Bua tshinyi Bantemu badi batungunuka ne kukumbulangana?

‘MBOBUABU kabidi! Kadi’s bavu’apa kukadi anu mbingu mikese tshianana!’ Patu umue wa ku Bantemu ba Yehowa ukukumbula, ke mutubi bikuluila mu mutu muebe anyi? Bantu miliyo ne miliyo lelu’eu badi bakumbudibua pa tshibidilu kudi Bantemu ba Yehowa. Udi pamu’apa mua kudiebeja ne: bua tshinyi badi basuminyina, pabu mbamanye ne: bantu ba bungi badi ne biabo bitendelelu anyi kabatu basankidila bulelela? Lukonko alu ndukumbanyine diandamuna.

Bujitu kumpala kua Nzambi

Bantemu ba Yehowa mbalonge mu Mifundu ne: kubangila mu 1914, tshidimu tshivua Mvita ya Kumpala ya pa Buloba bujima mituadije, mianda ya pa buloba idi yenda ikumbaja milayi ya mu Bible idi itangila nshikidilu wa ndongoluelu wa bulongolodi ebu ne nkokeshilu wa Bukalenge bua Nzambi bualua pa buloba. Siekele bu umue wa tshinyangu, diela mashi panshi, ne lukuna mmumueneshe ne: mianda ya tshididi ki mmijikija ntatu ya bantu to. Mvita ne ditshingishangana bitshidi anu bitatshisha dîku dia bantu ntshijadiki tshia se: bukokeshi bua bantu mbupangile kushintulula mitshima, ngenyi, ne mmuenenu bia bantu. Nkinu mikole pa mianda ivua mienzeke kale mu malu a bantu itshidi anu ne buenzeji bubi pa malanda munkatshi mua bisa, mêkala a makoba ne bitendelelu. Bidi nanku mu miaba ya kulekule bu mudi ku Afganistan, Afrike wa ku Sud, Azi wa Moyen Orient, Inde, Irlande wa ku Nord ne Yougoslavie wa kale. Nunku, dijikija ntatu dimuepele dia kashidi ndiepi?

Ntshinyi tshitu tshisaka Bantemu?

Bantemu ba Yehowa mbajadike ne: dijikija dia ntatu dia Nzambi​—Bukalenge buende bulaya bukokesha kudi Yezu Kristo—​ke diandamuna didi dikumbane. Yezu muine uvua muela dilomba dia bukokeshi bua Bukalenge ebu mu disambila dia tshitembelu didi ditambe kumanyika: “Nuenu sambilayi nenku: ‘Tatu wetu udi mu diulu, dina diebe ditumbe. Bumfumu buebe bufike; biudi musue bienzeke pa buloba, bu midibio bienzeka mu diulu.’” Bantemu badi bitabuja ne: disambila edi didi dilomba bushuwa dibuela dia Nzambi [nkayende] mu malu a bantu.​—Matayo 6:9, 10, Mukenji Mulenga.

Nenku bua bualu ebu, Bantemu ba Yehowa badi bumvu’anu dikengedibua dia kuya ku nzubu ne ku nzubu pa tshibidilu bua kumanyisha mukenji eu? Bua mêyi-matuma abidi avua Yezu muzangike: “‘Udi ne bua kunanga Yehowa, Nzambi webe, ne mutshima webe wonso, ne anyima webe wonso ne lungenyi luebe luonso.’ Atshi ke dîyi ditambe bunene ne dia kumpala. Mona diibidi, didi difuanangane nadi: ‘Udi ne bua kunanga muntu nebe bu mûdi mudinange.’”​—Matayo 22:37-39, NW.

