TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • w94 15/8 dib. 5-7
  • Mushindu udi lumu luimpe lubulula mêsu

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Mushindu udi lumu luimpe lubulula mêsu
  • Tshibumba tshia Nsentedi tshidi tshimanyisha Bukalenge bua Yehowa—1994
  • Tumitu tua bualu
  • Bintu bia muomumue
  • Kutshimuna bufofo bua mu nyuma
  • Diondopibua dimuepele dia kashidi​—Bukalenge bua Nzambi
  • Disanka mu bulongolodi bupiabupia bua Nzambi
  • Ambuluisha bampofu bua balonge malu a Yehowa
    Mudimu wetu wa Bukalenge—2015
  • Nditekemena kayi didiku bua bafofo?
    Tshibumba tshia Nsentedi tshidi tshimanyisha Bukalenge bua Yehowa—1994
  • Bafalese badi bakokangana ne muntu uvua mpofu
    Yezu udi njila ne bulelela ne muoyo
  • Yezu udi wondopa muntu uvua mulela mpofu
    Yezu udi njila ne bulelela ne muoyo
Tangila bikuabu
Tshibumba tshia Nsentedi tshidi tshimanyisha Bukalenge bua Yehowa—1994
w94 15/8 dib. 5-7

Mushindu udi lumu luimpe lubulula mêsu

“DIULU ki ndifikuluke kakese bualu mufofo kêna mua kudimona to,” ke mudi kasumuinu ka bena Danemark kamba. Kadi mu nsombelu wetu wa matuku wonso, tutu tumona ne diulu ndifikuluke bu mudidi anyi? Tutu tumona matuku atshilualua ne dieyemena dionso anyi? Tutu tuitaba menemene lumu luimpe ludi Bible, Dîyi dia Nzambi, utuleja anyi?

Mu tshiena-bualu tshishale, tuvua bakonkonone mishindu ya bufofo buena dîna. Tukonkononayi mpindieu lumonu ludi ne mushinga mukole mutambe. Ndusuikakaja ku diakalenga dietu dia kashidi ne ditekemena bua banangibue betu.

Kakuyi mpata, tudi tuakamangana ne “bikondo bikole ne bia ntatu.” (2 Timote 3:1) Tshidi tshienzeka ntshinyi padi bantu baluangana bua kupeta nsombelu muimpe, kunanukila ntatu ya makanda a mubidi ne ya mu dîku, ne kutantamena dipanga buakane ne dipangika dia dinanga mu bantu? Bidi bia luse bualu bavule badi bamona se: dieyemena bantu nabo, bitendelelu, ne mbulamatadi didi dienda dikepela. Pa kusunguluja se: kakuena mushindu nansha mukese wa kuyijikija, bamue badi bakomesha se: ntatu yabo kayakujikibua mu mushindu muimpe to. Mu tshikandakanda tshia mu Brezile tshia Jornal da Tarde, Jacob Pinheiro Goldberg udi uleja ne: “Bantu, padibu bapetangana ne nsombelu mikole, badi bumvua batapibue kudi ntupakanyi mu mushindu wa se: bidi bibafikisha ku dipanga kuela meji malongame, ne ku dieyemena ntendelelu midingianganyi.” Kadi, nansha padi malu aya bibi, bidi bitukengela kuela meji bimpe, ki mmuomu’anyi?

Anjibi kuela meji ne: udi ukengela nzubu bua dîku diebe ne udi ne mfranga mikumbanyina mushinga kayi wonso udibo mua kulomba. Imue misangu udi unyunguluka ne ukumbula nzubu mishilangane mu bitupa bishilashilangane bidi pabuipi. Nansha bikala bakebedianganyi ba kalanda musenga ba nzubu ya difutshila ne disumba bateta mua kutuisha dijinga diebe, nzubu udi mu mutu muebe kêna upeteka to. Kadi, bu mudi disankishibua ne nsombelu muimpe bia dîku diebe bisuikakaja ku muanda eu, kuena ulekela to, ki mmuomu anyi? Mpindieu fuanyikija disanka paudi, ndekelu wa bionso ufika ku dipeta nzubu wa mu meji ebe.

Amu bu muuvua mupitshisha dîba bua kukeba nzubu mupiamupia, bua tshinyi kubenga kukonkonona Bible bua kumanya mushindu wa kujikija ntatu yebe? Anu bu mutudi ne bua kutshintshikila malu patudi tuangata mapangadika bua nzubu, bia muomumue tudi ne bua kuela meji bimpe pa bitudi tubala mu Dîyi dia Nzambi. Dimona ne ditaba bulelela bietu pa bidi bitangila Yehowa Nzambi ne Yezu Kristo bidi ne mushinga kupita ne kule dipeta dia nzubu. Yezu wakamba ne: “Etshi tshidi tshiumvuija muoyo wa kashidi: balonge mua kukumanya, wewe, Nzambi umuepele mulelela, ne eu uudi mutume, Yezu Kristo.”​—Yone 17:3, NW.

