Mandamuna ku nkonko yenu

▪ Mbiakanyine bua kukuma bikashi padibu bamanyisha dipingana dia muntu uvuabu bipate mu tshisumbu anyi?

Bua bulenga buende bua muoyo, Yehowa Nzambi mmuleje mu Mifundu mushindu udi benji ba mpekatu badi bayilekela mua kuanyishibua tshiakabidi kudiye ne kupingana mu tshisumbu tshia bena Kristo. (Mus. 51:12, 17) Padi bualu bua nunku buenzeka, tudi ne bua kuleja ne muoyo mujima dinanga kudi bantu aba badi balekele malu mabi.​—2 Kol. 2:6-8.

Nansha mutudi ne disanka dia bungi bua mulela wetu kampanda peshi nyanetu udibu bapingaje mu tshisumbu, katuena ne bua kuenza mitoyi anyi kuela tunkunduluila dîba didibu bamanyisha dipingana dia muntu eu mu tshisumbu to. Tshibumba tshia Nsentedi tshia dia 1 Kasuamansense 1998, mu dibeji dia 17, tshiakumvuija malu mushindu eu: “Kadi tudi ne bua kuvuluka ne: bantu ba bungi mu tshisumbu ki mbamanye nsombelu misunguluke idi mifikishe ku dipata muntu anyi ku dimupingaja mu tshisumbu nansha. Kabidi, kudi mua kuikala bamue bavua bikale babungamija anyi batapa mputa ku muoyo​—pamu’apa mene wa matuku a bungi—​kudi bubi bua muntu eu munyingaladi. Nenku tuetu bimanyine pa malu aa, mbimueneke bua se: padibu benza dimanyisha dia dipingaja muntu eu mu tshisumbu, netudikande bua kumuakidila anu too ne pasua muoyo wetu.”

Nansha tuetu ne disanka bualu muntu eu wapinganyi mu bulelela, ki mbiakanyine bua kukuma bikashi dîba didibu bamanyisha dipingana diende mu tshisumbu to.