Tuikale ne “lungenyi luimpe” bu mudi nshikidilu wenda usemena pabuipi

“Nshikidilu wa bintu bionso wasemenyi pabuipi. Pa nanku, ikalayi ne lungenyi luimpe.”​—1 PETELO 4:7, NW.

1. Dikala “ne lungenyi luimpe” didi diumvuija tshinyi?

MÊYI a mupostolo Petelo adi kuulu eku adi ne bua kuikala ne buenzeji bukole pa nsombelu wa bena nkristo. Kadi, Petelo kakambila babadi bende bua kudiumbushabu ku majitu a panu ne ku malu a mu nsombelu a kutabalela; kakakankamija nansha mmuenenu wa dilubakana lubaluba pa kabutu kakavua pabuipi. Kadi, wakabela ne: “Ikalayi ne lungenyi luimpe.” Kuikala “ne lungenyi luimpe” kudi kumvuija dileja busolakaji buimpe bua malu, dikala ne tshiumvuidi, ne budimu, ne butshintshikidi mu ngakuilu ne mu bienzedi bietu. Kudi kumvuija dianyisha bua Dîyi dia Nzambi kukokeshadi ngelelu wetu wa meji ne bienzedi bietu. (Lomo 12:2) Bu mutudi “munkatshi mua bena tshikondo tshikonyangala ne tshia tshishiku,” bidi bilomba lungenyi luimpe bua kuepuka bilumbu ne ntatu.​—Filipoi 2:15.

2. Mmunyi mudi lutulu lua Yehowa lukuatshisha bena nkristo lelu’eu?

² “Lungenyi luimpe” ludi kabidi lutuambuluisha bua kuikala ne mmuenenu mutshintshikila ne mulelela wa tshitudi tuetu bine. (Tito 2:12; Lomo 12:3) Ebi bidi ne mushinga pa kumona mêyi mafunda mu 2 Petelo 3:9 (NW): “Yehowa kêna ujanguluka bua bidi bitangila dilaya diende, bu mudi bamue bantu bamona dijanguluka, kadi udi nenu lutulu bualu kêna ujinga bua muntu nansha umue abutudibue kadi udi ujinga ne: bonso bafike ku dinyingalala.” Bambisha ne: Yehowa udi ne lutulu, ki ng’anu ne badi kabayi bena kuitabuja, kadi udi kabidi “nenu” lutulu​—nuenu bena mu tshisumbu tshia Buena-nkristo. Bua tshinyi? Bualu “kêna ujinga bua muntu nansha umue abutudibue.” Pamu’apa bamue batshidi amu ne bua kuenza mashintuluka ne makajilula bua kumona mua kukumbaja malu malomba bua dipa dia muoyo wa kashidi. Pa nanku, tutangilayi imue nsombelu mutudi tukengela kuenza amue makajilula.

“Lungenyi luimpe” mu malanda etu nkayetu

3. Nnkonko kayi idi baledi mua kudiela pa bidi bitangila bana babu?

³ Nzubu udi ne bua kuikala tshikishilu tshia ditalala. Kadi bua bamue utu ‘nzubu mûle tente ne . . . diyoyo.’ (Nsumuinu 17:1) Bidi munyi bua dîku diebe? Nzubu webe mmupange kuikala ne “tshiji, matandu, bipendu” anyi? (Bena Efeze 4:31, MMM) Netuambe tshinyi bua bana bebe? Badiku badiumvua banangibue ne banyishibue anyi? (Fuanyikija ne Luka 3:22.) Utuku upeta dîba dia kubashidimuna ne kubakela anyi? Udi ‘ubakolesha mu buakane’ pamutu pa kuenza nunku ne luonji ne tshiji anyi? (2 Timoteyi 3:16, MMM) Bu mudi bana bikale “bu[mp]ianyi bufume kudi Yehowa,” udi utabalela bikole mushindu udibu babangata.​—Musambu 127:3.

4. (a) Ntshipeta kayi tshidi mua kumueneka bu bikala mulume wenzela mukajende malu mu mushindu mukolakane? (b) Mmunyi mudi bakaji mua kulubuluja ditalala ne Nzambi pamue ne diakalenga mu dîku dijima?