Bantemu mbasue dibenesha dia Nzambi buabu nkayabo, ne bu mudibo banange bantu nabo, mbasue bia muomumue bua bantu nabo badipete pabo. Nunku, pa kulonda tshilejilu tshia Yezu, badi badiumvua benzejibue kudi dinanga dikena bia kasombela bua kukumbula bantu nabo. Mbasue kubapetesha mushindu wa kumanya tshivua “Nzambi wa disanka” mulaye bukua-bantu badi bamutumikila pa buloba bukezula.​—1 Timote 1:11; 2 Petelo 3:13.

Misionere muena nkristo Paulo uvua witabuja milayi ya Nzambi ne bua nunku wakafunda ne: “Paulo, mupika wa Nzambi ne mupostolo wa Yezu Kristo bua ditabuja dia basungula ba Nzambi ne dimanya dijalame dia bulelela didi diumvuangana ne kanemu ka Nzambi pa tshishimikidi tshia ditekemena dia muoyo wa tshiendelele udi Nzambi, udi kayi mua kushima, mulaye kumpala kua bikondo bilebile.” Bushuwa, Nzambi, “Udi kayi mua kushima,” “mmulaya” muoyo wa kashidi kudi aba badi bakeba ne budipuekeshi buonso bua kumumanya ne kumusadila.​—Tito 1:1, 2; Sefanya 2:3.

Bantemu batu bafutshibua anyi?

Imue misangu bamue batu bela meji ne: Bantemu badi bafutshibua bua mudimu wabo. Kabitu nanku to. Badi bangata ne mushinga muvule miaku ya Paulo kudi tshisumbu tshia ku Kolinto ne: “Katuena bapanyishi ba dîyi dia Nzambi bu mudi bantu bavule, kadi ne muoyo mutoke, bushuwa, bu batumibue kudi Nzambi, ku mêsu kua Nzambi, ne Kristo, tudi tuakula.”​—2 Kolinto 2:17, NW.

Bamue balombodi ba bitendelelu badi balongesha bua kupeta mfranga, nansha biobi bikale difutu dia midimu ya mu tshitendelelu anyi bua kutungunuja kumpanyi ya bungenda ku malongesha abo a ku televizion. Bitendelelu bia bungi bidi ne balombodi badi bafutshibua.

Bishilangane, Bantemu ba Yehowa kabena ne bamfumu badi bafutshibua to, ne mene mikanda yabo idi yumvuija Bible idi ifidibua kakuyi mushinga bua bakebi ba bulelela ba muoyo mutoke, nansha mudi bavule ba kudibo basakibue bua kufila mapa a ku budisuile. Mapa aa, badi benza nawu mudimu wa kukumbaja mfranga idi ikengedibua bua mudimu eu wa buambi pa buloba bujima. Mu diumvuangana ne mubelu wa Yezu wa ne: “Nudi bapete patupu, filayi patupu,” Bantemu badi ku budisuile bafila bintu biabo bia ku mubidi, kuambikilapu dîba ne makanda, pa kupitshisha mêba miliyo ne miliyo tshidimu tshionso mu mudimu wa Nzambi. Nunku, ku diya ku nzubu ne ku nzubu ne ku malonga a Bible ku nzubu, badi balongeshi basankididi ba bulelela.​—Matayo 10:8; 28:19, 20; Bienzedi 20:19, 20.

Malu mine adi ajadika se: kakuena tshipatshila tshia mfranga bua yonso wa ku Bantemu ba Yehowa, bua bisumbu bia miaba idibo basombele, anyi bua Société Watch Tower. Muntu nansha umue katu upeta difutu bua kuya ku nzubu ne ku nzubu to. Kadi mfranga itu ikengedibua mu mudimu eu itu ilua munyi? Ku mapa a ku budisuile a kudi bantu bena dianyisha pa buloba bujima. Kabatu basangisha mfranga to.

