Diambuluisha bakuabu bua kulongabu malu malomba kudi Nzambi

‘Bualu budi bunkuata . . . , bua ndi ne mulawu bingikala tshiyi ngambila bantu lumu luimpe.’​—1 KOLINTO 9:16.

1, 2. (a) Mmudimu kayi wa bitupa bibidi udi Yehowa utulomba bua kuenza? (b) Ntshinyi tshidi bantu bena mitshima milulame ne bua kulonga bua kulua bakokedi ba Bukalenge bua Nzambi?

YEHOWA udi ne lumu luimpe bua bukua-bantu. Udi ne Bukalenge, ne mmusue bua bantu ba miaba yonso kumvuabu bualu buabu! Diakamue patudi tulonga lumu luimpe elu, Nzambi udi ulomba ne: tuluabanyangane ne bakuabu. Eu mmudimu wa bitupa bibidi. Tshia kumpala, tudi ne bua kumanyisha lumu luimpe lua Bukalenge bua Nzambi. Mu mulayi wende pa “nkomenu wa ndongoluelu wa malu eu,” Yezu wakamba ne: “Lumu luimpe elu lua bukalenge neluyishibue pa buloba buonso buasa bu bumanyishi kudi matunga onso; ne pashishe nshikidilu nealue.”​—Matayo 24:3, 14, NW.

² Tshitupa tshibidi tshia mudimu eu tshidi tshilomba dilongesha aba badi bandamuna biakane ku dimanyisha dia Bukalenge. Kunyima kua dibiishibua diende, Yezu wakambila musumba munene wa bayidi bende ne: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia [“spiritu munsantu,” NW], nubayishe mua kuenza malu onso [“angakanutumina dîyi,” NW]; ne monayi, ndi n’enu matuku onso too ne kunshikidilu kua tshikondo etshi.’ (Matayo 28:19, 20) Malu ‘avua Kristo mutumine dîyi’ kâvua mafume kudiye; wakalongesha bakuabu bua kutumikila mêyi-matuma a Nzambi, peshi malu malomba ende. (Yone 14:23, 24; 15:10) Nunku kulongesha bakuabu bua ‘kutumikila malu avua Kristo mutumine dîyi’ (NW) kudi kumvuija dibambuluisha bua kulongabu malu malomba kudi Nzambi. Bantu bena mutshima mululame badi ne bua kukumbaja malu malomba kudi Nzambi bua kuluabu bakokedi ba Bukalenge buende.

3. Bukalenge bua Nzambi ntshinyi, ne ntshinyi tshiakumbajabu tshidi tshivuija mukenji wa Bukalenge lumu luimpe bu nunku?

³ Bukalenge bua Nzambi ntshinyi? Ne ntshinyi tshienzabu tshidi tshivuija mukenji wa Bukalenge lumu luimpe lua mushindu’eu? Bukalenge bua Nzambi mmbulamatadi wa mu diulu. Budi ne mushinga ku mutshima wa Yehowa, bualu ku diambuluisha diabu neasantuishe dîna diende, uditokesha ku ditobolola dionso. Bukalenge budi tshiamu tshia mudimu tshiatumika natshi Yehowa bua kukumbaja disua diende pa buloba anu bu mudidi dienzeka mu diulu. Ke bua tshinyi Yezu wakatulongesha bua kusambila bua Bukalenge bua Nzambi bulue ne wakatulomba bua kubuteka pa muaba wa kumpala mu nsombelu yetu. (Matayo 6:9, 10, 33) Udi mumone bua tshinyi bidi bia mushinga muvule kudi Yehowa bua tuetu kulongesha bakuabu bualu bua Bukalenge buende anyi?

Mudimu udi usankisha kadi ki mbujitu

4. Mmunyi mutudi mua kufila tshilejilu tshidi tshileja ne: dienzejibua dietu bua kuyisha lumu luimpe kadiena bujitu?

⁴ Bidi bujitu bua kuyisha lumu luimpe elu anyi? Nansha kakese! Tshilejilu: Tatu udi muenzejibue bua kupetesha dîku diende bintu bia ku mubidi. Dipanga kuenza nunku didi diangatshibua bu dipidia ditabuja dia Buena-nkristo. Mupostolo Paulo wakafunda ne: “Bushuwa bikala kampanda kayi upetesha badi bena diende [bidi bikengedibua], ne nangananga bua bena mu nzubu muende, mmuvile ditabuja ne mmubi kupita muntu mupange ditabuja.” (1 Timote 5:8, NW) Kadi dienzejibua adi didi bujitu kudi mulume muena nkristo anyi? Tòo, bikalaye munange dîku diende, bualu mu nsombelu eu udi musue kubapetesha bidi bikengela.