⁴ Netuambe tshinyi bua muena dibaka netu? “Balume badi ne bua kunanga bakaji babo bu mudibo banange mibidi yabo bobo bine. Kunanga mukajiebe nkudinanga wewe muine. Katshia, muntu kena muanji kubenga mubidi wende; kadi udi uudisha ne uwengeleka kabidi. Ke mudi Kristo wenzela [“tshisumbu,” NW] tshiende.” (Bena Efeze 5:28, 29, MMM) Mulume muena bulaku, udi ukokesha ne makoyi, peshi udi kayi ne butshintshikidi kêna anu uteka bupole bua nzubu wende mu njiwu, kadi udi unyanga malanda ende ne Nzambi. (1 Petelo 3:7) Tuambe bishi bua bakaji? Buobu pabu badi ne bua ‘kukokela babayabu bu mudibu bakokela Mukalenge.’ (Efeso 5:22) Diela meji mu mushindu wa kusankisha Nzambi didi mua kuambuluisha mukaji bua kulengulula bilema bia bayende ne kumukokela kakuyi njiya. Imue misangu, mukaji udi mua kudiumvua muenzejibue bua kumvuija patoke muende mudiye namu. Nsumuinu 31:26 udi wamba bua mukaji wa tshitembu ne: ‘Udi ubulula mukana muende ne meji, diyisha dia luse didi pa ludimi luende.’ Pa kuenzela bayende malu mu mushindu muimpe ne wa kanemu, udi ulama ditalala ne Nzambi, ne udi ulubuluja diakalenga dia dîku dijima.​—Nsumuinu 14:1.

5. Bua tshinyi bansonga badi ne bua kulonda mubelu wa mu Bible udi utangila mudibu ne bua kuangata baledi babu?

⁵ Bansonga, mmunyi munudi nuangata baledi benu? Nudi nutumika ne ngakuilu wa disendeka, mupange kanemu udi bulongolodi ebu buanyisha misangu yonso anyi? Peshi nudi nutumikila dîyi-dituma edi dia mu Bible: “Nuenu bana, nutumikile baledi benu bualu bua Mfumu; ke tshidi tshiakane. Unemeke tatuebe ne mamuebe, ke diyi dia kumpala didi dienda pamue ne dilaya dia ne: bua wikale ne diakalenga, ulale matuku a bungi pa buloba”?​—Bena Efeze 6:1-3, MMM.

6. Mmunyi mutudi mua kukeba ditalala ne batendeledi netu?

⁶ Tudi kabidi tuleja “lungenyi luimpe” patudi ‘tukeba ditalala ne tudilonda’ pamue ne batendeledi netu. (1 Petelo 3:11) Makokangana ne mapangangana bitu bijuka ku musangu ne ku musangu. (Yakobo 3:2) Bitualekela nkuna yenda ikola, ditalala dia tshisumbu tshijima didi mua kutekibua mu njiwu. (Galatia 5:15) Nenku jikijayi matandu pa lukasa; kebayi mishindu ya kuajikija mu ditalala.​—Matayo 5:23-25; Efeso 4:26; Kolosai 3:13, 14.

“Lungenyi luimpe” ne majitu a mu dîku

7. (a) Mmunyi muvua Paulo mukankamije dileja “lungenyi luimpe” mu malu a panu? (b) Mmuenenu kayi udi balume ne bakaji bena nkristo ne bua kuikala nende pa bidi bitangila majitu a mu nzubu?

⁷ Mupostolo Paulo wakabela bena nkristo bua “kuikala ne nsombelu wa lungenyi luimpe.” (Tito 2:12, NW) Bidi bikoka ntema bualu, mu mêyi adi kumpenga, Paulo udi ubela bakaji ‘bua kunangabu babayabu ne bana bakalelabu; bua kuikala ne [“lungenyi luimpe,” NW]; bua kuikala kabayi ne meji a tshiendenda; bua kusala mudimu wa mu nzubu yabu.’ (Tito 2:4, 5) Paulo wakafunda mêyi au mu bidimu bia 61-64 B.B., bidimu bikese kumpala kua nshikidilu wa ndongoluelu wa malu wa bena Yuda. Pabi, malu a panu, bu mudi mudimu wa mu nzubu, atshivua anu ne mushinga. Pa nanku, buonso buabu, balume ne bakaji bavua ne bua kulama mmuenenu mulenga ne muakane wa majitu abu a mu nzubu bua se: ‘dîyi dia Nzambi kadipendibu.’ Mfumu kampanda wa dîku wakalomba muenyi kansanga luse bua mmuenekelu wa nzubu wende uvua ukuatshisha bundu. Wakumvuija ne: nzubu kavua mulongolola “bualu uvua wenza bumpanda-njila.” Mbiakanyine ka-lumbandi bua kudibudisha amue malu bua bipatshila bia Bukalenge, kadi tudi ne bua kutabalela bua katuteki diakalenga dia mêku etu mu njiwu.

