Mpungilu wa Distrike wa Bantemu ba Yehowa wa “Tuendayi ne Nzambi” bua tshidimu tshia 2004
1 Buebe wewe ntshinyi tshitu tshienza bua mpungilu yetu ya distrike ya ku tshidimu ikale ya pa buayi? Mmiyuki milenga ne dinaya dia drama bitulongololuela kudi “mupika wa lulamatu ne wa budimu” anyi? (Mat. 24:45-47, NW) Mmikanda mipiamipia idi ne biakudia bia mu nyuma bifila mu tshikondo tshiabi anyi? Mbana betu ba balume ne ba bakaji badi batulondela malu abu a mudi Bible mushintulule nsombelu wabu, mulue mulenga anyi? Nduapolo lua didiunda dia mudimu wa diyisha Bukalenge ya mu matunga makuabu anyi? Nkudisangisha ne bana betu bananga ba bidimu bionso anyi? Eyowa, tudi bindile mpungilu yetu ne muoyo kuulu kuulu bua malu atudi batele aa ne bua makuabu a bungi kabidi!
2 Tuikalemu matuku onso asatu: Yehowa wakatuma dîyi mukana mua Mose ne: ‘Nusangishe bantu bonso bua buonso buabu bumvue ne bayile lungenyi.’ (Dut. 31:12) Ku butuangaji bua kasumbu ka mupika wa lulamatu ne wa budimu, Yehowa mmutulongoluele dilongesha dilenga mu matuku onso asatu a mpungilu wetu. Bu mudiye utulongesha bua ‘diakalengele dietu,’ nanku mbimpe tuikalamu bua kuteleja dilongesha edi. (Yesh. 48:17) Wewe musue kulomba mfumuebe wa mudimu dikisha, anji sambila Yehowa, nunku wewe muenze nunku udi ulonda tshilejilu tshia muoyo mukole tshia Nehemiya. (Neh. 1:11; 2:4) Kabidi, kuoku mushindu udi mua kumanyisha bena dîku dienu badi kabayi Bantemu kumpala kua dîba bua mpungilu eu unuikala nende.
3 Miaba ya dilala: Pa tshibidilu miaba ya dilala itu imueneka mu nzubu ya bana betu, mu Nzubu ya Bukalenge anyi kudi balela betu. Kunyima kua nuenu bamane kukonkonona tshisakidila etshi mu Tshisangilu tshienu tshia Mudimu, nebalamike liste wa miaba yenzekela mpungilu ku tablo wa mamanyisha. Tudi tulomba bantu bonso kua kuela meji bimpe bua kusungula muaba wikalabu ne bua kubuelela mu mpungilu wa tshidimu tshia 2004. Wewe musue bua kusombela ku nzubu wa muanetu kampanda anyi ku Nzubu wa Bukalenge, tudi tulomba bua sekretere wa tshisumbu tshienu kuenza liste wa bana betu bonso badi bajinga ba babakebela muaba wa kulala kumpala kua dîba ne pashishe kutuma liste eu kudi bena Tshibambalu tshia miaba ya kulala tshia muaba wikala mpungilu ne bua kuenzekela. Udi ne bua kufunda dîna, kuleja ne: mmulume anyi mmukaji, bungi bua bidimu bia muntu au ne malela adiye nau nende. Kuenza nunku nekuambuluishe bana betu badi mu Tshibambalu etshi bua kupeta dîba dia kukebela buonso miaba ya dilala. Buobu bamane kutupesha muaba wa kulala, kabiakuikala bilenga bua kushintulula kabidi, kuya kusombela muaba utudi tuetu basue kua muanetu mukuabu anyi kua mulunda wetu to. Kuenza nanku au nekuvudijile bena mu Tshibambalu tshia miaba ya kulala mudimu wa bungi tshianana. Kadi, bikala muntu yeye musue kuya kusombela kua mulela wende udi kayi Ntemu wa Yehowa mu matuku a mpungilu, kabena ne bua kufunda dîna diende bua kudituma ku Tshibambalu tshia malu a benyi to.
