Tuambuluishayi badi badiakaje bilenga
1. Mbanganyi badi Yehowa usangisha kudiye lelu eu?
1 Muntu yonso eu utu ne ende malu atu mele miji majame mu mutshima wende wa mu tshimfuanyi. (Mat. 12:35) Bible udi wakula bua badi ne ‘mvita mu mutshima.’ (Mis. 55:21) Bamue batu ‘bena tshiji tshia lukasa.’ (Nsu. 29:22) Kadi kudi kabidi bantu bakuabu ‘badiakaje bua muoyo wa tshiendelele.’ (Bien. 13:48, NW) Mu matuku etu aa, Yehowa udi usangisha kudiye bantu badi badiakaja aba kudiye. (Hag. 2:7) Mmunyi mutudi mua kubambuluisha bua kuluabu batendeledi ba Yehowa?
2. Nntshinyi tshidi tshikengedibua bua kuvuija bantu bayidi?
2 Tuenzayi makumbula mapiamapia: Kuikala ne lungenyi luimpe pa bidi bitangila dienza makumbula mapiamapia kudi ne mushinga bua kukumbaja tshipatshila tshia mukenji wetu wa divuija bantu bayidi. (Mat. 28:19, 20) Tutuku kakuyi dijingakana tupinganyina muntu yonso uvua umueneka ne nyota ya kumanya bulelela anyi? Tutuku tupinganyina kabidi bantu buonso badi bitaba bua kushala ne mikanda itudi tubapesha anyi badi baleje dianyisha bua lumu luimpe anyi? Tutuku tutungunuka ne kuenza madikolela bua kubambuluisha bua kukolabu mu nyuma anyi? Bu mudi mioyo ya bantu mu njiwu, tudi ne bua kuenza bua nyota yonso ya kumanya bulelela idi muntu uleja kayijiminyi to.
3. Ntshinyi tshidi tshikengela kuenza kunyima kua tuetu bamane kuyukila ne muntu mu buambi?
3 Patshidi muyuki utuvua benze ne muntu uvua musankidile bulelela mu lungenyi luetu, mbimpe tuetu kufunda dîna diende ne adrese wende katuyi tujingakana. Funda bualu bunudi bakuile, mvese yonso unudi babale ne mukanda uudi mumushile. Udifundila tshipatshila tshia kupinganyina muntu eu ne lukasa luonso.
4. Mmunyi mutudi mua kuenza makumbula bimpe?
4 Mua kuenza makumbula: Paudi upinganyina muntu, mbimpe kuikala ne musangelu ne mpala wa disanka ne kabidi kuleja ne: udi uditatshisha bua bualu buende. Muyuki wenu wikale mupepele ne muimanyine mu Mifundu Minsantu. Longolola biena-bualu bidi bisankisha bia mu Bible bua kuyukila ne muntu eu, ne ku ndekelu kua diyuki dienu, jula lukonko lua kuandamuna musangu walua. Bidi bikengela kuepuka makokangana pa malongesha adi kaayi a mu mukanda wa Nzambi adi muntu eu mua kujula. Keba bua nuanji kuakuila pa malu anudi nuenu buonso nuitaba.—Kolos. 4:6.
5. Mmadikolela kayi akenza mpanda-njila kampanda, ne akapatula bipeta kayi?
5 Kuenza makumbula kudi kulomba madikolela, kadi bipeta biudi mua kupeta bidi bisankisha bikole. Mpanda-njila mukuabu wa mu ditunga dia Japon wakadifundila tshipatshila tshia kuenza makumbula a bungi ku ngondo yonso. Wakabanga ne kufunda malu onso adi atangila bantu bavuaye uyukila nabu ku nzubu ne ku nzubu, ne pashishe kumpala kua lumingu kukumbanalu, uvua ubapinganyina kabidi. Uvua ulongolola bionso bivuaye ne bua kuamba ne upatuka mu mudimu mumanye bimpe malu onso avuaye ne bua kuamba. Mu dimue dia ku makumbula aa, wakatuadija kulonga ne muntu kampanda uvua muambe ne: “Ntu ne tshibidilu tshia kunuipatshila anu ku tshibi. Kadi eu ke musangu wa kumpala undi nganyisha bua kuyikila nenu.” Dinanukila dia mpanda-njila eu ne dinanga dionso diakapatula bipeta bimpe. Ku ndekelu kua ngondo au, wakafila luapolo ne malonga a Bible dikumi majima.
6. Bua tshinyi tudi ne bua kutungunuka ne kuenza makumbula?
6 Nsombelu ya bantu idi yenda anu ishintuluka. (1 Kol. 7:31) Pa tshibidilu bitu bilomba bua kupinganyina muntu misangu ya bungi bua kushisha kumusangana ku nzubu. Patudi tuenza makumbula ne muoyo mujima, tudi tuambuluisha bantu badi badiakaje bua kuendelabu mu njila wa muoyo wa tshiendelele.—Mat. 7:13, 14.