Kadi bikala mukenji wa Bible muikale ne mushinga nunku, bua tshinyi bantu bavule mbashale amu bafofu ku lumu luimpe luawu? Nansha mudibi mua kukemesha ba bungi, kamue kabingila kadi ka se: “bena mu bulongolodi ebu buonso badi ku bukokeshi bua mubi.” (1 Yone 5:19, NW) Bu tshipeta, Satana Diabolo “mmufofomije tshieledi tshia lungenyi tshia badi babule ditabuja, bua kabakenkeshibu kudi butoke bua lumu luimpe lua butumbi ludi lutangila Kristo, udi tshimfuanyi tshia Nzambi.” (2 Kolinto 4:4, NW) Nansha mutudi tumona ne mêsu etu, buongo ke budi busunguluja bukenke budi bubuela mu dîsu. Ke bualu kayi, kuikala mpofo kudi kabidi kumvuijibue bu kupanga mushindu anyi dijinga dia kujingulula anyi kuela meji.” Ebi bidi bituvuluija kasumuinu kadi katamba kumanyika kudi bavule: “Kakuena bafofo bu aba badi kabayi basue kumona.”

Bu mudi mpofu kayi mua kumona tshidi kumpala kuende, udi mua kuikala mu njiwu mikole. Bufofo buena dîna bua ba bungi kabuena mua kutshimunyibua mpindieu to, kadi muntu nansha umue kêna muenzejibue bua kushala mpofo mu nyuma nansha.

Kutshimuna bufofo bua mu nyuma

Anu bu mudi nsombelu mubi wa mankenda a muaba utudi mua kutekesha lumonu, nsombelu munyanguka udi utunyungulula udi mua kufikisha ku bufofo bua mu bikadilu bilenga. Kusakidila apu, Yezu Kristo wakadimuija bua malongesha ne bilele bia bantu. Wakumvuija patoke bua balombodi ba bitendelelu ba mu bidimu abi bavua bapambula tshisumbu tshia tshisumbu tshiabo tshia mikoko ne: “Badi balombodi bafofo. Bialombola mufofo munga mufofo, bubidi buabo nebahone mu dina.”​—Matayo 15:14.

Pamutu pa kushimibua mu nyuma kudi balombodi bafofo, ndisanka kayipu didi nadi aba badi babulula mêsu abo ku lumu luimpe lua Bukalenge bua Nzambi! Yezu wakamba ne: “Nakuluila ha buloba bua kulumbuluisha bantu, badi kabai bamona bamone.” (Yone 9:39) Kadi, mmushindu kayi udi bafofo ba mu nyuma mua kufika ku dimona? Ee, tutungunukayi ne kukonkonona bufofo buena dîna.

Bintu bishilangane bidi biambuluisha bena lumonu lukepele bidiku lelu’eu. Kabivua anu nunku to. Madikolela malelela kaavua enjibua bua kuambuluisha bafofo kumpala kua diteka kalasa ka pa buaku ka bafofo kudi Valentin Haüy mu 1784 to. Kunyima, Louis Braille wakapatula ndongeshilu mupiamupia udi ubikidibua mu dîna diende; wakenza nenku bua kuambuluisha bena lumonu lukepele bua kubala.

Kadi netuambe tshinyi bua bufofo bua mu nyuma? Mu bidimu bidi panshi ebi, madikolela mavule mmenza bua kuamba lumu luimpe too ne mu bitupa bia kulekule bia buloba. (Matayo 24:14) Bantemu ba Yehowa badi ne disanka dia kutuadila bafofo bena dîna ne ba mu tshimfuanyi ditekemena.

Mukaji kampanda muena ditunga dia Brésil wakafunda ne: “Ndi musue kuamba ne: nansha mundi ne tshilemende tshia ku mubidi, ndi mua kumona​—mu nyuma. Nnzambi kayipu wa dikema! Tudi ne disanka bua kumanya ne: ‘Yehowa neabulule tshianza tshiende ne neakumbaje dijinga dia tshintu tshionso tshidi ne muoyo.’” (Musambu wa 145:16, NW) Ne Jorge udi mufofo muena dîna udi uvuluka ne: “Muoyo wanyi mmutapulula bimpe mu bitupa bibidi: kumpala ne kunyima kua Bantemu. . . . Ku diambuluisha diabu, ngakatuadija kumona mu lungenyi buloba ne butoke buonso ne bukenke. Ndi ndabula malanda masheme ne muntu yonso mu tshisumbu.” Bidi bia disanka divule, bualu Bible udi utupesha dishindika dia se: mu tshitupa tshîpi muntu nansha umue pa buloba kakuikala mpofo​—muena dîna anyi wa mu nyuma. Nebienzeke munyi? Mmunyi muajadikibuabi bilelela pa buloba bujima ne: “Yehowa udi ubulula mêsu a bafofo”?​—Musambu wa 146:8, NW.

