Bua tshinyi tudi ne bua kutungunuka ne kuyisha?

¹ Kukadi bidimu bia bungi bidi mudimu wa diyisha Bukalenge wenzeka muaba unudi basombele anyi? (Mat. 24:14) Bikalabi nanku, udi mua kumona ne: bakadi bayishe bajikije teritware wa tshisumbu tshienu yonso nkong. Mpindieu paudi uyisha, pamu’apa bantu ba bungi baudi upetamu badi bamueneka bu badi kabayi banyisha mukenji wa Bukalenge eu to. Nansha bikale nanku, tutangilayi tshidibu batumvuija bua bidi bitangila bayidi balelela ba Yezu mu mukanda wa La Prophétie d’Isaïe II, dibeji dia 141 ne: “Mu imue miaba, bipeta bia mudimu wabu wa diyisha bidi mua kumueneka bu kabiyi bia nsongo patudi tubifuanyikija ne bungi bua mudimu wakakuatabu ne mushindu wakadifilabu mu mudimu au. Kadi, bakatantamana anu kutantamana.” Mpindieu, bua tshinyi tudi ne bua kutungunuka ne kuyisha?

² Tuvulukayi tshivua Yelemiya muenze: Dinanukila dietu ne lulamatu luonso mu mudimu wa diyisha kadiena ne bua kuikala dilonda anu mudi bantu banyisha bua kututeleja anyi babenga to. Yelemiya uvua muyishe bidimu makumi anayi bijima muaba umue umue nansha muvua anu bantu bakese patupu bamuteleje ne ba bungi babenge bua kumuteleja. Bua tshinyi Yelemiya wakananukila ne diyisha? Bualu uvua wenza mudimu uvua Nzambi mumutumine dîyi bua kuenza. Kabidi bu muvuaye mumanye tshivua ne bua kulua kuenzeka, bionso abi bivua bimusaka bua kutungunukaye ne mudimu wa diyisha.​—Yel. 1:17; 20:9.

³ Nsombelu utudi nende lelu udi bu wa mu tshikondo atshi. Yezu “wakutupa mukenji bua kuambila bantu bualu buende ne kumanyisha ne yeye ke udi [Nzambi] mujadike bua kulumbuluisha badi ne muoyo ne bafue.” (Bien. 10:42, MML) Malu atudi tuyisha bantu ntshilumbu tshia lufu apa muoyo apa. Nenku, bantu nebapete difutu diabu bilondeshile mushindu wangatabu lumu luimpe ludibu bumvua. Bu mudibi nanku, bujitu butudi nabu mbua kuenza menemene anu mudibu batuambile bua kuenza. Nansha bantu babenga bitudi tubambila, bidi bitupesha mushindu wa kubaleja ne: tshia bushuwa tudi babanange bikole ne kabidi tudi balamate Yehowa pa kusuminyina ne kuenza tshionso tshitudi ne bua kuenza. Kadi kudi malu makuabu a bungi.

⁴ Tudi tupeta dibenesha: Kuenza disua dia Nzambi, nansha mu teritware mudi bantu batuteleja ta kabayi batuteleja kudi kutupesha ditalala mu mutshima wetu, kutupesha kabidi disanka dia bungi menemene ditudi katuyi mua kupeta mu mishindu mikuabu. (Mus. 40:8) Muoyo wetu newikale ne tshipatshila tshilelela. Patudi tutamba kuyisha, mitshima yetu ne ngenyi bidi bishala bishindamene anu pa ditekemena dietu ne disanka dia kuikala ne muoyo mu bulongolodi bupiabupia bua Nzambi. Kuelangana meji bua malaya a mu Bible aa kudi kutukolesha mu nyuma, kulengeja kabidi malanda etu ne Yehowa.

⁵ Nansha tuetu katuyi bamone diakamue bipeta bimpe mu mudimu wetu wa diyisha, lutete lua bulelela ludi mua kuikala lukuna mu mutshima wa muntu ludi mua kulua kutoloka mu tshikondo tshidi Yehowa mujadike. (Yone 6:44; 1 Kol. 3:6) Kakuena muntu nansha umue udi mumanye bungi bua bantu bikala ne bua kulua kumanya lumu luimpe lua Bukalenge ludi bantu ba Yehowa bamanyisha bantu ba muaba utudi anyi ba pa buloba bujima to.

⁶ Tudi ne bua kuteya ntema mikole mipitshidile ku dîyi dia Yezu dia ne: ‘Nuikale badimuke, nutabale, bualu kanuena bamanye diakumbana tshikondo atshi. Tshindi nnuambila, ndi ntshiambila kabidi bantu bonso ne: nuikale batabale!’ (Mâko 13:33, 37, MMM) Nunku, tutungunukayi ne kuyisha lumu luimpe lua Bukalenge, tusankishe mutshima wa Yehowa pa kudifila muetu muonso mu mudimu eu wa ditumbisha dîna diende dinene ne dinsantu.