Utuku ufuilangana luse bu mutu Yehowa wenza anyi?

“Binuafuila bantu ntupakenu yabu luse, Tatuenu wa mu diulu neanufuile penu luse; kadi binuabenga kufuila bantu ntupakanyi yabo luse, Tatuenu kakunufuila yenu ntupakenu luse nansha kakese.”​—MATAYI 6:14, 15, NW.

1, 2. Nnzambi wa mushindu kayi ututu tukengela, ne mbua tshinyi?

“YEHOWA udi mulekeledianganyi wa mibi ne muenzedianganyi wa bimpe, katu ukuatshika tshiji lubilu ne muena bulenga-bunangi buvule. Kakututobolola dîba dionso, anyi kutukuatshila njiya bua bikondo bikena bimanyika nansha. Kakatuenzela malu bilondeshile mpekatu yetu; kakatuvuijila bituvua bakumbanyine mua kupeta bilondeshile bilema bietu. Bualu, anu bu mudi diulu muulu mule kupita buloba, ke mudi bulenga-bunangi buende butambe kudi aba badi bamutshina. Anu bu mudi kudi dîba dipatukila kule menemene ne kudidi dibuelela, ke mudiye mutusemejile kule menemene ntupakenu yetu. Anu bu mudi tatu ufuila bana bende luse, ke mudi Yehowa ufuila aba badi bamutshina luse. Bualu, yeye nkayende mmumanye bimpe mushindu utudi benza, uvuluka se: tudi lupuishi.”​—Musambu wa 103:8-14, NW.

² Bimitshibua mu mpekatu ne baledibua ne bilema, ne mapanga bupuangana atuakapiana adi pa tshibidilu ateta kutulombola bu bapika bua kutupa mikenji, tudi menemene tukengela Nzambi udi ‘uvuluka se: tudi benza ne lupuishi.’ Bidimu nkama isatu kunyima kua Davidi mumane kusenga bilenga bitambe Yehowa mu Musambu wa 103, mukuabo mufundi wa Bible, Mika, wakakula bia muomumue bua Nzambi umue umue eu udi muena bulenga mu difuilangana luse bua mpekatu ituvua benze: “Nganyi udi Nzambi bu wewe, udi ubajimishila bubi, udi ulekelela difuka dia buhianyi buandi bubi bua ditomboka diabo? Yeye kena ushala ne tshiji tshiendelele, bualu bua udi usanka bua kulesha bantu luse lujalame. Yeye neatufuile luse kabidi, neadiate malu mabi etu munda mua makasa andi. Wewe newele malu mabi abo onso mu ndondo wa mai manene.”​—Mika 7:18, 19.

3. Kufuilangana luse ntshinyi?

³ Mu Mifundu ya tshiena-Greke, muaku “kufuilangana luse” udi umvuija “kulekela [anyi kupua muoyo].” Mona se: Davidi ne Mika batêla kuulu eku badi bafila diumvuija dia muomumue ne miaku idi ilenga ku muoyo, ya dikonkonona nayi. Bua kuanyisha bualabale bua difuilangana luse dia Yehowa, lekela tuanji kukonkonona bikese bia ku bilejilu biadi bivule bidi mu ditumika. Tshia kumpala tshidi tshileja se: lungenyi lua Yehowa lua kubutula ludi mua kulua difuilangana luse.

Mozese udi ulomba​—Yehowa udi umumvuila

4. Nkunyima kua bilejilu kayi bia bukole bua Yehowa kuvua bena Izalele bashale anu ne ditshina bua kubuela mu Buloba Bulaya?