4 Miaba ya kulala ku Nzubu wa Bukalenge: Tudi tunuleja tshia kuenza pa mushindu wa kuladika bantu ku Nzubu wa Bukalenge. Komite wa Mpungilu wa Distrike neateke mukulu kampanda bua kutangila muanda eu. Neikale ne muntu udi umuambuluisha, nangananga mukulu mukuabu anyi musadidi wa mudimu udi mupie mu nyuma. Nzubu eu ng’wa kuabanya mu bitupa bibidi. Luseke lumue, bua bana betu ba bakaji ne bana, kabidi ne bansongakaji, lukuabu bua bana betu ba balume. Nzubu wa Bukalenge neikale anu bua dilala patupu. Munda munya, padi bantu bonso bapatuka baya muaba wa mpungilu, nebalongolole bua kuikale balami bashintulukangana bua kabalu kuiba bintu kuntu aku to. Bana betu ba balume ba malu malenga ne bakole mu nyuma ke badi mua kuenza mudimu wa dilama bintu eu. Kabena ne bua kuipikila munda mua Nzubu wa Bukalenge nansha. Nudi mua kuasa kasasa ka lukasa lukasa kikala mua kuambuluisha bua kuikala kulambilamu anu bua tshikondo tshia mpungilu atshi nkayatshi. Padi mpungilu ujika, nupule kasasa aka. Nulame mu lupangu ne munda mua Nzubu wa Bukalenge ne mankenda. Nuenze muenu muonso bua kanunyangi tshintu nansha tshimue. Bana betu basombela ku Nzubu wa Bukalenge nebenze muabu muonso bua kuikala ne bienzedi bidi bikumbanyine bena Kristo balelela munkatshi muabu kabidi ne kudi bantu badi ku mutumba.—1 Kol. 10:31.
5 Mupostolo Paulo wakavuluija bena mu tshisumbu tshia Galatia bua ‘kuenzela bantu bonso bimpe, kadi kutamba kuenzela bena dîku dia bena kuitabuja bimpe.’ (Gal. 6:10) Bana betu bakadi bakulakaje, badi balema, bapele anyi aba badi mu mudimu wa ku dîba ne ku dîba badi mua kumvua bundu bua kunulomba diambuluisha, kadi badi mua kuikala ne ntatu kampanda idibu baluangana nayi bua kumona mua kubuela mu mpungilu. Udiku ne mushindu wa ‘kubenzela malu mimpe’ ne kubambuluisha anyi? Nangananga balela babu badi bena Kristo ne bakulu ba tshisumbu ke badi ne bua kutamba kutangila tshilumbu tshia bantu badi ne dijinga dia nunku.
6 Mbalongolola malu mushindu’eu anu bua bamanyishi badi ne ngikadilu mulenga ne bana babu ba tshikadilu tshilenga kabidi. Bikala bena mu Tshibambalu tshia miaba ya kulala ne nkonko pa bidi bitangila badi balomba bua babakebela muaba wa kutudila, badi mua kumonangana ne sekretere wa tshisumbu tshia bana betu aba.
7 Mu mpuilu kampanda wakenza bantu ba Yehowa kukadi bidimu bitue ku 2 500 lelu, Ezela ne bena Lewi nende bakuabu bakabala Dîyi dia Nzambi ne kudiumvuija bantu bavua basangile mu mpuilu au. Ntshinyi tshiakenzeka? Nehemiya 8:12 udi utuambila ne: ‘Bantu bonso bakaya bua kusankabu, bualu bua bobu bakajingulula mêyi akabambilabu.’ Tudiku petu ne disanka bushuwa bua mudi kasumbu ka mupika muela manyi, anu bu Ezela ne bena Lewi, bakuata mudimu ne Dîyi dia Nzambi, badiumvuija ne batuleja mushindu utudi mua kuditumikila mu nsombelu wetu anyi? Padi mupika wa lulamatu wenza nunku, udi uleja dinanga dilelela didi Yehowa nadi bua bantu bende bonso ne mushindu udiye uditatshisha bua bualu buabu. Difundileku tshipatshila tshia kuikala mu mpungilu wetu wa distrike wa “Tuendayi ne Nzambi” matuku onso asatu kuyi upumbisha dituku nansha dimue.
8 Mudimu wa bena budisuile: Basadidi ba lulamatu ba Yehowa badi misangu yonso baleja lungenyi lua didifila pa kuitaba ne kuenza mudimu wa bena budisuile. Tshilejilu, pavua mushindu mumueneke bua kuikala bu mutuadi wa mukenji wa Nzambi, muprofete Yeshaya wakitaba diakamue ne: ‘Ke meme eu, untume meme.’ (Yesh. 6:8) Kulongolola mpungilu kutu kulomba dîba ne makanda a bungi. Bena bisumbu bia muaba udibu benzela mpungilu nebitabe bua kuandamuna ku lubila ludibu bela bakeba bana betu badi mua kuenza mudimu wa bena budisuile. Nangananga bakulu ne basadidi ba mudimu ke badi ne bua kufila tshilejilu tshilenga mu muanda eu. Dinanga dietu bua Yehowa Nzambi, bua ntendelelu wende mukezuke ne bua bana betu didi ne bua kutusaka bua tuetu kudifila petu. Batu bamba mu kasumuinu ne: “Nkunde ya bangi ibobele ne mata.”
