Batuadi ba mukenji wa ditalala dia Nzambi badi badisangisha

“TUDI biibakibue kudi mpuilu yonso wa distrike utudi babuele,” ke mudi mukulu muena nkristo kampanda wa mu États-Unis wamba. “Kadi, tshidimu etshi katshivua kumvuija. Tuvua tumbuka dituku dionso tudikonka muvua dituku divua dilonda ne bua kupitshisha pa matekemena etu, ne katuvua batekeshibue ku muoyo!”

Biwikala uvua mubuele mu umue wa ku Mpuilu ya Distrike ya “Batuadi ba mukenji wa ditalala dia Nzambi,” udi mua kuikala kakuyi mpata mukuate ku tshia muleji-mpala eu wa musangelu. Dituku dionso dia mpuilu diakashindamena pa bitupa bishilangane bia mudimu udi Bantemu ba Yehowa bakumbaja bu batuadi ba mukenji ba Nzambi. Tutangilulayi programe eu wa matuku asatu.

‘Muntu udi umuangalaja lumu lua ditalala mmulengele’

Etshi ke tshivua tshiena-bualu tshia dituku dia kumpala dia mpuilu. Tshivua tshishindamene pa Yeshaya 52:7. Mu bikondo ebi bikole, bantu bavule badi basadila Yehowa mu nsombelu ya ntatu. Muyuki wa “Diteleja bamanyishi ba ditalala ba mitalu” wakakonga dielangana nkonko ne bamue ba ku bena lulamatu aba. Diteleja mêyi abu masunguluke divua bushuwa dikankamiji, ne babuedi ba mu mpuilu bavua bushuwa bashindikila ne: Yehowa udi mua kubakolesha pabu, pa kubapetesha mene “bukole budi bupite bua pa tshibidilu” bua kubambuluisha bua kutantamena.​—2 Kolinto 4:7, NW.

Malu malomba a Yehowa kaena ne bujitu. (1 Yone 5:3) Ebi bivua bitokeshibue mu muyuki wa ndekelu wa programe wa mu dinda adi, wakajika ne dipatula dia broshire wa mabeji 32 muikale ne tshiena-bualu tshia: Ntshinyi tshidi Nzambi utulomba? Tshiambuluishi etshi tshia dilonga tshipiatshipia tshienza bimpe ne bimfuanyi netshikale bushuwa ne mushinga munene mu dikuatshisha bavule bua kulonga malongolola a Nzambi. Mumvuija pa mushindu wa kutumika ne broshire eu mupiamupia adi asanganyibua mu tshiena-bualu tshia dilonga tshia ndekelu mu tshibejibeji etshi, ne mu dibeji dia 16 ne dia 17.

Muyuki wa “Dinanukila mu mudimu udi muimpe” wakazangika se: Yehowa mmumanye bimpe ntatu yetu. Kunanukila kudi kumvuija ne: tudi tushimata panshi ne katuyi tujimija ditekemena nansha. Yehowa mmutupeshe Dîyi diende, spiritu wende, ne bulongolodi buende bua kutukuatshisha. Bidi bilomba dinanukila bua kuyisha, ne diyisha didi dituambuluisha bua kunanukila, bualu didi dilama ditabuja dietu ne muoyo. Bua nenku, pabuipi ne ku tshibungubungu, katuena ne bua kulekela ntatu yetu ikepesha lukunukunu luetu, bualu anu aba badi bananukila too ne ku nshikidilu ke basungidibua.​—Matayo 24:13.

Muyuki wa nshindamenu, “Mudimu wetu bu batuadi ba mukenji wa ditalala dia Nzambi,” wakakoka ntema ku dipatuka dia bena Yuda bapika mu Babilone ne diasulula dia ntendelelu mukezuke mu Yeruzaleme mu 537 K.B.B. Muanda eu, ke muakumvuija ngamba-malu, uvua anu tshilejilu tshikese tshia tshiakumbajibua mu katupa kîpi emu kudi Bukalenge bua Nzambi pa buloba bujima. (Musambu 72:7; Yeshaya 9:7) Mudimu wetu mutuomekela mpindieu ng’wa kuyisha lumu luimpe lua Bukalenge ebu ne kuikala ne nsombelu mumvuangane ne mukenji eu. Dinanga bua Nzambi ne bua muntu netu didi ne bua kutusaka bua kutungunuka mu mudimu eu kakuyi dilekela nansha.​—Bienzedi 5:42.