5. Nansha mudi mudimu wa diyisha ne wa dienza bayidi muikale dienzejibua, bua tshinyi tudi ne bua kuikala ne milowo bua kudifilamu?

⁵ Bia muomumue, mudimu wa diyisha ne dienza bayidi ndienzejibua, mbualu bulomba, kudi mioyo yetu mene misuikakajilaku. Paulo wakabileja mushindu’eu: ‘Bualu budi bunkuata . . . , bua ndi ne mulawu bingikala tshiyi ngambila bantu lumu luimpe.’ (1 Kolinto 9:16; fuanyikija ne Yehezekele 33:7-9.) Nansha nanku, dinanga ke didi ditusaka bua kuyisha, ki mbualu mmudimu mutuomekela. Tshia kumpala, tudi banange Nzambi, kadi tudi banange kabidi bantu netu, ne tudi bamanye mudibi bia mushinga bua kumvuabu lumu luimpe. (Matayo 22:37-39) Lumu elu ludi lubapesha ditekemena bua matuku atshilualua. Bukalenge bua Nzambi nebuakaje dipanga buakane mu tshitupa tshîpi emu, nebumbushe difinakaja dionso, ne kupingajilula ditalala ne buobumue​—bionso ebi bua dibenesha dia tshiendelele dia aba badi bakokela bukokeshi buabu buakane. Katuenaku basangale, eyowa balengibue ku muoyo bua kuabanyangana lumu luimpe bu elu ne bakuabu anyi?​—Musambu 110:3.

6. Bua tshinyi mudimu wa diyisha ne dienza bayidi udi muikale lutatu lua bushuwa?

⁶ Tshidibi, mudimu wa diyisha ne dienza bayidi udi lutatu lua bushuwa. Bantu mbashilangane. Bonso kabena ne makokeshi a mumue peshi basankisha kudi malu a mumue. Bamue badi ne dimanya mukanda divule, eku bakuabu badi ne dimanya mukanda dikese menemene. Kubala​—kuvua kumpala dijikija lutetuku dianyishibue—​kudi mpindieu kuangatshibua misangu mivule bu mudimu mukole. Dipetu dia mukanda, didibu bumvuija bu “ngikadilu peshi nsombelu wa dikala ne makokeshi a kubala kadi kubenga kudifila ku dibala,” mbualu budi buenda budiunda, nansha mu matunga adi aditumbisha mudiwu ne muayene wa dimanya mukanda mutumbuke. Nunku, mmunyi mutudi mua kuambuluisha bantu badi ne nsombelu ne bipatshila bishilangane nunku bua kulonga tshidi Nzambi ulomba?​—Fuanyikija ne 1 Kolinto 9:20-23.

Bapetesha bia-mudimu bikumbanyine bua kuambuluisha bakuabu

7. Mmunyi mudi “mupika wa lulamatu ne wa budimu” mutupeshe bia-mudimu bua kuambuluisha bakuabu bua kulonga malu malomba kudi Nzambi?

⁷ Mudimu wa lutatu udi upepela kuwenza biwikala ne biamu bia mudimu bikumbanyine peshi bia didikuatshisha nabi. Tshiamu tshia mudimu tshidi tshikumbanyine mudimu wa pa buawu lelu’eu badi mua kutshikudimuna anyi kutshishintulula ne tshikuabu malaba bua dishintuluka dia makengela. Mbia muomumue bua mudimu mutuomekela wa kumanyisha mukenji wa Bukalenge bua Nzambi. Mu bule bua bidimu, “mupika wa lulamatu ne wa budimu” mmutupeshe biamu bimpe bia mudimu, mikanda milongolola mu mushindu musunguluke bua ditumika nayi mu dilombola dia malonga a Bible ku nzubu. (Matayo 24:45) Nunku tuvua bapetesha bia-mudimu bua kuambuluisha bantu ba “matunga onso ne bisamba ne . . . miakulu” bua kulonga malu malomba kudi Nzambi. (Buakabuluibua 7:9) Ku musangu ku musangu, biamu bia mudimu bia pa mutu biakafidibua bua kukumbaja makengela adi ashintuluka mu budimi pa buloba bujima. Tukonkononayi bilejilu bikese.

