Bena mapolome a Galaad ne diluijakana bua kutangalaja lumu luimpe

“BUALU bua tuyayi tukamona butuvua katuyi mua kufuanyikija.” Ke muakamona Anders ne Amalia Groth dishidimunyibua diabu dia bu-misionere. Bakaleja nyanji ya bapetshi 48 ba mapolome a Kalasa ka Bible ka 97 ka Galaad ka Société Watchtower: “Dishidimuna dia Galaad nditusake ne nditulongolole ku mudimu, nunku tudi tuluijakana bua kuya ku miaba yetu mipiamipia ya midimu.”

Tudi mua kusunguluja disanka edi mu mumvuija a balongi pa programe wa difidibua dia mapolome; bantu 6 420 bakadisangisha mu dia 4 Kabitende 1994, bua bualu ebu.

“Theodore Jaracz wa mu Kasumbu Kaludiki wakunzulula programe pa kuakula pa tshiena-bualu tshia ‘Kuikala balongesha kudi Yehowa,’” ke muakamba David Abel ne mukajende, Kelli. “Bualu butudi katuyi mua kupua muoyo nansha kakese buvua pavua muanetu wa balume Jaracz wamba ne: ‘Tudi ne bua kumanya bukese buetu pa kudifuanyikija ne Yehowa,’ ne kubileja ku diambuluisha dia dilongesha dia bujitu didi mu Yobo nshapita ya 38 ne 39. Muanetu Jaracz wakakula ne miaku misunguluke wamba ne: nansha mutuavudiji dimanya dietu dia Bible ku butuangaji bua Kalasa ka Galaad, katuena bamanye diandamuna ku lukonko kayi luonso to. Tudi ne bua kutungunuka ne kulonga Dîyi dia Nzambi.”

Christian ne Angele Coffy bakamba mpindieu ne: “Tuvua balengibue ku muoyo kudi muyuki muenza kudi Max Larson pa tshiena-bualu tshia ‘Tshishimikidi tshimpe tshidi ne mushinga kayi?’ Tuakananga ditufuanyikija diende ne nzubu udi ukengela tshishimikidi tshiondoke mu bulaba bukole bua kushala bashindame nansha biatuta tshikumina. Pa kulonga ne disuminyina dionso, tudi mua kulubuluja malanda ne Yehowa ne kumona mua kushindamija ditabuja dietu pa dimanya diondoke bua se: tumone mua kushala anu bashindame mu bikondo bia ntatu.”

“Muyuki muenza kudi Milton Henschel, mulombodi wa kalasa, pa tshiena-bualu tshia ‘Madimi adi matoke bua dinowa’ neuvulukibue bua musangu mule,” ke muakaleja Gary ne Lynn Elfers. “Mvese wa nshindamenu wa Yone 4:35-38, wakazangika diakalenga ditudi nadi dia kubuela mu budimi mudi babidime ba kumpala bamane kukuna. Ebi nebitusake ku ditumika katuyi tujingakana.” Jan ne Sirpa Vaahtola bakatuishibua kudi bualu ebu, bakamba ne: “Muanetu Henschel uvua mutusake ku difuanyikija mu meji dinowa dietu divua kumpala pa kufila luapolo lua ndekelu ludi lufumina ku Matunga a Balte. Divula divua dia bia pa lukama 51 mu Estonie, dia bia pa lukama 106 mu Latvia, ne dia bia pa lukama 51 mu Lithuanie. Mmushindu kayipu udibi bitua ku muoyo! Bana betu badi miaba ayi badi balomba Mukalenge bua atume bena mudimu bavule. Tuvua ne disanka dia pa buadi bua kumvua bualu ebu, bualu muaba wetu wakuenzela mudimu udi ku Estonie!”