⁴ Yehowa wakapatula mu dikubibua dionso bena ditunga dia Izalele mu Ejipitu ne kubafikisha pabuipi ne buloba buvuaye mubalaye bu ditunga diabo, kadi bakabenga bua kuya kumpala, batshina bantu ba patupu ba mu Kanana. Kunyima kua bamane kumona Yehowa ubapikula kudi bena Ejipitu ku bipupu dikumi bibutudi, unzulula njila wa diepukila njiwu munkatshi mua Mbuu Mukunze, ubutula butubutu biluilu bia bena Ejipitu bivua bitêta bua kubalonda, ubanjija nabo tshiovo tshia Mikenji ku Mukuna wa Sinayi tshiakabavuija tshisamba tshia Yehowa tshisungula, ne ubapetesha mu tshishima ku dituku dionso mana avua afumina mu diulu bua kubakuatshisha, bakatshina bua kubuela mu Buloba Bulaya bua bamue bena Kanana ba mpolondo!​—Nomba 14:1-4.

5. Mmunyi muakateta batentekedi babidi ba lulamatu bua kukankamija bena Izalele?

⁵ Mozese ne Aarona bakakema bikole bua ditshina dia bantu divua nadi bena tshisamba. Yoshua ne Kalebe, batentekedi babidi bena lulamatu, bakateta bua kukankamija Izalele: ‘Ditunga didi, ditunga dimpe menemene, ditunga didi mabele ne buitshi bipueka. Kanutshinyi bantu to; Yehowa udi netu!’ Pamutu pa kukankamijibua ku mêyi a mushindu’eu, bantu bena buntomboji ne bena buôwa bakateta bua kutapa Yoshua ne Kalebe mabue.​—Nomba 14:5-10.

6, 7. (a) Ntshinyi tshiakapangadija Yehowa bua kuenza pakakandamana bena Izalele bua kubuela mu Buloba Bulaya? (b) Bua tshinyi Mozese wakapindulula dilumbuluisha dia Yehowa pa bena Izalele ne ntshinyi tshiakapatuka?

⁶ Yehowa wakafika munda bikole bitambe! “Ndekelu wa bionso Yehowa wakambila Mozese ne: ‘Too ne dîba kayi diabenga tshisamba etshi kunnemeka, ne too ne dîba kayi diabengabo kungitabuja bua bimanyinu bionso bingakenza munkatshi muabo? Lekela mbabutule ne biyole ne mbumbushe, ne lekela nkuenze ditunga ditambe bunene ne ditambe bukole kubapita.’ Kadi Mozese wakambila Yehowa ne: ‘Nunku, bena Ejipitu nebumvue lumu lua se: ku bukole buebe wakapatula tshisamba etshi munkatshi muabo. Ne nebambile bushuwa bantu badi base mu buloba ebu. . . . Bu wewe mua kushipa tshisamba etshi bu muntu umue, nunku matunga adi mumvue bualu bua butumbi buebe kakuyi mpata neambe ne: “Bu muvua Yehowa kayi mukumbana bua kubueja tshisamba etshi mu buloba buakabenzelaye mutshipu, wakaditua mu dibashipela mu tshipela.”’”​—Nomba 14:11-16, NW.

⁷ Mozese wakalomba bua kubafuila luse, bua dîna dia Yehowa: “‘Bu wewe ne bua kusua, ufuila ntupakanyi ya tshisamba etshi luse bilondeshile bunene bua bulenga-bunangi buebe, ne anu bu muwakafuila tshisamba etshi luse kumbukila mu Ejipitu too ne mpindieu.’ Pashishe Yehowa wakamba ne: ‘Ndi mbafuila luse bilondeshile dîyi diebe.’”​—Nomba 14:19, 20, NW.

Ditendelela mpingu dia Manase ne dienda masandi dia Davidi

8. Mmuanda wa mushindu kayi wakenza Manase Mukalenge wa Yuda?

⁸ Tshilejilu tshidi tshisunguluke tshia difuilangana luse dia Yehowa ntshia tshilumbu tshia Manase, muana wa balume wa Mukalenge muimpe Hezekiya. Manase utshivua ne bidimu 12 pakatuadijaye kukokesha mu Yeruzaleme. Wakiibaka miaba mitumbuke, kuasapu bilambuilu bua Baala, kuenza makunji a tshijila, kuinamina mitoto ya mu diulu, kuenza majimbu ne mupongo, kuenza ba-medium ne bamanyishi ba malu atshilualua, kuteka tshimfuanyi tshia lupingu lusonga mu ntempelo wa Yehowa, ne kupitshisha muanende pa kapia mu tshibanda tshia Hinnom. “Wakenza bualu buvua butambe bubi ku mêsu kua Yehowa” ne “kutungunuka ne kupambula Yuda ne bantu bavua base mu Yeruzaleme bua kuenza malu mabi kupita matunga akabutula Yehowa kumpala kua bana ba Izalele.”​—2 Kulondolola 33:1-9, NW.