8. (a) Ntshinyi tshiakakumbaja mukanda wa “Que Dieu soit reconnu véridique” mu dilubuluja dilongesha dia Bible? (b) Ntshia-mudimu kayi tshiakafidibua mu 1968 bua mudimu wa dilonga dia Bible, ne mmunyi muvuatshi tshilongolola mu mushindu wa pa buawu? (c) Mmunyi muakambuluisha mukanda wa Bulelela mu mudimu wa dienza bayidi?

⁸ Biangatshile ku 1946 too ne mu 1968, mukanda wa “Que Dieu soit reconnu véridique” uvua mutumika nawu bu tshiamu tshia mudimu tshia bukole bua dilongesha Bible, ne bakapatula kopi bu 19 250 000 mu miakulu 54. Mupatula mu 1968, mukanda wa Bulelela budi bufikisha ku muoyo wa kashidi uvua bua bidimu bivule mutumika nawu mu mushindu mulengele mu dilonga Bible ne bantu badi ne dijinga dia kumanya. Kumpala, bivua tshibidilu bua bamue bantu kulonga ne Bantemu ba Yehowa bidimu ne bidimu kabayi batambula. Kadi tshia-mudimu etshi tshivua tshilongolola bua mulongi kudifilaye, tshimukankamija bua kutumikila bivuaye ulonga. Tshipeta? Mukanda wa Les Témoins de Jéhovah: Prédicateurs du Royaume de Dieu udi wamba ne: “Mu bidimu bisatu bia mudimu bituadije mu dia 1 Kabitende 1968, ne bishikile mu dia 31 Tshimungu 1971 bungi busangisha bua bantu 434 906 bakatambula​—bapite misangu ibidi bungi bua bakatambula mu bule bua bidimu bisatu bia mudimu bishale!” Biangatshile ku dipatuka diawu, mukanda wa Bulelela mmufike ku bungi bukemeshi​—bupite pa 107 000 000 mu miakulu 117.

9. Ntshintu kayi tshia pa buatshi tshidi natshi mukanda wa Muoyo wa kashidi, ne mbuenzeji kayi buvuawu nawu pa milongo ya bamanyishi ba Bukalenge?

⁹ Mu 1982 mukanda wa Udi mua kuikala ne muoyo wa kashidi pa buloba bukudimuna mparadizu wakalua mukanda munene mutumika nawu mu dilombola malonga a Bible. Tshia-mudimu etshi tshidi ne bimfuanyi bia kutangila bipite pa 150, tshimfuanyi tshionso tshikale ne mêyi adi atshiumvuija malenga adi azangika mu tshikoso dilongesha dileja pa bimfuanyi. Nimero wa Mudimu wetu wa Bukalenge wa Kasuamansense 1982 (Anglais) wakamba ne: “Mu bidimu bu 20 bivua mukanda wa ‘Que Dieu soit reconnu véridique’ muikale mukanda wetu munene wa dilongesha (biangatshile ku 1946 too ne munkatshi mua bidimu bia 1960) bamanyishi bapiabapia ba Bukalenge bapite pa 1 000 000 bakasakidibua mu milongo yetu. Pashishe bambi bakuabu 1 000 000 bakasakidibua pakalua mukanda wa Bulelela budi bufikisha ku muoyo wa kashidi mukanda wetu munene wa dilongesha panyima pa dipatuka diawu mu 1968. Mu ditumika ne mukanda wetu mupiamupia wa dilongesha, Udi mua kuikala ne muoyo wa kashidi pa buloba bukudimuna mparadizu, netumone didiunda dia muomumue mu milongo ya bambi ba Bukalenge anyi? Bushuwa, bikalabi disua dia Yehowa!” Kakuyi mpata bivua disua dia Yehowa, bualu biangatshile mu 1982 too ne mu 1995, bantu 2 700 000 bakasakidibua ku milongo ya bamanyishi ba Bukalenge!

10. Ntshia-mudimu kayi tshipiatshipia tshiakafidibua mu 1995, ne bua tshinyi tshidi ne bua kuenzeja balongi ba Bible bua benze malubuluka mimpe a mu nyuma pa lukasa?