Bualu bunene bua mu programe wa mu Ditanu buvua symposium wa “Nudimukile mateyi masokome a mu dijikija lutetuku.” Mijiki ya lelu, filme, video, televizion, tusete tua video, mikanda, bibejibeji, ne mikanda ya biakuseka, misangu mivule bitu bileja ngelelu wa meji wa ba-demon. Pa nanku, tudi tukengela bua ‘kukina malu adi mabi’ ne ‘kulamata malu adi mimpe.’ (Lomo 12:9) Eyowa, tudi ne bua kutangila dijikija lutetuku dibi bu dia muendi ne kudiepuka, eku bikale ne ntema mitangija ku malu a bupeluke, a tshitembu, ne a bunême. (Filipoi 4:8) Mikanda ne bintu bia mudimu bia makebulula bitupetesha kudi bulongolodi bua Yehowa bidi bisonsola bieledi bietu bia meji ne ngenyi miibaki ne bitulongesha bua kusunguluja tshidi tshimpe ne tshidi tshibi. (Ebelu 5:14) Tudi ne bua kulamata ku ndongoluelu eyi anu bu mutudi mua kukuata ku buâtu mu tshipepele tshikole pa mâyi manene.

Pashishe kuakalua muyuki wa “Kandamenayi Diabolo​—Kanulekeledi ditembangana.” Anu pakavuabu pa kubuela mu Buloba Bulaya, binunu bia bena Izalele biakapona mu buteyi bua tshiendenda tshia masandi. Finease kakalekelela ditembangana bua ntendelelu mulelela. Wakangata dipangadika dikole bua bena mpekatu, ne bulamate buende bukole buakasankisha Yehowa. (Nomba 25:1-13) Tshipatshila tshia Satana ntshia kutuvuija bantu bakena bakanyine dibuela mu bulongolodi bupiabupia bua Nzambi. Pa nanku, anu bu Finease, tudi ne bua kukandamena madikolela a Diabolo bua kutunyanga. Nansha tuetu bikale basele peshi bajike, tudi ne bua ‘kunyema masandi.’​—1 Kolinto 6:18.

“Disanyika ne bulamatshi Dîyi dia Nzambi mu ka-bujima kadi” divua muyuki wa nkomenu wa dituku dia kumpala dia mpuilu. Bakudimunyi bavule badi bashintulula peshi bapua muoyo bitupa bia Mifundu. Tshilejilu, bua kutuuyisha babingishi ba manême a bakaji, bakudimunyi ba The New Testament and Psalms: An Inclusive Version badi bakula bua Nzambi, ki mbu Tatu, kadi bu Tatu-Mamu ne bua Yezu bu “Muntu kampanda” pamutu pa “Muana wa muntu.” Bishilangane, Traduction du monde nouveau udi usanyika ne lulamatu luonso mifundu ya mu muakulu wa ntuadijilu mu mushindu udiye muambuluishe bua kutokesha ngelelu wetu wa meji pa malu a bungi a mu Mifundu. Tshilejilu, ngamba-malu wakamba ne: “Ngandamuinu mijalame ya mu Traduction du monde nouveau ke yakapetesha tshishimikidi bua dilongolola dietu dia bisumbu pa kuteka tusumbu tua bakulu, mu lungenyi lumue menemene ne tshilejilu tshishiya mu tshisumbu tshia bena nkristo tshia mu siekele wa kumpala.” Tudi tuleja bulamatshi buetu ku Dîyi dia Nzambi pa kudibala dituku dionso ne pa kutumikila mibelu yadi. Ngamba-malu wakamba kabidi ne: “Tudi tuleja ne: tudi babingishi bena bulamate ba Dîyi dia Nzambi pa kudiyisha bakuabu ne lukunukunu ne pa kutumika nadi ne lubatshi patudi tulongesha bakuabu, katuyi tukeba bua kudiakaja ku ngenyi yetu pa kukondakaja peshi kudialabaja kupitshisha tshididi diamba.”