8. Mmunyi mudi bamfumu ba mêku mua kutabalela ne nkatshinkatshi bidi mêku abu akengela?

⁸ Bible udi ubela batatu bua badianjile kutabalela mêku abu, pa kuamba ne: eu udi kayi upetesha dîku diende bidi bikengedibua “mmuvile ditabuja ne mmubi kupita muntu ukena ditabuja.” (1 Timote 5:8, NW) Mu buloba bujima, nsombelu mmishilangane, ne bidi bimpe kulama budipope mu malu a bintu bia ku mubidi. “Kumpi bu[p]ele anyi bubanji nansha,” ke muakasambila mufundi wa Nsumuinu 30:8. Kadi, baledi kabena ne bua kulengulula majinga a ku mubidi a bana babu. Tshilejilu, bidi mua kuikala bia meji bua muntu kulekelaye dîku diende ku bukole kadiyi ne bintu bia nshindamenu bidi bikengedibua mu nsombelu bua kumona mua kuipatshila masanka a mudimu wa teokrasi anyi? Ebi kabiakufiikisha bana munda anyi? Ku luseke lukuabu, Nsumuinu 24:27 udi wamba ne: ‘Longolola mudimu webe pambelu, udilongolueleu mu budimi; pashishe wase nzubu webe.’ Eyowa, nansha mudi diditatshisha bua bintu bia ku mubidi dikale ne muaba wadi, ‘didiashila nzubu’​—mu nyuma ne mu mpampakenu​—ndia mushinga mukole.

9. Bua tshinyi mbia meji bua bamfumu ba mêku kuelabu meji ku mpukapuka ya lufu luabu anyi disama?

⁹ Udi mulongolole bidi bikengedibua bua kuambuluisha dîku diebe bu wewe mua kupeta lufu lua tshikoso anyi? Nsumuinu 13:22 udi wamba ne: ‘Muntu muimpe udi ushila bana ba bana bende bumpianyi.’ Kusakidila ku bumpianyi bua dimanya dia Yehowa ne dikala nende mu malanda, baledi nebatabalele bua kupetesha bana babu bidibu bakengela ku mubidi. Mu matunga a bungi, bamfumu ba mêku bakumbaji ba midimu yabu batu benza madikolela bua kuikala ne imue mpetu mibumba, dîyi dishiya bilondeshile mikenji, ne mfranga ya pansio. Ndekelu wa bionso, bantu ba Nzambi ki mbepula ku ‘bikondo bidi malu atulukilangana.’ (Muambi 9:11) Mfranga idi “ne dikuatshisha,” ne didianjila kulongolola malu ne lubatshi didi misangu mivule mua kuepula ntatu. (Muambi 7:12) Mu matunga mudi mbulamatadi kayi ufutshila bantu luondapu, bamue badi mua kusungula bua kuteka ku luseke mfranga idi mua kuambuluisha bua masama peshi kulongolola umue mushindu wa kukuba makanda a mubidi.a

10. Mmunyi mudi baledi bena nkristo mua “kulamina” bana babu bintu?

¹⁰ Mifundu idi kabidi yamba ne: “Bana ki mbadi balamina baledi mpetu nansha, anu baledi ke badi bayilamina bana babo.” (2 Bena Korente 12:14, MMM) Mu buloba ebu, bitu tshibidilu bua baledi kulaminabu bana babu mpetu bua kulongabu tulasa ne kuselanganabu mu matuku atshilualua, bua se: bana bapete ntuadijilu mulenga mu nsombelu wabu. Ukadiku muele meji bua kulamina muanebe bintu bia mu nyuma bua matuku ende atshilualua anyi? Tshilejilu, tshinkabi se: muana ukadi mukole udi wipatshila mudimu wa ku dîba ne ku dîba. Nansha mudi basadidi ba ku dîba ne ku dîba kabayi ne bua kulomba anyi kutekemena dikuatshisha dia kudi bakuabu, baledi bena dinanga badi mua kusungula bua ‘kumukuatshisha ne bintu bidiye ukengela’ bua kumona mua kumuambuluisha bua ashale mu mudimu wa ku dîba ne ku dîba.​—Lomo 12:13; 1 Samuele 2:18, 19; Filipoi 4:14-18.

