Bena nkristo ne bulongolodi bua bantu

“Tungunukayi ne kuenda ne meji kudi bena pambelu.”​—KOLOSAI 4:5, NW.

1. Ntshinyi tshiakamba Yezu pa bidi bitangila balondi bende ne bulongolodi ebu?

DIMUE edi pavuaye usambila Tatuende wa mu diulu, Yezu wakamba bua balondi bende ne: ‘Ba [“mu bulongolodi ebu,” NW] badi nabu lukuna, bualu bua buobu kabena ba [“mu bulongolodi ebu,” NW], bu mundi meme tshiyi wa [“mu bulongolodi ebu,” NW].’ Pashishe kusakidilaye ne: ‘Tshiena nkulomba ne: Ubumushe [“mu bulongolodi ebu,” NW]; ndi nkulomba ne: Ubasungile kudi bubi.’ (Yone 17:14, 15) Bena nkristo kabavua ne bua kuikala batapuluke ne bulongolodi abu ku mubidi nansha​—tshilejilu, pa kuikala baditole mu nzubu ya badiambike. Kadi, Kristo ‘wakabatuma munkatshi mua [“bulongolodi abu,” NW]’ bua kuikalabu bantemu bende “too ne mu tshitupa tshia buloba tshia kulekule.” (Yone 17:18; Bienzedi 1:8, NW) Tshidibi, wakalomba Nzambi bua kubakuba bualu Satana, “mukokeshi wa [“bulongolodi,” NW] ebu,” uvua ne bua kubajudila lukuna bua dîna dia Kristo.​—Yone 12:31; Matayo 24:9.

2. (a) Mmunyi mudi Bible utumika ne muaku “bulongolodi”? (b) Mmuenenu kayi wa nkatshinkatshi udi Yehowa uleja kudi bena mu bulongolodi ebu?

² Mu Bible muaku “bulongolodi” (tshiena-Greke: koʹsmos) pa tshibidilu udi ufunkuna nsangilu wa bantu mupange buakane, udi ‘mulale mu bukokeshi bua mubi.’ (1 Yone 5:19, NW) Bualu bena nkristo badi batumikila mêyi-makulu a Yehowa ne kabidi bateya ntema ku dîyi-dituma dia kuyisha lumu luimpe lua Bukalenge bua Nzambi kudi ba pa buloba, imue misangu kudi kuikale malanda a makeyikeyi pankatshi pabu ne bena mu bulongolodi ebu. (2 Timote 3:12; 1 Yone 3:1, 13) Nansha nanku, muaku koʹsmos mmutumika kabidi nawu mu Mifundu bua kuleja dîku dia bukua-bantu mu ka-bujima. Muikale wakula bua bulongolodi mu ngumvuilu eu, Yezu wakamba ne: ‘Nzambi wakatamba kusua ba [“mu bulongolodi ebu,” NW], yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele. Nzambi kakatuma Muana wende [“mu bulongolodi ebu,” NW] bua kulumbuluisha [“bulongolodi,” NW], kadi bua ba [“mu bulongolodi ebu,” NW] basungidibue kudiye.’ (Yone 3:16, 17; 2 Kolinto 5:19; 1 Yone 4:14) Nenku, nansha mudiye ukina bintu bidi mu ndongoluelu eu mubi wa Satana, Yehowa wakaleja dinanga diende bua bukua-bantu pa kutuma Muanende pa buloba bua kupandisha bonso badi ‘bafika ku dinyingalala.’ (2 Petelo 3:9, NW; Nsumuinu 6:16-19) Mmuenenu wa nkatshinkatshi wa Yehowa pa bidi bitangila bulongolodi ebu udi ne bua kulombola batendeledi bende.

Tshilejilu tshia Yezu

3, 4. (a) Mmuenenu kayi uvua Yezu muangate pa bidi bitangila bukokeshi? (b) Mmunyi muvua Yezu wangata bulongolodi bua bantu?