‘Ditalala dia Nzambi nditambe lungenyi luonso’

Tshiena-bualu etshi, tshishindamene pa Filipoi 4:7, tshiakakoka ntema ya bateleji bua dituku dibidi dia mpuilu. Mamanyisha mavule maleja avua atangila mmuenenu muakanyine bua mudimu wetu, dîku, diditshipa, ne bikuabu bitupa bia nsombelu wa buatshiabuatshia.

Panyima pa dikonkonona dia mvese wa ku dituku, symposium wakenjibua muikale ne tshiena-bualu tshia “Batuadi ba mukenji bàdì batuala lumu luimpe lua ditalala.” Mukenji wetu ng’wa ditalala, ne udi ne bua kufidibua mu ngikadilu wa ditalala. (Efeso 6:15) Tshipatshila tshietu ntshia kupeta mioyo, ki ntshia kubinga nansha. Atshi ke tshidi dibidijibua ne mikanda bitudi tupeta kudi bulongolodi bua Yehowa bituambuluisha bua kuenza. Katuanyishi bua kalèngù ne ditanaji bitutekeshe ku muoyo nansha. Bishilangane, tudi ne bua kutungunuka ne ‘kuenza muetu muonso mua kuenza,’ bikale ne midimu mimpe ya buatshiabuatshia ya didilongela, dibuela mu bisangilu, ne dienza mudimu wa diyisha. (2 Timote 2:15) Muanda ukena kulengulula ndienzela dia bakuabu tshidi tshimpe, nangananga aba badi balela betu mu ditabuja. (Galatia 6:10) Bushuwa, dienza muetu muonso mua kuenza kadiena diumvuija didienzeja mudimu mu mushindu muela kalela nansha. Tshionso tshidi muntu mua kuenza bilondeshile makole ende nkayende ne nsombelu yende ntshianyishibue kudi Yehowa.

Bantu ba Nzambi badi bafila dîba diabu, makanda, ne mpetu yabu bua kutungunuja bipatshila bia Bukalenge. Muyuki wa “Kupa kua musangelu mu bulongolodi bua Yehowa” wakazangika se: bu mudi bantu bavule badi bafuane mikoko bandamuna ku mukenji wa Bukalenge, kudi dikengela dia bia kutumika nabi bia pa mutu, miaba ya bisangilu, ne nzubu ya filiale. Mapa etu adi ambuluisha bulongolodi bua kuikala ne tshionso tshidibu bukengela bua kukumbaja mudimu wa diyisha wa pa buloba bujima. Difila dia kalolo didi kabidi ditumbisha Yehowa ne difila disanka kudi mufidi muine. Pa nanku, bu bena nkristo, katuena ne bua kulengulula tshitupa etshi tshia mushinga tshia ntendelelu wetu.​—2 Kolinto 8:1-7.

Nkomenu wa tshitupa tshia mu dinda uvua muyuki wa batismo​—misangu ya bungi utu muanda munene mu madisangisha manene a Bantemu ba Yehowa. Ndisankapu kayi bua kumona baditshipe aba bapiabapia balonda mu makasa a Yezu pa kuanyisha batismo mu mâyi! (Matayo 3:13-17) Bonso badi bela tshidia etshi mbalongeshibue ku diambuluisha dia mpokolo wa meji matambe onso​—Bible. Kabidi, mbapete diumvuija dilelela dia muoyo, ne mbabeneshibue ne ditalala didi difumina ku dimanya se: badi benza tshidi tshiakane.​—Muambi 12:13.

