Bamanyishi ba Bukalenge badi balonda

Diambuluisha bua “badi ne nyota” mu Russie

“BA DIAKALENGA mbadi ne nzala ne nyota ya buakane, bualu nebuukute,” ke muakamba Yezu. (Matewuse 5:6, MMM) Malu mamona adi alonda aa adi aleja mushindu udi Bantemu ba Yehowa bambuluisha bua kujikija nyota ya mu nyuma ya bavule mu Russie, muaba uvua budikadidi bua ntendelelu bupepejibue munkatshi mua bidimu bipite pa 70.

▪ Mukaji kampanda udi ne dîna se: Valentina uvua ne nkonko minene ya mu Bible ivua kayiyi mipete diandamuna munkatshi mua bidimu bivule. Tshilejilu, uvua udikonka ne: ‘Yezu uvua usambila nganyi?’ Uvua welangana meji ne: Yezu uvua ne bua kuikala usambila muntu kampanda mumupite yeye muine mene ne uvua udikonka pa bidi bitangila dîna dia Muine eu.

Wakabuela mu Ekleziya Ortodokse wa bena Russie. Kadi, kakapeta mandamuna ku nkonko yende mu tshitendelelu atshi. Kayi mujikije nyota, wakaya mu ekleziya kampanda wa bena Mishonyi, kadi kakapeta kabidi mandamuna matokesha. Pa kupanga kukuabu kua kuya, Valentina wakabanga kubala Bible, uteta bua kupeta mandamuna yeye nkayende​—kakuyi tshipeta. Wakalomba diambuluisha mu disambila.

Panyima pa tshikondo kampanda, Bantemu ba Yehowa bakakokola ku tshiibi tshiende. Bakamuleja mu Bible ne: dîna dia Nzambi n’Yehowa. Ndekelu wa bionso, wakamanya uvua Yezu usambila! Wakabanga kulonga Bible pa tshibidilu ne Bantemu. Misangu mivule uvua ubala mikanda mipatula kudi Société Watch Tower butuku bujima ne ukebulula mvese ya mu Bible. Valentina kakanenga bua kukoma ne: uvua mupete bulelela. Mu ngondo isatu wakabanga kudifila mu mudimu wa buambi, ne panyima pa ngondo ibidi, wakatambula. Dikebulula diende dia bulelela mu masambila diakafutshibua.

▪ Ntemu kampanda wakenzela luendu ku bise bua kuya kuyisha kule. Mu luendu, wakayukila ne nsongakaji kampanda pa bidi bitangila malaya a mu Bible, kadi nsongakaji eu kakaleja disankidila. Panyima pa ngondo ibidi, Ntemu eu wakalukila musangu muibidi ku tshitupa tshimue tshimue atshi bua kuenza muyuki wa patoke. Kunyima kua muyuki, wakasemena kudi muenyi kampanda ne kumukonka ne: “Kukadi muntu muyukileku nebe pa lumu luimpe lua mu Bible anyi?” Muntu au e kuandamuna se: “Eyowa, ukadi muyukile nanyi.” Ntemu kuelaye meji ne: uvua wela bilele. Kadi nsongalume wakumvuija ne: ngondo ibidi mishale wakumvua muyuki pankatshi pa Ntemu eu ne nsongakaji au, pavuabu mu luendu mu bise. “Mvua musue bua kumanya bivule, kadi wakatuluka mu bise, ne ngakela meji ne: tshivua mua kumona kabidi Bantemu ba Yehowa. Nunku ngakapeta muntu uvua ulonga Bible ne Bantemu ku muaba wanyi wa mudimu. Ke bualu kayi ndi apa!”

Mulume eu ne muena kuende bakatuadija dilonga dia Bible. Panyima pa katupa kîpi mene, wakamona se: mudimu wende kauvua upetangana ne mêyi-maludiki a mu Bible. Ne dijinga dia kulama kuondo ka muoyo kimpe kudi Nzambi, wakashintulula mudimu wende. Ukadi mpindieu wambila bakuabu malu adi atangila Bukalenge bua Nzambi mu tshikondo tshionso. Mukajende udi pende ulubuluka mu dilonga diende dia Bible.

Mu teritware eu mualabale wa Russie, Bantemu ba Yehowa badi ne disanka bua kukuata mudimu mu diambila muntu yonso wa muoyo umue ne: “‘Vuaku!’ Ne muntu yonso udi ne nyota alue; muntu yonso udi musue angate mâyi a muoyo kaayi kusumba.”​—Buakabuluibua 22:17, NW.