¹⁰ “Bintu bia kunowa bidi bia bungi kadi bena mudimu badi banya-banya,” ke muakamba Yezu. (Matayo 9:37) Bushuwa, dinowa didi dinene. Kutshidi bivule bia kuenza. Mu amue matunga bantu badi ne bua kudifundisha ku liste wa dindila bua malonga a Bible. Nunku ne lungenyi lua dimuangalaja dimanya dia Nzambi ne lukasa luvule, mu 1995 “mupika wa lulamatu ne wa budimu” wakafila tshia-mudimu tshipiatshipia, mukanda wa mabeji 192 udi ne tshiena-bualu ne: Dimanya didi difikisha ku muoyo wa kashidi. Tshia-mudimu etshi tshia mushinga katshiena tshimanyina pa malongesha a dishima. Tshidi tshileja malelela a mu Bible mu mushindu udi wibaka. Mbitekemenyibue se: newambuluishe balongi ba Bible bua kuenza bimpe malubuluka a mu nyuma a lukasa. Mukanda wa Dimanya ukadi ne buenzeji mu budimi pa buloba bujima ne kopi 45 500 000 mipatula mu miakulu 125 ne udi wenda ukudimunyibua mu miakulu ya pa mutu 21.

11. Ntshia-mudimu kayi tshilenga tshiakafidibua bua kuambuluisha bua kulongesha aba badi kabayi bamanye mukanda peshi badi babala ne lutatu, ne mmunyi muditshi tshituale buenzeji bukole pa programe wetu wa dilongesha wa pa buloba bujima?

¹¹ Ku musangu ku musangu, ‘mupika wa lulamatu’ mmufile bia-mudimu bilongolola bua tshisumbu tshia bantu tshisunguluke anyi tshikepele. Tshilejilu, ntshinyi tshìdì tshienza bua bantu badi mua kukengela diambuluisha dia pa buadi bua nsombelu wa nshidimukilu wabu anyi wa tshitendelelu tshiabu? Mmunyi mutudi mua kubambuluisha bua kulonga malu malomba kudi Nzambi? Mu 1982 tuakapeta anu tshituvua tukengela​—broshire wa mabeji 32 wa Ikalayi ne muoyo wa kashidi ne disanka pa buloba! Mukanda eu wa bimfuanyi bivule udi muikale tshia-mudimu tshilenga mu dilongesha aba bakena bamanye mukanda peshi badi babala ne lutatu. Udi ne dileja ditekete menemene ne dipepele kumvua dia malongesha a ntaku a mu Mifundu. Biangatshile ku dipatuka diende, broshire wa Ikalayi ne muoyo mmufile dikuatshisha dinene mu programe wetu wa dilongesha wa pa buloba bujima. Kopi mipite pa 105 100 000 mmipatula mu miakulu 239, bimuenza mukanda mutambe kukudimuna ku yonso idi Société Watch Tower mupatule too ne ku lelu!

12, 13. (a) Biangatshile mu 1990, ‘mupika wa lulamatu’ wakafila mushindu kayi mupiamupia wa dilenga nawu misumba ya bantu mialabale? (b) Mmunyi mutudi mua kutumika ne tusete tua video tua Société mu mudimu wetu wa budimi? (c) Ntshia-mudimu kayi tshipiatshipia tshiakafidibua mu matuku mashale aa bua kuambuluisha mudimu wetu wa dienza bayidi?

¹² Kusakidila ku mikanda mitapa ku biamu, biangatshile ku 1990 ‘mupika wa lulamatu’ mmutupeteshe tshia-dilongesha natshi tshidi tshifila mushindu mupiamupia bua kulenga misumba ya bantu mialabale​—tusete tua video. Mu Kasuamansense wa tshidimu atshi, kasete ka video ka minute 55 ka Les Témoins de Jéhovah: un nom, une organisation kakapatuka​—kasete ka video ka kumpala kenza kudi Société Watch Tower. Kasete aka kalengele ne kadi ne mamanyisha, kadiku mu miakulu 35, kadi kaleja bulongolodi bua pa buloba bujima bua bantu badifile kudi Yehowa badi bakumbaja dîyi-dituma dia kumanyisha lumu luimpe pa buloba bujima. Kasete aka nkalongolola nangananga bua kuambuluisha mu mudimu wetu wa dienza bayidi. Bambi ba Bukalenge kabakajimija dîba bua kutumika ne tshia-mudimu etshi tshipiatshipia mu mudimu wa budimi. Bamue bakaya naku mu bibuta biabu bia mikanda, badiakaje dîba dionso bua kuleja anyi kukasombesha bantu badi ne dijinga dia kumanya. Tshitupa tshîpi panyima pa dipatuka diaku, mutangidi muena ngendu umue wakafunda ne: “Tusete tua video ntulue bia-mudimu bia mu siekele wa 21 bia kulenga nabi bieledi bia lungenyi ne mitshima bia miliyo ya bantu, nunku tudi ne ditekemena dia se: kasete aka nekikale ka kumpala ka ku tuvule tuatumika natu Société bua kulubuluja mudimu wa pa buloba bujima wa Bukalenge.” Bushuwa, tusete tua video ntupatula, kusangisha ne kasete ka bitupa bisatu ka La Bible: un livre historique et prophétique ne ka Jehovah’s Witnesses Stand Firm Against Nazi Assault (Bantemu ba Yehowa badi bakandamena dibunda dia bena Nazi). Bikala tusete tua video tua Société tuikaleku mu muakulu webe, ukadi mutumike natu mu mudimu wa budimi anyi?a