³ Katupa kîpi kumpala kua lufu luende, Yezu wakambila Pontio Pilato ne: ‘Bukalenge buanyi kabuena bua [“mu bulongolodi,” NW] ebu.’ (Yone 18:36) Mu diumvuangana ne mêyi aa, kumpala Yezu wakabenga pakasua Satana kumupesha bukokeshi bua makalenge a pa buloba, ne kavua muanyishe bua bena Yuda kumuvuija mukalenge. (Luka 4:5-8; Yone 6:14, 15) Pabi, Yezu wakaleja dinanga dikole bua bulongolodi bua bantu. Tshilejilu tshia dinanga edi tshivua tshifunda kudi mupostolo Matayo ne: ‘Pakatangilaye bisumbu bia bantu, wakadi nabu luse, bualu bua buobu bakadi batata, bakadi bamuangalake bu mikoko idi kayiyi ne mulami.’ Bua dinanga, wakayisha bantu mu bimenga ne mu misoko yabu. Wakabalongesha ne kuondapa malema abu. (Matayo 9:36) Uvua kabidi ne ntema ku bivuabu bakengela ku mubidi kudi aba bakalua kudiye bua kulonga. Tudi tubala ne: ‘Yezu wakabikila bayidi bende, kubambilaye ne: Ndi ne bantu luse, bualu bua buobu bakusomba nanyi matuku asatu, kabena ne tshiakudia; tshiena musue kubatuma ne nzala, kabayi kupanga mu njila.’ (Matayo 15:32) Ndiditatshisha kayipu dia dinanga!

⁴ Bena Yuda bavua batamba kuikala ne mmuenenu mibi bua bena Samariya, kadi Yezu wakakula mutantshi ne mukaji muena Samariya ne wakenza matuku abidi ufila bumanyishi bua tshishiki mu tshimenga tshia mu Samariya. (Yone 4:5-42) Nansha muakamutuma Nzambi kudi ‘mikoko mijimine ya nzubu wa Izalele,’ Yezu imue misangu uvua wenzaku tshintu kampanda bua mêyi a ditabuja a bantu bakuabu bavua kabayi bena Yuda. (Matayo 8:5-13; 15:21-28) Eyowa, Yezu wakaleja ne: kudi mushindu wa kubenga kuikala ‘mu bulongolodi’ ebu ne eku kuleja dinanga kudi bulongolodi bua bantu, anyi kudi bantu. Tudiku bia muomumue tuleja luse bua bantu badi muaba utudi basombele, tuenza mudimu, peshi tukasumba bintu anyi? Tudiku tuleja diditatshisha bua diakalenga diabu​—kabiyi anu bua bidibu bakengela mu nyuma kadi bua majinga makuabu kabidi pikalabi mu mushindu wa meji bikale ku bukokeshi buetu bua kuambuluisha anyi? Ke muakenza Yezu, ne mu dienza nenku, wakunzulula njila bua kulongesha bantu pa Bukalenge. Bulelela, katuena mua kuenza bishima biena dîna bu muakenza Yezu. Kadi tudi mua kuamba ne: pa tshibidilu tshienzedi kampanda tshia bulenga tshitu tshienza bishima mu ditshimuna ngenyi mibi mifuikakajila Bantemu.

Mmuenenu wa Paulo kudi bantu “bena pambelu”

5, 6. Mmunyi muvua mupostolo Paulo wangata bena Yuda bavua “bena pambelu”?

⁵ Mu mikanda yende mivule, mupostolo Paulo udi wakula bua bantu badi “pambelu” anyi “bena pambelu,” mmumue ne: badi kabayi bena nkristo, nansha buobu bikale bena Yuda peshi Bampangano. (1 Kolinto 5:12; 1 Tesalonike 4:12; 1 Timote 3:7, NW) Mmunyi muvuaye wangata bantu ba nunku? ‘Kudi [“bantu ba mishindu yonso,” NW] wakalua muena malu onso, bua yeye kumanya mua kusungila bakuabu ne ngenyi yonso.’ (1 Kolinto 9:20-22) Pavuaye ufika mu tshimenga kampanda, tshilejilu tshiende tshia diyisha tshivua tshia kuya diambedi kudi bena Yuda bavua basombelemu. Ntshinyi tshivua ngenzelu wende? Ne mbabi ne kanemu konso uvua ufila bijadiki bituishi bia mu Bible bivua bileja ne: Masiya ukavua mulue, mufue lufu lua mulambu, ne mubiishibue.​—Bienzedi 13:5, 14-16, 43; 17:1-3, 10.

⁶ Mu mushindu’eu Paulo wakatumika ne dimanya dia bena Yuda dia Mikenji ne baprofete bua kumona mua kubalongesha bua Masiya ne bua Bukalenge bua Nzambi. Ne wakafika ku ditabijija bamue. (Bienzedi 14:1; 17:4) Nansha muvuaku buluishi bua kudi balombodi bena Yuda, Paulo wakaleja dinanga bua binende bena Yuda pakafundaye ne: ‘Bana betu, disua dia mu mutshima wanyi ne dilomba dianyi kudi Nzambi bua bualu buabu [bena Yuda] bidi bua buobu bapete lupandu. Bua ndi mumanyi wa bualu buabu ne: Badi ne lukunukunu kudi Nzambi, kadi ki ndua [“dimanya dijalame,” NW].’​—Lomo 10:1, 2.