Buenzeji bua bumanyishi buabo

Mudimu wa ku nzubu ne ku nzubu ne buambi bua mu mpukapuka bua Bantemu ba Yehowa bidi ne buenzeji kudi bantu badi bawumanye anyi? Tshijadiki tshileja mu bifidi bia ngumu tshidi tshiandamuna eyowa ku lukonko alu. Badi bakula bua Bantemu ba Yehowa mu programme ya ku televizion ne mu filme padibo baleja muntu kampanda ukokola ku tshiibi. Bimfuanyi bia bintu bizola bua kusekesha bivua bileje Bantemu. Bua kuleja se: disuminyina dia mudimu wabo ndimanyike bimpe, bazodi ba bimfuanyi aba pa buloba bujima badi bakul’amu bua Bantemu ba Yehowa. Ebi bidi mua kumueneka bu kupetula bakuabu, kadi pa tshibidilu mbashindamene pa bualu bunene bulelela​—bua se: Bantemu mbamanyike bua buambi buabo bua lukunukunu bua ku nzubu ne ku nzubu.​—Bienzedi 20:20.

Umue wa ku filme eyi ya bintu bizola bua kusekesha wa matuku adi panshi aa uvua uleja muntu ubanda ku mukuna bua kuakula ne “guru (mulongeshi wa mu nyuma).” Yeye kuamba ne: “Ngambila malu a dikema alua kuenzeka!” “Guru” wakamuandamuna munyi? “Tumonayi . . . Nekuikale biyole bia nzala, bipupu bia masama, ne bikumina. Dîba nedishintuluke dilue muîdima, ne ngondo mashi.” Muebeji wakakonka ne: “Kudi lumu luimpe kayi?” “Guru” e kuandamuna ne: “Nzambi neakupule tshinsoji tshionso . . . kakuakuikala kabidi ni ndufu ni nkanyinganyinga ni mbisama!” Mukumbudi e kuebeja ne: “Mmunyi muudi mumanye malu a mushindu’eu?” Diandamuna? “Muntu nansha umue kêna mua kuepuka Bantemu ba Yehowa to!” Ne bivua kabidi nanku bua yeye muine muzodi wa bimfuanyi bua kusekesha!

Mushinga wa bualu buzola ebu ne makuabo a muomumue udi wa se: adi asokolola ki ng’anu makumbula a pa tshibidilu atu Bantemu benza kadi kabidi bukole bua mukenji wabo. Mu miaku mikese, muzodi uvua muleje tshitupa tshia nshindamenu tshia bumanyishi buabo bua ku nzubu ne ku nzubu; ne uvua mutêla mifundu.​—Fuanyikija ne Matayo 24:7, 29; Buakabuluibua 21:3, 4.

Dibenga dia mukenji wabo kudi bantu ba bungi kadiena ditekesha Bantemu mu mikolo anyi dikepesha tshisumi tshiabu nansha. Mupostolo Petelo wakadimuija ne: “Mu matuku a ku nshikidilu, baseki nebapatuke ne tuseku tuabu bilondeshile nkuka yabo ne nebikale bamba ne: ‘Dikalaku diende diakalayabo didi kunyi? Bualu kubangila ku dituku diladile bankambua betu tulu [mu lufu], malu wonso adi’anu bu muvuawu menemene ku ntuadijilu wa bufuki.’” Nansha nenku, basaka kudi dinanga, Bantemu badi batungunuka ne kukumbula bantu nabo ne nebenze nunku too ne pafikisha Nzambi bulongolodi ebu bunyanguke ku nshikidilu.​—2 Petelo 3:3, 4, NW.

Yezu wakamba ne: mu matuku a ku nshikidilu, lumu luimpe elu luvua diambedi ne bua kumanyishibua. Bua dikonkonona dikuabo bua kumanya bua tshinyi ne mmunyi mutu lumu luimpe lumanyishibua, tangila biena-bualu bibidi bidi bilonda.​—Mâko 13:10.

[Bimfuanyi mu dibeji 9]

Bantemu ba Yehowa kabatu ne kasumbu ka bamfumu batu bafutshibua pa tshibidilu to​—buonso mba-ministre badisuile