Padi bantu kabayi kumbelu
1. Ndutatu kayi lutudi tupeta patudi tuyisha ku nzubu ne ku nzubu?
1 Bidi bienda bikola miaba ya bungi bua kupeta bantu ku mabu. Mu “matuku makole” aa, bantu ba bungi badi ne bua kuenza mudimu mêba a bungi bua kumona mua kupetaku bidibu nabi dijinga. (2 Tim. 3:1) Bakuabu badi baya mu bisalu anyi baya kuendakana bua kujikija mukodi. Mmunyi mutudi mua kuyisha bantu aba lumu luimpe?
2. Tudi mua kuenza tshinyi bua kuyisha bantu badi kabayi kumbelu?
2 Funda malu bimpe: Bualu bua kumpala bua kuenza nkufunda adrese ya ku nzubu ya bantu batudi katuyi basangane ku nzubu. Bitu bimpe kufunda malu aa nangananga biwikala uyisha mu teritware webe bikole. Ukadi mufundapu dîna dia njila anyi musesu, nimero ya teritware, dîna diebe ne matuku a ngondo anyi? Udi mua kushiya kaba ka kufunda malu makuabu dîba diudi wewe anyi muanetu mukuabu uya bua kutangila bantu bauvua kuyi mupete kumbelu. Paudi ujikija teritware, vuluka bua kupesha muntu udi utangila malu a teritware kabeji aku. Bua wewe kushala ne kabeji aka anu yeye muitabe bua uya kutangila bantu bavua kabayi ku nzubu. Funda mu kabeji kakuabu bantu bonso bavua bakuakidile bimpe bua umone mua kubapinganyina.
3. Tela amue malu atudi mua kuenza bua kuyisha bantu batuvua katuyi bapete.
3 Teta kupingana dîba dikuabu: Pamuapa bantu bauvua kuyi mupete munkatshi mua lumingu, udi mua kubapeta ku dilolo anyi mu Disambombo ne mu Dia lumingu. Udiku ne mushindu wa kuya mêba audi mua kubapeta anyi? (1 Kol. 10:24) Wewe kuyi ne dîba, udi mua kupesha muanetu mukuabu udi mua kuikala ne mushindu kabeji ka bantu bauvua kuyi musangane bua aye kubatangila mêba makuabu. Anyi udi mua kufundila bantu aba mikanda anyi kubabikila ku telefone. Bana betu badi kabayi ne mushindu wa kuyisha ku nzubu ne ku nzubu bua masama, badi mua kukuambuluisha bua kuyukila ne bantu ku mikanda anyi ku nshinga.
4. Mbualu kayi budi buleja mushinga wa kupinganyina bantu batuvua katuyi bapete ku nzubu?
4 Mona tshilejilu tshia mudibi bikengela kupinganyina bantu bavua kabayi ku mabu. Bana betu bakenza bidimu bisatu bijima kabayi basangana muntu ku nzubu kampanda to. Kadi dimue edi nunku e kupetabu muenaku. Mamu au wakabambila ne: bidimu bionso bisatu abi uvua anu muindile bua Bantemu balue kumutangila bua kutungunuka ne dilonga dia Bible dikavuaye mutuadije kumpala kua yeye kulua kubuela ku nzubu aku.
5. Tudi mua kuamba ne: muntu mmujikije teritware wende dîba kayi?
5 Yisha mu teritware webe mujima: Ndîba kayi ditudi mua kuamba ne: muntu mmujikije teritware wende mujima? Ndîba didiye muenze muende muonso bua kuyisha nansha muntu umue wa ku nzubu yonso wa mu teritware wende. Bidi mua kuikala bimpe kushila muntu utudi katuyi basangane kumbelu trakte anyi tshibejibeji tshia kale muaba udi bapitshi ba njila kabayi babimona, nangananga bua teritware ututu katuyi tutamba kuyisha. Teritware udi ne bua kujika mu ngondo inayi. Udi ne bua kumanyisha muntu udi utangila malu a teritware pa lukasa bua kufunda malu aa mu dibeji diende dia teritware ya tshisumbu.
6. Tudi ne bua kuditatshisha bua kuyisha muntu yonso wa mu teritware wetu lumu luimpe bua tshinyi?
6 Tudi basue bua bantu ba bungi bapete mushindu wa kulonga mua kubila dîna dia Yehowa ne kusungidibua. (Lomo 10:13, 14) Ku bantu aba kudi aba batudi tupangila dîba ditudi tuyisha ku nzubu ne ku nzubu. Anu bu mupostolo Paulo, kipatshila kebe kikale ka ‘kumanyisha bantu lumu luimpe lua ngasa wa Nzambi bikole.’—Bien. 20:24.