Diambuluisha bena kuitabuja bavua kabayi bena Yuda

7. Ntshinyi tshiakenza ba-prozelite bavule bua lumu luimpe luakayisha Paulo?

⁷ Ba-prozelite bavua bantu bavua kabayi bena Yuda bakavua balue balondi batengula ba ntendelelu wa Buena-Yuda. Kakuyi mpata, kuvua ba-prozelite balondi ba Buena-Yuda mu Roma, mu Antiokia wa ku Syrie, mu Etiopia, ne mu Antiokia wa ku Pisidia​—bushuwa, mu matunga onso menyi muvua bena Yuda batangalake. (Bienzedi 2:8-10; 6:5; 8:27; 13:14, 43; fuanyikija ne Matayo 23:15.) Bashilangane ne bakokeshi bavule bena Yuda, mbimueneke ne: ba-prozelite kabavua badiambi, ne kabavua mua kuditumbisha ne diambu bua dikala ndelanganyi ya Abrahama. (Matayo 3:9; Yone 8:33) Kadi, bakavua balekele nzambi ya bampangano pashishe ne budipuekeshi buonso batangile kudi Yehowa bua kupeta ndambu wa dimanya diende ne dia mikenji yende. Ne bakitaba ditekemena dia bena Yuda dia Masiya uvua ne bua kulua. Bamane kuleja dijinga diabu dia kushintuluka mu dikeba diabu dia bulelela, bavule ba munkatshi muabu bavua badiakaje bua kuenza mashintuluka a bungi ne kuitaba diyisha dia mupostolo Paulo. (Bienzedi 13:42, 43) Pavua prozelite uvua diambedi mutendelele nzambi ya bampangano witaba Buena-nkristo, mu mushindu wa pa buawu uvua mukumbane bua kufila bumanyishi kudi Bampangano bakuabu batshivua batendelela nzambi ayi.

8, 9. (a) Pa kumbusha ba-prozelite, nkasumbu kayi kakuabu ka Bampangano kavua kakokibue ku ntendelelu wa bena Yuda? (b) Ntshinyi tshiakenza batshinyi ba Nzambi bavule bavua kabayi batengula bua lumu luimpe?

⁸ Pa kumbusha ba-prozelite batengula, bakuabu bavua kabayi bena Yuda bakavua bakokibue ku ntendelelu wa Buena-Yuda. Wa kumpala mu bantu aba wakalua muena nkristo uvua Korneliyo, nansha muvuaye kayi prozelite, uvua ‘mutendeledi muakane, muikale utshina Nzambi.’ (Bienzedi 10:2) Mu diumvuija diende dia mukanda wa Bienzedi, Profesere F. F. Bruce wakafunda ne: “Bampangano ba nunku batu bababikila pa tshibidilu ne: ‘Batshinyi ba Nzambi’; nansha mudi tshiambilu etshi katshiyi tshiangata mu ngumvuilu mushidisha, tshiotshi ke tshidi tshikumbane bua kutumika natshi. Bampangano bavule ba mu matuku au, nansha muvuabu kabayi balongolola bua kulua bitabuji binenke ba Buena-Yuda (bualu-bulomba bua ditengula buikale bu dibue dia tshilenduishi dia pa buadi kudi bantu), bavua bakokibue kudi dilongesha dipepele kumvua dia Nzambi umuepele dia ntendelelu wa bena Yuda mu nsunagoga, ne kudi mêyi-makulu a nsombelu wa bena Yuda. Bamue ba munkatshi muabu bakabuela mu nsunagoga ne mu mushindu kampanda kufikabu ku dibidilangana ne masambila ne malongesha a mu Mifundu, avuabu bateleja dibala diawu mu nkudimuinu wa tshiena-Greke.”

