Dituku didi ‘dilakuka bu tshikutu tshia kapia’
“Monayi! dituku didi dilakuka bu tshikutu tshia kapia nedilue.”—MALAKI 4:1, NW.
1. Nnkonko kayi idi ijudibua mu diumvuangana ne Malaki 4:1?
MU MATUKU aa a ku nshikidilu, ba diakalenga mbadi Yehowa musungule mêna abo bua kuafunda mu mukanda wa tshivulukidi. Kadi, tuambe tshinyi bua aba bapangila bua kukumbaja malu malomba bua disanka adi? Nansha buobo bikale bakokeshi anyi bantu ba tshianana, nkomenu wabo neikale munyi biapetulabo bamanyishi ba Bukalenge bua Nzambi ne mukenji wabo? Malaki udi wakula bua dituku dia dibadika. Mu nshapita 4, mvese wa 1, tudi tubala ne: “‘Bualu, monayi! dituku didi dilakuka bu tshikutu tshia kapia nedilue, ne bena lutambishi buonso ne aba buonso badi benza malu mabi nebalue anu bu nsona. Ne dituku didi dilua nedikale ne bua kubamina,’ ke mudi Yehowa wa biluilu muambe, ‘nenku kadiakubashila nansha muji peshi ditamba.’”
2. Mmushindu kayi udi Yehezekele mumvuije dilumbuluisha dia kudi Yehowa?
2 Bakuabo baprofete badi pabo bafuanyikija kabidi dilumbuluisha dia kudi Yehowa dia matunga ne luya lukole lua tshikutu tshia kapia. Mmushindu kayipu udi Yehezekele 22:19-22 (Mukanda wa Mvidi Mukulu) mukumbanangane ne dilumbuluisha tutendelelu tua mu Bukua-buena-nkristo butontolodi kudi Nzambi! Mbafunde ne: “Nanku, meme [Yehowa, NW] ndi ngamba ne: Bu munudi bonso bu bikanganya, nennusangishe . . . Bu mudibo basangisha tshiamu tshitoke, nansha tshiamu tshikunze, nansha tshiamu tshifike, nansha tshiamu tshia kabanda, nansha tshiamu tshia ntende, babiela mu tshikutu tshia kapia, basonsola kapia muinshi muabio bua kubiengulula, ke munganusangisha kaba kamue ne tshiji, ne luonji luonso bua kunuengulula. Nennukunguije, nensonsole kapia pambidi penu bua tshiji tshindi natshio. Nennuengulule mu tshimenga ne kapia. Bu mudibo bengulula tshiamu tshitoke mu tshikutu tshia kapia, ke muanuengululabo mu tshimenga ne kapia. Diba adio nenumanye ne: Meme [Yehowa, NW] ke udi mujikije tshiji tshianyi pambidi penu.’”
3, 4. (a) Ntshinyi tshidi bamfumu ba bitendelelu bamba ne lutambishi luonso? (b) N’lumu kayi lukuate muengu ludi bitendelelu nalu?
3 Bushuwa, ntshifuanyikijilu tshimpe tshitambe! Balombodi ba bitendelelu badi babenga kuenza mudimu ne dîna dia Yehowa, bafike too ne ku dipetula dîna adi dinsantu, nebikale ne bua kutuilangana ne dituku adi dia dibadika. Ne lutambishi luonso, badi bamba se: buobo ne bena diabo bena malu a tshididi nebateke Bukalenge bua Nzambi pa buloba peshi nebakaje buloba bua kubuvuija muaba muakane bua Bukalenge.
