela muondoke, “malu muondoke a Nzambi.” (1 Kolinto 2:10) Nenku, tulongayi ne disuminyina dionso Mukanda wa Yehowa ne tusambila bua atulombole ku diambuluisha dia spiritu munsantu. Mu diumvuangana ne Nsumuinu 2:1-6, tuteye ntema ku meji, tuinamije mutshima wetu ku busunguluji, ne tubikile lungenyi. Tudi ne bua kuenza nunku anu bu badi bakeba biuma bisokoka, bualu anu pa kuenza nunku ke patudi mua ‘kujingulula ditshina dia Yehowa ne kupeta menemene dimanya dia Nzambi.’ Dikonkonona dia amue matshimuna ne bipeta bitu bifumina ku dilongesha dia Nzambi nedizangike dianyisha dietu bua meji adi Nzambi upetesha.
Dijingulula dia ku kakese ku kakese
9, 10. Ntshinyi tshivua Nzambi muambe mu Genese 3:15, ne ndijingulula kayi dijalame didi ne mêyi aa?
9 Dilongesha dia Nzambi didi ditshimuna pa kupetesha bena tshisamba tshia Yehowa dijingulula dia ku kakese ku kakese dia Mifundu. Tshilejilu, tuakalonga ne: Satana Diabolo, yeye ke wakakula mu budimi bua Edene pa kutumika ne nyoka ne kushiminyina Nzambi malu pambileye ne: Nzambi wakashima pakambaye ne: eu yonso uvua ne bua kudia tshimuma tshikandika uvua ne bua kupeta dinyoka dia lufu. Nenku, tudi bamone se: dibenga kutumikila Yehowa Nzambi diakabueja lufu kudi bantu. (Genese 3:1-6; Lomo 5:12) Kadi, nansha biobi nanku, Nzambi wakapetesha bukua-bantu ditekemena edi pakambilaye nyoka anyi Satana ne: “Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende. Nedikuboze ku mutu kuebe ne wewe neudisume ku tshikankanyi.”—Genese 3:15.
10 Mêyi aa avua ne bualu kampanda busokoka buvua ne bua kusokolodibua ku kakese ku kakese ku diambuluisha dia dilongesha dia Nzambi. Yehowa mmulongeshe tshisamba tshiende se: biangatshile ku kale, tshiena-bualu tshinene tshia Bible ndibingisha bumfumu buende ku mutu kua bionso ku butuangaji bua Dimiinu, ndelanganyi wa Abrahama ne Davidi udi ne bukokeshi bua Bukalenge mu bianza biende. (Genese 22:15-18; 2 Samuele 7:12, 13; Yehezekele 21:25-27) Mutushidimunyi wetu Munene mmutulongeshe ne: Yezu Kristo n’Dimiinu dia nzanzanza dia “mukaji,” anyi bulongolodi bua Nzambi mu bukua-bifukibua. (Galatia 3:16) Nansha muvua Satana mumubueje mu mateta kabukabu, Yezu wakashala anu ne muoyo mutoke—too ne ku lufu, disumibua dia Dimiinu ku tshikankanyi. Tudi kabidi balonge se: bantu 144 000 bapianyi diatshimue ba Bukalenge basungula mu bukua-bantu nebikale ne Kristo mu mudimu wa diboza mutu wa Satana, “nyoka wa ku tshibangidilu.” (Buakabuluibua 14:1-4; 20:2; Lomo 16:20; Galatia 3:29; Efeso 3:4-6) Mmushindu kayipu utudi tuleja dianyisha bua dimanya dia mushindu’eu dia Dîyi dia Nzambi!