9 Tudifilayi mu mudimu wa budisuile: Dîba didi mpungilu wenzeka, bena budisuile nkama mivule batu bambuluisha mu midimu ya bungi kabayi bikisha. Bakididianganyi ne basadidi badi ku miaba ya dimanyikila mashinyi ta makalu batu balombola bantu pa miaba ya kusomba ne babatangidila mashinyi anyi makalu abu muaba udibu bayimanyikile. Tshibambalu tshia mankenda tshidi tshienza bua lumu ludi lutuendele lua ne: tutu bantu bena mankenda luye kule. Nunku bena tshibambalu etshi benze muabu muonso bua muaba wetu utudi tuenzela ntendelelu bua matuku makese eu ushale ne mankenda kupita mutuvua bausangane. Tudiku mua kuambuluisha tshibambalu etshi ta bikuabu bidi mua kuikala netu dijinga anyi? Neudifileku ku budisuile bua kuenza mudimu “mu buobumue” pamue ne bana betu bakuabu anyi?—Sef. 3:9, MMM.
10 Bu mudi ‘tshimuenekelu tshia panu tshipita,’ tudi dijinga ne mpungilu wetu wa distrike bua kutuambuluishaye bua kushala batuishile mêsu etu pa bintu bia mu nyuma. (1 Kol. 7:31, Mukenji Mulenga) Bushuwa kudilongolola bua kuikalamu matuku onso asatu kudi kulomba makanda a bungi, kadi ke tshidi tshikengela kuenza. Mpungilu wa distrike wa “Tuendayi ne Nzambi” udi mulongolola bua tshidimu etshi mmuenza bua kutuambuluisha bua kushala bimane tendee patudi bindile kabutu ka Yehowa bua kalue kubutula malu a Satana aa. Nunku katuanyishi bua tshintu nansha tshimue tshitupangishe bua kuteleja dilongesha didi Yehowa mutulongoluele nansha.—Yesh. 51:4, 5.
[Kazubu mu dibeji 3]
Ndongamu
Ditanu ne Disambombo
9:30 mu dinda - 5:10 mu mapingaja
Dia lumingu
9:30 mu dinda - 4:05 mu mapingaja.
[Kazubu mu dibeji 4]
Mua kudilongolola bua kubuela mu Mpungilu wa Distrike wa “Tuendayi ne Nzambi”
1. Biwikala ne bua kuenza luendu lule bua kubuela mu mpungilu, utuadije kulama makuta a biakudia ne a njila bua dîku diebe bituadije ku mpindieu.
2. Uvuluke kabidi mapa a budisuile a kufila bua dilongolola dia mpungilu. ‘Kumueneki ku mêsu kua Yehowa bianza bitupu to,’ kadi ‘umutumbishe ne biuma biebe.’—Dut. 16:16; Nsu. 3:9.
3. Netuikale mua kutumbisha dîna dia Yehowa bituikala ne bienzedi bimpe ne mvuadilu mulenga wa mankenda dîba dia mpungilu.—1 Kol. 10:31.
4. Udilongolole bua kulonda tshidi bana betu badi benza mudimu wa diakidilangana bakulomba. Kukuatshi miaba ya kusomba tshianana tshianana to. Kadi udi mua kuyilamina anu bena dîku dienu anyi bantu baudi muende nabu.
5. Mêba a dikisha, kanudi biakudia bipite bungi to, bualu bidi mua kulua kunupangisha bua kuteleja ndongamu wa mu mapingaja bimpe. Nuamanya, diukuta ditu difila tulu.—Luka 8:18.
6. Mankenda atu apa Yehowa lumu. Ku ndekelu kua tshitupa tshionso, muntu yonso neangule mabeji ne bintu bikuabu bia bukoya ne neabiele miaba mibilongoluela bua muaba wa mpungilu kushalawu ne mankenda.—1 Pet. 1:15, 16.