¹³ Mu matuku adi mashale aa tshia-mudimu tshipiatshipia, broshire wa Ntshinyi tshidi Nzambi utulomba?, tshiakafidibua bua kuambuluisha mu mudimu wetu wa dienza bayidi. Bua tshinyi bakamupatula? Mmunyi mutudi mua kutumika nende?

Dikonkonona tshia-mudimu tshipiatshipia

14, 15. Broshire wa Utulomba mmulongoluela banganyi, ne mmalu kayi adimu?

¹⁴ Mukanda eu mupiamupia wa Ntshinyi tshidi Nzambi utulomba? mmulongoluela bantu badi bamane kuitabuja Nzambi ne banemeka Bible. Batangidi bena-ngendu pamue ne bamisionere balongesha ku Gilada badi ne bidimu bivule bia dimonamona malu mu matunga mapele bakambuluisha mu dilongolola dia broshire eu. Mudi malu a dilongesha dialabale, didi dilenga malongesha a ntaku a Bible. Mfundilu ng’wa musangelu, mupepele, ne wa buludiludi. Tshidibi, bìdì bifundamu kabiena bipepele menemene. Kêna anu “mabele” kadi udi kabidi ‘tshiakudia tshikole’ tshia mu Dîyi dia Nzambi mu mushindu udi bantu bavule ne bua kufika ku diumvua.​—Ebelu 5:12-14.

¹⁵ Mu bidimu bishale ebi bambi ba Bukalenge mu matunga mavule bakalomba menemene mukanda anu bu eu. Tshilejilu, filiale wa Société Watch Tower mu Papouasie-Nouvelle-Guinée wakafunda ne: “Bantu mbalubakaja kudi malongesha mabengangane pa malu a Nzambi. Badi bakengela malelela majikula mu tshikoso, masanyika kudi imue mvese ya mu Bible idibu mua kukeba mu Bible yabu nkayabu. Badi bakengela dileja ditokesha ne disunguluke dia tshidi Nzambi ulomba kudi bena nkristo balelela ne bilele ne ngenzelu bikena bianyisha kudiye.” Broshire wa Utulomba udi anu tshitudi tukengela bua kuambuluisha bantu ba mushindu’eu bua kulonga malu malomba kudi Nzambi.

16. (a) Mbanganyi badi mua kubabidila mu mushindu wa pa buawu mumvuija mapepele a mu broshire mupiamupia? (b) Mmunyi mudi aba badi mu teritware webe mua kubabidila broshire wa Utulomba?

¹⁶ Mmunyi muudi mua kutumika ne tshia-mudimu etshi tshipiatshipia? Tshia kumpala, udi mua kutumikibua nende bua kulonga ne bantu badi babala ne lutatu anyi badi kabayi ne tshinyikilu tshia kubala.b Bantu bu aba badi mua kubabidila mumvuija mapepele mu broshire eu. Panyima pa dikonkonona kumpala kua dipatuka dia kopi wa mukanda eu, filiale ya Watch Tower yakafunda ne: “Broshire eu neyikale ne dikuatshisha dinene mu bitupa bivule bia ditunga mudi bantu kabayi basue kubala bikole.” (Brésil) “Kudi bungi buvule bua bena tshimuangi badi kabayi mua kubala muakulu wabu wa tshilelelu ne batshidi ne lutatu mu dibala Mfualansa. Badi mua kutumika ne broshire eu bu tshiambuluishi bua kulonga ne bantu bu aba.” (France) Udiku mua kuela meji bua bantu ba mu teritware webe badi mua kupetela disanka ku broshire wa Utulomba anyi?