“Joel Adams wakenza muyuki uvua ulonda pa tshiena-bualu tshia ‘Eyemenayi Yehowa,’” ke muakavuluka Kevin ne Evelyn Cortina. “Uvua mutubele ne: musangu nansha umue katuedi meji ne: imue misangu tudi mua kueyemena Yehowa ne mikuabu tudi mua kueyemena meji etu nkayetu. Mu mudimu wetu netupetangane ne ntatu mivule​—idi itangila makanda a mubidi, biakudia, muakulu, bibidilu, ne mikuabu. Yonso ya kudiyi neikengele bua tuetu kueyemena Yehowa.”

Ngamba-malu wakalonda uvua Gerrit Lösch, muena mu Kasumbu Kaludiki, wakasulakaja tshiena-bualu tshia “Tungunukayi ne kukenkesha luse lua Yehowa.” Alen ne Ann Marie Gokavi bakamba ne: “Mu miaku misunguluke uvua muambe ne: kualabaja luse kudi ba-misionere netu ne kudi aba batudi tuabanyangana nabo lumu luimpe, ntshimanyinu tshia bupie bua buena-nkristo. Midimu ku matunga menyi idi ikengela didipua muoyo, kadi biapangika luse, nunku didipua muoyo dietu nedikale ne mushinga mutambe bukese.” (Matayo 9:13) Peter ne Fleur Hupston bakasakidila ne: “Muanetu Lösch wakamba ne: tudi ne bua kuleja luse kudi bana betu ba balume ne ba bakaji kabidi, tubatangila ne jimele mikudimuna, mu ngakuilu wa mu tshimfuanyi, bua se: bilema biabu bimueneke bikese pamutu pa kudiundishibuabi.”

“Jack Redford, umue wa ku balongeshi betu ba Galaad, wakalonda ne tshiena-bualu tshia ‘Udi mua kuanyisha dibedibua anyi?’” ke muakavuluka Mickey ne Sherry Minsky. “Mu miaku misunguluke wakamba ne: lutambishi ludi luvuija kuanyisha mubelu bualu bukole ne se: bituikala katuyi basue dibedibua, netubule bipeta biadi bimpe. Pashishe wakafila imue ngenyi mimpe idi itangila dianyisha mubelu mishindamene pa Muadi wa Yelemiya 3:27-31.” Charles ne Joan Held bakasakidila ne: “Misangu mivule kumpala kua bilema bietu, tudi bafofo; nunku, tudi ne bua kuangata dibedibua bu mushindu wa kunzulula mêsu etu bua kujingulula bintu bituvua katuyi bajingulule. Dibedibua anyi mubelu wa kudi Yehowa ntshijadiki tshia dinanga diende kutudi.”

“Mulongeshi mukuabu, Ulysses Glass, wakakula pa tshiena-bualu tshia ‘Dimayi meji makuatshishi adi afikisha ku muoyo.’ Wakebeja ne: ‘Nenuenze tshinyi ne binudi balonge?’” ke muakamba Kenneth ne Lisbeth Ardkäll. “Pashishe wakafila tshifuanyikijilu tshishindamene pa Nsumuinu 30:24-26 tshidi tshitangila nyama mukese wa nsenji ne mudi Yehowa mumukumbaje tshishiki bua muoyo. Ku luetu luseke, katuena ne meji a mu tshingenyingenyi to, ke bualu kayi bidi bikengela bua tuetu kuenza madikolela bua kudima meji. Yehowa mmutukumbaje ne bintu bionso bitudi tukengela bua kuenza bualu abu. Bituatungunuka ne kusemena pabuipi ne Yehowa ne kudi umue ne mukuabu mu dinanga, netukumbaje bivule.”

Muyuki munene

“Muanetu Karl F. Klein, muena mu Kasumbu Kaludiki, wakakonkonona netu ne musangelu wuonso Musambu wa 19 mu muyuki wende wa ‘Tshia mushinga mukole munkatshi mua bia mushinga mukole,’” ke muakamba Jay ne Gwen Abraczinskas. “Uvua muzangike dianyisha diondoke dia mufundi wa misambu Davidi bua Yehowa ne dinanga divuaye nadi bua Dîyi dia Nzambi.” “Muanetu Klein uvua muabanye musambu mu bitupa bisatu,” ke muakaleja Keith ne Donna Hornback. “Tshitupa 1 (mvese wa 1-6) tshidi tshileja dianyisha dia Davidi bua bufuki bua Nzambi, tshitupa 2 (mvese wa 7-10) tshidi tshiumvuija dianyisha diende bua mikenji ya Nzambi, ne tshitupa 3 (mvese wa 11-14) tshidi tshituvuluija ne: anu bu Davidi, tudi ne bua kujinga bua kushemeja malanda ne Yehowa.”

