Nkonko ya babadi

Nzambi wakadimuija Kaina ne: ‘mpekatu uvua mumualamine ku tshibuelelu, ne dijinga diende divua kudiye,’ mbienza amu bu ne: nyama wa luonji udi mualamine nyama kampanda wa kudiaye. (Genese 4:7) Bua tshinyi kutumika ne ngakuilu wa mushindu’eu bualu nyama ivua idia amu bisosa kumpala kua mvula wa kabutu?

Mu mikanda ivua Mozese mufunde, tudi tupetamu mvese ya bungi mikale ne malu adi mua kumueneka se: ki mmakumbana mua kuikala mu mianda ya kale.

Tshilejilu, bualu budi mu Genese 2:10-14 budi bufila malu masunguluke pa bidi bitangila muaba uvua budimi bua Edene. Mozese wakafunda ne: musulu umue “udi uya ku luseke lua ditunga dia Assyrie kudi dîba dipatukila.” Kadi, dîna dia ditunga dia Assyrie ndifumine ku dîna dia Assur, muana wa balume wa Sem uvua muledibue kunyima kua mvula wa kabutu. (Genese 10:8-11, 22; Yehezekele 27:23; Mika 5:6) Mbimueneke patoke se: mu miyuki yende mijalame milombola kudi spiritu, Mozese wakatumika patupu ne dîna “Assyrie” bua kufunkuna tshitupa tshia buloba tshivua babadi bende bamanye bimpe.

Tangila tshilejilu tshikuabo mu nshapita ya ntuadijilu ya Genese. Kunyima kua Adama ne Eva bamane kuenza mpekatu ne bipatshibue mu budimi, Yehowa wakabapangisha bua kupinganamu. Mmu mushindu kayi? Genese 3:24 udi wamba ne: “Wakipata muntu, e kutekaye ku luseke lua budimi bua Edene lua kudi dîba dipatukila bakeluba ne muele wa mvita ukenka ne kadilu, muikale unyunguluka misangu yonso bua kulama njila wa ku mutshi wa muoyo.” Tangila, “muele wa mvita ukenka ne kapia.” Nzambi ke wakenza miele ya mvita anyi?

Katuena mua kufila nkomenu wa se: Mufuki wetu wa dinanga ke ntunga-mulongo mu dienza dia miele ya mvita nansha. Adama ne Eva bavua bamona tshintu tshinyunguluka kumpala kua banjelo tshikale tshikenka. Tshivua tshinyi menemene? Dîba diakafunda Mozese mukanda wa Genese, miele ya mvita ivua mimanyibue bimpe ne bavua bakuata nayi midimu mu mvita. (Genese 31:26; 34:26; 48:22; Ekesode 5:21; 17:13) Pa nanku, miaku ya Mozese eyi “muele wa mvita uvua ukenka” ivua yambuluisha babadi bende bua kudifuanyikijila bunene bua tshintu tshivua ku tshibuelelu tshia Edene. Malu a mu tshikondo tshia Mozese adi ambuluisha dijingulula malu a mushindu’eu. Ne mfundilu uvua Mozese mutumika nende uvua ne bua kuikala mujalame, bualu Yehowa wakamulamisha mu Bible.​—2 Timote 3:16.

Mpindieu, netuambe tshinyi bua bidi bitangila Genese 4:7? Apa, Nzambi uvua udimuija Kaina: “Wewe mutuadije kuenza malu mimpe, kuakutumbishibua anyi? Kadi, wewe kuyi muenze malu mimpe, mpekatu mmukualamine ku tshibuelelu, ne dijinga diebe didi kudiye; ne buebe wewe, neumutshimune anyi?” Amu bu mutukadi bamanyishe, mfundilu eu udi bu udi uleja tshimfuanyi tshia nyama wa luonji muikala ne nzala ya kavuambu muzonzame bua kutumpikila bua kukuata ne kudia nyama mukuabo.

Kadi, Bible udi uleja patoke ne: Adama ne Eva bavua basombe mu ditalala pamue ne nyama yonso. Bimue bia ku bifukibua bivua mu disanka pepi ne bantu. Mikuabo ivua nyama ya tshisuku, mikale isomba kule ne bantu. (Genese 1:25, 30; 2:19) Kadi, Bible kêna uleja ne: nyama ivua ibunda nyama nayi anyi bantu to. Ku tshibangidilu, Nzambi wakapesha bantu ne nyama bisosa bu biakudia. (Genese 1:29, 30; 7:14-16) Bualu ebu kabuakashintuluka nansha too ne kunyima kua mvula wa kabatu, amu bu mudi Genese 9:2-5 ujadika.

Nenku, netuambe tshinyi bua didimuija dia Kaina kudi Nzambi, amu bu mutudi tubala mu Genese 4:7? Bushuwa, tshimfuanyi tshia nyama wa luonji muzonzame, muikale pepi ne kudiela pa nyama mukuabo tshivua tshipepele bua kumvua mu tshikondo tshia Mozese, ne ke mutudi petu tutshijingulula. Nenku, Mozese wakatumika ne mfundilu uvua babadi bende ba kunyima kua mvula wa kabutu bamanye bimpe. Ne nansha muvua Kaina kayi muanji kumona tshifukibua tshia mushindu’eu, uvua amu mua kujingulula didimuija divua difuanangana ne dijinga dia bubi divua munda muende bu dia myama wa luonji muikale ne nzala ya kavuambu.

Bulelela, malu manene adi mua kulomba ntema yetu ng’owu aa: buimpe bua Nzambi mu didimuija Kaina, mushinga wa kuitaba mubelu ne budipuekeshi buonso, mushindu udibi bipepele bua lubabu kunyangalu muntu, mushindu muimpe utudi ne bua kutumikila madimuija makuabo a Nzambi adi mu Mifundu.​—Ekesode 18:20; Muambi 12:12; Yehezekele 3:17-21; 1 Kolinto 10:11; Ebelu 12:11; Yakobo 1:14, 15; Yuda 7, 11.