⁹ Mupostolo Paulo wakapetangana ne Batshinyi ba Nzambi bavule pavuaye uyisha mu nsunagoga ya mu Azi Minere ne ya mu Grèce. Mu Antiokia wa ku Pisidia wakabikila aba bavua badisangishe mu nsunagoga bu ‘bantu ba Izalele, ne badi batshina Nzambi.’ (Bienzedi 13:16, 26) Luka udi ufunda ne: panyima pa Paulo mumane kuyisha mu nsunagoga matuku asatu a Nsabatu ku Tesalonike, ‘bakuabu [bena Yuda] bakitabuja [kuluabu bena nkristo], bakadisangisha ne Paulo ne Sila; tshisumbu tshinene tshia bena Greke bakadi [“batendelela,” NW] Nzambi ne bakaji ba butumbi ba bungi bakenza nunku kabidi.’ (Bienzedi 17:4) Pamu’apa, bamue ba munkatshi mua bena Greke bavua Batshinyi ba Nzambi kabayi batengula. Kudi tshijadiki tshia se: Bampangano bavule ba nunku bavua batantshila binsanga bia bena Yuda.

Diyisha munkatshi mua “badi kabayi bena kuitabuja”

10. Mmunyi muvua Paulo muyishe Bampangano bavua kabayi ne dimanya dia mu Mifundu, ne kuakapatuka tshipeta kayi?

¹⁰ Mu Mifundu ya tshiena-Greke ya Buena-nkristo, tshiambilu “badi kabayi bena kuitabuja” tshidi mua kuleja mu ka-bujima bantu badi pambelu pa tshisumbu tshia bena nkristo. Pa tshibidilu tshitu tshifunkuna bampangano. (Lomo 15:31; 1 Kolinto 14:22, 23; 2 Kolinto 4:4; 6:14, NW) Mu Atena bavule bavua kabayi bena kuitabuja bavua balonge nkindi ya bena Greke ne kabavua ne dimanya dia mu Mifundu nansha dikese. Ebi biakatekesha Paulo mu maboko bua kubenga kubayisha anyi? Tòo. Kadi wakakaja ngenzelu wende. Ne mbabi yonso wakumvuija ngenyi ya mu Bible kayi utela buludiludi Mifundu ya tshiena-Ebelu, ivua kayiyi mimanyike kudi bena Atena. Ne meji onso wakaleja difuanangana pankatshi pa bulelela bua mu Bible ne imue ngenyi ya bafundi ba tusala bena nkindi ya Stoiko. Ne wakumvuija lungenyi lua Nzambi umuepele mulelela bua bukua-bantu buonso, Nzambi walumbuluisha mu buakane ku diambuluisha dia muntu wakafua ne wakabiishibua. Nenku, ne mbabi yonso Paulo wakayisha bena Atena pa bidi bitangila Kristo. Tshipeta tshivua munyi? Nansha muvua bantu ba bungi bamuseke patoke peshi bikale ne mpata, ‘banga balume bakamulamata, bakitabuja; munkatshi muabu kabidi muakadi Dionusio, muena Aleopago, ne mukaji, dîna diende Damali, ne bakuabu [pamue] nabu.’​—Bienzedi 17:18, 21-34.

11. Kolinto uvua tshimenga tshia mushindu kayi, ne mudimu wa Paulo wa diyisha wakapatulamu tshipeta kayi?

¹¹ Mu Kolinto muvua tshinsanga tshinene tshia bena Yuda, nenku Paulo wakabanga mudimu wende kuine aku uyisha mu nsunagoga. Kadi pakabenga bena Yuda, Paulo wakaya kudi Bampangano. (Bienzedi 18:1-6) Ne mbantu kayi aba ba pa buabu! Kolinto uvua tshimenga tshikuatshila ku bianza, tshienza ne bantu ba miaba mivule ya pa buloba, ne tshia bungenda, tshivua tshiende lumu mu nsangilu wa bena Greke ne bena Roma bua nsombelu watshi wa buenzavi. Bushuwa, “Kuenza tshiena Kolinto” kuvua kumvuija kuenza buenzavi. Pabi, panyima pa bena Yuda bamane kubenga diyisha dia Paulo, Kristo wakamumuenekela ne kumuambila ne: ‘Kutshinyi; kadi amba . . . ; bua meme ndi ne bantu ba bungi mu musoko eu.’ (Bienzedi 18:9, 10) Kuenzekabi anu muakamba Kristo, Paulo wakajadika tshisumbu mu Kolinto nansha muvua bamue benamu kumpala bikale ne nsombelu wa “Tshiena kolinto.”​—1 Kolinto 6:9-11.