Mu butoke bua Nzambi bua dikema
11. Bua tshinyi bidi mua kuambibua se: dilongesha dia Nzambi didi ditshimuna pa kubueja bantu mu butoke bua mu nyuma?
11 Dilongesha dia Nzambi didi ditshimuna bualu didi dibueja bantu mu butoke bua mu nyuma. Bushuwa, bena nkristo bela manyi a mu nyuma mbatokeshibue, bilondeshile dikumbana dia 1 Petelo 2:9: “Nuenu, nudi ‘tshisa tshisungula, bukalenge bua bakuidi, ditunga dinsantu, tshisamba tshidianjila kufunkuna bua kuikalatshi bumpianyi bua pa buabo, bua nuenu kumanyisha ngikadilu milenga’ ya eu wakanubikila ku mîdima bua kunubueja mu butoke buende bua dikema.” Lelu’eu, butoke ebu bua kudi Nzambi budi kabidi bukenkesha “musumba munene” udi utekemena kuikala ne muoyo wa kashidi mu mparadizu pa buloba. (Buakabuluibua 7:9; Luka 23:43) Bu mudi Nzambi ulongesha tshisamba tshiende, mêyi aa adi mu Nsumuinu 4:18 adi ajadika bulelela buawu: “Njila wa bantu bakane udi bu butoke budi buenda bukenka, budi buenda butoka ku kakese ku kakese too ne patamba munya kujalama.” Ndongoluelu eu wa dilongesha dia ku kakese ku kakese udi upelula dijingulula dietu dia dilongesha dia Nzambi, anu bu mutu balongi benda bakolesha dimanya diabo ku kakese ku kakese ku diambuluisha dia mushinga mukole dia kudi mulongeshi padibo balonga gramere, histware anyi dikuabo dilongesha.
12, 13. Dilongesha dia Nzambi didi dikuba tshisamba tshia Yehowa ku malongesha kayi a njiwu?
12 Ditshimuna dikuabo dia dilongesha dia Nzambi ndia se: didi dikuba aba badi badiakidila ne budipuekeshi buonso ku “malongesha a ba-demon.” (1 Timote 4:1) Ku lukuabo luseke, tangila bidi bienzeka mu bukua-buena-nkristo! Kale, mu 1878, John Henry Newman muepiskopo wa Ekleziya Katolike wa bena Roma wakafunda ne: “Nanku, bu muvuabo bamanye se: buena-nkristo buvua ne bukokeshi bukole bua kutantamena buenzeji bubi, ne bua kushintulula biamu bia mudimu ne bintu pamue ne bienzedi bidi bisuikakaja ku ntendelelu wa ba-demon bua midimu ya evanjeliyo, . . . kutuadijila ku bikondo bia kumpala, bakokeshi ba ekleziya bavua bamane kudiakaja, pavua mushindu upeteka bua kuitaba, kuidikija anyi kufila manyoka pa bidi bitangila bilele ne bibidilu bivua kudi bantu ba tshianana, bia muomumue ne filizofi ya kasumbu ka bamanyi ba mukanda.” Newman wakasakidila ne: bintu bia mushindu’eu bu mudi mâyi mabenesha, bilamba bia badiambike ne bimfuanyi “bionso mbifumine kudi bampangano, bivuija binsantu ku dianyishibua diabi mu ekleziya.” Bena tshisamba tshia Nzambi mbuwule tente ne dianyisha bualu dilongesha dia Nzambi didi dibakuba ku butontolodi bua mushindu’eu. Didi ditshimuna mishindu yonso ya malongesha a ba-demon.—Bienzedi 19:20.
13 Dilongesha dia Nzambi didi ditshimuna malongesha a mashimi a bitendelelu [bikuabo] mu mishindu yonso. Tshilejilu, bu mutudi balongeshibue kudi Yehowa, katuena tuitabuja Busatu-Bunsantu, kadi tudi bamanye se: Yehowa ke udi Mutambe Bunene, Yezu Kristo m’Muanende, ne spiritu munsantu m’bukole bua Nzambi buenzeji. Katutu tutshina kapia ka inferno, bualu tudi bajingulule se: mu Bible, inferno n’lukita mudi bukua-bantu baya. Ku lukuabo luseka, batendeledi ba dishima badi bamba ne: anyima wa muntu katu ufua, kadi tuetu tudi bamanye se: bafue ki mbamanye bualu nansha bumue to. Tudi mua kutela malelela bungi buvule atudi bapete ku dilongesha dia Nzambi. Ndiakalenga kayipu dia kuikala bapikudibue ku bupika bua mu nyuma bua kudi Babilone Munene, nsangilu wa pa buloba bujima wa bitendelelu bia dishima!—Yone 8:31, 32; Buakabuluibua 18:2, 4, 5.