Mubelu muakanyine uvua mufidibue mu muyuki wa “Busunguluji bukukube.” Busunguluji budi ne mushinga wa bungi pa bidi bitangila malu a bungenda. Katuena ne bua kuendela mushinga wetu ku Nzubu wa Bukalenge, nansha kutumika ne bena nkristo netu bua kupeta mfranga. (Fuanyikija ne Yone 2:15, 16.) Busunguluji budi bukengedibua kabidi padiku diela mfranga mu mushinga peshi disomba anyi disombeshangana mfranga. “Dipanga kulubuluka dia bungenda bua njiwu munkatshi mua bena nkristo ndifikishe ku dibungama ne mene ku dijimija dia makanda a mu nyuma bua bamue bavua babuele lukasalukasa mu bilobeshi bia njiwu bia dikeba dia mfranga,” ke muakabambisha ngamba-malu. Nansha mudibi kabiyi bibi bua bena nkristo kuendabu mushinga pamue, bushuwa budimu mbua meji. Ne padi tshipungidi tshia bungenda tshienjibua pankatshi pa bitupa bibidi, mêyi majadiki a tshipungidi adi misangu yonso ne bua kufundibua pa mikanda.

Mêyi-makulu a Nzambi bua balume ne bakaji avua makonkonona mu muyuki wa “Wakabafuka mulume ne mukaji.” Ngangatshilu wa bitupa bia lulelu mmunyanga mu malu a kale. “Bavule batu ne ditupakana dionso bangata buntu bulume bu dikokesha ne dîsu dikole, dipapa muoyo, peshi dileja dinekesha dia makanda,” ke muakamba ngamba-malu. “Mu imue nshidimukilu bidi mpukapuka, anyi mene bia bundu, bua muntu mulume kudilaye munkatshi mua bantu peshi kumpenga mene. Pabi, Yowanese 11:35 (MMM) udi ulonda ne: pavuaye munkatshi mua musumba ku lukita lua Lazare, ‘Yezu kudilaye.’” Mmunyi bua bakaji? Buntu bukaji mbuvuija misangu ya bungi bu tshilobeshi tshia ku mubidi. Kadi ngamba-malu wakakonka ne: “Bikala mukaji muimpe ku mêsu kadi kayi ne meji majalame ne musue matandu, dielangana nsenda, peshi mudiambi, udiku mua kuikala muimpe mu ngumvuilu mulelela wa muaku eu, muikale bushuwa ne buntu bukaji anyi?” (Fuanyikija ne Nsumuinu 11:22; 31:26.) Mu ngakuilu wabu, ngikadilu, nkoselu wa nsuki ne mvuadilu wabu, bena nkristo balume ne bakaji badi badienzeja bua kulonda mêyi-makulu a mu Bible. Ngamba-malu wakamba ne: “Mulume udi uleja mamuma a spiritu mbipepele bua kumunemeka, ne mukaji udi ualeja mbipepele bua kumunanga.”​—Galatia 5:22, 23.

Pashishe kuakalua symposium wa “Nzambi wa ditalala udi ukutabalela.” Bena nkristo bavule badi ne tunyinganyinga tua mfranga. Nansha nanku, Yehowa udi ulaya ne: ‘Tshiena nkulekela, nansha kakese, tshiena nkushiya tshianana.’ (Ebelu 13:5) Nansha mudiku ntatu ya mfranga, bamue mbaleje dieyemena mu dilaya edi pa kubuela mu mudimu wa bumpanda-njila buambuluishi peshi bua pa tshibidilu. Bakuabu badi kabayi mua kuenza bumpanda-njila mpindieu badi bateka bipatshila bia Bukalenge pa muaba wa kumpala pa kubabidila tshikondo tshionso bua kufila bumanyishi. (Matayo 6:33) Madikolela onso a nunku adi ne bua kuedibua ka-lumbandi! Bulongolodi bua Yehowa mbupeteshe mikanda mivulavulayi bua kutukuatshisha mu mudimu wetu ne kutuambuluisha bua kumona mua kupita ne ntatu yetu. Bitualeja dianyisha bua ndongoluelu ya Yehowa ya mu nyuma, neatubeneshe ne ditalala mu bikondo ebi bisaluke bia malu a mpetu.​—Musambu 29:11.