Tukebayi mua kupandisha “bantu ba mishindu yonso” lelu’eu

12, 13. (a) Lelu’eu mmunyi mudi teritware wetu mufuanangane ne wa mu matuku a Paulo? (b) Mmuenenu kayi utudi tuleja mu teritware mudi bitendelelu bia Bukua-buena-nkristo biele miji kukadi matuku a bungi, peshi mudi bavule bikale kabayi basankisha kudi bitendelelu binene?

¹² Lelu’eu, anu bu mu siekele wa kumpala, “bulenga bukena butuakanyine bua Nzambi . . . budi butuadila bantu ba mishindu yonso lupandu.” (Tito 2:11, NW) Teritware wa diyishila lumu luimpe mmualabale wangata kontina yonso ne bidiila bivule bia mbuu. Ne, anu bu mu matuku a Paulo, tudi tupetangana ne “bantu ba mishindu yonso.” Tshilejilu, bamue ba munkatshi muetu badi bayisha mu matunga mudi ekleziya ya Bukua-buena-nkristo miele miji kukadi siekele mivule. Anu bu bena Yuda ba mu siekele wa kumpala, benamu badi mua kuikala babasuike bikole kudi bilele bia ntendelelu. Nansha nanku, tudi ne disanka dia kukeba aba badi ne ngikadilu muimpe wa mu mutshima, kutumika ne dimanya kayi dionso dia mu Bible didibu nadi. Katuena tuyukila nabu ne kapeja anyi tubadiombola nansha bikala imue misangu bamfumu babu ba bitendelelu batuluisha ne batukengesha. Pamutu pa nanku, tudi tujingulula ne: bamue ba munkatshi muabu badi mua kuikala ne “lukunukunu kudi Nzambi” nansha buobu kabayi ne dimanya dijalame. Anu bu Yezu ne Paulo, tudi tuleja dinanga dia bushuwa bua bantu, ne tudi ne dijinga dikole dia se: bapande.​—Lomo 10:2.

¹³ Patudi tuyisha, bavule ba munkatshi muetu badi batuilangana ne bantu kabayi basankisha kudi bitendelelu binene. Kadi batshidi mua kuikala batshinyi ba Nzambi, bitabuja Nzambi mu bualabale kampanda ne bateta bua kuikala ne nsombelu mululame. Mu tshipungu etshi tshikonyangale ne mudi bantu bapidi ba Nzambi benda bavula, katuenaku mua kusanka bua kupeta bantu badi bitabuja Nzambi anyi? Ne katuenaku ne dijinga dia kubatangija ku ntendelelu udi kayi ne lubombo ne mashimi anyi?​—Filipoi 2:15.

14, 15. Mmunyi mudi budimi bualabale bua diyishila lumu luimpe bulue kumueneka?

¹⁴ Mu mufuanu wende wa kapamba ka nyunguluilu, Yezu wakadianjila kuamba ne: kuvua ne bua kuikala teritware munene bua mudimu wa diyisha. (Matayo 13:47-49) Mu diumvuija mufuanu eu, Tshibumba tshia Nsentedi tshia Kabalashipu 1992, tshiakamba mu dibeji dia 20 ne: “Mu kupita kua siekele mivule, bena mu Bukua-buena-nkristo bakenza mudimu wa bungi mu dikudimuna, ditentula ne diabanya dia Dîyi dia Nzambi. Pashishe ekleziya yakenza anyi yakambuluisha société ya Bible, yakandamuna Bible mu miakulu ya mu matunga a kulekule. Yakatuma kabidi ba-misionere buondopianganyi pamue ne balongeshi, bakavuija bantu bena nkristo bua bintu bia ku mubidi bia ba misionere aba. Yakasangisha mishipa mivule ivua kayiyi miakanyine, ivua kayiyi ne dianyisha dia kudi Nzambi. Kadi nansha nanku, bakafikisha miliyo mivule ya bavua kabayi bena nkristo ku dipetangana ne Bible ne mushindu kampanda wa Bukua-buena-nkristo, nansha muvuawu munyanguke.”