9. Mmunyi muakatuyisha Manase mpala wa Yehowa, ne ntshipeta kayi tshiakapatuka?

⁹ Ndekelu wa bionso, Yehowa wakajula bena Assyrie bua kuluisha Yuda, ne bakakuata Manase ne kuya nende ku Babilone. “Ne mu katupa kîpi, biakamunyingalaja, wakatuuyisha mpala wa Yehowa Nzambi wende ne kudipuekesha bikole bitambe bua bualu bua Nzambi wa ba-kakuende. Ne wakatungunuka ne kumusambila, ne wakanyisha yeye muine bua kumusengelelabo ne wakateleja dilomba diende bua kupeta dianyishibua ne kumupingaja ku Yeruzaleme mu bumfumu buende.” (2 Kulondolola 33:11-13, NW) Nenku Manase wakumbusha nzambi mienyi, mpingu ne bilambuilu ne kubimansha pambelu pa tshimenga. Wakatuadija kufidila milambu pa tshilambuilu tshia Yehowa ne kuenza bua Yuda kutuadijaye kusadila Nzambi mulelela. Muanda eu uvua tshilejilu tshinene tshia disua dia Yehowa bua kufuilangana luse padi didipuekesha, masambila ne tshienzedi kampanda bua kululamija nsombelu mubi bipatula mamuma adi makumbanyine dinyingalala!​—2 Kulondolola 33:15, 16.

10. Mmunyi muakateta Davidi bua kujimija mukono wa mpekatu wende wakenzaye ne mukaji wa Uriya?

¹⁰ Mpekatu wa masandi avua Mukalenge Davidi muende ne mukaji wa Uriya muena Hitite mmumanyike bimpe. Kakenda anu nende masandi to, kadi wakenza kabidi mushindu wa kujimija mukono wa bualu ebu pakimita mukaji eu. Mukalenge wakapesha Uriya dianyisha bua kumbuka ku mvita ne ditekemena dia kumumona uya ku nzubu kuende ne kushala ne mukajende. Kadi bua kanemu kavuaye naku bua basalayi nende bavua ku milongo ya kumpala ya mvita, Uriya kakaya kuende to. Pashishe, Davidi wakamubikila bua kudia ne kumukuatshisha maluvu, kadi Uriya kakashala ne mukajende to. Pashishe, Davidi wakatuma dîyi kudi jenerale wende bua kuteka Uriya ku milongo ya kumpala ya mvita, bua Uriya kushipibuaye, ke tshiakenzeka bushuwa.​—2 Samuele 11:2-25.

11. Mmunyi muakafikishabo Davidi ku dinyingalala bua mpekatu wende, kadi ntshinyi tshiakakengaye?

¹¹ Yehowa wakatuma muprofete wende Natana kudi Davidi bua kutandula mpekatu wa mukalenge. “Mpindieu Davidi udi wambila Natana ne: ‘Ndi muenzele Yehowa mpekatu.’ Bua bualu ebu Natana wakambila Davidi ne: ‘Yehowa ku luende luseke udi ulekela mpekatu webe. Kuakufua to.’” (2 Samuele 12:13, NW) Davidi wakadiumvua mupie tshibawu bua mpekatu wende ne wakaleja dinyingalala diende mu masambila menza ne muoyo umue kudi Yehowa: “Bualu wewe kuena usanka bua mulambu​—bu biobi nanku, mvua mua kuufila; kuena usanka bua mulambu wa kuosha. Milambu ya kulambula Nzambi, mmuoyo mubungame; mutshima mubungame ne musunsuke, Ô Nzambi, kuakuwupetula.” (Musambu wa 51:16, 17, NW) Yehowa kakapetula masambila a Davidi menza ne mutshima mubungame to. Bituadijile apu, Davidi wakapeta dinyoka dikole ditambe mu diumvuangana ne mêyi a Yehowa pa difuilangana luse adi mu Ekesode 34:6, 7: “Kadi kena ubingisha muntu udi uhila.”