4 Bukua-buena-nkristo butontolodi mbudisuike pamue ne balombodi ba malu a tshididi mu diluangana mvita mikole. Malu a kale muule ne mvita ya bena krwazade ya bikondo bia Moyen Âge, ditambuishangana ku bukole kudi Kabadi ka dijimija butontolodi ka Ekleziya Katolike mu Espagne, Mvita ya Bidimu Makumi Asatu (1618-1648) pankatshi pa bena Katolike ne bena Mishonyi yakabutula bantu ku Mputu mu siekele wa 17, ne Mvita ya bena Espagne badi kabayi basalayi biangatshile mu bidimu bia 1930, miluangana bua Espagne ikale bua bena Katolike nkayabo. Diedibua dipite bunene dia mashi panshi diakenzeka ne mvita ibidi ya buloba bujima ya mu siekele wetu eu, pavua bena Katolike, bena Mishonyi, ne bena bitendelelu bikuabo babuele mu tshimvundu, bashipa bena kuitabuja nabo ne bena kuitabuja ba bikuabo bitendelelu. Matuku adi panshi aa, nkubudike mvita mitapianganyi pankatshi pa bena Katolike ne bena Mishonyi mu Irlande, pankatshi pa tusumbu tua bitendelelu mu Inde, ne pankatshi pa tusumbu tua bitendelelu mu Yougoslavie wa kale. Malu a kale a bitendelelu mmuule kabidi ne mashi a binunu ne binunu bia bantemu ba Yehowa ba lulamatu.—Buakabuluibua 6:9, 10.
5. Ndilumbuluisha kayi didi dindile bitendelelu bia dishima?
5 Tudi ne lukasa luonso mua kuanyisha buakane bua dibutula dikadi pabuipi dia kudi Yehowa dia Babilone Munene, nsangilu wa bitendelelu bia dishima pamue ne bena diende. Dibutula edi ndilejibue mu Buakabuluibua 18:21, 24 (NW): “Ne muanjelu kampanda wa bukole wakambula dibue difuane dibue dinene dia mpelu ne wakadikupa mu mbuu, wamba ne: ‘Ku dikupa dikole ke muimanshibua Babilone tshimenga tshinene, ne katshiakusanganyibua kabidi kashidi. Eyowa, muende bakasangana mashi a baprofete ne a bansanto ne a buonso bakakoshibua muminu pa buloba.’”
6. (a) Mbanganyi badi ne bua kulua bu nsona, ne mbua tshinyi? (b) Ndishindika kayi didiku bua aba badi batshina Yehowa?
6 Kunyima, baluishi buonso ba buakane, ne bena diabo buonso, “badi ne bua kulua bu nsona.” Dituku dia Yehowa nedioshe munkatshi muabo bu tshikutu tshia kapia. “Kadiakubashila nansha muji peshi ditamba.” Mu dituku adi dia dibadika, bansonga, anyi matamba, nebalumbuluishibue ne buakane buonso bilondeshile dipimibua dia kudi Yehowa dia miji yabo: baledi babo, bavua batangidi ba bana aba. Baledi bena bubi kabakuikala ne ndelanganyi bua kulubuluja njila yabo mibi to. Kadi aba badi benza midimu ya ditabuja mu malaya a Bukalenge kabakubutudibua to. Ke bua tshinyi Ebelu 12:28, 29 (NW) udi utubela bua: “Tutungunuke ne kuangata bulenga bukena butuakanyine, butudi mua kuenzela Nzambi mudimu wa tshijila ne ditshina ne dikakala. Bualu Nzambi wetu udi kabidi kapia kadi kabutula.”
Yehowa n’Nzambi wa tshikisu anyi?
7. Mmunyi mutu Yehowa ubueja dinanga mu dilumbuluisha diende?
7 Ebi bidi bisua kumvuija se: Yehowa udi Nzambi wa tshikisu ne mudisombuedi anyi? Tòo! Mu 1 Yone 4:8 (NW), mupostolo udi utela bulelela bua nshindamenu wamba ne: “Nzambi udi dinanga.” Pashishe, mu mvese wa 16 (NW) udi uzangika ne: “Nzambi udi dinanga, ne eu udi ushala mu dinanga udi ushala mu buobumue ne Nzambi ne Nzambi udi ushala mu buobumue nende.” Mbua dinanga diende bua bukua-bantu budi Yehowa mupangadike bua kukezula buloba ku bubi buonso. Nzambi wetu wa dinanga ne luse udi wamba ne: “Bu mundi ne muoyo, . . . ndi nsanka ki mbua lufu lua muntu mubi, kadi bua muntu mubi eele nyima ku njila wende ne atungunuke ne kuikala ne muoyo. Elayi nyima, elayi nyima ku njila yenu mibi, bualu, mbua tshinyi nudi ne bua kufua?”—Yehezekele 33:11, NW.
8. Mmunyi muakazangika Yone dinanga, eku pende udileja bu Muana wa Dikubakuba?
8 Yone udi ufunkuna a·gaʹpe, dinanga dishindamene pa mêyi-maludiki, misangu mivule kupita bakuabo bafundi basatu ba Evanjeliyo basangisha pamue, kadi mu Mâko 3:17, Yone muine mmufunkunyibue bu ‘Muana wa Dikubakuba.’ Nku buenzeji bua spiritu munsantu wa Yehowa kuvua Muana wa balume eu wa Dikubakuba mufunde mikenji mikuate buôwa ya mu mukanda wa ndekelu wa mu Bible wa Buakabuluibua udi wakula bua Yehowa bu Nzambi utu ukumbaja buakane. Mukanda eu mmuule ne mêyi adi aleja dilumbuluisha, bu mudi “tshikaminu tshinene tshia tshiji tshia Nzambi,” “tubakudi muanda-mutekete tua tshiji tshia Nzambi,” ne “tshiji tshikole tshia Nzambi Wa-Bukole-Buonso.”—Buakabuluibua 14:19; 16:1; 19:15.
9. Mmêyi kayi akamba Yezu pa bidi bitangila malumbuluisha a kudi Yehowa, ne mmunyi muakakumbana milayi yende?
9 Mukalenge wetu Yezu Kristo, udi muikale “tshimfuanyi tshia Nzambi udi kayi mua kumueneka,” wakamanyisha ne dikima dionso malumbuluisha a Nzambi patshivuaye apa pa buloba. (Kolosai 1:15, NW) Tshilejilu, kudi milawu muanda-mutekete ya mu Matayi nshapita wa 23 yakelaye patoke bua bena bitendelelu bena mpala ibidi ba mu tshikondo tshiende. Wakakoma dilumbuluisha adi dia dipisha ne mêyi aa: “Yeruzaleme, Yeruzaleme, mushipi wa baprofete, ne udi ukuma aba badi batumibue kudiye mabue,—mmisangu bungi munyi imvua musue bua kusangisha bana bebe, anu bu mudi nzolo usangisha bana bende mu mapuapua ende! Kadi, kanuakasua. Monayi, nzubu wenu nyawu munulekelela.” Kunyima kua bidimu makumi asatu ne muanda-mutekete, bakakumbaja dilumbuluisha kudi masalayi a bena Roma maludika kudi jenerale Titus. Divua dituku divua dikuatshisha buôwa, dia mulayi wa malu avua ne bua kuikala bu dituku ditambe kukuatshisha buôwa mu malu mamonamona wonso kudi bantu—dituku dia Yehowa, dikadi pabuipi ne kulua.
“Dîba” didi dikenka
10. Mmunyi mudi “dîba dia buakane” dituadila tshisamba tshia Nzambi disanka?
10 Yehowa udi umanyisha se: nekuikale bapanduki mu dituku diende. Udi ushindamena kudi aba badibo batela mu Malaki 4:2 (NW), wamba ne: “Nuenu badi batshina dîna dianyi, dîba dia buakane nedinukenkeshe bushuwa, pamue ne luondapu mu mapuapua adi.” Dîba dia buakane adi ki ntshintu tshikuabo nansha apo n’Yezu Kristo mene. Udi “bukenke bua buloba” bua mu nyuma. (Yone 8:12, NW) Mmunyi mudiye ukenka? Udi ujuka ne luondapu mu mapuapua ende—diondapibua dia nzanzanza mu nyuma, ditudi mua kupeta nansha lelu’eu, ne pashishe, mu bulongolodi bupiabupia bualua, diondapa dia ku mubidi dia bena mu matunga wonso. (Matayo 4:23; Buakabuluibua 22:1, 2) Mu tshimfuanyi, anu bu mudi Malaki wamba, aba buondapibua “nebapatuke ne nebatungunuke ne kuenda ntunku bu bana ba ngombe ba manyi” idibo bafuma ku dipatula mu tshikumbi. Ndisanka kayipu diumvua babiishibua ku lufu badi babiika ne ditekemena dia kufika ku bupuangane bua bantu!
11, 12. (a) Nnkomenu kayi udi muindile bantu babi? (b) Bena tshisamba tshia Nzambi munyi mudibo “badiatakaja bantu babi”?
11 Kadi, tuambe tshinyi bua bantu babi? Mu Malaki 4:3 (NW), tudi tubala ne: “‘Nenudiatakaje bantu babi, bualu nebalue bu difuenkenya muinshi mua makasa enu mu dituku dingenza malu awu,’ ke mudi Yehowa wa misumba wamba.” Nansha muakubaye bantu badi bamunange, Nzambi wetu Muena mvita neakezule buloba umbusha baluishi bena tshikisu, ubabutula butubutu. Satana ne ba-demon bende nebakuatshibue.—Musambu wa 145:20; Buakabuluibua 20:1-3.
12 Tshisamba tshia Nzambi katshiakubuelakana mu dibutula dia bantu babi to. Nenku, mmunyi mudibo “badiatakaja bantu babi”? Badi benza nenku mu mushindu wa tshimfuanyi pa kubuela mu difesto dinene dia ditshimuna. Ekesode 15:1-21 udi wakula bua difesto dia mushindu’eu. Diakalonda dibutula dia Faraona ne masalayi ende mu Mbuu Mukunze. Mu dikumbana dia Yeshaya 25:3-9 (MMM), diumbushibua dia “bena tshikisu” nebaditue mu nyima kudi difesto dia ditshimuna didi mu diumvuangana ne dilaya edi dia Nzambi: “Neajimije lufu kashidi. [Mukalenge Yehowa, NW] neakupule binsonji bionso ku mesu abo, neumbushe bundu buvuabo bafuisha bantu bende mu buloba bujima. Ke mudi [Yehowa, NW] wamba nanku. Dituku adio, bantu nebambe ne: Yeye ke [Nzambi, NW] wetu! Tuvua batekemena lupandu amu kudiye, yeye ke [Yehowa, NW] utuvua batekemene. Tusankayi, tusangulukayi, bualu mmutupandishe.” Mu disanka edi kamuena didisombuela anyi disanka bua dikenga dia bakuabo, kadi ditshionkomoka pa kumona dîna dia Yehowa ditumbishibue ne buloba bukezudibue bua nsombelu wa bupole kudi bukua-bantu mu buobumue.
Programe munene wa dishidimuna
13. Ndishidimuna kayi dienzeka mu “buloba bupiabupia”?
13 Mu Malaki 4:4 (NW), bena Yuda bakabedibua se: “vulukayi . . . mikenji ya Mozese.” Nenku lelu’eu tudi tukengela kulonda “mikenji ya Kristo,” bu mudibi bileja mu Galatia 6:2 (NW). Bapanduki ba ku Armagedon, kabiyi mpata, nebapeshibue dishidimuna dia pa mutu dishindamene pa mikenji ya Kristo, ne malongesha aa neikale mua kufundibua pamu’apa mu “mivungu” ya Buakabuluibua 20:12 (NW) yunzululabo mu tshikondo tshia dibiishibua ku lufu. Ndituku kayipu adi dinene, pashidimunyibua bafue aba babiishibua ku lufu bua kulonda nsombelu wikala pa “buloba bupiabupia”!—Buakabuluibua 21:1, NW.
14, 15. (a) Mmunyi mudi Eliya wa tshiena-lelu mulejibue? (b) Mbujitu kayi budi kasumbu ka Eliya kakumbaja?
14 Atshi netshikale dialabaja dia mudimu wa dishidimuna muamba kudi Yehowa, bu mudibi bifundibue mu Malaki 4:5: “Monai, nennutumine Eliya muprofete diambedi dituku dia Yehowa kadiyi dianji kulua, dituku adi dinene ne didi dikuatshisha bantu buowa.” Kadi, nnganyi udi Eliya wa tshiena-lelu? Bu mudibi bilejibue mu Matayi 16:27, 28, Yezu wakashindamena pa “dilua mu bukalenge buende” ne wakamba ne: “Muana wa muntu nealue mu butumbi bua Tatu wandi ne banjelo bandi; dituku adi neafute muntu yonso bu muakenzenzeye.” Matuku asambombo kunyima, pa mukuna ne Petelo, Yakobo ne Yone, “e kuandamukaye ku meso abo: mpala wende uvua ubalakana bu diba, bilamba biende kukenka bu butoke.” Uvua nkayende mu tshikena-kumona etshi anyi? Tòo, bualu “Mozese ne [Eliya, NW] kubamuenekela, bayukila nende.”—Mateus 17:2, 3, Mukenji Mulenga.
15 Ebi bivua mua kumvuija tshinyi? Bivua bileja Yezu bu Mozese Munene tshikondo tshia dilua diende bua dilumbuluisha. (Dutelonome 18:18, 19; Bienzedi 3:19-23) Nenku, uvua mua kudisangisha ne Eliya wa tshiena-lelu bua kukumbaja mudimu wa mushinga mukole wa kumanyisha lumu luimpe elu lua Bukalenge pa buloba bujima kumpala kua dituku dinene ne didi dikuatshisha buôwa dia Yehowa kufikadi. Malaki nshapita 4, mvese 6 udi umvuija mudimu wa “Eliya” eu ne: “Yeye neakudimune mitshima ya batatu bua ihingane kudi bana babo, neakudimune mitshima ya bana bua ihingane kudi batatu babo; bua meme tshilu kubutula buloba ku mulau.” Nenku, “Eliya” kêna mukuabo muntu apo nkasumbu ka bena nkristo bela manyi pa buloba, kadi Mfumu Yezu muteke pa bintu Biende bionso. Ebi bidi biumvuija kupesha nzubu wa bena kuitabuja ‘biakudia bia mu nyuma bidibo bakengela mu tshikondo tshiabi.’—Matayi 24:45, 46, NW.
16. Mbipeta kayi bia disanka bidi bipatukile ku mudimu wa kasumbu ka Eliya?
16 Lelu’eu pa buloba bujima, tudi mua kumona bipeta bia disanka bia programe eu wa didisha. Tshibejibeji tshia Tshibumba tshia Nsentedi, tshidi ne dipatuka ku biamu dia bibejibeji 16 100 000 ku nimero wonso mu miakulu 120, 97 ya kudiyi ipatuka mu tshikondo tshimue tshimue, tshidi tshimuangalaja “lumu luimpe elu lua Bukalenge” pa buloba bujima. (Matayi 24:14, NW) Mikuabo mikanda mu miakulu mivule badi bakuata nayi midimu mishilangane ya buambi ne mudimu wa Bantemu ba Yehowa wa dilongesha. Kasumbu ka Eliya, mupika wa lulamatu ne wa budimu, nkatabale mu difila biakudia bivule bua buonso “badi bamanye bidibo bakengela mu nyuma.” (Matayi 5:3, NW) Kabidi, aba badi bitaba ditekemena edi dia Bukalenge ne benza tshididi dibalomba mbasangishibue mu buobumue budi bukemesha pa buloba bujima. Budi [buobumue] bukungija musumba munene “wa mu matunga wonso ne bisa bionso ne bisamba bionso ne miakulu yonso.” (Buakabuluibua 7:9, NW) Pakumbajibua mudimu eu too ne ku bualabale budi Yehowa ujinga, nshikidilu nealue pashishe, mu dituku diende dinene didi dikuatshisha buôwa.
17. Ndîba kayi diadikuma dituku dia Yehowa didi dikuatshisha buôwa?
17 Kadi, ndîba kayi diatufikila mu tshimpitshimpi dituku adi didi dikuatshisha buôwa? Mupostolo Paulo udi wandamuna ne: “Dituku dia Yehowa didi dilua menemene bu muibi butuku. Anu padibo bamba [pamu’apa mu mushindu musunguluke] ne: ‘Ditalala ne dikubibua!’ ke pabavuila diakamue kabutu ka tshimpitshimpi bu mudi bisama bia kudinyenga kua mukaji wa dîmi; ne kabakupanduka nansha kakese.”—1 Tesalonike 5:2, 3, NW.
18, 19. (a) Mmunyi mudi “ditalala ne dikubibua” bimanyishibua? (b) Ndîba kayi diapeta tshisamba tshia Yehowa disulakana?
18 “Mbangany’abu” mu mulayi eu? Badi bamfumu ba malu a tshididi badi bamba mudibo mua kuenza ndongoluelu mupiamupia udi mu buobumue kumbukila ku bitupa bitapulukangane bia bulongolodi ebu bua tshikisu. Ndongoluelu yabo minene idibo benza, bu mudi Ligue des Nations ne Nations Unies, mmipangile mu muanda eu. Anu bu muvua muprofete wa Yehowa mudianjila kuakula, bakadi mpindieu pa “kuamba ne: ‘Ditalala didiku! Ditalala didiku!’ padiku kakuyi ditalala nansha dikese.”—Yelemiya 6:14; 8:11; 14:13-16, NW.
19 Mu tshikondo tshimue tshimue etshi, tshisamba tshia Yehowa tshidi tshinanukila ntatu ne makenga bia kudi bapetudi ba Nzambi bena mu bulongolodi ebu. Kadi mu katupa kîpi emu, anu bu mudibi bifundibue mu 2 Tesalonike 1:7, 8 (NW), nebapete disulakana “ku disokolodibua dia Mukalenge Yezu biangatshile mu diulu ne banjelo bende ba bukole, mu kapia kadi kalakuka, patualaye disombuela pa bantu badi kabayi bamanye Nzambi ne pa aba badi kabayi batumikila lumu luimpe ludi lutangila Mukalenge wetu Yezu.”
20. (a) Mmilayi kayi yakenza Sefanya ne Habakuka pa bidi bitangila dituku didi ‘dilakuka bu tshikutu tshia kapia’? (b) Mmubelu ne ndikankamija kayi bidi milayi eyi ifila?
20 Mmunyi muikalabi mu katupa kîpi emu? Bavule ba kutudi mbindile kukadi mutantshi mule. Pinapo, badipuekeshi bavule bapandishibua badi bandamuna ku lubila elu ludi mu Sefanya 2:2, 3 (NW): “Kebayi Yehowa . . . kebayi buakane, kebayi budipuekeshi; pamu’apa nebanusokoke mu dituku dia tshiji tshia Yehowa.” Pashishe tudi tusangana mu Sefanya 3:8 mubelu eu: “Nunku Yehowa udi wamba ne, Nungindile, tô ne ku dituku dindi mbika bua kunyenga bintu; bualu bua nakuhangidisha bua kusangisha bisamba bia bantu, bua kukungisha makelenge, bua meme kuhumuna tshiji tshianyi ham’bidi habo, kahia konso ka tshiji tshianyi mene; bualu bua buloba buonso nebuhie mu kahia ka lukunukunu luanyi.” Nshikidilu ukadi pabuipi! Yehowa mmumanye dituku ne dîba abi ne kakushintulula kalandrié kende nansha. Nanku, tunanukilayi ne lutulu luonso. “Bualu, tshikena-kumona tshitshidi bua tshikondo tshijadika, ne tshidi tshienda lukasa too ne ku nshikidilu, ne katshiakuamba dishima to. Nansha bianengatshi, tungunuka ne kutshindila; bualu, netshikumbane bushuwa. Katshiakujanguluka to.” (Habakuka 2:3, NW) Dituku didi dikuatshisha buôwa dia Yehowa diasemenyi pabuipi menemene. Vulukayi se: dituku adi kadiakupanga kufika pa dîba!
Njila wa diambulula:
◻ Mmunyi muikala nkomenu wa bakokeshi ne bakokedi mu dituku dia Yehowa didi dikuatshisha buôwa?
◻ Yehowa udi Nzambi wa mushindu kayi?
◻ Ndishidimuna dia mushindu kayi didi dilejibua bua tshisamba tshia Nzambi?
◻ Mmunyi mudi baprofete ba Nzambi batubela mu diumvuangana ne disemena pabuipi dia nshikidilu?
[Tshimfuanyi mu dibeji 21]
Dîba dia Kabadi ka Ekleziya Katolike kenza bua kujikija butontolodi mu Espagne, bavule bakenzejibua ku bukole bua kulua bena Katolike
[Mêyi a dianyisha]
The Complete Encyclopedia of Illustration/J. G. Heck