11. Dikala ne mmuenenu mulelela bua mfranga didi dileja dipanga ditabuja anyi? Umvuija.

¹¹ Dikala ne mmuenenu mulelela bua mfranga kadiena dileja dipanga kuitabuja ne: ndongoluelu mubi wa Satana udi pabuipi ne nshikidilu wende. Bidi anu muanda wa kuleja “meji makuatshishi” ne disunguluja diakane dia malu. (Nsumuinu 2:7, NW; 3:21) Yezu wakamba umue musangu ne: “bana ba mu ndongoluelu eu wa malu badi ne meji mu mushindu mukuatshishi . . . kupita bana ba butoke” mu ntumikilu wabu ne mfranga. (Luka 16:8, NW) Nenku, kabiena bikemesha mudi bamue bamone dikengela dia kuenza makajilula mu mushindu udibu batumika ne mpetu yabu, bua kumonabu mua kutabalela bilenga bidi mêku abu akengela.

“Lungenyi luimpe” mu mmuenenu wetu pa malonga

12. Mmunyi muvua Yezu mulongeshe bayidi bende bua kuibidila ne nsombelu mipiamipia?

¹² “Tshimuenekelu tshia bulongolodi ebu tshidi tshienda tshishintuluka,” ne mashintuluka manene mu malu a mpetu ne dimanya dia malu a biamu adi enda enzeka ne lukasa. (1 Kolinto 7:31, NW) Kadi, Yezu wakalongesha bayidi bende bua kuibidila ne nsombelu yonso. Wakabambila pakabatumaye mu kampanye kabu ka kumpala ka diyisha ne: ‘Kanuditekedi ngolo ne tshiamu tshia argent ne tshiamu tshia mitaku mu mikaba yenu. Kanuangatshi tshibombi tshia kuya natshi mu njila, kanuangatshi bikowelu bibidi ne bisabata bikuabu ne tshibangu, bualu bua muena mudimu udi ne buakane bua kupeta bidia biende.’ (Matayo 10:9, 10) Kadi, musangu mukuabu pashishe, Yezu wakamba ne: “Udi ne tshibombi atshiangate, bia muomumue ne udi ne tshibuta.” (Lukase 22:36, MMM) Ntshinyi tshivua tshishintuluke? Nnsombelu. Nsombelu uvuaku mu malu a Nzambi uvua mulue mukole be, ne mpindieu bavua ne bua kudiambuila bivuabu bakengela.

13. Malonga adi ne tshipatshila kayi tshinene, ne mmunyi mudi baledi mua kukuatshisha bana babu mu bualu ebu?

¹³ Bia muomumue lelu’eu, baledi badi mua kujinga kuangata ne mushinga nsombelu milelela idiku mu malu a mpetu. Tshilejilu, udiku udienzeja bua kujadika ne: bana bebe badi bapeta ndongeshilu mukumbanyine mu tulasa anyi? Tshipatshila tshinene tshia malonga tshidi ne bua kuikala tshia kupetesha nsonga bidiye ukengela bua kuikalaye ministre mukumbane wa Yehowa. Ne ndongeshilu mutambe mushinga ku yonso ng’wa mu nyuma. (Yeshaya 54:13) Baledi badi kabidi batabalela bukokeshi bua bana babu bua kudikuatshishabu mu malu a mfranga. Nenku peshayi bana benu buludiki, bambuluishayi bua kusungula malonga makanyine, ne yukilayi nabu pikalabi bia meji anyi kabiyi bia meji bua kutungunuka ne malonga a pa mutu. Mapangadika a nunku adi bujitu bua dîku, ne bakuabu kabena ne bua kujana njila wikalabu basungule. (Nsumuinu 22:6) Netuambe tshinyi bua aba badi basungule bua kulongeshila bana babu kumbelu?b Nansha mudi bavule benze mudimu muakanyine ka-lumbandi, bamue mbamone mudimu eu mukole kupita muvuabu bele meji, ne bana babu mbapangile ndongeshilu muakanyine. Nenku, biwikala wela meji bua dilongeshila dia kumbelu, ikala mujadike bua kutshinka mushinga, pa kupima mu mushindu mulelela biwikala ne nzanzu pamue ne didienzeja bidi bikengedibua bua kutua ku ndekelu.​—Luka 14:28.

‘Kudikebedi malu manene nansha’

14, 15. (a) Mmunyi muakajimija Baruke nkatshinkatshi wende wa mu nyuma? (b) Bua tshinyi bivua dibula dia meji bua yeye ‘kudikebela malu manene’?