Ku nkomenu wa muyuki wa ndekelu bua dituku adi, “Ipatshilayi ditalala dia Nzambi mu nsombelu wa mu dîku,” babuedi ba mu mpuilu bakatshionkomoka bua kupeta mukanda mupiamupia wa: Nsapi wa disanka mu dîku. “Longayi ne disuminyina mukanda eu muntu pa nkayende ne mu mêku,” ke muakabela ngamba-malu. “Dienzejayi ne muoyo umue bua kutumikila mibelu miashila pa Bible, nenku nenumone mua kudiundisha ditalala ne disanka mu dîku dienu.”

‘Lamayi buobumue . . . mu tshisuikidi tshia ditalala’

Tshishindamene pa Efeso 4:3, etshi tshivua tshiena-bualu tshiakanyine bua dituku dia ndekelu dia mpuilu. Bantemu ba Yehowa, bafumine mu bisamba bionso bia pa buloba, mbalongeshibue kudi Nzambi. Pa nanku, mbanange ditalala. Badi balonda tshilejilu tshia Yezu ne badienzeja “bua kulama buobumue [“bua spiritu,” NW] mu tshisuikidi tshia ditalala.”

Ditalala dìdì dibuela mu bulongolodi bua Nzambi divua dizangika mu symposium wa “Disunguluja batuadi balelela ba mukenji.” Baprofete ba mashimi bavuaku mu tshikondo tshia Izalele. Nansha nanku, batuadi balelela ba mukenji wa Nzambi​—baprofete bu mudi Yeshaya, Yehezekele, ne Yelemiya—​bakadianjila kuamba mu bujalame buonso bualu bua dipona dia Yeruzaleme, tshikondo tshia dipatshibua, ne dilekeledibua divua mua kuenzeka bua tshisamba tshia Nzambi. Nsombelu wa muomumue udiku lelu’eu. Batuadi ba mukenji ba dishima mbavulangane mu malu a tshididi ne mu bitendelelu bia dishima. Pabi, Yehowa mmujule Bantemu bende bua kumanyisha dilongolola diende didi ditangila ndongoluelu eu wa malu. Nangananga bituadijile mu 1919, basadidi ba Yehowa mbatumika nabu bua kumanyisha mukenji wa Nzambi. Mmunyipu mudibu bashilangane ne batuadi ba mukenji ba dishima ba Bukua-buena-nkristo! Ne lukunukunu luonso tuenzayi tshietu tshitupa mu mudimu eu too ne padi Yehowa wamba ne: wajiki.

Muyuki wa “Teleja ne tumikila Dîyi dia Nzambi” wakazangika se: Mifundu idi mpokolo mutambe bunene wa bulombodi, busambi, ne ditekemena. (Yeshaya 30:20, 21; Lomo 15:4) Bulongolodi bua lelu budi mu mushindu mubandile ne nsombelu wa tshidi muoyo musue. Kupita tshikondo kayi tshionso, tudi pa nanku tukengela bua kuteleja mibelu idi ifumina mu Dîyi dia Nzambi ne bulongolodi buende. Yehowa mmumanye matekete etu, ne mu Dîyi diende mmuleje patoke njila watusankisha. Dimanya ne: Yehowa udi utukuatshisha didi ditupesha dieyemena bua kuya kumpala ne tshintu kayi tshionso tshidiye utulomba.

Muyuki eu wakalongolola lungenyi lua bateleji bua drama mushemesha tshishiki wakalonda. Drama eu uvua ne tshiena-bualu tshia “Bua tshinyi kunemeka ndongoluelu ya teokrasi?” Pa kutumika ne muyuki wa mu Bible wa Gideona bu nshindamenu, dileja edi diakazangika bikole dilongesha dia bukole​—tudi ne bua kulonda mêyi-mashidimunyi a Nzambi ne kubenga kupingajapu ngelelu wetu wa lungenyi peshi kuteta bua kusesuka ku mibelu ya teokrasi.