¹⁵ Divuija bantu bena kuitabuja dienza kudi Bukua-buena-nkristo didi dikale nangananga ne bipeta bimpe mu Amerike wa ku Sud, mu Afrike, ne mu bimue bidiila bia mbuu. Mu matuku etu aa, mbapete bena bupuekele bavule mu bitupa ebi, ne tudi mua kutungunuka ne kutamba kuenza bimpe bituikala ne mmuenenu muimpe ne wa dinanga kudi bantu bena bupuekele ba nunku’eu, anu muakenza Paulo bua ba-prozelite balondi ba Buena-Yuda. Munkatshi mua aba badi bakengela diambuluisha dietu mudi kabidi miliyo ya bantu batudi mua kubikila ne: “bapetshianganyi” ne Bantemu ba Yehowa. Misangu yonso batu ne disanka dia kutumona patudi tubakumbula. Bamue tudi balonge nabu Bible ne mbabuele mu bisangilu bietu, nangananga mu Tshivulukilu tshia ku tshidimu tshionso tshia lufu lua Kristo. Bantu ba nunku kabenaku bu budimi bualabale bua kuyishila lumu luimpe lua Bukalenge anyi?

16, 17. (a) Mbantu ba mishindu kayi batudi tuyila ne lumu luimpe? (b) Mmunyi mutudi tuidikija Paulo mu diyisha bantu ba mishindu mishilangane?

¹⁶ Kabidi, tuambe munyi bua aba badi bafumina mu nshidimukilu ya pambelu pa Bukua-buena-nkristo​—nansha bituabapeta mu matunga abu peshi bikale bu bena tshimuangi mu ditunga dietu? Ne mmunyi bua miliyo mivule eyi ya badi babenge malu a Nzambi ne muoyo mujima, balue bavidi peshi belakanyi bua dikalaku dia Nzambi? Kabidi, netuambe bishi bua aba badi mene batamba kuteya ntema ne lukunukunu bu lua mu malu a Nzambi ku nkindi ya buena lelu anyi ku ngenyi ya bantu mipatula mu mikanda mivule ya didilongela idi mu bisumbishidi bia mikanda? Tudiku ne bua kulengulula muntu nansha umue wa ku bantu aba, kumuangata bu udi kayi mua kupeta bupikudi anyi? Katuakuenza nunku bituikala tuidikija mupostolo Paulo.

¹⁷ Pavuaye uyisha mu Atena, Paulo kakapona mu buteyi bua dielangana mpata ya nkindi ne bateleji bende. Kadi, wakakaja ngelelu wende wa meji bilondeshile bantu bavuaye wakula nabu, uleja malelela a mu Bible mu mushindu mutoke ne wa meji. Bia muomumue, katuena ne bua kulua bapiluke mu malu a bitendelelu anyi mu nkindi ya bantu batudi tuyisha. Kadi, tudi tuakaja ngenzelu yetu bua kuvuija diyisha dietu dipatudi dia bipeta bimpe, nenku tulua ‘kudi [“bantu ba mishindu yonso,” NW] bena malu onso.’ (1 Kolinto 9:22) Mu difundila bena nkristo ba mu Kolosai, Paulo wakamba ne: “Tungunukayi ne kuenda ne meji kudi bena pambelu, pa kudisumbila tshikondo tshiakanyine buenu nkayenu. Dîyi dienu dikale dilenga misangu yonso, dituisha ne luepu, nenku bua kumanya munudi ne bua kufila diandamuna kudi muntu yonso.”​—Kolosai 4:5, 6, NW.

18. Mbujitu kayi butudi nabu, ne ntshinyi tshitudi katuyi mua kupuaku muoyo?

¹⁸ Anu bu Yezu ne mupostolo Paulo, tulejayi dinanga kudi bantu ba mishindu yonso. Tudienzejayi nangananga bua kuambila bakuabu lumu luimpe lua Bukalenge. Ku lunga luseke, katupu muoyo bua se: Yezu wakamba bua bayidi bende ne: “Kabena ba [“mu bulongolodi ebu,” NW].” (Yone 17:16) Netumone kabidi tshidi muanda eu umvuija buetu tuetu mu tshiena-bualu tshidi tshilonda.

Bua kuambulula

◻ Umvuija mmuenenu wa nkatshinkatshi wa Yezu pa bidi bitangila bulongolodi ebu.

◻ Mmunyi muvua mupostolo Paulo muyishe bena Yuda ne ba-prozelite?

◻ Mmunyi muvua Paulo uyukila ne batshinyi ba Nzambi ne bantu bavua kabayi bena kuitabuja?

◻ Mmunyi mutudi mua kuikala ‘bena malu onso kudi bantu [“ba mishindu yonso,” NW]’ mu mudimu wetu wa diyisha?

[Bimfuanyi mu dibeji 10]

Mu dienzela bena mutumba nabu malu ne bulenga, bena nkristo batu mua kutshimuna ngenyi mibafuikakajila