¹⁴ Bu mudi nshikidilu wa ndongoluelu eu wa malu kayi muanji kulua, bamue badi mua kuikala bakokibue bua kukeba bidi bulongolodi ebu mua kufila​—midimu ya lumu, ya mfranga ya bungi, pamue ne bubanji. Tangila Baruke, mufundi wa Yelemiya. Wakadilakana ne: ‘Ndi ne mulawu! Bualu bua Yehowa wakatentakaja kanyinganyinga pa mutu pa dikenga dianyi; ndi mupungile ne kutua kuanyi kua mikemu, ne tshiena mpeta dikisha.’ (Yelemiya 45:3) Baruke uvua mupungile. Disadila bu mufundi wa Yelemiya divua mudimu mukole, wa lutatu lua bungi. (Yelemiya 36:14-26) Ne lutatu elu lukole luvua lumueneka bu luvua kaluyi ne ndekelu. Luvua ne bua kujika bidimu 18 kumpala kua Yeruzaleme kubutudibuaye.

¹⁵ Yehowa wakambila Baruke ne: ‘Mona, nensasule tshintu tshingakasa, nentule tshintu tshingakakuna; nengenze nunku mu buloba bujima. Wewe udi udikebela malu manene anyi? Yehowa udi wamba ne: Kudikebediwu nansha.’ Baruke ukavua mujimije nkatshinkatshi wende. Ukavua mutuadije ‘kudikebela malu manene,’ pamu’apa bubanji, lumu, peshi bukubi bua bintu bia ku mubidi. Bu muvua Yehowa muikale ‘utula bintu mu buloba bujima,’ dikeba bintu bia nunku divua ne mushinga kayi? Pa nanku, Yehowa wakapa Baruke divuluija edi didi dielesha meji: ‘Bualu bua mona, nentumine bonso ba pa buloba makenga. Kadi nenkupe muoyo webe bu tshintu tshiudi unyenga mu mvita mu miaba yonso iudi uya.’ Bintu bia ku mubidi kabivua ne bua kupanduka ku kabutu ka Yeruzaleme! Yehowa wakamujadikila anu bua lupandu lua ‘muoyo wende bu tshintu tshinyenga mu mvita.’​—Yelemiya 45:4, 5.

16. Ndilongesha kayi didi bantu ba Yehowa lelu’eu mua kupetela ku bualu bumona bua Baruke?

¹⁶ Baruke wakateya ntema ku diakaja dia Yehowa, ne mu dikumbana dia dilaya dia Yehowa, Baruke wakapanduka ne kushala ne muoyo. (Yelemiya 43:6, 7) Ndilongesha kayipu bua bantu ba Yehowa lelu’eu! Etshi ki ntshikondo tshia ‘tuetu kudikebela malu manene nansha.’ Bua tshinyi? Bualu “bulongolodi ebu budi bupita ne dijinga diabu kabidi.”​—1 Yone 2:17, NW.

Ditumika ditambe buimpe ne tshikondo tshidi tshishale

17, 18. (a) Ntshinyi tshiakumvua Yona pakanyingalala bena Ninive? (b) Ndilongesha kayi divua Yehowa mupeshe Yona?

¹⁷ Nunku, mmunyi mutudi mua kutumika bimpe menemene ne tshikondo tshidi tshishale? Longela ku bualu bumona kudi muprofete Yona. ‘Wakaya ku Ninive, . . . wakabanga kuela dîyi ne: Papita matuku makumi anayi, nebabutule Ninive.’ Bualu buvua Yona kayi muindile, bena Ninive bakandamuna bimpe ku mukenji wende ne bakanyingalala! Yehowa wakadikanda bua kubutula tshimenga atshi. Ntshinyi tshiakumvua Yona? ‘Yehowa, ndi nkusengelela ne: Angata muoyo wanyi; bualu bua kufua kudi kupita kushala ne muoyo buakane kundi.’​—Yona 3:3, 4; 4:3.