14. Bua tshinyi basadidi ba Nzambi badi ne bua kutungunuka ne kuenda mu butoke bua mu nyuma?
14 Bu mudi dilongesha dia Nzambi ditshimuna malongesha a dishima a mu bitendelelu [bikuabo], didi diambuluisha basadidi ba Nzambi bua kuenda mu butoke bua mu nyuma. Bushuwa, badi bumvua dîyi mu nyima muabu dibambila ne: “Ke njila eu. Endelayimu, nuenu bantu.” (Yeshayi 30:21) Dilongesha dia Nzambi didi kabidi dikuba bamusadidi bende ku ngelelu ya meji ya dishima. Pavua “bapostolo ba dishima” bajula tshimvundu mu tshisumbu tshia ku Kolinto, mupostolo Paulo wakafunda ne: “Bia mvita bietu kabiena bia mubidi, kadi bidi bikole bualu bua Nzambi bua kushimbula ngumbu. Bualu tudi tushimbula ngelelu ya meji ne tshintu tshionso tshidi tshidibandisha ne tshitombokela dimanya dia Nzambi; ne tudi tukuata ku bupika lungenyi luonso bua kulufikisha ku ditumikila Kristo.” (2 Kolinto 10:4, 5; 11:13-15) Ngenyi idi mishilangana ne dilongesha dia Nzambi mmishimbudibue kudi dishidimuna didi difidibua ne lutulu mu tshisumbu ne ku dimanyisha dia lumu luimpe kudi bantu ba pambelu.—2 Timote 2:24-26.
Kutendelela ne spiritu ne bulelela
15, 16. Kutendelela Yehowa ne spiritu ne bulelela kudi kumvuija tshinyi?
15 Bu mudi mudimu wa dimanyisha Bukalenge [bua Nzambi] wenda ulubuluka, dilongesha dia Nzambi didi ditshimuna pa kuleja badipuekeshi mushindu wa kutendelela Nzambi “ne nyuma ne bulelela.” Ku tshiina tshia Yakoba, pabuipi ne tshimenga tshia Sishare, Yezu wakambila mukaji muena Samariya ne: yeye uvua mua kufila mâyi adi apetesha muoyo wa tshiendelele. Pavuaye wakula bua bena Samariya, wakasakidila ne: “Nudi nutendelela tshinudi kanuyi bamanye . . . Dîba nedilue, ne mmpindieu mene, dikala batendeledi balelela ne bua kutendelela Tatu ne nyuma ne bulelela, bualu, bushuwa, Tatu udi ukeba bantu ba mushindu’eu bua kumutendelela.” (Yone 4:7-15, 21-23) Pashishe, Yezu wakadimanyisha bu Masiya.
16 Kadi, mmunyi mutudi mua kutendelela Nzambi ne spiritu? Mpa kumutendelela ne musangelu ne mutshima wa disakidila muwule tente ne dinanga bua Nzambi diibakila pa dimanya dijalame dia Dîyi diende. Tudi mua kumutendelela ne bulelela pa kulekela mashimi a bitendelelu bikuabo ne pa kuenza disua diende, anu bu mudidi disokolola mu mukanda munene wa Yehowa.
Didi ditshimuna mateta ne bulongolodi ebu
17. Mmunyi muwudi mua kufila tshijadiki tshia se: dilongesha dia Nzambi didi diambuluisha basadidi ba Yehowa bua kuakamangana ne mateta?
17 Padi tshisamba tshia Nzambi tshiakamangana ne mateta, dilongesha dia Nzambi didi ditshimuna amu kutshimuna. Nenku, mu Kabitende 1939, dîba diakabudika Mvita Mibidi ya pa buloba bujima, basadidi ba Yehowa bavua bakengela bujinguludi bua pa buabu pa malu adi mu Mukanda wende munene. Diambuluisha dinene divua dia kudi tshiena-bualu tshiakapatuka mu Tshibumba tshia Nsentedi tshia mu dia 1 Kasuabanga 1939 (angl.), tshivua tshileja patoke dilongesha dia Nzambi didi diakula bua nsombelu wa bena nkristo wa ndubidila. (Yone 17:16) Bia muomumue, ku ntuadijilu wa bidimu bia 1960, biena-bualu bia mu Tshibumba tshia Nsentedi bivua biakula bua ditumikila didi ne mikalu dia “bakokeshi badi ku mutu” biakambuluisha basadidi ba Nzambi bua kutumikila dilongesha dia Nzambi nansha munkatshi mua nsangilu wa bantu bena tshimvundu.—Lomo 13:1-7; Bienzedi 5:29.