“Tuakasankidila bualu bua se: ditshina dia Yehowa didi ne mushinga bituepuka bubi. Ebi bidi bitusaka ku dienza tshidi tshikezuke ku mêsu kuende,” ke muakamba David ne Raylene Long. Frank ne Vibeke Madsen bakapunga ku dîyi. “Mumvuija a muanetu Klein pa buimpe bua bivuluiji, mikenji, ne mêyi-matuma bia Yehowa akafila tshikepeshilu tshia bituvua balonge mu Galaad,” ke muakambabu. “Abi bivua bitusake too ne ku diangata dipangadika dikole bua kulamata ku Dîyi dia Nzambi matuku alua ne kudiangata bu mushete wa bintu bia mushinga mukole.”

Kunyima kua muyuki munene, balongi bakapeta mapolome abu, ne miaba yabu ya midimu ku matunga menyi yakamanyishibua. Kunyima kua diikisha bua kuanji kudia ne kutalaja pa mioyo, buonso bakadisangishilula bua programe wa mu mapingaja. Bapetshi ba mapolome bakaditua ku diandamuna nkonko miela mu kupita kua dilonga dikepesha dia Tshibumba tshia Nsentedi.

“Pashishe kuakalonda programe wa balongi wa ‘Bashidimunyibue bua kulua bamanyishi ba Bukalenge pa buloba bujima,’” ke muakavuluija Bob ne Shannon Lakatos. “Tshitupa tshia kumpala tshia programe tshiakaleja malu mamona kudi balongi mu mudimu wa budimi mu kupita kua dishidimunyibua dietu dia ngondo itanu. Tshiakashindamena pa nzanzu mu ditumika ne nkonko mu mudimu wetu. Tshitupa kampanda tshia nkonko ne mandamuna tshivua tshileje mishindu mimpe bua kuakamangana ne ntatu ne nshintulukilu wa malu bia nsombelu wa bu-misionere. Maleja asatu a diapozitive, dia Costa Rica, Inde, ne Malawi, akatupetesha tshipidishilu tshia bulongolodi bua Yehowa bua pa buloba bujima.”

“Drama wakalonda wa Nuikale bena teokrasi, kadi ki mbena mu bulongolodi ebu to, wakaleja buenzeji bubi budi bamue balela bena mu bulongolodi ebu, bena mmuenenu wa budikadidi mua kuikala nabu,” ke muakamba Jesse ne Michelle Duncan. “Wakaleja mudi bena nkristo ne bua kumanya ne: mêyi-maludiki ne bulombodi bia teokrasi bidi ne mushinga ne dikuatshisha,” ke muakasakidila Wenzel ne Kelly Koula.

Musambu ne disambila bia nkomenu biakatuisha programe eu wa masanka ku tshibungubungu. Mu diumbuka diabu, bapetshi ba mapolome bavua bafuanyikija mu meji luendu luabu ku miaba yabu ya midimu mu matunga menyi 18, ngenyi yabu yakambibua biakane mu diumvuija dia kulayangana nadi dia Tommi ne Jael Kauko: “Tudi baluijakana bua kuya ku muaba wetu wa mudimu ne kutumika ne bitudi balonge. Tudi bapeta bivule​—mpindieu ng’wetu musangu bua kupa.”

[Tshimfuanyi mu dibeji 26]

Bena mapolome a Kalasa ka Bible ka 97 ka Galaad ka Watchtower

Mu liste udi kuinshi eku, milongo mbayibale bituadijile kumpala baya panyima, ne mêna mbaatele bituadijile ku dia bakaji baya ku dia balume mu mulongo wuonso.

(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.