Diondopibua dimuepele dia kashidi​—Bukalenge bua Nzambi

Nansha mudiku divulangana dia dimanya mu malu a luondapu, musumbasumba wa masama utshidi anu ukebesha bufofo, bisama, ne lufu. Nunku, ntshinyi tshidi tshikengedibua bua kujikija didia dibi, nsombelu mibi ya mankenda, ne bisama bidi bijimija lumonu ne disanka dia kuikala ne muoyo? Diondapa dia Yezu dia bafofo ne bakuabo bena masama divua tshilejilu tshikese tshia [muenzaye] matuku atshilualua. Bia disanka, dilongesha ne mudimu wende wa diondapa bivua mundidimbi wa mabenesha alabajibua pa buloba muinshi mua mbulamatadi wa Bukalenge bua Nzambi.

Diondapa dialabajibua pa buloba bujima dikadi pabuipi.a Programme eu wa diondapa dia Nzambi mmuleja bimpe bitambe kudi mupostolo Yone: “Yeye kundeja musulu wa mâyi a muoyo, matoke bu kristale, apatukila ku nkuasa wa bumfumu wa Nzambi ne wa Muan’a mukoko apueka munkatshi mua musesu munene wa tshimenga. Ne dia munemu dia musulu ne dia muamua kuvua mitshi ya muoyo ikuama manowa dikumi ne abidi a bimuma, ikuama bimuma biayi ku ngondo wonso. Ne mabeji a mitshi avua bua diondapibua dia matunga.”​—Buakabuluibua 22:1, 2, NW.

Biambilu bu mudi “mâyi a muoyo” ne “mitshi ya muoyo” bidi bileja se: kunyima kua bulongolodi bubi bua lelu’eu bumane kupita, bintu bia luondapu bia Bukalenge bua Nzambi nebifikishe bukua-bantu ku kakese ku kakese ku bupuangane. Bushuwa, bulengele bua tshia-bupikudi tshia mulambu wa Yezu (ne difuidibua luse dijima dia mpekatu), pamue ne dimanya Yezu Kristo ne Tatuende, nebifile makanda a mubidi mapuangane ne muoyo wa kashidi.​—Yone 3:16.

Disanka mu bulongolodi bupiabupia bua Nzambi

Nanku, fuanyikija buloba kamuyi dibunda bibawu, dinyanguka dia kapepa ne mâyi, anyi bupele. Mona mu lungenyi dîku diebe dikale ne muoyo mu ditalala mu Mparadizu muasulula. (Yeshaya 32:17, 18) Ndisanka kayipu dia kumona mishindu mishilashilangane ya mêkala ne tshieledi tshia lungenyi ne biumvuidi bipuangane!

“Nsombelu wa ku tshifukilu wa muntu udi wa kuikala ne muoyo muaba udi dishintuluka​—dia bukenke, mêkala ne mmuenekelu. Mu bufuki kamuena tshintu tshia mushindu umue umue nansha,” ke muvua Faber Birren wamba. “Dîkala ntshimue tshia ku bifidi bia masanka bia ku tshifukilu bia pa buloba. Mmukenji wa ku tshifukilu, udi umueneka miaba yonso, ne tshitupa tshinene tshia nsombelu muimpe ntshikuatakaja kudidi.”

Mmushinga kayipu udi nawu dipa dia lumonu! Nebikale disanka kayipu pikala mêsu avua umue musangu mafofome​—ku dîna anyi mu nyuma—​amona!

Bushuwa, mu Mparadizu muasulula walua, bufofo ne bikuabo bilemende kabiakufila kabidi dibungama nansha! Muntu nansha umue kakupambushibua kabidi to. Bu muavula dinanga dilelela, bantu buonso nebatokeshibue mu nyuma. Abi, ne bikuabu bivule, bikadi pa kuenzeka, kadi mpindieu ke dîba dia kukeba dianyishibua kudi Eu wakumbaja mulayi wende wa buprofete eu ne: “Mu dituku adi mesu a mufofo neatabale”!​—Yeshaya 35:5.

[Mêyi adi kuinshi]

a Suaku ukonkonone bijadiki bileja mu mukanda wa Udi mua kuikala ne muoyo wa kashidi pa buloba bukudimuna mparadizu, nshapita wa 18, mupatula kudi Watchtower Bible and Tract Society of New York, Inc.

[Tshimfuanyi mu dibeji 7]

Mu dituku adi mesu a mufofo neatabale!

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu