Bamanyishi ba Bukalenge badi balonda

Bumanyishi budi bupatula mamuma kumbelu ne mu kalasa

NSOMBELU wa muena nkristo udi ukonga dienzela bakuabu bimpe, nangananga pa kuabanyangana nabu lumu luimpe lua Bukalenge bua Nzambi. Nsumuinu 3:27 (MMM) udi wamba ne: “Kubengi kuenzela muntu bualu buimpe budiye ujinga, paudi ne mushindu wa kumuenzelabu.” Mu Argentine Ntemu nsongalume kampanda ukavua mu tshidimu tshisatu tshia tshikadilu uvua usua kuabanyangana lumu luimpe lua Bukalenge ne mulongi nende. Dienza diende nunku diakapatula bipeta bivule.

Dimue dituku Ntemu nsongalume eu wakambila muinende ne: bitendelelu bionso kabiena bimpe nansha. Pakandamuna nsongalume eu ne: kavua wenza bualu bubi nansha bumue, Ntemu eu wakamba ne: “Ne kabidi kuena wenzela Nzambi bualu nansha bumue.” Ebi biakelesha nsongalume eu meji. Pashishe Ntemu wakamumvuija ne: aa mmatuku a ku nshikidilu ne bua kupeta dianyishibua kudi Nzambi, muntu udi ne bua kupeta dimanya dijalame dia Bible ne kuditumikila. Mulongi nende wakitaba. Kadi dîku diende divua mua kumulekela bua yeye kulonga Bible anyi? Bua kupetesha muinende tshintu tshidi mua kumuambuluisha bua kuela meji, Ntemu eu wakamulomba bua kubala mukanda wa Udi mua kuikala ne muoyo wa kashidi pa buloba bukudimuna mparadizu.

Tshikondo tshiakapita, ne mulunda eu wakalekela kalasa. Tshidimu bu tshijima kabakumvua bualu buende. Pashishe dimue edi Ntemu nsongalume eu wakakema pa kupeta dibikila ku nshinga kudi mulunda wende wakamuambila ne: uvua mumone mushindu uvua milayi ya mu Bible yenda ikumbana bushuwa. Amu apu Ntemu wakadilongolola bua kulonga nende Bible.

Pakayaye kumbelu kua ba mulongi nende wa kale, wakabambisha ne: baledi ba mulunda wende bavua baditatshisha bikole bua muanda uvua muanabu mukadibuejakaje. Nansha muakunyi wa mulunda wende wakela meji ne: uvua wenda upaala. Nunku baledi bakalomba muakunyende eu bua kuikalaye mu dilonga divua dilonda bu muteleji. Pashishe, ne binsonji ku mêsu, nsongalume eu wakamanyisha baledi ne: tutuende kavua mupaale, ne mamu kukemaye pa kuandamuna ne: “Pamutu pa muanda umue, ngapetshi mpindieu ibidi!”

Nunku’eu, mu dilonga diakalonda mamu yeye nkayende uvuaku ne wakitaba se: bana bende ba balume kabavua bapaale. Pashishe, dilonga dia Bible diakalongolodibua nende pamue ne bayende. Mu katupa kakese dîku dijima diakatuadija kubuela mu bisangilu bia tshisumbu ku Nzubu wa Bukalenge. Ndekelu wa bionso, ba-kakuabu bakatuadija pabu kulonga Bible ne kubuela mu bisangilu. Kutuadija apu, nsongalume wa kumpala wakatambushibua. Ukadi musele, ne yeye pamue ne muena kuende badi buonso bamanyishi ba mitalu.

Kupita apu, ku diambuluisha dia bumanyishi bua ku mpukapuka buenza mu kalasa, Ntemu nsongalume eu mmuambuluishe bakuabu balongi nende babidi pamue ne mamu ne muanabu wa bakaji wa umue wa kudibu bua kutuadija dilonga Bible. Buonso basanga, bantu 11 bakalonga bulelela bua mu Bible bualu Ntemu nsongalume eu kakabenga kuenzela balongi nende bualu buimpe. Mbipeta kayipu bia disanka! Bushuwa, “Disanka didi kudi bantu badi ne Yehowa [muikale, NW] Nzambi wabo!”​—Musambu wa 144:15.