Dibanjija ntempelo dia Solomo

12. Ndilomba kayi diakenza Solomo mu dibanjija ntempelo, ne ntshinyi tshiakandamuna Yehowa?

¹² Pakajikija Solomo diibaka ntempelo wa Yehowa, wakamba mu disambila diende dia dibanjija ne: “Witabushe kutendekena kua muntu webe, ne kua bantu bebe Bena Isalele, hatendelelabo ku muaba eu; bulelela, unvue biebe mu muaba webe, mu diulu mene; ne haunvua, utubuikidile mibi yetu.” Yehowa wakandamuna ne: “Binabuikila diulu bua nvula kayiloki, anyi binatuma mikumbi bua kudiayi bintu biakamena mu buloba, anyi binatuma tshihuhu munkatshi mua bantu banyi, biadihuekesha bantu banyi badi babikila dina dianyi, biantendelelabo, biakebabo mpala wanyi, ne biakudimunabo mitshima yabo bua mibi yabo, nengunvuile mu diulu, nembabuikidile mibi yabo, nensangashe buloba buabo.”​—2 Kulondolola 6:21; 7:13, 14.

13. Ntshinyi tshidi Yehezekele 33:13-16 uleja pa bidi bitangila mmuenenu wa Yehowa bua muntu?

¹³ Bu mudi Yehowa ukuangata ne mushinga, udi ukuitaba bua tshiudi mpindieu, kadi ki mbua tshiuvua to. Nebikale anu bu mudi Yehezekele 33:13-16 wamba ne: “Hangambila muntu muakane ne: ‘Newikale ne muoyo bulelela,’ ne bieyemeneye buakane buandi ne bienzeye bualu bubi, kabena bavuluka bualu bumue bua malu makane akadiye wenza​—kadi bua bubi buakuenzeye yeye neafue. Bualu bukuabo kabidi, bingambila muntu mubi ne, ‘Wewe neufue bulelela,’ ne yeye udi umuka ku bubi buandi ne udi wenza malu adi makanangane ne mikenji ne adi makane kabidi; biahingasha muntu eu mubi tshintu tshiakadiye muangate bu tshieya, biahingasheye bintu biakuangateye bu munyengi, biendeye mu mikenji idi ivuisha muoyo, kayi wenza bualu bubi, yeye neikale ne muoyo. Kabena bavuluka bubi bumue bua mu malu mabi akenzeye diambedi bua kumubanda n’abu. Yeye wakuenza malu adi makanangane ne mikenji ne adi makane, neikale ne muoyo bulelela.”

14. Ntshinyi tshidi tshisunguluke pa bidi bitangila difuilangana luse dia Yehowa?

¹⁴ Difuilangana luse didi Yehowa utupetesha didi ne ngikadilu musunguluke, ngikadilu udi mukole bua kumusakidila ku luse ludibo balejangana umue kudi mukuabo​—badi ne bua kufuilangana luse ne kupua muoyo. Bamue bantu nebambe ne: ‘Ndi mua kukufuila luse bua biudi muenze, kadi tshiena mua kubipua muoyo (anyi tshiakubipua muoyo to).’ Bishilangane, mona bidi Yehowa muambe ne bienzaye: “Bualu nemfuile ntupakanyi yabo luse, ne tshiakuvuluka kabidi mpekatu yabo nansha.”​—Yelemiya 31:34, NW.