Muyuki wa patoke uvua pa tshiena-bualu tshia “Ndekelu wa bionso, ditalala dia bushuwa!​—Difumine kuepi?” Ditalala didi Nzambi ulaya ndipite tshintu kayi tshionso tshidi bulongolodi ebu mua kuelela meji. “Ditalala dia bushuwa didi diumvuija ditalala dituku dionso,” ke muakamba ngamba-malu. “Ditalala dia Nzambi didi diumvuija bulongolodi bukena masama, ntatu, tunyinganyinga, ne lufu.” Bible udi utuambila ne: Yehowa ‘udi ulekesha mvita bua ijike too ne ku mfudilu kua buloba.’ (Musambu 46:9) Mmunyi muenzaye nenku? Pa kumbusha mujudi wa mvita, Satana Diabolo. (Buakabuluibua 20:1-3) Ebi nebiunzuluile bena bupuekele njila bua ‘bapiane buloba, ne mioyo yabu isanke mu ditalala dikumbane.’​—Musambu 37:11.

Panyima pa tshikepeshilu tshia tshiena-bualu tshia dilonga dia Tshibumba tshia Nsentedi bua lumingu alu, muyuki wa ndekelu bua mpuilu au wakenjibua. Muikale ne tshiena-bualu tshia “Tuyayi kumpala bu batuadi ba mukenji wa ditalala dia Nzambi,” muyuki eu musonsodi wakazangika se: mudimu wetu wa diyisha udi wa pa buawu ne wa lukasalukasa. Mpindieu ki ntshikondo tshia kuikisha, kujanguluka, peshi kupingana ku ngenyi ya mashimi. Tudi bapetesha bitudi tukengela​—mukenji wa Nzambi, spiritu wende munsantu, ne ndongoluelu mivule idi ifumina kudi bulongolodi buende bua teokrasi bua dinanga. Bu basadidi ba Yehowa, tutungunukayiku ne kuya kumpala bu batuadi ba mukenji wa ditalala dia Nzambi!

[Kazubu/​Bimfuanyi mu dibeji 9]

Ndongoluelu wa dinanga bua mêku

Aba bavuapu mu dituku dibidi dia mpuilu wa distrike wa “Batuadi ba mukenji wa ditalala dia Nzambi” bavua balengibue ku muoyo pa kupeta mukanda mupiamupia muikale ne tshiena-bualu tshia: Nsapi wa disanka mu dîku. Mukanda eu udi ne mamanyisha a mu mifundu ikala mua kuambuluisha mêku onso adi manange Nzambi.

Mukulu kampanda wa ku Connecticut, mu États-unis, udi wela nseka ne: “Mu dia 15 Kabalashipu, tuakapeta mukanda wetu wa Disanka mu dîku. Mu dia 16 Kabalashipu, nkavua munkatshinkatshi ne diwubala. Mu dituku dia 17, tuakenzamu dilonga dietu dia mu dîku dia kumpala, ne tuvua bakankamijibue bikole! Mu dituku dimuedimue adi, ngakajikija dibala dia mukanda eu. Kakuyi mpata mukanda eu mulenga newikale wa mushinga mukole kudi bonso badi badipetelawu. Bujalame buawu ne mamanyisha awu makanyine tshikondo bidi bifila tshijadiki tshikuabu tshia se: ‘Mupika wa lulamatu ne wa budimu’ udi ufila ‘biakudia mu tshikondo tshiakanyine’ ne mmumanye bimpe makengela etu mu bikondo ebi bia ntatu mikole.”​—Matayo 24:45-47, NW.

[Tshimfuanyi mu dibeji 7]

Bansonga pamue ne bakulumpe mbasue kumanya tshidi Nzambi ulomba