18. Mmunyi muvua bantu bavua badiamba muvuabu bena nkristo ba mu siekele wa kumpala ne muibidi B.B. bangata dijikija lutetuku dibi, ne pa muanda eu, ndiambuluisha kayi didi dilongesha dia Nzambi ditupetesha lelu’eu?
18 Dilongesha dia Nzambi didi dituambuluisha bua kutshimuna matetshibua, bu mudi dikeba dijikija lutetuku dibi. Mona tshivua tshiambibua kudi bantu ba mu siekele muibidi ne muisatu mu bikondo bietu ebi bavua badiamba muvuabo bena nkristo. Tertullien wakafunda ne: “Ludimi luetu, mêsu etu ne matshi etu kabiena biumvuangana ne bupale bua mu tshipalu tshia manaya, ne tshiendenda tshia mu Nzubu wa teyatre, ne tshikisu tshia mu tshipalu.” Mufundi mukuabu wa mu tshikondo atshi wakebeja ne: “Ntshinyi tshidi muena nkristo muena lulamatu wenza mu miaba mibi ya dijikija lutetuku ya nanku, yeye udi kayi nansha ne bua kuela meji ku malu mabi? Ndisanka kayi didiye upeta pa kutangila manaya a malu a bundu?” Bafundi aba bavua ne muoyo bidimu bungi kampanda kunyima kua bena nkristo ba mu siekele wa kumpala, bavua bapiisha manaya mabi a dijikija lutetuku. Lelu’eu, dilongesha dia Nzambi didi ditupetesha meji adi akengedibua bua kuepuka manaya a dijikija lutetuku a bundu, a masandi ne a tshikisu.
19. Mmunyi mudi dilongesha dia Nzambi dituambuluisha bua kutshimuna bulongolodi ebu?
19 Pa kuenza malu mu diumvuangana ne dilongesha dia Nzambi, tudi tupeta mushindu wa kutshimuna bulongolodi buine bua malu. Eyowa, kutumikila dilongesha dia Mutushidimunyi wetu Munene kudi kutuambuluisha bua kutshimuna buenzeji bubi bua bena mu bulongolodi ebu, badi ku bukokeshi bua Satana. (2 Kolinto 4:4; 1 Yone 5:19) Efeso 2:1-3 udi wamba ne: Nzambi wakatupingajila muoyo, nansha mutuvua bafue mu bilema bietu ne mpekatu yetu, patuvua tuenda bilondeshile mfumu wa bukokeshi bua kapepa. Tudi tuela Yehowa tuasakidila bualu dilongesha dia Nzambi ndituambuluishe bua kutshimuna bijingajinga bia mu bulongolodi ebu ne ngenyi idi ufumina kudi muluishi wetu nende—mushimianganyi wa dilambu, Satana Diabolo!
20. Nnkonko kayi idi miakanyine dikonkononyibua musangu walonda?
20 Nenku, mbimueneke patoke se: dilongesha dia Nzambi didi ditshimuna mu mishindu mivule. Bua bualu ebu, mbimueneke se: mbikole bua kutela matshimuna adi wonso. Didi ne buenzeji kudi bantu pa buloba bujima. Kadi, ntshinyi tshididi dienza buebe wewe? Mmunyi mudi dilongesha dia Nzambi ne buenzeji pa nsombelu webe?
Nntshinyi tshiuvua mulonge?
◻ Mmunyi mudi meji malelela mua kumvuijibua?
◻ Ntshinyi tshivua Nzambi musokolole ku kakese ku kakese pa bidi bitangila Genese 3:15?
◻ Mmunyi mudi dilongesha dia Nzambi ditshimuna mu malu a mu nyuma?
◻ Kutendelela Nzambi ne spiritu ne bulelela kudi kumvuija tshinyi?
◻ Mmunyi mudi dilongesha dia Nzambi diambuluisha basadidi ba Yehowa bua kutshimuna mateta ne bulongolodi ebu?
[Bimfuanyi mu dibeji 10]
Yezu wakashala ne muoyo mutoke too ne ku lufu—disumibua dia Dimiinu ku tshikankanyi