15. Ndumu kayi ludi Yehowa muende pa bidi bitangila difuilangana luse?

¹⁵ Kukadi binunu bia bidimu, Yehowa mmufuile bamutendeledi bende badi pa buloba luse. Mmubafuile luse bua mpekatu ivuabo bamanye ne: mbayenze anu mudibi bua eyi ivuabo kabayi bamanye ne: mbayenze. Dilekelelangana mibi diende, muoyo-mule ne difuilangana luse kabiena mfudilu. Yeshayi 55:7, [NW] udi wamba ne: “Muntu mubi umuke mu njila wende ne muenji wa bibi alekele ngenyi yende; ne apingane kudi Yehowa, yeye neamulekelele mibi, ne kudi Nzambi wetu, bualu neamufuile luse mu mushindu mualabale.”

Difuilangana luse mu Mifundu ya tshiena-Greke ya bena nkristo

16. Bua tshinyi tudi mua kuamba se: difuilangana luse dia Yezu didi mu diumvuangana ne dia Yehowa?

¹⁶ Miyuki ya difuilangana luse dia Nzambi mmimuangalake mu Mifundu ya tshiena-Greke ya bena nkristo. Yezu wakakula bualu buadi misangu ne misangu, uleja se: udi mu diumvuangana ne lungenyi lua Yehowa pa bualu ebu. Ngelelu wa meji wa Yezu mmufumine kudi Yehowa, udi uleja mudi Yehowa, udi tshimuenekelu menemene tshia mudi Yehowa; kumumona nkumona Yehowa.​—Yone 12:45-50; 14:9; Ebelu 1:3.

17. Mmunyi muakaleja Yezu difuilangana luse dia Yehowa “mu mushindu mualabale”?

¹⁷ Difuilangana luse dia Yehowa edi mu mushindu mualabale ndilejibua mu tshimue tshia ku bifuanyikijilu bia Yezu, bia mukalenge wakafuila mupika [wende] luse bua dibanza dia ntalanta 10 000 (dolare ya bena Etats-Unis bu 33 000 000). Kadi pakabenga mupika awu bua kufuila mupika nende luse bua dibanza dia ndenario lukama (dolare ya bena Etats-Unis bu 60 patupu), mukalenge wakafika munda. “‘Musadidi mubi we, mvua mumbushe dibanza diebe dionso pawakansengelela. Kuvuaku mua kulekelela pebe muena mudimu nebe [dibanza], bu mumvua mukulekelela panyi anyi?’ Mukalenge awu ne tshiji e kumufila kudi bena tshinyangu, too ne pavuaye ne bua kufuta dibanza diende dionso.” Pashishe Yezu wakaleja mua kubitumikila: “Bia muomumue, ke muanuenzela Tatuanyi wa mu diulu, pikala yonso wa kunudi kayi ufuila muinende luse ne muoyo wende mujima.”​—Matayi 18:23-35, NW.

18. Mmunyi muvua mmuenenu wa difuilangana luse wa Petelo mufuanyikija ne wa Yezu?

¹⁸ Bangabanga ne Yezu kufilaye tshifuanyikijilu tshitêla kuulu eku, Petelo wakalua kudiye ne kumuebejaye ne: “Mfumu, misangu indi mua kufuila muanetu luse idi bungi munyi padiye ungenzela bibi? yakumbana ne ku muanda-mutekete anyi?” Petelo uvua wela meji se: uvua menemene muena kalolo. Kadi nansha muvua ba-skribe ne Bafarizeya bela mikala ku misangu ya difuilangana luse, Yezu wakambila Petelo ne: “Tshiena nkuambila ne: amu muanda mutekete, kadi too ne ku makumi muanda mutekete misangu muanda mutekete.” (Mateus 18:21, 22, Mukenji Mulenga) Bivua bikole bua misangu kukumbanayi muanda mutekete bua dituku dimue, anu bu muakamba Yezu ne: “Nuadimukayi. Bienza muanenu mpekatu, umukanyine; ne bianyingalalaye umufuile luse. Nansha biakuenzelaye mpekatu misangu muanda-mutekete ku dituku ne biapinganaye kuudi misangu muanda-mutekete wamba ne: ‘Ndi nyingalala,’ udi ne bua kumufuila luse.” (Luka 17:3, 4, NW) Padi Yehowa ufuilangana luse, katu ulama kabidi mpekatu yetu mu lungenyi to​—ebu mbualu bua disanka kutudi.