17. Mmu mushindu kayi udi broshire eu mupiamupia mua kuikala ne dikuatshisha mu matunga mavule, ne mbua tshinyi?

¹⁷ Tshibidi, mu matunga mavule broshire eu udi mua kuikala ne dikuatshisha bua kubangisha malonga a Bible ne bantu batshinyi ba Nzambi kabiyi kutangila dimanya diabu dia mukanda. Bushuwa, madikolela adi ne bua kuenjibua bua kutuadija dilonga mu mukanda wa Dimanya didi difikisha ku muoyo wa kashidi. Kadi imue misangu bidi mua kuikala bitambe kupepela bua kutuadija dilonga mu broshire kampanda. Pashishe mu tshikondo tshiakanyine, dilonga didi ne bua kubuejibua mu mukanda wa Dimanya, tshiambuluishi tshietu tshia dilonga tshinene ne tshitamba kujinga. Pa bidi bitangila ditumika ne broshire wa Utulomba, filiale ya Société Watch Tower yakafunda ne: “Kutuadija malonga a Bible nkukole, ne mishindu ya kutuadija dilonga idi itamba kumueneka padi bambi batuadija ne broshire.” (Allemagne) “Broshire wa mushindu’eu neatambe kupatula bipeta mu dituadija malonga a Bible mapiamapia, adi panyima mua kutungunuka mu mukanda wa Dimanya.” (Italie) “Nansha mudi bena Japon bikale ne dimanya mukanda dibandile, bavule ba kudibu badi ne dimanya dikepele menemene dia Bible ne malongesha ende a ntaku. Broshire eu udi ne bua kuikala dibue dia kubuelela mu mukanda wa Dimanya.”​—Japon.

18. Ntshinyi tshitudi ne bua kuvuluka pa bidi bitangila dikumbaja malu malomba kudi Nzambi?

¹⁸ Filiale ya Société pa buloba bujima yakalomba broshire eu, ne dianyisha diakafidibua bua kumukudimuna mu miakulu 221. Mukanda eu mupiamupia udi udileja wa mushinga mu ditukuatshisha bua kuambuluisha bakuabu bua kulongabu tshidi Yehowa Nzambi ubalomba. Ku luetu luseke, tuvuluke ne: dikumbaja malu malomba kudi Nzambi, kukonga dîyi-dituma dia kuyisha ne kuenza bayidi, didi ditupesha mushindu wa mushinga wa kuleja Yehowa bunene bua dinanga dietu kudiye. Eyowa, tshidi Nzambi utulomba katshiena bujitu. Mmushindu mutambe bulenga wa nsombelu!​—Musambu 19:7-11.

[Mêyi adi kuinshi]

Udi mua kumvuija anyi?

◻ Mmudimu kayi wa bitupa bibidi udi Yehowa ulomba basadidi bende bua kuenza?

◻ Bua tshinyi dienzejibua dietu bua kuyisha ne kuenza bayidi kadiena bujitu kutudi?

◻ “Mupika wa lulamatu ne wa budimu” mmufile bia-mudimu kayi bia ditumika nabi mu mudimu wetu wa diyisha ne dienza bayidi?

◻ Mbanganyi badi broshire wa Utulomba mulongoluela, ne mmunyi mutudi mua kutumika nende mu mudimu wetu?

[Tshimfuanyi mu dibeji 24]

Mudimu wetu wa diyisha ne dienza bayidi kawena bujitu

[Bimfuanyi mu dibeji 26]

“Que Dieu soit reconnu véridique” (1946, mufundulula mu 1952): 19 250 000 mu miakulu 54

“Bulelela budi bufikisha ku muoyo wa kashidi” (1968): 107 000 000 mu miakulu 117 (Muleja mu Mfualansa)

“Udi mua kuikala ne muoyo wa kashidi pa buloba bukudimuna mparadizu” (1982): 80 900 000 mu miakulu 130 (Muleja mu tshiena-Russie)

“Dimanya didi difikisha ku muoyo wa kashidi” (1995): 45 500 000 mu miakulu 125 (Muleja mu tshiena-Allemagne)