¹⁸ Pashishe Yehowa wakapesha Yona dilongesha dia mushinga. ‘Wakamenesha mudiantondo, wakaulepesha too ne pa mutu pa Yona, bua wikale dileji pa mutu pende . . . Nunku Yona wakatamba kusanka bua mudiantondo.’ Kadi, disanka dia Yona divua dia mutantshi muîpi, bualu mutshi eu wakuuma ne lukasa luonso. Yona ‘wakakuata tshiji’ bua lutatu luende. Yehowa wakela kashonyi pa bualu Buende, wamba ne: ‘Wewe udi unyingalala bua mudiantondo, . . . Meme tshiakadi ne bua kunyingalala bua Ninive, musoko au munene, mudi bantu binunu lukama ne makumi abidi badi kabayi mua kujingulula tshianza ne ntshia balume ne ntshia bakaji, ne mudi bimuna bia bungi kabidi anyi?’​—Yona 4:6, 7, 9-11.

19. Nngelelu kayi wa meji wa budinangi utudi ne bua kuepuka?

¹⁹ Mmunyipu muvua ngelelu wa lungenyi wa Yona muikale wa budinangi! Wakanyingalala bua mutshi, kadi kakumvua luse nansha lukese bua bantu ba mu Ninive​—bantu bavua, mu ngakuilu wa mu nyuma, ‘kabayi mua kujingulula tshianza ne ntshia balume ne ntshia bakaji.’ Tudi bia muomumue mua kujinga bikole bua kabutu ka bulongolodi ebu bubi kalue, ne mbiakanyine nanku! (2 Tesalonike 1:8) Kadi, mu dindila tudi ne bujitu bua kuambuluisha bantu bena mitshima milulame badi, mu ngakuilu wa mu nyuma, kabayi ‘bajingulule tshianza ne ntshia balume ne ntshia bakaji.’ (Matayo 9:36; Lomo 10:13-15) Neutumike ne tshikondo tshîpi tshidi tshishale bua kuambuluisha bantu ba bungi bua kupetabu dimanya dia mushinga mukole dia Yehowa anyi? Mmudimu kayi mene udi mua kuakanangana ne disanka dia kuambuluisha muntu bua kupetaye muoyo?

Tungunukayi ne kuikala ne nsombelu wa “lungenyi luimpe”

20, 21. (a) Mmu imue mishindu kayi mutudi mua kuleja “lungenyi luimpe” mu matuku atshidi kumpala? (b) Mmabenesha kayi afumina ku dikala ne nsombelu wa “lungenyi luimpe”?

²⁰ Bu mudi ndongoluelu wa Satana utungunuka ne ditukina diende mutangile ku kabutu, mbushuwa se: netupete ntatu mipiamipia. Timoteyi muibidi 3:13 (MMM) mmudianjile kuamba ne: “Benji ba bibi ne bena didinga, nebatungunuke ne dienza dia bibi bipite.” Kadi “kanupungidi ne kanuteketshi mu anyima yenu.” (Ebelu 12:3, NW) Eyemenayi Yehowa bua kupeta bukole. (Filipoi 4:13) Longayi mua kuikala bapepele, bua kuibidila ne nsombelu eyi idi yenda ibipa, pamutu pa kujinga malu a kale. (Muambi 7:10) Tumikayi ne meji makuatshishi, nuenda dikasa dimue ne bulombodi budi “mupika wa lulamatu ne wa budimu” ufila.​—Matayo 24:45-47, NW.

²¹ Katuena bamanye bule bua tshikondo tshidi tshishale. Kadi, ne dieyemena dionso tudi mua kuamba ne: “nshikidilu wa bintu bionso wasemenyi pabuipi.” Too ne padi nshikidilu au ulua, tuikalayi ne nsombelu wa “lungenyi luimpe” mu malu etu bamue ne bakuabu, mu mushindu utudi tutabalela mêku etu, ne mu majitu etu a pa tshibidilu. Mu dienza nunku, tuetu bonso tudi mua kuikala ne dieyemena dia se: nebatusangane ndekelu wa bionso ‘katuyi katoba, katuyi kalema, basombe mu bupole’!​—2 Petro 3:14, MMM.

[Mêyi adi kuinshi]

Malu a kuambulula

◻ Mmunyi mutudi mua kuleja “lungenyi luimpe” mu malanda etu nkayetu?

◻ Mmunyi mutudi mua kuleja nkatshinkatshi mu ditabalela majitu etu a mu dîku?

◻ Bua tshinyi baledi badi ne bua kutabalela malonga a mu bulongolodi ebu a bana babu?

◻ Mmalongesha kayi atudi tupetela kudi Baruke ne Yona?

[Tshimfuanyi mu dibeji 18]

Padi mulume ne mukaji bakengeshangana, badi banyanga malanda abu ne Yehowa

[Tshimfuanyi mu dibeji 20]

Baledi badi ne bua kutabalela malonga a bana babu