19. Ntshinyi tshitudi ne bua kuenza bua kupeta difuilangana luse dia Yehowa?

¹⁹ Bituikala ne budipuekeshi bua kunyingalala ne kutonda mpekatu yetu, Yehowa udi ku budisuile wenza malu bua disanka dietu: “Kadi, bituatonda mpekatu yetu, yeye udi muena lulamatu ne muakane bua kufuila mpekatu yetu luse ne kutukezula ku dipanga buakane dionso.”​—1 Yone 1:9, NW.

20. Ndifuilangana luse kayi dia ku budisuile divua Stefana muleje?

²⁰ Stefana mulondi wa Yezu, ne lungenyi ludi lutua ku muoyo lua difuilangana luse, wakela lubila elu pavuabo bamutapa mabue kudi musumba wa bantu bavua ne tshiji tshikole: “‘Mfumu Yezu, angata muoyo wanyi.’ Pashishe, kutuaye binu panshi, e kuela dîyi dikole ne: ‘[Yehowa, NW], kubashi tshilema etshi to.’ Wamba nanku e kufuaye.”​—Malu Menza 7:59, 60, Mukenji Mulenga.

21. Bua tshinyi didiakaja dia ku budisuile dia Yezu bua kufuila basalayi ba bena Roma luse didi ditamba kukemesha?

²¹ Yezu wakashiya tshilejilu tshidi tshitamba kusunguluka tshia muntu uvua ku budisuile ufuilangana luse. Baluishi bende bakamukuata, kumulumbuluisha kakuyi dilonda mikenji, kumupiisha, kumuseka, kumutuila mata, kumufiankula mikaba ya biseba misuika mifuba ne tuamu ku nsongo kuayi, ne ndekelu wa bionso kumushiya mupopela pa mutshi munkatshi mua mêba bungi kampanda. Bena Roma bakenza mavule a ku malu aa. Kadi, pavua Yezu wamba kufua ku mutshi wa tshinyongopelu awu, wakambila Tatuende wa mu diulu pa bidi bitangila basalayi bakamutubuluja ne: “Tatu, ubafuile luse, bualu ki mbamanye tshidibo benza to.”​—Luka 23:34, NW.

22. Mmêyi kayi a mu Muyuki wa pa Mukuna atudi ne bua kutumikila?

²² Mu Muyuki wende wa pa Mukuna, Yezu uvua muambe ne: “Tungunukayi ne kunanga baluishi benu ne nusambile bua aba badi banukengesha.” Too ne ku ndekelu wa mudimu wende pa buloba, wakatumikila yeye muine dîyi-diludiki edi. Ebi nkunekesha mu ditulomba, tuetu badi baluangana ne butekete bua mubidi wetu udi unyanguka anyi? Ndekelu wa bionso, tudi ne bua kutumikila mêyi a Yezu avuaye mulongeshe bamulondi bende kunyima kua mumane kubalongesha disambila dia tshitembelu: “Binuafuila bantu ntupakenu yabu luse, Tatuenu wa mu diulu neanufuile penu luse; kadi binuabenga kufuila bantu ntupakenu yabo luse, Tatuenu kakunufuila yenu ntupakenu luse nansha kakese.” (Matayi 5:44; 6:14, 15, NW) Bituafuilangana luse anu bu mutu Yehowa ufuilangana luse, netufuilangane luse ne tupua muoyo.

Utshidi muvuluka anyi?

◻ Mmunyi mutu Yehowa wangata mpekatu yetu, ne mbua tshinyi?

◻ Bua tshinyi Manase wakapingajiludibua mu bumfumu buende?

◻ Nngikadilu kayi musunguluke wa difuilangana luse dia Yehowa udi mukolele bantu bua kuidikija?

◻ Mmunyi muvua difuilangana luse dia ku budisuile dia Yezu dikale ditamba kukemesha?

[Tshimfuanyi mu dibeji 24]

Natana wakambuluisha Davidi bua kumona dikengedibua dia difuilangana luse dia Nzambi